အခန်း ၂၂

အပိုင်း ၂၂

[Host ၊ ငါတို့ အဆင့် ၂ ကို မြှင့်တင်ဖို့ လုံလောက်တဲ့ စွမ်းအင်တွေ ရပြီ! ငါ အဆင့်မြှင့်တင်တာကို စတင်တော့မယ်။ ငါပြန်လာတဲ့အခါ၊ မင်းဟာ ပိုပြီး အစွမ်းထက်တဲ့ ‌‌တော်ဝင်လုပ်ကြံမှုစနစ် အသစ်နဲ့ တွေ့ရလိမ့်မယ်။ "သုံးရက်လောက် မတွေ့ရရုံနဲ့ အသစ်အဆန်းတွေ ဖြစ်သွားစေရမယ်"—စောင့်ကြည့်နေလိုက်!]

ဤသို့ ရဲဝံ့စွာ ကြေညာပြီးနောက်၊ ‌‌နန်းတွင်းလုပ်ကြံမှုစနစ်သည် အဆင့်မြှင့်တင်ရန်အတွက် ပျော်ရွှင်စွာဖြင့် ပျောက်ကွယ်သွားခဲ့သည်။

ယွီမြောင်ဟွာ၏ စိတ်ထဲမှ တောက်ပနေသော အလင်းရောင်မှာ မှိန်သွားပြီး၊ အမြဲတမ်း စကားပြောနေသည့် အသံမှာလည်း တိတ်ဆိတ်သွားခဲ့သည်။

စနစ်မှာ အဆင့်မြှင့်တင်နေပြီဖြစ်ကြောင်း သူမ သိလိုက်သည်။ နှစ်ဝက်လောက် အမြဲတမ်း အတူရှိနေခဲ့ပြီးနောက်၊ ရုတ်တရက် ပျောက်ကွယ်သွားခြင်းမှာ သူမကို တစ်မျိုးကြီး ဖြစ်သွားစေသည်။

ပိုပြီး အရေးကြီးတာက၊ စနစ်ဟာ မပျောက်ကွယ်ခင်မှာ သူမအတွက် လမ်းကြောင်းတစ်ခုမှ ချန်မထားခဲ့ခြင်းပင်—သုံးရက်တိတိ သူမ ကာတွန်းတွေ ဖတ်လို့ရတော့မည် မဟုတ်ပေ!

ဇိမ်ခံနေရရာမှ ရုတ်တရက် ချွေတာရသည့်ဘဝသို့ ပြန်ရောက်သွားရသည်မှာ အလွန်ပင် ခက်ခဲလှသည်။

ယွီမြောင်ဟွာသည် သူမ၏ အင်တာနက် စွဲလမ်းမှုမှ အတင်းအကျပ် ဖြတ်တောက်ခံလိုက်ရသကဲ့သို့ ခံစားရသဖြင့် သူမ၏ စိတ်အခြေအနေ ညစ်နွမ်းသွားခဲ့သည်။

သို့သော်လည်း ချွေ့ဝေနှင့် အခြားသူများက သူမ၏ ရာထူးတိုးခြင်းအတွက် ပျော်ရွှင်နေကြသည်ကို မြင်သောအခါ၊ သူမ၏ နှုတ်ခမ်းတွင် အပြုံးတစ်ခု ပေါ်လာခဲ့သည်။ "ဒီလမှာ လူတိုင်းကို သုံးလစာ အပိုဆုကြေး ပေးမယ်" သူမ ကြေညာလိုက်သည်။

ယခင်က အဆင့် ၁ အစေခံ နှစ်ဦးသာ ထားခွင့်ရှိသော်လည်း၊ ယခုအခါ လေးဦးအထိ ခန့်အပ်နိုင်ပြီဖြစ်သည်။ ယွီမြောင်ဟွာသည် ဟုန်ရှင်းကို ချက်ချင်း ရာထူးတိုးပေးလိုက်ပြီး၊ ကျန်ရှိသော နေရာတစ်ခုကိုမူ ရွှယ်လန်၏ စွမ်းဆောင်ရည်ကို စောင့်ကြည့်ရန် ချန်ထားခဲ့သည်။

ကွမ်ကျွီနန်းဆောင်၏ နေရာတိုင်းတွင် ပျော်ရွှင်မှုများ လွှမ်းမိုးနေပြီး၊ အစေခံများမှာလည်း ဂုဏ်ယူဝံ့ကြွားစွာဖြင့် သွားလာနေကြသည်။

သူတို့၏ အမြင်တွင်၊ ကိုယ်လုပ်တော်ဟွေ့၏ မျက်နှာသာပေးမှုကို ရရှိခြင်းမှာ အလွန်ပင် ကံကောင်းခြင်းဖြစ်ပြီး၊ အခြားသော အစေခံများစွာက သူတို့ကို မနာလို ဖြစ်နေကြသည်။ အထူးသဖြင့် သူမသည် နှစ်ဝက်အတွင်း ရာထူးများ ဆက်တိုက် တိုးမြှင့်ခံခဲ့ရသဖြင့်၊ သူတို့၏ လစာငွေများမှာလည်း အလျှံပယ် ဖြစ်နေခဲ့သည်။

ဤမျှအထိ ကြင်နာပြီး ရက်ရောသော သခင်မမျိုးကို မည်သူက မလိုချင်ဘဲ နေပါမည်နည်း။ သူတို့အနေဖြင့် ဟွေ့ကွေ့ဖေးသည် ဧကရာဇ်၏ မျက်နှာသာပေးမှုကို အချိန်အကြာကြီး ဆက်ရရှိနေရန်သာ မျှော်လင့်နေကြတော့သည်။

သူတို့ မျှော်လင့်ချက် ထားနေကြသော ယွီမြောင်ဟွာမှာမူ၊ ယခုရက်ပိုင်းအတွင်း အလွန်ပင် ပျင်းရိနေခဲ့သည်—ဖတ်စရာ ကာတွန်းလည်းမရှိ၊ ကြည့်စရာ ဇာတ်လမ်းတွဲလည်း မရှိချေ။

ပျင်းရိမှုကို ဖြေဖျောက်ရန်အတွက်၊ သူမသည် ဝေ့ချုံ၏ ဓားအကကိုသာ ကြည့်ရှုနေခဲ့ရသည်။

လွန်ခဲ့သော လအနည်းငယ်အတွင်း၊ ဝေ့ချုံနှင့် ရော့လန်တို့မှာ အလွန်ပင် တည့်တည့်မတ်မတ် ရှိလာကြပြီး၊ ရှေးဟောင်းအက နှစ်ခုကိုပင် အတူတကွ တီထွင်ခဲ့ကြသည်။

သူတို့၏ အဖော်ပြုမှုကြောင့် ယွီမြောင်ဟွာသည် ပျင်းစရာကောင်းသော အချစ်ဝတ္ထုများကို ဖတ်ရင်း အချိန်ဖြုန်းနေရန် မလိုတော့ပေ။ ‌‌နန်းတွင်းမှ အမျိုးသမီးများသည် ဘာကြောင့် ဧကရာဇ်၏ မျက်နှာသာကို ရယူရန် ကြိုးစားကြသည် (သို့မဟုတ်) ဝါသနာတစ်ခုခုကို စွဲစွဲမြဲမြဲ လုပ်ဆောင်ကြသည်ကို သူမ အနည်းငယ် နားလည်လာခဲ့သည်—‌‌နန်းတွင်းဘဝမှာ တကယ်ပင် ပျင်းစရာကောင်းလှသည်။ နေ့စဉ် ထပ်တလဲလဲ ဖြစ်နေသော ထိုဘဝမျိုးမှာ လူတစ်ယောက်၏ တက်ကြွမှုကို တဖြည်းဖြည်း တိုက်စားသွားနိုင်ပေသည်။

သုံးရက်အကြာတွင်၊ စနစ်မှာ နောက်ဆုံးတွင် အဆင့်မြှင့်တင်မှု ပြီးဆုံးသွားခဲ့သည်။

[ဒင်-ဒင်-ဒင်၊ ငါပြန်လာပြီ!]

ထိုအသံကို ပြန်ကြားရသည့်အတွက် ယွီမြောင်ဟွာမှာ အနည်းငယ် လွမ်းဆွတ်သွားရကြောင်း ဝန်ခံရပေလိမ့်မည်။

[အဆင့်မြှင့်တင်မှုက ဘာထူးခြားချက်တွေ ပါလာလဲ]

စနစ်သည် ၎င်း၏ စစ်ဆေးမှုများကို စတင်လိုက်သည်။

[ညာဘက်အောက်ခြေမှာ မိုးလေဝသခန့်မှန်းချက် လုပ်ဆောင်ချက်ကို ဖွင့်ပေးထားပြီ။ တစ်ခါသုံးရင် တစ်မှတ် ပေးရမယ်။]

ယွီမြောင်ဟွာသည် ထိုအဆင့်မြှင့်တင်မှုအကြောင်း သိထားပြီးဖြစ်သည်။

[အဲဒါအပြင် တခြားဘာရှိသေးလဲ]

[...]

စနစ်မှာ တိတ်ဆိတ်သွားခဲ့သည်။

[မိုးလေဝသ ခန့်မှန်းချက် တစ်ခုတည်းလို့တော့ မပြောနဲ့နော်။ နင်က ငါတွေ့ဖူးသမျှထဲမှာ အညံ့ဆုံးစနစ်ပဲ! ငါ ဘယ်လောက်တောင် ကြိုးစားခဲ့ရလဲဆိုတာ မင်းသိလား။ အခုတော့ ဒါလေးပဲ ရတာလား။]

သူမသည် စနစ်ပြောလေ့ရှိသည့် စကားများကိုပင် စနစ်ထံသို့ ပြန်ပြောလိုက်သည်။

စနစ်မှာ အမှားလုပ်မိသည်ဟု ခံစားရသဖြင့် ပြန်ပြောမည့်စကားကို မျိုသိပ်လိုက်သည်။"မင်းရဲ့ တာဝန်အများစုက သူ့အလိုလို ပြီးသွားတာလေ" စွမ်းအင်များကို အများကြီး သုံးစွဲလိုက်မိသဖြင့် အဆင့်မြှင့်တင်မှုမှာ မပြည့်စုံဘဲ ဖြစ်သွားရလား။ ၎င်းသည် ရုပ်ထွက်အသစ်တစ်ခု ဝယ်ယူရန်အတွက် စုဆောင်းထားလိုရုံသာ ဖြစ်သည်။

[ငါ—ငါလဲ ဒီလိုဖြစ်မယ်လို့ မထင်ထားဘူး။ ဒါက ဒီလိုမဖြစ်သင့်ဘူး... အဆင့်မြှင့်ပြီးရင် နောက်ထပ် လုပ်ဆောင်ချက်တွေ ပါလာရမှာ။ ငါ ပြင်ဆင်ဖို့ တောင်းဆိုချက် သွားတင်လိုက်အုံးမယ်။]

အမှားအယွင်းကို မသိသဖြင့် စနစ်မှာ ထိတ်လန့်သွားကာ ပင်မစနစ်ထံသို့ သွားရောက် အစီရင်ခံခဲ့သည်။ သေချာစွာ စစ်ဆေးပြီးနောက်တွင်လည်း မည်သည့်ပြဿနာမျှ မတွေ့ရသဖြင့်၊ ၎င်းမှာ စိတ်ပျက်စွာဖြင့် ပြန်လာခဲ့သည်။

ယွီမြောင်ဟွာသည် တကယ်တမ်းတွင် ထိုမျှအထိ စိတ်မဆိုးသော်လည်း—သူမသည် စနစ်ကို ဇာတ်လမ်းတွဲများ ကြည့်ရန်အတွက်သာ အဓိက အသုံးပြုသည်—သူမသည် အကြီးအကျယ် စိတ်ဆိုးသယောင် ဟန်ဆောင်ကာ လိမ်လည်ခံရသည်ဟု ပြောဆိုခဲ့သည်။ ၎င်းမှာ စနစ်အား သူမ စိတ်ကြိုက် ခိုင်းစေနိုင်ရန်အတွက် အခွင့်အရေး ယူလိုက်ခြင်း ဖြစ်သည်။

ဥပမာအားဖြင့် သူမ၏ စိတ်ကြိုက် ဇာတ်လမ်းတွဲများကို ကြိုတင်အကြံပြုပေးရန်၊ သို့မဟုတ် သူမ စကားမပြောချင်သည့်အခါတွင် စနစ်က သူ့အလိုလို တိတ်တိတ်နေရန် စသည်ဖြင့် ဖြစ်သည်။

စနစ်ကို အောင်မြင်စွာဖြင့် စိတ်ဓာတ်ပိုင်းဆိုင်ရာ လွှမ်းမိုးပြီးနောက်၊ ယွီမြောင်ဟွာ စိတ်လက်ပေါ့ပါးသွားခဲ့သည်။

သို့သော်လည်း သူမ၏ စိတ်ကောင်းနေမှုမှာ ကြာရှည်မခံခဲ့ပေ—မူလက ဒီဇင်ဘာလတွင် ပြန်လာရန် စီစဉ်ထားသော မယ်တော်ကြီးသည် တစ်လစော၍ ပြန်လာတော့မည်ဟူသော သတင်းဆိုးကို ရရှိခဲ့သောကြောင့်ပင်။

မိုးကြိုးပစ်ခံရသကဲ့သို့ပင်!

ဒါက သူမကို ပစ်မှတ်ထားတာလား။

…

မယ်တော်ကြီး ပြန်လာခြင်းမှာ အလွန်ပင် ခမ်းနားသော ကိစ္စဖြစ်သည်။ ဘာပဲဖြစ်ဖြစ် သူမသည် ဧကရာဇ်၏ မယ်တော်အရင်းဖြစ်ပြီး၊ သူတို့ကြားက သံယောဇဉ်မှာလည်း ခိုင်မာလှသည်။ ဤခရီးစဉ်မှာ တချီပြည်ကြီး သာယာဝပြောစေရန် ဆုတောင်းပေးရန် ဖြစ်သဖြင့်၊ မည်သူကမှ သူမကို မလေးမစား မလုပ်ရဲကြပေ။

မြို့တော်သို့ မယ်တော်ကြီး ရောက်ရှိလာကြောင်း သတင်းရသည်နှင့်တစ်ပြိုင်နက်၊ ဖေးများမှစ၍ မင်းသား၊မင်းသမီးများအထိ အားလုံးက သူမကို ကြိုဆိုရန် ကိုယ်တိုင် သွားရောက်ခဲ့ကြသည်။

ဧကရာဇ်နှင့် မိဖုရားခေါင်ကြီးတို့မှာ ရှေ့ဆုံးတွင် ရပ်နေကြပြီး၊ ဖေးလင်ယွဲ့၏ မျက်နှာမှာ တည်ကြည်နေကာ သူ၏မျက်လုံးများတွင်မူ စူးရှသော အကြည့်အချို့ ရှိနေခဲ့သည်။

မယ်တော်ကြီး အချိန်မတိုင်မီ ပြန်လာရသည့် အကြောင်းရင်းမှာ သူမ၏ အစေခံဖြစ်သူ အထိန်းတော် လီက ကုမိသားစုထံမှ စာတစ်စောင် ရရှိခဲ့သောကြောင့် ဖြစ်သည်။

အစေခံတစ်ယောက်က ပြဿနာရှာရဲတယ်ဆိုတာ တကယ်ကို သေချင်နေတာပဲ ဖြစ်ရမယ်။

ဖေးလင်ယွဲ့သည် မူလက သူ့ဦးလေး၏ အပြုအမူကို ထောက်ထား၍ ကျန်ရှိသော မိသားစုဝင်များကို ချန်ထားရန် စဉ်းစားခဲ့သော်လည်း၊ ယခုတော့ သူတို့က သေမင်းကို ခေါ်နေကြပြီဖြစ်သဖြင့် မျက်နှာသာပေးနေရန် မလိုတော့ပေ။

မယ်တော်ကြီးက ယွီမြောင်ဟွာအပေါ် အထင်လွဲနေသည့် ကိစ္စနှင့် ပတ်သက်၍မူ ဖေးလင်ယွဲ့ မစိုးရိမ်ပေ။ သူ သေချာရှင်းပြလျှင် မယ်တော်က နားလည်သွားလိမ့်မည်ဟု သူယုံကြည်ထားသည်။

ယွီမြောင်ဟွာသည် ယခုတစ်ကြိမ်တွင်မူ တကယ်ပင် အပြစ်မဲ့သော သားကောင် ဖြစ်နေခဲ့ရသည်။

သူသည် နှစ်သစ်ကူး လက်ဆောင်ပစ္စည်းအချို့ကို သူမထံသို့ အရင်ပို့ပေးထားလိုက်ပြီး၊ သူမ နှစ်သက်ရာကို ရွေးချယ်စေမည်ဖြစ်သည်။

ဖေးလင်ယွဲ့ စဉ်းစားနေစဉ်မှာပင် မယ်တော်ကြီး၏ ဝေါယာဉ် ရောက်ရှိလာခဲ့သည်။

ယွီမြောင်ဟွာသည် လီဖေး၏ ဘေးတွင် ‌‌တော်ဝင်ဝတ်စုံဖြင့် ရပ်နေကာ၊ အတတ်နိုင်ဆုံး လိမ္မာယဉ်ကျေးသည့် ပုံစံမျိုး ဖြစ်နေအောင် ကြိုးစားနေခဲ့သည်။

မယ်တော်ကြီး ပြန်ရောက်လာပြီဖြစ်သဖြင့်၊ သူမအနေဖြင့် ‌‌နန်းတော်ကို ဖရိုဖရဲဖြစ်အောင် လုပ်မည့် မြူဆွယ်တတ်သော ကိုယ်လုပ်တော်မျိုးအဖြစ် အထင်မခံနိုင်ပေ။ မယ်တော်ကြီးသည် ငယ်စဉ်က မိဖုရားခေါင်ကြီး ကျန့်ယီ၏ လက်အောက်တွင် ဆင်းရဲဒုက္ခ ခံခဲ့ရသည်ဟု သတင်းများရှိပြီး၊ ယခု ယွီမြောင်ဟွာ နေထိုင်သည့် ကွမ်ကျွီမှာလည်း ထိုမိဖုရားခေါင်ကြီး နေထိုင်ခဲ့သည့် နေရာပင် ဖြစ်လေသည်။ ၎င်းမှာ သူမအတွက် အစကတည်းက အခြေအနေ မကောင်းသည့် အချက်ပင် ဖြစ်သည်။

သူမသည် တိတ်တိတ်ဆိတ်ဆိတ်သာ နေချင်သော်လည်း၊ ‌‌နန်းတွင်းလုပ်ကြံမှုစနစ်ကမူ ခွင့်မပြုပေ။

[ဒင်-ဒင်-ဒင်! ရှေးယခင်ကတည်းက ယောက္ခမနဲ့ ချွေးမ ဆက်ဆံရေးဟာ ခက်ခဲလှပါတယ်။ တကယ့်ကို မျက်နှာသာပေးခံရတဲ့ ကိုယ်လုပ်တော်ဆိုတာ အထက်လူကြီးရဲ့ စိန်ခေါ်မှုတွေကို ကြောက်မနေတတ်ဘူး။ Host၊ ဧကရာဇ်က မင်းဘက်ကနေ ရပ်တည်ပေးပြီး မယ်တော်ကြီးရဲ့ ရန်ကနေ ကာကွယ်ပေးအောင် လုပ်ဆောင်ရမယ်။ ဧကရာဇ်ရဲ့ ကာကွယ်မှုကို လူသိရှင်ကြား ပြသပြီး မင်းရဲ့ ဩဇာကို ပြသလိုက်ပါ။ ဆုလာဘ်- စာပုံနှိပ်စက် နည်းပညာ!]

[ဘုရားရေ—Host ! ဒီဆုလာဘ်က ပညာရှိတွေရဲ့ နှလုံးသားကို သိမ်းပိုက်ဖို့အတွက်ပဲ!]

ယွီမြောင်ဟွာမှာ ဘာမှမပြောနိုင်တော့ဘဲ ဆွံ့အသွားရသည်။

[နင်က ငါ့ကို သတ်ဖို့ ကြိုးစားနေတာပဲ!! ငါ မလုပ်ဘူး။ ငါ့ကို အခုချက်ချင်းပဲ သယ်သွားလိုက်တော့]

ဧကရာဇ်မှာ ရှေ့ဆုံးတွင် ရပ်နေသဖြင့် ထိုမြင်ကွင်းကို မတွေ့လိုက်ပေ။

မယ်တော်ကြီးသည် ဝေါယာဉ်ပေါ်မှ ဆင်းလာစဉ်၊ သူမကို ကြိုဆိုနေကြသော ကိုယ်လုပ်တော်များကို တစ်ချက် ကြည့်လိုက်ပြီးနောက်၊ မြစိမ်းရောင် ‌‌တော်ဝင်ဝတ်စုံကို ဝတ်ဆင်ထားသည့် မျက်လုံးတောက်တောက်နှင့် အမျိုးသမီးလေးထံတွင် သူမ၏အကြည့်မှာ ရပ်တန့်သွားသည်—ဤသူမှာ ယွီမြောင်ဟွာ ဖြစ်ရမည် မဟုတ်ပါလား။

သူမသည် သူမ သား၏ ‌‌တော်ဝင်မှ အဆင့်မြင့်ကိုယ်လုပ်တော် အားလုံးနှင့် တွေ့ဖူးသော်လည်း ယွီမြောင်ဟွာနှင့်သာ မတွေ့ဖူးသေးပေ။ ထိုနေရာတွင် ရပ်နေသည့် မရင်းနှီးသော မျက်နှာမှာ သူမမှအပ အခြားသူ မဖြစ်နိုင်ပေ။

ဒါက ဧကရာဇ်ကို ပြုစားထားတယ်ဆိုတဲ့ မြူဆွယ်တတ်တဲ့ ကိုယ်လုပ်တော်လား။

သူမ၏ အလှတရားမှာ တကယ်ပင် ထင်ရှားသော်လည်း၊ သူမ၏ မျက်လုံးများကမူ အနည်းငယ်... တုံးအအ နိုင်လှသည်။ ယခင်ဧကရာဇ် လက်ထက်ကသာဆိုလျှင် ယွီမြောင်ဟွာသည် ‌‌အနောက်ဆောင်ထဲတွင် သုံးလတောင် ခံလိမ့်မည် မဟုတ်ပေ။

ရုတ်တရက်၊ မယ်တော်ကြီးသည် ယွီမြောင်ဟွာ၏ ဦးခေါင်းအထက်တွင် စာတန်းကြီးအချို့ ပေါ်လာသည်ကို သတိပြုမိလိုက်သည်။

သူမ၏ မျက်လုံးများမှာ ပြူးသွားကာ၊ ဘေးမှ အထိန်းတော်၏ လက်ကို အလိုအလျောက် တင်းတင်းဆုပ်ကိုင်လိုက်မိတော့သည်။

မယ်တော်ကြီးသည် စီအန်း ဘုရားကျောင်းတွင်ရှိစဉ် သခင်မကု ပေးပို့သောစာကို ဖတ်ပြီးနောက် ပထမတွင် အလွန်အမျက်ထွက်သွားသည်။ သို့သော် ဒေါသအရှိန် လျော့ပါးသွားသောအခါ ဆင်ခြင်တုံတရား ပြန်ဝင်လာပြီး တစ်ဝက်ယုံတစ်ဝက်သံသယ ဖြစ်လာခဲ့သည်။

ထိုစာအရဆိုလျှင် သူမ၏ ပညာရှိပြီး အရည်အချင်းရှိသော သားတော်သည် ယွီမြောင်ဟွာကို အအေးနန်းဆောင်မှ ခေါ်ထုတ်လာပြီးကတည်းက စိတ်ဖောက်ပြန်နေခဲ့သည်။ သူမကို ချီးမြှောက်ရန်အတွက် နတ်ဘုရားတို့၏ အံ့ဖွယ်အမှုများအဖြစ် ဟန်ဆောင်ကာ လူထုလှုပ်ရှားမှုများ ပြုလုပ်ခဲ့ရုံသာမက၊ သူမအတွက် ကဲ့စားချေရန် သူမ မောင်တော်၏ မိသားစုတစ်ခုလုံးကိုပင် ချေမှုန်းပစ်ခဲ့သည်။ ပိုဆိုးသည်မှာ ထိုသတင်းကို သူမအား ဖုံးကွယ်ထားခဲ့ခြင်းဖြစ်ပြီး တစ်လကျော်ကြာမှသာ သူမ သိရှိခဲ့ရသည်။

အကယ်၍ သူမ၏ သားတော်သည် ထိုမျှအထိ အသိတရားကင်းမဲ့သွားပါက ‌‌တော်ဝင်အမတ်များက ဆူပူအုံကြွကြမည် မဟုတ်ပါလား။

သူမ ပြုစုပျိုးထောင်ခဲ့သော သားတော်၏ စရိုက်ကို သူမ ကောင်းကောင်းသိသည်။ သူ့အတွက်ဆိုလျှင် တိုင်းပြည်တည်ငြိမ်ရေးသည် အရာအားလုံးနှင့် လူအားလုံးထက် ပို၍ အရေးကြီးသည်။

သူသည် ထိုကိုယ်လုပ်တော်ကို တကယ်ပင် အလိုလိုက်ကောင်း အလိုလိုက်ပါလိမ့်မည်၊ သို့သော် စစ်မှန်သော အချစ်ကြောင့် ဖြစ်နိုင်ခြေမရှိပေ။ အကယ်၍သာ သူမကို ပထမဆုံးမြင်ကတည်းက စွဲလမ်းခဲ့ပါက ယွီမြောင်ဟွာကို ဘာကြောင့် အစောကြီးကတည်းက အအေးနန်းဆောင်သို့ ပို့ထားပါမည်နည်း။ ဖြစ်နိုင်သည်မှာ ကုမိသားစု၏ ပင်မအနွယ်ဝင်များသည် အကန့်အသတ်တစ်ခုကို ကျော်လွန်သွားသဖြင့်၊ သူက ယွီမြောင်ဟွာကို အကြောင်းပြကာ သူတို့ကို ဖျက်ဆီးပစ်ခဲ့ခြင်း ဖြစ်ပေလိမ့်မည်။

ထို့ကြောင့် မယ်တော်ကြီးသည် သူမ ယုံကြည်ရသော လက်ထောက်များကို စုံစမ်းစစ်ဆေးရန် အမိန့်ပေးခဲ့ပြီး မကြာမီမှာပင် အချက်နှစ်ချက်ကို သိရှိခဲ့ရသည်။

ဧကရာဇ်မင်းမြတ်သည် ကုမိသားစု၏ ပင်မအနွယ်ဝင်များကို ချေမှုန်းခဲ့ခြင်းမှာ ဒုတိယအနွယ်ဝင်များက သူတို့၏ ရေတွက်၍ မကုန်နိုင်သော ပြစ်မှုများအတွက် လူသိရှင်ကြား စွဲချက်တင်ခဲ့သောကြောင့် ဖြစ်သည်။ သူတို့၏ ကံကြမ္မာမှာ ထိုက်တန်လှပြီး မိမိကိုယ်ကိုယ်မှလွဲ၍ မည်သူ့ကိုမျှ အပြစ်တင်စရာမရှိပေ။

သူမ၏ သားတော်မှာမူ ကိုယ်လုပ်တော်ဟွေ့ကို တကယ်ပင် နက်နက်ရှိုင်းရှိုင်း စွဲလမ်းနေခဲ့ပြီး၊ သူ၏ လုပ်ရပ်များကို အကြောင်းပြရန်အတွက် ကွယ်လွန်သူ ဧကရာဇ်မင်းမြတ်က အိပ်မက်ထဲတွင် လာရောက်မိန့်ကြားသည်ဟုပင် လုပ်ကြံပြောဆိုခဲ့သည်။

အကယ်၍ ကွယ်လွန်သူ ဧကရာဇ်က အိပ်မက်ထဲမှာ တကယ်ပေါ်လာခဲ့ရင်၊ သူတို့သားတော်ကို အသိတရားရအောင် ရိုက်နှက်ဆုံးမမည်ပင်—အကြံဉာဏ်ပေးနေမည် မဟုတ်ပေ။

ထို့ကြောင့် အခြေအနေမှန်ကို သိရှိနိုင်ရန် ဤယွီမြောင်ဟွာနှင့် ကိုယ်တိုင်တွေ့ဆုံရန် လိုအပ်လာသည်။

ကုမိသားစု၏ ပင်မအနွယ်ဝင်များအတွက် မျက်ရည်စက်လက်နှင့် တောင်းပန်ပေးခဲ့သော အထိန်းတော် လီနှင့် ပတ်သက်၍မူ၊ မယ်တော်ကြီးသည် ထိုအမျိုးသမီး၏ သစ္စာရှိမှုကို သိရှိသွားပြီးနောက် သူမကို ချည်နှောင်ကာ မြို့တော်သို့ ပြန်လည်ပို့ဆောင်စေခဲ့သည်။

ခရီးစဉ်မှာ အလွန် အရေးကြီးနေသဖြင့် သူမသည် ယွီမြောင်ဟွာအကြောင်း ထပ်မံစုံစမ်းရန် အချိန်မရခဲ့ပေ။

သို့သော် ယနေ့ ပထမဆုံးတွေ့ဆုံချိန်တွင်၊ မယ်တော်ကြီးသည် ယွီမြောင်ဟွာ၏ ‌‌နန်းတွင်းဝတ်စုံကို ကြည့်ပြီး သူမသည် အချိန်တိုအတွင်း ထပ်မံ၍ ရာထူးတိုးမြှင့်ခံခဲ့ရကြောင်း သတိပြုမိလိုက်သည်—ယခုအခါ သူမသည် နန်းဆောင်သခင်မ ဖြစ်လောက်သည်အထိ မြင့်မားသော "‌‌ဖေး" အဆင့်သို့ ရောက်ရှိနေပြီဖြစ်သည်။

သူမ၏ လျင်မြန်သော ရာထူးတက်လှမ်းမှုမှာ ယခင်က ကွမ်ကျွီနန်းဆောင်မှ အမျိုးသမီးထက်ပင် သာလွန်နေခဲ့သည်။

သူမ၏ သားတော်သည် တစ်ချိန်က သူကိုယ်တိုင်ပင် မုန်းတီးခဲ့သော "အချစ်နွံထဲ နစ်မွန်းနေသည့် လူမိုက်ဧကရာဇ်" မျိုး အမှန်တကယ် ဖြစ်လာနေပြီလား။

မယ်တော်ကြီးသည် ယွီမြောင်ဟွာကို အသေအချာ စိုက်ကြည့်နေစဉ်—သူမ၏ ဦးခေါင်းအထက်တွင် စာတန်းအချို့ ပေါ်လာသည်ကို မြင်လိုက်ရသည်။

"‌‌နန်းတွင်လုပ်ကြံမှုတာဝန်" တဲ့လား။ ပြီးတော့ "တာဝန်အတွက် ဆုလာဘ်" အကြောင်းတွေလား။ သူမသည် စာပုံနှိပ်ခြင်းအယူအဆကို နားလည်သော်လည်း "မြေစေးသုံး စာလုံးရွှေ့ပုံနှိပ်စနစ်" အကြောင်းကိုမူ နားမလည်ပေ။

ထိုတာဝန်မှာ သူမနှင့် ဧကရာဇ်ကြားတွင် သွေးခွဲရန် ရည်ရွယ်ထားပုံရသည်။

အကယ်၍ ဧကရာဇ်က ကိုယ်လုပ်တော်တစ်ဦးအတွက် သူမကို လူသိရှင်ကြား အရှက်ခွဲခဲ့ပါက၊ သူသည် အလှအပအတွက် သူ့မယ်တော်ကို ဆန့်ကျင်ခဲ့သည်ဟူသော သတင်းမှာ ပျံ့နှံ့သွားလိမ့်မည်—၎င်းမှာ ကြီးမားသော မိဘအပေါ် မရိုသေမှုပင် ဖြစ်သည်။ မြို့စားနယ်စား ဖြစ်နေကြသော သူ၏ ညီတော်များသည်လည်း ထိုအခွင့်အရေးကို ယူကာ ပြဿနာရှာကြပေလိမ့်မည်။

ဧကရာဇ်၏ ဂုဏ်သိက္ခာအတွက်၊ သူမသည် ယွီမြောင်ဟွာကို လူပုံအလယ်တွင် ဆူပူကြိမ်းမောင်းပြီး သူမ၏ ဆန္ဒကို ဖြည့်ဆည်းပေး၍ မဖြစ်ပေ။

မယ်တော်ကြီး၏ ယွီမြောင်ဟွာအပေါ် မုန်းတီးမှုမှာ အထွတ်အထိပ်သို့ ရောက်သွားခဲ့သည်။

ဒါဆို တကယ်ပဲပေါ့!

ဒီမိန်းမကို မကောင်းဆိုးဝါးတစ်ကောင်က ပူးကပ်နေပြီး၊ ဧကရာဇ်ကို ပြုစားဖို့ အမှောင်ပညာတွေကို သုံးနေတာပဲ။ မဟုတ်ရင် သူက ဘာလို့ ကိုယ်လုပ်တော်တစ်ယောက်ကို ဒီလောက်အထိ ရုတ်တရက် ရာထူးတိုးပေးပြီး၊ ထုံးတမ်းစဉ်လာတွေကို တစ်ခုပြီးတစ်ခု ချိုးဖောက်နေရမှာလဲ။

တော်သေးတာပေါ့၊ သူမ အချိန်မီ ပြန်လာနိုင်ခဲ့လို့။ ဒီမိစ္ဆာကို ‌‌တော်ဝင်ထဲမှာ ဖရိုဖရဲဖြစ်အောင် သူမ ဘယ်တော့မှ ခွင့်ပြုမှာ မဟုတ်ဘူး။

သူမ၏ နှုတ်ခမ်းများမှာ ဖြူဖျော့သွားကာ အထိန်းတော် ကျိုး၏ လက်ကို တင်းတင်းဆုပ်ကိုင်လိုက်သည်။

အထိန်းတော် ကျိုးက သူမကို မသိမသာ ထိန်းပေးလိုက်သည်။

ဖေးလင်ယွဲ့သည် သူ၏မယ်တော်က တစ်နေရာတည်းကို စိုက်ကြည့်နေသည်ကို သတိပြုမိလိုက်သည်။

သူမ၏ မျက်နှာအမူအရာမှာ တုန်လှုပ်နေပုံရပြီး၊ တည်ငြိမ်အောင် အတင်းကြိုးစားနေရသည်။ သူမ ဘာကို မြင်လိုက်တာလဲ။

သူက ကူညီသယောင်ဖြင့် ချဉ်းကပ်သွား၏။ "မယ်တော်၊ ခရီးပန်းလာပြီ ထင်ပါရဲ့"

သူမ၏ အကြည့်နောက်သို့ လိုက်ကြည့်ရင်း၊ သူမသည် ယွီမြောင်ဟွာကို ကြည့်နေကြောင်း သူသိလိုက်သည်။

ထို့ကြောင့် သူသည်လည်း ခေါင်းငုံ့ကာ အလွန်ပင် လိမ္မာယဉ်ကျေးသော ပုံစံဖြင့် ရပ်နေသည့် ယွီမြောင်ဟွာထံသို့ လှည့်ကြည့်လိုက်သည်။

သို့သော် သူမ၏ ဦးခေါင်းအထက်တွင် ပေါ်နေသော စာလုံးများကမူ သူမ၏ အတွေးများကို ဖော်ပြနေသည်-

[Host ၊ မယ်တော်ကြီးက မင်းကို စိုက်ကြည့်နေတယ်! ကောင်းပြီ... ခုနက ရထားတဲ့ တာဝန်ကို မမေ့နဲ့ဦး—ဒါက စာပုံနှိပ်စက် နည်းပညာပဲနော်!]

[ပါးစပ်ပိတ်ထားစမ်း! ထပ်ပြီး စကားများနေရင် မင်းကို အမှောင်ခန်းထဲမှာ ပိတ်ထားလိုက်မှာ!]

ဖေးလင်ယွဲ့ စိတ်ဝင်တစား ဖြစ်သွားသည်။ 'ဘာလဲ။ ယွီမြောင်ဟွာက နောက်ထပ် တာဝန်တစ်ခု ထပ်ရပြန်ပြီလား။ ပြီးတော့ အဲဒါက သူ့မယ်တော်နဲ့ ပတ်သက်နေတာလား။ နေပါဦး... စနစ်ကိုတော့ ပိတ်မထားလိုက်ပါနဲ့—သူ အရင်ဆုံး တာဝန်အသေးစိတ်နဲ့ ဆုလာဘ်တွေကို သိဖို့ လိုသေးတယ်!'

သူမက ဒီနတ်ဘုရားကို အကျဉ်းချမယ်လို့ ခြိမ်းခြောက်နေမယ့်အစား အနည်းငယ်လောက် လေးစားမှု မပြနိုင်ဘူးလား။

ဤအချိန်တွင် သူသည် ၎င်းကို သိလိုစိတ်ဖြင့် အလွန်ပင် စိတ်မရှည် ဖြစ်နေခဲ့သည်။

ငါးဆားနယ် ကိုယ်လုပ်တော်