အခန်း ၃၆

အခန်း ၃၆ - မိစ္ဆာအဆင့်သတ်မှတ်ခြင်းနှင့် ဟွမ်ကျန်း၏ တပည့်ခံခြင်း။

"အဆင်ပြေပါတယ် ဒါက နားလည်မှုလွဲဆိုတော့ တာအိုဆရာဟွမ်ကျန်းကို ကျွန်တော့်အိမ်မှာ ဧည့်ခံခွင့်ပြုပါ။"

တိတ်ဆိတ်သွားသော အခိုက်အတန့်လေးတစ်ခုအပြီးတွင် ဗိုလ်ချုပ် ယဲ့ဖုန်းက ဖိတ်ခေါ်လိုက်သည်။

"အင်း ကောင်းပြီ။"

အားလုံးသည် ဗိုလ်ချုပ် ယဲ့ဖုန်း၏ အိမ်သို့ လိုက်သွားကြသည်။ ယခုအခါ အသက်သုံးဆယ်ကျော်အရွယ်ရှိပြီဖြစ်သော ဗိုလ်ချုပ် ယဲ့ဖုန်း၏ အိမ်တွင် မိန်းမနှစ်ယောက်ရှိသည်။

တစ်ဦးမှာ ချစ်စရာကောင်းပြီး နူးညံ့သိမ်မွေ့သော ရှောင်ယာဖြစ်ပြီး ကျန်တစ်ဦးမှာ သူ ပြည့်တန်ဆာအိမ်မှ ခေါ်လာခဲ့သော အမျိုးသမီးဖြစ်သည်။

လူအုပ်ကြီးဝင်ရောက်လာပြီး ဗိုလ်ချုပ် ယဲ့ဖုန်းက လူငယ်တစ်ဦးကို အလွန်အမင်း ရိုသေနေသည်ကို မြင်သောအခါ သူတို့နှစ်ဦးမှာ အံ့ဩသွားကြသည်။

သို့သော် ရှောင်ယာမှာ လီချန်ရှင်းကို မြင်လိုက်သည့်အခိုက်တွင် အကြောင်းမဲ့ တုန်ယင်သွားခဲ့သည်။

"ရှောင်ယာ လော့လီ ဧည့်ခံပွဲ ပြင်ဆင်ကြ။ အမြန်လုပ်။"

"ဟုတ်ကဲ့ အစ်ကို"

"ဟုတ်ကဲ့။"

အမျိုးသမီးနှစ်ဦးမှာ မီးဖိုချောင်သို့ အလုပ်ရှုပ်သွားကြတော့သည်။

"တာအိုဆရာ ဟွမ်ကျန်း ဟဲပြည်နယ်ကနေ လာတာခရီးလမ်း အန္တရာယ်များသလား။ မိစ္ဆာဘုရင်တွေကိုရော တွေ့ခဲ့ရသလား။"

ဗိုလ်ချုပ် ယဲ့ဖုန်းသည် အားလုံးကို ထိုင်ခိုင်းပြီးနောက် စိတ်ဝင်တစား မေးသည်။

"မိစ္ဆာဘုရင်လား။ ပေငါးဆယ်ကျော်မြင့်တဲ့ ဧရာမမိစ္ဆာတွေကို ပြောတာလား။"

လီချန်ရှင်းသည် တောင်တန်းနက်များထဲတွင် တောင်ထက်ပင်မြင့်သော မိစ္ဆာတစ်ကောင်ကို တွေ့ခဲ့သည်ကို ပြန်တွေးမိသည်။

"အဲဒါ မိစ္ဆာဘုရင်မဟုတ်ဘူး။ မိစ္ဆာဧကရာဇ်ပါ။"

သူသည် ထိုကောင်နှင့် မတွေ့ဆုံလိုသဖြင့် လမ်းရှောင်ခဲ့ရသည်။ ဤစကားကို ကြားသောအခါ အားလုံးမှာ အံ့အားသင့်သွားကြပြီး အသံများ ထွက်ပေါ်လာသည်။

"အို မိစ္ဆာတွေကို ဘယ်လိုအဆင့်သတ်မှတ်ကြသလဲ။"

"ရိုးရိုးရှင်းရှင်း ပြောရရင် - အန္တရာယ်ရှိသောသားရဲ ၊ သေးငယ်သောမိစ္ဆာ ၊ မိစ္ဆာကြီး ၊ မိစ္ဆာဘုရင် နဲ့ မိစ္ဆာဧကရာဇ်ဆိုပြီး ငါးဆင့် ခွဲထားပါတယ်။ သူတို့ရဲ့အရွယ်အစားနဲ့ မိစ္ဆာစွမ်းအင်ကို ကြည့်ပြီး သတ်မှတ်တာပါ။"

"ပေ ၁၀ ပတ်လည်ရှိတဲ့ သားရဲတွေက စွမ်းအင်မရှိဘူး။ ပေ ၁၅ ပေကျော်ရင် သေးငယ်တဲ့မိစ္ဆာတွေ ဖြစ်လာတယ်။ ပေ ၂၀ ကနေ ၄၀ ကြားဆိုရင် မိစ္ဆာကြီးတွေဖြစ်ပြီး မိစ္ဆာပညာရပ်တွေကို သုံးနိုင်တယ်။ ပေ ၄၀ ကနေ ၄၅ ကြားက မိစ္ဆာဘုရင်တွေကတော့ ပိုပြီးကြောက်စရာကောင်းတယ်။ ပေ ၄၅ ကျော်သွားရင်တော့ မိစ္ဆာဧကရာဇ်တွေပေါ့။"

လီချန်ရှင်းသည် လူသားတို့၏ မိစ္ဆာသုတေသနမှာ အတော်အတန် တိုးတက်နေပြီဖြစ်ကြောင်း နားလည်သွားသည်။

"တာအိုဆရာက နှစ်ပေါင်း ၂၀ ကျော်ကြာသည့်တိုင် ဘာကြောင့် ဒီလောက်နုပျိုနေရတာလဲ။"

သူသည် ယခင်ကထက် ပိုမိုနုပျိုနေဆဲဖြစ်သော လီချန်ရှင်းကိုကြည့်ကာ ယဲ့ဖုန်းက အံ့ဩစွာဖြင့်ပင် မေးသည်။

"ကျွန်တော် ကြားဖူးတာတော့ ဆရာတော်ရဲ့ နာမည်အရင်းက လီချန်ရှင်းဆိုတာ ဟုတ်ပါသလား။"

"အတိတ်အကြောင်းကို မမေးတာ အကောင်းဆုံးပါ။"

လီချန်ရှင်းက မျက်လုံးများကို မှေးစင်းကာပြုံး၍ ဖြေသည်။

သူတို့သည် ညစာစားပွဲတွင် ငယ်စဉ်က အကြောင်းများကို ပြန်လည်ပြောပြကြသည်။

"ဆရာ ကျွန်တော် ယဲ့ဖုန်း တပည့်ခံချင်ပါတယ်။ ဆန္ဒကို ဖြည့်ဆည်းပေးပါ။"

"ဗိုလ်ချုပ် မင်းက အခု လူတွေကြားမှာ နဂါးတစ်ကောင်လိုပဲ။ ဘာလို့ ငါ့လို လမ်းဘေးတာအိုဆရာရဲ့ တပည့်ခံချင်ရတာလဲ။"

"ဆရာက ကျွန်တော်တို့မျိုးဆက်အတွက် လမ်းခင်းပေးခဲ့တာပါ။ သွေးသန့်စင်ခြင်း သွေးစွမ်းအင်မီးဖိုတို့လို နည်းလမ်းတွေနဲ့ ကိုယ်ခံပညာရပ်ကို ရှေ့ဆောင်ခဲ့တာ မဟုတ်ပါလား။ ဆရာ့နောက်ကို လိုက်ရတာ ကျွန်တော့်ကံကောင်းခြင်းပါပဲ။"

"ဒါဆိုရင်လည်း ကောင်းပါပြီ။ မင်းက ငါ့ရဲ့ တပည့်ပဲ။

နောက်တစ်နေ့ နံနက်တွင် ယဲ့ဖုန်းမှာ ဆရာ့ထံသို့ ချက်ချင်းလာရောက်ခဲ့သည်။

“တပည့် ယဲ့ဖုန်း ဆရာ့ကို အရိုအသေပေးပါတယ်။"

လီချန်ရှင်းက သူ၏သွေးစွမ်းအင် သန့်စင်ခြင်းနှင့် ပတ်သက်သော ပြဿနာများကို ရှင်းပြပေးသည်။

"မင်းရဲ့စွမ်းအင်က သန့်စင်ခြင်းနှစ်ကြိမ် ဖြစ်ပြီးပေမယ့် ငါပြောတဲ့ သွေးစွမ်းအင်မီးဖိုနည်းလမ်းအတိုင်း မဟုတ်ဘူး။ မင်းက နည်းလမ်းသစ်တစ်ခုကို လျှောက်လှမ်းနေတာဆိုတော့ သွေးစွမ်းအင် အရည်ပျော်ခြင်းအဆင့်ကို ရောက်ဖို့ အချိန် အများကြီးယူရလိမ့်မယ်။"

"သွေးစွမ်းအင် အရည်ပျော်ခြင်းလား ဆရာ။ ဒါဆိုရင် တတိယအကြိမ် သန့်စင်ခြင်းကို လုပ်ရမှာလား။"

"မှန်တယ် မင်းရဲ့ ရေ-မီး သန့်စင်ခြင်းနည်းလမ်းက နှလုံးနဲ့ ကျောက်ကပ်ကို အခြေခံထားတာဆိုတော့ ဆေးမြစ်တွေနဲ့ အားဖြည့်ဖို့ နည်းလမ်းကို မင်းကိုယ်တိုင်ပဲ စူးစမ်းရတော့မယ်။"

လီချန်ရှင်းက အကြံပေးလိုက်သည်။

"ဆရာ့ရဲ့လက်ရှိအဆင့်က ဘယ်လောက်လဲ။"

"ရွှေအဆီအနစ် ကို ဝမ်းဗိုက်ထဲမျိုချလိုက်ပြီဆိုရင် ငါ့ကံကြမ္မာကို ငါကိုယ်တိုင်ပဲ ပိုင်စိုးတယ်။"

လီချန်ရှင်းက ကောင်းကင်-လူသားအဆင့်ကို ပြင်ဆင်သတ်မှတ်ရန် စဉ်းစားလိုက်သည်။

အစောပိုင်း၊ အလယ်ပိုင်း၊ နောက်ဆုံးပိုင်းနှင့် ထိုအထက်တွင် ကိုယ်ပွါးအဆီအနှစ်အဆင့် ဟု သတ်မှတ်လိုက်ပြီး၊ သူရောက်ရှိနေသော အဆင့်မှာ ရွှေအဆီအနှစ်ဖြစ်ကြောင်း ရှင်းပြသည်။

ယဲ့ဖုန်းမှာ ဆရာ့၏ ရှင်းပြချက်ကြောင့် အသိပညာများ ပွင့်လင်းသွားပြီးနောက် ဝမ်းမြောက်စွာဖြင့် ပြန်လည် ထွက်ခွာသွားသည်။

လီချန်ရှင်းလည်း မြို့တော်ထဲသို့ လမ်းလျှောက်ထွက်ရန် ပြင်ဆင်လိုက်တော့သည်။