အခန်း ၆၈၃

အခန်း (၆၈၃) ဗဟိုတိုက်ကြီးဆီသို့ ပြန်လည်ခြေဆန့်ခြင်း

ထိုသို့သော အချိန်၌ ချင်ယွမ်ဖုန်းသည် ကွမ်းဟိုင်နှင့်တကွ အခြားသော ကျွန်းငယ်များမှ လာရောက်ကြသူများကို ရှာဖွေပြီး ယင်း၏ အခန်းတွင်းသို့ ခေါ်ယူလိုက်ချေသည်။

“ဆရာသခင်... ဆရာသခင် ထွက်သွားတော့မလို့လားခင်ဗျာ” ဟု စိတ်ထဲက ကြိုတင်ရိပ်မိနေသော ကွမ်းဟိုင်က တုန်ရီသော အသံဖြင့် မေးမြန်းရှာသည်။

ချင်ယွမ်ဖုန်းက ခေါင်းညိတ်ပြလျက် “ဟုတ်တယ်... ငါ အခုပဲ ထွက်သွားတော့မယ်၊ ဒါပေမဲ့ ကျွန်းပေါ်မှာ နေရာပြောင်း အစီအရင်တစ်ခု ငါ ထားခဲ့ပါတယ်၊ မင်းတို့တွေ သွားချင်တဲ့ ပန်းတိုင်ဆီ တိုက်ရိုက် နေရာပြောင်း သွားနိုင်အောင် ငါ မထွက်ခွာခင် ပြင်ဆင်ပေးခဲ့မယ်၊ စိုးရိမ်ပူပန်မှုတွေ သိပ်မထားကြပါနဲ့၊ အားလပ်တဲ့ အချိန်ကျရင်လည်း ကမ္ဘာ့အလယ်ပိုင်း ဗဟိုတိုက်ကြီးဆီ သွားရောက်ပြီး အမြင်ကျယ်အောင် လေ့လာနိုင်ကြတာပဲ” ဟု မိန့်ကြားလေသည်။

“ဆရာသခင်... ကျွန်တော်တို့ ဆရာသခင်ကို လွမ်းနေမှာပါဗျာ” ဟု ဘေးနားရှိ ချွေကျားနှင့် အခြားတစ်ယောက်က အော်ဟစ်ပြောဆိုကြသည်။

ထိုကာလ အတောအတွင်း ချင်ယွမ်ဖုန်းသည် ယင်းတို့အား စိတ်ရှည်လက်ရှည် ကျနစွာ သင်ကြားပြသပေးခဲ့သဖြင့် ယင်းတို့၏ ဆေးဖော်စပ်ခြင်း ပညာရပ်မှာ အရှိန်အဟုန်ဖြင့် တိုးတက်လာခဲ့ပေရာ ယခုလို ခွဲခွာရမည်ကို နှမျောတသ ဖြစ်နေကြရသည်။

“နောင်တစ်ချိန်မှာ ငါတို့ ပြန်ဆုံကြဦးမှာပါ” ချင်ယွမ်ဖုန်းက ပြုံးလျက် “ငါ ဒီကျွန်းပေါ် ရောက်နေတာ တစ်နှစ်ကျော်တောင် ရှိသွားပြီ၊ အခုတော့ ပြန်ရမယ့် အချိန်တန်ပြီပေါ့၊ ငါ သင်ပေးထားတဲ့ ပညာရပ်တွေကို မင်းတို့တွေ ကြိုးစားပမ်းစား လေ့ကျင့်ကြရမယ်၊ ဒါမှသာ ပိုပြီး မြင့်မားတဲ့ အဆင့်အတန်းဆီ တက်လှမ်းနိုင်မှာ” ဟု အားပေးစကား ဆိုလိုက်သည်။

“နားလည်ပါပြီ ဆရာသခင်” ယင်းတို့ နှစ်ဦးစလုံး၏ မျက်နှာတွင် နှမြောတသရိပ်များ ထင်ဟပ်နေချေသည်။

ကွမ်းဟိုင်ဆိုလျှင် ပို၍ပင် လမ်းခွဲရမည်ကို တွန့်ဆုတ်နေမိသည်။ ထိုကာလအတွင်း ယင်း၏ ဆေးဖော်စပ်ခြင်း ပညာရပ်သည် ဆဋ္ဌမအဆင့် ဆေးဖော်စပ်သူ အဆင့်သို့ တိုက်ရိုက် တိုးတက်အောင်မြင်ခဲ့ရာ ယခင်ကဆိုလျှင် ယင်း၏ တစ်သက်တာတွင် ဤမျှ မြင့်မားသော အဆင့်သို့ တက်လှမ်းနိုင်လိမ့်မည်မဟုတ်ဟု တွေးထင်ခဲ့ဖူးသည်။

“စကားတွေ အများကြီး ပြောမနေကြနဲ့တော့၊ ငါ ပြောခဲ့သလိုပဲ နောင်တစ်ချိန် ပြန်ဆုံကြဦးမှာပါ၊ သွားလာလှုပ်ရှားတဲ့အခါ သတိထားကြ၊ ဘယ်သူပဲဖြစ်ဖြစ် ငါ့အကြောင်း လာမေးရင်လည်း အရိုးခံကြီး အကုန်လျှောက်မပြောမိစေနဲ့” ဟု ချင်ယွမ်ဖုန်းက မှာတမ်းခြွေလေသည်။

ခေတ္တမျှကြာသော် ချင်ယွမ်ဖုန်းသည် အခန်းထဲမှ ထွက်လာခဲ့ပြီး ကွမ်းဟိုင်၊ ချွေကျားနှင့် ကျန်နှစ်ဦးတို့ကလည်း လမ်းခွဲရတော့မည့်အလား ဝမ်းနည်းပူဆွေးသော မျက်နှာများဖြင့် လိုက်ပါလာကြသည်။

ယန်ရုနှင့် စီဒန်ဟွာတို့သည်လည်း အနားသို့ ရောက်ရှိလာကြပြီး ချင်ယွမ်ဖုန်း နေရာပြောင်း အစီအရင်ဆီသို့ ဖြည်းညှင်းစွာ လျှောက်လှမ်းသွားသည်ကို ငေးမောကြည့်ရှုနေကြ၏။

“ဦးလေး... ကျွန်တော်အသက်ကို ကယ်တင်ပေးခဲ့တဲ့အတွက် တကယ်ပဲ ကျေးဇူးတင်ပါတယ်၊ ပြန်ရောက်သွားရင် ဦးလေးဆီ တစ်ခေါက် ပြန်လာတွေ့ပါ့မယ်”

ချင်ယွမ်ဖုန်းက လက်ဝှေ့ယမ်းပြလျက် နေရာပြောင်း အစီအရင်ပေါ်သို့ တက်လှမ်းရပ်တန့်လိုက်သည်။

ချင်ယွမ်ဖုန်း၏ စိတ်ထဲတွင် ပြန်လည်ရောက်ရှိပြီးနောက် မည်သည့်နေရာသို့ သွားမည်ဟူသော အစီအစဉ်တစ်ခု ရှိနှင့်ပြီးဖြစ်သည်။

ယင်း ထွက်ခွာသွားပြီးနောက် ဤနေရာပြောင်း အစီအရင်သည် သတ်မှတ်ထားသော ကန့်သတ်ချက် လမ်းကြောင်းအတိုင်းသာ တည်ရှိနေမည်ဖြစ်ရာ အကယ်၍ ပြန်လည် မပြင်ဆင်ပါက ယင်း နေရာပြောင်းခဲ့သည့် နေရာဆီသို့သာ တိုက်ရိုက် ရောက်ရှိစေမည် ဖြစ်ပေသည်။

“နှုတ်ဆက်ခဲ့ပါတယ်” ချင်ယွမ်ဖုန်းက တိုးတိုးလေး ရေရွတ်လိုက်သည်။ နေရာပြောင်း အစီအရင်ပေါ်တွင် စူးရှတောက်ပသော အလင်းတန်းတစ်ခု ဖြာထွက်လာပြီးနောက် ခဏအကြာတွင် အလင်းတန်းများ ပျောက်ကွယ်သွားကာ ချင်ယွမ်ဖုန်း၏ ပုံရိပ်သည်လည်း ထိုနေရာမှ တစ်ပါတည်း ပျောက်ကွယ်သွားချေပြီ ဖြစ်သည်။

“ဟူး... အဲဒီကောင်လေး ထွက်သွားတော့ ရုတ်တရက် ရင်ထဲမှာ ဟာတာတာကြီး ဖြစ်ကျန်ခဲ့တာပဲ” ဟု စီဒန်ဟွာက သက်ပြင်းချလျက် ခေါင်းကို ရမ်းခါရင်း ဆိုရှာသည်။

ယန်ရုကမူ ယင်း၏ မျက်ရည်များကို အတင်းအကျပ် အောင့်အီးအောင့်ခံ ထိန်းချုပ်ထားရရှာသည်၊ အကြောင်းမူကား ချင်ယွမ်ဖုန်းက ယင်းထံ သေချာပေါက် ပြန်လာခဲ့မည်ဟု ကတိစကား ဆိုခဲ့ခြင်းကြောင့် ဖြစ်ပေသည်။

ရှန်းဝူ စကြဝဠာ တိုက်ကြီး၏ ချီဖုန်းချောက်ကမ္ဘာ မြောက်ဘက် ကမ်းပါးစွန်းထက်တွင် ဆန်းကြယ်လှသော ဝိညာဉ်အဆောင်ပုံရိပ်များ ထုဆစ်ထားသည့် နေရာပြောင်း အစီအရင် တည်ရှိရာ စွန်းထွက်နေသော ကျောက်ဆောင်ကြီးတစ်ခု ရှိပေသည်။

ဤနေရာပြောင်း အစီအရင်အား မူလက ချင်ယွမ်ဖုန်း ကိုယ်တိုင် ဤနေရာ၌ ထားရှိခဲ့ခြင်း ဖြစ်သည်။

ဤအကြောင်းကို ယင်းနှင့် လင်တုံး နှစ်ဦးတည်းသာ သိရှိကြပြီး လောကတွင် တန်ခိုးဩဇာ ကြီးမားလှသော ယမမင်း လူသတ်သမားအဖွဲ့အစည်းပင်လျှင် ယင်း တည်ရှိနေမှုကို အရိပ်အယောင်မျှပင် မသိရှိချေ။

ထိုအချိန်၌ နေရာပြောင်း အစီအရင်ထက်တွင် အလင်းတန်းတစ်ခု ဖျတ်ခနဲ လက်ခနဲ ဖြစ်သွားပြီး ချင်ယွမ်ဖုန်း၏ ကိုယ်ထည် ပုံရိပ်သည် ရုတ်ချည်း ပေါ်ပေါက်လာခဲ့သည်။

ကျယ်ပြောလှသော ဝိညာဉ်စွမ်းအားသည် အပြင်ဘက်သို့ လျင်မြန်စွာ ဖြန့်ကျက်သွားပြီး မီတာငါးထောင်ပတ်လည် အရပ်ဒေသကို လွှမ်းမိုးသွားချေသည်။

ပင်လယ်ပြင်နှင့် ကွာလှမ်းသော အရပ်ဖြစ်သည့်အပြင် ချီဖုန်းချောက်ကမ္ဘာအတွင်း မည်သူတစ်ဦးတစ်ယောက်မျှ မရှိသည်ကို တွေ့ရသဖြင့် ချင်ယွမ်ဖုန်းသည် သက်ပြင်းချလျက် စိတ်အေးသွားရသည်။

“နောင်တစ်ချိန်မှာ ယန်ရုနဲ့ တခြားလူတွေ နေရာပြောင်းလာရင်လည်း ဒီနေရာကိုပဲ ရောက်လာကြမှာ၊ ငါ ဒီနေရာမှာ မြေပုံတစ်ခု ဝယ်ပြီး ထားခဲ့ရမယ်” ဟု ချင်ယွမ်ဖုန်းက တိုးတိုးလေး ရေရွတ်ရင်း ထိုနေရာမှ လျင်မြန်စွာ ထွက်ခွာခဲ့သည်။

သို့သော်လည်း ချင်ယွမ်ဖုန်းသည် ယခုအချိန်တွင် မိမိကိုယ်ကိုယ် လူလုံးပြပါက လွန်စွာ လူသိထင်ရှားသွားနိုင်သည်ကို သိရှိသဖြင့် ဝတ်ရုံရှည် အမည်းရောင်ကို ပြောင်းလဲဝတ်ဆင်လျက် ယင်း၏ မျက်နှာကို နက်ရှိုင်းသော ဦးထုပ်အောက်တွင် ဖုံးကွယ်ထားလိုက်ချေသည်။

တစ်ချိန်တည်းမှာပင် ယင်းက မိမိ၏ အရှိန်အဝါကို ဖိနှိပ်ထားလိုက်ရာ ခန္ဓာကိုယ်မှ သူစိမ်းများ အနားမကပ်ရဲသော အေးစက်စက် အရှိန်အဝါများ ထွက်ပေါ်နေပြီး ယင်း၏ ကျင့်စဉ်အဆင့်ကိုလည်း နဝမအဆင့် မဟာဆရာနယ်ပယ် အဆင့်တွင်သာ ထိန်းညှိပြသထားလိုက်သည်။

ဤမျှသော ကျင့်စဉ်အဆင့်သည် အခြားသော အစွမ်းထက် သိုင်းပညာရှင်ကြီးများကို သွားရောက် မရန်ရှာသရွေ့ တိုက်ကြီးထက်တွင် လွတ်လပ်စွာ သွားလာလှုပ်ရှားနိုင်ရန် လုံလောက်လှပေသည်။

“ရှောင်လင်... ငါ့ရဲ့ အရည်အချင်းပြကွက်ကို တစ်ချက်လောက် ထုတ်ပြစမ်းပါဦး” ချင်ယွမ်ဖုန်းက တည်ငြိမ်စွာ ဆိုလိုက်သည်။

“ဟုတ်ကဲ့ပါ အရှင်သခင်” ရှောင်လင်၏ အသံသည် ချင်ယွမ်ဖုန်း၏ စိတ်အာရုံထဲတွင် ပေါ်ပေါက်လာခဲ့ချေပြီ။

သခင် : ချင်ယွမ်ဖုန်း

အသက် : ၂၅ နှစ်

ကျင့်စဉ်နယ်ပယ်အဆင့်: ပဉ္စမအဆင့် ဘိုးဘေးနယ်ပယ်၊ သတ္တမအဆင့် ဆေးဖော်စပ်သူ၊ ဆဋ္ဌမအဆင့် အဆောင်လက်ဖွဲ့ ဖန်တီးသူ

သိုင်းပညာရပ်များ: ဝိညာဉ်ရှာဖွေခြင်းပညာရပ်၊ အဆိပ်တစ်သောင်း ပညာရပ်၊ မိုးတိမ်လွင့် ပညာရပ်၊ ကောင်းကင်ဘုံ သန့်စင်ခြင်း ပညာရပ်၊ အလောင်းကောင်ရုပ်သေး ပညာရပ်၊ ယင်ယန်ပေါင်းစပ်ခြင်း ပညာရပ်၊ ဝိညာဉ်သားရဲထိန်းကျောင်းရေး ပညာရပ်၊ နဂါးဟိန်းသံပညာရပ်၊ ဓားဆွဲ ခုတ်ချက်၊ လင်းနို့အသွင်ပြောင်းလဲခြင်း ပညာရပ် ၊ သွေးပေါက်ကွဲခြင်း ပညာရပ်၊ မီးလျှံကောင်းကင်ခုတ်ချက်၊ နေဝင်ချိန်တစ်ချက်ခုတ်၊ ဗုဒ္ဓဂါထာတော် လက်ဝါး၊ ဝရဇိန်ခန္ဓာပညာရပ်၊ ကြိုတင်သိမြင်ခြင်း၊ မိုးကြိုးမီးလျှံ ဗုံးသီး၊ နဂါးသတ်ချက်၊ ကိုယ်တွင်းစွမ်းအင် ချိုးဖျက်ခြင်း၊ ကောင်းကင်ဘုံ သန့်စင်ခြင်း နတ်ဘုရားလက်ဝါး၊ မီးလျှံဝိညာဉ်အမှတ်အသား

ဓာတ်စွမ်းအင်များ: ခရမ်းရောင်မီး၊ ရွှေရောင်မိုးကြိုး၊ ဟင်းလင်းပြင်၊ နှင်းမြူ၊ နဂါးအရှိန်အဝါ၊ ကမ္ဘာမြေဓာတ်

ကျင့်စဉ်: စွမ်းအင်စုပ်ယူခြင်း မဟာပညာရပ်

**ယုံကြည်မှုတန်ဖိုး** : ၉,၉၁၆,၅၃၈

ချင်ယွမ်ဖုန်းက ခေါင်းညိတ်လိုက်သည်။ မိမိသည် ယခုအခါ ပဉ္စမအဆင့် ဘိုးဘေးနယ်ပယ်နှင့် သတ္တမအဆင့် ဆေးဖော်စပ်သူ ဖြစ်နေပြီဖြစ်သည့်အပြင် မီးလျှံဝိညာဉ်အမှတ်အသား သိုင်းပညာရပ်ကိုလည်း ထပ်မံဖြည့်စွက်နိုင်ခဲ့ပြီ ဖြစ်သည်။

ဤအခြေအနေသည် ချင်ယွမ်ဖုန်းအား လွန်စွာ ကျေနပ်အားရစေခဲ့ရာ လွန်ခဲ့သော နှစ်နှစ်တာ ကာလကို အလဟဿ မဖြုန်းတီးခဲ့ဟု ခံစားလိုက်ရသည်။

ယင်းသည် ကမ်းပါးစွန်းထက်မှ ပျံသန်းဆင်းသက်ခဲ့ပြီး ယခင်က အသက်လု ထွက်ပြေးစဉ် ဖြတ်သန်းခဲ့ဖူးသော တောအုပ်ထဲသို့ ဝင်ရောက်ခဲ့ကာ မိမိ ပုန်းအောင်းခဲ့ဖူးသည့် လိုဏ်ဂူကို ရှာဖွေတွေ့ရှိခဲ့သည်။

လိုဏ်ဂူတွင်းမှာမူ ယခုအခါ ဗလာကျင်းနေချေပြီ။ ချင်ယွမ်ဖုန်းအား မိစ္ဆာသားရဲများ တိုက်ခိုက်ခဲ့သော အမှတ်အသားများ ရှိနေသေးသော်လည်း နေရာပြောင်း အစီအရင်မှာမူ ပျောက်ကွယ်သွားခဲ့ချေပြီ။

“တုန်ကော်... ရှီးလျူ... မင်းတို့တွေ ငါ့ရဲ့ နတ်မင်းစစ်သည်တော်လေးကို လုယူသွားရုံတင်မကဘူး၊ ငါ့ရဲ့ နေရာပြောင်း အစီအရင်ကိုပါ ခိုးယူပြီး ငါ့ကို အသေအလဲ ဖြစ်အောင် လုပ်ခဲ့ကြတယ်၊ မကြာခင်မှာ ဒီအကြွေးတွေကို ငါ မပျက်မကွက် ပြန်တောင်းရမယ်” ဟု ချင်ယွမ်ဖုန်းက အေးစက်စက် ရေရွတ်လိုက်သည်။

ချင်ယွမ်ဖုန်းသည် ချီဖုန်းချောက်ကမ္ဘာမှ ထွက်ခွာလာပြီးနောက် စိန်ခေါ်ရာမြို့တော်သို့ ရောက်ရှိလာခဲ့သည်။

ချင်ဝူယန်းနှင့် ချင်ယွမ်ဖုန်းတို့၏ စိန်ခေါ်ပွဲကြီး ပြီးဆုံးခဲ့သည်မှာ နှစ်နှစ်မျှ ကြာမြင့်ခဲ့ပြီဖြစ်ရာ ထိုအုတ်အော်သောင်းနင်း ဖြစ်မှုများမှာ ငြိမ်သက်သွားခဲ့ပြီ ဖြစ်သော်လည်း လူအများစုသည် ထိုစိန်ခေါ်ပွဲအကြောင်းကို ရံဖန်ရံခါ ထုတ်ဖော်ပြောဆိုနေကြဆဲ ဖြစ်သည်။

မြူနှင်းဂိုဏ်းသည် လွန်စွာ ဆိုးသွမ်းယုတ်မာသော မိစ္ဆာဂိုဏ်းတစ်ခုအဖြစ် ကောလာဟလများ ထွက်ပေါ်နေသည်မှာ ချင်ယွမ်ဖုန်း မျှော်လင့်မထားသော အရာပင်ဖြစ်သည်။

အမှန်စင်စစ် ယင်းအား အမှန်တကယ် သတ်ဖြတ်လိုသူမှာ ဖုမိုချိုး တစ်ယောက်တည်းသာ ရှိခဲ့ခြင်း ဖြစ်ပေသည်။

ထို့ပြင် ထိုစိန်ခေါ်ပွဲ သမိုင်းကြောင်းကို လွန်စွာ ချဲ့ကားပြီး ပြောဆိုနေကြရာ ဥပမာအားဖြင့် ချင်ယွမ်ဖုန်းသည် သန့်ရှင်းသော နယ်မြေဖြစ်သည့် မြူနှင်းဂိုဏ်းကို တစ်ဦးတည်း ရင်ဆိုင်ခဲ့ပြီး မသေဆုံးမီ ယမမင်း လူသတ်သမားအဖွဲ့အစည်းနှင့်ပါ စိန်ခေါ်တိုက်ခိုက်ခဲ့သည်ဟု ပြောဆိုကြသဖြင့် ချင်ယွမ်ဖုန်းအား လောကတွင် အနှိုင်းမဲ့ သိုင်းပညာရှင်ကြီးတစ်ဦးအဖြစ် ရည်ညွှန်းနေကြတော့သည်။

ချင်ယွမ်ဖုန်းသည် ရယ်လည်းရယ်ချင်၊ စိတ်လည်းပျက်မိသော်လည်း ထိုအရာများကို ဂရုစိုက်မနေတော့ဘဲ မြို့တွင်းရှိ ကုန်စုံဆိုင်သို့ တိုက်ရိုက်သွားရောက်ကာ ရှန်းဝူ စကြဝဠာ တိုက်ကြီး၏ မြေပုံတစ်ခုကို ဝယ်ယူပြီး တည်နေရာများကို သေချာစွာ မှတ်သားကာ ကမ်းပါးစွန်းထက်ရှိ နေရာပြောင်း အစီအရင်ဆီသို့ ပြန်လည် ပို့ဆောင်ထားလိုက်သည်။

ဤနေရာသည် လွန်စွာ ဆိတ်ငြိမ်လှသဖြင့် သူတစ်ပါး ရှာဖွေတွေ့ရှိသွားမည်ကို စိုးရိမ်စရာ မလိုပေ။

မပြန်လာမီကပင် ချင်ယွမ်ဖုန်းသည် မိမိ၏ အထောက်အထားကို ဖုံးကွယ်ရန် အကောင်းဆုံး နည်းလမ်းတစ်ခုကို ကြံဆခဲ့ပြီး ဖြစ်သည်။

လူတိုင်းက ယင်းအား သေဆုံးသွားပြီဟု ယုံကြည်နေကြသော်လည်း အကယ်၍ ယင်း အသက်ရှင်နေသေးသည့် သတင်းသာ ပေါက်ကြားသွားပါက တစ်နေ့တွင် ယမမင်းအဖွဲ့အစည်းထံသို့ ရောက်ရှိသွားမည်ဖြစ်ရာ မိမိကိုယ်ကိုယ် ဖုံးကွယ်ထားရန် အထောက်အထား အသစ်တစ်ခု လိုအပ်ပေသည်။

ထိုသို့ဖြင့် ချင်ယွမ်ဖုန်းသည် အလွန်ကောင်းမွန်သော အတွေးတစ်ခုကို ရရှိခဲ့သည်၊ ယင်းမှာ ယမမင်း လူသတ်သမားအဖွဲ့အစည်းအတွင်းသို့ ဝင်ရောက်ရန်ပင် ဖြစ်ချေသည်။

ချင်ယွမ်ဖုန်းသည် ရန်သူ့မျက်စိအောက်တွင် ပုန်းအောင်းနေလိမ့်မည်ဟု မည်သူမျှ ထင်မှတ်ထားကြလိမ့်မည်မဟုတ်ပေ။

ရှေးလူကြီးများ ပြောစကားအရ အန္တရာယ်အရှိဆုံး နေရာသည် အလုံခြုံဆုံး နေရာဖြစ်သည်ဟူသော စကားအတိုင်း ဤနည်းလမ်းသည် လွန်စွာ စိတ်ချရသော နည်းဗျူဟာဖြစ်ကြောင်း ချင်ယွုန်းဖုန်း ယုံကြည်မိသည်။

ထို့ပြင် ယမမင်းအဖွဲ့သို့ ဝင်ရောက်ခြင်း၏ နောက်ထပ် အားသာချက်တစ်ခုမှာ မိမိ သိရှိလိုသော လျှို့ဝှက်သတင်း အချက်အလက်များစွာကို စုံစမ်းဖော်ထုတ်နိုင်ခြင်းပင် ဖြစ်သည်။

မိမိ အလေးအနက် ဂရုစိုက်ရသော လူသားများ၏ လက်ရှိ အခြေအနေကို သေသေချာချာ မသိရသေးသဖြင့် ယင်းတို့ထံ စောစီးစွာ သွားရောက်ရှာဖွေပါက ယင်းတို့အား အန္တရာယ်တွင်းသို့ တွန်းပို့သကဲ့သို့ ဖြစ်သွားနိုင်သည်။

ထို့ကြောင့် မိမိအနေဖြင့် အခြေစိုက်စခန်းတစ်ခုကို အတည်တကျ တည်ဆောက်ပြီး အထောက်အထားကို သေသေချာချာ ဖုံးကွယ်ပြီးမှသာ သွားရောက်သင့်ပေသည်။

ချင်ယွမ်ဖုန်းသည် မည်သည့် သတင်းအချက်အလက်မျှ ကျန်ရစ်ခြင်းမရှိစေရန် အကြိမ်ကြိမ် အထပ်ထပ် စစ်ဆေးပြီးနောက် စိန်ခေါ်ရာမြို့တော်သို့ ပြန်လည် ခြေလှမ်းလှည့်ခဲ့သည်။

“မြူနှင်းဂိုဏ်း... ယမမင်း... မင်းတို့တွေ ငါ ပြန်ရောက်လာပြီဆိုတာကို ဘယ်တော့မှ ထင်မှတ်ထားမှာ မဟုတ်ဘူး၊ ငါ့ရဲ့ ကလဲ့စားချေမှုက ဘယ်လိုပုံစံမျိုး ဖြစ်လာမလဲဆိုတာ စောင့်ကြည့်နေကြရုံပေါ့” ဟု ချင်ယွမ်ဖုန်းက တိုးတိုးလေး ရေရွတ်လိုက်ချေသည်။