အခန်း ၁၅၂၆

အခန်း ၁၅၂၆ ဖုန်းဘေလ်ဖြင့် ရန်ပုံငွေ ဝယ်ယူခြင်း

ရှေးခေတ် ငွေကြေးလုပ်ငန်းများတွင် တစ်စုံတစ်ယောက်က မိမိထံ၌ ငွေလာအပ်နှံပါက မိမိက ၎င်းအတွက် သိမ်းဆည်းပေးရသဖြင့် ထိုသူက မိမိအား ငွေပေးရလေသည်။ ၎င်းမှာ သိမ်းဆည်းခပင် ဖြစ်၏။

သို့သော် နောက်ပိုင်းတွင် ငွေကြေးလုပ်ငန်းများ ပိုမိုများပြားလာသည်နှင့်အမျှ ငွေလာအပ်သူများကို ငွေပြန်ပေးသည့်သူများ စတင်ပေါ်ပေါက်လာခဲ့သည်။ အဘယ်ကြောင့်ဆိုသော် သူက အခြားသူများ အပ်နှံထားသောငွေကိုယူ၍ ချေးငွေထုတ်ပေးလုပ်ငန်း လုပ်ကိုင်သောကြောင့် ရရှိသည့်အတိုးက ပိုများသောကြောင့်ပင် ဖြစ်သည်။

သင်က တစ်သန်းအပ်နှံလျှင်၊ သူက နှစ်စဉ် သင့်အား အတိုး နှစ်သောင်းပေးမည်။ သို့သော် သူက ဤတစ်သန်းကို ချေးငွေထုတ်ပေးလိုက်ပါက နှစ်စဉ် အတိုး လေးသောင်း ပြန်ရနိုင်လေရာ၊ ဤနှစ်သောင်း ကွာဟချက်မှာ သူရရှိသည့် အမြတ်ပင် ဖြစ်သည်။

ဘဏ်မှလွဲ၍ မည်သူက ဤမျှများပြားသော ငွေသားအရန်ထားရှိမှုမျိုး လိုအပ်မည်နည်း။ ဘဏ်ဖြစ်နေလျှင်ပင် ထိုမျှလောက် အများကြီး သိမ်းဆည်းထားမည် မဟုတ်ပေ။ ၎င်းတို့၏ အများစုမှာလည်း ဂဏန်းသင်္ချာများသာ ဖြစ်ကြသည်။ သင်က များပြားသော ငွေသားများကို လိုချင်ပါက ရနိုင်သော်လည်း၊ အရင်ဆုံး ဖုန်းဆက်၍ ကြိုတင်ချိန်းဆိုရပေမည်။

ငွေအများကြီး မြတ်ချင်ပါက ပထမဆုံး သင့်ထံတွင် ငွေအများကြီး ရှိရန်လိုအပ်သည်။

အခြေခံပမာဏ ကြီးမားမှသာ အမြတ်အစွန်း များများရနိုင်ပေမည်။ သင့်ထံတွင် အရင်းအနှီး ဆယ်ကျပ်သာရှိပါက ထီဝယ်ခြင်းမှလွဲ၍ မည်သို့လုပ်ကာ တရားဝင် တစ်ညတည်းဖြင့် တစ်သန်း မြတ်နိုင်မည်နည်း။

သို့သော် သင့်ထံတွင် တစ်ကုဋေရှိနေပါက တစ်ညတည်းဖြင့် တစ်သန်းမြတ်နိုင်သော နည်းလမ်းများစွာ ရှိသွားပြီဖြစ်သည်။ ငွေကြေးလုပ်ငန်း နယ်ပယ်ထဲတွင် အထူးသဖြင့် ဤသို့သော လုပ်ဆောင်မှုများကို ကျွမ်းကျင်ကြပေသည်။

Yi Dong ကုမ္ပဏီက ယခုတစ်ကြိမ်တွင် အရှုံးပေါ်သွားသယောင် ထင်ရလေသည်။ အနည်းဆုံး ဤသို့တွက်ကြည့်လျှင် ဆယ့်ရှစ်လမှ သုံးဆယ်လအထိ ဖုန်းဘေလ် ပြန်အမ်းပေးရခြင်းနှင့် ဖုန်း၏ ဈေးနှုန်းကိုပါ ထည့်တွက်လိုက်ပါက သူတို့ အများကြီး ရှုံးသွားရလိမ့်မည် ဖြစ်သည်။

သို့သော် သူတို့ ကြိုတင်ကောက်ခံထားသော ဖုန်းဘေလ်များကို ဤတစ်နှစ်ခွဲမှ နှစ်နှစ်ခွဲအထိ ရင်းနှီးမြှုပ်နှံမှုမှ ရရှိလာနိုင်မည့် အမြတ်အစွန်းများကိုပါ ထည့်တွက်လိုက်မည်ဆိုပါက ထိုအရာက အရှုံးမဟုတ်တော့ဘဲ အမြတ်ဖြစ်သွားလေပြီ။

Yi Dong ကုမ္ပဏီအနေဖြင့် အလွန်စိတ်ချရသော နိုင်ငံတော်ငွေတိုက်စာချုပ်များကိုသာ ဝယ်ယူခဲ့မည်ဆိုလျှင်ပင် အမြတ်အစွန်းရှိရန် သေချာနေပြီဖြစ်သည်။ အကယ်၍ အခြားအရာများတွင် ရင်းနှီးမြှုပ်နှံခဲ့မည်ဆိုပါက ဥပမာအားဖြင့် စတော့ရှယ်ယာ စသည်တို့ဆိုပါက အမြတ်အစွန်းက ပို၍ပင်မြင့်မားနိုင်သေးသည်။

ထို့အပြင် ဤအမြတ်အစွန်း အစိတ်အပိုင်းသည် ရှုံးသွားသောငွေများထက် အများကြီး ပိုများလေသည်။ တစ်နည်းအားဖြင့် ပြောင်းလဲ၍ နားလည်ကြည့်၍ ရနိုင်ကောင်းသည်။ ယင်းမှာ ရန်ပုံငွေကောက်ခံခြင်း တစ်မျိုးပင် ဖြစ်၏။

လုရှောက်သည်လည်း ဤသီအိုရီကို အားကိုး၍ အထက်မှ ခေါင်းဆောင်များကို ဖြောင်းဖျနိုင်ခဲ့ခြင်းဖြစ်ပြီး၊ ဤသို့လုပ်ဆောင်ခြင်းကို သဘောတူစေခဲ့သည်။ ဤငွေကို ရင်းနှီးမြှုပ်နှံရန် သုံးသည်ဖြစ်စေ၊ အခြားကိစ္စများလုပ်ရန် သုံးသည်ဖြစ်စေ၊ လက်ထဲသို့ အရင်ရောက်လာပါက မည်သို့ပင်ဖြစ်စေ မရှုံးနိုင်ပေ။

သို့သော် လုရှောက်က ဤငွေကို အမြတ်အစွန်းအဖြစ် သတ်မှတ်၍ တိုက်ရိုက် အထက်သို့ ပေးသွင်းရန် မရည်ရွယ်ထားပေ။ သူက ဤငွေကို ရင်းနှီးမြှုပ်နှံမှုလုပ်ရန်သာ ဆုံးဖြတ်ထားသည်။ ဤသို့ဆိုလျှင် စာရင်းဇယားအရလည်း ငွေမြတ်မည်ဖြစ်ပြီး၊ သူ၏ နိုင်ငံရေးစွမ်းဆောင်ရည်ကလည်း ပို၍လှပလာမည်ဖြစ်သည်။

မည်သည့်အရာကို ရင်းနှီးမြှုပ်နှံရမည်ဆိုသည်ကိုမူ သေသေချာချာ စဉ်းစားသုံးသပ်ရန် လိုအပ်ပေသည်။ နိုင်ငံတော်ငွေတိုက်စာချုပ်တွင် ရင်းနှီးမြှုပ်နှံခြင်းက အတည်ငြိမ်ဆုံးပင်ဖြစ်သည်။ လက်ရှိ နိုင်ငံတော်ငွေတိုက်စာချုပ် အတိုးနှုန်းအရဆိုလျှင် မရှုံးနိုင်ကြောင်းကို အာမခံရန် လုံလောက်သော်လည်း၊ သက်တမ်းက အရမ်းရှည်လွန်းနေသည်။

ဘဏ်တွင် ငွေအပ်ရန်ကိုမူ သေချာပေါက် ရွေးချယ်မည် မဟုတ်ပေ။ သို့သော် စတော့ရှယ်ယာဈေးကွက်တွင် ရင်းနှီးမြှုပ်နှံရန်ကလည်း စည်းမျဉ်းစည်းကမ်းများနှင့် သိပ်မကိုက်ညီသကဲ့သို့ ဖြစ်နေသည်။ သို့ဆိုလျှင် ကျန်နေသော ရွေးချယ်စရာမှာ ရန်ပုံငွေ တစ်ခုသာ ရှိတော့သည်။

......

"လုရှောက်၊ မင်းက ငါ့ကုမ္ပဏီက ထုတ်ဝေတဲ့ ရန်ပုံငွေကို ဝယ်ဖို့ သေချာသွားပြီလား” ဖုန်းယွီက လုရှောက် ကို အကြံဉာဏ်ပေးခဲ့ခြင်း ဖြစ်သော်လည်း၊ လုရှောက်က သူ့ထံသို့ပင် ထပ်၍ ရောက်လာလိမ့်မည်ဟု မထင်ထားခဲ့ပေ။

"သေချာတာပေါ့၊ မင်းကုမ္ပဏီရဲ့ လက်အောက်မှာရှိတဲ့ အတိုင်ပင်ခံကုမ္ပဏီ နှစ်ခုရဲ့၊ အဲ့ဒီ ရင်းနှီးမြှုပ်နှံမှု အကျိုးအမြတ်ရရှိနှုန်းကိုတော့၊ အားလုံးက မျက်မြင်ကိုယ်တွေ့ပဲလေ။ ဒီငွေကို မင်းကုမ္ပဏီမှာထားပြီး၊ မင်းတို့ကို ရင်းနှီးမြှုပ်နှံခိုင်းမယ်ဆိုရင်၊ အထက်က သဘောတူချင်မှ တူလိမ့်မယ်။ ဒါပေမဲ့ မင်းတို့ကုမ္ပဏီက ထုတ်ဝေတဲ့ ရန်ပုံငွေကို ဝယ်တာကတော့၊ ဒီအချက်က လုံးဝပြဿနာမရှိဘူး” လုရှောက်က မျက်နှာထားတည်တည်ဖြင့် ပြောလိုက်သည်။

သူက လက်အောက်ငယ်သားများ၊ အိမ်မှလူများနှင့် အချိန်အကြာကြီး တိုင်ပင်ဆွေးနွေးခဲ့ပြီး၊ ဤသို့လုပ်ဆောင်ခြင်းက အလုံခြုံဆုံးပင် ဖြစ်သည်။ ထို့အပြင် လုမိသားစုကလည်း ဖုန်းယွီသည် လုရှောက်အပေါ်တွင် နိုင်ငံရေးရင်းနှီးမြှုပ်နှံမှု လုပ်နေသည်ဟု ယူဆထားသောကြောင့်၊ သူ့အား ဒုက္ခပေးမည် မဟုတ်ဟု ထင်ကြလေသည်။

ဖုန်းယွီ၏နာမည်ဂုဏ်သတင်းကို အားကိုး၍ သူရှယ်ယာအများစုပိုင်ဆိုင်ထားသော ကုမ္ပဏီတွင် ရင်းနှီးမြှုပ်နှံခြင်းကို မည်သူကမျှ ကန့်ကွက်မည် မဟုတ်ပေ။ လူများစွာက ရင်းနှီးမြှုပ်နှံချင်သည်တိုင်အောင် ရင်းနှီးမြှုပ်နှံ၍ မရကြပေ။

"ဒါဆိုရင် မင်းက ဘယ်လိုရန်ပုံငွေ အမျိုးအစားကို ဝယ်ချင်တာလဲ။ ငါတို့က စာချုပ်ပုံစံ ရန်ပုံငွေကိုပဲ ထုတ်ဝေနိုင်တယ်” ကုမ္ပဏီတွင် မူလကတည်းက ရန်ပုံငွေ ရှိပြီးသားဖြစ်ရာ Yi Dongအား ရင်းနှီးမြှုပ်နှံခွင့်ပေးလိုက်ခြင်းကလည်း ကိစ္စမရှိပေ။ ၎င်းအပြင် ဖုန်းယွီ၏ အတိုင်ပင်ခံကုမ္ပဏီကလည်း ပို၍ အမြတ်ရနိုင်သေးသည်။

လုရှောက်၏ မျက်နှာတစ်ခုလုံး ကြောင်အမ်းအမ်းဖြစ်သွားပြီး "ရန်ပုံငွေက ပုံစံအများကြီး ခွဲထားသေးတာလား”

ဖုန်းယွီမှာ အနည်းငယ် ပြောစရာစကားမဲ့သွားပြီး ‘အရူးကောင် မင်းက ရန်ပုံငွေဆိုတာ ဘာလဲဆိုတာကိုတောင် တစိတ်တပိုင်းပဲ နားလည်ထားပြီးတော့များ၊ ရင်းနှီးမြှုပ်နှံမယ်ဆိုပြီး အော်ဟစ်နေတာလား။ ရင်းနှီးမြှုပ်နှံမှုလုပ်ရာမှာ အဆိုးရွားဆုံး ရှုံးတတ်တာက ပုံမှန်အားဖြင့် မင်းတို့လို လူမျိုးတွေပဲ။’

"ဘယ်လိုပဲဖြစ်ဖြစ် ဒါက စာချုပ်ပုံစံရှိတဲ့ ရန်ပုံငွေ တစ်မျိုးပဲ၊ ငါတို့တွေ စာချုပ်ချုပ်ဆိုမယ်၊ မင်းက ငွေကို ငါ့ကုမ္ပဏီကို ပေး၊ ပြီးရင် ငါတို့က မင်းတို့ကို အကျိုးခံစားခွင့် လက်မှတ်တစ်စောင် ထုတ်ပေးမယ်၊ နောင်ကျရင် ဒီလက်မှတ်ကတစ်ဆင့် ငါတို့ဆီကိုလာပြီး ငွေလာလဲလို့ရတယ်”

"မင်းတို့က ရင်းနှီးမြှုပ်နှံသူတွေဖြစ်ပြီး၊ ငါတို့က စီမံခန့်ခွဲသူတွေဖြစ်တယ်၊ ငါတို့ကြားမှာ အာမခံချက်ပေးတဲ့ အပ်နှံခံအဖွဲ့အစည်းကတော့ Min Sheng Bankပဲ။ ထားလိုက်ပါတော့၊ ဒါတွေကို မင်းကို ပြောပြနေလည်း မင်းနားလည်မှာ မဟုတ်ပါဘူး”

"ဒီလိုလုပ်ရအောင်၊ ငါတို့ရဲ့ ဒီရန်ပုံငွေကို အသေးစိတ် ထပ်ခွဲထားသေးတယ်၊ အဲ့ဒီထဲမှာ စတော့ရန်ပုံငွေ၊ ငွေတိုက်စာချုပ်ရန်ပုံငွေ၊ ငွေကြေးရန်ပုံငွေနဲ့ အနာဂတ်ကုန်သွယ်မှုရန်ပုံငွေတို့ ပါဝင်တယ်။ အဲ့ဒီအထဲက စတော့ရန်ပုံငွေနဲ့ အနာဂတ်ကုန်သွယ်မှုရန်ပုံငွေက မင်းကို ငါဝယ်ဖို့ အကြံပေးချင်တဲ့အရာတွေဖြစ်ပြီး၊ ငါ့ကုမ္ပဏီက အဓိက ထုတ်ဝေတဲ့အရာတွေလည်းဖြစ်တယ်၊ အကျိုးအမြတ်ကလည်း ပိုများတယ်။ တခြား နှစ်မျိုးကတော့ ထုတ်ဝေတဲ့ ပမာဏ သိပ်မကြီးသလို၊ အကျိုးအမြတ်ကလည်း သာမန်ပါပဲ”

စတော့ရှယ်ယာနှင့် အနာဂတ်ကုန်သွယ်မှုဆိုသည်မှာ ဖုန်းယွီလက်အောက်တွင်ရှိသော အတိုင်ပင်ခံကုမ္ပဏီ နှစ်ခု၏ အဓိက ရင်းနှီးမြှုပ်နှံသည့် လားရာများလည်း ဖြစ်သည်။ အရင်ဘဝကတည်းက ဖုန်းယွီသည် ငွေတိုက်စာချုပ်များနှင့် သိပ်မထိတွေ့ခဲ့ဖူးပေ။ လုပ်နိုင်သည်ဆိုသော်ငြား အားသာချက် အများကြီး လျော့နည်းနေလေသည်။ ကုမ္ပဏီတွင်တော့ ပွဲစားများက ကိုင်တွယ်လှုပ်ရှားပေးနေခြင်း ရှိသော်လည်း နှမြောစရာကောင်းသည်မှာ သိပ်မမြတ်ပေ။

ငွေကြေးဆိုသည်ကိုမူ အမြဲတမ်း စောင့်ကြည့်နေရန် လိုအပ်သည်။ အဘယ်ကြောင့်ဆိုသော် ယခုအချိန်တွင် ငွေကြေးအများစု၏ ငွေလဲလှယ်နှုန်းများသည် သိပ်ကြီးမားသော အတက်အကျမျိုး ဖြစ်ပေါ်လေ့မရှိပေ။ အရင်းရှင်ကြီးများ ဝင်ရောက်စွက်ဖက်ခြင်းမျိုး ရှိခဲ့လျှင်လွဲ၍ဖြစ်သည်။ ဥပမာပြောရလျှင် အရင်တုန်းက ဆိုရော့စ်အဖွဲ့မျိုးဖြစ်သည်။

သို့သော် လက်ရှိအခြေအနေအရဆိုလျှင် စတော့ရှယ်ယာဖြစ်စေ အနာဂတ်ကုန်သွယ်မှုဖြစ်စေ ငွေမြတ်မည်ဆိုသည်ကို အာမခံနိုင်သည်။ ရေရှည်ရင်းနှီးမြှုပ်နှံမှုလုပ်မည်ဆိုပါက နည်းနည်းလေး ကျဆင်းသွားသည်နှင့် စိုးရိမ်ထိတ်လန့်နေစရာ မလိုဘဲ ပေါ့ပေါ့ပါးပါးနှင့် စိတ်ချရလေသည်။

"အဲဒီစတော့ရန်ပုံငွေဆိုတာက စတော့ရှယ်ယာတွေကိုပဲ ရင်းနှီးမြှုပ်နှံတာဖြစ်ပြီး၊ အနာဂတ်ကုန်သွယ်မှုရန်ပုံငွေဆိုတာက အနာဂတ်ကုန်သွယ်မှုတွေကိုပဲ ရင်းနှီးမြှုပ်နှံတာ မဟုတ်လား” လုရှောက်က အသေးစိတ် မေးမြန်းလိုက်သည်။

"နာမည်ကြည့်လိုက်တာနဲ့ သိနိုင်တဲ့အတိုင်း၊ အဲ့ဒီလိုပါပဲ”

"အဲ့ဒီလို ရောနှောထားတဲ့ အမျိုးအစားမျိုး ရှိလို့မရဘူးလား။ မင်းတို့က အခြေအနေကြည့်ပြီး ရင်းနှီးမြှုပ်နှံမယ်၊ ပြီးရင် အမြင့်ဆုံးနှုန်းထားနဲ့ ငါတို့ကို ပေးလေ”

ဖုန်းယွီက မျက်စောင်းထိုးလိုက်ပြီး "မင်းစဉ်းစားထားတာက တော်တော်လှပနေပါလား။ ဒါဆိုရင် ငါ့ကုမ္ပဏီမှာရှိတဲ့ ပညာရှင်အဆင့် ပွဲစားတွေ အများကြီးနဲ့၊ သတင်းအချက်အလက်တွေကို သီးသန့် စုဆောင်းပေးနေတဲ့ ဝန်ထမ်းတွေ အများကြီးက အလကား အလုပ်လုပ်ပေးရမှာလား၊ ငွေတွေကို မင်းပဲ မြတ်သွားမှာပေါ့ ဟုတ်လား”

"မဟုတ်ပါဘူး၊ မင်းတို့မှာလည်း ပွဲခရတာပဲ မဟုတ်ဘူးလား၊ မင်းတို့ရဲ့ ပွဲခက ဒီလုပ်ငန်းနယ်ပယ်မှာ အမြင့်ဆုံး မဟုတ်ဘူးလား” လုရှောက်က ငါအကုန်နားလည်တယ်၊ မင်းငါ့ကို လိမ်လို့မရဘူး ဆိုသည့် မျက်နှာထားဖြင့် ပြောလိုက်သည်။

ဤသို့ တစိတ်တပိုင်းသာ နားလည်ထားပြီး၊ မိမိကိုယ်ကိုယ် အကုန်သိသည်ဟု ထင်နေသူများကို ရှင်းပြရခြင်းက အရှုပ်ထွေးဆုံးပင် ဖြစ်သည်။

ဖုန်းယွီသည် အလွယ်ကူဆုံး ရှင်းပြမှုတစ်ခု ပြုလုပ်ရန် ဆုံးဖြတ်လိုက်သည်။ "မင်းပြောတဲ့ အဲဒီလို ရန်ပုံငွေမျိုး ငါတို့ဆီမှာ မရှိဘူး၊ ဒါပေမဲ့ တိုက်ရိုက် ရင်းနှီးမြှုပ်နှံလို့တော့ ရတယ်၊ မင်းတို့ရဲ့ ငွေသားစာရင်းကို ငါတို့ဆီမှာ အပ်နှံထားပြီး၊ ငါတို့ကို လွတ်လွတ်လပ်လပ် ရင်းနှီးမြှုပ်နှံခွင့် ပေးထားလိုက်၊ ပြီးရင် နှစ်ကုန်တဲ့အခါ အကျိုးအမြတ်ပေါ် မူတည်ပြီး တွက်ချက်မယ်၊ ငါတို့က အမြတ်ရဲ့ ရာခိုင်နှုန်း သုံးဆယ်ကို ပွဲခအဖြစ် ယူမယ်။ တကယ်လို့ ရှုံးသွားခဲ့ရင်၊ မင်းတို့ရဲ့ အရင်းကို ငါတို့က တာဝန်ယူပြီး လျော်ပေးမယ်”

"နေပါဦး၊ ဘယ်လိုလုပ်ပြီး ရှုံးသွားတယ်ဆိုတဲ့ အပြောမျိုး ရှိလာရတာလဲ။ မင်းကုမ္ပဏီက တစ်ခါမှ မရှုံးဖူးဘူး မဟုတ်ဘူးလား။ ငါရင်းနှီးမြှုပ်နှံတာက ငွေမြတ်ဖို့လေ၊ နောက်ဆုံးကျမှ မင်းက ငါ့ကို အရင်းလောက်ပဲ ပြန်ပေးမယ်ဆိုရင်၊ အဲ့ဒါဆိုရင် ငါ ဘဏ်မှာ သွားအပ်ထားတာကမှ ပိုကောင်းဦးမယ်” လုရှောက်က စိုးရိမ်တကြီး ပြောလိုက်သည်။

"တစ်ခါမှ မရှုံးဖူးဘူးဆိုတာက အတိတ်ကိုပဲ ကိုယ်စားပြုတာလေ။ တကယ်တော့ ငါ့ကုမ္ပဏီမှာ ပွဲစားတစ်ယောက်က တစ်ခါတုန်းက ကိုင်တွယ်မှု အမှားအယွင်းဖြစ်ပြီး၊ ဖောက်သည်အတွက် အမှိုက် ငွေတိုက်စာချုပ်တွေကို ဝယ်ပေးလိုက်မိလို့၊ နောက်ဆုံးမှာ အရှုံးပေါ်သွားခဲ့ဖူးတယ်၊ အဲဒါကို ကုမ္ပဏီက ငွေစိုက်ပြီး ဖြည့်ဆည်းပေးခဲ့ရတာ။ ဖောက်သည်က အရင်းကိုတော့ ပြန်ရသွားတယ်၊ ဒါပေမဲ့ အဲ့ဒီနှစ်က ငါတို့ကုမ္ပဏီရဲ့ တခြားရင်းနှီးမြှုပ်နှံမှုတွေရဲ့ နှစ်စဉ် အကျိုးအမြတ်ရရှိနှုန်းက ရာခိုင်နှုန်း သုံးဆယ် အထက်မှာချည်းပဲ ရှိခဲ့တာဆိုတော့၊ ဒီလိုတွက်ကြည့်မယ်ဆိုရင်၊ အဲဒီဖောက်သည်က အနည်းဆုံး ရာခိုင်နှုန်း သုံးဆယ်လောက် ရှုံးသွားတာပေါ့”

"မင်းက အကျိုးအမြတ် အာမခံချက်ပါတဲ့ ရန်ပုံငွေ အမျိုးအစားကိုပဲ ဝယ်လိုက်တာ ပိုကောင်းပါတယ်၊ ငါတို့ထုတ်ဝေထားတဲ့အထဲမှာ ငါးနှစ် သတ်မှတ်ကာလ အတိုးနှုန်းကို ကိုးကားထားတဲ့ အာမခံချက်ပါ ရန်ပုံငွေ ရှိတယ်၊ ပြီးတော့ အဲဒါက အပိတ်ရန်ပုံငွေ ဖြစ်တဲ့အတွက်၊ တစ်နှစ်ပြည့်တာနဲ့ ငွေပြန်လဲလို့ရသလို၊ ဈေးကွက်ထဲကို တိုက်ရိုက်ယူသွားပြီး အရောင်းအဝယ် လုပ်လို့လည်း ရသေးတယ်”

"မနှစ်က ငါတို့ရဲ့ အပိတ်ရန်ပုံငွေမှာ အနိမ့်ဆုံး အကျိုးအမြတ်က တစ်ဆယ့်ခုနစ် ရာခိုင်နှုန်းဖြစ်ပြီး၊ အမြင့်ဆုံး အကျိုးအမြတ်က တစ်ရာ့ရှစ် ရာခိုင်နှုန်းဖြစ်တယ်၊ ပျမ်းမျှအားဖြင့် ၃၆.၃ ရာခိုင်နှုန်းရှိပြီး၊ လုပ်ငန်းတူတွေရဲ့ ပျမ်းမျှကိန်းဂဏန်းထက် တစ်ဆကျော် ပိုများတယ်။ ဒီနှစ်မှာ ဈေးကွက်အခြေအနေက ပိုကောင်းတဲ့အတွက်၊ ဒီအကျိုးအမြတ်က ပိုပြီးတောင် များလာနိုင်သေးတယ်”

ယခုနှစ်တွင် တစ်ကမ္ဘာလုံး၏စီးပွားရေးအခြေအနေမှာ ယေဘုယျအားဖြင့် ကောင်းမွန်လာခဲ့ပြီး၊ ငွေကြေးဈေးကွက်မှာ ပို၍ပင်သိသာသေးသည်။ စတော့ရှယ်ယာဈေးကွက်တွင် အတက်ဈေးကွက်ကြီးကို ကြိုဆိုနေရသောကြောင့် ရင်းနှီးမြှုပ်နှံမှုလုပ်ပါက သေချာပေါက် ငွေမြတ်မည်သာ ဖြစ်သည်။

အနိမ့်ဆုံးပင်လျှင် တစ်ဆယ့်ခုနစ် ရာခိုင်နှုန်း အကျိုးအမြတ် ရနိုင်သည်ပေါ့လေ။ လုရှောက် သည် ထိုအာမခံချက်ဆိုသည်မှာ ဘဏ်၏ ငါးနှစ် သတ်မှတ်ကာလ အတိုးနှုန်းကို ကိုးကား၍ တိုင်းတာထားသည်ဆိုသော စကားကို အလိုအလျောက် လျစ်လျူရှုလိုက်ပြီး၊ အကယ်၍ ရာခိုင်နှုန်း တစ်ရာအထက် အကျိုးအမြတ် ရနိုင်မည်ဆိုလျှင်မူ အများကြီး မြတ်လေပြီ။

ဤသို့သာဆိုလျှင် သူ၏နိုင်ငံရေးစွမ်းဆောင်ရည်က ပို၍ပင် ခိုင်မာသွားပြီဖြစ်သည်။

......

******