အခန်း ၂၂၄၅

အခန်း (၂၂၄၅) ပြင်းထန်လှသော ဓားချက်ကြီး

ဤမျှသာမက မိုင်ထောင်နှင့်ချီသော နယ်ပယ် အတွင်း၌ တောင်တန်းများ နှင့် မြေကြီးများ အားလုံးမှာ မြည်သံများနှင့်အတူ ပြင်းထန်စွာ တုန်ခါသွားခဲ့ပြီး၊ သံမဏိခံတပ် ကြီး ပင်လျှင် အပြင်းအထန် တုန်ခါနေခဲ့ရာ၊ ကောင်းကင်ယံ အမြင့်ပိုင်းတွင် ရှိနေသော ထိုလုံးဝယုံကြည်နိုင်စွမ်း မရှိလောက်အောင် အံ့ဩဖွယ်ရာ ကောင်းလှသည့် ရွှေဝါရောင် ဓားချီစွမ်းအင်ကြီးနှင့် အဝေးမှနေ၍ အချင်းချင်း အပြန်အလှန် ပဲ့တင်ထပ်ကာ တုံ့ပြန်နေသည့်အလား ဖြစ်နေတော့သည်။

"ဒါက... အရှင်မင်းကြီးရဲ့ ဓားစွမ်းအင်ပဲ"

မြေပြင်ပေါ်ရှိ သံမဏိခံတပ်၏ အတွင်း၌ မင်းဆရာ ဝမ်ကျုံးစစ်မှာ စစ်တပ်ကြီးကို ဦးဆောင်ကာ မြောက်ဘက် အရပ်ဆီသို့ လျင်မြန်စွာ တဟုန်ထိုး ပြေးဝင်သွားနေခဲ့ရာမှ၊ ရုတ်တရက် ကောင်းကင်ယံ အမြင့်ပိုင်းရှိ ထိုဓားချက် ကြီးကို မြင်တွေ့လိုက်ရသည့်အခါ တစ်ကိုယ်လုံး ပြင်းထန်စွာ တုန်ခါသွားခဲ့ပြီး စစ်မြင်းကို ဇက်ကြိုးဆွဲကာ ချက်ချင်း ရပ်တန့်လိုက်တော့သည်။

သူတော်စင် ဧကရာဇ်နှင့်အတူ ဧကရာဇ်နှင့် မှူးမတ်ဆက်ဆံရေးဖြင့် တစ်သက်တာ ကာလ တစ်လျှောက်လုံး အတူတကွ ဖြတ်သန်းလာခဲ့သူ တစ်ဦးအနေဖြင့်၊ သူတော်စင် ဧကရာဇ်၏ အရှိန်အဝါကို သူ့ထက် ပိုမို ရင်းနှီးကျွမ်းဝင်သူ မည်သူမျှ လုံးဝရှိမနေတော့ပါချေ။

"အရှင်မင်းကြီး"

ဤအခိုက်အတန့် မျက်တောင်တစ်ခတ် အတွင်းမှာပင် ဝမ်ကျုံးစစ်၏ မျက်နှာအမူအရာမှာ အလွန်အမင်း စိတ်လှုပ်ရှား တက်ကြွနေတော့သည်။

"လီထိုက်ယီ ဒါ လုံးဝမဖြစ်နိုင်ဘူး"

အဆုံးအစမရှိ ကြီးမားကျယ်ပြန့်လှသော ညကောင်းကင်ယံ ကြီး အတွင်း၌ ထိုက်ရှီမှာ ရုတ်တရက် ရင်ကွဲမတတ် အော်ဟစ်သံကြီးတစ်ခု ထုတ်လွှတ်လိုက်ရာ၊ အသံပင်လျှင် အလွန်အမင်း အထိတ်တလန့် ဖြစ်နေတော့သည်။

ကောင်းကင်သားတော်၏ ဓား။

ဤသည်မှာ လီထိုက်ယီ၏ အစွမ်းအထက်ဆုံးနှင့် အကြောက်မက်ဖွယ် အကောင်းဆုံးသောဓားချက် ပင် ဖြစ်တော့သည်။

ဤဓားချက် ပေါက်ကွဲထွက်ပေါ်လာသည့် အခါတွင် ‘ထျန်း’ မှလွဲ၍ အခြား မည်သူ တစ်ဦးတစ်ယောက် ကမျှ လုံးဝတားဆီးနိုင်စွမ်း မရှိပါချေ။ ထိုက်ရှီပင်လျှင် လုံးဝတားဆီးနိုင်စွမ်း မရှိခဲ့ပါချေ။ ဤသည်မှာ ဂူကောင်းကင်အဆင့်ရှိ အစွမ်းထက် သိုင်းပညာရှင် များ အနေဖြင့် လုံးဝတားဆီးနိုင်စွမ်း ရှိသည့် အရာမျိုး လုံးဝမဟုတ်ပါချေ။

ဤဓားချက်၏ ရှေ့မှောက်တွင် ထိုက်ရှီပင်လျှင် အနည်းငယ်မျှ အရေးမပါသော သေးငယ်သည့် အရာလေးတစ်ခုအလား ဖြစ်နေတော့သည်။

ဤအခိုက်အတန့် မျက်တောင်တစ်ခတ် အတွင်းမှာပင် ထိုက်ရှီမှာ အလွန်အမင်း အထိတ်တလန့် ဖြစ်သွားခဲ့ပြီး အလွန်အမင်း တုန်လှုပ် ချောက်ချားသွားတော့သည်။

"မဟုတ်ဘူး ဒါ ကောင်းကင်သားတော်ရဲ့ဓား မဟုတ်ဘူး"

သို့သော် လျင်မြန်စွာပင် ထိုက်ရှီမှာ ကွဲပြားခြားနားသော အချက်အချို့ကို ရုတ်တရက် သတိပြုမိသွားတော့သည်။

လီထိုက်ယီ အသုံးပြုခဲ့သော ထိုဓားချက်၏ပြသလိုက်သော ခွန်အားမှာ မိုင်ပေါင်း သောင်းနှင့်ချီ အကွာအဝေး အထိ ရောက်ရှိနိုင်စွမ်းရှိပြီး၊ ကျိုကျိုး ကုန်းမြေလောက ကြီး တစ်ခုလုံးပင်လျှင် ရိုက်ခတ်မှုကို ခံစားသိရှိနိုင်စွမ်း ရှိသည်။ သို့သော် ဝမ်ချောင်၏ ဤဓားချက်မှာမူ ထိုမျှလောက်အထိ ခမ်းနားကြီးကျယ်လှခြင်း လုံးဝမရှိခဲ့ပါချေ။ အများဆုံး ဆိုလျှင် လီထိုက်ယီ၏ "ကောင်းကင်သားတော်၏ဓား"၏ ခွန်အား တစ်ဝက်ခန့်သာ ရှိပေသည်။ ထို့ပြင် အပြင်ပန်းတွင် ကြည့်မည်ဆိုပါက "ကောင်းကင်သားတော်၏ ဓား" နှင့် တူညီနေသည် ဆိုသော်ငြားလည်း၊ ဓားစွမ်းအင်၏ အနက်ရှိုင်းဆုံးသော နေရာတွင်မူ ထိုမျှလောက်အထိ သန့်စင်နေခြင်း လုံးဝမရှိခဲ့ပါချေ။

ထိုဓားစွမ်းအင်၏ အတွင်း၌ ဝမ်ချောင်၏ အရှိန်အဝါ ပါဝင်နေသည်ကို ထိုက်ရှီ ရှင်းလင်းစွာ ခံစားသိရှိလိုက်ရတော့သည်။

"ထိုက်ရှီ... ကံကြမ္မာ ကို လက်ခံလိုက်တော့… ဒါက မင်းရဲ့ ကံကြမ္မာပဲ"

ဝမ်ချောင်၏ သတ်ဖြတ်လိုစိတ် များ ပြည့်နှက်နေသော အသံကြီးမှာ ကောင်းကင်နှင့် မြေကြီး အကြား၌ ပဲ့တင်ထပ်သွားခဲ့ပြီး လုံးဝအေးစက် ရက်စက်လွန်းလှပေသည်။

ထိုက်ရှီ၏ ခံစားသိရှိနိုင်စွမ်းမှာ လုံးဝမှားယွင်းနေခြင်း မရှိပါချေ။ သူတော်စင် ဧကရာဇ်သည် ဝမ်ချောင်၏ ကိုယ်တွင်း၌ "ကောင်းကင်သားတော်၏ဓား"ကို လုံးဝချန်ရစ်ထားခဲ့ခြင်း မရှိခဲ့ပါချေ။

ထိုစဉ်က သေဆုံးခါနီး အချိန်တွင် သူတော်စင် ဧကရာဇ်သည် ဤစွမ်းအင် အလယ်ဗဟိုကို ချန်ရစ်ထားခဲ့ခြင်းမှာ ဝမ်ချောင်အတွက် ဘေးအန္တရာယ်များကို ဖြေရှင်းပေးရန်နှင့် အန္တရာယ် ကြီးမားလှသော အချိန်မျိုးတွင် အောင်မြင်စွာ ထွက်ပြေးလွတ်မြောက်နိုင်ရန် အတွက်သာ ဖြစ်ပေသည်။

သို့သော် ဝမ်ချောင်က ဤစွမ်းအင် အလယ်ဗဟိုကို ထိုက်ရှီအား သတ်ဖြတ်ရန်အတွက် အသုံးပြုလိမ့်မည် ဟု သူတော်စင် ဧကရာဇ် ကိုယ်တိုင်ပင်လျှင် လုံးဝတွေးတောထားခဲ့မည် မဟုတ်ပါချေ။

ဤမျှသာမက ဝမ်ချောင်သည် ဤစွမ်းအင်အလယ်ဗဟိုနှင့် ၎င်းအတွင်း၌ ကျန်ရစ်နေခဲ့သော အလွန်သေးငယ်လွန်းသည့် "ကောင်းကင်သားတော်၏ဓား" ၏ ဓားစိတ်ဆန္ဒလေးကို အသုံးပြုခဲ့သည်။ သူ၏ အလွန်အံ့ဩဖွယ်ကောင်းသော မွေးရာပါပါရမီနှင့် နားလည်သဘောပေါက်နိုင်စွမ်းတို့ကိုလည်း အားကိုးခဲ့ပေသည်။ ထို့ပြင် ဂူကောင်းကင်အဆင့်၏ အလွန်အစွမ်းထက်လှသော ခွန်အားများကို အသုံးချကာ၊ သူတော်စင်ဧကရာဇ်၏ "ကောင်းကင်သားတော်၏ ဓား" ကို အတင်းအကျပ် ပေါက်ကွဲထွက်ပေါ်လာစေခဲ့သည်။ ဤနည်းအားဖြင့် သူတော်စင်ဧကရာဇ် ချန်ရစ်ခဲ့သော ထိုစွမ်းအင်အလယ်ဗဟို၏ ခွန်အားများကို များစွာ မြှင့်တင်ပေးလိုက်ခြင်းပင် ဖြစ်တော့သည်။

ဤဓားချက်မှာ သူတော်စင် ဧကရာဇ် ထိုစဉ်က အသုံးပြုခဲ့သော ဓားချက်နှင့် လုံးဝနှိုင်းယှဉ်၍ မရနိုင်သလို၊ အနည်းငယ်မျှ မသန့်စင်မှုများ ရှိနေသေးသည် ဆိုသော်ငြားလည်း၊ ထိုက်ရှီကို ကိုင်တွယ် ဖြေရှင်းရန်အတွက်မူ ဤမျှလောက်ဖြင့် လုံလောက်နေပြီ ဖြစ်၏။

"ဝုန်း"

ပြင်းထန်လှသော မြည်ဟည်းသံကြီး တစ်ခုကိုသာ ကြားလိုက်ရပြီး၊ ဟင်းလင်းပြင်ကြီး တစ်ခုလုံးမှာ လုံးဝခွဲထုတ်ခံလိုက်ရတော့သည်။ ထိုအခိုက်အတန့်၌ အရှေ့မြောက်ဘက် ဒေသကြီးတစ်ခုလုံးတွင် အပ်ကျသံ ကိုပင် ကြားရလောက်အောင် တိတ်ဆိတ် ငြိမ်သက်သွားတော့သည်။

မြေပြင်ပေါ်တွင် မရေမတွက်နိုင်သော လူများ၏ အကြည့်များ အားလုံးမှာ ကောင်းကင်ယံသို့ အသီးသီး လှမ်းကြည့်လိုက်ကြရာ၊ ဟင်းလင်းပြင်ကြီး ခွဲထွက်သွားသည့် အခါတွင် လူတိုင်း အနေဖြင့် ဤအလွန်အမင်း ခမ်းနား ကြီးကျယ်ပြီး တောက်ပ လင်းလက်လှသော ဓားချက်ကြီးကို ရှင်းလင်းစွာ မြင်တွေ့လိုက်ကြရတော့သည်။

တိတ်ဆိတ် ငြိမ်သက်မှု။

အလွန်အမင်း တိတ်ဆိတ် ငြိမ်သက်မှု။

မျက်တောင်တစ်ခတ်မျှ အချိန်လေး အတွင်းမှာပင် ပြီးဆုံးသွားသည့်အလား ဖြစ်သလို၊ အဆုံးအစမရှိ ရှည်လျားလှသော ရာစုနှစ်ပေါင်းများစွာ ကြာမြင့်သွားခဲ့သည့်အလားလည်း ဖြစ်နေတော့သည်။ ကောင်းကင်ယံတွင် အလွန်အမင်း တိတ်ဆိတ် ငြိမ်သက်နေခဲ့ပြီး အလင်းတန်း တစ်ချက် လက်သွားကာ ဝမ်ချောင်၏ပုံရိပ်မှာ ညကောင်းကင်ယံကြီး အတွင်း၌ ရုတ်တရက် ပေါ်ထွက်လာတော့သည်။

"ပြီးဆုံးသွားပြီ ပေါ့"

ဝမ်ချောင်က ရှည်လျားလှသော သက်ပြင်းကြီး တစ်ခုကို ချလိုက်သည်။ ယနေ့လေးကို ရောက်ရှိလာရန် အတွက် သူသည် အချိန်အကြာကြီး ပြင်ဆင်ထားခဲ့ရပြီး ဤမျှလောက် အချိန်အကြာကြီး စောင့်ဆိုင်းထားခဲ့ရပြီးနောက် နောက်ဆုံးတွင် ထိုက်ရှီကို အောင်မြင်စွာ တိုက်ခိုက် နှိမ်နင်းနိုင်ခဲ့ပြီ ဖြစ်၏။

သို့သော် ထိုအချိန်မှာပင် ဝမ်ချောင်၏မျက်တောင်များ အနည်းငယ် လှုပ်ရှားသွားခဲ့ပြီး၊ သူနှင့် သိပ်မဝေးလှသော လေဟာနယ်ဆီသို့ ရုတ်တရက် ခေါင်းလှည့် ကြည့်လိုက်ရာ၊ ဝမ်ချောင်၏ ခံစားသိရှိနိုင်စွမ်းကို တုံ့ပြန်နေသည့်အလား…

အဟွတ် အဟွတ်…

အလွန် သေးငယ် တိုးညှင်းလှသော ချောင်းဆိုးသံအချို့မှာ ဟင်းလင်းပြင်ကြီး အတွင်းမှနေ၍ ရုတ်တရက် လွင့်ပျံလာတော့သည်။ ဝမ်ချောင်၏အကြည့်များအောက်တွင် အလွန်အမင်း စုတ်ပြတ်သတ်နေသော ပုံရိပ်တစ်ခုမှာ ယိမ်းယိုင်ယိုင်ဖြင့် လေဟာနယ်မှနေ၍ ရုတ်တရက် ပြုတ်ကျလာတော့သည်။

ထိုက်ရှီ၊

ဝမ်ချောင်မှာ တစ်ချက်ကြည့်လိုက်ရုံ ဖြင့်ပင် မျက်နှာအမူအရာ ချက်ချင်း အေးစက်သွားတော့သည်။

သူရဲ့အစွမ်းကုန် တိုက်ခိုက်လိုက်တဲ့ ဒီဓားချက်ကြီးကို ခံလိုက်ရတယ်ဆိုတာတောင်မှ ထိုက်ရှီက မသေသေးဘူး ပေါ့။

ထိုက်ရှီ၏ ကိုယ်ပေါ်ရှိ ထိုရှေးဟောင်း ရွှေဝါရောင် နတ်သံချပ်ကာကြီးမှာ အပိုင်းပိုင်းအစစ ပြတ်တောက်နေခဲ့ပြီး အပိုင်းအစလေးများပင်လျှင် ဘယ်နေရာကို လွင့်စင်သွားမှန်း မသိရှိရတော့ပါချေ။ ထိုဂူကောင်းကင်အဆင့်ရှိ နတ်ဘုရား ခန္ဓာကိုယ်ကြီး အပေါ်တွင်လည်း သွေးကွက်များ ပြည့်နှက်နေပြီး ထိခိုက်ဒဏ်ရာများ အနှံ့အပြား ရရှိနေကာ အလွန်အမင်း ပြင်းထန်သော ဒဏ်ရာ များကို ရရှိထားပုံ ပေါ်နေတော့သည်။

ထို့ပြင် သူ၏တစ်ကိုယ်လုံးရှိ အရှိန်အဝါ များမှာလည်း လုံးဝဖရိုဖရဲ ဖြစ်နေခဲ့ပြီး၊ ယခင်ကကဲ့သို့ အစွမ်းထက်နေသည့် ပုံစံမျိုး အနည်းငယ်မျှ လုံးဝရှိမနေတော့ပါချေ။

ထိုအလွန်အမင်း ကြောက်မက်ဖွယ်ကောင်းသော တိုက်ခိုက်မှု ကြီးအတွင်း၌ ထိုက်ရှီသည် အလွန်အမင်း အစွမ်းထက်လှသော ဂူကောင်းကင်အဆင့်၏ ခွန်အားများနှင့် ထိုအမည်မသိ ရွှေဝါရောင် နတ်သံချပ်ကာကို အားကိုးလျက်၊ နောက်ဆုံးတွင် ကံကောင်း ထောက်မစွာဖြင့် အသက်ရှင် လွတ်မြောက်လာနိုင်ခဲ့ခြင်း ပင် ဖြစ်တော့သည်။

"ကောင်လေး... မင်း နိုင်သွားပြီလို့ မင်းကိုယ်မင်း ထင်နေတာလား"

ကောင်းကင်ယံတွင် ထိုက်ရှီမှာ ဝမ်ချောင်ကို စိုက်ကြည့်နေခဲ့ရာ မျက်ဝန်းထဲ၌ ကောင်းကင်ယံ သို့တိုင်အောင် လွင့်ပျံနေသော အမုန်းတရားများ ပြည့်နှက်နေတော့သည်။

"ဒီလို ခန္ဓာကိုယ် မျိုး ငါ လိုချင်သလောက် အများကြီး ရနိုင်တယ်။ ဒီလို နတ်သံချပ်ကာ မျိုး ကိုလည်း ငါ အလွယ်တကူ ရနိုင်တယ်။ ငါတို့ နှစ်ယောက်ကြားကတိုက်ပွဲက အခုမှ စတင်ရုံ သက်သက်ပဲ ရှိသေးတယ်၊ ဒီတစ်ကြိမ်မှာတော့ ငါ ရှုံးသွားခဲ့တယ် ဆိုပါတော့၊ ဒါပေမဲ့ နောက်တစ်ကြိမ်ကျရင် မင်း အနေနဲ့ ဒီလောက် ကောင်းတဲ့ အခွင့်အရေးမျိုး လုံးဝရလာတော့မှာ မဟုတ်ဘူး"

ဝမ်ချောင်၏ တိုက်ခိုက်မှု ကြောင့် အလွန်အမင်း ပြင်းထန်သော ဒဏ်ရာများကို ရရှိထားခဲ့ပြီး ဂူကောင်းကင်အဆင့်၏ဒန်တျန်ပင်လျှင် ပြိုကွဲပျက်စီးသွားခဲ့ပြီ ဖြစ်သည် ဆိုသော်ငြားလည်း၊ ထိုက်ရှီ၏ မျက်နှာအမူအရာတွင် အနည်းငယ်မျှ ထိတ်လန့် ချောက်ချားနေခြင်း လုံးဝမရှိခဲ့ပါချေ။

မြို့တော်တွင် သူ အသက်ရှင် လွတ်မြောက်နိုင်ခဲ့သည် ဆိုမှတော့ ယခုလည်း အလားတူပင် သူ အသက်ရှင် လွတ်မြောက်နိုင်မည်မှာ သေချာလှပေသည်။ အများဆုံး ဆိုလျှင် ခန္ဓာကိုယ် တစ်ခု အသစ် ပြောင်းလဲလိုက်ရုံ သက်သက်သာ ဖြစ်ပေသည်။

ဝမ်ချောင်မှာ သူ့ကို အလွန်အမင်း အထင်သေးလွန်း နေဆဲ ဖြစ်သလို၊ နတ်ဘုရား အဖွဲ့အစည်းကိုလည်း အလွန်အမင်း အထင်သေးလွန်း နေဆဲပင် ဖြစ်တော့သည်။

"ဟွန်း... ဟုတ်လို့လား?"

ဝမ်ချောင်မှာ ဤစကားကို ကြားလိုက်ရသည့်အခါ အေးစက်စက် ဖြင့် လှောင်ပြောင် ရယ်မောလိုက်သည်။ အနည်းငယ်မျှ ထိတ်လန့် ချောက်ချားသွားခြင်း လုံးဝမရှိခဲ့သလို ထိုက်ရှီထွက်ပြေး လွတ်မြောက်သွားမည်ကို ကာကွယ် တားဆီးရန်အတွက် သူ့ကို နောက်ယောင်ခံ လိုက်ရန်ပင် လုံးဝပြင်ဆင်ခြင်း မရှိခဲ့ပါချေ။

"မင်း ပြောနေတာ ဒါကို လား?"

ဝမ်ချောင်က လက်ဖဝါးကို တစ်ချက် လှန်လိုက်ရာ လက်ဖဝါး ပေါ်တွင် အနက်ရောင် သတ္တု မန္တန်ပြားတစ်ခု ရုတ်တရက် ပေါ်ထွက်လာတော့သည်။

ထိုရင်းနှီးကျွမ်းဝင်နေသော အနက်ရောင် မန္တန်ပြား လေးကို မြင်တွေ့လိုက်ရသည့်အခါ ထိုက်ရှီ၏ မျက်လုံးသူငယ်အိမ်များ ရုတ်တရက် ကျုံ့သွားခဲ့ပြီး၊ ပြင်းထန်လှသော တိုက်ခိုက်မှု ကြီးကို ခံလိုက်ရသည့်အလား တစ်ကိုယ်လုံး အဆက်မပြတ် တုန်ယင်သွားတော့သည်။

"မဖြစ်နိုင်ဘူး။ အဲဒါက ဘယ်လိုလုပ်ပြီး မင်းဆီကို ရောက်နေရတာလဲ"

ထိုအခိုက်အတန့် မျက်တောင်တစ်ခတ် အတွင်းမှာပင် ထိုက်ရှီ၏မျက်ဝန်းထဲ၌ အလွန်အမင်း ထိတ်လန့် ချောက်ချားနေသော အရိပ်အယောင်များ ချက်ချင်း ပေါ်ထွက်လာတော့သည်။ မျက်နှာပေါ်ရှိ သွေးရောင် များ ပင်လျှင် လုံးဝဖြူရော်သွားခဲ့ပြီး အသက်ရှူ ရပ်သွားမတတ် ဖြစ်သွားတော့သည်။

ယခင်က ထိုက်ရှီမှာ အလွန်အမင်း အေးဆေးတည်ငြိမ်နေခဲ့ပြီး ဝမ်ချောင်က သူ့ကို သတ်ဖြတ်ရန် အတွက် ရက်စက်ကြမ်းတမ်းသော နည်းလမ်း များကို အသုံးပြုလာမည်ကို အနည်းငယ်မျှ စိုးရိမ်ပူပန်နေခြင်း မရှိခဲ့ရသည့် အဓိက အကြောင်းရင်းမှာ၊ ဤ"ဟင်းလင်းပြင်နှင့် အချိန် မန္တန်ပြား" ကြောင့်ပင် ဖြစ်တော့သည်။

ဤဟင်းလင်းပြင်နှင့် အချိန် မန္တန်ပြား လေး ရှိနေသရွေ့ သူ၏ ရုပ်ပိုင်းဆိုင်ရာ ခန္ဓာကိုယ်မှာ လုံးဝအမှုန့်ကြိတ်ခံရပြီး ပြိုကွဲပျက်စီးသွားမည် ဆိုလျှင်တောင်မှ၊ သူသည် ဝမ်ချောင် လုံးဝတွေးတော မှန်းဆ၍ မရနိုင်လောက်အောင် မြန်ဆန်လှသော အရှိန်ဖြင့် ဤနေရာ မှနေ၍ ထွက်ပြေး လွတ်မြောက်နိုင်စွမ်း ရှိပြီး၊ အဓိက ဌာနချုပ်သို့ အောင်မြင်စွာ ပြန်လည်ရောက်ရှိသွားနိုင်မည် ပင် ဖြစ်တော့သည်။

ထိုအချိန် ကျရောက်လာပါက လအနည်းငယ်ခန့် ကြာမြင့်ပြီးနောက် သူသည် နောက်တစ်ကြိမ် ထပ်မံ၍ အကောင်းပကတိအနေအထားဖြင့် ဝမ်ချောင်၏ မျက်စိရှေ့တွင် ပေါ်ထွက်လာနိုင်ဦးမည် ပင် ဖြစ်သည်။

သို့သော် ယခုအခါ

ဤမန္တန်ပြားကို သူ အစောကြီးကတည်းက သန့်စင်ထားခဲ့ကာ သူ၏ဝိညာဉ်နှင့် တစ်သားတည်း ပေါင်းစပ်ထားခဲ့ပြီး ဖြစ်သည်။ ဘယ်လိုလုပ်ပြီး ဝမ်ချောင်ရဲ့ လက်ထဲကို ရောက်နေရတာလဲ။

"ဟဲဟဲ... ငါ လုပ်လိုက်တာလေ"

ထိုအချိန်မှာပင် အသံတစ်ခု ရုတ်တရက် ထွက်ပေါ်လာတော့သည်။ ထိုက်ရှီ၏ ကိုယ်တွင်းရှိ အိပ်မက်ဆိုးသားရဲမှာ ရုတ်တရက် ဆိုလိုက်တော့သည်။

"သခင်က မင်းမှာ ဒီလို လှုပ်ရှားမှုမျိုး ရှိလာမယ် ဆိုတာကို အစောကြီးကတည်းက တွက်ချက်ထားပြီးသားပဲ၊ အဲဒါကြောင့် ငါ မင်းရဲ့ခန္ဓာကိုယ်ထဲကို ဝင်သွားတာနဲ့ တစ်ပြိုင်နက်၊ ပထမဆုံး လုပ်ရမယ့် အလုပ်က မင်းရဲ့အာရုံခံနိုင်စွမ်းတွေကို အနှောင့်အယှက် ပေးပြီး ဒီ နတ်မန္တန်ပြားကို လုယူဖို့ပဲ လို့ ငါ့ကို သေချာ မှာကြားထားခဲ့တာ လေ၊ မဟုတ်ဘူးဆိုရင်... မင်းက အခုအချိန်အထိ မင်းရဲ့ခန္ဓာကိုယ်ကို ဒီလောက် အေးအေးဆေးဆေးနဲ့ ထိန်းချုပ်ထားနိုင်ဦးမယ်လို့ မင်း တကယ်ပဲ ထင်နေတာလား"

စကားသံ ဆုံးသည်နှင့် တစ်ပြိုင်နက် နောက်တစ်ခဏတွင် ထိုက်ရှီ၏ ဘယ်ဘက် ဝမ်းဗိုက် အောက်ပိုင်း နေရာမှနေ၍၊ ကြီးမားကျယ်ပြန့်လှသော စွမ်းအင်ကြီးတစ်ခုမှာ ဒီရေလှိုင်းလုံးကြီးများအလား ရုတ်တရက် ပေါက်ကွဲထွက်ပေါ်လာခဲ့ပြီး၊ ထိုက်ရှီနှင့်အတူ ခန္ဓာကိုယ်၏ ထိန်းချုပ်ခွင့်ကို စတင် လုယူနေတော့သည်။

"အားးး"

အိပ်မက်ဆိုး သားရဲ၏ တိုက်ခိုက်မှု အောက်တွင် ထိုက်ရှီ၏ ခန္ဓာကိုယ် ကြီး တစ်ခုလုံးမှာ အဆက်မပြတ် တုန်ယင်နေပြီး လိမ်ကောက်သွားတော့သည်။ ပါးစပ်မှလည်း အလွန်အမင်း နာကျင်လှသော အော်ဟစ်သံကြီးတစ်ခု ထွက်ပေါ်လာတော့သည်။

အကယ်၍ ယခင်အချိန်များတွင် အိပ်မက်ဆိုး သားရဲ၏ တိုက်ခိုက်ခြင်းကို ခံရသည် ဆိုပါက၊ အိပ်မက်ဆိုး သားရဲ ကို အပြည့်အဝ ဖိနှိပ်ထားနိုင်ရန် သူ့တွင် လုံလောက်သော ယုံကြည်ချက် ရှိပေသည်။ သို့သော် ဝမ်ချောင်က သူ့ကို တိုက်ခိုက်လိုက်သော ထိုဓားချက်ကြီးမှာ သူ၏ ရုပ်ပိုင်းဆိုင်ရာ ခန္ဓာကိုယ်ကိုသာ ထိခိုက်ဒဏ်ရာ ရရှိသွားစေခဲ့ခြင်း မဟုတ်ဘဲ၊ သူ၏ စိတ်စွမ်းအင်များကိုပါ အလွန်အမင်း ကြီးမားလှသော ထိခိုက် ဒဏ်ရာများ ရရှိသွားစေခဲ့ရာ ယခင်ကကဲ့သို့ အစွမ်းထက်နေခြင်း လုံးဝရှိမနေတော့ပါချေ။

ဝိညာဉ်က ခန္ဓာကိုယ် တစ်ခုကို ဝင်ရောက် ပူးကပ်လိုက်သည့်အခါတွင် ရုပ်ပိုင်းဆိုင်ရာ ခန္ဓာကိုယ်၏ အားနည်းချက်များမှာ ဝိညာဉ်၏အားနည်းချက်များအဖြစ်သို့ ပြောင်းလဲသွားလေ့ ရှိပြီး၊ ထိခိုက် ဒဏ်ရာများ အားလုံးမှာလည်း အချင်းချင်း ကူးစက် ပြန့်နှံ့သွားလေ့ ရှိကြပေသည်။

"တိရစ္ဆာန်ကောင် မင်း ရဲလှချည်လား”

ဤအခိုက်အတန့်၌ ထိုက်ရှီ၏ ရင်ထဲ၌ အလွန်အမင်း ဒေါသထွက်နေတော့သည်။

အလွန်အမင်း မြင့်မားသော နေရာတွင် ရပ်တည်နေသည့် နတ်ဘုရား တစ်ပါးအဖြစ်၊ လောကကြီး အတွင်းရှိ သက်ရှိ သက်မဲ့ အရာရာတိုင်းကို လမ်းညွှန် ထိန်းချုပ်ပြီး မရေမတွက်နိုင်သော လုပ်ပိုင်ခွင့် အာဏာများကို ထိန်းချုပ်ထားနိုင်သော အလွန်အမင်း မြင့်မြတ် သန့်စင်သည့် တည်ရှိမှုကြီးတစ်ခု ဖြစ်လင့်ကစား၊ တိရစ္ဆာန် တစ်ကောင်၏ မိမိ ခန္ဓာကိုယ်ကို လုယူခြင်း ခံလိုက်ရသည်ဆိုခြင်းမှာ၊ ထိုက်ရှီအတွက်မူ လုံးဝခံပြင်း ဒေါသထွက်စရာ ကောင်းလှသော အရှက်ခွဲမှု ကြီးတစ်ခုပင် ဖြစ်တော့သည်။

ထို”က်ရှီ... မင်း အခုထိ နားမလည်သေးဘူးလား။ နောက်တစ်ကြိမ်ဆိုတာ လုံးဝ မရှိတော့ဘူး။ ဒီစစ်ပွဲကနေ မင်း လုံးဝ ထွက်ပြေးလွတ်မြောက်နိုင်မှာ မဟုတ်ဘူးလို့ ငါ အစောကြီးကတည်းက ပြောထားခဲ့တယ် မဟုတ်လား"

ဝမ်ချောင်က အေးဆေးတည်ငြိမ်စွာဖြင့် ဆိုလိုက်သည်။ စကားပြောနေရင်းဖြင့် ရှေ့သို့ ဖြည်းညင်းစွာ ခြေလှမ်း လှမ်းလာတော့သည်။

စကားပြောနေသည့် အချိန်လေး အတွင်းမှာပင် ဝမ်ချောင်၏ စိတ်ဆန္ဒ တစ်ချက် လှုပ်ရှားသွားခဲ့ပြီး ကြီးမားကျယ်ပြန့်လှသော စိတ်စွမ်းအင်များ ပေါက်ကွဲထွက်ပေါ်လာကာ၊ နောက်တစ်ကြိမ် ထပ်မံ၍ ကြယ်တာရာများ၏ စကြဝဠာကို ဖန်တီးလိုက်ပြီး ထိုက်ရှီ၏ ဦးနှောက်ထဲသို့ အပြင်းအထန် တိုက်ခိုက်လိုက်တော့သည်။

အားးး... ဝမ်ချောင်နှင့် အိပ်မက်ဆိုး သားရဲ တို့ နှစ်ဦးစလုံး၏ အရှေ့အနောက် ညှပ်ပိတ် တိုက်ခိုက်မှုအောက်တွင်၊ နောက်ဆုံးတွင် ထိုက်ရှီအနေဖြင့် ဆက်လက်၍ တောင့်ခံထားနိုင်စွမ်း လုံးဝရှိမနေတော့ပါချေ။

ထိုက်ရှီ၏မျက်နှာ တစ်ခုလုံးမှာ ရှုံ့တွသွားခဲ့ပြီး နောက်ထပ် မျက်နှာတစ်ခု ရုတ်တရက် ပေါ်ထွက်လာသည်ကို မြင်တွေ့လိုက်ရသည်၊ နောက်တစ်ခဏတွင် ကြီးမားကျယ်ပြန့်လှသော ဝိညာဉ်လှိုင်းဂယက်များ အပြည့်အဝ ပါဝင်နေသည့် အနက်ရောင် အငွေ့ ကြီးတစ်ခုမှာ၊ ထိုက်ရှီ၏ကိုယ်တွင်းမှနေ၍ ဟင်းလင်းပြင်ကြီးကို ဖောက်ထွက်ကာ ရုတ်တရက် ပေါက်ကွဲထွက်ပေါ်လာတော့သည်။

အိပ်မက်ဆိုး သားရဲ၏ အဆက်မပြတ် တိုက်ခိုက်မှုများအောက်တွင် ထိုက်ရှီမှာ နောက်ဆုံးတွင် ဤရုပ်ပိုင်းဆိုင်ရာ ခန္ဓာကိုယ်၏ ထိန်းချုပ်ခွင့်ကို လုံးဝအပြည့်အဝ ဆုံးရှုံးသွားခဲ့ပြီဖြစ်ပြီး၊ ခန္ဓာကိုယ်၏ အပြင်ဘက်သို့ အတင်းအကျပ် မောင်းထုတ်ခံလိုက်ရပြီဖြစ်၏။

ခန္ဓာကိုယ်၏ အပြင်ဘက်သို့ အတင်းအကျပ် ညှစ်ထုတ်ခံလိုက်ရသည့် မျက်တောင်တစ်ခတ်အတွင်းမှာပင်၊ ထိုက်ရှီ၏ ဝိညာဉ် မှနေ၍ ပြောင်းလဲ ဖန်တီးထားသော ထိုအနက်ရောင် အငွေ့ ကြီးမှာ လေးသံ ကြားရုံဖြင့် လန့်နေသော ငှက် တစ်ကောင်အလား အဝေးဆီသို့ အလွန်အမင်း အထိတ်တလန့်ဖြင့် လျင်မြန်စွာ ထွက်ပြေးသွားတော့သည်။

သို့သော် နောက်တစ်ခဏတွင် ဟင်းလင်းပြင်ကြီး တုန်ခါသွားခဲ့ပြီး စက်ဝိုင်းပုံသဏ္ဌာန် ရှိသော ဟင်းလင်းပြင်နှင့် အချိန် အတားအဆီး နံရံကြီး တစ်ခုမှာ မြေပြင်မှနေ၍ ရုတ်တရက် ပေါ်ထွက်လာကာ ထိုက်ရှီ၏သွားရာ လမ်းကြောင်းကို ချက်ချင်း တားဆီးလိုက်တော့သည်။ ၎င်း၏ အနောက်တွင် ဒုတိယမြောက်၊ တတိယမြောက်... စသည်ဖြင့် အဆက်မပြတ် ပေါ်ထွက်လာတော့သည်။

"ထိုက်ရှီ... ဒီလို အခြေအနေမျိုးအထိ ရောက်နေပြီကို မင်းကိုယ်မင်း ထွက်ပြေး လွတ်မြောက်နိုင်ဖို့ အခွင့်အရေး ရှိသေးတယ် လို့ တကယ်ပဲ ထင်နေတာလား?"

ဝမ်ချောင်က အေးစက်စက် ဖြင့် လှောင်ပြောင် ရယ်မောလိုက်တော့သည်။

သူတို့နှစ်ဦး စကားပြောဆိုနေကြသည့် အချိန်ကတည်းက ဝမ်ချောင်သည် ဘေးပတ်ဝန်းကျင် အရပ်မျက်နှာ အားလုံးတွင် ဟင်းလင်းပြင်နှင့် အချိန် စက်ကွင်း များကို တစ်ခုပြီးတစ်ခု အသံတိတ် အနံ့တိတ်ဖြင့် လျှို့ဝှက်စွာ နေရာချထားခဲ့ပြီး ဖြစ်သည်။ ကောင်းကင်ယံ မှနေ၍ အပေါ်စီးမှ ငုံ့ကြည့်လိုက်မည် ဆိုပါက ဝမ်ချောင်ကို ဗဟိုပြု၍ အမည်းရောင်နှင့် ရွှေရောင် ဟင်းလင်းပြင်နှင့် အချိန် စက်ကွင်းများမှာ၊ ဝင်္ကပါကြီးတစ်ခုအလား ဤနေရာတစ်ခုလုံးကို လုံးဝချုပ်နှောင် ပိတ်ဆို့ထားသည်ကို မြင်တွေ့ရမည် ဖြစ်သည်။

ဝမ်ချောင်၏ ဆံပင်ရှည်ကြီးများမှာ လေထဲတွင် တလွင့်လွင့် လွင့်ပျံနေခဲ့သည်၊ ဤအမည်းရောင်နှင့် ရွှေရောင် ဟင်းလင်းပြင်နှင့် အချိန် စက်ကွင်း များ၏ အလင်းရောင် အောက်တွင် ဝမ်ချောင်မှာ အစစ်အမှန် နတ်ဘုရား တစ်ပါး အလားဖြစ်နေခဲ့ပြီး လူတိုင်းကို ကြောက်ရွံ့ ရိုသေသွားစေရန် လုံလောက်ပေသည်။

အရာရာတိုင်းကို ကြိုတင် စီစဉ် တွက်ချက်ထားပြီးမှ လှုပ်ရှားခြင်းပင် ဖြစ်သည်။ ထိုက်ရှီအနေဖြင့် ယခု အချိန်အထိ ထွက်ပြေး လွတ်မြောက်နိုင်မည်ဟု ထင်မှတ်နေခြင်းမှာ အလွန်အမင်း ရူးသွပ်လွန်းလှသော စိတ်ကူးယဉ် အိပ်မက်တစ်ခု သက်သက်သာ ဖြစ်ပေသည်

အခြားတစ်ဖက်တွင်မူ ထိုက်ရှီမှာ ထွက်ပြေး လွတ်မြောက်ရန်လမ်း လုံးဝမရှိတော့ကြောင်းကို မြင်တွေ့လိုက်ရသည့်အခါ ရင်ထဲ၌ အလွန်နက်ရှိုင်းလှသော မျှော်လင့်ချက် ကင်းမဲ့မှုများ ရုတ်တရက် ပေါ်ထွက်လာတော့သည်။ သို့သော် ထိုအရာများထက် ပိုမို များပြားနေသည်မှာ အမုန်းတရားများနှင့် ဒေါသထွက်နေမှုများသာလျှင် ဖြစ်ပေသည်။

"အဆင့်မရှိတဲ့ ပုရွက်ဆိတ်ကောင်ကများ မင်းက ငါ့ရဲ့ ရုပ်ပိုင်းဆိုင်ရာ ခန္ဓာကိုယ်ကို နှစ်ကြိမ်တိုင်တိုင် ဖျက်ဆီးပစ်ခဲ့တယ်၊ ငါ့အနေနဲ့ လုံးဝထွက်ပြေး လွတ်မြောက်နိုင်မှာ မဟုတ်ဘူး ဆိုမှတော့ မင်းလည်း အေးအေးဆေးဆေး နေရဖို့ မစဉ်းစားနဲ့…ငါနဲ့ အတူတူ သေလိုက်ကြစမ်း”

ထိုက်ရှီ၏ ပြင်းထန်လွန်းလှသော အမုန်းတရားများ ပြည့်နှက်နေသော အသံကြီးမှာ ဟင်းလင်းပြင်ကြီး အတွင်း၌ ပဲ့တင်ထပ်သွားတော့သည်။ စကားသံ ဆုံးသည်နှင့် တစ်ပြိုင်နက် ဘုန်းခနဲ မြည်သံနှင့်အတူ အနက်ရောင် အငွေ့များမှာ ရုတ်တရက် ပေါက်ကွဲထွက်ပေါ်လာခဲ့ပြီး၊ ထိုက်ရှီ၏ ဝိညာဉ် အနက်ရှိုင်းဆုံးသော နေရာ မှနေ၍ အလင်းတန်း တစ်ချက် ရုတ်တရက် ပေါက်ကွဲထွက်ပေါ်လာတော့သည်။

အလင်းစက်ဝန်း။

ဝမ်ချောင်မှာ တစ်ချက် ကြည့်လိုက်ရုံ ဖြင့်ပင် မျက်နှာအမူအရာ ချက်ချင်း ပြောင်းလဲသွားတော့သည်။

ထိုက်ရှီမှာ ရုပ်ပိုင်းဆိုင်ရာ ခန္ဓာကိုယ်၏ အပြင်ဘက်သို့ အတင်းအကျပ် မောင်းထုတ်ခံလိုက်ရပြီး ဝိညာဉ် ထွက်ပြေး လွတ်မြောက်လာခဲ့သည့်အချိန်တွင်၊ အမြဲတမ်း ခေါင်းနောက်တွင် ထားရှိလေ့ ရှိသော ထိုအလင်းစက်ဝန်း နတ်လက်နက်ကြီးကိုပါ တစ်ပါတည်း ယူဆောင်လာခဲ့ခြင်း ပင် ဖြစ်နေတော့သည်။

နတ်လက်နက်ကြီး၏ အတွင်း၌ ရှိနေသော မန္တန် အတားအဆီးတစ်ခုခုကို အသက်သွင်းလိုက်သည့်အလား၊ ဤအခိုက်အတန့်၌ မူလက အလင်းရောင်များ မှေးမှိန်နေပြီး မူလ အရွယ်အစား၏ ငါးပုံတစ်ပုံခန့်သာ ကျန်ရှိတော့သော ထိုအလင်းစက်ဝန်း ကြီးမှာ ရုတ်တရက် အလွန်အမင်း တောက်ပ လင်းလက်လာခဲ့ပြီး၊ မူလ အရွယ်အစား အတိုင်း ချက်ချင်း ကြီးမားလာတော့သည်။ ဤမျှသာမက အလင်းစက်ဝန်း ကြီး၏ အနက်ရှိုင်းဆုံးသော နေရာ တွင်လည်း တောက်ပသော အနီရောင်များ ရုတ်တရက် ပေါက်ကွဲထွက်ပေါ်လာတော့သည်။

အန္တရာယ် ရှိတယ်။

ဝမ်ချောင်၏ ရင်ထဲ၌ တင်းကျပ်သွားခဲ့ပြီး မသိစိတ်အရပင်လျှင် အနောက်သို့ လျင်မြန်စွာ ဆုတ်ခွာလိုက်တော့သည်။ ထိုက်ရှီတွင် ဤကဲ့သို့သော နည်းလမ်း မျိုး ရှိနေလိမ့်မည် ဟု သူ လုံးဝတွေးတောထားခဲ့ခြင်း မရှိပါချေ။ ထိုက်ရှီ၏ ဝိညာဉ်၏ ခိုင်မာမှု အတိုင်းအတာအရ ကြည့်မည်ဆိုပါက ဤနတ်လက်နက်ကြီးနှင့်တကွ အားလုံး တစ်ပြိုင်နက်တည်း မိမိကိုယ်ကို ဖောက်ခွဲလိုက်မည်ဆိုပါက၊ ထိုပေါက်ကွဲမှု၏ ခွန်အားမှာ မိမိကိုယ်ကို အလွန်အမင်း ကြီးမားလှသော အန္တရာယ် ကြီးတစ်ခုသေချာပေါက် ဖြစ်ပေါ်လာစေမည်မှာ အမှန်ပင် ဖြစ်တော့သည်။

"ကောင်လေး... ငါနဲ့ အတူတူ သေလိုက်စမ်း"

ထိုက်ရှီ၏ ရူးသွပ်နေသော အသံကြီးမှာ ကောင်းကင်ယံ သို့တိုင်အောင် ပဲ့တင်ထပ်သွားတော့သည်။ အလင်းစက်ဝန်းကြီး ပေါ်ထွက်လာသည့် မျက်တောင်တစ်ခတ် အတွင်းမှာပင် ထိုက်ရှီ၏ဝိညာဉ်မှာ ပေါက်ကွဲတော့မည့် အလင်းစက်ဝန်း ကြီးကို ရစ်ပတ်လျက်၊ လျှပ်စီးများ နှင့် မိုးကြိုးများအလား လျင်မြန်စွာဖြင့် ဝမ်ချောင်ရှိရာ အရပ်ဆီသို့ တိုက်ရိုက် တဟုန်ထိုး ပြေးဝင်လာတော့သည်။

"ပုရွက်ဆိတ်လေး… မင်း အရမ်းအစွမ်းထက်တဲ့ ခွန်အားတွေကို ရရှိထားရင်တောင်မှ ဘာဖြစ်လဲ"

"ဒါက နတ်ဘုရားတွေကို သတ်ဖြတ်ဖို့ ကြိုးစားတဲ့ အတွက် ပေးဆပ်ရတဲ့ ရလဒ်ပဲ"

"ဒါက နတ်ဘုရား တွေရဲ့ ကျိန်စာပဲကွ"

ထိုအခိုက်အတန့်၌ ထိုက်ရှီ၏ရင်ထဲတွင် အလွန်ရူးသွပ်နေခဲ့သလို၊ အလွန်လည်းဝမ်းသာ ပျော်ရွှင်နေတော့သည်။

"သခင်... ငါ့ကို လွှဲထားလိုက်ပါ"

ထိုက်ရှီအလွန်အမင်း ရူးသွပ်နေသည့် အချိန်လေး အတွင်းမှာပင် အသံတစ်ခုမှာ ဟင်းလင်းပြင်ကြီး အတွင်း၌ ရုတ်တရက် ထွက်ပေါ်လာတော့သည်။ ထိုက်ရှီ၏ ရင်ထဲ၌ တင်းကျပ်သွားခဲ့ပြီး သူ တုံ့ပြန်ရန် အချိန်ပင် မရလိုက်မီမှာပင်၊ ရုတ်တရက် ဘုန်းခနဲ မြည်သံနှင့်အတူ လက်နှစ်ဖက်မှာ ဟင်းလင်းပြင်ကြီး အတွင်းမှနေ၍ ရုတ်တရက် ထွက်ပေါ်လာခဲ့ပြီး၊ ထိုက်ရှီ၏ ဝိညာဉ်နှင့် ထိုအလင်းစက်ဝန်း ကြီးကို ချက်ချင်း ဖမ်းဆုပ်လိုက်တော့သည်။

ထိုလက်နှစ်ဖက် မှနေ၍ ပေးစွမ်းလာသော ခွန်အားများကို ခံစားသိရှိလိုက်ရသည့်အခါ ထိုက်ရှီ၏ ရင်ထဲ၌ အသက်ရှူ ရပ်သွားမတတ်ဖြစ်သွားခဲ့ပြီး ဝိညာဉ်ပင်လျှင် ရပ်တန့်သွားမတတ် ဖြစ်သွားတော့သည်။

******