အခန်း ၈၇၀

အခန်း (၈၇၀) - ပါရမီရှင်များ၏ တိုက်ပွဲ

ကျားသစ်ရိုင်းကြီး ထွက်ပေါ်လာမှုက အင်အားကြီး အဖွဲ့အစည်းများကို အမှန်တကယ်ပင် တုန်လှုပ်သွားစေခဲ့ပြီး ထိုသို့ ဖြစ်ရခြင်းမှာလည်း အကြောင်းရင်း ခိုင်လုံပေသည်။

ကျားသစ်ရိုင်းကြီး၏ ကြောက်မက်ဖွယ်ကောင်းမှုက သူတို့ကို အလွန်အမင်း သတိထား စောင့်ကြည့်နေရအောင် ဖိအားပေးလိုက်ပြီး ပေါ့ပေါ့တန်တန် သဘောမထားရဲကြတော့ချေ။

သူတို့ နဂါးနတ်ဘုရား နန်းတော်သို့ လာရောက်ရသည့် အဓိက ရည်ရွယ်ချက်မှာ အမှောင်မိစ္ဆာ ကျားသစ်၏ အခြေအနေ အသေးစိတ်ကို စုံစမ်းရန်နှင့် ၎င်းအနေဖြင့် တိုက်ကြီး တစ်ခုလုံးကို ဖျက်ဆီးပစ်မည့် အန္တရာယ်မျိုး လုံးဝ ခွင့်မပြုနိုင်ကြောင်း သေချာစေရန် ဖြစ်ပေသည်။

လင်ရှောင်ရှောင်က မယုံကြည်နိုင်စွာဖြင့် မေးလိုက်၏။

"ဦးလေးလုံကျန့်... အမှောင်မိစ္ဆာ ကျားသစ်က တကယ်ပဲ ဦးလေး ပြောသလို လူမဆန်တဲ့ သားရဲကြီးလား..."

အမှောင်မိစ္ဆာ ကျားသစ်နှင့် အတူ နေထိုင်ခဲ့ရသော အချိန်ကာလ တစ်လျှောက်လုံးတွင် လင်ရှောင်ရှောင် အနေဖြင့် ၎င်းသည် လူမဆန်သော၊ ညှာတာမှု ကင်းမဲ့သော သားရဲကြီး တစ်ကောင်ဟု လုံးဝ မခံစားခဲ့ရချေ။ ထို့အပြင် ၎င်းက သူမကို အကြိမ်ကြိမ် ဝင်ရောက် ကယ်တင်ပေးခဲ့ဖူးသည် မဟုတ်ပါလော။

ပိုင်လီ ယွိဖုန်းက လေးနက်စွာ ရှင်းပြလိုက်သည်။

"သူတော်စင်မလေး... ဒါက လုံးဝ အမှန်တရားပဲ... ငါတို့ ဒီကို လာတာက အခြေအနေ အသေးစိတ်ကို အတည်ပြုဖို့ပါ... အမှောင်မိစ္ဆာ ကျားသစ်က အလွန်တရာ ရက်စက်ကြမ်းကြုတ်တယ်... အစ်ကိုဖုန်းကို သူ အသုံးချသွားမှာ ငါတို့ စိုးရိမ်နေသလို... နတ်ဆိုး မျိုးနွယ်စု လက်ထဲကို သူ ရောက်သွားမှာကိုလည်း ပူပန်နေကြတာပါ... ပထမအဆင့် နတ်ဘုရား အသွင်ပြောင်းဘုံ နဝမအလွှာ ဆိုတာ ဘယ်လောက်တောင် ကြောက်စရာကောင်းလဲ ဆိုတာ သူတော်စင်မလေးလည်း အသိဆုံး ဖြစ်မှာပါ..."

လင်ရှောင်ရှောင်က မျက်မှောင် အနည်းငယ် ကြုတ်လျက် ပြန်လည် တုံ့ပြန်လိုက်၏။

"အတိတ်တုန်းက အမှောင်မိစ္ဆာ ကျားသစ်က စီနီယာတို့ ပြောသလို လူမဆန်တဲ့ သားရဲကြီး ဟုတ်ချင် ဟုတ်ခဲ့လိမ့်မယ်... ဒါပေမဲ့ အခု လက်ရှိ ကျားသစ်ရိုင်းကြီးကတော့ အဲဒီလို လူမဆန်တဲ့ ရှေးဦး ကမ္ဘာဦး သားရဲကြီး တစ်ကောင်နဲ့ လုံးဝ မတူဘူး... နဂါးနတ်ဘုရား မဟာမိတ်အဖွဲ့က ဘယ်သူမဆို ဒီကိစ္စကို သက်သေပြနိုင်ပါတယ်..."

ဖုန်းဝူချန်ကလည်း ဝင်ရောက် ဖြည့်စွက်ပေးလိုက်သည်။

"အစောင့်အရှောက် လုံကျန့်... ပိတ်လှောင်ရေး အခင်းအကျင်းထဲမှာ လင်ရွှီဇီရဲ့ စွမ်းအားတွေ ရှိနေတယ်... မိစ္ဆာကျားသစ်က ငါတို့ကို လှည့်စားနေတယ် ဆိုရင်တောင်မှ သူ ထွက်ပြေးလို့ မရပါဘူး... ပြီးတော့ ကိုးထပ် ချန်ခွင်း မျှော်စင်က ငါ့ရဲ့ နတ်ဘုရား လက်နက်လေ... သူ့ကို ငါ အချိန်မရွေး ဖိနှိပ်ထားနိုင်တယ်... သူ ဘယ်တော့မှ ထွက်ပြေးပြီး ဒုက္ခပေးနိုင်မှာ မဟုတ်သလို အပြစ်မဲ့တဲ့ သူတွေကိုလည်း သတ်ဖြတ်နိုင်မှာ မဟုတ်ဘူး... ဒါကိုသိရင် ခင်ဗျားတို့ စိတ်သက်သာရာ ရနိုင်မလား..."

လုံကျန့်က ခေါင်းညိတ်ပြရင်း ပြန်ပြောလိုက်၏။

"အဲဒီလို ဆိုရင်တော့ အကောင်းဆုံးပေါ့... သူ့ကို နတ်ဆိုး မျိုးနွယ်စု လက်ထဲ လုံးဝ အရောက်ခံလို့ မဖြစ်ဘူး..."

"အစ်ကိုဖုန်း... မင်းက တကယ်ကို သတ္တိကောင်းတာပဲ..."

ပိုင်လီ ယွိဖုန်းက ခါးသီးသော အပြုံးဖြင့် မှတ်ချက်ချလိုက်သည်။

လုံကျန့်က ဆက်ပြောလိုက်၏။

"ဒါနဲ့ ဖုန်းဝူချန်... ခေါင်းဆောင်ကြီးက မင်းကို နဂါး မျိုးနွယ်စုဆီ အလည်လာစေချင်နေတယ်..."

ထိုစကားကို ကြားလိုက်ရသည့်အခါ ဖုန်းဝူချန်က ခဏမျှ စဉ်းစားလိုက်ပြီးနောက် ပြန်လည် ဖြေကြားလိုက်သည်။

"ဧရာမ တိုက်ပွဲကြီးက အခုမှ ပြီးဆုံးသွားတာ ဆိုတော့... ယင်ယန် မိသားစုက နောက်ထပ် ဘာတွေ ဆက်လုပ်မလဲ ဆိုတာ ငါတို့ မသိရသေးဘူးလေ... ပြီးတော့ နောက်လထဲမှာ သန့်ရှင်းသော ဝိညာဉ် ကျောင်းတော် က ကြီးမှူးကျင်းပမယ့် ဆေးပညာ ပြိုင်ပွဲ ရှိသေးတယ်... အဲဒီကို သွားဖို့ ကျွန်တော် သဘောတူထားပြီးသား... ဒါကြောင့် နဂါး မျိုးနွယ်စုဆီ အလည်လာဖို့ကတော့ အချိန် နည်းနည်း စောင့်ရဦးမယ် ထင်တယ်..."

"ပြဿနာ မရှိပါဘူး... မင်း သဘောတူတယ် ဆိုရင်ပဲ လုံလောက်နေပါပြီ... မင်းကိုယ်ထဲမှာ ရှိနေတဲ့ နဂါး မျိုးနွယ်စုရဲ့ သွေးမျိုးဆက်က ဘာလဲ ဆိုတာကို ခေါင်းဆောင်ကြီး သိနိုင်ကောင်းပါတယ်... တခြား ကိစ္စ မရှိတော့ဘူး ဆိုရင် ငါ ပြန်ပြီး သတင်းပို့လိုက်ပါဦးမယ်..."

လုံကျန့်က ခပ်ရေးရေး ပြုံးရင်း ပြန်ပြောလိုက်ရာ တစ်စုံတစ်ခုကို တမင် အရိပ်အမြွက် ပေးနေသည့်အလား ပင် ဖြစ်တော့၏။

"ကောင်းပါပြီ အစောင့်အရှောက် လုံကျန့်..."

ဖုန်းဝူချန်က ယဉ်ကျေးစွာ နှုတ်ဆက်လိုက်သည်။

"ဦးလေးလုံကျန့်... ဂရုစိုက်သွားပါဦး..."

လင်ရှောင်ရှောင်ကလည်း ပြုံးလျက် နှုတ်ဆက်လိုက်၏။

လျှပ်တစ်ပြက် အလင်းတန်း တစ်ခုနှင့်အတူ အကာအကွယ် အခင်းအကျင်း ပျောက်ကွယ်သွားပြီး အစောင့်အရှောက် လုံကျန့်လည်း ထွက်ခွာသွားခဲ့၏။

"အစ်ကိုပိုင်လီ... နောက်ထပ် ကိစ္စ တစ်ခုခု ရှိသေးလို့လား..."

ဖုန်းဝူချန်က ပိုင်လီ ယွိဖုန်းကို ပြုံးလျက် မေးလိုက်သည်။

ပိုင်လီ ယွိဖုန်းက လက်နှစ်ဖက်ကို ဖြန့်ကာ ပခုံးတွန့်ပြရင်း ပြောလိုက်၏။

"တခြား ထွေထွေထူးထူးတော့ မရှိပါဘူး... မင်းနဲ့ တစ်ပွဲလောက် ယှဉ်ချင်နေလို့... မင်းရဲ့ စွမ်းအားတွေလည်း အများကြီး တိုးတက်လာလောက်ပြီ မဟုတ်လား..."

"ဘုန်း"

စကားသံ အဆုံးမှာပင် ပိုင်လီ ယွိဖုန်းက ရုတ်တရက် တိုက်ခိုက်လိုက်၏။ သူက ပြင်းထန်သော လက်သီး တစ်ချက်ဖြင့် ထိုးနှက်လိုက်ရာ တုံးတိတိ အသံ ထွက်ပေါ်လာပြီး ဖုန်းဝူချန်က အလွယ်တကူပင် ကာကွယ်လိုက်တော့သည်။

အစစ်အမှန်ယွမ်များကို အသုံးမပြုထားသည့်တိုင် ထိုပြင်းထန်သော အင်အားကြောင့် လေပြင်းများ ရူးသွပ်စွာ တိုက်ခတ်သွားတော့၏။

'ပိုင်လီ မျိုးနွယ်စုရဲ့ သခင်လေးက တကယ်ကို အစွမ်းထက်တာပဲ... လိန်ဟွန်းနဲ့ သေချာပေါက် ရင်ဘောင်တန်းနိုင်တယ်...'

ထျန်းရှန်းဇီက ရင်တွင်း၌ တိတ်တဆိတ် အံ့အားသင့်နေမိတော့သည်။

ရှားယွင်ရွှမ်၊ ဟန်ခွန်းနှင့် အခြားသူများ အားလုံးလည်း လုံးဝ ဆွံ့အ မှင်သက်သွားကြ၏။

ဒီလောက် ငယ်ရွယ်တဲ့ သူတစ်ယောက်က ဘယ်လိုလုပ်ပြီး ဒီလောက် ကြောက်စရာ ကောင်းတဲ့ စွမ်းအားမျိုး ပိုင်ဆိုင်ထားရတာလဲ။

တကယ့်ကို အံ့မခန်း ပါရမီရှင်ပဲ။

"အိုး... တကယ်ကို အံ့သြစရာပဲ... ငါ့ရဲ့ အင်အားကို ဘာအားစိုက်ထုတ်မှုမှ မပါဘဲ ကာကွယ်နိုင်တယ်ပေါ့..."

ပိုင်လီ ယွိဖုန်းက အံ့အားသင့်စွာ မှတ်ချက်ချလိုက်သော်ငြား သူ၏ ရင်ထဲတွင်မူ အလွန်အမင်း တုန်လှုပ်နေတော့သည်။

အချိန်သိပ်မကြာသေးသော်လည်း ဖုန်းဝူချန်၏ စွမ်းအားများက ပိုင်လီ ယွိဖုန်း၏ စိတ်ကူးယဉ် မှန်းဆနိုင်စွမ်းကို လုံးဝ ကျော်လွန်ကာ ကြောက်မက်ဖွယ်ကောင်းလောက်အောင် တိုးတက်လာခဲ့၏။

"ပိုင်လီ ယွိဖုန်း... တိုက်ချင်ခိုက်ချင် စိတ်တွေ အရမ်း ဖြစ်နေတယ်ပေါ့... သတိထားနော်... အစ်ကိုကြီးဖုန်းက နင့်ကို အသေအလဲ ရိုက်နှက်သွားဦးမယ်..."

လင်ရှောင်ရှောင်က အောင်ပွဲခံသော အပြုံးဖြင့် ရယ်ရင်း သတိပေးလိုက်ရာ ဖုန်းဝူချန်၏ စွမ်းဆောင်ရည် အပေါ် လုံးဝ ယုံကြည်မှု အပြည့် ရှိနေပုံ ရသည်။

"အစ်ကိုဖုန်း... အခု ဘယ်အဆင့်ကို ရောက်နေပြီလဲ ဆိုတာများ သိခွင့်ရမလား..."

ပိုင်လီ ယွိဖုန်းက သိချင်စိတ်ဖြင့် မေးလိုက်၏။

"ထျန်းကျီဘုံ အဋ္ဌမအလွှာ အထွတ်အထိပ် ပါ..."

ဖုန်းဝူချန်က ပြုံးလျက် ဖြေကြားလိုက်သည်။

ထိုစကားကို ကြားလိုက်ရသည့် အခိုက်အတန့်မှာပင် ပိုင်လီ ယွိဖုန်း၏ မျက်နှာအမူအရာ ရုတ်ချည်း တင်းမာသွားပြီး မျက်လုံးများ ပြူးကျယ်ကာ အော်ဟစ်လိုက်တော့၏။

"ထျန်းကျီဘုံ အဋ္ဌမအလွှာ အထွတ်အထိပ် ဟုတ်လား..."

ပိုင်လီ ယွိဖုန်းမှာ အလွန်အမင်း ထိတ်လန့်သွားပြီး ထိုနေရာတွင်ပင် လုံးဝ ဆွံ့အ မှင်သက်သွားတော့သည်။

"ဒါ... ဒါ ဘယ်လိုလုပ် ဖြစ်နိုင်မှာလဲ..."

ပိုင်လီ ယွိဖုန်း၏ မျက်နှာပေါ်တွင် မယုံကြည်နိုင်မှုများ အပြည့်အဝ ဖုံးလွှမ်းနေတော့၏။ ထို့နောက် သူက ဖုန်းဝူချန် လိမ်ပြောနေကြောင်း သက်သေ တစ်ခုခု ရှာတွေ့နိုင်မလား ဆိုသည့်အလား ဖုန်းဝူချန်၏ ပတ်လည်ကို အကြိမ်ကြိမ် လှည့်ပတ် ကြည့်ရှုနေတော့သည်။

သို့သော် အကြိမ်ကြိမ် လှည့်ပတ် ကြည့်ရှုပြီးသည့်တိုင် ပိုင်လီ ယွိဖုန်းက ဘာမှ ထူးခြားချက် မတွေ့ရချေ။

သူ ဖုန်းဝူချန်ကို ပထမဆုံးအကြိမ် တွေ့ခဲ့စဉ်က ဖုန်းဝူချန်မှာ ထျန်းယွမ်ဘုံ အဆင့်တွင်သာ ရှိနေသေးကြောင်း ပိုင်လီ ယွိဖုန်း ကောင်းကောင်းကြီး မှတ်မိနေဆဲပင်။ သူ၏ အရှေ့တွင် ဖုန်းဝူချန်မှာ အားနည်းလွန်းလှသူ တစ်ဦးသာ ဖြစ်ခဲ့၏။

အချိန်သိပ်မကြာသေးသော်လည်း ဖုန်းဝူချန်မှာ ယခုအခါ ထျန်းကျီဘုံ အဋ္ဌမအလွှာ အထွတ်အထိပ် ပညာရှင် တစ်ဦး ဖြစ်လာခဲ့၏။ ဤမျှ ကြောက်မက်ဖွယ် ကောင်းလှသော တိုးတက်မှု အမြန်နှုန်း ဆိုသည်မှာ တိုက်ကြီး၏ အထွတ်အထိပ် ပါရမီရှင် ဖြစ်သော ယင်ယန်ထျန်း ကိုယ်တိုင်ပင် မစွမ်းဆောင်နိုင်သည့် အရာ တစ်ခု ဖြစ်ပေသည်။

ပိုင်လီ ယွိဖုန်း အနေဖြင့် မည်သို့မျှ မယုံကြည်နိုင်အောင် ဖြစ်နေတော့၏။

ပိုင်လီ ယွိဖုန်း၏ မယုံကြည်နိုင် ဖြစ်နေသော မျက်နှာထားကို မြင်လိုက်ရသည့်အခါ လင်ရှောင်ရှောင်က သရော်လှောင်ပြောင်သော အပြုံးဖြင့် မေးလိုက်သည်။

"ပိုင်လီ ယွိဖုန်း...နင် ကြောက်သွားတာတော့ မဟုတ်ပါဘူးနော်..."

"ကြောက်တယ်... ငါကလား..."

ပိုင်လီ ယွိဖုန်း၏ မျက်နှာမှာ မဲ့သွားပြီး ဆူပူလိုက်၏။

"အစ်ကိုဖုန်း... ထျန်းကျီဘုံ အဋ္ဌမအလွှာ အထွတ်အထိပ် ဆိုတာ ဘယ်လောက်တောင် အစွမ်းထက်လဲ ဆိုတာ ငါ့ကို ပြစမ်းပါ..."

စကားပြောနေစဉ်မှာပင် ကြီးစိုးသည့် အရှိန်အဝါကြီး တစ်ခု ပေါက်ကွဲထွက်လာပြီး ပြင်းထန်သော တိုက်ခိုက်လိုစိတ်များက ကောင်းကင်ယံသို့ ထိုးတက်သွားတော့၏။

ထျန်းကျီဘုံ နဝမအလွှာ၏ အရှိန်အဝါများ ပေါက်ကွဲထွက်လာပြီး ပြင်းထန်သည့် စွမ်းအားများ ပြည့်နှက်နေတော့သည်။

"ပိုင်လီ မျိုးနွယ်စုရဲ့ ပါရမီရှင် ဖြစ်ဖို့ တကယ်ကို တန်ပါတယ်... သူ့ရဲ့ ကျင့်ကြံခြင်းက ထျန်းကျီဘုံ နဝမအလွှာကိုတောင် ဖောက်ထွက်သွားခဲ့ပြီပဲ..."

ဖုန်းဝူချန်က ပြုံးလိုက်ရာ သူ၏ ပြင်းထန်သော တိုက်ခိုက်လိုစိတ်များလည်း ရုတ်တရက် ပေါက်ကွဲထွက်လာတော့၏။

ထျန်းကျီဘုံ အဋ္ဌမအလွှာ အထွတ်အထိပ်သို့ ယခုလေးတင် ဖောက်ထွက်နိုင်ခဲ့သူ ဖြစ်ရာ ဖုန်းဝူချန် ကိုယ်တိုင်လည်း သူ၏ စွမ်းအားများ မည်မျှအထိ အစွမ်းထက်လာသနည်း ဆိုတာကို အလွန်အမင်း စမ်းသပ်ကြည့်ချင်နေတော့သည်။

"ဖုန်းဝူချန်... လာစမ်း... ငါနဲ့ တိုက်မယ်..."

ပိုင်လီ ယွိဖုန်းက လွှမ်းမိုးဖိနှိပ်နိုင်စွမ်း အပြည့်ဖြင့် ကျယ်လောင်စွာ ဟိန်းဟောက်လိုက်၏။ သူက ခန်းမဆောင် အတွင်းမှ တဟုန်ထိုး ထွက်ခွာသွားပြီး ကောင်းကင်ယံသို့ ပျံတက်သွားတော့သည်။

"ကောင်းပြီလေ..."

ဖုန်းဝူချန်က ရင်ဘတ်ကော့ကာ ယုံကြည်မှု အပြည့်ဖြင့် ပြန်လည် ဖြေကြားလိုက်ပြီး နည်းနည်းလေးမျှ တုံ့ဆိုင်းမနေဘဲ ရှေ့သို့ တဟုန်ထိုး ပြေးထွက်သွားရာ သူ၏ ထက်ရှသော အရှိန်အဝါကြီးလည်း တစ်ပြိုင်နက်တည်း ပေါက်ကွဲထွက်လာတော့၏။

ကြောက်မက်ဖွယ် အရှိန်အဝါကြီး နှစ်ခု ပေါက်ကွဲထွက်လာမှုကြောင့် နဂါးနတ်ဘုရား နန်းတော် တစ်ခုလုံး တုန်လှုပ်သွားပြီး လူအများအပြား၏ ဇဝေဇဝါ ဖြစ်နေသော အကြည့်များက ကောင်းကင်ယံဆီသို့ ရောက်ရှိသွားကြတော့သည်။

"ဘာတွေ ဖြစ်နေတာလဲ... နန်းတော်သခင်က ဘာဖြစ်လို့ ပိုင်လီ မျိုးနွယ်စုရဲ့ သခင်လေးနဲ့ တိုက်ခိုက်နေရတာလဲ..."

"သတ်ဖြတ်ချင်တဲ့ အငွေ့အသက်တွေတော့ မပါဘူး... ရိုးရိုး ယှဉ်ပြိုင်ကြည့်တာပဲ ဖြစ်ရမယ်..."

"အရမ်း အစွမ်းထက်တဲ့ အရှိန်အဝါတွေပါလား... ထျန်းကျီဘုံ နဝမအလွှာပဲ... နတ်ဘုရား ဘုရင် နန်းတော်က လိန်ဟွန်းထက်တောင် ပိုပြီး အစွမ်းထက်နေတယ်..."

"နောက်ဆုံးတော့ နန်းတော်သခင်ရဲ့ လက်ရှိ စွမ်းအားကို မြင်တွေ့ခွင့် ရပြီပေါ့..."

နဂါးနတ်ဘုရား နန်းတော်မှ လူတိုင်းမှာ အလွန်အမင်း စိတ်လှုပ်ရှားနေကြတော့၏။

"တကယ်ကို ထျန်းကျီဘုံ အဋ္ဌမအလွှာ အထွတ်အထိပ် ပါလား..."

ဖုန်းဝူချန် ထုတ်လွှတ်လိုက်သော အရှိန်အဝါကို အာရုံခံမိလိုက်သည့်အခါ ပိုင်လီ ယွိဖုန်း၏ မျက်နှာအမူအရာက ပို၍ လေးနက်လာတော့သည်။

အမှောင်ထဲတွင် ပုန်းကွယ်နေကြသော လျှို့ဝှက်ဆန်းကြယ်သည့် အင်အားကြီး အဖွဲ့အစည်းများမှ အစွမ်းထက် ပညာရှင်များ အားလုံး သိချင်စိတ် ပြင်းပြစွာဖြင့် စောင့်ကြည့်နေကြပြီး ဖုန်းဝူချန်၏ စွမ်းအား မည်မျှ ကြီးမားသနည်း ဆိုတာကို အလွန်အမင်း သိချင်နေကြတော့၏။

"ထျန်းကျီဘုံ အဋ္ဌမအလွှာ အထွတ်အထိပ်... ဖုန်းဝူချန်ရဲ့ စွမ်းအားက တကယ်ကို မရိုးရှင်းဘူးပဲ..."

လျှို့ဝှက်ဆန်းကြယ်သော အင်အားကြီး အဖွဲ့အစည်းများမှ ပညာရှင်များက အံ့အားသင့်စွာ မှတ်ချက်ချလိုက်ကြသည်။

"ဘုန်း"

လွှမ်းမိုးဖိနှိပ်နိုင်စွမ်း အပြည့်ရှိသော ပိုင်လီ ယွိဖုန်းက အရင်ဆုံး စတင် တိုက်ခိုက်လိုက်၏။ မိုးခြိမ်းသံပမာ ပေါက်ကွဲသံနှင့်အတူ သူ၏ ပုံရိပ်က အဖြူရောင် လျှပ်စီးတန်း တစ်ခု အဖြစ်သို့ ပြောင်းလဲသွားပြီး ကြီးစိုးသော အမြန်နှုန်းဖြင့် ပစ်ထွက်သွားတော့သည်။

"မင်းကို စိတ်မပျက်စေရပါဘူးကွာ..."

ဖုန်းဝူချန်ကလည်း အရှုံးမပေးဘဲ ရဲရင့်စွာဖြင့် တဟုန်ထိုး ပြေးဝင်သွားတော့၏။

"ဘုန်း"

ဝီ...

မျက်တောင်တစ်ခတ် အတွင်းမှာပင် အဖြူရောင်နှင့် သွေးကဲ့သို့ နီရဲနေသော အလင်းတန်း နှစ်ခုက အလွန်တရာ ရက်စက်ကြမ်းကြုတ်စွာဖြင့် ဝင်တိုက်မိသွားကြတော့၏။ ကောင်းကင်ယံကို တုန်လှုပ်စေသော ပေါက်ကွဲသံ ထွက်ပေါ်လာပြီး ကြမ်းတမ်း ပြင်းထန်လှသော ဖျက်ဆီးခြင်း စွမ်းအင်များက အရပ်မျက်နှာ အသီးသီးသို့ ပြန့်ကျဲသွားတော့သည်။

ပါရမီရှင်များ၏ တိုက်ပွဲကြီး... ယခုပင် စတင် ပေါက်ကွဲလာလေပြီ။

--