အခန်း ၂

အခန်း (၂)

သားရဲထိန်းချုပ်ခြင်း ဟင်းလင်းပြင်ဆိုသည်မှာ သားရဲထိန်းချုပ်သူတိုင်း၏ စိတ်အာရုံအနက်ရှိုင်းဆုံးတွင် တည်ရှိသော ဆန်းကြယ်သည့် နေရာလွတ်တစ်ခုဖြစ်ပြီး ၎င်းနေရာ၌ပင် သားရဲထိန်းချုပ်ခြင်းမျိုးစေ့ကို စတင်မွေးဖွားပေးခြင်းဖြစ်သည်။

၎င်းအပြင် ဤဟင်းလင်းပြင်သည် ယဉ်ပါးပြီးသား သားရဲများကို ထည့်သွင်းထားနိုင်ရုံသာမက သားရဲများ၏ ကြီးထွားမှု၊ ဆင့်ကဲပြောင်းလဲမှု၊ နှင့် စွမ်းရည်များ၊ နိယာမတရား များကို နားလည်သဘောပေါက်လာစေရန်အတွက်လည်း အလွန်ကြီးမားသော အထောက်အပံ့ကောင်းတစ်ခုကို ပေးစွမ်းနိုင်သည်။

ကျန်းဟန်သည် သူ၏သားရဲထိန်းချုပ်ခြင်းဟင်းလင်းပြင်ကို ယခုတင် အာရုံခံမိလိုက်ခြင်း ဖြစ်သည်။ မူလက သားရဲယဉ်ပါးစေခြင်းဟင်းလင်းပြင်သည် လဟာပြင်တစ်ခုမျှသာဖြစ်ပြီး ဖြူလွလွ မြူခိုးအနည်းငယ်သာ ပြည့်နှက်နေကာ အကျယ်အဝန်းမှာလည်း တစ်ကုဗမီတာခန့်သာ ရှိသည်။ ကျောက်စိမ်းတီကောင်နှင့် စာချုပ်ချုပ်ဆိုထားသော သားရဲထိန်းချုပ်ခြင်းမျိုးစေ့သည်လည်း ၎င်းဟင်းလင်းပြင်ထဲ၌ ငြိမ်သက်စွာ မျောလွင့်နေခဲ့သည်။

သို့သော်လည်း သူ့ဝိညာဉ်၏ ရောက်ရှိလာမှုကြောင့် ထိုသားရဲထိန်းချုပ်ခြင်းဟင်းလင်းပြင်တစ်ခုလုံးသည် အာဟာရဆေးကောင်းတစ်ခွက်ကို မှီဝဲလိုက်ရသည့်အလား ရုတ်တရက် တောက်ပလင်းလက်လာပြီး အရှိန်အဟုန်ဖြင့် ကျယ်ပြန့်သန်မာလာခဲ့သည်။

ဤကဲ့သို့ ပေါင်းစပ်မှုနှင့် မျိုးဗီဇပြောင်းလဲမှုများ ဖြစ်ပေါ်ပြီးနောက် သားရဲထိန်းချုပ်ခြင်းဟင်းလင်းပြင်တစ်ခုလုံးသည် ၁၀ ကုဗမီတာနီးပါးအထိ လျင်မြန်စွာ ကျယ်ပြန့်လာခဲ့ပြီး မြေပြင်ပေါ်တွင်လည်း ယခင်ကမရှိခဲ့ဖူးသော ဆန်းကြယ်သည့် ပုံရိပ်များစွာ ပေါ်ပေါက်လာခဲ့သည်။

ထို့ပြင် သားရဲထိန်းချုပ်ခြင်းဟင်းလင်းပြင်၏ အထက်ကောင်းကင်တွင် ရေတွက်၍မရနိုင်သော အဖြူရောင်မြူခိုးများ စုစည်းလာပြီး မမျှော်လင့်ဘဲ အလွန်လျင်မြန်စွာပင် အဖြူရောင်စွမ်းအင်လုံးတစ်လုံးအဖြစ် ပုံပေါ်လာခဲ့တော့သည်။

“ဒါက ဒုတိယမြောက် သားရဲထိန်းချုပ်ခြင်းမျိုးစေ့လား။ ဒါပေမဲ့ အလုပ်သင် သားရဲထိန်းချုပ်သူတွေမှာ သားရဲထိန်းချုပ်ခြင်းမျိုးစေ့ တစ်ခုပဲ ရှိရတာ မဟုတ်ဘူးလား။ ငါက စတင်သူအဆင့်ကိုတောင် မရောက်သေးဘူးလေ။”

ကျန်းဟန်သည် အသစ်မွေးဖွားလာသော ဤသားရဲထိန်းချုပ်ခြင်းမျိုးစေ့ကို အာရုံခံမိပြီးနောက် အနည်းငယ် ထိတ်လန့်သွားခဲ့သည်။ အလုပ်သင်အဆင့်မှာတင် သားရဲထိန်းချုပ်ခြင်းမျိုးစေ့ နှစ်ခုကို ပိုင်ဆိုင်ထားခြင်းသည် အခြားသူများထက် အစကတည်းက သားရဲတစ်ကောင် ပိုမိုပိုင်ဆိုင်ထားခြင်းနှင့် အတူတူပင် ဖြစ်သည်။

ဤအရာသည် အသစ်စက်စက်ဖြစ်ပြီး သန့်စင်သော အဖြူရောင် သားရဲထိန်းချုပ်ခြင်းမျိုးစေ့တစ်ခုဖြစ်ကာ အိမ်မွေးသားရဲအသစ်တစ်ကောင်နှင့် ထပ်မံစာချုပ်ချုပ်ဆိုနိုင်သည်။

မှားစရာမရှိပေ။ အဘယ်ကြောင့်ဆိုသော် ယခုအခါ သူ့ရရှိထားသော သားရဲထိန်းချုပ်ခြင်းဟင်းလင်းပြင်ထဲတွင် သားရဲထိန်းချုပ်ခြင်းမျိုးစေ့ နှစ်ခုရှိနေပြီး တစ်ခုပေါ်တွင် ကျောက်စိမ်းတီကောင်၏ ပုံရိပ်ပါရှိကာ အခြားတစ်ခုမှာမူ သန့်စင်သော အဖြူရောင် ဖြစ်နေသောကြောင့်ပင်။

“ငါက ကူးပြောင်းလာသူမို့လို့များလား။ ဒါက ငါ့ရဲ့ ကိုယ်ပိုင်ဝိညာဉ်နဲ့ သက်ဆိုင်တဲ့ သားရဲထိန်းချုပ်ခြင်းမျိုးစေ့လား။”

ဤအကြောင်းပြချက်တစ်ခုတည်းသာလျှင် လက်ရှိအခြေအနေကို ရှင်းပြနိုင်ပေလိမ့်မည်။

“ကောင်းကင်က လမ်းအားလုံးကို ဘယ်တော့မှ ပိတ်မထားဘူးပဲ။”

ကျန်းဟန်တစ်ယောက် စိတ်လှုပ်ရှားစွာဖြင့် သက်ပြင်းချလိုက်မိသည်။

ယခင်ခန္ဓာကိုယ်ပိုင်ရှင်ထံမှ ဆက်ခံရရှိထားသော မှတ်ဉာဏ်များထဲတွင် အစကတည်းက သားရဲထိန်းချုပ်ခြင်းမျိုးစေ့ နှစ်ခုနှင့် မွေးဖွားလာသူတစ်ဦးတစ်ယောက်မျှ မရှိခဲ့ဖူးသော်လည်း ဤသည်မှာ သူ့အတွက်မူ သံသယဖြစ်ဖွယ်မရှိဘဲ အလွန်ကောင်းမွန်သော အရာတစ်ခု ဖြစ်သည်။

ရှေ့ဆက်ရမည့် လမ်းခရီးသည် အလွန်ခက်ခဲနေဦးမည် ဖြစ်သော်လည်း နောက်ဆုံးတွင်တော့ မျှော်လင့်ချက်တချို့ ရှိလာခဲ့ပြီ ဖြစ်သည်။

“မင်းက အရမ်းအားနည်းနေပေမဲ့ ပါရမီစွမ်းရည်တစ်ခုတည်းက အရာအားလုံးကို မဆုံးဖြတ်ပေးနိုင်ဘူးလို့ ငါယုံကြည်တယ်။ အခုကစပြီး ငါတို့တူတူ ကြိုးစားကြတာပေါ့။”

ကျန်းဟန်သည် သူ့ရှေ့မှ ကျောက်စိမ်းတီကောင်လေးကို ကြည့်ပြီး အပြုံးတစ်ခုဖြင့် ပြောလိုက်သည်။

နောက်တစ်စက္ကန့်တွင် ဟင်းလင်းပြင်ထဲမှ ကြီးမားလှသော အစီအရင်တစ်ခု ရုတ်တရက် ထွက်ပေါ်လာပြီး ကျောက်စိမ်းတီကောင်လေးကို လွှမ်းခြုံသွားခဲ့သည်။

မကြာမီမှာပင် ကျောက်စိမ်းတီကောင်လေးသည် သားရဲထိန်းချုပ်ခြင်းဟင်းလင်းပြင်ထဲသို့ ရောက်ရှိသွားတော့သည်။

Σ(°△°|||)︴

ကျောက်စိမ်းတီကောင်လေးသည် ခေါင်းကိုမော့ကာ ပတ်ဝန်းကျင်ကို ဇဝေဇဝါဖြင့် ဝေ့ကြည့်နေမိသည်။ ဤသည်မှာ ၎င်းကျန်းဟန်၏ သားရဲထိန်းချုပ်ခြင်းဟင်းလင်းပြင်ထဲသို့ ဒုတိယအကြိမ် ရောက်ရှိလာခြင်း ဖြစ်သည်။ ပထမအကြိမ်မှာ စာချုပ် ချုပ်ဆိုပြီးစအချိန်က ဖြစ်သည်။

၎င်းကို အံ့အားသင့်သွားစေသည့်အရာမှာ အချိန်ဘယ်လောက်မှမရှိသေးဘဲ ကျန်းဟန်၏ သားရဲထိန်းချုပ်ခြင်းဟင်းလင်းပြင်က အဘယ်ကြောင့် ဤမျှအထိ ကြီးမားသွားရသနည်း ဆိုခြင်းပင်။

ထို့အပြင် ၎င်းအတွင်းသို့ ရောက်ရှိလာသည်နှင့်တစ်ပြိုင်နက် ၎င်း၏ ခန္ဓာကိုယ်မျက်နှာပြင်မှ အမှန်တကယ်ပင် အလင်းရောင်များ ဖြာထွက်လာပြီး ဝိညာဉ်စွမ်းအင်များကို စုပ်ယူသည့်နှုန်းမှာလည်း သိသိသာသာ မြန်ဆန်လာခဲ့သည်။

သခင်...ဘာတွေဖြစ်သွားတာလဲ။

ကျောက်စိမ်းတီကောင်လေး၏ နုနယ်လှသော ဉာဏ်ရည်စွမ်းရည်လေးဖြင့်မူ ဤကဲ့သို့ အံ့အားသင့်ဖွယ် အပြောင်းအလဲကြီးကို နားမလည်နိုင်သေးပေ။

သို့သော် ၎င်းနားလည်လိုက်သည်မှာ သခင်ဖြစ်သူသည် မိမိကို လက်ခံလိုက်ပြီဖြစ်ပြီး ယခင်ကလို မုန်းတီးခြင်း သို့မဟုတ် အလိုမရှိခြင်းမျိုး မရှိတော့ပေ။ ထိုအချက်က ၎င်းကို အတိုင်းထက်အလွန် ပျော်ရွှင်တက်ကြွသွားစေခဲ့လေသည်။

သူ၏ကြိုးစားမှုက အမှန်တကယ်ပင် အရာထင်ခဲ့လေပြီ။ ၎င်းသည် သခင်ဖြစ်သူ၏ အသိအမှတ်ပြုမှုကို ရရှိခဲ့လေပြီ။

၎င်း ဝမ်းမြောက်ဝမ်းသာ ဖြစ်နေစဉ်မှာပင် ၎င်း၏ခန္ဓာကိုယ်မှ အစိမ်းရောင် အလင်းတန်းတစ်ခု ရုတ်တရက် ဖြာထွက်လာ၏။ ထိုအစိမ်းရောင် အလင်းတန်းများ မှေးမှိန်ပျောက်ကွယ်သွားသောအခါ ၎င်း၏ ဖြူဖွေးသောခန္ဓာကိုယ်မှာ တစ်ဆိုက်ခန့် ပိုမိုကြီးထွားလာပြီး အဖြူရောင်ကျောက်စိမ်းတစ်တုံးကဲ့သို့ ပိုမိုတောက်ပပြောင်လက်လာခဲ့သည်။

“ဒါက အစေခံအဆင့်ရဲ့ အလယ်အလတ်အဆင့်ကို အောင်မြင်စွာ တက်လှမ်းနိုင်ခဲ့တာလား။ ဂုဏ်ယူပါတယ်...။”

ကျန်းဟန်သည် ကျောက်စိမ်းတီကောင်လေး၏ ပြောင်းလဲမှုကို အာရုံခံမိလိုက်ပြီး အံ့အားသင့်သွားသည့် အရိပ်အယောင်တချို့ ပြသလိုက်သည်။ ဤသည်မှာ မွန်းစတားတစ်ကောင် အဆင့်တက်သည်ကို သူ ပထမဦးဆုံးအကြိမ် မြင်ဖူးခြင်းဖြစ်ပြီး အလွန်ပင် ဆန်းကြယ်လှသည်။

ကျောက်စိမ်းတီကောင်လေးသည် ၎င်း၏ခေါင်းကို ရမ်းခါလိုက်ပြီး စိတ်လှုပ်ရှားစွာဖြင့် လှည့်ပတ်ကာ ပါးစပ်ကိုဖွင့်၍ ပိုးမျှင်ပစ်လွှတ်ခြင်းစွမ်းရည်ကို အသုံးပြုကာအဖြူရောင်ပန်းပွင့်လေးတစ်ပွင့်ကို ရက်လုပ်ပြလိုက်၏။ ၎င်းသည် ဤအခြေအနေအပေါ် အလွန်အမင်း စိတ်လှုပ်ရှားဝမ်းသာနေကြောင်း ထင်ရှားလှပေသည်။

ကျန်းဟန်သည်လည်း ကျောက်စိမ်းတီကောင်လေး၏ စိတ်ခံစားချက်ကို နားလည်ပေးနိုင်ပါသည်။ ကျောက်စိမ်းတီကောင်တစ်ကောင်၏ ဘဝစက်ဝန်းအရဆိုလျှင် ၎င်းသည် အစေခံအဆင့်၏ အလယ်အလတ်အဆင့်သို့ လွန်ခဲ့သောအချိန်ကတည်းက ရောက်ရှိနေသင့်ပြီ ဖြစ်သည်။

ဘာပဲဖြစ်ဖြစ် ၎င်း၏သက်တမ်းမှာ သုံးလသာရှိပြီး ယခုအခါ တစ်လကျော်ပင် ကုန်လွန်သွားခဲ့ပြီ ဖြစ်သည်။ တောရိုင်းထဲရှိ ကျောက်စိမ်းတီကောင်များသည် ယခုအချိန်ဆိုလျှင် အစေခံအဆင့်နှောင်းပိုင်းသို့ပင် ရောက်ရှိနေကြပြီ ဖြစ်သည်။

ဘဝစက်ဝန်း တိုတောင်းလှသဖြင့် ၎င်းတို့၏ ကြီးထွားမှုနှုန်းမှာလည်း သဘာဝအတိုင်း မြန်ဆန်လှသည်။

ဤကျောက်စိမ်းတီကောင်လေး ယခုလို ဖြစ်နေရသည့် အကြောင်းရင်းမှာ... ယခင်ခန္ဓာကိုယ်ပိုင်ရှင်သည် ၎င်းအား ကျောက်စိမ်းတီကောင်မျှသာဖြစ်ကြောင်း သိရှိသွားပြီးနောက်တွင် မည်သည့် ဝိညာဉ်ပစ္စည်းကိုမျှ မကျွေးမွေးခဲ့ဘဲ သာမန်သစ်ရွက်အချို့ကိုသာ ကျွေးမွေးခဲ့သောကြောင့် ဖြစ်ပေသည်။

၎င်းသည် တောရိုင်းထဲရှိ ကျောက်စိမ်းတီကောင်တစ်ကောင်ကိုပင် မယှဥ်နိုင်ခဲ့ပေ။

သို့သော်လည်း မှတ်ဉာဏ်များအရ ကျန်းဟန်သည် ကျောက်စိမ်းတီကောင်လေး၏ ဇွဲလုံ့လနှင့် ကြိုးစားအားထုတ်မှုကို တွေ့ရှိခဲ့ရ၏။ ထိုသို့သော အခြေအနေမျိုးတွင်ပင် ၎င်းသည် ပိုးမျှင်ပစ်လွှတ်ခြင်းစွမ်းရည်ကို နေ့စဉ်ရက်ဆက် အသည်းအသန် လေ့ကျင့်ခဲ့သည်။ ၎င်းသည် ခုနက ပိုးမျှင်ပစ်လွှတ်ခြင်းစွမ်းရည်ကို အသုံးပြု၍ ပန်းပွင့်ပုံစံလေးကိုပင် ကျွမ်းကျင်စွာ ရက်လုပ်ပြနိုင်ခဲ့ခြင်းဖြင့် သက်သေပြနေခဲ့လေသည်။

ဝိညာဉ်အာဟာရပစ္စည်းများ မရှိသဖြင့် ၎င်းသည် သာမန်သစ်ရွက်များကိုသာ တရစပ် စားသုံးခဲ့ရ၏။ မည်သို့ပင်ဆိုစေကာမူ သာမန်သစ်ရွက်များတွင်လည်း ဝိညာဉ်စွမ်းအင် အနည်းငယ် ပါရှိတတ်ရာ အမြောက်အမြား စားသုံးခြင်းဖြင့် ထိုစွမ်းအင်ကို အတိုင်းအတာတစ်ခုအထိ ရရှိနိုင်သည်။

ဤကျောက်စိမ်းတီကောင်လေး၏ ဘဝစက်ဝန်းမှာ အလွန်တိုတောင်းလှသော်လည်း ကျန်းဟန်ကမူ ၎င်းသည် သူ့ယခင်ခန္ဓာကိုယ်ပိုင်ရှင်ထက် များစွာ ပိုမိုကြံ့ခိုင်သန်မာသည်ဟု ခံစားမိပေသည်။ ဤကဲ့သို့သော သခင်မျိုးနှင့် ဆုံတွေ့ခဲ့ရလင့်ကစား ၎င်းသည် ကြီးထွားလာရန်အတွက် ဆက်လက်၍ အသည်းအသန် ကြိုးစားနေဆဲ ဖြစ်သည်။

၎င်း၏ ယခင်ခန္ဓာကိုယ်ပိုင်ရှင်မှာလည်း ကျန်းဟန်ဟုပင် အမည်တွင်သော်လည်း လက်ရှိကျန်းဟန်ကမူ သူ့စိတ်ထဲတွင် ယခင်ပိုင်ရှင်ကို အထင်သေးမိသည်။

သူသည် စာကို ကြိုးစားမသင်ယူခဲ့ရုံသာမက အရည်အသွေးမြင့်မားသော သားရဲတစ်ကောင်ကို ဝယ်ယူပြီး အခြေအနေကို အလွယ်တကူ အလှည့်အပြောင်းလုပ်ရန်သာ စဉ်းစားခဲ့သည်။

အကယ်၍ အရည်အသွေးမြင့်မားသော သားရဲတစ်ကောင် ရှိရုံမျှဖြင့် အခြေအနေကို ပြောင်းလဲပစ်နိုင်မည်ဆိုလျှင် ဤကမ္ဘာကြီးက အလွန် ပျင်းစရာကောင်းသွားပေလိမ့်မည်။ သားရဲတစ်ကောင်၏ အရည်အချင်းစွမ်းရည်မှာ ကဏ္ဍတစ်ခုမျှသာ ဖြစ်ပြီး အမှန်တကယ် စွမ်းအားကြီးမားသောအရာမှာ သားရဲထိန်းချုပ်သူ ကိုယ်တိုင်သာ ဖြစ်သည်။

ပို၍ မိုက်မဲသောအချက်မှာ သားရဲတစ်ကောင်ကို ဝယ်ယူခြင်းကဲ့သို့သော ကြီးမားသည့် ကိစ္စရပ်မျိုး၌ လောဘဇော တက်ခဲ့ခြင်းပင်။ မည်သည့် အခြေခံအသိပညာမျှ မရှိဘဲနှင့် သားရဲပွဲစားတစ်ဦးထံမှ သားရဲကို ဝယ်ယူဝံခဲ့ခြင်းမှာ...ဤရလဒ်သည် မိမိပြုခဲ့သော ကံကြောင့် မိမိသာ ပြန်လည်ခံစားရခြင်းဟု ဆိုရပေမည်။

ကျန်းဟန်သည် အကယ်၍ ယခင်ခန္ဓာကိုယ်ပိုင်ရှင်အနေဖြင့် လှည့်ဖြားခြင်း မခံခဲ့ရလျှင်ပင် မည်သည့်အရာကိုမျှ အောင်မြင်အောင် လုပ်ဆောင်နိုင်လိမ့်မည်မဟုတ်ဟု ခံစားလိုက်ရသည်။ ကျောက်စိမ်းတီကောင်လေး အလွန်အမင်းကြိုးစားအားထုတ်နေချိန်၌... သူကမူ မိမိကိုယ်ကိုယ် လက်လျှော့အရှုံးပေးရန်သာ သိပြီး တာဝန်မဲ့စွာဖြင့် မိမိ၏ဘဝကို အဆုံးစီရင်ခဲ့သည်။

အနည်းဆုံးတော့ သူ အရင်ဆုံး အစွမ်းကုန် ကြိုးစားကြည့်သင့်ခဲ့သည်။ ရှုံးနိမ့်ခဲ့လျှင်ပင် မည်သည့်နောင်တမျှ ကျန်ရစ်ခဲ့မည် မဟုတ်ပေ။

“အခုကစပြီး ငါတို့တူတူ ကြိုးစားကြရအောင်။ ငါ့ရဲ့ အရင်က ပြုမူခဲ့တဲ့ အပြုအမူတွေအတွက် တောင်းပန်ပါတယ်။ ငါတို့ အစကနေ ပြန်စကြမယ်။”

ကျန်းဟန်သည် ကျောက်စိမ်းတီကောင်လေးကို မြေပြင်ပေါ်သို့ ပြန်ချပေးလိုက်ပြီး ၎င်းကို စိုက်ကြည့်ကာ ပြောလိုက်သည်။

ကျောက်စိမ်းတီကောင်လေးသည် အနည်းငယ် ကြောင်အသွားပြီးနောက် ခေါင်းကို တရစပ် ငြိတ်ပြကာ ပိုးမျှင်ပစ်လွှတ်ခြင်းစွမ်းရည်ဖြင့် ပျော်ရွှင်နေသော အပြုံးမျက်နှာပုံစံလေးကို ရက်လုပ်ပြခဲ့သည်။ (*๓´╰╯`๓)♡

“ဒီနေ့ကစပြီး မင်းကို ပိုင်လင်းလို့ ခေါ်မယ်။ ငါတို့တူတူ ကြိုးစားသွားမယ်ဆိုရင်... ငါတို့ရဲ့ အကန့်အသတ်တွေကို ကျော်ဖြတ်ပြီး သားရဲထိန်းချုပ်ခြင်းရဲ့ ထိပ်ဆုံးအဆင့်မှာ အမှန်တကယ် ရပ်တည်နိုင်လိမ့်မယ်လို့ ငါယုံကြည်တယ်။”

ကျန်းဟန်သည် ကျောက်စိမ်းတီကောင်လေးကို ကြည့်ပြီး အပြုံးတစ်ခုဖြင့် ပြောလိုက်သည်။ ၎င်းတို့ အောင်မြင်နိုင်ပါ့မလား ဆိုသည်ကိုမူ သူ ထည့်မတွက်ချေ။ သူသည် ပိုင်လင်းကို ယုံကြည်မှုပေးသင့်ပြီး ၎င်းအနေဖြင့် နဂါးတံခါးကို အမှန်တကယ် ကျော်ဖြတ်နိုင်သည်ဟု ယုံကြည်လာအောင် လုပ်ဆောင်ပေးသင့်သည်ဟု သူ ခံစားမိပေသည်။

အကယ်၍ နောက်ဆုံးတွင် ရှုံးနိမ့်သွားခဲ့လျှင်ပင် မည်သည့်နောင်တမျှ ကျန်ရစ်လိမ့်မည် မဟုတ်ပေ။

ကျောက်စိမ်းတီကောင်လေးသည် ခေါင်းကို တရစပ် ငြိတ်ပြပြီးနောက် အခြားသော ပျော်ရွှင်စရာ အမူအရာလေးတစ်ခုကို ထပ်မံရက်လုပ်ပြလိုက်ပြန်သည်။ (＾＿＾)☆

“ကောင်းပြီ။ ဒါဆို အိမ်ပြန်ကြစို့...ပိုင်လင်း။”

ကျန်းဟန်သည် လက်ကို ဆန့်တန်းကာ မြေပြင်ပေါ်မှ ပိုင်လင်းကို ကောက်ယူလိုက်ပြီး သူ့မှတ်ဉာဏ်ထဲရှိ အိမ်ရှိရာ အရပ်မျက်နှာဆီသို့ လျှောက်သွားခဲ့တော့သည်။

ဤအချိန်တွင် နေမင်းသည် လုံးဝ နစ်မြုပ်သွားခဲ့ပြီဖြစ်ရာ အနောက်ဘက် ကောင်းကင်တွင် နောက်ဆုံးကျန်ရစ်သော ဆည်းဆာအလင်းတန်းများသာ ကျန်ရှိတော့သည်။

ပိုင်လင်းသည် ကျန်းဟန်၏ ပွေ့ပိုက်ခြင်းကို ခံထားရသဖြင့် ၎င်း၏ ပျော်ရွှင်မှုများမှာ လျှံထွက်နေခဲ့သည်။ ၎င်း၏ အေးမြသော ခန္ဓာကိုယ်လေးသည် ကျန်းဟန်၏ လက်မောင်းကို ညင်သာစွာ ပွတ်သပ်နေပြီး ၎င်း၏ တီကောင်ခန္ဓာကိုယ်တစ်ခုလုံးမှ မှိန်ဖျော့ဖျော့ အစိမ်းရောင်အလင်းတန်းလေးများ ဖြာထွက်နေခဲ့သည်။

ကျန်းဟန်သည် အနောက်ဘက်ကောင်းကင်ရှိ ဆည်းဆာအလင်းတန်းများကို တစ်ချက် လှည့်ကြည့်လိုက်သည်။ ရှေ့ဆက်ရမည့် လမ်းခရီးသည် မှောင်မိုက်နေဦးမည် ဖြစ်သော်လည်း သူသည် ဤကမ္ဘာသစ်ထဲသို့ စွန့်စားဝင်ရောက်ရန်အတွက် ယုံကြည်မှုအချို့ကို အတိုင်းအတာတစ်ခုအထိ ရရှိထားပြီး ဖြစ်နေခဲ့ချေပြီ။

သားရဲထိန်းချုပ်သူ တစ်ဦးအနေဖြင့် သားရဲထိန်းချုပ်သူတိုင်းသည် ကိုယ်ပိုင်ပါရမီစွမ်းရည်တစ်ခုစီကို ပိုင်ဆိုင်ကြပေသည်။

သားရဲထိန်းချုပ်သူတစ်ဦး၏ ပါရမီစွမ်းရည်များသည် အမျိုးမျိုး ကွဲပြားကြပြီး အဓိကအားဖြင့် ကူညီပံ့ပိုးမှုအမျိုးအစား၊ အဆင့်မြှင့်တင်မှုအမျိုးအစားနှင့် ဆက်သွယ်မှုအမျိုးအစား ဟူ၍ ခွဲခြားထားသည်။

ယေဘုယျအားဖြင့် အဆင့်မြှင့်တင်မှုနှင့် ဆက်သွယ်မှုအမျိုးအစားများမှာ အတွေ့ရဆုံး ဖြစ်သည်။ မြှင့်တင်မှုအမျိုးအစား ပါရမီစွမ်းရည်များသည် မိမိ၏ သားရဲများကို ပိုမိုသန်မာလာစေနိုင်ပြီး ၎င်းတို့၏ တိုက်ခိုက်ရေးစွမ်းရည်ကို မြှင့်တင်ပေးနိုင်သည်။

ဆက်သွယ်မှုအမျိုးအစားမှာမူ မိမိ၏ သားရဲများနှင့် စကားပြောဆို ဆက်သွယ်နိုင်ပြီး အပြန်အလှန် နားလည်မှုကို ဖြစ်စေသည့် ပါရမီစွမ်းရည်မျိုး ဖြစ်သည်။

ပံ့ပိုးမှုအမျိုးအစား ပါရမီစွမ်းရည်များသည် သားရဲများ၏ ကြီးထွားမှုနှင့် ဆင့်ကဲပြောင်းလဲမှုတို့အတွက် ကြီးမားသော အထောက်အပံ့ကောင်းကို ပေးစွမ်းနိုင်သောအရာများ ဖြစ်သည်။

ကျန်းဟန်၏ ယခင်ခန္ဓာကိုယ်ပိုင်ရှင် ရရှိထားသော ပါရမီစွမ်းရည်အမည်မှာ စိတ်ဝိညာဉ်စွမ်းအင်အသိဟုခေါ်ပြီး ပံ့ပိုးမှုအမျိုးအစား ပါရမီစွမ်းရည်တစ်ခု ဖြစ်သည်။ ၎င်းကို အသုံးပြုပြီး သားရဲများ၏ ဉာဏ်ရည်ကို မြှင့်တင်ပေးနိုင်ပြီး ၎င်းတို့အနေဖြင့် စွမ်းရည်များနှင့် နိယာမတရားများကို ပိုမိုကောင်းမွန် လျင်မြန်စွာ နားလည်သဘောပေါက်လာစေရန် အထောက်အပံ့ကောင်း ပေးနိုင်သည်။

ဤသည်မှာ အလွန်ကောင်းမွန်သော ပါရမီတစ်ခု ဖြစ်ပြီး သားရဲများကို အချို့သော စွမ်းရည်များအား ပိုမိုမြန်ဆန်စွာ သင်ယူနိုင်စေမည်ဖြစ်သည်။ အကယ်၍ ကောင်းမွန်စွာ အသုံးချနိုင်ပါက သားရဲများကို အပိုဆောင်းစွမ်းရည်အချို့ကိုပင် သင်ယူစေနိုင်ပေလိမ့်မည်။

ဤအချက်သည်ပင် ယခင်ခန္ဓာကိုယ်ပိုင်ရှင်အနေဖြင့် အခြေအနေကို ပြောင်းပြန်လှန်နိုင်မည်ဟု ထင်မှတ်ခဲ့သည့် အကြောင်းရင်းဖြစ်ပေသည်။ အဘယ်ကြောင့်ဆိုသော် ဤသားရဲထိန်းချုပ်ခြင်း ပါရမီသည် ပိုမိုအသုံးဝင်သော ပံ့ပိုးမှုအမျိုးအစားကဏ္ဍတွင် ပါဝင်နေသောကြောင့်ပင်။

နှမြောစရာကောင်းသည်မှာ ယခင်ပိုင်ရှင်၏ စိတ်နေသဘောထား ချို့ယွင်းချက်များက အလွန်ပြင်းထန်လွန်းလှပြီး ဤစွမ်းရည်ကို အလဟဿ ဖြုန်းတီးပစ်ခဲ့ခြင်းပင်။

ယခုအခါ ကျန်းဟန်၏ ယုံကြည်မှုသည် ဤပါရမီစွမ်းရည်တစ်ခုတည်းမှ လာခြင်းမဟုတ်ဘဲ သူ ယခုတင် နိုးထလာခဲ့သည့် ဒုတိယမြောက် ပါရမီစွမ်းရည်မှ ရရှိလာခြင်းဖြစ်သည်။

ဒုတိယမြောက် သားရဲထိန်းချုပ်ခြင်းမျိုးစေ့ မွေးဖွားလာမှုနှင့်အတူ သူ၏ ကိုယ်ပိုင်ဝိညာဉ်နှင့်သာ သီးသန့်သက်ဆိုင်သည့် ဒုတိယမြောက် သားရဲထိန်းချုပ်ခြင်း ပါရမီစွမ်းရည်သည်လည်း တစ်ပါတည်း နိုးထလာခဲ့ပြီ ဖြစ်သည်။