အခန်း ၁၄၇
Vol. 14 Ch. 147
Chapter 147
~
အခန်း ၁၄၇ : ငါးဖမ်းအဆင့် တက်သွားခြင်း
~
" ငါတို့ ဝယ်ယူရေးဌာနရဲ့ လုပ်ငန်းစဥ်ကတော့ ယေဘုယျအားဖြင့် အရင်ဆုံး မှတ်ပုံတင်ရတယ်.. ပြီးရင် ဘဏ္ဍာရေးဌာနကနေ ငွေထုတ်ပြီးမှ ပစ္စည်းတွေ ဝယ်ဖို့ ထွက်ရတာ.. "
" ပစ္စည်းတွေ ဝယ်ပြီးသွားရင်တော့ အလေးချိန်စစ်ဆေးဖို့ စားသောက်ဆောင်ကို ယူသွားရတယ်.. အဲ့ဒီနောက် စာရင်းတွေ ကိုက်ညီအောင် ပြေစာကို ဘဏ္ဍာရေးဌာနဆီ ပြန်ပို့ပေးရတယ်.. "
" မင်းက အထက်တန်းကျောင်းက ဘွဲ့ရထားတာဆိုတော့ ဒါတွေက မင်းအတွက် သိပ်ခက်မှာ မဟုတ်ဘူး.. "
ဌာနမှူး ရုံးခန်းမှ ထွက်ခွာလာပြီးနောက် လီရှန်းလီက ဝယ်ယူရေး လုပ်ငန်းစဥ်များကို ယန်ကျီဝမ်အား ရှင်းပြနေလေ၏ ။
ယန်ကျီဝမ်က နားထောင်ရင်း အထပ်ထပ်အခါခါ ခေါင်းညိတ်လိုက်သည် ။
ထို့နောက် လီရှန်းလီက...
" မနေ့က မင်းကို စားသောက်ဆောင်နဲ့ ဘဏ္ဍာရေးဌာနဆီ ခေါ်သွားပြီးပြီဆိုတော့ လမ်းကို မှတ်မိတယ် မလား.. "
ယန်ကျီဝမ်က ထပ်၍ ခေါင်းညိတ်လိုက်ပြီး...
" အစ်ကိုလီ.. ကျွန်တော်တို့ ဝယ်ယူရေးဌာနက ဘယ်လိုပစ္စည်းမျိုးတွေကို ဝယ်လေ့ရှိတာလဲ.. "
" ငါတို့က အရာအားလုံးနီးပါးကို လက်ခံပါတယ်.. အများစုကတော့ အသားတွေပေါ့ ..တောင်ပေါ်ထွက်ကုန် တချို့ကိုလည်း လက်ခံတယ်.. "
" စျေးနှုန်းတွေနဲ့ ပတ်သက်ပြီးတော့ ဘဏ္ဍာရေးဌာနကနေ စျေးနှုန်းစာရင်းကို နောက်မှ သွားယူလို့ရတယ်.. "
လီရှန်းလီက နောက်ပြောင်သည့်ဟန်ဖြင့်...
" စာရင်းထဲက စျေးနှုန်းအတိုင်းပဲ ဝယ်ရမယ်နော်.. မဟုတ်လို့ ပိုပေးလိုက်ရရင် ကွာဟသွားတဲ့ ငွေကို ကိုယ့်ဘာသာ စိုက်လျော်ရလိမ့်မယ်.. "
" တကယ်လို့ စျေးပိုနည်းသွားရင်ရော ဘယ်လိုလုပ်ရမလဲ.. "
" ဟီးဟီး.. "
လီရှန်းလီက တိုးတိုးလေး ရယ်လိုက်ပြီးနောက် အသံနှိမ့်ကာ...
" အဲ့ဒါကတော့ မင်းရဲ့ အိတ်ကပ်ထဲကို အလိုလို ရောက်သွားမှာပေါ့ကွ.. "
" စျေးနည်းနည်းနဲ့ ဝယ်နိုင်တာက မင်းရဲ့ အရည်အချင်းပဲလေ.. "
" ဒါက ငါတို့ ဝယ်ယူရေးဌာနရဲ့ တရားဝင်ထုတ်ပြန်မထားတဲ့ အကျိုးခံစားခွင့် တစ်ခုပဲ.. ဒါပေမဲ့ ဒါကို လူသိရှင်ကြား လျှောက်မပြောသင့်ဘူး.. "
ယန်ကျီဝမ်က ခေါင်းညိတ်လိုက်ပြီး...
" နားလည်ပါပြီ.. ဒီအကြောင်းကို မပြောတာ အကောင်းဆုံးပဲ.. "
ဤသည်က ရွှီတာမော့၏ ရုပ်ရှင်ပြသသည့် အလုပ်တွင် ရှိသော မပြောထားသည့် စည်းမျဥ်းတစ်ခုနှင့် အတော်လေး ဆင်တူသည် ။
သူ ရုပ်ရှင်ပြရန် ကျေးလက်ဒေသများသို့ သွားသည့်အခါ ရုပ်ရှင်မစမီမှာပင် ရွာသားများက သူ့အား ကောင်းမွန်သော အစားအသောက်များဖြင့် ဧည့်ခံကြလေ့ရှိ၏ ။
သူ ထွက်ခွာလာသည့် အခါတွင်လည်း သူတို့က အိမ်သို့ ပြန်သယ်သွားရန် ဒေသထွက် အထူးဟင်းလျာများကို အများအပြား ပေးလေ့ရှိကြသည် ။
သူ၏ လစာမှာ မများသော်လည်း ရုပ်ရှင်ပြသသူ အလုပ်ကတော့ အတော်လေး အကျိုးအမြတ်များသော ရာထူးတစ်ခု ဖြစ်ပေသည် ။
ကုန်တင်ကားကြီးများကို မောင်းနှင်ရသော ယာဥ်မောင်းများတွင်လည်း အကျိုးအမြတ်များ ရှိကြ၏ ။ သူတို့သည် ခရီးသည်များကို တင်ဆောင်နိုင်သလို ကုန်ပစ္စည်းများ သယ်ဆောင်ရာတွင်လည်း ကူညီပေးနိုင်ပြီး ထိုမှတစ်ဆင့် အကျိုးအမြတ်များ ရရှိကြသည် ။
" ကျွန်တော်တို့ဆီမှာ ကောက်ပဲသီးနှံတွေကိုရော လက်ခံလား.. "
ယန်ကျီဝမ်က ထပ်မေးလိုက်သည် ။
" ကောက်ပဲသီးနှံ.. "
ထိုစကားကို ကြားသောအခါ လီရှန်းလီက သူ့အား ထူးဆန်းသော အမူအရာဖြင့် ကြည့်လိုက်၏ ။
" ဘာဖြစ်လို့လဲ.. "
ယန်ကျီဝမ် ဇဝေဇဝါ ဖြစ်သွားသည် ။
လီရှန်းလီက ရယ်လိုက်ပြီး...
" ဟားဟားဟား ..မင်း ပြောတဲ့စကားကိုက ရယ်စရာကောင်းနေတာ.. "
" ဒီနေ့ခေတ်မှာ နေရာတိုင်းက ခက်ခဲကျပ်တည်းနေတာ.. ကောက်ပဲသီးနှံတွေကို ဘယ်ကများ သွားရနိုင်မှာလဲ.. "
ထိုအခါမှ ယန်ကျီဝမ်လည်း ရုတ်တရက် နားလည်သဘောပေါက်သွားတော့သည် ။
မှန်ပေသည် ။
နေရာတိုင်းတွင် ကောက်ပဲသီးနှံများ ရှားပါးနေပြီဖြစ်ရာ သူ ဘယ်သွား၍ ရှာဖွေရမည်နည်း ။
ကျေးလက်ဒေသကို သွားရမည်လော ။
ကျေးလက်ဒေသ တချို့နေရာများတွင် လူများမှာ သစ်ခေါက်များကိုပင် ခွာ၍ စားသောက်နေကြရသည်ဟု သူ ကြားဖူးထား၏ ။
မှောင်ခိုစျေးကွက်ကို သွားရမည်လော ။
ထိုနေရာရှိ စျေးနှုန်းများက မယုံနိုင်လောက်အောင် မြင့်မားနေသည်ဖြစ်ရာ သူ့အိတ်ကပ်ထဲမှပင် စိုက်ထုတ်၍ ပေးချေရလိမ့်မည် ။
စျေးဝယ်စင်တာ တစ်ခုကို ပိုင်ဆိုင်ထားသည့် ယန်ကျီဝမ်လောက် လူတိုင်း ကံကောင်းကြသည် မဟုတ်ပေ ။
သူက ထိုနေရာမှ ကောက်ပဲသီးနှံများကို လဲလှယ်ယူနိုင်သည် ။
သို့သော် ရက်အနည်းငယ်အတွင်း ကောက်ပဲသီးနှံများကို ရုတ်တရက် ထုတ်ယူလာခဲ့လျှင် ပမာဏ များပြားနေပါက ပြဿနာကြီးကြီးမားမား ဖြစ်စေနိုင်ပြီး စုံစမ်းစစ်ဆေးခြင်းကို ခံရလိမ့်မည် ။
ထို့ကြောင့်ပင် လီရှန်းလီက ရယ်နေခြင်းပင် ။
သူ နားလည်သွားသည်ကို မြင်လျှင် လီရှန်းလီက သူ့ပုခုံးကို ပုတ်လိုက်ပြီး...
" ညီလေး.. "
" ကောက်ပဲသီးနှံ ကိစ္စက ငါတို့လို ဝယ်ယူရေး ဝန်ထမ်းလေးတွေ ပူပန်ရမယ့် ကိစ္စ မဟုတ်ဘူး.. "
" အထက်က ခေါင်းဆောင်တွေက စပါးကျီတွေနဲ့ သူတို့ဘာသာ ညှိနှိုင်းကြလိမ့်မယ်.. "
" ငါတို့က တစ်လစာ သတ်မှတ်ထားတဲ့ ခွဲတမ်း ပြည့်မီအောင် လုပ်ဖို့ပဲ လိုတာ.. "
" ခွဲတမ်းတွေနဲ့ ပတ်သက်ပြီးတော့ နောက်မှ စျေးနှုန်းစာရင်း သွားယူဖို့ ဘဏ္ဍာရေးဌာနကို ရောက်တဲ့အခါ တစ်ယောက်ယောက်က ရှင်းပြလိမ့်မယ်.. "
" ကျွန်တော် စက်ရုံကို နေ့တိုင်း လာဖို့ လိုအပ်သလား.. "
ယန်ကျီဝမ်က မေးလိုက်သည် ။ ဤသည်က သူ အဂရုစိုက်ဆုံး ကိစ္စ ဖြစ်၏ ။
သူ မည်သည့်အတွက်ကြောင့် ဝယ်ယူရေးဌာနကို ဝင်ရောက်ရန် ရွေးချယ်ခဲ့သနည်း ။
ပို၍ လွတ်လပ်မှု ရရှိရန်ပင် ။
သို့မဟုတ်ပါက အလုပ်ရုံထဲတွင်သာ အလုပ်ဝင်လုပ်လိုက်သည်က ပိုကောင်းပေမည်။
အလုပ်ရုံထဲရှိ အလုပ်များတွင် အဆင့်သတ်မှတ်ချက်များ ရှိပြီး အဆင့်မြင့်လေ လစာ ပိုရလေပင် ဖြစ်သည် ။
ဝယ်ယူရေး ဝန်ထမ်းများတွင်လည်း အဆင့်သတ်မှတ်ချက်များ ရှိသည် ။
အချိန်ပြည့် ဝန်ထမ်း ဖြစ်လာသည်နှင့် သူသည် လစာ ၂၃ ယွမ် ရရှိမည့် အုပ်ချုပ်ရေးအဆင့် ၃၀ ရှိသော အဆင့် ၁၂ စာရေး တစ်ယောက် ဖြစ်လာပေလိမ့်မည် ။
အဆင့် ၁၂ စာရေး တစ်ယောက်၏ လစာက အဆင့် ၁ အလုပ်ရုံ စက်ယန္တရား လုပ်သား တစ်ယောက်၏ လစာနှင့် ယှဥ်၍ မရနိုင်ချေ ။
သို့သော် အုပ်ချုပ်ရေးအဆင့်ကိုလည်း မြှင့်တင်နိုင်သေးသည် ။
အုပ်ချုပ်ရေးအဆင့်ကို ရာထူးတိုးမြှင့်ပြီးနောက် လစာတိုးလာနိုင်ရုံသာမက သတ်မှတ်ထားသော အဆင့်တစ်ခုသို့ ရောက်ရှိသွားပါက ကေဒါ တစ်ဦးပင် ဖြစ်လာနိုင်သည် ။
သို့သော်လည်း အဆက်အသွယ် မရှိလျှင် အုပ်ချုပ်ရေးအဆင့်ကို မြှင့်တင်ရန် မလွယ်ကူပေ ။
ထောက်ပံ့ပို့ဆောင်ရေး ဒါရိုက်တာဖြစ်သူ ဦးလေး ရှိနေသော လီရှန်းလီ လောက် လူတိုင်း ကံကောင်းနိုင်ကြမည် မဟုတ်ချေ ။
သို့သော် ကံကောင်းထောက်မစွာဖြင့် ယန်ကျီဝမ်သည် ဤအရာများကို ဂရုမစိုက်ခဲ့ဘဲ သူ အလေးထားသည်မှာ အလုပ်တွင် လွတ်လပ်မှု ရှိရန်သာ ဖြစ်သည် ။
" ဘယ်ဟုတ်မလဲ.. "
" မင်း ဘာတွေ တွေးနေတာလဲ.. "
လီရှန်းလီက စကားကို ခဏရပ်လိုက်ပြီးမှ ဆက်၍...
" စဥ်းစားကြည့်လေ.. အဝယ်တော်ဆိုတာ ပစ္စည်းတွေ ဝယ်ဖို့ အပြင်ကို ခြေတိုအောင်ထွက်နေရတာ.. တစ်ခါတလေ အရမ်းဝေးတဲ့ နေရာတွေကိုတောင် သွားရတတ်တယ်.. "
" အဲ့ဒီတော့ ဘယ်လိုလုပ် နေ့တိုင်း လာပြီး သတင်းပို့နိုင်ပါ့မလဲ.. "
ထို့နောက် သူက...
" မင်း ဆိုလိုချင်တာကို ငါ နားလည်ပါတယ်.. "
" မင်းက ငါးဖမ်းတာ တော်တယ်ဆိုတော့ ပုံမှန်ဆိုရင် ငါးဖမ်းတဲ့ ကိစ္စကိုပဲ သေချာ အာရုံစိုက်ထားလိုက်.. အားလပ်ချိန် ရမှသာ စက်ရုံကို ဝင်လာခဲ့.. "
" အဲ့ဒါဆိုရင် အရမ်းကောင်းတာပေါ့.. "
ယန်ကျီဝမ်က ပြုံးလိုက်သည် ။
ဤသည်က သူ လိုချင်နေသည့် အရာပင် ။
ဝယ်ယူရေး ဝန်ထမ်း လုပ်ရသည်က သူ့အတွက် အလွန် သင့်တော်လှပေသည် ။
ဤအလုပ်ကို ယူလိုက်ခြင်းက အစိုးရကဏ္ဍနှင့် ပူးပေါင်းဆောင်ရွက်ခွင့် ရလိုက်သလို ဖြစ်သွားပြီး ခဲတစ်လုံးတည်းနှင့် ငှက်နှစ်ကောင် ပစ်ချလိုက်နိုင်ခြင်းပင် ။
" ကောင်းပြီ.. ငါတို့ ပြောစရာရှိတာတွေ အားလုံး ပြောပြီးသွားပြီ.. "
" ငါလည်း အပြင်ထွက်ပြီး ပတ်ဝန်းကျင်ကို ကြည့်လိုက်ဦးမယ်.. "
" ညီလေး.. ငါ့ရဲ့ ခွဲတမ်းတွေက မင်းအပေါ်မှာ မူတည်နေပြီနော်.. "
" ပြဿနာ မရှိပါဘူး.. "
" ကောင်းပြီ.. ဒါဆိုရင် ငါ အရင်သွားလိုက်တော့မယ်.. "
လီရှန်းလီသည် ခြေလှမ်းနှစ်လှမ်းခန့် လှမ်းအပြီးတွင် ရုတ်တရက် တစ်ခုခုကို သတိရသွားဟန်ဖြင့် ပြန်လှည့်လာကာ...
" ဪ.. စကားမစပ်.. ငါတို့ ဝယ်ယူရေး ဝန်ထမ်းတွေက စက်ဘီး တစ်စီးစီ ထုတ်ယူခွင့် ရှိတယ်.. "
" မင်းရော တစ်စီး လိုသေးလား.. "
ယန်ကျီဝမ်က ခဏစဥ်းစားလိုက်ပြီး...
" ဟုတ်ကဲ့.. "
သူ့တွင် ကိုယ်ပိုင် စက်ဘီး တစ်စီး ရှိထားသော်လည်း ထိုစက်ဘီးကို ဖခင်ဖြစ်သူ ယန်ဖူကွေ့ စီးရန်နှင့် သူ၏ ညီငယ် ညီမငယ်များကို ကျောင်းပို့ရန်အတွက် သုံးနိုင်သည်သည် ။
" ဒါဆိုရင်တော့ မင်းကိုယ်တိုင် ဌာနမှူးဆီ သွားပြီး လျှောက်လိုက်တော့.. "
" ငါ သွားတော့မယ်.. "
လီရှန်းလီ ထွက်သွားပြီးနောက် ယန်ကျီဝမ်လည်း သူ၏ စက်ဘီးကို စီးကာ အိမ်သို့ ပြန်လာခဲ့သည် ။
အိမ်ပြန်ရောက်သောအခါ အလုပ်များနေသည့် ရန်ရွေ့ဟွားက သူ့ကို ဇဝေဇဝါဖြင့် ကြည့်ကာ မေးလိုက်၏ ။
" ဒုတိယသား.. အလုပ် မသွားဘူးလား.. "
" ဘာလို့ ပြန်လာတာလဲ.. "
" ငါးမျှားပစ္စည်းတွေ လာယူတာပါ အမေ.. "
ယန်ကျီဝမ်က ရှင်းပြလိုက်သည် ။
" ကျွန်တော်တို့ အဝယ်တော်အလုပ်က တာဝန်ပြီးမြောက်အောင် လုပ်နိုင်သရွေ့ အချိန်ကန့်သတ်ချက် မရှိဘူး.. တော်တော်လေး လွတ်လပ်တယ်.. "
" ဒါဆိုရင်လည်း ကောင်းတာပေါ့.. "
ရန်ရွေ့ဟွား ထိုစကားကို ကြားမှ စိတ်သက်သာရာ ရသွားသည် ။
သူမက အလုပ်ဝင်သည့် ပထမဆုံးနေ့မှာပင် သူမ၏ ဒုတိယသား အလုပ်ပြုတ်လာပြီဟု ထင်မှတ်နေခဲ့ခြင်း ဖြစ်၏ ။
ငါးဖမ်း ကိရိယာများကို ယူဆောင်ပြီးနောက် ယန်ကျီဝမ်သည် ဟောက်ဟိုင် ရေကန်ဘက်သို့ ငါးဖမ်းရန် ထွက်လာခဲ့သည် ။
...
[ ဒင်.. ငါးဖမ်းအဆင့် တိုးတက်လာပါပြီ.. ]
[ ဆုလာဘ် - တိုက်ခိုက်ရေး ကျွမ်းကျင်မှု.. ]
ညနေ သုံးနာရီ လေးနာရီခန့် အချိန်တွင် သူ၏ စိတ်ထဲ၌ အီလက်ထရွန်းနစ် အသံတစ်သံ ပေါ်ထွက်လာ၏ ။
ယန်ကျီဝမ် လန့်သွားပြီး သူ၏ မျက်နှာက ချက်ချင်းဆိုသလို မည်းမှောင်သွားတော့သည် ။
' ဒါပဲလား.. '
သူ၏ ငါးဖမ်းအဆင့်ကို မြှင့်တင်ရန် အချိန်များစွာ ပေးဆပ်ခဲ့ရသော်လည်း သူရရှိလိုက်သည်က တိုက်ခိုက်ရေး ကျွမ်းကျင်မှုသာ ဖြစ်နေသည် ။
သူက တစ်ခုခု ကောင်းသောအရာ ရလိမ့်မည်ဟု တွေးထင်ထားခဲ့သည်။
ယန်ကျီဝမ် အနည်းငယ် စိတ်ပျက်သွားမိ၏ ။
သို့သော်လည်း ဘာမှ မရှိသည်ထက်စာလျှင်တော့ ပိုကောင်းပေသည် ။
ဆုလာဘ်ကို လက်ခံရယူလိုက်ပြီးနောက် လက်ဝှေ့ ၊ နပန်းလုံးခြင်း စသည်တို့ အပါအဝင် တိုက်ခိုက်ရေးနှင့် ပတ်သက်သည့် အကြောင်းအရာများ မရေမတွက်နိုင်အောင် ယန်ကျီဝမ်၏ စိတ်ထဲသို့ ချက်ချင်း စီးဆင်းဝင်လာသည် ။
မူလက သူသည် ခွန်အားဆေးပြားကို သောက်သုံးထားပြီးနောက် ခွန်အားကြီးမားလာခဲ့သော်လည်း တိုက်ခိုက်ရေး ကျွမ်းကျင်မှု မရှိခဲ့ပေ ။
ထို့ကြောင့် ဝမ်မြောင်မြောင်က သူ့ကို တိုက်ခိုက်သည့်အချိန်တွင် ပြင်းပြင်းထန်ထန် ဖိနှိပ်ခံခဲ့ရ၏ ။
သို့သော် အခုတော့ ကွဲပြားသွားလေပြီ ။ တိုက်ခိုက်ရေး ကျွမ်းကျင်မှုများ ရရှိထားပြီဖြစ်ရာ ဝမ်မြောင်မြောင်သည် သူ၏ ပြိုင်ဘက် မဟုတ်တော့ပေ ။
အနည်းဆုံးတော့ နောက်တစ်ကြိမ် ဝမ်အဘိုးကြီး၏ အိမ်သို့ သူ သွားရသည့်တိုင် ဝမ်မြောင်မြောင်ဆိုသည့် ကျားမကြီးနှင့် ထပ်တွေ့ရမည်ကို မကြောက်ရွံ့တော့ချေ ။
ထို့အပြင် သူ အပြင်ထွက်သည့်အခါ ကိုယ့်ကိုယ်ကိုယ် ကာကွယ်ရန် နည်းလမ်းများလည်း ပိုရှိလာခဲ့ပြီ ဖြစ်သည် ။
ထိုအချက်ကို တွေးမိလိုက်သောအခါ ယန်ကျီဝမ် အတော်လေး စိတ်သက်သာရာ ရသွားတော့၏ ။
ဤဆုလာဘ်အပြင် ရမှတ်စတိုးအတွင်းရှိ ပစ္စည်းအမျိုးအစားများကလည်း သိသိသာသာ တိုးလာခဲ့သည် ။
ထိုအထဲတွင် ယန်ကျီဝမ် အလွန် စိတ်ဝင်စားသွားသော အရာတစ်ခုကိုပင် မြင်တွေ့လိုက်ရသေးသည် ။
သို့သော် ထိုသည်ကို သူ အခု ချက်ချင်း မလိုအပ်သေးသောကြောင့် နောက်မှသာ စဥ်းစားရန် ဆုံးဖြတ်လိုက်လေသည် ။