အခန်း ၆၇၅

အခန်း ၆၇၅ - ကောင်းကင်ဘုံအဆင့်သွေးဆက် (၂)

ဤပုံစံများမှာ ထာဝရ မပြောင်းလဲနိုင်သော အရာများ မဟုတ်ပေ။ ဓမ္မဆုတ်ယုတ်သောကာလ သည် စောစီးစွာ ရောက်လာနိုင်သကဲ့သို့ မဟာယှဉ်ပြိုင်မှုခေတ်သည်လည်း စောစီးစွာ ပြီးဆုံးသွားနိုင်သည်။ ဓမ္မဆုတ်ယုတ်သောကာလ ဖြစ်ပေါ်ရသည့် အကြောင်းရင်းမှာ ဤစကြဝဠာသည် အစွမ်းထက်သူ အများအပြားကို လက်ခံပေးနိုင်ခြင်း မရှိသောကြောင့် စကြဝဠာ၏ စည်းမျဉ်းကို ထိန်းသိမ်းရန် ဖိနှိပ်ထားရခြင်း ဖြစ်သည်။ ကျင့်ကြံသူများအတွက်မူ ဤသည်မှာ မကောင်းသော သတင်းပင် ဖြစ်သည်။ သို့သော် ကောင်းကင်တာအိုမှာ ဘက်လိုက်မှု မရှိပေ။

ကုချင်းဖန်၏ ထင်မြင်ချက်အရ နောက်ထပ် ဓမ္မဆုတ်ယုတ်သောကာလသည် အနည်းဆုံး နှစ်ပေါင်း နှစ်ထောင်ကျော်မှသာ ရောက်ရှိလာလိမ့်မည်။ နှစ်ပေါင်း နှစ်ထောင်သည် အခြားဧကရာဇ်များအတွက် တိုတောင်းသော်လည်း ကုချင်းဖန်အတွက်မူ အရာများစွာကို လုပ်ဆောင်နိုင်သော အချိန်ကာလ ဖြစ်သည်။ သူ၏ အသက်အရွယ်မှာ နှစ်တစ်ရာကျော်သာ ရှိသေးသည်။ ဤနှစ်ပေါင်း နှစ်ထောင်အတွင်း ကုချင်းဖန်၏ စွမ်းအား မည်မျှ တိုးတက်လာမည်ကို မည်သူမျှ မခန့်မှန်းနိုင်ပေ။

"အခုလောလောဆယ်မှာ ကောင်းကင်လှည့်ဖြားဧကရာဇ်ပြဿနာကို ဖြေရှင်းနိုင်ရင် ရှေးဟောင်းသီးခြားကမ္ဘာမှာ အတွင်းပိုင်း စိုးရိမ်စရာ မရှိတော့ဘူး။ ကျန်တာက နတ်ဆိုးမျိုးနွယ်ပြဿနာပဲ"

ရှေးဟောင်းသီးခြားကမ္ဘာရှိ လူသားမျိုးနွယ်မှာ အထွတ်အထိပ်သို့ ရောက်ရှိနေရခြင်း၏ အကြောင်းရင်းမှာ သူတို့၏ သွေးကြောထဲတွင် ကောင်းကင်ဘုံအဆင့်ပုဂ္ဂိုလ်၏ သွေးဆက် အနည်းငယ် စီးဆင်းနေသောကြောင့် ဖြစ်သည်။ ရှေးခေတ်တုန်းက ထိုအထွတ်အထိပ် ပုဂ္ဂိုလ်သည် ရှေးဟောင်းသီးခြားကမ္ဘာကို ဖန်တီးခဲ့ပြီး မသေမျိုး လောကမှ ကောင်းကင်ဘုံအဆင့်တစ်ဦးနှင့် တိုက်ခိုက်ခဲ့သည်။ ထိုတိုက်ပွဲမှ ကျန်ရစ်သော အကြွင်းအကျန်များဖြင့် ယနေ့ခေတ် ကမ္ဘာကို တည်ဆောက်ခဲ့ခြင်း ဖြစ်သည်။

နတ်ဆိုးမျိုးနွယ်မှာလည်း ထိုကဲ့သို့သော အဆင့်မြင့်မျိုးနွယ် ဖြစ်သည့်အတွက် သူတို့တွင်လည်း ကောင်းကင်ဘုံအဆင့်သွေးဆက်များ ရှိနိုင်သည်ဟု ကုချင်းဖန် တွေးဆမိသည်။ ရှေးဟောင်း မဟာဧကရာဇ်များသည် ရှေးဟောင်းသီးခြားကမ္ဘာရှိ လူသားများကို ပူဇော်ပသမှုပြုလုပ်ကာ သူတို့၏ အသက်အရင်းအမြစ်ကို လုယူခဲ့ကြခြင်းမှာ ထိုသွေးဆက်ကို လိုချင်သောကြောင့် ဖြစ်နိုင်သည်။

ကုချင်းဖန်သည် ဤကိစ္စများကို တွေးတောရင်း မြောက်ပိုင်းနယ်မြေမှ အရှေ့ပိုင်းနယ်မြေသို့ တစ်ခဏချင်းအတွင်း ပြန်ရောက်လာသည်။ ကောင်းကင်ဘုံအဆင့် တာအိုကို ကျွမ်းကျင်ပြီးနောက် ကုချင်းဖန်အတွက် နေရာရွှေ့ပြောင်းခြင်းမှာ အလွန်လွယ်ကူလှသည်။ ကုမိသားစုသို့ ပြန်ရောက်ပြီးနောက် ကုချင်းဖန်သည် တရားကျင့်ကြံရန် ပြင်ဆင်သည်။ သို့သော် မကျင့်ကြံမီ ကုယန်ကို ခေါ်ယူလိုက်သည်။

"အဖေ"

"မင်း ရောက်လာပြီလား"

ကုချင်းဖန်သည် အေးဆေးစွာ ပြောရင်း သူ၏ စိတ်အာရုံဖြင့် 'ကောင်းကင်ပေတံ'ကို ဆင့်ခေါ်လိုက်သည်။ ရတနာမှာ ကြီးမားသော ဖိအားကို ထုတ်လွှတ်နေသည်။

"ဒါက ကောင်းကင်ပေတံ"

ကုယန်မှာ အလွန် အံ့အားသင့်သွားသည်။ ဤရတနာ၏ ကျော်ကြားမှုမှာ ကမ္ဘာကျော်ဖြစ်ပြီး ကုချင်းဖန်သည် ၎င်းကို သုံးကာ တားမြစ်နယ်မြေများကို ဖျက်ဆီးခဲ့ခြင်း ဖြစ်သည်။ ယခုအခါ ကုယန်သည် သူ၏ စွမ်းအားကို ပိုမိုနားလည်လာပြီး ဤရတနာ၏ နက်နဲမှုကို သိရှိသွားသည်။

ကုချင်းဖန်က ပြောသည်။ "ဟုတ်တယ်၊ ဒါက ဖန်တီးရှင် ဝိညာဉ်ရတနာပဲ။ ကောင်းကင်လှည့်ဖြားဧကရာဇ်တွေကို မသတ်နိုင်ပေမဲ့ ဒီရတနာကတော့ ဖျက်ဆီးနိုင်တယ်။ ငါ တရားကျင့်ကြံတဲ့ အချိန်မှာ ဒီရတနာကို ခဏထားခဲ့မယ်။ ဒီထဲမှာ ငါ့ရဲ့ စိတ်အာရုံ ပါဝင်တဲ့အတွက် မင်း သုံးနိုင်တယ်။ ကောင်းကင်လှည့်ဖြားဧကရာဇ်တွေကိုတင်မကဘဲ သာမန် မဟာဧကရာဇ်တွေကိုပါ သတ်နိုင်တဲ့ စွမ်းအားရှိတယ်။"

"ဖန်တီးရှင် ဝိညာဉ်ရတနာ"

ကုယန်သည် အသက်ပြင်းပြင်း ရှူလိုက်သည်။ ဤကဲ့သို့သော ရတနာမျိုးကို ကိုင်တွယ်ခွင့်ရခြင်းမှာ ဂုဏ်ယူစရာပင်။ ကုယန်သည် ကောင်းကင်ပေတံကို လေးစားစွာ သိမ်းဆည်းပြီးနောက် မေးလိုက်သည်။

"အဖေ တားမြစ်နယ်မြေတွေကို ရှင်းလင်းနေတုန်းက ရှေးဟောင်း မဟာဧကရာဇ်တစ်ပါးက လက်နက်ချဖို့ လာခဲ့တယ်။ ကျွန်တော် သူ့ကို ဂုဏ်ပြုစာရင်းထဲမှာ ခဏထားထားတယ်။ အဖေ ဘယ်လို သဘောရပါသလဲ"