အခန်း ၄

အခန်း ၄

ဘုန်းခနဲမြည်သံနှင့်အတူ ကျောက်စိမ်းတီကောင်လေးမှာ အရှိန်ပြင်းစွာ ဝင်တိုက်မိသွားသဖြင့် အနည်းငယ် မူးဝေသွားရသော်လည်း ၎င်း၏ခန္ဓာကိုယ်မှ မှိန်ဖျော့ဖျော့ အလင်းတန်းတစ်ခု စတင်တောက်ပလာခဲ့သည်။

သာမန်မျက်စိဖြင့် မမြင်တွေ့နိုင်သော ထူးခြားဆန်းကြယ်သည့် ချီစွမ်းအင်များသည် ပတ်ဝန်းကျင်မှ တဖွဲဖွဲ စုစည်းလာပြီး ကျောက်စိမ်းကောင်လေး၏ ခန္ဓာကိုယ်ထဲသို့ ပေါင်းစပ်ဝင်ရောက်သွားကြသည်။

ကျောက်စိမ်းတီကောင်လေးမှာ ခဏတာ ကြောင်အသွားပြီးနောက် ခန္ဓာကိုယ်တစ်ခုလုံး အနည်းငယ် နွေးထွေးပူရှိန်းလာသည်ကို ခံစားလိုက်ရသည်။ ၎င်းက ကျန်းဟန်ဘက်သို့ လှည့်ကြည့်လိုက်ပြီး ဤအရာက သူ့သခင်၏ ပါရမီစွမ်းအင်မြှင့်တင်မှု အာနိသင်ကြောင့် ဖြစ်ရဖြစ်ဖြစ်ကြောင်း သဘောပေါက်သွားခဲ့လေသည်။

၎င်းက ခေါင်းညိတ်ပြလိုက်ပြီး နောက်တစ်ကြိမ် ထပ်မံပြေးဝင်တိုက်ခိုက်လိုက်ပြန်သည်။ မှန်ပါသည်။ ပိုမိုထူးခြားသော ချီစွမ်းအင်များ ၎င်း၏ခန္ဓာကိုယ်ထဲသို့ ထပ်မံစီးဝင်လာပြန်သည်။ ကျောက်စိမ်းတီကောင်လေးသည် မိမိ၏ အရေပြားများ ပိုမိုမာကြောသန်မာလာသည်ကို ခံစားလိုက်ရတော့သည်။

တစ်ချိန်တည်းမှာပင် ကျန်းဟန်၏ မျက်စိရှေ့မှောက် လေဟာနယ်ထဲ၌ ပိုးစုန်းကြူးလေးများကဲ့သို့ သေးငယ်သော စာလုံးတန်းလေးများ ပေါ်ထွက်လာခဲ့သည်။

[သင်၏ သားရဲသည် ကြိုးကြိုးစားစား လေ့ကျင့်နေပြီး အံ့ဖွယ်ချီ အမြောက်အမြားကို စုပ်ယူပြီး ဖြစ်သည်။ အံ့ဖွယ်ဆင့်ကဲပြောင်းလဲခြင်း လမ်းကြောင်း ပွင့်သွားပါပြီ။

လမ်းကြောင်း ၁ - ကျောက်စိမ်းတီကောင်၏ အသွင်ပြောင်းလဲခြင်း။

နေ့စဉ် အရှိန်ပြင်းတိုက်ခိုက်ခြင်း အကြိမ်ရေ ၁၀၀၀ နှင့် ပိုးမျှင်ပစ်လွှတ်ခြင်း အကြိမ်ရေ ၁၀၀၀ ကို တစ်ပတ်တိတိ လုပ်ဆောင်ရမည်။ ၎င်းသည် ပြီးပြည့်စုံသော ကျောက်စိမ်းတီကောင် ခန္ဓာကိုယ်တည်ဆောက်ပုံကို ပေးစွမ်းနိုင်မည်ဖြစ်ပြီး ကျောက်စိမ်းဖီးနစ်လိပ်ပြာအဖြစ်သို့ သေချာပေါက် ဆင့်ကဲပြောင်းလဲနိုင်မည့်အပြင် ရှားပါးသော ကျောက်စိမ်းဖီးနစ်လိပ်ပြာဘုရင်အဖြစ်သို့ ပြောင်းလဲနိုင်ခြေ ၅၀ ရာခိုင်နှုန်း ရှိသည်။

လမ်းကြောင်း ၂ - လျှပ်စီးတီကောင်အဖြစ် အသွင်ပြောင်းလဲခြင်း။

လျှပ်စစ်ရှော့ခ်တိုက်မှုကို အောင့်ခံရင်း နေ့စဉ် အိပ်ထမတင် အကြိမ် ၂၀၀၀ နှင့် အရှိန်ပြင်းတိုက်ခိုက်ခြင်းအကြိမ် ၁၀၀၀ ကို ၁၀ ရက်တိတိ ပြီးမြောက်အောင် လုပ်ဆောင်ရမည်။ ၎င်းသည် ကြယ် ၃ ပွင့် အလားအလာရှိသော အမည်မသိ လျှပ်စီးအမျိုးအစား သားလောင်းကောင်အဖြစ်သို့ သန္ဓေပြောင်းလဲသွားမည်။

လမ်းကြောင်း ၃ - နဂါးအဖြစ် အသွင်ပြောင်းလဲခြင်း။

ဖိအားပုံဆောင်ခဲ၏ ဖိနှိပ်မှုအောက်တွင် နေ့စဉ် အနှုတ် ၂၀ ဒီဂရီဆဲလ်စီးယပ်စ်၌ အရှိန်ပြင်းတိုက်ခိုက်ခြင်းအကြိမ် ၃၀၀၀၊ ၁၅၀ ဒီဂရီဆဲလ်စီးယပ်စ်၌ အသက်ရှူခြင်း အကြိမ် ၃၀၀၀ နှင့် ခုန်ခြင်း အကြိမ် ၁၀၀၀၀ ကို ပြီးမြောက်အောင် လုပ်ဆောင်ရမည်။ နောက်ဆုံးတွင် ဖိအားစွမ်းရည်ကို နားလည်သဘောပေါက်ရမည်။ ရက်ပေါင်း ၃၀ အကြာတွင် ၎င်းသည် နဂါးသွေးမျိုးဆက် တစ်စိပ်တစ်ပိုင်းကို ရရှိမည်ဖြစ်ပြီး ကြယ် ၄ ပွင့် အလားအလာရှိသော အမည်မသိ သန္ဓေပြောင်းသားလောင်းကောင်အဖြစ်သို့ ပြောင်းလဲသွားမည်။

မှတ်ချက်။ ။ အံ့ဖွယ်လမ်းကြောင်းများကို တစ်ခုပေါ်တစ်ခု ထပ်ဆင့်၍ ရရှိနိုင်သည်။ သားရဲသည် လက်ရှိအဆင့်၏ အသွင်ပြောင်းလဲခြင်းကို ပြီးမြောက်ပြီးမှသာ အံ့ဖွယ်ဆင့်ကဲပြောင်းလဲခြင်း လမ်းကြောင်းအသစ်ကို ဖွင့်နိုင်မည် ဖြစ်သည်။]

ကျန်းဟန်သည် သူ့မျက်စိရှေ့ လေဟာနယ်ထဲတွင် ပျံဝဲနေသော ပိုးစုန်းကြူးကဲ့သို့ သေးငယ်သော စာလုံးလေးများကို စိုက်ကြည့်နေမိ၏။ ၎င်းတို့က သူ့မျက်ကြည်လွှာပေါ်တွင် ရှိနေသလိုလို လေထုထဲတွင် ရှိနေသလိုလိုပင်။ ယခုမှသာ သူသည် မိမိ၏ ဒုတိယမြောက် သားရဲထိန်းပါရမီကို အပြည့်အဝ နားလည်သဘောပေါက်သွားတော့သည်။

သူ့သားရဲသာ လုံလောက်အောင် ကြိုးစားအားထုတ်မည်ဆိုပါက မည်သည့်အရာမဆို ဖြစ်နိုင်ခြေရှိပုံရသည်။ ဒါက တကယ့်ကို အံ့သြစရာကောင်းလှပြီး သူ့ကို အနာဂတ်အတွက် မျှော်လင့်ချက်များဖြင့် ချက်ချင်း ပြည့်နှက်သွားစေခဲ့လေသည်။

“ဆက်ကြိုးစားထား ပိုင်လင်း။ ငါလည်း မင်းနဲ့အတူတူ လုပ်မယ်။ မင်း အရှိန်ပြင်းတိုက်ခိုက်ခြင်း၁၀ ကြိမ်လုပ်တိုင်း ငါ ထိုင်ထ တစ်ကြိမ် လုပ်မယ်။”

ကျန်းဟန်က ကျောက်စိမ်းကောင်လေးကို အားပေးလိုက်သည်။ သားရဲထိန်းချုပ်သူများမှာလည်း ကိုယ်လက်လှုပ်ရှားမှု လုပ်ရန် လိုအပ်သဖြင့် အတူတူလေ့ကျင့်ခြင်းက အကောင်းဆုံးပင်။ ၎င်းက သူတို့ကြားရှိ ရင်းနှီးမှုကို တိုးပွားစေရုံသာမက ၎င်းကို အံ့ဖွယ်ဆင့်ကဲပြောင်းလဲခြင်း ပန်းတိုင်ဆီသို့ အရောက်လှမ်းနိုင်ရန်လည်း တွန်းအားပေးရာရောက်ပေသည်။

အံ့ဖွယ်လမ်းကြောင်းများကို တစ်ခုပေါ်တစ်ခု ထပ်ဆင့်၍ ရနိုင်သည်ဖြစ်ရာ အရိုးရှင်းဆုံးလမ်းကြောင်းမှ စတင်ခြင်းမှာ သဘာဝကျပေသည်။ အဆုံးစွန်၌ လူသားဟူသည် ခြေလှမ်းတစ်လှမ်းချင်းစီဖြင့်သာ သွားရမည် မဟုတ်ပါလော။ လက်ရှိတွင် ကျောက်စိမ်းတီကောင်လေးအနေဖြင့် နဂါးအဖြစ် အသွင်ပြောင်းလဲခြင်း လေ့ကျင့်ခန်းဆီသို့ တိုက်ရိုက်ခုန်ကျော်ရန်မှာ လုံးဝ မဖြစ်နိုင်ပေ။

၎င်း၏ လက်ရှိခန္ဓာကိုယ်အခြေအနေအရ အနှုတ် ၂၀ ဒီဂရီပဲဖြစ်ဖြစ် ၁၅၀ ဒီဂရီပဲဖြစ်ဖြစ် သေစေနိုင်လောက်သည်။ ပြီးပြည့်စုံသော ကျောက်စိမ်းတီကောင် ခန္ဓာကိုယ်တည်ဆောက်ပုံကို ရရှိပြီးမှသာ ၎င်းကို စမ်းသပ်ကြည့်နိုင်စွမ်း ရှိမည်ဖြစ်သည်။

ကျောက်စိမ်းတီကောင်လေး - (｡>∀<｡)

၎င်းသည် ကျန်းဟန်၏ အလုပ်ခိုးလုပ်နေမှုကို လုံးဝရိပ်မိပုံမရဘဲ သခင်ဖြစ်သူနှင့် အတူတူ လှုပ်ရှားရသည့် ပျော်ရွှင်မှုထဲတွင်သာ စီးမျောနေရှာသည်။

ကျန်းဟန်တစ်ယောက် အနည်းငယ် ပြုံးလိုက်မိပြီး ကျောက်စိမ်းတီကောင်လေး၏ အူတူတူအတတ ပုံစံလေးကို ကြည့်ကာ သဘောကျမိသွားခဲ့သည်။ သူ ချက်ချင်းပင် ထိုင်ထတစ်ကြိမ် လုပ်လိုက်ရင်း ပြောလိုက်၏။

“ငါ တစ်ကြိမ်လုပ်ပြီးပြီ။ မင်းအလှည့်ပဲ။”

ဘုန်း၊ ဘုန်း၊ ဘုန်း...

ဘုန်းခနဲ၊ ဒိုင်းခနဲ မြည်သံများ ဆက်တိုက်ထွက်ပေါ်လာပြီးနောက် ကျောက်စိမ်းတီကောင်လေးသည် စိတ်လှုပ်ရှားစွာဖြင့် အရှိန်ပြင်းတိုက်ခိုက်ခြင်း ၁၀ ကြိမ်ကို ပြီးမြောက်သွားခဲ့သည်။ ၎င်းက မူးဝေဝေမျက်လုံးလေးများဖြင့် ကျန်းဟန်ကို ကြည့်လိုက်သည်။ ၎င်းအတွက်မူ ကျန်းဟန်က မိမိကို လက်ခံပေးထားခြင်းကပင် အပျော်ဆုံးအရာ ဖြစ်နေခဲ့လေသည်။

မကြာမီ ကျန်းဟန်က နောက်ထပ် ထိုင်ထတစ်ကြိမ် လုပ်ပြီးသွားပြန်၏။ သားရဲထိန်းချုပ်သူများမှာလည်း လေ့ကျင့်ခန်းလုပ်ရန် လိုအပ်ပြီး သူတို့တွင်လည်း အဆင့် ခွဲခြားမှုများ ရှိပေသည်။ မိမိ၏ အဆင့်ကို မြှင့်တင်နိုင်မှသာ သားရဲထိန်းချုပ်ခြင်းမျိုးစေ့အသစ်ကို ပေါင်းစုစေနိုင်ပြီး သားရဲအသစ်တစ်ကောင်နှင့် စာချုပ်ချုပ်ဆိုနိုင်မည် ဖြစ်သည်။

သားရဲထိန်းချုပ်သူအဆင့်များမှာ အနိမ့်ဆုံးမှ အမြင့်ဆုံးသို့ အလုပ်သင်အဆင့်၊ အခြေခံအဆင့်၊ လက်ရွေးစင်အဆင့် စသည်ဖြင့် ရှိကြသည်။ သားရဲထိန်းချုပ်သူမဟာမိတ်အဖွဲ့မှ တရားဝင်အသိအမှတ်ပြုထားသော မှတ်ပုံတင်ထားသည့် သားရဲထိန်းချုပ်သူတစ်ဦး ဖြစ်လာစေရန်အတွက် အနည်းဆုံး လက်ရွေးစင်အဆင့်သို့ ရောက်ရှိရမည်ဖြစ်ပြီး ပရော်ဖက်ရှင်နယ် သားရဲထိန်းချုပ်ခြင်း အရည်အချင်းစစ်ဆေးမှုကို အောင်မြင်ရမည် ဖြစ်သည်။

ဤသည်မှာ အလွန်အရေးကြီးသော အရည်အချင်းစစ်လက်မှတ်တစ်ခုဖြစ်ပြီး ဒုတိယမှတ်ပုံတင်ကတ်ပြားတစ်ခုကဲ့သို့ပင် ဖြစ်သည်။ ပရော်ဖက်ရှင်နယ်လက်မှတ် ရှိမှသာလျှင် အချို့သော ပြိုင်ပွဲများတွင် ပါဝင်ယှဉ်ပြိုင်ခွင့်ရရှိခြင်း၊ အဆင့်မြင့်ရိက္ခာနှင့် အထောက်အပံ့ပစ္စည်းများကို ဝယ်ယူခွင့်ရရှိခြင်း သို့မဟုတ် သားရဲထိန်းချုပ်သူသင်တန်းကျောင်းနှင့် သားရဲလေ့ကျင့်ရေးကွင်းများကို ဖွင့်လှစ်ခွင့် ရရှိမည် ဖြစ်သည်။

သားရဲထိန်းချုပ်သူများကိုယ်တိုင်ကမူ ကမ္ဘာပေါ်ရှိ ထူးခြားဆန်းကြယ်သော စွမ်းအင်များကို တိုက်ရိုက်မစုပ်ယူနိုင်ကြပေ။ သူတို့သည် မိမိတို့သားရဲများထံမှ ရရှိသော တုံ့ပြန်မှုစွမ်းအင်များနှင့် ခန္ဓာကိုယ်ကြံ့ခိုင်မှု လေ့ကျင့်ခန်းများအပေါ်တွင်သာ မှီခိုအားထား၍ တိုးတက်အောင် လုပ်ဆောင်နိုင်ကြသည်။

ယင်းကို တရားထိုင်ခြင်းနည်းစနစ်များနှင့် ပေါင်းစပ်ကာ စိတ်စွမ်းအင်ကို မြှင့်တင်ပြီး မိမိတို့၏ အာရုံငါးပါးနှင့် အသိစိတ်ခြောက်ပါးကို တဖြည်းဖြည်းချင်း ဖွင့်လှစ်ပေးခြင်းဖြင့်သာ စစ်မှန်သော သားရဲထိန်းချုပ်သူများ ဖြစ်လာနိုင်ကြသည်။

ယခုမှ စတင်လိုက်ရုံသာရှိသေးသည့် အလုပ်သင်သားရဲထိန်းတစ်ယောက်သည် လက်တွေ့တွင် သာမန်လူတစ်ယောက်နှင့် ဘာမျှ ကွာခြားမှုမရှိချေ။ အဆက်မပြတ် လေ့ကျင့်ခန်းလုပ်ခြင်းနှင့် စိတ်ကိုတည်ငြိမ်အောင်ထား၍ စွမ်းအင်များကို မျက်လုံးဆီသို့ အာရုံစူးစိုက်ပေးခြင်းဖြင့်သာ နောက်ဆုံးတွင် မျက်လုံးများကို အသွင်ပြောင်းလဲလာစေနိုင်သည်။

ဝိညာဉ်စွမ်းအင်များ၏ ရွေ့လျားမှုလမ်းကြောင်းကို မြင်တွေ့နိုင်စွမ်းရှိပြီး လျင်မြန်လှုပ်ရှားနေသောအရာများကို ချက်ချင်းဖမ်းဆွဲနိုင်သည့် အမြင်အာရုံကို ပိုင်ဆိုင်ကာ သာမန်မျက်စိဖြင့် မမြင်နိုင်သော အရာဝတ္ထုများနှင့် တည်ရှိမှုများကို မြင်တွေ့နိုင်ပြီဆိုမှသာ ၎င်းသည် အမြင်အာရုံ ပွင့်သွားပြီဟု သတ်မှတ်နိုင်ပြီး အခြေခံအဆင့် သားရဲထိန်းချုပ်သူတစ်ဦးအဖြစ်သို့ အဆင့်တက်သွားခြင်း ဖြစ်ပေသည်။

သားရဲထိန်းချုပ်သူများသည် တိုက်ပွဲများတွင် သားရဲများကဲ့သို့သော ထူးခြားဆန်းကြယ်သည့် သတ္တဝါများကို အမိန့်ပေးစေခိုင်းရမည် ဖြစ်သည်။ သာမန်လူသားတို့၏ အာရုံငါးပါးနှင့် အသိစိတ်ခြောက်ပါးက ၎င်းကို အမှီမလိုက်နိုင်သလို ဝိညာဉ်စွမ်းအင်များ၏ ရွေ့လျားမှုလမ်းကြောင်းကိုလည်း မမြင်နိုင်ကြချေ။ ထို့ကြောင့် သာမန်ထက်ထူးကဲသော အာရုံခံစားမှုများကို ရရှိရန် အဆက်မပြတ် လေ့ကျင့်မှသာလျှင် တိုက်ပွဲအတွင်း သားရဲများကို အမှန်တကယ် အမိန့်ပေးကွပ်ကဲနိုင်မည် ဖြစ်သည်။

ဘုန်း၊ ဘုန်း၊ ဘုန်း...

ကျန်းဟန် ထိုင်ထတစ်ကြိမ် ပြီးသွားပြီးနောက် ကျောက်စိမ်းကောင်လေးက နောက်ထပ် အရှိန်ပြင်းတိုက်ခိုက်ခြင်း ၁၀ ကြိမ်ကို လျင်မြန်စွာ ပြီးမြောက်အောင် လုပ်ဆောင်လိုက်ပြန်သည်။ ၎င်းသည် အနည်းငယ် မူးနောက်နောက် ဖြစ်လာပြီး နောက်ဆုံးတွင် ပလုတ်ဟူသော အသံနှင့်အတူ ကြမ်းပြင်ပေါ်သို့ ခွေကျသွားတော့သည်။

“မင်း အဆင်ပြေရဲ့လား။ ဖြည်းဖြည်းချင်းပဲ လုပ်ပါ။ ဒီလောက်အထိ အတင်းအလောကြီး လုပ်နေတာက လေ့ကျင့်ရေးအတွက် အထောက်အကူမဖြစ်ဘူး။ မင်းရဲ့ ခန္ဓာကိုယ်ထဲက ပြောင်းလဲမှုတွေကို အမှန်တကယ် ခံစားမိဖို့ လိုတယ်။”

ကျန်းဟန်က လျှောက်သွားပြီး ကျောက်စိမ်းတီကောင်လေးကို ကောက်ချီလိုက်ကာ ၎င်း၏ ခန္ဓာကိုယ်ပေါ်တွင် လိမ်းပေးရန်အတွက် ကျောင်းက ပေးထားသည့် စျေးပေါသော ကျောက်စိမ်းရောင်ဆေးဆီ အချို့ကို ထုတ်ယူလိုက်သည်။

“ဂျိ...”

ကျောက်စိမ်းတီကောင်လေးက အသံလေးပြုရင်း ကျန်းဟန် ဆေးဆီလိမ်းပေးနေသည်ကို သဘောကျနှစ်ခြိုက်နေဟန်ဖြင့် ၎င်း၏ ပိုးမျှင်ပစ်လွှတ်ခြင်းစွမ်းရည်ကို အသုံးပြုကာ ပန်းပွင့်ပုံစံလေးတစ်ခုကို ရက်လုပ်ပြလာခဲ့ပြန်သည်။

“ကဲ ဆက်ကြစို့။ ပိုပြီး သန်မာလာဖို့အတွက် ငါတို့ ဆက်ပြီး လေ့ကျင့်ရမယ်။”

ဆေးလိမ်းပေးပြီးနောက် ကျန်းဟန်က ၎င်းကို ထပ်မံအားပေးလိုက်သည်။

ယခုအခါ အချိန်မှာ ခုနစ်နာရီ ထိုးနေပြီဖြစ်ရာ ယနေ့အတွက် ငါးနာရီသာ ကျန်တော့သည်။ သူသည် အံ့ဖွယ်ဆင့်ကဲပြောင်းလဲခြင်း လမ်းကြောင်း ၁ ၏ သတ်မှတ်ချက်များကို ပြီးမြောက်အောင် လုပ်ဆောင်ရမည် ဖြစ်သည်။

အဓိကမှာ ဤနေရာတွင် တစ်ရက်ဟူသော အချိန်ကို ၂၄ နာရီအလိုက် တွက်ချက်ခြင်းလား သို့မဟုတ် ပြက္ခဒိန်ရက်အလိုက် တွက်ချက်ခြင်းလား ဆိုသည်ကို သူ မသိခြင်းပင်။ ဘေးကင်းစေရန်အတွက် သူသည် သန်းခေါင်ယံအချိန်မတိုင်မီ တာဝန်ကို ပြီးဆုံးအောင် လုပ်ရမည် ဖြစ်သည်။ သို့မဟုတ်ပါက အလုပ်မဖြစ်ဘဲ ကျရှုံးသွားလျှင် ဒုက္ခရောက်ပေလိမ့်မည်။

ယနေ့တွင် ဤအံ့ဖွယ်ဆင့်ကဲပြောင်းလဲခြင်းလမ်းကြောင်းကို ဖွင့်လိုက်မိခြင်းအတွက် သူ အမှန်တကယ် နောင်တရမိသည်။

သူ၏ ခန္ဓာကိုယ်မှာလည်း ရေနစ်လုနီးပါး ဖြစ်ခဲ့ရသဖြင့် အခုထိ သိပ်ပြီး နေရထိုင်ရ အဆင်မပြေသေးချေ။ သို့သော်လည်း တာဝန်ကိုမူ ပြီးမြောက်အောင် လုပ်ဆောင်ရမည်သာ ဖြစ်သည်။

“ဂျိ...”

ကျောက်စိမ်းတီကောင်လေးက အသံတစ်ချက်ပြုလိုက်ပြီးနောက် ၎င်း၏ခန္ဓာကိုယ်ကို လေးပစ်သလိုမျိုး အောက်သို့ ကိုင်းညွတ်လိုက်ပြီး ရှေ့သို့ ပစ်လွှတ်လိုက်တော့သည်။

ဘုန်း

ဘုန်း

တစ်ကြိမ်၊ နှစ်ကြိမ်... ဝင်တိုက်မိတိုင်း ကျောက်စိမ်းတီကောင်လေး၏ ခန္ဓာကိုယ်သည် အံ့ဖွယ်ချီများ၏ အစိတ်အပိုင်းတစ်ခုကို စုပ်ယူသွားသဖြင့် ၎င်း၏ အင်အားများ အကုန်အစင် ကုန်ခမ်းမသွားအောင် ကာကွယ်ပေးထားသည်။

ကျောက်စိမ်းတီကောင်လေးသည် အမြဲတမ်း ကြိုးစားပမ်းစား လေ့ကျင့်တတ်သူဖြစ်သော်လည်း အများအားဖြင့် ပိုးမျှင်ပစ်လွှတ်ခြင်းကိုသာ လေ့ကျင့်ခဲ့ခြင်း ဖြစ်သည်။ ၎င်းသည် အရှိန်ပြင်းတိုက်ခိုက်ခြင်းကိုမူ လေ့ကျင့်ခဲလှသည်။ အကြိမ်ပေါင်း သုံးရာကျော် လေ့ကျင့်ပြီးနောက်တွင် ၎င်း၏ အရှိန်က တဖြည်းဖြည်း နှေးကွေးလာခဲ့သည်။

သို့သော်လည်း ၎င်း မောပန်းနွမ်းနယ်လာသည့် အကြိမ်တိုင်းတွင် ကျန်းဟန်က ဆေးဆီအချို့ လိမ်းပေးလေ့ရှိပြီး ထို့နောက်တွင်မူ လူနှင့် တီကောင်လေးတို့သည် သူတို့၏ လေ့ကျင့်ရေးကို ဆက်လက်လုပ်ဆောင်ကြပြန်သည်။

ကျန်းဟန်၏ စိတ်ဝိညာဉ်စွမ်းအင်ပါရမီ၏ မြှင့်တင်ပေးမှုအောက်တွင် ကျောက်စိမ်းတီကောင်လေးသည် ပိုမိုပါးနပ်လိမ္မာလာပြီး အရှိန်ပြင်းတိုက်ခိုက်ခြင်း လေ့ကျင့်ခန်း၏ အနှစ်သာရကို တဖြည်းဖြည်းချင်း သဘောပေါက်နားလည်လာခဲ့သည်။

၎င်း၏ ခန္ဓာကိုယ်အစိတ်အပိုင်းတိုင်း လေ့ကျင့်ခန်း၏ အကျိုးသက်ရောက်မှု ရရှိစေရန်အတွက် ၎င်း၏ ကိုယ်ဟန်အနေအထားကို အမြဲမပြတ် ပြောင်းလဲခြင်းဖြင့် ၎င်း၏ အရေပြားမာကြောမှုကလည်း တဖြည်းဖြည်း မြင့်တက်လာခဲ့သည်။

တစ်ချိန်တည်းမှာပင် ဆက်တိုက်ဝင်တိုက်နေမှုများက ၎င်းကို နည်းစနစ်အချို့ကို နားလည်သဘောပေါက်ရန် အထောက်အကူပြုနေပုံရပြီး ပိုမိုပြင်းထန်သော တိုက်မိမှုများကို ခံနိုင်ရည်ရှိစေရန် ၎င်း၏အရေပြားကို ချိန်ညှိနိုင်စွမ်း ရှိလာစေခဲ့သည်။

ပိုင်လင်း သစ်သားတိုင်ကို ဝင်တိုက်မိသည့် အကြိမ်တိုင်းတွင် တိုက်မိသော ၎င်း၏ခန္ဓာကိုယ်အစိတ်အပိုင်းမှ မှိန်ဖျော့ဖျော့ အစိမ်းရောင်အလင်းတန်းတစ်ခု ထွက်ပေါ်လာပြီးနောက် မာကြောလာသည်ကို ကျန်းဟန် သတိပြုမိလိုက်သည်။

သူသည် သားရဲပျိုးထောင်ခြင်းလက်စွဲစာအုပ်ကို ဖွင့်၍ ကြည့်ရှုလိုက်ရာ အနည်းငယ် စိတ်လှုပ်ရှားသွားရ၏။ ဤသည်မှာ တီကောင်မျိုးနွယ်စုများ မာကြောခြင်းစွမ်းရည်ကို တတ်မြောက်တော့မည့် ရှေ့ပြေးနိမိတ် လက္ခဏာပင် ဖြစ်သည်။ ဤအတိုင်းသာ ဆက်လက်လေ့ကျင့်နေမည်ဆိုပါက ကျောက်စိမ်းတီကောင်လေးသည် မာကြောခြင်းစွမ်းရည်ကို သေချာပေါက် သင်ယူတတ်မြောက်နိုင်လိမ့်မည် ဖြစ်သည်။

ထိုစွမ်းရည်သည် ခန္ဓာကိုယ်တစ်ခုလုံးကို သံမဏိကဲ့သို့ မာကြောသွားစေနိုင်သဖြင့် ကာကွယ်ရေးအတွက်ရော တစ်ပါးသူကို ပြေးဝင်တိုက်ခိုက်ရာတွင်ပါ အသုံးပြုနိုင်သည်။

အစေခံအဆင့် သားရဲများသည် ဝိညာဉ်စွမ်းအင်အား အပြင်သို့ ထုတ်လွှတ်တိုက်ခိုက်ခြင်းကို မလုပ်ဆောင်နိုင်ကြသေးဘဲ ဝိညာဉ်စွမ်းအင်ဖြင့် သန်မာအောင် ပြုလုပ်ထားသော ခန္ဓာကိုယ်များကိုသာ အားကိုးကြရသည်။ ထို့ကြောင့် ခန္ဓာကိုယ်ကို မာကြောစေနိုင်သည့် စွမ်းရည်မှာ အလွန်ပင် အဖိုးတန်ပြီး လူကြိုက်များလှသည်။

မိမိတို့ခန္ဓာကိုယ်ထဲ၌ လက်ရွေးစင်အဆင့် စွမ်းအင်များကို စတင်စုစည်းနေပြီဖြစ်သော သားရဲများထဲတွင်ပင် ဝိညာဉ်စွမ်းအင်ကို အပြင်သို့ ထုတ်လွှတ်တိုက်ခိုက်ရန်မှာ အလွန်ခက်ခဲနေသေးသည်။ ထို့ကြောင့် လက်ရွေးစင်အဆင့်သို့ ရောက်ရှိပြီးသည့်တိုင်အောင် ခန္ဓာကိုယ်မာကြောခြင်းစွမ်းရည်က ကြီးမားသော အထောက်အကူကို ပေးစွမ်းနိုင်ဆဲပင်။

ကျောက်စိမ်းတီကောင်လေး ထိုစွမ်းရည်ကို တတ်မြောက်ရန်အတွက် နောက်ထပ် နှစ်ရက်ခန့် လိုအပ်ဦးမည့်ပုံပင်။ ကျန်းဟန် အလောမကြီးပါချေ။ အရာအားလုံးက လမ်းကြောင်းမှန်ပေါ်တွင် ရွေ့လျားနေသရွေ့ သူ ဖြည်းဖြည်းချင်းသာ သွားမည်ဖြစ်သည်။