အခန်း ၆၉၉

အခန်း ၆၉၉ - နတ်ဆိုးဘိုးဘေးနှင့် တိုက်ပွဲ (၂)

နတ်ဆိုးဘိုးဘေး၏ မျက်နှာပေါ်ရှိ တည်ကြည်မှုများမှာ စိတ်လှုပ်ရှားမှုအဖြစ် ပြောင်းလဲသွားသည်။ ကုချင်းဖန်ထံမှ လွှမ်းခြုံလာသော စစ်ပွဲ၏အရှိန်အဝါကို ခံစားလိုက်ရသည့်အခါ သူ၏ နှစ်ပေါင်းများစွာ အေးခဲနေသော သွေးသားတို့သည် တဖြည်းဖြည်း ဆူပွက်လာသည်။

"နတ်ဆိုးဘိုးဘေး... ခင်ဗျားရဲ့ နာမည်ကျော်ကြားမှုကို ကြားဖူးပါတယ်"

"မင်းလည်း မဆိုးပါဘူး။ 'ထိုက်ရိ နတ်ဘုရားဧကရာဇ်' နောက်ပိုင်းမှာ လူသားမျိုးနွယ်စုထဲကနေ ငါ့ရဲ့ အာရုံစိုက်မှုကို ရရှိမယ့်သူ ပေါ်လာလိမ့်မယ်လို့ မထင်ထားခဲ့ဘူး။ အရင်ကတော့ မင်းကိုသတ်ပြီး မင်းရဲ့ အသားနဲ့သွေးကို ငါ့ရဲ့ 'နတ်ဘုရားစွမ်းရည်' ကို အောင်မြင်အောင် လုပ်ဖို့ စိတ်ကူးခဲ့တယ်။ ဒါပေမဲ့ အခုတော့ ငါ့အစီအစဉ် ပြောင်းလိုက်ပြီ"

နတ်ဆိုးဘိုးဘေးသည် သွေးနီရောင် မျက်လုံးများဖြင့် အခြားလူသားများကို ကြည့်ကာ ပြုံးလိုက်သည်။

"မသေမျိုးနယ်မြေ မှာ ကြောက်မက်ဖွယ်ကောင်းတဲ့ အရာတွေ အများကြီးရှိတယ်။ တစ်ယောက်တည်းနဲ့ ရင်ဆိုင်လို့မရဘူး။ ငါတို့ ပူးပေါင်းကြရအောင်။ မသေမျိုးတံခါးကိုဖွင့်ပြီး မသေမျိုးနယ်မြေထဲ ဝင်ကြည့်ရအောင်၊ ထာဝရအသက် ဆိုတာ ဘာလဲဆိုတာ သိရအောင်ပေါ့"

"ကျုပ်က ဘာပေးဆပ်ရမှာလဲ" ကုချင်းဖန်က မေးသည်။

နတ်ဆိုးဘိုးဘေးက"ရိုးရှင်းပါတယ်။ 'ရှေးဟောင်းသီးခြားကမ္ဘာ' က လူသားတွေကို သွေးစတေးပူဇော်မယ်၊ မင်းဝင်မရှုပ်နဲ့။ ပြီးရင် ငါတို့ ထာဝရအသက်ကို အတူတူ ခံစားကြမယ်"

"ရှေးဟောင်းကမ္ဘာကို သွေးစတေးတာလား... နတ်ဆိုးနယ်မြေရဲ့ ရင်းမြစ်ကလည်း မရိုးရှင်းပါဘူး။ ဘာလို့ နတ်ဆိုးနယ်မြေကို သွေးမစတေးတာလဲ" ကုချင်းဖန်က အေးဆေးစွာ ပြန်မေးသည်။

ထိုစကားကြောင့် နတ်ဆိုးဘိုးဘေး၏ မျက်နှာမှာ အနည်းငယ် အေးစက်သွားသည်။

"ပုရွက်ဆိတ်တွေအတွက်နဲ့ ငါ့ကို စိတ်မရှုပ်ပါနဲ့။ ထာဝရအသက်ကို ရတဲ့အခါ လူမျိုးရေးဆိုတာ ဘာမှမဟုတ်တော့ဘူး။ နတ်ဆိုးနယ်မြေက 'နတ်ဘုရား ' တွေရဲ့ အကြွင်းအကျန်တွေသာ ဖြစ်တယ်။ ရှေးဟောင်းကမ္ဘာမှာတော့ အမှန်တကယ် 'နတ်ဘုရား' တစ်ပါး ကျဆုံးခဲ့တာလေ"

သူသည် ကုချင်းဖန်နှင့် အသက်သေဆုံးသည်အထိ တိုက်ခိုက်လိုခြင်း မရှိပေ။ သို့သော် ကုချင်းဖန်ကမူ ထိုသို့မတွေးပေ။

"နောက်ဆုံးတော့ အားလုံးက လက်သီးချက်အောက်မှာပဲ ဆုံးဖြတ်ရမှာပဲ"

စကားဆုံးသည်နှင့် ကုချင်းဖန်သည် 'နတ်ဆိုးသတ်ဓား' ကို ထုတ်ကာ အားအပြည့်ဖြင့် တိုက်ခိုက်သည်။

"ဒါက... မဟာတာအို ရဲ့ စွမ်းအားပဲ"

နတ်ဆိုးဘိုးဘေး ထိတ်လန့်သွားသည်။ သူသည် ကုချင်းဖန်၏ စွမ်းအားကို ခန့်မှန်းထားသော်လည်း ဤမျှ ပြည့်စုံသော မဟာတာအိုကို ကျွမ်းကျင်လိမ့်မည်ဟု မထင်ထားခဲ့ပေ။ နတ်ဆိုးဘိုးဘေးသည် အသက်ရှုလမ်းကြောင်း ပိတ်ဆို့သွားသည့်အထိ ဖြစ်သွားပြီး သူ၏ တိုက်ခိုက်မှုကို စတင်သည်။ သူသည် ပတ်ဝန်းကျင်ကို အနက်ရောင်တွင်း အဖြစ် ပြောင်းလဲကာ အရာအားလုံးကို ဝါးမြိုရန် ကြိုးစားသည်။

သို့သော် ကုချင်းဖန်၏ တိုက်ခိုက်မှုကြောင့် အနက်ရောင်တွင်းမှာ ပေါက်ကွဲသွားသည်။

"အူး"

နတ်ဆိုးဘိုးဘေး သွေးအန်ပြီး နောက်သို့ ဆုတ်သွားရသည်။ တိုက်ပွဲတစ်ပွဲတည်းနှင့်ပင် သူ ဒဏ်ရာရသွားသည်။

"ပြည့်စုံတဲ့ မဟာတာအို... ဘယ်လိုလုပ် ဖြစ်နိုင်မှာလဲ၊ ဒီစကြဝဠာထဲကသူက ဘယ်လိုလုပ်ပြီး ဒါကို ကျွမ်းကျင်မှာလဲ၊ ငါ မယုံဘူး"

နတ်ဆိုးဘိုးဘေးမှာ ဒေါသထွက်ပြီး ရူးသွပ်မတတ် ဖြစ်သွားသည်။ သူသည် ကုချင်းဖန်ကို စိတ်ဝိညာဉ်စွမ်းအားဖြင့် တိုက်ခိုက်သော်လည်း ကုချင်းဖန်က 'မြေအောက်စမ်းရေ' တာအိုစည်းချက်ဖြင့် ချက်ချင်း ပြန်လည် ဖိနှိပ်လိုက်သည်။ နတ်ဆိုးဘိုးဘေး၏ မျက်လုံးများမှ သွေးများ စီးကျလာသည်။

အခြေအနေကို မြင်သောအခါ ကုယန်သည် "အားလုံးပဲ၊ နတ်ဆိုးဘိုးဘေး ရှုံးတော့မယ်၊ နတ်ဆိုးတွေကို သတ်ကြ" ဟု အမိန့်ပေးလိုက်သည်။

သိုင်းနတ်ဘုရားတပ်ဖွဲ့ဝင်များ ရှေ့တန်းသို့ တိုးဝင်သွားကြသည်။ လိုင်ချန်နှင့် ရှထျန်းဂျွင်း တို့က နတ်ဆိုးဧကရာဇ်ငါးပါးကို တိုက်ခိုက်နေပြီး အခြားစစ်သည်များက နတ်ဆိုးနယ်မြေကို ဝင်ရောက်စီးနင်းကြသည်။

ဘုန်း ဘုန်း

ကောင်းကင်ယံတွင် မဟာတာအို မြစ်များ စီးဆင်းနေသည်။ ကုချင်းဖန်သည် ယခုအထိ အားအပြည့်ဆုံး တိုက်ပွဲကို ဖော်ထုတ်လိုက်သည်။ နတ်ဆိုးဘိုးဘေးမှာ 'နတ်ဘုရားအဆင့်တစ်ဝက်' ဖြစ်သော်လည်း သူ၏ တာအိုမှာ ချို့ယွင်းချက် ရှိနေသည်။

ကုချင်းဖန်၏ ' ဆိတ်ငြိမ်ခြင်း နိဂုံးလမ်းကြောင်း ' သည် ဒုတိယအလွှာသို့ ရောက်ရှိနေပြီဖြစ်ရာ ချို့ယွင်းနေသော တာအိုထက် အဆပေါင်းများစွာ သာလွန်သည်။

"မင်း ပြည့်စုံတဲ့ တာအိုကို ရထားတာပဲ ဖြစ်ပါစေ၊ ဒီတိုက်ပွဲမှာ အနိုင်ရမယ့်သူက ငါပဲ"

နတ်ဆိုးဘိုးဘေးသည် သူ၏ သွေးနှင့် စွမ်းအားအကုန်လုံးကို 'သွေးဓား' တစ်လက်ထဲသို့ ထည့်သွင်းလိုက်သည်။ ထိုဓားသည် အမှန်တကယ် 'ဖန်ဆင်းရှင် နတ်ဘုရားရတနာ' ၏ စွမ်းအားကို ခဏတာ ထုတ်လွှတ်လိုက်သည်။ ဓားချက်အောက်တွင် စကြဝဠာတစ်ခုလုံး ကွဲအက်သွားသကဲ့သို့ ဖြစ်သည်။

ကုချင်းဖန်လည်း တည်ကြည်သော အမူအရာဖြင့် 'နတ်ဆိုးသတ်ဓား' ထဲသို့ စွမ်းအားများ ထည့်သွင်းကာ ပြန်လည် တိုက်ခိုက်သည်။

"ဘုန်း"

သူတို့နှစ်ဦး၏ တိုက်ခိုက်မှုကြောင့် ကြယ်တာရာများ ပျက်စီးသွားပြီး ကမ္ဘာမြေများမှာ ဖုန်မှုန့်များအဖြစ် ပြောင်းလဲသွားသည်။ မျက်စိတစ်မှိတ်အတွင်းမှာပင် အကြိမ်ထောင်ပေါင်းများစွာ တိုက်ခိုက်နေကြရာ ပတ်ဝန်းကျင်ရှိ စကြဝဠာတစ်ခုလုံးမှာ ပျက်စီးခြင်း၏ အငွေ့အသက်များဖြင့် ပြည့်နှက်သွားတော့သည်။