မူလရည်ရွယ်ချက်ကို ဘယ်တော့မှ မမေ့နဲ့

အခန်း (၂၁) : မူလရည်ရွယ်ချက်ကို ဘယ်တော့မှ မမေ့နဲ့

ဝမ်ဝေ့ မျှော်နန်းဆောင်စစ်ဆေးမှုမှ အပြင်သို့ ထုတ်ခံရပြီးနောက် ထိုနေရာတွင် အချိန်ခဏတာ မိန်းမောတွေဝေစွာဖြင့် မတ်တပ်ရပ်နေမိသည်။

လွန်ခဲ့သော လအနည်းငယ်တုန်းက သူ စစ်ဆေးမှုငါးခုကို ဖြတ်ကျော်နိုင်ခဲ့သော်လည်း ထိုထဲမှ နှစ်ခုက သူ့အပေါ် လွှမ်းမိုးနိုင်ဆုံး ဖြစ်သည်။

ပထမတစ်ခုက သူ့ကိုယ်သူ ဝဋ်ကြေးမုံအခန်းငယ်ထဲတွင် ပိတ်ထားပြီး ဒုတိယတစ်ခုက စွမ်းအားအတွက် လောဘကို စစ်ဆေးမှု ဖြစ်သည်။

ထိုစစ်ဆေးမှုနှစ်ခုလုံးက တူညီသော သင်ခန်းစာကို ပေးသည်။

ပန်းတိုင်ရောက်ဖို့အတွက် ဘယ်လိုတန်ကြေးမျိုးကို ပေးမှာလဲ

ဝမ်ဝေ့က ယုံကြည်မှုရှိသူ တစ်ယောက် ဖြစ်သည်။ သူ၏ သေသပ်သော အစီအစဉ်များအရ တာအိုကို သက်သေပြပြီး မဟာဧကရာဇ် ဖြစ်လာနိုင်သည့် အခွင့်အရေးက ၈၀ ရာခိုင်နှုန်းထက်ပိုသည်။ သို့သော် ခရီးလမ်းတစ်လျှောက်အတွင်း သူ စိတ်ပြောင်းလဲသွားမလား၊ မူလနှလုံးသားကို ထိန်းသိမ်းထားနိုင်မလားဆိုတာကို သူ မဖြေနိုင်ပေ။

“ အချိန်က ငါတို့အားလုံးရဲ့ ရန်သူပဲ” ဆိုသော စကားကို နည်းလမ်းပေါင်းများစွာဖြင့် အဓိပ္ပာယ်ဖွင့်ဆိုနိုင်သည်။ သေမျိုးများအတွက် အချိန်ဆိုသည်မှာ ထာဝရငြိမ်သက်ခြင်းဖြစ်သည့် သေခြင်းတရားဆီသို့ တွန်းပို့နေသည့်အရာ ဖြစ်သည်။ ကျင့်ကြံသူများက သက်တမ်းပိုရှည်သော်လည်း အတူတူဟုပင် ပြောနိုင်သည်။

ဒါပေမဲ့ မဟာဧကရာဇ်တွေအတွက်ကျ ဘယ်လိုအဓိပ္ပာယ်သက်ရောက်မှုမျိုး ရှိတာလဲ။ သူတို့က အချိန်ရဲ့ ချုပ်နှောင်မှုကနေ ကင်းလွတ်နိုင်ပြီးတော့ အကန့်အသတ်မရှိတဲ့ သက်တမ်း ရှိတယ်လေ။ သူတို့အတွက် အချိန်ဆိုတာ ဘယ်လိုအဓိပ္ပာယ်မျိုးလဲ

ယခု မဟာဧကရာဇ်များအတွက် အချိန်ဆိုသည်မှာ ထာဝရစစ်ဆေးမှုတစ်ခု ဖြစ်ကြောင်း ဝမ်ဝေ့ နားလည်သွားသည်။

သူတို့ရဲ့ စိတ်နှလုံးသားက အချိန်ရဲ့တိုက်စားမှုကို တွန်းလှန်နိုင်လား။ အချိန်တွေ ပြောင်းလဲပြီးတဲ့နောက်မှာရော သူတို့ရဲ့ စစ်မှန်တဲ့ပုံစံက ရှိသေးရဲ့လား

အချိန်နှောင်ကြိုးမှ လွတ်မြောက်သွားသူများအတွက် အချိန်က ကျင့်ကြံသူများတွင် စွဲကပ်နေမည့် ထာဝရ စစ်ဆေးမှုတစ်ခု ဖြစ်သည်။ အချိန်က သူတို့အတွက် ကျိန်စာတစ်ခုဟုပင် ဆိုနိုင်သည်။ အကျဉ်းချုပ်အားဖြင့် ပြောရလျှင် ထိုအရာက အချိန်နှင့် အချိန်နှောင်ကြိုးမှ လွတ်မြောက်သူတို့၏ ပုံမှန်ဆက်ဆံရေးဟု ဆိုနိုင်သည်။ အကြောင်းက အဆုံးမဲ့သက်တမ်းကို ရရှိပြီး အကျိုးဆက်အားဖြင့် မမှတ်မိနိုင်သည့် ဖြစ်တည်မှု တစ်ခုဖြစ်သွားသည်အထိ အချိန် တိုက်စားမှုကို တစ်သက်လုံး ခံစားနေရမည် ဖြစ်သည်။

ကျင့်ကြံခြင်းအပေါ် အာရုံစိုက်သည်က သူက အစစ်အမှန် ဘယ်သူဆိုတာ အမြဲတမ်း မှတ်မိနေဖို့ဖြစ်ပြီး ကျင့်ကြံခြင်းအတွက် မူလရည်ရွယ်ချက်ကို မေ့ပစ်ဖို့ မဟုတ်ကြောင်း ဝမ်ဝေ့ သတိထားမိသွားသည်။

ပြီးတော့ အဲဒီရည်ရွယ်ချက်က ဘာလဲ

ဧကရာဇ်ဖြစ်လာဖို့လား။ မဟုတ်သေးဘူး အဲဒါက သူ့ကျင့်ကြံခြင်းအတွက် ရရှိတဲ့ အကျိုးရလဒ်သက်သက်ပဲ။ သူ့ရဲ့ စစ်မှန်တဲ့ ရည်ရွယ်ချက် မဟုတ်ဘူး

သူ၏ စစ်မှန်သော ရည်ရွယ်ချက်က အချိန်နှင့်နေရာ၊ သေခြင်းနှင့် ရှင်ခြင်း၊ အကြောင်းနှင့် အကျိုးတို့၏ ချုပ်နှောင်မှုမှ ကင်းလွတ်ပြီး ကံကြမ္မာ၏ ထိန်းချုပ်မှုမှလည်း ကင်းလွတ်ရန် ဖြစ်သည်။

ကံကြမ္မာက သူ့လွတ်လပ်မှု လမ်းကြောင်းအတွက် အကြီးမားဆုံးရန်သူဟု ဝမ်ဝေ့ ယုံကြည်မိသည်။ ကံကြမ္မာတာအိုက ရှေ့လျှောက် သူကျင့်ကြံမည့် အဓိကတာအိုဖြစ်ပြီး မဟာဧကရာဇ်ဖြစ်လာဖို့အတွက် သူအသုံးပြုမည့် တာအိုလည်း ဖြစ်သည်။

ကံကြမ္မာ၏ လျှို့ဝှက်အကြံအစည်ကို နားလည်မှသာလျှင် ထိန်းချုပ်ပြီး ဖျက်စီးပစ်လို့ ရနိုင်လိမ့်မည်။ သူ ထိုအရာအားလုံးကို လုပ်နိုင်သည့်နေ့ ရောက်လာသည့်အခါ သူ အမှန်တကယ် လွတ်လပ်ကာ အချုပ်အနှောင်မှ ကင်းလွတ်သွားမည် ဖြစ်၏။

ထိုအရာအားလုံးကို နားလည်ပြီးနောက် ဝမ်ဝေ့၏ တာအိုနှလုံးသားက သန့်စင်သွားသည်။ ထာဝရ ဖြစ်တည်မှုအားလုံး၏ ကောင်းကင်ဘုံကို အုပ်ချုပ်သည့် ဧကရာဇ်တစ်ပါး၏ အရိပ်က သူ့နောက်တွင် ထွက်ပေါ်လာသည်။

ထိုအရာက ငယ်ရွယ်သော ဧကရာဇ်တစ်ပါးဖြစ်သည့် ဝမ်ဝေ့၏ သက်သေပြမှုတစ်ခု ဖြစ်သည်။ ယခင်တစ်ခေါက်ကလိုမျိုး အရိပ်က ပုံရိပ်ယောင်သက်သက် မဟုတ်တော့ဘဲ ဝမ်ဝေ့၏ မျက်နှာကို ယခုတစ်ခေါက် ရှင်းလင်းစွာ မြင်နိုင်သွားသည်။

ထိုအရိပ်ပေါ်လာပြီးနောက် ကြီးကျယ်ပြီး စွမ်းအားကြီးသော အရှိန်အဝါက ငါးခုမြောက်စစ်ဆေးမှုကို အပြင်ဘက်မှ ကြည့်ရှုနေသည့် တပည့်များနှင့် အကြီးအကဲများကို ဖုံးလွှမ်းသွားသည်။ လူအများစုက ထိုထိပ်သီးဖြစ်တည်မှုကို ဦးညွှတ်ချင်သည့် စိတ်အားထက်သန်မှုရှိပြီး လူအများစုက ဦးညွှတ်ခဲ့ကြသည်။

ကျင့်ကြံဆင့် နိမ့်သော တပည့်အချို့က မြေပြင်ပေါ်တွင် ဒူးထောက်ကျသွားကာ ဝမ်ဝေ့နှင့် အကြည့်ချင်းမဆုံရဲပေ။ ကျန်လူများက ကြမ်းပြင်ပေါ်တွင် ဒူးထောက်ကျသွားခြင်း မရှိသော်လည်း ဂိုဏ်းချုပ်ငယ် တစ်ယောက်အနေဖြင့် ဝမ်ဝေ့အပေါ် ထားရှိသော အံ့ဩမှုက အဆမတန် မြင့်တက်သွားခဲ့သည်။

ဝမ်ဝေ့၏ ဧကရာဇ်ငယ်အရိပ်က ယခင်တစ်ခေါက်ထက် ပိုပြီး ကြာကြာခံသော်လည်း မကြာခင်မှာ ပျောက်ကွယ်သွားပြန်သည်။ သူက ဧကရာဇ်ငယ်ဟူသော ခေါင်းစဉ်နှင့် ထိုက်တန်သော နေရာသို့ မရောက်သေးပုံပေါ်သည်။

တာအိုနှလုံးသား ပြန်လည်သန့်စင်ပြီး ဧကရာဇ်ငယ်အရိပ် ပျောက်ကွယ်သွားပြီးနောက် ဝမ်ဝေ့က အစေခံခေါင်းဆောင်နှင့်အတူ မျှော်နန်းဆောင်ထဲမှ ထွက်လာသည်။

ဝမ်ဝေ့ထွက်သွားပြီးနောက် တပည့်များက ဘာဖြစ်ခဲ့လဲဆိုတာကို စတင်ဆွေးနွေးကြတော့သည်။

“ ဂိုဏ်းချုပ်ငယ်လေးရဲ့ နောက်မှာ ပေါ်လာတဲ့အရိပ်က ဘာလဲဆိုတာ မင်းတို့ သိကြလား”

“ ကျွန်တော် မသိဘူး ဒါပေမဲ့ အံ့ဩဖို့ကောင်းတယ်။ ကျွန်တော်ကို မဟာဧကရာဇ်တစ်ပါးက ကြည့်နေသလိုခံစားရပြီးတော့ ဦးညွှတ်ချင်လာတာပဲ”

“ အဓိပ္ပာယ်မရှိတာတွေ လျှောက်ပြောမနေနဲ့တော့။ မဟာဧကရာဇ်က ဘယ်လိုပုံစံရှိတယ်ဆိုတာကို မင်းက ဘယ်လိုလုပ်ပြီးတော့ သိနိုင်မှာလဲ။ ဒါပေမဲ့ မင်းပြောတာမှန်တယ်။ ငါလည်း ဂိုဏ်းချုပ်ငယ်လေးကို ဦးညွှတ်ချင်သွားတာ။ ကြည့်ရတာ ဒီမျိုးဆက်မှာ ငါတို့ရဲ့ တာအိုအခွင့်အလမ်းဂိုဏ်းမှာ မဟာဧကရာဇ်တစ်ပါး ရှိလာနိုင်တယ်”

ထိုတပည့်များက သူတို့၏ ဂိုဏ်းထဲတွင် မဟာဧကရာဇ်တစ်ပါး ရှိလာမည့်အကြောင်းနှင့် ပတ်သက်ပြီး အရမ်းစိတ်လှုပ်ရှားနေကြသည်။

တစ်စုံတစ်ယောက် ဉာဏ်အလင်းပွင့်သွားရင် သူ့ရဲ့ ကြက်နဲ့ခွေးတွေတောင် သူနဲ့အတူ ကောင်းကင်ဘုံကို တက်လှမ်းနိုင်လိမ့်မယ်ဆိုတဲ့ စကားလိုမျိုးပေါ့

ဂိုဏ်းချုပ်ငယ်လေးသာ မဟာဧကရာဇ်ဖြစ်သွားပါက သူ့ဆီမှ အသေးငယ်ဆုံးသော စွန့်ကြဲမှုလေးကပင် သူတို့အတွက် များစွာ အကျိုးအမြတ် ရရှိနိုင်လိမ့်မည်။

တပည့်အများစုက ပျော်ရွှင်စွာ စကားပြောဆိုနေကြသော်လည်း အားလုံးက သူတို့လိုမျိုး စိတ်လှုပ်ရှားနေတာမျိုး မဟုတ်ပေ။ ထိုအရာက အပြိုင်အမွေခံသားတော် ဆယ်ယောက်အတွက် ဖြစ်၏။ တခြားတပည့်များက ဝမ်ဝေ့၏ နောက်မှအရိပ်က ဘာလဲဆိုတာ မသိနိုင်သော်လည်း သူတို့ကတော့ ထိုအရာက ဘာကို ကိုယ်စားပြုလဲဆိုတာ ကောင်းကောင်းသိထားကြသည်။

ထိုအရာက ဧကရာဇ်ငယ် အရည်အချင်းကို သက်သေပြခြင်းဖြစ်သည်။ ထိုအရိပ်ကို သူတို့မြင်မြင်ချင်း ဖြူဖပ်ဖြူလျော် ဖြစ်သွားကြသည်။ အပြိုင် အမွေခံသားတော်များအနေဖြင့် သူတို့အားလုံးက ကြီးမားသော ရည်မှန်းချက်များ ရှိကြသည်။ သူတို့အားလုံးက တစ်နေ့တွင် ဂိုဏ်းချုပ်နေရာတွင် ထိုင်ချင်ကြသူများ ဖြစ်သည်။

ဂိုဏ်းကလူများက ဝမ်ဝေ့ကို “ဂိုဏ်းချုပ်ငယ်”အဖြစ် ပြောနေကြသော်လည်း သူတို့အတွက်တော့ ထိုအရာက လက်ရှိဂိုဏ်းချုပ်၏ သားဖြစ်သူကို လေးစားသမှုဖြင့် ခေါ်ဝေါ်သော အခေါ်အဝေါ်တစ်ခုသာ ဖြစ်သည်။

တာအိုအခွင့်အလမ်းဂိုဏ်း၏ စည်းမျဉ်းများအရ ဂိုဏ်းချုပ်၏ မျိုးဆက်ဖြစ်လျှင်ပင် ရာထူးကို တိုက်ရိုက်ဆက်ခံခွင့် မရှိပေ။ အမွေခံသားတော်ဟူသော ခေါင်းစဉ်ကို ရရှိဖို့အတွက် မျှတသော ပြိုင်ပွဲများကို ယှဉ်ပြိုင်ပြီး ကိုယ့်ကိုယ်ကို သက်သေပြရမည်။

ဝမ်ဝေ့က အရည်အချင်းရှိသူဖြစ်ပြီး ကောင်းကင်ဆန္ဒအတွက် ယှဉ်ပြိုင်ရန် ဂိုဏ်းမှ တွန်းအားပေးလိမ့်မည် ဖြစ်ကြောင်း အပြိုင် အမွေခံသားတော်များ သိသည်။ ယခုကစပြီး စိတ်ပူပန်စရာများ ရှိလာပြီဟု သူတို့ တွေးလိုက်မိသည်။

ဝမ်ဝေ့က ဘယ်လောက်ထိ အရည်အချင်း ရှိနေပါစေ သူတို့၏ အဆင့်ရောက်ရန် အချိန်လိုအပ်သေးသည်ဟု သူတို့ ယုံကြည်သည်။ ထို့နောက် ယခုတစ်ခေါက်ကို အသုံးချပြီး သူနှင့် သူတို့ကြားက ကွာဟမှုကို ပိုမိုကြီးမားလာအောင် ဆွဲဆန့်နိုင်သည်။ ထို့ကြောင့် ဝမ်ဝေ့၏ အရည်အချင်းက ယူဆောင်မသွားခင် သူတို့မှာ ဂိုဏ်းချုပ်ဖြစ်လာဖို့ ပိုမိုမြင့်မားသော အခွင့်အရေး ရှိသည်။

သို့သော် ယခုတော့ ဧကရာဇ်ငယ် တစ်ပါးအဖြစ် ဝမ်ဝေ့၏ အရည်အချင်းက သူတို့၏ အိပ်မက်အများစုကို လုံးဝ တစ်စစီဖြစ်သွားစေသည်။ ထိုအရည်အချင်းကြောင့် သူတို့ အမွေခံသားတော်နေရာကို ဝမ်ဝေ့နှင့် ယှဉ်ပြိုင်နိုင်တော့မည် မဟုတ်ပေ။

ဧကရာဇ်ငယ်က ပြိုင်ဘက်ကင်းသည်ဟု ဆိုလိုခြင်းမဟုတ်မှန်း သူတို့သိသည်။ ပြီးခဲ့သော ခေတ်များတွင် ဧကရာဇ်ငယ်များကို နိုင်အောင် တိုက်ခိုက်နိုင်သည့် ကောင်းကင် ရွေးချယ်ခံများလည်း ရှိသည်။ ယခု မေးရမည့်မေးခွန်းက သူတို့ထဲမှာ ကောင်းကင် ရွေးချယ်ခံ ရှိလားဆိုသည့် မေးခွန်း ဖြစ်သည်။

ဧကရာဇ်ငယ်များအားလုံးလည်း မဟာဧကရာဇ်ဖြစ်လာမည်ဟု မဆိုလိုနိုင်ပေ။ ဧကရာဇ်လမ်းစဉ်က ရှည်လျားခက်ခဲသည့်အတွက် ဘာကိုမှ အတည်သေချာပေါက် တွက်ဆထားလို့ မရပေ။