အခန်း ၈၆၈

အခန်း (၈၆၈) - ထျန်းကျီဘုံ အဋ္ဌမအလွှာ အထွတ်အထိပ်

"ထျန်းကျီဘုံ အဋ္ဌမအလွှာ အထွတ်အထိပ် ပါလား..."

"ဘုရားရေ... ဒါ... ဒါ ဘယ်လိုလုပ် ဖြစ်နိုင်မှာလဲ..."

"ငါ အမြင်မှားနေတာလား... နန်းတော်သခင်က တစ်ဟုန်ထိုးတည်းနဲ့ လေးလွှာတောင် တက်သွားတာလား..."

ဖုန်းဝူချန်၏ အရှိန်အဝါက ရူးသွပ်စွာ ထိုးတက်သွားပြီး မျက်တောင်တစ်ခတ် အတွင်းမှာပင် ထျန်းကျီဘုံ ပဉ္စမအလွှာမှနေ၍ အဋ္ဌမအလွှာ အထွတ်အထိပ်သို့ ရောက်ရှိသွားသည်ကို အာရုံခံမိလိုက်သည့်အခါ လူတိုင်းမှာ အလွန်အမင်း အံ့အားသင့် ထိတ်လန့်သွားကြပြီး မျက်လုံးများ ပြူးကျယ်ကာ ပါးစပ်အဟောင်းသား ဖြစ်သွားကြတော့၏။

"ဆရာက.. တကယ်ပဲ ထျန်းကျီဘုံ အဋ္ဌမအလွှာ အထွတ်အထိပ်ကို ရောက်သွားတာလား... ကင်းမဲ့ခြင်း အခြေအနေက တကယ်ကို ကြောက်ဖို့ ကောင်းလွန်းတယ်..."

ကျန်းကျွင့်လန်မှာ တစ်ကိုယ်လုံး ပြင်းထန်စွာ တုန်ယင်နေပြီး သူ၏ အသံများပင် ထစ်အနေကာ လုံးဝ မယုံကြည်နိုင်အောင် ဖြစ်နေတော့သည်။

လျိုချင်းယန်ကလည်း လုံးဝ မယုံကြည်နိုင်သော မျက်နှာထားဖြင့် ရေရွတ်လိုက်၏။

"ငါများ အမြင်မှားနေတာလား... ကင်းမဲ့ခြင်း အခြေအနေမှာ တစ်လ ကျင့်ကြံလိုက်ရုံနဲ့ အစ်ကိုဖုန်းက လေးလွှာတောင် ဖောက်ထွက်သွားတာလား... ဒါ ဘယ်လိုလုပ် ဖြစ်နိုင်မှာလဲ..."

"မင်း အမြင်မှားနေတာ မဟုတ်ပါဘူး... အစ်ကိုကြီးဖုန်းက တကယ်ပဲ ထျန်းကျီဘုံ အဋ္ဌမအလွှာ အထွတ်အထိပ်ကို ရောက်သွားတာပါ..."

လင်ရှောင်ရှောင်က အလွန်အမင်း အံ့အားသင့်နေသော်ငြား သူမ၏ လှပသော မျက်နှာလေးပေါ်တွင် စိတ်လှုပ်ရှား ဝမ်းသာနေသော အပြုံးလေးတစ်ခု ဖုံးလွှမ်းနေတော့၏။

"ထျန်းကျီဘုံ အဋ္ဌမအလွှာ အထွတ်အထိပ်..."

ယဲ့ထျန်းဝေ၊ ပေတိုယန်နှင့် အခြားသူများ အားလုံးမှာလည်း လုံးဝ ဆွံ့အ မှင်သက်နေကြတော့သည်။

ဖုန်းဝူချန် တစ်ယောက် ကင်းမဲ့ခြင်း အခြေအနေသို့ ရောက်ရှိနေကြောင်းကို လျိုချင်းယန်ထံမှ တစ်ဆင့် သိရှိထားပြီး ၎င်းမှာ သန်းဆယ်ချီမှ တစ်ယောက်သာ ကြုံတွေ့နိုင်သော လျှို့ဝှက်ဆန်းကြယ်သည့် ကျင့်ကြံခြင်း အခြေအနေ တစ်မျိုး ဖြစ်ကြောင်း သိထားကြသည့်တိုင်အောင် ဖုန်းဝူချန်၏ ကြောက်မက်ဖွယ် တိုးတက်မှုက သူတို့၏ စိတ်ကူးယဉ် မှန်းဆနိုင်စွမ်းကို လုံးဝ ကျော်လွန်သွားခဲ့၏။

ကင်းမဲ့ခြင်း အခြေအနေ၏ ကြောက်မက်ဖွယ် ကောင်းမှုကလည်း လူတိုင်း၏ စိတ်ကူးယဉ် မှန်းဆနိုင်စွမ်းကို အပြည့်အဝ ကျော်လွန်သွားခဲ့ခြင်းပင်။

ဖုန်းဝူချန်၏ အရှိန်အဝါက ထျန်းကျီဘုံ အဋ္ဌမအလွှာ အထွတ်အထိပ်သို့ ရောက်ရှိသွားသည့် အခိုက်အတန့်တွင် ထပ်မံ မြင့်တက်လာခြင်း မရှိတော့ဘဲ လုံးဝ အဆင့်အတန်း အသစ် တစ်ခုသို့ ရောက်ရှိသွားသည်။ သူ၏ အရှိန်အဝါက လွှမ်းမိုးဖိနှိပ်နိုင်စွမ်း အပြည့် ရှိနေတော့၏။

ဝူကျိ ၀င်္ကပါမျက်လှည့် နယ်မြေ အတွင်း၌ တရားထိုင် ကျင့်ကြံနေသော ဖုန်းဝူချန်က သူ၏ အရှိန်အဝါများ ရပ်တန့်သွားသည်ကို သတိပြုမိလိုက်သည့်အခါ မျက်လုံးများကို ဖြည်းညင်းစွာ ဖွင့်လိုက်၏။

"ငါ ကိုယ်တိုင် ကင်းမဲ့ခြင်း အခြေအနေထဲ ဝင်သွားလိမ့်မယ်လို့ ဘယ်သူကများ ထင်ထားမိမှာလဲ..."

မျက်လုံးများကို ဖွင့်လိုက်သည်နှင့် ဖုန်းဝူချန် ကိုယ်တိုင်ပင် အလွန်အမင်း အံ့အားသင့်နေမိတော့သည်။

မိစ္ဆာ နဂါးနတ်ဘုရား၏ မှတ်ဉာဏ်များမှ တစ်ဆင့် ဤကင်းမဲ့ခြင်း အခြေအနေ အကြောင်းကို သူ အနည်းငယ် သိရှိထားပြီး ဖြစ်၏။ ဤမျှ ရှားပါးလှသော အခြေအနေမျိုးက သူ့ထံသို့ ဆိုက်ဆိုက်မြိုက်မြိုက် ရောက်ရှိလာခဲ့ခြင်းပင်။

"ထျန်းကျီဘုံ အဋ္ဌမအလွှာ အထွတ်အထိပ် ဆိုတော့ နဝမအလွှာကို တက်လှမ်းဖို့ ခြေတစ်လှမ်းပဲ လိုတော့တာပေါ့... တစ်လအတွင်းမှာ ဒီလောက်အထိ တိုးတက်သွားတာက တကယ့်ကို အိပ်မက်မက်နေသလိုပဲ..."

သူ၏ လက်နှစ်ဖက်ကို ငုံ့ကြည့်ရင်း ဖုန်းဝူချန် တစ်ယောက် သူ၏ ကျင့်ကြံခြင်း အဆင့် ဤမျှ လျင်မြန်စွာ တိုးတက်လာလိမ့်မည်ကို ကိုယ်တိုင်ပင် မယုံကြည်နိုင်အောင် ဖြစ်နေတော့၏။

တစ်လအတွင်းမှာ လေးလွှာတောင် တက်သွားတာ ဆိုတာကို ဘယ်သူကများ ယုံကြည်နိုင်ပါမည်နည်း။ အကယ်၍ ဤသတင်းသာ ပေါက်ကြားသွားပါက တိုက်ကြီး တစ်ခုလုံးရှိ မရေမတွက်နိုင်သော ပါရမီရှင်များ အားလုံး ဒေါသထွက်ပြီး သွေးအန် သေဆုံးသွားကြမည် မဟုတ်ပါလော။

"ထျန်းကျီဘုံ နဝမအလွှာကို ချိုးဖြတ်နိုင်ခဲ့မယ် ဆိုရင်တော့... နတ်ဘုရားအသွင်ပြောင်းဘုံကို ရောက်ဖို့ သိပ်မလိုတော့ဘူးပဲ..."

အံ့အားသင့်မှုများ ပြီးဆုံးသွားပြီးနောက် ဖုန်းဝူချန်၏ ရင်ထဲတွင် ရူးသွပ်သော ဝမ်းသာရွှင်မြူးမှုများဖြင့် ပြည့်နှက်သွားတော့၏။ မကြာမီ နတ်ဘုရားအသွင်ပြောင်းဘုံသို့ တက်လှမ်းနိုင်တော့မည့် အကြောင်း တွေးမိလိုက်တိုင်း သူ၏ စိတ်လှုပ်ရှားမှုများကို မထိန်းချုပ်နိုင်အောင် ဖြစ်နေတော့သည်။

"တစ်လ အချိန်က ကွက်တိ ပြည့်သွားတာပဲ..."

ဖုန်းဝူချန် တစ်ယောက် စိတ်လှုပ်ရှားမှုများ လွှမ်းမိုးနေစဉ်မှာပင် အမှောင်မိစ္ဆာ ကျားသစ်၏ အသံက သူ၏ နားထဲသို့ ရုတ်တရက် ဝင်ရောက်လာတော့၏။

ထိုအသံကို ကြားလိုက်ရသည့်အခါမှသာ အမှောင်မိစ္ဆာ ကျားသစ်က အချိန်တိုင်း အနီးနားတွင် ရှိနေခဲ့ကြောင်း ဖုန်းဝူချန် သတိပြုမိသွားတော့သည်။

"ဟီး ဟီး... မိစ္ဆာကျားသစ်... လင်ရွှီဇီရဲ့ စွမ်းအားတွေကို ငါ သိပ်မဝါးမြိုရသေးဘူး... ပြီးတော့ ဒီလောက် အစွမ်းထက်တဲ့ ပိတ်လှောင်ရေး အခင်းအကျင်းကြီး ရှိနေသေးတယ် ဆိုတော့... နောက်ကျရင် အခွင့်အရေး ရတာနဲ့ မင်းရဲ့ ပိတ်လှောင်မှုကို အမြန်ဆုံး ချိုးဖျက်ပေးဖို့ ငါ သေချာပေါက် လာကူညီပေးပါ့မယ်... ငါ့ကို အားနာမနေနဲ့နော်..."

ဖုန်းဝူချန်က မသိမသာ လှည့်စားသော အပြုံးဖြင့် ပြန်လည် ပြောဆိုလိုက်၏။

"..."

အမှောင်မိစ္ဆာ ကျားသစ်မှာ ဖုန်းဝူချန်၏ စကားကြောင့် ဘာပြောရမှန်းပင် မသိတော့ချေ။ ဖုန်းဝူချန်၏ စိတ်ထဲတွင် ဘာတွေ ကြံစည်နေသနည်း ဆိုတာကို ၎င်း ကောင်းကောင်းကြီး သိရှိနေသည် မဟုတ်ပါလော။

အမှောင်မိစ္ဆာ ကျားသစ်က ဘာမှ ပြန်မပြောသည်ကို မြင်သောအခါ ဖုန်းဝူချန်က ဆက်ပြောလိုက်သည်။

"မိစ္ဆာကျားသစ်... ၀င်္ကပါမျက်လှည့် နယ်မြေထဲမှာ မရေမတွက်နိုင်တဲ့ ရတနာတွေ ရှိနေတယ်လို့ ဒဏ္ဍာရီတွေမှာ ပြောကြတယ်လေ... ငါ့ကို နည်းနည်းပါးပါးလောက် ပေးဖို့ အစီအစဉ် မရှိဘူးလား..."

"ရတနာတွေ ဘယ်လောက်ပဲ များများ... ငါ့အရှင်သခင်ရဲ့ စွမ်းအားတွေ၊ ပိတ်လှောင်ရေး အခင်းအကျင်းရဲ့ စွမ်းအားတွေလောက် အစွမ်းမထက်ပါဘူး..."

အမှောင်မိစ္ဆာ ကျားသစ်က ဖုန်းဝူချန်ကို ရက်စက်သော အကြည့်ဖြင့် စူးစိုက်ကြည့်ရင်း ပြန်ပြောလိုက်၏။

"လွန်ခဲ့တဲ့ လဝက်လောက်က ယင်ယန် မိသားစု လာတိုက်သွားလို့ နဂါးနတ်ဘုရား မဟာမိတ်အဖွဲ့ အကြီးအကျယ် ဒုက္ခရောက်သွားတယ်... ဒီမှာ အလကား စကားတွေ ပြောပြီး အချိန်ဖြုန်းနေမယ့် အစား... အပြင်ထွက်ပြီး မင်း ဘာလုပ်နိုင်မလဲ ဆိုတာကို သွားကြည့်တာ ပိုမကောင်းဘူးလား..."

ဟု အမှောင်မိစ္ဆာ ကျားသစ်က ဆက်ပြောလိုက်သည်။

ထိုအခါ ဖုန်းဝူချန်က ခပ်ရေးရေး ပြုံးရင်း ပြန်လည် ဖြေကြားလိုက်၏။

"ဒီကိစ္စတွေကို ငါ အကုန် သိပြီးသားပါ... ကိုးထပ် ချန်ခွင်း မျှော်စင်က ငါ့ရဲ့ နတ်ဘုရား လက်နက် ဆိုတာကို မမေ့နဲ့ဦး..."

"မင်း သိပြီးသား ဆိုရင်တော့ ယင်ယန် မိသားစုက ဒီကိစ္စကို ဒီအတိုင်း လွှတ်ထားမှာ မဟုတ်ဘူး ဆိုတာကိုလည်း မင်း သဘောပေါက်သင့်တာပေါ့..."

အမှောင်မိစ္ဆာ ကျားသစ်က သတိပေးလိုက်၏။

ဖုန်းဝူချန်က အမှောင်မိစ္ဆာ ကျားသစ်ကို လှမ်းကြည့်ရင်း လေးနက်သော လေသံဖြင့် မေးလိုက်သည်။

"ယင်ယန် မိသားစုရဲ့ ဘိုးဘေးကြီးကို မင်း စိုးရိမ်နေတာလား..."

"မင်းက ယင်ယန် မိသားစု အကြောင်းကို တော်တော်လေး သိထားပုံရတယ်... လွန်ခဲ့တဲ့ ရက်အနည်းငယ်က ယင်ယန် မိသားစုဆီကနေ ပထမအဆင့် နတ်ဘုရား အသွင်ပြောင်းဘုံ နဝမအလွှာ အထွတ်အထိပ် စွမ်းအား တစ်ခု ထွက်ပေါ်လာတာကို ငါ အာရုံခံမိလိုက်တယ်..."

အမှောင်မိစ္ဆာ ကျားသစ်က လေးနက်သော အမူအရာဖြင့် ရှင်းပြလိုက်၏။

"မင်း အဆင့်တက်သွားတဲ့ စွမ်းအားနဲ့တောင် သူ့ကို မယှဉ်နိုင်ဘူးလား..."

ဖုန်းဝူချန်က မျက်မှောင် အနည်းငယ် ကြုတ်လျက် မေးလိုက်သည်။

"ငါ့ရဲ့ စွမ်းအားတွေကို ပိတ်လှောင်ထားတယ်လေ... အဆင့်တက်သွားတဲ့ အခြေအနေကို အချိန်အကြာကြီး ငါ မထိန်းထားနိုင်ဘူး..."

အမှောင်မိစ္ဆာ ကျားသစ်က ကူကယ်ရာမဲ့စွာ ခေါင်းခါယမ်းရင်း ပြန်လည် ဖြေကြားလိုက်၏။

ဖုန်းဝူချန်က ပခုံးတွန့်ပြလိုက်ပြီး လျှို့ဝှက်ဆန်းကြယ်သော အပြုံးတစ်ခုဖြင့် ပြောလိုက်သည်။

"စိတ်မပူပါနဲ့... ယင်ယန် မိသားစုက အလွယ်တကူ လှုပ်ရှားမှာ မဟုတ်ပါဘူး... ဘာလို့လဲ ဆိုတော့ ဒီနေ့ နဂါးနတ်ဘုရား နန်းတော်မှာ ဂုဏ်သရေရှိ ဧည့်သည်တော်တွေ အများကြီး ရောက်နေလို့လေ..."

စကားပြောနေစဉ်မှာပင် ဖုန်းဝူချန်၏ ပုံရိပ်က ၀င်္ကပါမျက်လှည့် နယ်မြေ ဟင်းလင်းပြင် အတွင်းမှ လျှပ်တစ်ပြက် ထွက်ခွာသွားခဲ့၏။

အပြင်ဘက်တွင်မူ ချီဟွမ် အပါအဝင် နဂါးနတ်ဘုရား နန်းတော်မှ စစ်သည်များ အားလုံး ဖုန်းဝူချန်ကို မြင်လိုက်ရသည့်အခါ အလွန်အမင်း စိတ်လှုပ်ရှား ဝမ်းသာသွားကြတော့သည်။

"ထျန်းကျီဘုံ အဋ္ဌမအလွှာ အထွတ်အထိပ် ပါလား..."

"တကယ်ပါပဲ... နန်းတော်သခင်က တကယ်ပဲ လေးလွှာတောင် တက်သွားတာပဲ..."

"နန်းတော်သခင်ရဲ့ ကျင့်ကြံခြင်း အဆင့် တိုးတက်သွားတဲ့ အတွက် ဂုဏ်ယူပါတယ်..."

ချီဟွမ်နှင့် အခြားသူများ အားလုံး အလွန်အမင်း စိတ်လှုပ်ရှားနေကြပြီး သူတို့၏ မျက်နှာများမှာ ဝမ်းသာလွန်းသဖြင့် နီရဲနေကြတော့၏။ သူတို့ အားလုံးက ဒူးတစ်ဖက် ထောက်ကာ ကျယ်လောင်စွာ အော်ဟစ် နှုတ်ခွန်းဆက်သလိုက်ကြရာ သူတို့၏ အသံများက မြင့်မြတ်သော တောင်တော် တစ်ခုလုံး ပဲ့တင်ထပ်သွားတော့သည်။

"ထကြပါ..."

ဖုန်းဝူချန်က ခပ်ရေးရေး ပြုံးရင်း ပြောလိုက်ပြီး သူတို့ အနီးသို့ လွင့်မျော ဆင်းသက်လာ၏။

"အစ်ကိုဖုန်း... အစ်ကို့ရဲ့ ကျင့်ကြံခြင်းက အရမ်းကို မြန်မြန် တိုးတက်နေတာပဲနော်... ကျွန်တော်တောင် ထျန်းကျီဘုံကို မရောက်သေးဘူး... အစ်ကိုက နတ်ဘုရားအသွင်ပြောင်းဘုံကိုတောင် ရောက်တော့မယ်..."

လျိုချင်းယန်က ညည်းတွားလိုက်သည်။

"ဒါဆိုရင်လည်း ကြိုးစားပြီး ကျင့်ကြံလေ..."

ဖုန်းဝူချန်က ပြုံးလျက် တိုက်တွန်းလိုက်၏။

"နန်းတော်သခင်... ကင်းမဲ့ခြင်း အခြေအနေ ဆိုတာက တကယ်တမ်း ဘယ်လို ခံစားရလဲ ဗျ..."

ယဲ့ထျန်းဝေက သိချင်စိတ်ဖြင့် ဝင်ရောက် မေးမြန်းလိုက်သည်။

ဖုန်းဝူချန်က ခေါင်းခါယမ်းပြရင်း ပြန်လည် ဖြေကြားလိုက်၏။

"အဲဒီ ခံစားချက်ကို စကားလုံးတွေနဲ့ ဖော်ပြဖို့ ခက်တယ်... အရမ်းကို နက်နဲပြီး လျှို့ဝှက်ဆန်းကြယ်တယ်... အလွယ်တကူ ဖမ်းဆုပ်လို့ မရဘူး..."

လျိုချင်းယန်၏ ပခုံးကို ပုတ်ပေးရင်း ဖုန်းဝူချန်က ပြုံးလျက် ဆက်ပြောလိုက်သည်။

"မင်းတို့ အားလုံး သေချာ ကြိုးစားပြီး ကျင့်ကြံကြနော်... ထျန်းကျီဘုံကို အမြန်ဆုံး ချိုးဖြတ်နိုင်အောင် လုပ်... မြင့်မြတ်သော တောင်တော် ဆိုတာ ဘယ်သူမဆို လာပြီး ကျင့်ကြံလို့ ရတဲ့ နေရာ မဟုတ်ဘူး... ပျင်းမနေကြနဲ့..."

"ဟုတ်ကဲ့ပါ နန်းတော်သခင်..."

လူတိုင်းက ရိုသေစွာဖြင့် တစ်သံတည်း ပြန်လည် ဖြေကြားလိုက်ကြ၏။

ထို့နောက် ဖုန်းဝူချန်နှင့် လင်ရှောင်ရှောင်တို့ နှစ်ဦး မျှော်စင် အတွင်းမှ ထွက်ခွာသွားကြတော့သည်။

ကိုးထပ် ချန်ခွင်း မျှော်စင်၏ အပေါက်ဝတွင် ဖုန်းဝူချန်နှင့် လင်ရှောင်ရှောင်တို့၏ ပုံရိပ်များ ဖြည်းညင်းစွာ ထွက်ပေါ်လာ၏။

'ရောက်နေတဲ့ သူတွေ တော်တော် များတာပဲ... ဘီလူး မျိုးနွယ်စုနဲ့ ဖီးနစ်နတ်ဆိုး မျိုးနွယ်စု ကရော၊ နတ်ဆိုး မျိုးနွယ်စု ကပါ ရောက်နေကြတာပဲ...'

အမှောင်ထဲတွင် လျှို့ဝှက်စွာ ပုန်းကွယ်နေကြသော အင်အားကြီး အဖွဲ့အစည်း အသီးသီးမှ အစွမ်းထက် ပညာရှင်များကို အာရုံခံမိလိုက်သည့်အခါ ဖုန်းဝူချန်က ရင်တွင်း၌ တိတ်တဆိတ် သုံးသပ်လိုက်ပြီး သူ၏ နှုတ်ခမ်းထောင့်များတွင် မသိမသာ လှည့်စားသော အပြုံးတစ်ခု ပေါ်လာတော့၏။

"နန်းတော်သခင်...တံခါးပိတ် ကျင့်ကြံတာကနေ ပြန်ထွက်လာပြီ..."

ဖုန်းဝူချန်နှင့် လင်ရှောင်ရှောင်တို့၏ ပုံရိပ်များကို မြင်လိုက်ရသည့်အခါ နဂါးနတ်ဘုရား နန်းတော်မှ တစ်စုံတစ်ယောက်က စိတ်လှုပ်ရှားစွာဖြင့် အော်ဟစ်လိုက်တော့သည်။

"နန်းတော်သခင် တံခါးပိတ် ကျင့်ကြံတာကနေ ပြန်ထွက်လာတာကို ကြိုဆိုပါတယ်..."

နဂါးနတ်ဘုရား နန်းတော်မှ လူတိုင်းက ရိုသေစွာဖြင့် နှုတ်ခွန်းဆက်သလိုက်ကြရာ သူတို့၏ ထက်ရှသော အရှိန်အဝါကြီးက ကောင်းကင်ယံသို့ ထိုးတက်သွားတော့၏။

'ဖုန်းဝူချန် ဆိုတာ တကယ်ကို မရိုးရှင်းတဲ့ ကောင်လေးပဲ... ဒီလောက် အချိန်တိုလေး အတွင်းမှာ ဒီလောက် ကြီးကျယ် ခမ်းနားတဲ့ မဟာမိတ်အဖွဲ့ကြီး တစ်ခုကို တည်ထောင်နိုင်ခဲ့တာ တကယ်ကို လေးစားစရာပဲ... သူ့ရဲ့ ကျင့်ကြံခြင်း အဆင့်ကလည်း အများကြီး တိုးတက်လာပုံရတယ်... သူ့ရဲ့ စွမ်းအားတွေက တကယ်ကို ကြောက်စရာ ကောင်းနေမှာ သေချာတယ်...'

အမှောင်ထဲတွင် ပုန်းကွယ်နေသော ပိုင်လီ ယွိဖုန်းက ဖုန်းဝူချန်ကို ကြည့်ရင်း ခပ်ရေးရေး ပြုံးကာ တိတ်တဆိတ် ရေရွတ်လိုက်၏။ သူ၏ ရင်ထဲတွင်လည်း တိုက်ခိုက်လိုစိတ်များ ပြင်းထန်စွာ ပေါက်ကွဲထွက်လာတော့သည်။

'နဂါး မျိုးနွယ်စု ခေါင်းဆောင်ကြီး ပြောတဲ့ ဖုန်းဝူချန် ဆိုတာ သူလား... သူ့ကိုယ်ထဲက နဂါး သွေးမျိုးဆက်က တကယ်ကို ထူးခြားတာပဲ... နဂါး မျိုးနွယ်စုရဲ့ သွေးမျိုးဆက်ထက်တောင် ပိုပြီး သန့်စင်နေသေးတယ်... နတ်ဘုရားအဆင့်ကိုတောင် ရောက်နေပါလား...'

ဘီလူး မျိုးနွယ်စုမှ အစွမ်းထက် ပညာရှင် တစ်ဦးကလည်း အမှောင်ထဲမှနေ၍ အံ့အားသင့်စွာ မှတ်ချက်ချလိုက်သည်။

အခြား လျှို့ဝှက် နေရာတစ်ခုတွင်မူ ဖီးနစ်နတ်ဆိုး မျိုးနွယ်စုမှ ပညာရှင် တစ်ဦးက ဖုန်းဝူချန်ကို စောင့်ကြည့်ရင်း တီးတိုး ရေရွတ်လိုက်၏။

'ဒါက ဖုန်းဝူချန်လား... တကယ်ကို ထင်မထားဘူးပဲ... နဂါး မျိုးနွယ်စုရဲ့ သွေးမျိုးဆက်ကို ပိုင်ဆိုင်ထားတဲ့ လူသား တစ်ယောက်ကို ငါ ပထမဆုံးအကြိမ် မြင်ဖူးတာပဲ... ပိုပြီး ရယ်စရာကောင်းတာက သူ့ရဲ့ သွေးမျိုးဆက်က နဂါး မျိုးနွယ်စုထက်ကို ပိုပြီး သန့်စင်နေတာပဲ...'

ဤလျှို့ဝှက်ဆန်းကြယ်သော အစွမ်းထက် ပညာရှင်များ အပြင် နတ်ဆိုး မျိုးနွယ်စုမှ အစွမ်းထက် ပညာရှင်များလည်း ထိုနေရာတွင် ရှိနေကြသေး၏။

--