အခန်း ၂၀

အခန်း (၂၀) စစ်ဆေးမေးမြန်းခြင်း

ရွှန်းရိရပ်ကွက်။

တိုင်ချုံး၏ခေါင်းပြတ်ကို သယ်ဆောင်ရင်း ဟွမ်ပင်းချန်က စည်ကားသောလမ်းမပေါ်တွင် လျှောက်သွားရသည်မှာ အလွန်အနေရခက်သလို ခံစားရ၏။

တစ်ချိန်က သူက မိုးပြာဝါးဂိုဏ်း၏ဩဇာကြီးမားသော ခေါင်းဆောင်ကြီးဖြစ်ခဲ့သော်လည်း နောက်တစ်ခဏတွင် သူက သေတ္တာတစ်လုံးထဲတွင် ထုပ်ပိုးခံရပြီး တစ်စုံတစ်ဦး၏အောင်ပွဲရ ပစ္စည်း ဖြစ်သွားခဲ့၏။

ဤခံစားချက်က ဟွမ်ပင်းချန်အားရှင်းပြ၍မရအောင် လွမ်းဆွေးမှုကိုခံစားရစေသည်။

သူ၏ရှေ့တွင် တည်ငြိမ်ပြီးခိုင်မာစွာရပ်နေသော ဆုရှင်းကို ကြည့်ကာ ဤခေါင်းဆောင်က ဤကဲ့သို့သောယုံကြည်မှုကို ဘယ်ကရလာသနည်းဆိုတာကို ဟွမ်ပင်းချန် တကယ် နားမလည်နိုင်ပေ။

ဂိုဏ်း၏အထက်လူကြီးများက ပြင်းထန်စွာ အပြစ်ပေးမည်ကို စိုးရိမ်သဖြင့် သူက မနေ့ညက တစ်ညလုံး အိပ်မပျော်ခဲ့ပေ။

သို့သော် မနက်မိုးလင်း၍ဆုရှင်းကို ကြည့်လိုက်ချိန်တွင် သူက ခွန်အားများအပြည့်ဖြင့် ရှိနေပုံရပါသည်။

ဟွမ်ပင်းချန်က အာရုံလွင့်နေလျက် တတိယသခင်ကြီးဟူ၏စံအိမ်သို့ ဆုရှင်းနောက်မှ လိုက်သွားခဲ့၏။ အကြံပေးလျိုက ဂိတ်တံခါးတွင် သူတို့ကို စောင့်နေနှင့်ပြီ ဖြစ်သည်။

ဆုရှင်းကိုကြည့်ရင်း အကြံပေးလျို၏အကြည့်က အတော်လေး ရှုပ်ထွေးနေခဲ့၏။

ပထမဆုံး တွေ့ဆုံစဉ်က ဆုရှင်းက အကြံပေးလျိုအား အသက်နှစ်ဆယ်ပင် မပြည့်သေးသော လူငယ်တစ်ဦးနှင့် လုံးဝ မလိုက်ဖက်အောင် နားလည်ရခက်ဖွယ်ပါးနပ်ပြီး တွက်ချက်တတ်သည်ဟူသော အထင်အမြင်ကို ချန်ထားခဲ့သည်။

တတိယသခင်ကြီးဟူ၏အကြံပေးတစ်ဦးအနေဖြင့် အကြံပေးလျိုက အမြဲတမ်း သူ၏ဦးနှောက်ကို အားကိုး၍အသက်မွေးဝမ်းကျောင်းပြုခဲ့ပြီး တိုက်ခိုက်ခြင်းနှင့် သတ်ဖြတ်ခြင်းမှတစ်ဆင့် အခက်အခဲကိုဖြတ်ကျော်ရန်ဆိုသည့် အကြံဉာဏ်ကို သူ တစ်ခါမှသဘောမတူခဲ့ပေ။

ပြီးခဲ့သည့် အကြိမ်က သတင်းရယူရန် ဆုရှင်းက သူ့ကို လာဘ်ထိုးပြီးနောက် ဆုရှင်းက အခက်အခဲကို မည်သို့ဖြတ်ကျော်မည်နည်းဟု အကြံပေးလျိုက တွေးနေခဲ့သည်။

သို့သော် သူ လုံးဝ အံ့အားသင့်သွားသည်မှာ ဆုရှင်းက အခက်အခဲကိုဖြတ်ကျော်ရန် အရိုးရှင်းဆုံး နည်းလမ်းကို အသုံးပြုခဲ့ခြင်းဖြစ်သည်။ သတ်ဖြတ်ခြင်းပင်။

"နှမြောစရာပဲ။ ဒီလူငယ်က ဒီအခက်အခဲကို သည်းခံပြီးအတွေ့အကြုံတွေ စုဆောင်းနိုင်ခဲ့မယ်ဆိုရင် အနာဂတ်မှာ တတိယသခင်ကြီးဟူထက်တောင်ပိုပြီး အောင်မြင်လာမှာ သေချာတယ်။ ကံမကောင်းစွာနဲ့ပဲ သူက ဒီတစ်ကြိမ်မှာဆိုးရွားတဲ့ အမှားတစ်ခုကို လုပ်မိသွားတယ်။"

စိတ်ထဲမှ တွေးနေစဉ်မှာပင် အကြံပေးလျို၏ မျက်နှာပေါ်တွင် တောက်ပသောအပြုံးတစ်ခု ပေါ်လာခဲါသည်။ "သခင်လေးဆု ရောက်လာပြီလား။ တတိယသခင်ကြီးဟူက အထဲမှာ စောင့်နေပါတယ်။"

ဆုရှင်း ခေါင်းညိတ်ပြီး အကြံပေးလျိုနောက်မှ ဧည့်ခန်းထဲသို့ ဝင်သွားခဲ့သည်။

ဧည့်ခန်းအတွင်း၌။

တတိယသခင်ကြီးဟူ၏မျက်နှာမှာ ပြာနှမ်းနေပြီး အကြံပေးလျိုက ဆုရှင်းကိုအထဲသို့ ခေါ်ဆောင်လာပြီးနောက်ဘေးတွင် ရပ်နေ၏။

ဟွမ်ပင်းချန် ၎င်းကို မြင်သောအခါ အလျင်အမြန် ဘေးတွင် ရပ်လိုက်ပါသည်။

ကြာရှည်စွာ တိတ်ဆိတ်နေပြီးနောက် ဆုရှင်းက ဦးစွာ စကားပြောလိုက်၏။ "အဖေ့ရဲ့သားက မွေးစားအဖေကို ဂါရဝပြုပါတယ်။"

"ငါက မင်းရဲ့မွေးစားအဖေဆိုတာကို မင်း မှတ်မိသေးတယ်လား။"

တတိယသခင်ကြီးဟူက စားပွဲကိုလက်ဖြင့် ထုလိုက်ရာ ရွှေရောင်နန်မုသစ်သားပေါ်တွင် နက်ရှိုင်းသော လက်ဝါးရာတစ်ခု ကျန်ရစ်ခဲ့သည်။

"ပြီးခဲ့တဲ့တစ်ခေါက်က ငါ မင်းကို ဘာပြောခဲ့လဲ။ ပြဿနာမရှာဖို့၊ ပြဿနာ မရှာဖို့၊ ပြီးတော့ ဘာမှ မဖြစ်ခဲ့သလိုဟန်ဆောင်ဖို့ ငါ မင်းကို ပြောခဲ့တယ်။ ဒါပေမဲ့ မင်းက တိုင်ချုံးကို သွားပြီး လုပ်ကြံဖို့ ကြိုးစားခဲ့တယ်။ မင်းကြောင့် လင်းယုန်ပျံဂိုဏ်းက ဇောက်ထိုးမိုးမျှော်ဖြစ်လုနီးပါး ဖြစ်သွားပြီ ဆိုတာ မင်း သိလား။"

"စိတ်မပူပါနဲ့ မွေးစားအဖေ။ ကျွန်တော် လူသတ်ခဲ့တာပါ။ ဂိုဏ်းကိုရောက်ရင် ဂိုဏ်းချုပ်နဲ့ တခြားသူတွေကို ရှင်းပြပါ့မယ်။ အဲဒါက မွေးစားအဖေကို အပြစ်ရောက်စေမှာ မဟုတ်ပါဘူး။" ဆုရှင်းက သဲ့သဲ့လေးပြုံးလိုက်သော်လည်း သူ၏အပြုံးထဲတွင် လှောင်ပြောင်မှုအရိပ်အယောင်တစ်ခု ပါဝင်နေခဲ့သည်။

တတိယသခင်ကြီးဟူက ဘာကြောင့် ဤမျှအထိ ဒေါသထွက်နေရသနည်းဆိုရလျှင် ဆုရှင်း၏ လုပ်ရပ်က သူ့ကိုပါအပြစ်သက်ရောက်စေမည်ကို ကြောက်သောကြောင့်ဖြစ်သည်။

အမည်ခံအားဖြင့် ဆုရှင်းက တတိယသခင်ကြီးဟူ၏ မွေးစားသား ဖြစ်သည်။ သူက ဤမျှ ကြီးလေးသောပြစ်မှုတစ်ခုကို ကျူးလွန်ခဲ့၏။ လင်းယုန်ပျံဂိုဏ်းက တတိယသခင်ကြီးဟူကို မည်ကဲ့သို့လုပ်ပြီး တာဝန်မယူခိုင်းဘဲနေမည်နည်း။

"မင်း ငါ့ကို ဒီအထဲဆွဲသွင်းမှာကို ငါ ကြောက်နေတယ်လို့ ထင်လား။ မင်းကိုယ်မင်း လေးစားမှု မရှိတဲ့အတွက် ငါ ဒေါသထွက်နေတာ။ မင်းက ကောင်းကောင်းနေလို့ရရက်နဲ့ ပြဿနာရှာဖို့ အတင်းလုပ်နေတယ်။ ဒီကိစ္စကို မင်း ဘယ်လို ဖြေရှင်းမလဲ ကြည့်ကြသေးတာပေါ့။"

တတိယသခင်ကြီးဟူက အေးစက်စွာ နှာမှုတ်လိုက်ရာ သူ၏မျက်လုံးများရှိ ဒေါသများ လျော့ကျသွားသော်လည်း ပြန်လည် ပေါ်ပေါက်လာသည်မှာ နက်ရှိုင်းသောကြောက်ရွံ့မှုနှင့် နောင်တရမှုပင်။

မမှားပေ။ ယခု တတိယသခင်ကြီးဟူက နောင်တတချို့ ရနေပြီဖြစ်သည်။ သူက ဆုရှင်းကို တိုက်ရိုက်ကိုယ်လက်အင်္ဂါချို့ယွင်းအောင် မလုပ်ခဲ့ဘဲ ချန်သောက်နေရာတွင် သူ၏မွေးစားသားအဖြစ် အစားထိုးရန် ရွေးချယ်ခဲ့မိသည်ကို နောင်တရနေသည်။

ဆုရှင်းက ချန်သောက်က သူ၏ရာထူးကို ခြိမ်းခြောက်လာလိမ့်မည်ဟုချောမွေ့စွာ ပြောဆိုခဲ့သူဖြစ်ခဲ့သော်လည်း ယခုမူ တတိယသခင်ကြီးဟူက ဆုရှင်း၏ခြိမ်းခြောက်မှုကို ခံစားနေရပြီဖြစ်သည်။

တစ်လကျော် ကာလအတွင်းမှာပင် ဆုရှင်းက ဤအဆင့်အထိ ကြီးထွားလာခဲ့၏။

သူတို့တွင် ငွေနှင့် လူအင်အားရှိပါသည်။

အရေးအကြီးဆုံးမှာ ဆုရှင်းထံတွင်လည်း ခွန်အားရှိနေ၏။

တိုင်ချုံး၏ခွန်အားကို တတိယသခင်ကြီးဟူ သိသည်။ သူက တတိယသခင်ကြီးဟူထက် သေချာပေါက် ပို၍ သန်မာလေ၏။

မွေးရာပါခွန်အားဖြင့် မွေးဖွားလာသော တိုင်ချုံးက ဟောက်ထျန်းအစောပိုင်းအဆင့်ရှိ သိုင်းပညာရှင်တစ်ဦးထက် မနိမ့်ကျပေ။ သူက မိုးပြာဝါးဂိုဏ်း တစ်ခုလုံးတွင် ထိပ်တန်းငါးဦးစာရင်းဝင် ဖြစ်သော်လည်း ယခုအခါ ဆုရှင်းက သူ၏ခေါင်းကို ဖြတ်ပြီး ဤနေရာသို့မောက်မာစွာလျှောက်လာခဲ့ပြီဖြစ်သည်။

ချန်သောက်က တစ်နေ့တွင် သူ၏ရာထူးကို ခြိမ်းခြောက်လာလိမ့်မည်ဟု ဆုရှင်းက တစ်ခါပြောခဲ့ဖူးသော်လည်း ယခု ဆုရှင်းက သူ့ကိုခြိမ်းခြောက်ရန် အာဏာရှိနေပြီဖြစ်သည်။

"သွားကြစို့။

ဂိုဏ်းချုပ်နဲ့ တခြားသူတွေက မင်းကို စောင့်နေတယ်။ ဒီတစ်ခါတော့ မင်းက ကြီးမားတဲ့ အမှားတစ်ခုကို လုပ်မိသွားပြီ၊ အဆုံးသတ်က ကောင်းမှာ မဟုတ်လောက်ဘူး။ ဒါပေမဲ့ အနည်းဆုံးတော့ မင်းက ငါ့ကို မွေးစားအဖေလို့ ခေါ်တာဆိုတော့ မင်းကို ဘေးကင်းအောင်ထားဖို့ ငါအကောင်းဆုံး ကြိုးစားပါ့မယ်။"

တတိယသခင်ကြီးဟူက ကြီးကျယ်ခမ်းနားပြီး ဂုဏ်သိက္ခာရှိစွာပြောဆိုခဲ့သော်လည်း သူ၏နှလုံးသားထဲတွင်မူ ဆုရှင်းကို သေဒဏ်ပေးပြီးပြီ ဖြစ်သည်။

ဤတစ်ကြိမ် သူ၏ဖြစ်ရပ်က ကြီးမားသည့်ရုတ်ရုတ်သဲသဲဖြစ်သွားစေခဲ့ပြီး ကိစ္စရပ်များမှကင်းကွာနေသည်မှာ ကြာပြီဖြစ်သော ဂိုဏ်းချုပ်အိုကြီးကိုပင် လန့်နိုးသွားစေခဲ့၏။

ပြစ်ဒဏ်က သေချာပေါက် ပေါ့ပေါ့ပါးပါးဖြစ်မှာ မဟုတ်ပေ။

တတိယသခင်ကြီးဟူ၏ အဆင့်အတန်းအရ ဤကဲ့သို့ကြီးမားသော ကိစ္စရပ်မျိုးတွင် သူ့အတွက် ပြောဆိုခွင့် မရှိပေ။ ထို့အပြင် သူ့တွင် ပြောဆိုခွင့် ရှိလျှင်ပင် သူက ပြဿနာမှခပ်ခွာခွာနေပြီး ဆုရှင်းကို ခြိမ်းခြောက်မှုတစ်ခုအနေဖြင့် ဖယ်ရှားပစ်မည်သာဖြစ်သည်။

ချန်နင်စီရင်စု၏ရပ်ကွက် ၄၉ ခုတွင် လင်းယုန်ပျံဂိုဏ်း၏ဌာနချုပ်က အရှေ့ဘက် ရပ်ကွက် ၁၂ ခုအနက်အစည်ကားဆုံးဖြစ်သော ကျင်ယွဲ့ရပ်ကွက်တွင် တည်ရှိပါသည်။

ခန်းမတစ်ခုလုံးက ဧကဆယ်ဂဏန်းကျော် ကျယ်ဝန်းပြီး လမ်းတစ်လမ်း၏တစ်ဝက်ခန့်ရှိကာ အလွန် ခမ်းနားကြီးကျယ်ပုံရသည်။

ဆုရှင်း၏ဌာနခွဲလေးမှာ အလွန်အထင်ကြီးစရာ ကောင်းလှသည်ဟု ဟွမ်ပင်းချန်ထင်ခဲ့သော်လည်း လင်းယုန်ပျံဂိုဏ်း၏ပင်မဌာနချုပ်နှင့် နှိုင်းယှဉ်လျှင် ဘာမှမဟုတ်တော့ပေ။

ခန်းမ၏ပင်မ အဝင်ဝတွင် လူနှစ်ယောက်စာထက် ပိုမြင့်သော ကျောက်သားလင်းယုန်ရုပ်တု နှစ်ခုက ဂိတ်တံခါး၏တစ်ဖက်တစ်ချက်တွင် ရပ်နေပြီး အဝင်ဝကို စောင့်ကြပ်လေ့ရှိသော ကျောက်သားခြင်္သေ့များကို အစားထိုးထားပေ၏။

ဤသည်မှာ လင်းယုန်ပျံဂိုဏ်း၏ထူးခြားသော လက္ခဏာ တစ်ရပ်ပင်။

ခန်းမ၏တစ်ဖက်တစ်ချက်စီကို စောင့်ကြပ်နေသော ဂိုဏ်းဝင်များအားလုံးက အနက်ရောင် လက်တိုစစ်သည်ဝတ်စုံများကို ဝတ်ဆင်ထားပြီး သူတို့၏ဘယ်ဘက် ရင်ဘတ်တွင် ကြီးကျယ်ခမ်းနားသော လင်းယုန်ရုပ်ကိုချယ်မှုန်းထားကာ ခါးတွင်ဓားကောက်များကို ချိတ်ဆွဲထားကြ၏။

ဆုရှင်း မျက်စိမှေးကာ ဂိုဏ်းဝင်များကို အကဲခတ်ကြည့်လိုက်ရာ ကွာခြားမှုတစ်ခုကို သတိပြုမိသွားသည်။

ဆုရှင်းနှင့် တတိယသခင်ကြီးဟူ လက်အောက်ရှိ ဂိုဏ်းဝင်များက တည့်တိုးပြောရလျှင် ဂိုဏ်းတစ်ခု၏အဖွဲ့ဝင်များ ဖြစ်ကြသော်လည်း တကယ်တမ်းတွင် သူတို့ထဲမှအများစုမှာ လမ်းဘေး လူဆိုးလူမိုက်များသာ ဖြစ်ကြသည်။

လီဟွိုင်ကဲ့သို့ တကယ့်ကျွမ်းကျင်မှု ရှိသူ အလွန် နည်းပါးပါသည်။

ဤဂိုဏ်းဝင်များတွင် ထက်မြက်သော မျက်လုံးများရှိပြီး မှိန်ဖျော့ဖျော့သတ်ဖြတ်လိုစိတ်များကို သယ်ဆောင်ထားကြ၏။ သူတို့အားလုံးက သန်မာပြီး ကျန်းမာကာတက်ကြွမှုအပြည့်ရှိပြီး လူသတ်ဖူးကာ သွေးထွက်သံယိုဖြစ်ဖူးသည့် ထိပ်တန်းစားများ ဖြစ်ကြောင်း ထင်ရှားပါသည်။

ဆုရှင်း၏ အကြည့်ကို မြင်သောအခါ အကြံပေးလျိုက တီးတိုးပြောလိုက်၏။ "ဒီလူတွေ အကုန်လုံးက စစ်ရေးခန်းမကတပည့်တွေချည်းပဲ၊ လင်းယုန်ပျံဂိုဏ်းရဲ့ထိပ်တန်းတွေပေါ့။ လင်းယုန်ပျံဂိုဏ်း တစ်ခုလုံးမှာ သူတို့တွေကလူတစ်ရာတောင် မပြည့်ဘူး။"

ဆုရှင်း ခေါင်းညိတ်လိုက်၏။ သူက လင်းယုန်ပျံဂိုဏ်း၏အာဏာ ဖွဲ့စည်းပုံကို ရင်းနှီးပြီး ဖြစ်သည်။

ထိပ်တန်း ခေါင်းဆောင်ကြီးဆယ့်သုံးဦးအပြင် လင်းယုန်ပျံဂိုဏ်းက ဌာနခွဲမှခန်းမသခင်သုံးဦးက ဂိုဏ်းချုပ်ပြီးလျှင် ဒုတိယနေရာ၌ရှိသည်။

ဤဌာနခွဲသုံးခုမှာ ဘဏ္ဍာရေးကို စီမံခန့်ခွဲသော အထွေထွေခန်းမ၊ ရာဇဝတ်မှုများကို စီမံခန့်ခွဲသော ပြစ်ဒဏ်ခန်းမ နှင့် ဂိုဏ်း၏အစွမ်းအထက်ဆုံး တိုက်ခိုက်ရေးအင်အားကို စီမံခန့်ခွဲသော စစ်ရေးခန်းမ တို့ ဖြစ်ကြ၏။

ဤ ခန်းမသခင်သုံးဦးက ခေါင်းဆောင်ကြီး ဆယ့်သုံးဦးထက်များစွာ မြင့်မားသော ရာထူးကို ရယူထားကြပြီး လင်းယုန်ပျံဂိုဏ်း၏အစစ်အမှန် အာဏာပိုင်များ ဖြစ်လာကြ၏။

"မင်းတို့ နှစ်ယောက် အပြင်မှာ နေခဲ့။" ဟု တတိယသခင်ကြီးဟူက အကြံပေးလျိုနှင့် ဟွမ်ပင်းချန်ကို ပြောလိုက်သည်။

မည်သူမဆို လင်းယုန်ပျံဂိုဏ်း၏ ဌာနချုပ်သို့ ဝင်ရောက်နိုင်သည် မဟုတ်ပေ။

တတိယသခင်ကြီးဟူ၏အကြံပေးဖြစ်သော အကြံပေးလျိုပင်လျှင် ဝင်ရောက်ရန် အရည်အချင်း မပြည့်မီပါက သာမန် ဂိုဏ်းဝင်တစ်ဦးဖြစ်သော ဟွမ်ပင်းချန်ဆိုလျှင် မပြောလိုတော့ပေ။

လူတစ်ရာဆံ့သော ကောင်စီခန်းမအတွင်း၌ ဆယ်ပေခန့်ရှိသော စားပွဲရှည်တစ်လုံးကို အလယ်တွင် ထားရှိထားသည်။ ဘယ်ဘက်တွင် လူသုံးဦးထိုင်ပြီး ညာဘက်တွင် လူဆယ့်နှစ်ဦးထိုင်ကာ ပင်မနေရာတွင် အဘိုးအို တစ်ဦး ထိုင်နေခဲ့၏။

တတိယသခင်ကြီးဟူက ဆုရှင်းကိုအထဲသို့ ခေါ်ဆောင်လာသောအခါ လူတိုင်း၏မျက်လုံးများက သူ့ဆီသို့ ချက်ချင်းရောက်သွားသဖြင့် ဆုရှင်းမှာ ကြီးမားသော ဖိအားကို ခံစားလိုက်ရ၏။

ရောက်ရှိနေသူများမှာ လင်းယုန်ပျံဂိုဏ်း၏ အစစ်အမှန်ခေါင်းဆောင်များ ဖြစ်ကြပြီး ဆယ်စုနှစ်တစ်ခုကျော်ကြာ ဂိုဏ်း၏ထိပ်ပိုင်းသို့ ရောက်အောင် တိုက်ခိုက်လာခဲ့ကြသူများဖြစ်သည်။ သူတို့ တစ်ဦးစီထံမှ ကျောချမ်းဖွယ်အရှိန်အဝါ တစ်ခု ထွက်ပေါ်နေလေ၏။

အထူးသဖြင့် ပင်မနေရာတွင် ထိုင်နေသော လင်းယုန်ပျံဂိုဏ်း၏ ယခေါင်းဆောင် ရှားဖေးယင်း ပင်။

ရှားဖေးယင်းက အလွန်အိုမင်းနေပုံရပြီး အသက် ခုနစ်ဆယ် သို့မဟုတ် ရှစ်ဆယ်ခန့် ရှိနိုင်ကာ ဆံပင်ဖြူများအပြည့်ရှိပြီး သူ၏မျက်နှာပေါ်တွင် နက်ရှိုင်းသော အရေးအကြောင်းများရှိပါသည်။ သူက အနည်းငယ်တက်ကြွမှုမရှိပုံရသော်လည်း သူ၏မျက်ခုံးများကြားတွင် ထက်မြက်သော အသွင်အပြင် ရှိနေဆဲဖြစ်သည်။

ဆုရှင်းက ဤဂိုဏ်းချုပ်အပေါ် နက်ရှိုင်းသော အထင်အမြင် တစ်ခု ရှိပါသည်။ လင်းယုန်ပျံဂိုဏ်း တစ်ခုလုံးတွင် ရှားဖေးယင်းက လူငယ်ဂိုဏ်းဝင်များစွာ၏ နှလုံးသားထဲမှ ဂန္ထဝင် တစ်ဦး ဖြစ်ပါသည်။

ရှားဖေးယင်းက ချန်နင်စီရင်စုတွင် မွေးဖွားခဲ့သည်ဟု ဆိုကြ၏။ သူ၏အစောပိုင်း နှစ်များတွင် သူ၏ မိသားစုက ချန်နင်စီရင်စုရှိထင်ရှားသော မိသားစု တစ်ခု ဖြစ်ခဲ့သော်လည်း အင်အားကြီးသူတစ်ဦးကို စော်ကားမိသောကြောင့် သူတို့ အားလုံး သုတ်သင်ခံခဲ့ရသည်။

သူ တစ်ယောက်တည်းသာ အသက်ရှင်လျက် လွတ်မြောက်ခဲ့၏။

ထို့နောက် ရှားဖေးယင်းက ချန်နင်စီရင်စုမှ ထွက်ပြေးပြီး ကျန်းဟူလောကတွင် လှည့်လည်သွားလာခဲ့သည်။ သူက ထိုက်ဟန်းတောင်တန်း ခံတပ်သို့ဝင်ရောက်ခဲ့ပြီး ဟီနန်ပြည်နယ်ကို လွှမ်းမိုးသော နာမည်ဆိုးဖြင့်ကျော်ကြားသည့် ဓားပြ တစ်ဦးဖြစ်လာခဲ့သည်ဟု ဆိုကြ၏။

အချို့က သူက အနောက်ဘက်ဒေသများသို့ သွားရောက်ကာ အနောက်ဘက်ဒေသများ၏နိုင်ငံ ၃၆ နိုင်ငံနှင့် အနောက်လျန်လမ်းအကြား ဓားပြ တစ်ဦးဖြစ်လာပြီး လူများစွာကို သတ်ဖြတ်ခဲ့သည်ဟု ဆိုကြသည်။

မည်သို့ပင်ဆိုစေကာမူ အနှစ်နှစ်ဆယ်အကြာတွင် လူလတ်ပိုင်းအရွယ်ရှိ ရှားဖေးယင်း ပြန်လည် ရောက်ရှိလာခဲ့၏။

သူက သူ၏သိုင်းပညာ စွမ်းရည်များနှင့် သွေးထွက်သံယိုမှုများဖြင့် ချန်နင်စီရင်စုသို့ ပြန်လာခဲ့ပြီး သူ၏ရန်သူများနှင့် ၎င်းတို့၏မိသားစုများကို သတ်ဖြတ်ကာ လင်းယုန်ပျံဂိုဏ်းကို တည်ထောင်ခဲ့ပြီး ချန်နင်စီရင်စုရှိအကြီးဆုံးသော အင်အားစုများထဲမှ တစ်ခု ဖြစ်လာခဲ့သည်။

ဇာတ်လိုက်များ၏လက်စားချေမှုနှင့် ပတ်သက်သော ဤကဲ့သို့သောဇာတ်လမ်းများက လူငယ်များကြားတွင် အမြဲတစေရေပန်းစားလေ့ရှိသော်လည်း ၎င်းတို့က အမှန်လား၊ အမှားလားဆိုသည်ကို မည်သူ သိမည်နည်း။

"ဂိုဏ်းချုပ်၊ဆုရှင်းကို ခေါ်လာခဲ့ပါပြီ။" တတိယသခင်ကြီးဟူသည် ရှားဖေးယင်းကို အလွန် လေးစားစွာဖြင့် ဦးညွှတ်လိုက်သည်။

ရှားဖေးယင်းက ဘာမှမပြောဘဲ လက်ကိုသာ ဝှေ့ယမ်းလိုက်ရာ တတိယသခင်ကြီးဟူက ခေါင်းဆောင်ကြီး၏ဘေးသို့ ချက်ချင်း လျှောက်သွားပြီး ထိုင်ချလိုက်ကာမလှုပ်မယှက်ဖြင့် ပါးစပ်ပိတ်နှာခေါင်းပိတ် အောက်ငုံ့ကြည့်နေတော့သည်။

"မင်းက ဆုရှင်းလား။" သဲများ အချင်းချင်း ပွတ်တိုက်နေသည့်အလားအိုမင်းပြီး အက်ကွဲနေသောအသံဖြင့် ရှားဖေးယင်းက မေးလိုက်သည်။

ဆုရှင်း ခေါင်းညိတ်လိုက်ပြီး လူတိုင်းကို လေးစားစွာ ဦးညွှတ်ကာ ပြောလိုက်၏။ "ဆုရှင်းက ဂိုဏ်းချုပ်နဲ့ စီနီယာတွေအားလုံးကို ဂါရဝပြုပါတယ်။"

လင်းယုန်ပျံဂိုဏ်း၏အဖွဲ့ဝင်များက ဆုရှင်းကို အကဲခတ်ကြည့်လိုက်ကြ၏။ တခြားအရာများ အားလုံးကို ဖယ်ထားလိုက်လျှင် ဤလူငယ်က သေချာပေါက် သတ္တိများစွာရှိပါသည်။

အကယ်၍ ၎င်းက သာမန် ဂိုဏ်းဝင် တစ်ဦးသာ ဖြစ်ပါက လင်းယုန်ပျံဂိုဏ်း၏အဆင့်မြင့် အဖွဲ့ဝင်များ အားလုံး၏စောင့်ကြည့်မှုအောက်တွင် သူက အကြောက်တရားကြောင့်တုန်ယင်နေပြီး မိမိကိုယ်ကို ထိန်းချုပ်နိုင်မည် မဟုတ်ပေ။

သို့သော် ဆုရှင်းက အတော်လေး တည်ငြိမ်နေပုံရပြီး ကြီးမားသောသတ္တိကို ပြသနေပါသည်။

အခြားတစ်ဖက်တွင် သတ္တိများစွာမရှိဘဲ ဤမျှ ကြီးကျယ်သော အရာမျိုးကို သင် လုပ်နိုင်မည် မဟုတ်ပေ။

"ဆုရှင်း။ မင်းကိုယ်မင်း လင်းယုန်ပျံဂိုဏ်းရဲ့ အဖွဲ့ဝင် တစ်ယောက်ဆိုတာသိသေးရဲ့လား။ဒီလောက် ကြီးမားတဲ့ ရှုပ်ထွေးမှုကြီးကို ဖန်တီးပြီးတာတောင် မင်းက လင်းယုန်ပျံဂိုဏ်းကို လေးစားမှုရှိသေးရဲ့လား။" ပြစ်ဒဏ်ခန်းမ၏ အကြီးအကဲ ဖြစ်သော တုန်းချန်ဝူက အသံနိမ့်နိမ့်ဖြင့်ပြင်းထန်စွာ အော်လိုက်ရာ သူ၏လေသံမှာ ဓားတစ်လက်ကဲ့သို့ ထက်မြက်နေသည်။

ခန်းမသခင်သုံးဦးအနက် တုန်းချန်ဝူက အသက်အငယ်ဆုံးဖြစ်ပြီး အသက် ငါးဆယ်ပင်မပြည့်သေးပုံရသော်လည်း တကယ်တမ်းတွင် သူက တတိယသခင်ကြီးဟူနှင့် အသက်အရွယ်အကြမ်းဖျင်း တူညီပြီး ခြောက်ဆယ်နီးပါး ရှိနေပြီဖြစ်သည်။

တုန်းချန်ဝူ၏သိုင်းပညာ စွမ်းရည်များအားမနည်းသောကြောင့်သာ သူကတတိယသခင်ကြီးဟူထက် ပိုငယ်ပုံရခြင်းဖြစ်ပေ၏။

တိကျသောခွန်အားကို ဆုရှင်းမခံစားနိုင်သော်လည်း ဟောက်ထျန်းအစောပိုင်းအဆင့်ရှိ သူ၏ကိုယ်ပိုင်ခွန်အားထက်များစွာ ပိုမို သန်မာသည်မှာ သေချာပါသည်။

ပြစ်ဒဏ်ခန်းမ၏အကြီးအကဲအဖြစ် အနှစ်သုံးဆယ်ကျော်တာဝန်ထမ်းဆောင်ခဲ့ပြီးနောက် တုန်းချန်ဝူက ပြင်ပလူများထက် သူ၏ကိုယ်ပိုင်လူများကို ပိုမို သတ်ဖြတ်ခဲ့သည်။ သာမန် ဂိုဏ်းဝင်များက ဂိုဏ်းချုပ်ထက် ဤပြစ်ဒဏ်ခန်းမ၏အကြီးအကဲကို ပို၍ပင် ကြောက်ရွံ့ကြ၏။