အခန်း ၅၈

အခန်း။ ၅၈

"တာအိုကျောင်းတော် အရေအတွက်က စုစုပေါင်း လေးခု ရှိတယ်။ သူတို့က ရှန်ရှီး၊ ဟူပေး၊ ဟူနန်နဲ့ စီချွမ်တို့မှာ အခြေစိုက်ပြီး မြောက်ဘက်မှာ အပြာရောင်နဂါး တာအိုကျောင်းတော်၊ အရှေ့ဘက်မှာ ယွန်ငှက် တာအိုကျောင်းတော်၊ တောင်ဘက်မှာ အနက်ရောင်လိပ် တာအိုကျောင်းတော်နဲ့ အနောက်ဘက်မှာ အဖြူရောင်ကျား တာအိုကျောင်းတော်လို့ အမည်ပေးထားတယ်။ တာအိုကျောင်းတော် တစ်ခုစီမှာ အရာရှိ ၁၀၀ စီ ရှိပြီး ဒေသအသီးသီးက ဂိုဏ်းကိုးဂိုဏ်း၊ မိသားစုငါးခုနဲ့ ဂိုဏ်းငယ်လေးတွေရဲ့ မျိုးဆက်သစ် အရည်အချင်းရှိသူတွေ စုဝေးရောက်ရှိနေတယ်လို့ ပြောကြတယ်"

မူယု၏ အစီရင်ခံစာကို နားထောင်ရင်း လက်ဖက်ရည်ခွက်ကို စောင်းငဲ့နေသည့် ဂျူချွန်း၏ အကြည့်တို့သည် အောက်သို့ နိမ့်ကျသွားသည်။

"တာအိုကျောင်းတော်တွေကို တည်ထောင်ပြီး မျိုးဆက်သစ် အရည်အချင်းရှိသူတွေကို တစ်နေရာတည်းမှာ စုစည်းထားရတဲ့ အကြောင်းရင်းနဲ့ ပတ်သက်ပြီး ခံတပ်ချူပ်မှူးရဲ့ အမြင်က ဘယ်လိုရှိလဲ"

သူ့ကို စိုက်ကြည့်နေသည့် ဂျူချွန်း၏ အကြည့်အောက်တွင် မည်သည့်အခြေအနေမျိုးမှာမဆို မတုန်လှုပ်တတ်သည့် မူယု၏ မျက်ဝန်းတို့ အနည်းငယ် တုန်ယင်သွားသည်။

မဟာမိတ် ခေါင်းဆောင်က ငါ့ကို စမ်းသပ်နေတာပဲ။

ဂျူချွန်း ဦးဆောင်သည့် မိစ္ဆာလမ်းစဉ် မဟာမိတ်အဖွဲ့၏ ခံတပ်ချူပ်မှူး ဖြစ်လာရန် တစ်ခုတည်းသော အခြေအနေမှာ သက်သေပြခြင်းပင်။ သူသည် မဟာမိတ် ခေါင်းဆောင်အား မိစ္ဆာလမ်းစဉ် မဟာမိတ်အဖွဲ့ကို ဦးဆောင်ကာ ကြီးမားသော ရည်မှန်းချက်ကို အကောင်အထည်ဖော်နိုင်စွမ်း ရှိကြောင်း သက်သေပြရမည်ဖြစ်ပြီး ယခုအချိန်သည် သက်သေပြရမည့် အချိန်ဖြစ်သည်။

မတူညီနိုင်ပေမယ့် မှားယွင်းလို့တော့ မရဘူး။

မဟာမိတ် ခေါင်းဆောင်၏ အတွေးနှင့် ကွဲပြားသည့် အဖြေကို ပေးနိုင်သော်လည်း မှားယွင်းသည့် အဖြေကိုမူ ပေး၍ မရပေ။ မျက်စိတစ်မှိတ်အတွင်း အခြေအနေကို ဖမ်းဆုပ်လိုက်သည့် မူယုသည် မတွန့်ဆုတ်ဘဲ ဖြေလိုက်သည်။

"တာအိုကျောင်းတော်တွေကို စောစောကတည်းက တည်ထောင်ထားတာပါ။ သိုင်းလောက မဟာမိတ်အဖွဲ့က တာအိုကျောင်းတော်တွေကို တည်ထောင်ရတဲ့ အကြောင်းရင်းက အဆင့်မြင့်သိုင်းပညာရှင်မျိုးကို မွေးထုတ်ဖို့လို့ ကျွန်တော် ယုံကြည်ပါတယ်။ သူတို့က သိုင်းလောက မဟာမိတ်အဖွဲ့အတွက် ဓားကို ဝှေ့ယမ်းပြီး ခြေကို စောင့်နင်းမယ့် ထူးချွန်တဲ့ သိုင်းပညာရှင်တွေကို မွေးထုတ်ဖို့ ဖြစ်ပါလိမ့်မယ်"

"ဒါဆို မင်းပြောချင်တာက ဗဟိုလွင်ပြင် အလယ်ပိုင်းမှာ တည်ထောင်ထားတဲ့ တာအိုကျောင်းတော်တွေက အဖူးအညွန့်ချိုးခြင်းနဲ့ မပတ်သက်ဘူးပေါ့လေ"

"မပတ်သက်တာတော့ မဟုတ်ပါဘူး ဒါပေမဲ့ အဖူးအညွှန့်ချေမှုန်းပစ်ခြင်းသာ မဖြစ်ပွားခဲ့ရင်တောင် သိုင်းလောက မဟာမိတ်အဖွဲ့က သူတို့ မွေးထုတ်မယ့် အထက်တန်းစား မျိုးဆက်သစ် အရည်အချင်းရှိသူတွေရဲ့ စာရင်းကို သူတောင်းစားဂိုဏ်းရဲ့ အကူအညီနဲ့ ပြည့်စုံအောင် လုပ်ပြီးသား ဖြစ်ပါလိမ့်မယ်။ အဲဒီနောက် အဖူးအညွှန့်ချေမှုန်းပစ်ခြင်းဖြစ်ပွားလာပြီး အန္တရာယ်နီးကပ်လာတဲ့အခါမှာတော့ သူတို့ တန်ဖိုးထားတဲ့ မျိုးဆက်သစ်တွေကို အဖူးအညွှန့်ချေမှုန်းပစ်ခြင်းလက်ထဲ မရောက်ခင် အရေးတကြီး တာအိုကျောင်းတော်တွေဆီ ခေါ်ယူလိုက်တာလို့ ကျွန်တော် ယုံကြည်ပါတယ်"

"အင်း"

ဂျူချွန်းက ခေါင်းကို ပေါ့ပါးစွာ ငြိမ့်လိုက်ပြီး နှုတ်ခမ်းကို စိုစွတ်စေရန် လက်ဖက်ရည်ခွက်ကို မလိုက်သည်။

"ကြီးမားတဲ့ ရည်မှန်းချက်ရဲ့ ပထမဆုံး ခြေလှမ်းက အတော်လေး အောင်မြင်ခဲ့တယ်။ ခံတပ်ချူပ်မှူး မူ မင်း အလုပ်ကြိုးစားခဲ့ပါတယ်"

"ကျေးဇူးတင်ပါတယ်"

ငါ မှားမသွားဘူး။

မူယုက ရင်ဘတ်ကို ပွတ်သပ်ကာ သူ၏ သက်သေပြမှု အောင်မြင်ခဲ့သည့်အတွက် စိတ်သက်သာရာ ရသွားသည်။

"မူယု"

"အမိန့်သာ ပေးပါ မဟာမိတ် ခေါင်းဆောင်"

"အကယ်၍ ဧကရာဇ်က စပါးကျီတွေကို ပိတ်လှောင်တယ်။ ကုန်သည်တွေကြား ကုန်သွယ်မှုကို ရပ်တန့်တယ် ပြီးတော့ သံနဲ့ စပါးကို စိတ်ကြိုက် စုဆောင်းတယ်။ လူငယ်တွေကို စုဆောင်းပြီး စစ်သားတွေအဖြစ် လေ့ကျင့်ပေးမယ်ဆိုရင်... ဒါက ဘာကို ဆိုလိုတာလဲ"

အလွန် ရိုးရှင်းသော မေးခွန်းဖြစ်သည့်အတွက် မူယုသည် မတွေးခင်မှာပင် ဖြေလိုက်သည်။

"ဒါ စစ်ပွဲပါ"

"ဟုတ်တယ်။ မှန်တယ်။ ဒါဆိုရင် သိုင်းလောက မဟာမိတ်အဖွဲ့အနေနဲ့ တာအိုကျောင်းတော်တွေကို တည်ထောင်ပြီး သူတို့ကိုယ်ပိုင် အထက်တန်းစား သိုင်းပညာရှင်တွေကို မွေးထုတ်ရတဲ့ အကြောင်းရင်းက ဘာဖြစ်မလဲ"

ခေါင်းကို မော့လိုက်သည့် မူယု၏ အကြည့်နှင့် ဂျူချွန်း၏ အကြည့်တို့ ဆုံမိကြသည်။ ဂျူချွန်းက ပြုံးနေသည်။ နာကျင်ဖွယ် စိတ်ရှည်မှု တစ်စုံတစ်ခုကို အဆုံးသတ်လိုက်သည့်အတိုင်းပင်။

"ဒါ စစ်ပွဲပါ"

…..

သိုင်းလောက မဟာမိတ်အဖွဲ့၏ ခံတပ်ချူပ်မှူး ဒိုဂူကျောက်မြောင်း၏ စကားကြောင့် ထိပ်သီးကောင်စီ အစည်းအဝေးခန်းတွင် တိတ်ဆိတ်သွားသည်။ လူတိုင်း ရင်ထဲမှာသာ ထားပြီး ထုတ်မပြောဝံ့ခဲ့သည့် စကားလုံးသည် ဇူဂယ်ဂိုအွန်နှင့်အတူ မဟာမိတ်အဖွဲ့၏ အကြီးအငယ် ကိစ္စများကို တာဝန်ယူထားသည့် ဒိုဂူကျောက်မြောင်း၏ ပါးစပ်မှ ထွက်ပေါ်လာခြင်းပင်။

"သူတို့ အဖူးအညွှန့်ချေမှုန်းပစ်ခြင်းကို ကျူးလွန်ရတဲ့ အကြောင်းရင်းက လွဲပြီး တခြား ဘာရှိဦးမလဲ သူတို့က ဗဟိုလွင်ပြင် တစ်ခွင်မှာ ပြင်းထန်တဲ့ အကြံဉာဏ်တွေနဲ့ လူငယ်တွေကို စောစောကတည်းက စိုက်ပျိုးထားခဲ့တာ။ အဲဒီမျိုးစေ့တွေက နောက်ဆုံးတော့ အပင်ပေါက်လာပြီး မိစ္ဆာလမ်းစဉ်ရဲ့ အရည်အချင်းရှိတဲ့ မျိုးဆက်သစ် အရည်အချင်းရှိသူတွေကို မြိုချလိုက်တာပဲ"

ဒိုဂူကျောက်မြောင်း၏ အသံမှာ ပို၍ပင် စိတ်လှုပ်ရှားလာသည်။

"ဒီနေရာမှာ အဖူးအညွှန့်ချေမှုန်းပစ်ခြင်းကြောင့် မိစ္ဆာလမ်းစဉ်က ထိခိုက်မှု ရှိတယ်ဆိုတဲ့ သတင်းကို ကြားဖူးတဲ့သူ ရှိလား"

အစည်းအဝေးခန်းထဲတွင် တိတ်ဆိတ်မှုသာ လွှမ်းမိုးနေသည်။

"ဟုတ်တယ်။ မကြားဖူးကြဘူး မဟုတ်လား။ အဖူးအညွှန့်ချေမှုန်းပစ်ခြင်းရဲ့ ပစ်မှတ်က တာအိုသိုင်းလောကတင် ဖြစ်ပြီး သူတို့က တာအိုသိုင်းလောကရဲ့ နှစ်တစ်ရာ စီမံကိန်းကို ဖျက်ဆီးနေတာ။ မဟုတ်ဘူး သူတို့ ဖျက်ဆီးပြီးသား"

"ဒါဆို မျိုးဆက်သစ် အရည်အချင်းရှိသူတွေကို ဘေးကင်းအောင် ကာကွယ်ပေးဖို့နဲ့ ပညာပေးဖို့ တာအိုကျောင်းတော်တွေကို တည်ထောင်ခဲ့တာ မဟုတ်ဘူးလား"

ချုံဆောင်းဂိုဏ်းမှ အကြီးအကဲ တစ်ဦးဖြစ်သည့် ဂွမ်ဒိုဟူး၏ မေးခွန်းကြောင့် မဟာမိတ်အဖွဲ့၏ နောက်ထပ် ခံတပ်ချူပ်မှူး ဖြစ်သည့် ဇူဂယ်ဂိုအွန်က ယခုတစ်ကြိမ်တွင် ရှေ့သို့ ထွက်လာသည်။

"လေးခုမြောက် တာအိုကျောင်းတော်တွေက မပြီးသေးပါဘူး။ မူလ ရည်ရွယ်ချက်က အနည်းဆုံး လူငါးရာကနေ အများဆုံး တစ်ထောင်အထိ နေရာချထားပြီး သင်ကြားပေးဖို့ ဒီဇိုင်းထုတ်ထားတာပါ။ ဒါပေမဲ့ အဖူးအညွှန့်ချေမှုန်းပစ်ခြင်းရုတ်တရက် ဖြစ်ပွားလာတဲ့အတွက် အပြီးမသတ်ရသေးတဲ့ တာအိုကျောင်းတော်တွေဆီကို မျိုးဆက်သစ်တွေကို အတင်းအကျပ် ခေါ်ယူလိုက်ရတာပါ"

ဗဟိုလွင်ပြင် အလယ်ပိုင်းတွင် တည်ထောင်ထားသည့် တာအိုကျောင်းတော် လေးခုသည် မပြီးဆုံးသေးသော အခြေအနေတွင် ရှိနေသည်။ ဒီဇိုင်း၏ ခုနစ်ပုံ ၁၀ ပုံမှာ မဆောက်ရသေးသဖြင့် နေရာချထားနိုင်မည့် အရေအတွက်မှာ ဆယ်ပုံတစ်ပုံအထိ လျော့ကျသွားခဲ့သည်။

"ကျွန်တော်တို့ အထက်တန်းစား သိုင်းပညာရှင် ၃,၆၀၀ ခန့် ဆုံးရှုံးခဲ့ရတယ်။ အဲဒီ ကလေးတွေသာ ရှိရင် နောက်ပိုင်း ဖြစ်လာမယ့် မိစ္ဆာလမ်းစဉ် မဟာမိတ်အဖွဲ့နဲ့ စစ်ပွဲမှာ ကြီးမားတဲ့ အခန်းကဏ္ဍကနေ ပါဝင်လာမှာ"

စီမံကိန်းမှာ မျှော်လင့်ထားသည်ထက် များစွာ စောစီးစွာ ရွှေ့ပြောင်းခဲ့ရပြီး လူပေါင်း ၄,၀၀၀ ကို နေရာချထားနိုင်မည့် တာအိုကျောင်းတော်များမှာ ယခုအခါ လူ ၄၀၀ ကိုသာ နေရာချထားနိုင်တော့သည်။

"ဒါက အလွန် နာကျင်စရာကောင်းတဲ့ အရာပါ။ ဒါပေမဲ့ အခုက စိတ်ဓာတ်ကျနေရမယ့် အချိန်မဟုတ်ဘူး။ ကျွန်တော်တို့က အရာရှိ ၄၀၀ ကိုတောင် ကောင်းကောင်း မွေးထုတ်ပြီး စစ်ပွဲအတွက် ပြင်ဆင်ရမယ်"

ဟွာရှန်းဂိုဏ်းမှ အကြီးအကဲ မဲအူဂျောင်း၏ အဖြေကြောင့် အခြားသော အကြီးအကဲများလည်း ခေါင်းငြိမ့်ကာ သဘောတူကြောင်း ဖော်ပြကြသည်။ သို့သော် မဟာမိတ်အဖွဲ့၏ ခံတပ်ချူပ်မှူး နှစ်ဦး၏ အတွေးများမှာမူ ကွဲပြားနေသည်။

"ကျွန်တော်တို့ ထိပ်သီးကောင်စီကို ဖွင့်လှစ်ခဲ့ရတဲ့ အကြောင်းရင်းက ဒီမှာ စုဝေးနေတဲ့ အကြီးအကဲတွေကို ပြောပြစရာ ရှိလို့ပါ"

ဒိုဂူကျောက်မြောင်း၏ ပို၍ပင် လေးနက်သော အသံကြောင့် အကြီးအကဲများမှာ တံတွေးကို မြိုချကာ နောက်ထပ် ပြောမည့်စကားကို စောင့်ဆိုင်းနေကြသည်။ မကြာမီ ဒိုဂူကျောက်မြောင်းက ဆက်ပြောသည်။

"သိုင်းလောက မဟာမိတ်အဖွဲ့က တာအိုကျောင်းတော် လေးခုထဲက တစ်ခုကို ရွေးချယ်ပြီး... မိစ္ဆာလမ်းစဉ် မဟာမိတ်အဖွဲ့ကို ဆွဲဆောင်ဖို့အတွက် အသုံးပြုသွားမှာပါ"

"မိစ္ဆာလမ်းစဉ် မဟာမိတ်အဖွဲ့ကို ဆွဲဆောင်မယ် အဲဒါ ဘာကို ဆိုလိုတာလဲ"

နားမလည်ကြသည့် အကြီးအကဲများ၏ မေးခွန်းကြောင့် ဇူဂယ်ဂိုအွန်က အသက်ကို တစ်ချက်ရှူသွင်းပြီး ရှင်းပြသည်။

"မိစ္ဆာလမ်းစဉ် မဟာမိတ်အဖွဲ့က မိုက်မဲတဲ့သူတွေ မဟုတ်ဘူး။ သူတို့က တာအိုကျောင်းတော်ရဲ့ အရာရှိတွေဟာ အနာဂတ်မှာ သူတို့အတွက် ခြိမ်းခြောက်မှု ဖြစ်လာမယ်ဆိုတာကို သေချာပေါက် သိနေမှာပါ။ သူတို့က မျိုးဆက်သစ်တွေကို ထူးခြားတဲ့ နည်းလမ်းတွေနဲ့ လုပ်ကြံခဲ့သလိုပဲ ဒီတစ်ခါမှာလည်း နည်းလမ်းနဲ့ အကြောင်းပြချက်တွေကို မစဉ်းစားတော့ဘဲ တာအိုကျောင်းတော်က အရာရှိတွေကို ပစ်မှတ်ထားလာလိမ့်မယ်"

"ဒါဆို မင်းပြောချင်တာက တခြား တာအိုကျောင်းတော် သုံးခုကို ကာကွယ်ဖို့အတွက် မိစ္ဆာလမ်းစဉ် မဟာမိတ်အဖွဲ့ကို တခြား တာအိုကျောင်းတော် တစ်ခုဆီ ဆွဲဆောင်ရမယ်ပေါ့ မိစ္ဆာလမ်းစဉ် မဟာမိတ်အဖွဲ့ရဲ့ အာရုံကို ပြောင်းလဲပေးခြင်းအားဖြင့်ပေါ့"

"ဟုတ်ပါတယ်"

"ဒါက အဓိပ္ပာယ်မရှိဘူး..."

ဒေါသတကြီး ထရပ်လိုက်သူမှာ ဟဲပေပင် မိသားစုမှ အကြီးအကဲ ပန်အိုဂီ ဖြစ်သည်။ သူသည် တိုက်ရိုက်မျိုးဆက် မဟုတ်ဘဲ အကိုင်းအလက် မျိုးဆက်မှ ဖြစ်သော်လည်း လက်ရှိ ဟဲပေပင် မိသားစု၏ အကြီးအကဲ ပန်အိုဆောင်း၏ ညီဖြစ်သည်။

သူ၏ တူဖြစ်သူ ပန်ဆိုဖုန်းသည် အပြာရောင်နဂါး တာအိုကျောင်းတော်သို့ ဝင်ရောက်ခဲ့ကြောင်း စောစောကတည်းက သိထားသူ ဖြစ်သဖြင့် တာအိုကျောင်းတော်၏ လူငယ်မျိုးဆက်သစ် အရည်အချင်းရှိသူများကို မြှားဦးအဖြစ် အသုံးပြုရန် ခံတပ်ချူပ်မှူး၏ ငြင်းခုံချက်ကို လက်မခံနိုင်ပေ။ မိသားစုငါးခုမှ အခြား အကြီးအကဲများမှာလည်း အတူတူပင်။

"ကျွန်တော် လက်မခံနိုင်ဘူး"

"ဒါက သူတို့ကို သေခိုင်းနေတာပဲ"

"သိုင်းလောက မဟာမိတ်အဖွဲ့က အဲဒီ လူငယ် သိုင်းပညာရှင်တွေကို စတေးခံတွေအဖြစ် အသုံးပြုဖို့ ကြိုးစားနေတာလား"

အကြီးအကဲများ၏ ကန့်ကွက်မှုများ ပြင်းထန်လာသည်နှင့်အမျှ ခံတပ်ချူပ်မှူး နှစ်ဦး၏ အကြည့်တို့သည် တစ်ဖက်သို့ အလိုအလျောက် ရွေ့သွားသည်။ သူတို့၏ အကြည့်တို့ ရောက်ရှိသွားသည့် နေရာမှာ ထိပ်သီးကောင်စီ အစည်းအဝေးခန်း၏ အမြင့်ဆုံး နေရာဖြစ်သည့် မဟာမိတ် ခေါင်းဆောင်၏ ထိုင်ခုံပင်။

"စိတ်အေးအေးထားပါ"

မဟာမိတ် ခေါင်းဆောင် ဂွမ်ဒိုယော့၏ အသံမှာ နူးညံ့သိမ်မွေ့သော်လည်း ထိုအသံထဲတွင် ပါဝင်နေသော စွမ်းအားမှာ မည်သို့မျှ နူးညံ့ခြင်း မရှိပေ။ ချီစွမ်းအင်ဖြင့် ပြည့်နှက်နေသည့် ထိုအသံကြောင့် အကြီးအကဲများမှာ လေထုမှာ လေးလံလာသည်ကို ရိပ်မိလိုက်သည်။

၎င်းမှာ မဟာမိတ် ခေါင်းဆောင်က သူတို့ကို ခြိမ်းခြောက်ရန် ချီစွမ်းအင်ကို ထုတ်လွှတ်လိုက်၍ ဖြစ်ပေါ်လာသော ဖိအားမဟုတ်ဘဲ မဟာမိတ် ခေါင်းဆောင်၏ တည်ရှိမှုကိုယ်တိုင်က ဖန်တီးလိုက်သော ဖိအားဖြစ်သည်။

"ကျွန်တော်တို့ မင်းဂိုဏ်းနဲ့ တိုက်ပွဲမှာ အနိုင်ရပြီး ဗဟိုလွင်ပြင် သိုင်းလောကကို ကာကွယ်နိုင်ခဲ့တာဟာ ကျွန်တော်တို့က တာအိုလမ်းစဉ်ဖြစ်လို့ မဟုတ်ဘူး။ ဓားမှာ မျက်စိမရှိသလိုပဲ၊ လူသားတွေကြား စစ်ပွဲမှာလည်း အကောင်းအဆိုးဆိုတာ မရှိဘူး"

ဂွမ်ဒိုယော့က ထိုသို့ပြောပြီးနောက် စားပွဲကို တစ်ဖက်ဖြင့် ပွတ်သပ်လိုက်သည်။

"တာအိုသိုင်းလောက အနိုင်ရခဲ့တဲ့ အကြောင်းရင်းက ကျွန်တော်တို့ နည်းနည်း ပိုသန်မာနေလို့ပဲ"

"ဒါပေမဲ့..."

"ကျွန်တော်တို့ သိသလို မိစ္ဆာလမ်းစဉ် မဟာမိတ်အဖွဲ့လည်း သိတယ်။ အဲဒါကြောင့်ပဲ မိစ္ဆာလမ်းစဉ်က နှစ်တစ်ရာ စီမံကိန်းကို ရေးဆွဲခဲ့တာဖြစ်ပြီး တာအိုလမ်းစဉ်က အဲဒါကို ဖျက်ဆီးဖို့ ဆယ်နှစ်တာ ကြံစည်မှုတွေကို ပြုလုပ်ခဲ့တာ။ အဲဒီ စီမံကိန်းနှစ်ခုရဲ့ အနိုင်ရသူကတော့... မိစ္ဆာလမ်းစဉ် မဟာမိတ်အဖွဲ့ပဲ"

ဂွမ်ဒိုယော့၏ စကားကြောင့် လူတိုင်း တိတ်ဆိတ်သွားကြသည်။

"စစ်ပွဲရဲ့ အဓိကဝင်ရိုးက သိုင်းလောကရဲ့ ထူးချွန်တဲ့ ဆရာသခင်တွေနဲ့ ကျွန်တော်တို့လို အိုမင်းနေတဲ့ ဆရာသခင်တွေရဲ့ ဝေစုဖြစ်ပေမယ့်၊ နောက်ပိုင်းမှာ ဖြစ်လာမယ့်အရာတွေအတွက် တာဝန်ယူရမယ့်သူတွေကတော့ သိုင်းလောကရဲ့ လူငယ် မျိုးဆက်သစ် အရည်အချင်းရှိသူတွေပဲ။ အနာဂတ်ကို မကာကွယ်ဘဲ လက်ရှိ အောင်ပွဲက ဘာအသုံးဝင်မှာလဲ"

"ဒါပေမဲ့ အပြစ်မဲ့တဲ့ မျိုးဆက်သစ်တွေကို ပူဇော်ဖို့ဆိုတာကတော့..."

"သေချာပါတယ်၊ ဒါက အန္တရာယ်များပါလိမ့်မယ်။ ဒါပေမဲ့ တာအိုကျောင်းတော်က မျိုးဆက်သစ်တွေက တစ်ဖက်သတ် အသတ်ခံရမှာ မဟုတ်ဘူး။ တာအိုကျောင်းတော် တစ်ခုစီက အမြင့်ဆုံးအဆင့် ပညာရေးနဲ့ လေ့ကျင့်မှုတွေကို ပြုလုပ်သွားမှာဖြစ်ပြီး မဟာမိတ်အဖွဲ့ရဲ့ ဆရာသခင်တွေကိုလည်း တာအိုကျောင်းတော်က ရွေးချယ်ထားတဲ့ အရာရှိတွေကို ကာကွယ်ဖို့အတွက် နေရာချထားပေးမှာပါ"

ဂွမ်ဒိုယော့၏ ဆက်လက်ရှင်းပြချက်ကြောင့် အနည်းငယ် သဘောပေါက်ပြီး စိတ်သက်သာရာ ရသွားကြသည့် အကြီးအကဲများမှာ ထိုင်ခုံများတွင် ပြန်ထိုင်လိုက်ကြသည်။

"ဒါဆိုရင် တာအိုကျောင်းတော်တွေထဲက မိစ္ဆာလမ်းစဉ် မဟာမိတ်အဖွဲ့အတွက် မြှားဦးဖြစ်လာမယ့် ကျောင်းတော်ကို ဘယ်လို ရွေးချယ်ဖို့ စီစဉ်ထားပါသလဲ"

စိတ်လှုပ်ရှားမှု အနည်းငယ် ငြိမ်ကျသွားသည့် ပန်အိုဂီက တာအိုကျောင်းတော် ရွေးချယ်မှုအကြောင်း မေးမြန်းလိုက်သောအခါ ဒိုဂူကျောက်မြောင်းက မဟာမိတ် ခေါင်းဆောင်ကိုယ်စား ရှင်းပြသည်။

"တစ်နှစ်အတွင်းမှာ တာအိုကျောင်းတော် တစ်ခုစီက ကိုယ်စားလှယ်တွေကို ရွေးချယ်ပြီး သိုင်းပြိုင်ပွဲ ကျင်းပဖို့ စီစဉ်ထားပါတယ်။ အဲဒီပြိုင်ပွဲမှာ အနိုင်ရတဲ့ တာအိုကျောင်းတော်က မိစ္ဆာလမ်းစဉ် မဟာမိတ်အဖွဲ့ကို ဆွဲဆောင်မယ့် အထူးရွေးချယ်ထားတဲ့ အဖွဲ့ ဖြစ်လာပါလိမ့်မယ်"

ထိပ်သီးကောင်စီ အစည်းအဝေး ပြီးဆုံးပြီးနောက် ဇူဂယ်ဂိုအွန်က အစည်းအဝေး အကြောင်းအရာများကို အပြီးသတ် ပြင်ဆင်နေချိန်တွင် ဒိုဂူကျောက်မြောင်းမှာ မဟာမိတ် ခေါင်းဆောင်ရုံးခန်းတွင် ဂွမ်ဒိုယော့နှင့် သီးသန့် တွေ့ဆုံသည်။ သူက တာအိုကျောင်းတော် တစ်ခုစီသို့ ဝင်ရောက်လာသည့် သိုင်းပညာရှင်များ၏ စာရင်းကို စစ်ဆေးကြည့်ရှုပြီး နားမလည်နိုင်သည့်အလား ပြောသည်။

"တခြားနေရာတွေကတော့ မပြောတတ်ဘူး။ ဒါပေမဲ့ အဖြူရောင် လနန်းတော်ရဲ့ နတ်ဘုရားက သူ့ရဲ့ တန်ဖိုးထားရတဲ့ ကလေးနှစ်ယောက်ကို အပြာရောင်နဂါး တာအိုကျောင်းတော်ထဲ ရောက်အောင် ဘာလို့ အသာတကြည် ခွင့်ပြုပေးခဲ့လဲဆိုတဲ့ အကြောင်းရင်းကို ကျွန်တော် နားမလည်ဘူး"

အဖြူရောင် လနန်းတော်၏ နတ်ဘုရား ချွန်းယူဆင်။ သူသည် မင်းဂိုဏ်း၏ ငယ်ရွယ်သော ဂိုဏ်းခွဲခေါင်းဆောင် ဒန်ယေဂန်းကို တစ်ဦးတည်းနှင့် သတ်ဖြတ်ခြင်းဖြင့် သူ၏ စွမ်းအားကို သက်သေပြခဲ့သူ ဖြစ်ပြီး ထိုအချိန်မှစ၍ ကောင်းကင်အောက် နံပါတ်တစ်ဟု ခေါ်ဆိုနိုင်သော အာဏာကို ရရှိခဲ့ကာ ဗဟိုလွင်ပြင်တွင် အသန်မာဆုံး သိုင်းပညာရှင် ဖြစ်ကြောင်း လူတိုင်းရှေ့တွင် သက်သေပြခဲ့သူ ဖြစ်သည်။ ထို့နောက်တွင် သူက အဖြူရောင် လနန်းတော်ကို တည်ထောင်ခဲ့ပြီး သိုင်းလောက မဟာမိတ်အဖွဲ့သာမက မိစ္ဆာသိုင်းလောကနှင့်ပါ နံရံတစ်ခု ခြားထားကာ ကောင်းကင်အောက် တစ်ဦးတည်းအဖြစ် ရပ်တည်ခဲ့သည်။

ထို့နောက် အဖူးအညွှန့်ချေမှုန်းပစ်ခြင်းစတင်ပြီး မကြာမီအချိန်တွင် အဖြူရောင် လနန်းတော်မှ စာတစ်စောင် ရောက်ရှိလာသည်။ အကြောင်းအရာမှာ မကြာမီ တည်ထောင်တော့မည့် အပြာရောင်နဂါး တာအိုကျောင်းတော်သို့ ချွန်းဂါဆောင်းနှင့် ချွန်းယဲရန်းတို့ကို ဝင်ရောက်ခွင့်ပေးရန် အမိန့်နှင့် နီးစပ်သည့် အကြောင်းအရာ ဖြစ်သည်။

"အဖြူရောင် လနန်းတော် နတ်ဘုရားရဲ့ စိတ်ရင်းအမှန်ကို ကျွန်တော်တို့ ဘယ်လိုလုပ် သိနိုင်ပါ့မလဲ လက်ရှိအချိန်မှာတော့ အဖြူရောင် လနန်းတော်က တာအိုသိုင်းလောကနဲ့ ဆက်သွယ်မှုကို မဖြတ်တောက်သေးတာကိုပဲ ဝမ်းသာရမှာပါ။ ဒါထက် ကျွန်တော်တို့ သတိထားရမယ့် မျိုးဆက်သစ်တွေ အားလုံးက ဒါတွေပဲလား"

"နည်းနည်း ထူးဆန်းတဲ့ ကောင်လေး တစ်ယောက် ရှိတယ်"

"ထူးဆန်းတဲ့ ကောင်လေး"

"ဟုတ်ပါတယ်။ သူက ဂျင်ဆိုဟွန်းလို့ အမည်ရပြီး ဂျင်မိသားစုလို့ ခေါ်တဲ့ ကုန်သည်မိသားစုက လူငယ် သိုင်းပညာရှင် တစ်ယောက်ပါ"

"သူ ဘာကြောင့် ထူးဆန်းရတာလဲ"

"ကောလာဟလတွေအရ သူက ငယ်ငယ်ကတည်းက အပျင်းထူလွန်းတဲ့သခင်လေးလို့ ခေါ်ဆိုခြင်း ခံရတဲ့အထိ အရမ်းပျင်းရိတဲ့သူလို့ သိရပါတယ်။ ဒါပေမဲ့ သူ့ရဲ့ ဆရာက ပျံသန်းဓားသူရဲကောင်း ကန်းချွန်းပါ။ သူနဲ့ ခြောက်နှစ်ကြာ သိုင်းပညာ သင်ယူခဲ့ပြီး မကြာသေးခင်က အန်းဟွီမှာ ဖြစ်ပွားခဲ့တဲ့ အဖူးအညွှန့်ချေမှုန်းပစ်ခြင်းဆွဲဆောင်မှု စစ်ဆင်ရေးမှာ ကြီးမားတဲ့ အခန်းကဏ္ဍကနေ ပါဝင်ခဲ့ပုံပဲ"

ဒိုဂူကျောက်မြောင်းက သူ၏ ပုံမှန်အမူအရာနှင့် မတူဘဲ မသေချာမရေရာစွာ ပြောဆိုသောအခါ ဂွမ်ဒိုယော့၏ စိတ်ဝင်စားမှုမှာ ပိုမိုမြင့်တက်လာသည်။

"သူ ပါဝင်ခဲ့ပုံပဲလို့ ပြောတာလား"

"ဂျင်ဆိုဟွန်းနဲ့အတူ အပြာရောင်နဂါး တာအိုကျောင်းတော်ကို လိုက်လာတဲ့ အစေခံမိန်းကလေးမှာ နမ်ဂွန်းမိသားစုရဲ့ ကျေးဇူးရှင် အမှတ်တံဆိပ်ဖြစ်တဲ့ ငွေရောင်နဂါး အမှတ်တံဆိပ် ရှိတယ်လို့ ဆိုပါတယ်။ အဲဒါက အစေခံမိန်းကလေးရဲ့ အမှတ်တံဆိပ် မဟုတ်လောက်ဘူးဆိုတော့ အဲဒီ ကျေးဇူးရှင် အမှတ်တံဆိပ်ရဲ့ မူလပိုင်ရှင်က ဂျင်ဆိုဟွန်း ဖြစ်နေလိမ့်မယ်။ ဆိုလိုတာက သူက နမ်ဂွန်းမိသားစုရဲ့ ကျေးဇူးရှင်လို့ ခေါ်ဆိုနိုင်လောက်တဲ့ အောင်မြင်မှု တစ်ခုခုကို ရရှိထားတာ ဖြစ်တယ်။ အသေးစိတ်ကိုတော့ မသိရသေးပါဘူး"

သူ၏ ကလေးများ ဝင်ရောက်ခဲ့သည့် ယွန်ငှက် တာအိုကျောင်းတော်ထက် အပြာရောင်နဂါး တာအိုကျောင်းတော်ကို နမ်ဂွန်းမူဟျော့က အရင်ဆုံး လာရောက်လည်ပတ်ခဲ့ကြောင်း သူ သိထားနှင့်ပြီး ဖြစ်သည်။ ဂွမ်ဒိုယော့သည် ဂျင်ဆိုဟွန်း၏ နာမည် စာလုံး သုံးလုံးကို ကြည့်ကာ အနည်းငယ် ပြုံးလိုက်သည်။

"ရှန်ရှီးရဲ့ နံပါတ်တစ် ပျင်းရိသူ... ပျံသန်းဓားသူရဲကောင်းရဲ့ တပည့် ပြီးတော့ နမ်ဂွန်းမိသားစုရဲ့ ကျေးဇူးရှင်... ထူးဆန်းတဲ့ ကောင်လေးပဲ"

…..

ညစာစားပြီးသွားသည့် ဂျင်ဆိုဟွန်းမှာ သူ၏ မိသားစု အိမ်တော်သို့ အမြန်ဆုံး ပြန်သွားချင်စိတ် ပေါက်နေသည်။ ဤနေရာရှိ နေ့စဉ်ဘဝမှာ ပျင်းရိသောသူ ဖြစ်သည့် သူအတွက် ခံနိုင်ရည်ရှိရန် အလွန်ပင် ပင်ပန်းလှသည်။

"မင်း အစားအစာကို မျိုချနိုင်သေးတာလား"

ညစာစားပြီးနောက် တည်းခိုခန်းသို့ ပြန်လာသော ဂျင်ဆိုဟွန်း၏ နောက်တွင် ဂျုံရိုအာက လမ်းလျှောက်လိုက်လာသည်။

"ဒါဆို မင်းက နှာခေါင်းကနေ မျိုချနေတာလား"

ဂျင်ဆိုဟွန်း၏ စကားကြောင့် ဂျုံရိုအာ၏ မျက်နှာမှာ ရှုံ့မဲ့သွားသည်။

ဒီကောင်က ဘာလို့ ဘာမှ မဖြစ်ရတာလဲ။

အပြာရောင်နဂါး တာအိုကျောင်းတော်မှ အရာရှိ အများစုမှာ ညစာကို ကောင်းကောင်း မစားနိုင်ကြပေ။ အကြောင်းရင်းမှာ နေ့လယ်စာအချိန်က တန်းဟိုချောလ်၏ စမ်းသပ်မှုကြောင့်ပင်။ ဂုဏ်သိက္ခာကို အသက်ထက် အရေးကြီးသည်ဟု သတ်မှတ်ထားသော ဂိုဏ်းကြီးများနှင့် မိသားစုများမှ သိုင်းပညာရှင်များမှာ သိက္ခာကို မေ့လျော့ကာ အိမ်သာဆီ ပြေးသွားကြပြီး မြန်မြန်ပြီးဆုံးဖို့ အသနားခံခဲ့ကြရသောကြောင့် အဆိပ်နှင့် ပတ်သက်သည့် ကြောက်ရွံ့မှုမှာ သူတို့၏ ရင်ထဲတွင် နက်ရှိုင်းစွာ စွဲထင်သွားခဲ့သည်။

ထိုအကြောင်းကြောင့် သူတို့မှာ ညစာကို ကောင်းကောင်း မစားနိုင်ကြဘဲ အများစုမှာ ညစာအတွက် အငတ်ခံကြရသည်။ သို့သော် ဂျင်ဆိုဟွန်းမှာမူ ကွဲပြားသည်။ သူက သူ၏ ညစာကို သပ်သပ်ရပ်ရပ် စားသောက်ပြီးနောက် နောက်ဆက်တွဲ ကျွေးသည့် အဆာပြေ မုန့်များကိုပါ ကုန်စင်အောင် စားသောက်ခဲ့သည်။

"သေသင့်တဲ့ ကောင်လေး"

သူ့မျက်နှာကို ကြည့်ရုံနှင့်ပင် စိတ်အနှောင့်အယှက်များမှာ တဟုန်ထိုး မြင့်တက်လာသည်။ သို့သော် သူတို့မှာ အခန်းတူတူ နေကြရသည်ဖြစ်၍ သူ အိပ်နေချိန်မှာပင် ဂျင်ဆိုဟွန်းကို မျက်နှာချင်းဆိုင်နေရသဖြင့် ဂျုံရိုအာမှာ အလွန်ပင် ခက်ခဲနေသည်။ သူက အခန်းပြောင်းရန် အကြိမ်ကြိမ် ကြိုးစားခဲ့သော်လည်း ကျောင်းတော် ခေါင်းဆောင် ဂွမ်မြောင်းက တစ်ခါမျှ ခွင့်မပြုခဲ့ပေ။

သူ အိပ်ပျော်နေတုန်း ငါ နင်းချေပစ်လိုက်ရမလား။

ကုတင်ပေါ် လှဲလိုက်သည်နှင့် အိပ်ပျော်သွားသည့် ဂျင်ဆိုဟွန်းကို မုန်းတီးသော မျက်လုံးများဖြင့် ကြည့်ရှုပြီးနောက် ဂျုံရိုအာက ကိုယ်ခန္ဓာကို လှည့်လိုက်သည်။ ဂျုံနမ်ဂိုဏ်း၏ သိုင်းပညာရှင် တစ်ယောက်အနေဖြင့် သူ၏ သိက္ခာက အိပ်ပျော်နေစဉ် ရုတ်တရက် တိုက်ခိုက်ခြင်းကို ခွင့်မပြုပေ။

တစ်နေ့ကျရင် မင်းရဲ့ မာနကြီးတဲ့ နှာခေါင်းကို ငါ အကောင်းဆုံး နင်းချေပစ်မယ်။

ဂျင်ဆိုဟွန်းအပေါ် မုန်းတီးစိတ်များ တောက်လောင်နေသည့် ဂျုံရိုအာမှာ ကုတင်ပေါ် လှဲလျက် ပင်ပန်းသောနေ့ကို ဖြတ်သန်းခဲ့ရသဖြင့် ချက်ချင်း အိပ်ပျော်သွားသည်။

ထိုညနှောင်းပိုင်း လူတိုင်း အိပ်ပျော်နေချိန်တွင် အနက်ရောင် မျက်နှာဖုံးများ ဝတ်ဆင်ထားသည့် အနက်ရောင်ဝတ် လူသားတို့မှာ အရာရှိများ အိပ်ပျော်နေသော အဆောင်၏ အမိုးပေါ်သို့ ပေါ်လာသည်။ သူတို့မှာ ရင်ဘတ်ထဲမှ လက်ဖဝါးအရွယ် အလျားလိုက် အရာဝတ္ထုများကို ထုတ်ယူကာ လက်ထဲတွင် ကိုင်ထားပြီး တစ်ဦးကိုတစ်ဦး စိုက်ကြည့်နေသည်။

"ပစ်မှတ်က လည်ပင်းနဲ့ မျက်ခုံးကြားပဲ။ အမှားမခံဘူး"

"ဟုတ်ကဲ့"

လမင်းကို တိမ်များ ဖုံးလွှမ်းထားသည့် မှောင်မိုက်သော ကောင်းကင်အောက်တွင် ပြင်ဆင်မှုများ ပြီးဆုံးသွားသည့် အနက်ရောင်ဝတ် လူသားတို့သည် အဆောင်အတွင်းသို့ လျှို့ဝှက်စွာ ဝင်ရောက်လာကြသည်။