အခန်း ၃၄

အပိုင်း ၃၄

နှစ်ကုန်ခါနီးအချိန်တွင် မိဖုရားခေါင်ကြီးမှာ လုပ်ငန်းတာဝန်များဖြင့် များစွာ မအားမလပ် ဖြစ်နေခဲ့၏။ သူမသည် နန်းတွင်းရေးရာအချို့ကို သဲ့ဖေး၊ ရှန်ဖေးနှင့် ရှန်းဖေးတို့ထံသို့ ခွဲဝေပေးအပ်ထားခဲ့သည်။ ထိုသူများထဲတွင် သဲ့ဖေးမှာ နန်းတွင်းစားသောက်ပွဲများကို စီမံခန့်ခွဲရန် တာဝန်ယူရသူ ဖြစ်၏။

နေ့စဉ်နေ့တိုင်း သဲ့ဖေးနှင့် အခြားသူများသည် ဖုန်းနင် နန်းဆောင်သို့ သွားရောက်ကာ ရုံးလုပ်ငန်းများကို လုပ်ဆောင်ပြီးမှသာ မိမိတို့၏ နန်းဆောင်များသို့ ပြန်ကြလေ့ရှိသည်။ တာဝန်များကို ထမ်းဆောင်နေစဉ် သဲ့ဖေး၏ စိတ်ကူးများမှာ နှစ်သစ်ကူးစားသောက်ပွဲဆီသို့ လွင့်ပျံနေခဲ့၏။ အဆင့်မြင့်ကိုယ်လုပ်တော်တစ်ဦး ဖြစ်သောကြောင့် သူမ၏ မိသားစုဝင်များသည် နန်းတော်သို့ဝင်၍ ဂါရဝပြုခွင့် ရှိကြပေသည်။ သူမ၏ မောင်လေးမှာလည်း အိမ်ထောင်ပြုမည့် အရွယ်သို့ ရောက်ရှိနေပြီ ဖြစ်၏။ သူမ၏ လက်ပေါ်တွင် ကြီးပြင်းလာသူ ဖြစ်သောကြောင့် အခွင့်ကြုံသည့်အခါ မိခင်ဖြစ်သူအား မောင်လေး၏ အိမ်ထောင်ရေးကိစ္စကို မေးမြန်းရန် သဲ့ဖေးက စီစဉ်ထားခဲ့သည်။

ရုတ်တရက် နန်းဆောင်အပြင်ဘက်တွင် ရုန်းရင်းဆန်ခတ် အသံများ ထွက်ပေါ်လာခဲ့၏။ သဲ့ဖေးမှာ လန့်သွားပြီး တံခါးဆီသို့ လှမ်းကြည့်လိုက်မိသည်။ မိဖုရားခေါင်ကြီး၏ ဖုန်းနင် နန်းဆောင်မှာ အမြဲတမ်း စနစ်တကျရှိပြီး တည်ငြိမ်အေးချမ်းလှပေ၏။ အပြင်ဘက်တွင် ဘာတွေများ ဖြစ်ပျက်နေပါသနည်း။

ခဏအကြာတွင် မိဖုရားခေါင်ကြီး၏ အနီးကပ်အစေခံ အဒေါ်ဖန် ဝင်လာပြီး ဂါရဝပြုလိုက်၏။ "မယ်မယ်တို့ကို အနှောင့်အယှက်ပေးမိတဲ့အတွက် ကျွန်တော်မျိုးမ တောင်းပန်ပါတယ်။ အစေခံအချို့ အစားအသောက်သေတ္တာကို မတော်တဆ လွှတ်ချမိသွားလို့ပါ"

ရှန်ဖေး ခေါင်းမော့လိုက်သည်။ "အဒေါ်ဖန်၊ တခြားကိစ္စ ရှိသေးလို့လား"

အဒေါ်ဖန် တုံ့ဆိုင်းနေသဖြင့် မိဖုရားခေါင်ကြီးက တည်ငြိမ်စွာပင် မိန့်ကြားလိုက်၏။ "တိုက်ရိုက်ပဲ ပြောပါ"

အဒေါ်ဖန်က ပြန်လည် လျှောက်တင်လိုက်သည်။ "ဧကရာဇ်မင်းမြတ်က ကိုယ်လုပ်တော်ဟွေ့ကို ဟွေ့ဖေး အဖြစ် ရာထူးတိုးမြှင့်ပေးလိုက်ပြီလို့ ကြားရပါတယ်။ ဘွဲ့နှင်းသဘင် အခမ်းအနားကိုလဲ မင်္ဂလာရှိတဲ့ ရက်မြတ်မှာ ကျင်းပပေးသွားမှာပါ"

နန်းဆောင်တစ်ခုလုံး ချက်ချင်းပင် တိတ်ဆိတ်သွားခဲ့၏။ သဲ့ဖေး၏ လက်ထဲမှ စာရင်းစာအုပ်ကို ဆုပ်ကိုင်ထားသော အားမှာ အနည်းငယ် ပို၍ တင်းကျပ်သွားခဲ့လေသည်။

သူမ နားကြားမှားတာလား။ ကိုယ်လုပ်တော်ဟွေ့က ဘယ်လိုဖြစ်ပြီး ရုတ်တရက် ဟွေ့ဖေး ဖြစ်သွားရတာလဲ။

ယွီမြောင်ဟွာနှင့် သဲ့ဖေးတို့မှာ အမြဲတမ်း ဆက်ဆံရေးကောင်းမွန်ကြပြီး ဟင်းချက်နည်းများပင် အပြန်အလှန် ဝေမျှလေ့ရှိကြ၏။ သို့သော် သဲ့ဖေးသည် သူမ၏ ယခုရာထူးကို ရရှိရန်အတွက် သားတစ်ယောက်နှင့် သမီးတစ်ယောက်ကို မွေးဖွားပေးကာ နှစ်ပေါင်းများစွာ ကြိုးစားခဲ့ရသည်ကို ပြန်တွေးမိသောအခါ ဤမျှ မြန်ဆန်စွာ တိုးတက်လာသော ယွီမြောင်ဟွာအပေါ် မနာလိုစိတ် အနည်းငယ် ဖြစ်ပေါ်လာခဲ့ရသည်။

နှိုင်းယှဉ်ခြင်းသည် ပျော်ရွှင်မှုကို ဖျက်ဆီးတတ်သည် မဟုတ်ပါလား။

မိဖုရားခေါင်ကြီးသည် အမြဲလိုပင် တည်ငြိမ်သိက္ခာရှိစွာဖြင့် ဆိုလိုက်၏။ "‌ကိုယ်လုပ်တော်ဟွေ့က စာကြည့်တိုက်ကနေ တန်ဖိုးရှိတဲ့ စာအုပ်တစ်အုပ် ထပ်ငှားလာပြန်ပြီလား"

အဒေါ်ဖန် ကမူ ခေါင်းခါလိုက်သည်။ "ဒီအစေခံ မသိပါဘူး"

အပြင်ဘက်ရှိ အစေခံများမှာ ထိုသတင်းကို ကြားလိုက်ရသဖြင့် အံ့သြကာ အစားအသောက်သေတ္တာကို လွှတ်ချမိခဲ့ခြင်းဖြစ်ပြီး အဒေါ်ဖန် မှာလည်း အသေးစိတ်ကို ထပ်မံမေးမြန်းရန် အချိန်မရခဲ့ချေ။

မိဖုရားခေါင်ကြီးသည် ထရပ်လိုက်၏။ "ငါ ဟွေ့ဖေး အတွက် ဂုဏ်ပြုလက်ဆောင် ပြင်ဆင်ရမယ်"

မိဖုရားခေါင်ကြီး၏ တည်ငြိမ်မှုနှင့် မနာလိုစိတ် အစအနမျှမရှိသော အမူအရာကို ကြည့်ကာ သဲ့ဖေးက ပို၍ပင် လေးစားမိသွားခဲ့သည်။ သူမသည် တကယ့်ကို တိုင်းပြည်၏ မိခင်တစ်ဦးနှင့် ထိုက်တန်လှပေ၏။

သူမသည် မိမိကိုယ်ကိုယ် ပြန်လည်နှစ်သိမ့်လိုက်သည်—ဧကရာဇ်မင်းမြတ်အနေဖြင့် ယွီမြောင်ဟွာကို ရာထူးတိုးပေးရခြင်းမှာ ခိုင်လုံသော အကြောင်းပြချက် ရှိပေလိမ့်မည်။ သူမ တစ်ခုခုကို ထပ်မံဆက်သလိုက်ပြန်ပုံပင်။

သူမသည် မျက်နှာသာရရန် ပြိုင်ဆိုင်ရမည့် အရွယ်မဟုတ်တော့သဖြင့် သဘောထားသေးသိမ်မခံသင့်ချေ။ အနည်းဆုံးတော့ ယွီမြောင်ဟွာမှာ သူမနှင့် အဆင်ပြေသောသူတစ်ဦး ဖြစ်နေသေး၏။

သူမ၏ စိတ်ကို ပြန်လည်ထိန်းချုပ်လိုက်ရင်း သဲ့ဖေးက ပြုံးလိုက်သည်။ "ဒါက တကယ့်ကို ဝမ်းသာစရာ သတင်းပဲ။ နှစ်ကုန်ပိုင်းကျ အလုပ်မများဘူးဆိုရင်တော့ ဟွေ့ဖေး ဆီကနေ ဝိုင်တစ်ခွက်လောက် တိုက်ခိုင်းမိမှာပဲ"

ရှန်ဖေးကမူ ပေါ့ပါးစွာ လက်ခုပ်တီးလိုက်၏။ "အခု မလုပ်နိုင်လဲ နှစ်သစ်ကူးပြီးရင် စီစဉ်လို့ရတာပဲ"

ရှန်းဖေးကလည်း အေးအေးလူလူပင် ထပ်လောင်းပြောဆိုခဲ့သည်။ "ဟွေ့ဖေးရဲ့ သဘောထားကို အရင်မေးရအုံးမှာပေါ့"

အားလုံး၏ စိတ်ထဲတွင် ယွီမြောင်ဟွာ၏ ရာထူးတိုးသတင်းကသာ နေရာယူနေသည်ကို မြင်သောအခါ မိဖုရားခေါင်ကြီးက ယနေ့လုပ်ငန်းဆောင်တာများကို စောစောအဆုံးသတ်ကာ သူတို့ကို ပြန်ခိုင်းလိုက်လေ၏။

…

ချုံးမင်နန်းဆောင် နန်းဆောင်သို့ ပြန်ရောက်သောအခါ ရှန်ဖေး သည် ထိုင်ခုံပေါ်တွင် တည်ငြိမ်စွာ ထိုင်လိုက်သည်။ "ငါ့ရဲ့ ဘဏ္ဍာတိုက်ထဲက ငွေရည်စိမ်ပြီး ကျောက်စီထားတဲ့ ဆံထိုးနဲ့ ရွှေဦးရစ်ကို ထုတ်လိုက်။ ပိုးထည်အချို့ပါထည့်ပြီး ကွမ်ကျွီ နန်းဆောင်ကို လက်ဆောင်အဖြစ် ပို့လိုက်ပါ"

သူမ၏ သားတော်ဖြစ်သူ ဒုတိယမင်းသား ဖေးချီယောင်သည် နန်းဆောင်ထဲသို့ ဝင်လာစဉ် ထိုစကားကို ကြားလိုက်ရသဖြင့် ပြောလိုက်သည်။ "မယ်တော်၊ အဲဒီဆံထိုးနဲ့ ဦးရစ်က မယ်တော့်အတွက်ပဲ သီးသန့်လုပ်ထားတာ မဟုတ်လား။ ဘာလို့ လက်ဆောင်ပေးပစ်ရတာလဲ"

ရှန်ဖေး အသာအယာ ပြုံးလိုက်၏။ "ကိုယ်လုပ်တော်ဟွေ့ရဲ့ ရာထူးတိုးတာက ဒီနှစ်တွေထဲမှာ နန်းတော်ရဲ့ အရှားပါးဆုံး အခမ်းအနားတစ်ခုပဲ—ငါတို့ဘက်က ဂုဏ်ပြုတဲ့နေရာမှာ ပေါ့ပေါ့တန်တန် မလုပ်သင့်ဘူး။ မယ်တော်ကြီးကတောင် ဟွေ့ဟွေ့ဖေးကို ရတနာတွေ အများကြီး ပေးထားတာဆိုတော့ ငါ့ရဲ့လက်ဆောင်က မကောင်းရင် ငါတို့ ချုံးမင် နန်းဆောင်ရဲ့ သိက္ခာကျစရာ ဖြစ်လိမ့်မယ်"

နောက်ဆုံး ရာထူးတိုးခဲ့သူမှာ သဲ့ဖေးဖြစ်ပြီး ၎င်းမှာလည်း သူမ အမြွှာကလေးများ မွေးဖွားပြီးချိန်မှသာ ရရှိခဲ့ခြင်း ဖြစ်သည်။ ယွီမြောင်ဟွာ၏ရာထူးမှာ သူတို့အုပ်စုထဲမှာပင် ရှိနေဦးမည်ဟု အားလုံးက ထင်မှတ်ထားခဲ့သော်လည်း ယွီမြောင်ဟွာက သူတို့ကို ကျော်တက်သွားလိမ့်မည်ဟု မည်သူမျှ မတွေးခဲ့မိချေ။

ထို့အပြင် ရှန်ဖေးသည် တကယ်တမ်းတွင် ဘာသာရေးကို ထက်ထက်သန်သန် ယုံကြည်သူ မဟုတ်သော်လည်း မယ်တော်ကြီးနှင့် စကားပြောစရာ အကြောင်းအရာရရှိရန် နန်းဆောင်တွင် ဘုရားကျောင်းဆောင်လေးတစ်ခု ပြင်ဆင်ထားကာ ယုံကြည်သူဟန် ဆောင်ထားခဲ့၏။ သို့သော်လည်း မယ်တော်ကြီးမှာ ယွီမြောင်ဟွာကိုသာ ပို၍ ချစ်ခင်နေခဲ့သည်။ မယ်တော်ကြီးက အစပိုင်းတွင် သူမကို မကြိုက်ခဲ့သော်လည်း ယခုမူ မည်သည့်အကြောင်းပြချက်မှမရှိဘဲ မျက်နှာသာပေးနေခဲ့၏။

ဖေးချီယောင်သည် နားလည်သော်လည်း စိတ်ထဲတွင်တော့ မကျေမနပ် ဖြစ်နေခဲ့လေသည်။ ဒုတိယမင်းသားတစ်ဦးအနေဖြင့် သူ၏ အဆင့်အတန်းမှာ အိမ်ရှေ့မင်းသားပြီးလျှင် ဒုတိယမြောက် ဖြစ်သော်လည်း သူ၏မိခင်မှာမူ အခြားသူများ၏ အနှိမ်ခံနေရသည့်အပြင် ယခုအခါတွင်လည်း ဧကရာဇ်၏ အနှစ်သက်ဆုံးသူအား အလေးထားနေရပြန်ပြီ ဖြစ်၏။

ရှန်ဖေးသည် သားတော်၏ မကျေနပ်မှုကို မြင်သဖြင့် ညင်သာစွာ ပြုံးလိုက်သည်။ "သားတော် အဆင်ပြေရင် မယ်တော်အတွက် ဘာမှမဖြစ်ပါဘူး" သူမ ခေတ္တ ရပ်လိုက်၏။ "ဒီမနက် ညီလာခံမှာ ထူးခြားတဲ့ သတင်းတွေ ရှိသေးလား"

သူမ၏ သားတော်မှာ ယွီမြောင်ဟွာ၏ ရာထူးတိုးသတင်းအပေါ် အံ့သြခြင်းမရှိသည်ကို မြင်သောအခါ ၎င်းမှာ ညီလာခံတစ်ခုလုံး သိရှိပြီးသား ကိစ္စဖြစ်လိမ့်မည်ဟု သူမ ခန့်မှန်းလိုက်သည််။

ဖေးချီယောင်ကမူ သူ၏ နဖူးကို ပွတ်လိုက်၏—ဤကိစ္စကြောင့်ပင် သူ ရောက်လာခြင်း ဖြစ်သည်။ သူ၏ မျက်နှာမှာ ရှုပ်ထွေးနေခဲ့သည်။ "ကိုယ်လုပ်တော်ဟွေ့က... ရှေးဟောင်းမှတ်တမ်းတွေထဲကနေ စာအုပ်ထုတ်လုပ်တဲ့ ကုန်ကျစရိတ်ကို အများကြီး လျှော့ချနိုင်မဲ့ ပုံနှိပ်နည်းပညာအသစ်ကို ရှာဖွေတွေ့ရှိခဲ့တယ်"

"ဧကရာဇ်မင်းမြတ်က ဒီနည်းပညာကို လူတိုင်းသုံးနိုင်အောင် လုပ်ဖို့ ရည်ရွယ်ထားတယ်။ အခုကစပြီး တိုင်းပြည်တစ်ဝန်းက ပညာရှင်တွေအားလုံးက သူ့ကို ကျေးဇူးတင်နေကြတော့မှာ"

ညီလာခံရှိ အရာရှိများ၏ အမူအရာကို ကြည့်ရုံနှင့်ပင် သူတို့သည် ယွီမြောင်ဟွာကို အလွန်လေးစားနေကြပြီဖြစ်ကြောင်း သိသာလှပေ၏။ ဧကရာဇ်က သူမ၏ ရာထူးတိုးခြင်းကို ကြေညာသောအခါ မည်သူမျှ ကန့်ကွက်ခြင်းမရှိဘဲ အားလုံးက ပုံမှန်ကိစ္စတစ်ခုကဲ့သို့သာ သဘောထားခဲ့ကြသည်။

အမြဲတမ်း တည်ငြိမ်လှသော ရှန်ဖေး ပင်လျှင် သူမ၏ အံ့သြမှုကို ဖုံးကွယ်မထားနိုင်တော့ချေ။ "ဒါကြောင့်ကိုး..." ယွီမြောင်ဟွာမှာ တကယ့်ကို နတ်ဘုရားများ၏ စောင်မမှုကို ရရှိထားသကဲ့သို့ပင် အဖိုးတန်သော အရာများကို မည်သို့ ရှာဖွေတွေ့ရှိနေသလဲဆိုသည်ကို သူမ နားမလည်နိုင်တော့ချေ။ နောင်အနာဂတ်တွင် သူမ၏ ဂုဏ်သတင်းမှာ ပညာရှင်များကြားတွင် မည်မျှအထိ ကြီးကျယ်လာမည်ကို ခန့်မှန်းရန်ပင် ခက်ခဲလှပေ၏။

ဖေးချီယောင်ကမူ မကျေမနပ်ဖြင့် ပြောလိုက်သည်။ "ခမည်းတော်က ဒီကိစ္စကို အိမ်ရှေ့မင်းသားဆီပဲ လွှဲပေးလိုက်တယ်"

ရှန်ဖေးက ဆိုလိုက်သည်။ "မင်းရဲ့ ခမည်းတော် မျက်စိထဲမှာ မင်းက ငယ်သေးတယ်။ အရေးကြီးတဲ့ တာဝန်တွေကို မင်းဆီကို မလွှဲပေးသေးတာက သဘာဝပါပဲ။ အခု မင်းလက်ရှိ တာဝန်တွေကိုပဲ အကောင်းဆုံး ဖြစ်အောင်လုပ်ပြီး မင်းရဲ့ အရည်အချင်းကို သက်သေပြပါ"

ဖေးချီယောင်မှာ ယဉ်ကျေးမှုနှင့် သာသနာရေးဝန်ကြီးဌာနတွင် တာဝန်ပေးအပ်ခံရသဖြင့် ပျင်းရိစရာကောင်းပြီး အရေးမပါဟု ထင်မြင်နေခဲ့၏။ အိမ်ရှေ့မင်းသားမှာမူ ဘဏ္ဍာရေးဝန်ကြီးဌာနတွင် တာဝန်ပေးခံရရာ ၎င်းမှာ သူတို့၏ ဖခင်က မျက်နှာသာပေးမှု တစ်ခုပင် ဖြစ်သည်။

ရုတ်တရက် သူ၏ မူလရည်ရွယ်ချက်ကို သတိရသွားပြီး ဖေးချီယောင်က ထပ်ပြောလိုက်၏။ "ဟွေ့ဟွေ့ဖေးမှာ အိမ်ထောင်မပြုရသေးတဲ့ ညီမလေးတစ်ယောက် ရှိတယ်လို့ ကြားတယ်..."

ရှန်ဖေးက ချက်ချင်းပင် စကားဖြတ်လိုက်ပြီး ဟန့်တားလိုက်သည်။ "လုံးဝ မဖြစ်နိုင်ဘူး! အဲဒါဆိုရင် အဆင့်အတန်းတွေ ရှုပ်ကုန်လိမ့်မယ်!"

အကယ်၍ ‌ဟွေ့ဟွေ့ဖေး၏ ညီမက ဖေးချီယောင်နှင့် လက်ထပ်ခဲ့လျှင် သူတို့ အချင်းချင်း မည်သို့ ခေါ်ဝေါ်ကြမည်နည်း။ အဆင့်အတန်းများကို လျစ်လျူရှုကြမည်လား။ ၎င်းမှာ အတော်ပင် သိက္ခာကျစရာ ဖြစ်ပေလိမ့်မည်။ ထို့အပြင် ဟွေ့ဟွေ့ဖေး၏ မိသားစု နောက်ခံမှာလည်း မင်းသားတစ်ဦး၏ ကြင်ယာတော်အဖြစ် သင့်တော်ခြင်း မရှိချေ။

ဖေးချီယောင်မှာ အရှက်ရသွားပြီး မျက်နှာနီမြန်းသွားခဲ့သည်။ "မယ်တော်၊ အထင်မလွဲပါနဲ့! သားတော်က ဝမ်းကွဲညီလေးအတွက် ပြောတာပါ—သူ့အိမ်ထောင်ရေးကိစ္စက မပြီးသေးဘူး၊ သူတို့က အသက်ချင်းလဲ မကွာဘူး မဟုတ်လား"

သူမ၏ မိသားစုအကြောင်းကို ကြားလိုက်သောအခါ ရှန်ဖေး၏ အပြုံးများမှာ ပျောက်ကွယ်သွားခဲ့သည်။ "မင်းရဲ့ ဝမ်းကွဲညီလေး ကိစ္စက မင်းအဘွားရဲ့ တာဝန်ပဲ။ မင်းကတော့ သူတို့နဲ့ ဝေးဝေးနေပါ။ သူတို့ရဲ့ မကောင်းတဲ့ အကျင့်တွေကို အတုမယူမိစေနဲ့"

သူမ၏ သားတော် နားမဝင်သေးသည်ကို မြင်သောအခါ သူမသည် စိတ်ထဲမှ သက်ပြင်းချလိုက်သော်လည်း စိတ်ရှည်စွာဖြင့်ပင် ဆက်လက် ပြောဆိုခဲ့၏။ "ဟွေ့ဟွေ့ဖေးရဲ့ မိသားစုက အခုအချိန်မှာ လူတိုင်းက စိတ်ဝင်စားနေကြတဲ့ မိသားစုပဲ။ မင်းက အခုအချိန်မှာ သူတို့နဲ့ သွားပတ်သက်နေရင် မင်းရဲ့ ခမည်းတော်က ဘယ်လိုထင်မလဲ"

အထူးသဖြင့် ဖြောင့်မတ်သော ပညာရှင်များမှာ ယွီမိသားစုနှင့် အမျိုးတော်ရန် ပို၍ပင် ဆန္ဒရှိနေကြပေလိမ့်မည်။

ဖေးချီယောင်သည် လေးနက်သော အမူအရာဖြင့် ပြောလိုက်သည်။ "သားတော် နားလည်ပါပြီ"

ရှန်ဖေးသည် သူမ၏ အေးစက်နေသော လက်ဖက်ရည်ခွက်ကို လက်ဖြင့် ပွတ်နေရင်း ပြောလိုက်သည်။ "အခွင့်အရေးရရင် မင်းရဲ့ အဘိုးနဲ့ တခြားသူတွေကို သွားပြောလိုက်ပါ—သူတို့အနေနဲ့ ကိုယ်လုပ်တော်ဟွေ့ရဲ့ ညီမလေးအပေါ် ထားတဲ့ စိတ်ကူးတွေကို လက်လျှော့လိုက်ဖို့ပေါ့"

သူမက ခဏရပ်လိုက်ပြီး အဓိပ္ပာယ်ပါသော အပြုံးကို ပြုံးလိုက်သည်။ "ကိုယ်လုပ်တော်ဟွေ့က အခုအချိန်မှာ တကယ့်ကို ထွန်းတောက်နေတဲ့ ကြယ်တစ်ပွင့်ပဲ။ ငါတို့ ဘာမှမလုပ်ရင်တောင် တခြားသူတွေကတော့ လုပ်ကြမှာ အသေအချာပဲ"

ဖေးချီယောင်မှာ တစ်ခုခုကို သတိရသွားပုံရပြီး သူ၏ မျက်လုံးများက တောက်ပသွားခဲ့လေ၏။

…

ကိုယ်လုပ်တော်ဟွေ့က ရွှံ့စေးသုံး ပုံနှိပ်နည်းပညာကို ရှာဖွေတွေ့ရှိခဲ့သည့် သတင်းမှာ နန်းတွင်းတစ်ခုလုံးသို့ အလျင်အမြန်ပင် ပြန့်နှံ့သွားခဲ့သည်။

ဧကရာဇ်၏ တိုက်တွန်းမှုကြောင့် နက္ခတ်ဗေဒင်ဆရာများသည် နှစ်သစ်ကူးမတိုင်မီ မင်္ဂလာရက်မြတ်ကို ရွေးချယ်ပေးခဲ့ရာ အခမ်းအနားကို ၁၂ လပိုင်း၊ ၁၂ ရက်နေ့တွင် ကျင်းပရန် သတ်မှတ်ခဲ့ကြလေ၏။ မူလက ၁၆ ရက်နေ့ကို ရွေးချယ်ခဲ့သော်လည်း ယွီမြောင်ဟွာက စနစ်မှ အမှတ်များကို သုံး၍ ထိုနေ့၏ မိုးလေဝသအခြေအနေကို စစ်ဆေးခဲ့ရာ နန်းတော်တွင် မိုးသည်းထန်စွာ ရွာသွန်းနိုင်ကြောင်း သိလိုက်ရသဖြင့် ထိုရက်ကို ပယ်ဖျက်လိုက်ခြင်း ဖြစ်ပေသည်။

နန်းတွင်း အပ်ချုပ်သည်များမှာလည်း သူမ၏ အခမ်းအနားဝတ်စုံကို အချိန်မီပြီးစီးရန် အချိန်ပိုဆင်း၍ လုပ်ဆောင်ခဲ့ကြရ၏။

ကိုယ်လုပ်တော်ကြီးများ၏ ဝတ်စုံမှာ ခရမ်းရောင်ဖြစ်ပြီး ဒေါင်းရုပ်များ၊ တိမ်တောင်များနှင့် ပန်းပုံစံများကို ချည်ထိုးထားသော်လည်း ဒေါင်းရုပ်အရေအတွက်မှာ မိဖုရားခေါင်ကြီး၏ ဝတ်စုံထက် နည်းပါးပေသည်။ မိဖုရားခေါင်ကြီး၏ ဝတ်စုံမှာ အနီရောင်ဖြစ်ပြီး ဒေါင်းရုပ်များနှင့် ပန်းများကို အဓိကထား၍ အလှဆင်ထား၏။ နန်းတွင်းရေးရာဌာနမှ သူမအတွက် ဒေါင်းဦးရစ်ကိုလည်း ပြင်ဆင်ပေးထားခဲ့သည်။ ထိုဦးရစ်ကို ရွှေ၊ ငွေတို့ဖြင့် ပြုလုပ်ထားပြီး လက်ထိပ်ခန့်ရှိသော ပုလဲများနှင့် အပြာရောင် ကျောက်မျက်များ စီထား၏။ ဒေါင်း၏ အတောင်ပံများကို ရွှေချည်များဖြင့် ယှက်ထားပြီး မျက်လုံးများတွင် ပတ္တမြားများ စီထားသဖြင့် တစ်ခုလုံးမှာ တလက်လက် တောက်ပနေခဲ့သည်။

ယွီမြောင်ဟွာသည် သူမထံ ပို့ဆောင်ပေးလာသော ခမ်းနားထည်ဝါသည့် ဝတ်စုံနှင့် ဦးရစ်ကို ကြည့်ရင်း—လူတိုင်း ဘာဖြစ်လို့ ရာထူးတိုးချင်နေကြလဲဆိုသည်ကို နားလည်သွားခဲ့၏။ ဤဒေါင်းဦးရစ်မှာ တကယ်ပင် ရင်သပ်ရှုမောဖွယ် ကောင်းလှပေသည်။ မိဖုရားခေါင်ကြီး၏ ဦးရစ်မှာ ယခုထက်ပင် ပိုလှပသည်ဟု ကြားဖူးသော်လည်း၊ ကိုယ်လုပ်တော်အဆင့်ရှိသူများ၏ ဦးရစ်မှာ အနည်းငယ်သာ ကွာခြားပေ၏။ ထိုအဆင့်အောက်ရှိ သူများမှာမူ ဧကရာဇ် သို့မဟုတ် မယ်တော်ကြီးက ကိုယ်တိုင်ပေးအပ်ခြင်း မရှိလျှင် ထိုကဲ့သို့သော ဦးရစ်ကို ဆောင်းခွင့်မရှိချေ။

[Host၊ ကျွန်တော် စစ်ဆေးကြည့်ပြီးပြီ—ဒီဦးရစ်က သုံးပိဿာလောက် လေးပြီး ဝတ်စုံက ဆယ်ပိဿာလောက် ရှိတယ်]

ယွီမြောင်ဟွာမှာ အံ့သြသွားရသည်။ ထိုအရာမှာ သူမအနေဖြင့် အခမ်းအနားပြီးဆုံးသည်အထိ ထိုအလေးချိန်များကို တောင့်ခံထားရမည်ဟု ဆိုလိုခြင်း ဖြစ်၏... ထို့အပြင် နောင်တွင် ကျင်းပမည့် အခမ်းအနားတိုင်းတွင်လည်း ၎င်းတို့ကို ဝတ်ဆင်ရဦးမည်ပင်။

ယွီမြောင်ဟွာမှာ စိတ်ညစ်သွားခဲ့ရသည်။ [မင်းရဲ့ စနစ်ထဲမှာ ပစ္စည်းတွေက တကယ်ပဲ မစုံသေးဘူး။ အလိုအလျောက် ထိန်းချုပ်တဲ့ စွမ်းရည်တွေ မရှိဘူးလား] အကယ်၍ ထိုစွမ်းရည်ရှိလျှင် စနစ်ကသာ အရာအားလုံးကို လုပ်ဆောင်ပေးမည်ဖြစ်ပြီး သူမက အေးအေးလူလူ နားနေရုံသာ ဖြစ်ပေလိမ့်မည်။

စနစ်ပင် စကားမပြောနိုင်တော့ချေ။ ၎င်းမှာ နန်းတွင်းရေးရာများတွင် အောင်မြင်ရန် ကူညီပေးရမည့် စနစ်ဖြစ်ပြီး သူမ၏ ပျင်းရိမှုကို အားပေးရန်အတွက် မဟုတ်ချေ။

လွယ်ကူသော လမ်းစမရှိသဖြင့် ယွီမြောင်ဟွာသည် မယ်တော်ကြီး လွှတ်ပေးလိုက်သော ဝါရင့်အစေခံများထံမှ နန်းတွင်းယဉ်ကျေးမှုများကို ကြိုးစားသင်ယူရန် ဆုံးဖြတ်လိုက်သည်။

ယခုတစ်ခေါက် ရာထူးတိုးမြှင့်ခြင်း အခမ်းအနားမှာ ယခင် ဟွေ့ဖေးများတုန်းကထက် များစွာ ပိုခမ်းနားလှပေ၏။ နန်းတွင်းသူနန်းတွင်းသားများအပြင် မြို့တော်ရှိ အရာရှိအားလုံးနှင့် သူဌေးသူကြွယ်များပါ တက်ရောက်ကြမည် ဖြစ်ပေသည်။ ထိုအခမ်းအနားကို ထိုက်ဟယ် ခန်းမဆောင်ကြီးတွင် ကျင်းပမည် ဖြစ်၏။

ယွီမြောင်ဟွာအနေဖြင့် ထိုကဲ့သို့သော အခမ်းအနားမျိုးတွင် အမှားအယွင်းပြုလုပ်ကာ အရှက်မကွဲလိုချေ။

အကောင်းဘက်မှ ကြည့်လျှင် သူမ၏ မိခင်နှင့် ညီမလေး တက်ရောက်ခွင့် ရရှိမည်ဖြစ်သည်။ သူမ၏ ဖခင်မှာမူ အလုပ်ကိစ္စများကြောင့် ၂၀ ရက်နေ့မှသာ မြို့တော်သို့ ရောက်ရှိလာမည် ဖြစ်၏။

နှစ်သစ်ကူးစားသောက်ပွဲတွင် ဖခင်နှင့် တွေ့ရမည်ဖြစ်သဖြင့် သူမကိုယ်သူမ ပြန်လည်နှစ်သိမ့်လိုက်သည်။

ယွီမြောင်ဟွာသည် သင်ခန်းစာများကို လေးလေးနက်နက် သင်ယူခဲ့၏။ ဤခေတ်ကာလတွင် အခမ်းအနားတစ်ခု၌ ခလုတ်တိုက်လဲကျလျှင် လူများက ယဉ်ကျေးမှုမရှိသူအဖြစ်သာ သတ်မှတ်ကြမည်ဖြစ်ပြီး ချစ်စရာကောင်းသော အမှားဟု သဘောထားကြမည် မဟုတ်ချေ။

ရက်သတ္တပတ်ပေါင်းများစွာ လေ့ကျင့်ပြီးနောက် သူမကိုယ်သူမ ပြောင်းလဲသွားသည်ဟု ခံစားလိုက်ရပြီး မိမိ၏ လှပသိက္ခာရှိမှုအပေါ် ဂုဏ်ယူနေမိသည်။ တစ်နေ့နေ့ သူမ၏ ရုပ်ရည်ပျက်စီးသွားခဲ့လျှင်ပင် သူမ၏ အမူအရာကြောင့် လှပနေဦးမည်ဟု တွေးမိ၏။ ...မဟုတ်သေး၊ ထိုသို့ မတွေးသင့်ချေ။ ရုပ်ပျက်ဆင်းပျက်ဖြစ်လျှင်ပင် စနစ်မှ ဆေးဝါးများက သူမကို ပြန်လည်ကုသပေးနိုင်လေသည်။

စနစ်၏ အချိန်ကို စစ်ဆေးကြည့်သောအခါ ဧကရာဇ်မင်းမြတ် ရောက်လာတော့မည်ဖြစ်ကြောင်း ယွီမြောင်ဟွာ သိလိုက်၏။ စောစောပိုင်းက ချိုင်ရှို့လာပြောထားသဖြင့် ဧကရာဇ်က သူမနှင့်အတူ ထမင်းစားမည် ဖြစ်ကြောင်းသိထားသည်။

ယွီမြောင်ဟွာသည် သူမ အနှစ်သက်ဆုံး ဟင်းလျာများကို ပြင်ဆင်ခိုင်းလိုက်၏။ ဧကရာဇ် ဘာကြိုက်လဲဆိုသည်ကိုမူ သူမ အမှန်တကယ်ပင် မသိချေ။

ငါးဆားနယ် ကိုယ်လုပ်တော်