အခန်း ၁၅၃၀

အခန်း ၁၅၃၀ ဖုန်း ဈေးနှုန်းစံသတ်မှတ်ချက်

ဖုန်းယွီသည် ရုံးခန်းထဲတွင် ထိုင်နေပြီး လက်ထဲမှ အစီရင်ခံစာ တစ်စောင်ကို ကြည့်ကာ နှုတ်ခမ်းထောင့်တွင် အပြုံးတစ်ခု ပေါ်လာလေသည်။

ကုန်ကျစရိတ် ထပ်မံကျဆင်းသွားပြန်ရာ၊ ဤသို့ဖြင့် ဤဖုန်း၏ ဈေးနှုန်းကိုလည်း လျှော့ချရမည့် အချိန်သို့ ရောက်ရှိလာခဲ့လေပြီ။

မူလက ဈေးပေါသော ဖုန်း ဈေးကွက်တွင် ဖုန်းယွီဖုန်း တစ်မျိုးတည်းသာ ရှိခဲ့ပြီး၊ အခြားသော ထုတ်လုပ်သူများတွင် လုံးဝ မရှိခဲ့ပေ။ သို့သော် ဖုန်းယွီ၏ ဈေးပေါသော ဖုန်းများ အရောင်းပမာဏ တစ်ဟုန်ထိုး တက်လာကာ ကမ္ဘာသူကမ္ဘာသားများ၏ အာရုံစိုက်ခြင်းကို ခံရပြီးနောက်ပိုင်းတွင်မူ၊ အခြားသော ထုတ်လုပ်သူများ အားလုံးသည်လည်း ဈေးပေါသော ဖုန်း ဈေးကွက်ထဲသို့ ဝင်ရောက်လာခဲ့ကြလေသည်။

သို့သော် အခြားသော ထုတ်လုပ်သူများက ဈေးနှုန်းပို၍ သက်သာသော ဖုန်းများကို ထုတ်လုပ်လာခဲ့ကြလျှင်ပင်၊ ဖုန်းယွီဖုန်းသည် မူလရောင်းဈေးကိုသာ ဆက်လက်ထိန်းသိမ်းထားခဲ့ပြီး ဈေးလျှော့ချခြင်း လုံးဝ မရှိခဲ့ပေ။

ဖုန်းယွီက ကျန်းဝမ်မုန့်အား ပြောဖူးလေသည်။ ဖုန်းယွီဖုန်းသည် ဈေးလျှော့၍ မရခြင်းမဟုတ်ဘဲ၊ နည်းနည်းလေးမျှ ဈေးလျှော့ခြင်းက မည်သည့်အစွမ်းသတ္တိမျှ မရှိကြောင်းနှင့်၊ တစ်ခါတည်း ဈေးလျှော့ချလိုက်ပါက အခြားသော ထုတ်လုပ်သူများကို မျှော်လင့်ချက် ကင်းမဲ့သွားစေရမည် ဖြစ်ကြောင်း ပြောခဲ့ဖူးသည်။

ရေနွေးဖြင့် ဖားကိုပြုတ်ခြင်းက (ဖြည်းဖြည်းချင်း အစီအစဉ်ချခြင်းက) ဤထုတ်လုပ်သူကြီးများကို ဆွဲချနိုင်မည် မဟုတ်ဘဲ၊ ဆန့်ကျင်ဘက်အနေဖြင့် သူတို့အား အရောင်းပမာဏကို ဆက်လက်ချဲ့ထွင်ရန် အခွင့်အရေး ပေးလိုက်သကဲ့သို့ ဖြစ်သွားစေမည်ဖြစ်သည်။

ရူးသွပ်လုမတတ် ဈေးလျှော့ချမှုတစ်ခု ပြုလုပ်ရမည်ဖြစ်ပြီး၊ မည်သည့်ထုတ်လုပ်သူကိုမဆို မျှော်လင့်ချက် ကင်းမဲ့သွားစေကာ၊ သူတို့အား ဈေးနှုန်း ယှဉ်ပြိုင်နိုင်စွမ်းရှိမည့် မျှော်လင့်ချက် တစ်စက်လေးမျှပင် မရှိစေတော့မှသာ၊ ဤဈေးကွက်ကို အမှန်တကယ် လက်ဝါးကြီးအုပ်နိုင်မည် ဖြစ်သည်။

ယခုအခါတွင်မူ အခွင့်အရေးက ရောက်ရှိလာခဲ့လေပြီ။

စားပွဲပေါ်မှ စာရွက်စာတမ်း တစ်စောင်ကို ရှာဖွေထုတ်ယူလိုက်ပြီး၊ ဖုန်းယွီက တစ်ချက်လှန်လှောကြည့်ကာ၊ လက်မှတ်ထိုးလိုက်ပြီး၊ အတွင်းရေးမှူးကို ဝင်လာရန် ခေါ်လိုက်ကာ၊ ထိုစာရွက်စာတမ်းအား လျူချွမ်းကျစ် ထံသို့ ပေးအပ်စေလိုက်သည်။

လျူချွမ်းကျစ်သည် ဖုန်းယွီ၏အတွင်းရေးမှူးကိုယ်တိုင် စာရွက်စာတမ်း လာပို့ည်ကို မြင်သောအခါ၊ ၎င်းမှာ ဖုန်းယွီထံမှ နောက်ထပ် ဆုံးဖြတ်ချက်တစ်ခုခု ရှိလာပြီဖြစ်ကြောင်းကို သိလိုက်လေသည်။ သူက စာရွက်စာတမ်းကို တစ်ချက်လှန်လှောကြည့်လိုက်ရာ၊ မျက်နှာပေါ်တွင်လည်း စိတ်လှုပ်ရှားနေသည့် အမူအရာများ ပေါ်ထွက်လာခဲ့လေသည်။

နောက်ဆုံးတော့လည်း စတင်လှုပ်ရှားနိုင်ပြီဖြစ်သည်။ ဒီဈေးကွက်ကို ငါတို့က ဖော်ဆောင်ခဲ့ခြင်းဖြစ်တာကြောင့် နောက်ဆုံးမှာလည်း သေချာပေါက် ငါတို့ပိုင်ဆိုင်မှုသာ ဆက်ဖြစ်နေရမယ်။

လျူချွမ်းကျစ်က စားပွဲပေါ်ရှိ ဖုန်းကို ကောက်ကိုင်လိုက်ပြီး "လောင်ကျန် ဈေးနှုန်းလျှော့ချမယ့် အစီအစဉ်ကို၊ အကောင်အထည်ဖော်လို့ ရပြီကွ”

......

[ဖုန်းယွီတန်ဖိုးကြီး ဖုန်း ဈေးနှုန်း ရုတ်တရက် အကြီးအကျယ် လျှော့ချ]

[ဈေးလျှော့ချသည့် ပမာဏမှာ နှစ်ဆယ့်ငါး ရာခိုင်နှုန်းထက် ကျော်လွန်၊ ဖုန်းယွီတန်ဖိုးကြီး ဖုန်းတွင် တကယ်ပဲ ဤမျှမြင့်မားသော အမြတ်အစွန်းများ ရှိနေသလား။]

[ဖုန်းယွီတန်ဖိုးကြီး ဖုန်း အကြီးအကျယ် ဈေးလျှော့ချ၊ အခြားသော ဖုန်း ထုတ်လုပ်သူများ ယုံကြည်ရန် ခက်ခဲနေ]

[ဈေးချ၍ အလုအယက် ရောင်းချခြင်းလား။ Wind and Rain Electronics နိုင်ငံပေါင်းများစွာ၏ တရားစွဲဆိုခြင်းခံရ]

[နိုင်ငံပေါင်းများစွာမှ ဖုန်း ထုတ်လုပ်သူများ ပူးပေါင်း၍ တရုတ် ကူးသန်းရောင်းဝယ်ရေး ဝန်ကြီးဌာနထံသို့ တိုင်ကြား၊ တရုတ်အနေဖြင့် ဖုန်းယွီဖုန်း၏ ဈေးချ၍ အလုအယက် ရောင်းချမှုအပေါ် ပြင်းထန်စွာ အပြစ်ပေးရန်နှင့် ၎င်းတို့၏ ဆုံးရှုံးမှုများကို လျော်ကြေးပေးရန် တောင်းဆို]

......

ဖုန်းယွီသည် အင်တာနက်ပေါ်ရှိ သတင်းများကို ကြည့်ရှုနေလေပြီး၊ ယနေ့တွင် ဖုန်းယွီဖုန်း၏ သတင်းများသည် သတင်းမီဒီယာ အားလုံးနီးပါး၏ မျက်နှာဖုံး သတင်းခေါင်းစဉ်များကို နေရာယူထားကာ၊ စီးပွားရေး ကဏ္ဍများတွင်ဆိုပါက ကြီးမားကျယ်ပြန့်သော စာမျက်နှာများကို ပို၍ပင် နေရာယူထားလေသည်။

သတင်းထောက် အချို့မှာ Feng Yu Electronicsဘက်သို့သွား၍ အင်တာဗျူးကြသလို၊ အချို့မှာလည်း Tai Hua Holding Groupဘက်သို့ လာရောက် အင်တာဗျူးကြပြီး၊ နိုင်ငံခြား မီဒီယာအချို့ဆိုလျှင် ကူးသန်းရောင်းဝယ်ရေး ဝန်ကြီးဌာနသို့ပင် သွားရောက် အင်တာဗျူးကြကာ၊ တရုတ်သည် ကမ္ဘာ့ကုန်သွယ်ရေးအဖွဲ့အစည်း၏ စာချုပ်များကို ဂရုမစိုက်ဘဲ ဖုန်းယွီဖုန်းအား ပြည်တွင်းဖြစ်ကို အကာအကွယ်ပေးခြင်း ပြုလုပ်မည်လား ဆိုသည်ကို ကြည့်ရှုချင်နေကြလေသည်။

ဤအချိန်တွင် ကျုံးချင်းရှန်၊ လျူချွမ်းကျစ်၊ ခါမီဒါ မာဆာအို စသူတို့သည် ဖုန်းယွီ၏ ရုံးခန်းထဲတွင် ထိုင်ကာ လက်ဖက်ရည် သောက်နေကြပြီး၊ သူတို့က ကိစ္စရပ်များ ဤသို့ဖြစ်လာမည်ကို စောစောစီးစီးကတည်းက ခန့်မှန်းထားခဲ့ပြီး ဖြစ်လေသည်။

အခြားသူများက တရားစွဲဆိုမည်ဆိုပါကလည်း သူတို့ကို စွဲခိုင်းထားလိုက်ရန်ပင်ဖြစ်သည်။ အရင်ဆုံး ရှင်းပြခြင်း မပြုလုပ်သေးဘဲ ဤကိစ္စကို ဆက်လက်၍ ကြီးထွားလာစေပြီး၊ ထိုမှတစ်ဆင့် ဖုန်းယွီဖုန်းအား မီဒီယာများ၏ သတင်းခေါင်းစဉ်များပေါ်တွင် ပိုမိုမကြာခဏ ပေါ်ထွက်လာစေကာ၊ ပို၍များပြားသော သုံးစွဲသူများ၏မျက်စိရှေ့သို့ ရောက်ရှိသွားစေရန် ဖြစ်သည်။

အရင်က လူအများအပြားမှာ ဖုန်းယွီဖုန်းကို ဝယ်ယူရန် ရည်ရွယ်ထားခြင်း မရှိခဲ့ကြသော်ငြားလည်း၊ သူတို့က ဖုန်း ဝယ်ယူချင်သည့် အခါမျိုးတွင်ဖြစ်စေ၊ သို့မဟုတ် ဖုန်း အသစ်လဲချင်သည့် အခါမျိုးတွင်ဖြစ်စေ၊ ခေါင်းထဲ၌ ပထမဆုံး ပေါ်ထွက်လာမည့် အမှတ်တံဆိပ်မှာ ဖုန်းယွီအမှတ်တံဆိပ် ဖြစ်လာနိုင်ခြေ အလွန်များလေသည်။

ဤသို့ ငွေမကုန်ဘဲ အလွန်မြင့်မားသော ကြော်ငြာသိပ်သည်းဆကို ရရှိနိုင်မည့် ကောင်းမွန်သော ကိစ္စမျိုးကို ဖုန်းယွီက ဝမ်းသာအားရပင် ကြိုဆိုနေလေသည်။

ယခုအချိန်တွင် ဤကိစ္စကို ကျန်းဝမ်မုန့်က ရှေ့ထွက်၍ ရင်ဆိုင်ဖြေရှင်းနေပြီး၊ အခြားသော အကြီးတန်း စီမံခန့်ခွဲသူများမှာမူ ဤကိစ္စနှင့် ပတ်သက်၍ သတင်းထောက်များ၏ အင်တာဗျူးများကို လုံးဝလက်ခံဖြေကြားခြင်း မရှိကြပေ။

"မန်နေဂျာဖုန်း ကျွန်တော်တို့ရဲ့ တန်ဖိုးကြီး ဖုန်း အရောင်းပမာဏက တစ်ဖန် ပြန်လည်ပြီး အကြီးအကျယ် မြင့်တက်လာပြန်ပြီ၊ ပြီးတော့ နိုင်ငံအများအပြားကလည်း သုံးစွဲသူတွေကို ဝယ်ယူဖို့ တမင်သက်သက် လမ်းညွှန်ပေးနေသလိုပဲ” ကျုံးချင်းရှန်က ပြုံး၍ ပြောလိုက်သည်။

"သူတို့က ငါတို့ရဲ့ အရောင်းပမာဏကို မြင့်တက်လာအောင် ကူညီပေးချင်နေတာပဲ၊ အဲ့ဒီနောက် ငါတို့ကို ဈေးချပြီး အလုအယက် ရောင်းချတယ်လို့ တရားစွဲတဲ့အခါကျရင်၊ ငါတို့ကို ပိုပြီးကြီးမားတဲ့ ဒဏ်ကြေးတွေ ပေးဆောင်ခိုင်းနိုင်သလို၊ သူတို့နိုင်ငံက လုပ်ငန်းတွေကိုလည်း ပိုများတဲ့ လျော်ကြေးတွေ ပေးနိုင်မှာလေ”

ခါမီဒါ မာဆာအို၏ မျက်နှာပေါ်တွင် အေးစက်စက် အပြုံးတစ်ခု ရှိနေလေသည်။ ထိုနိုင်ငံများက တွက်ခြေကိုက်အောင် တွက်ထားကြသည် မဟုတ်ပါလော။ ဤသို့သော အခြေအနေမျိုးကို သူမြင်ဖူးသည်မှာ ပထမဆုံးအကြိမ် မဟုတ်တော့ပေ။

"သူတို့က ငါတို့ရဲ့ ကုန်ကျစရိတ်က တကယ်ပဲ ဒီလောက်အထိ နည်းနေမယ်ဆိုတာကို သေချာပေါက် တွေးမိမှာ မဟုတ်ဘူးမလား။ အရင်တုန်းက ငါတို့တွေ ဈေးမလျှော့ဘဲ ထားခဲ့တာက ငါတို့ရဲ့ ကုန်ကျစရိတ်တွေ လျှော့ချလို့ မရတာကြောင့် မဟုတ်ဘဲ၊ ငါတို့က သူတို့ကို တမင်သက်သက် လုပ်ကြံဖန်တီးထားတဲ့ မြင်ကွင်းကို ပြသခဲ့တာဆိုတာကိုလည်း သူတို့ တွေးမိမှာ မဟုတ်ဘူးမလား” လျူချွမ်းကျစ်က ဆေးပြင်းလိပ်ကို ကိုက်ထားပြီး၊ စကားပြောနေရင်းဖြင့် အပြင်သို့ မီးခိုးငွေ့တန်းများကို မှုတ်ထုတ်နေလေသည်။

"ဒီကိစ္စကို ဆက်ပြီး ကြီးပါစေဦး၊ တရားခွင်ရောက်တဲ့အခါ သူတို့က ငါတို့ရဲ့ ကုန်ကျစရိတ်တွေကို မြင်ပြီးသွားရင်၊ ဘာမှဆက်ပြောနိုင်တော့မှာ မဟုတ်ဘူး။ ငါတို့ဆီမှာ အသက်သာဆုံးသော အီလက်ထရောနစ် အပိုပစ္စည်းတွေ ရှိနေလို့လေ၊ ငါတို့ရဲ့ ကုန်ထုတ်လုပ်မှုလိုင်း စွမ်းဆောင်ရည်က ဒီလောက်တောင် မြင့်မားနေလို့လေ မဟုတ်ဘူးလား” ကျုံးချင်းရှန်က ဖုန်းယွီဘက်သို့ လှည့်ကာ လက်မထောင်ပြလိုက်ပြီး "အစတုန်းက Feng Yu Electronicsကို Tai Hua ခရစ္စတယ်ဆီလီကွန်နဲ့ ရေရှည် ပစ္စည်းထောက်ပံ့မှု စာချုပ်ကို အရင်ချုပ်ဆိုခိုင်းခဲ့တာက ဒီလောက်ထိ နက်နဲတဲ့ အဓိပ္ပာယ်တွေ ရှိနေလိမ့်မယ်လို့ ထင်မထားခဲ့ဘူး”

အစတုန်းက ခရစ္စတယ်ဆီလီကွန်၏ ဈေးနှုန်းများ မတက်လာသေးချိန်တွင်၊ ဖုန်းယွီက Feng Yu Electronics အား Tai Hua ခရစ္စတယ်ဆီလီကွန်နှင့် ရေရှည် ပစ္စည်းထောက်ပံ့မှု စာချုပ်တစ်ရပ်ကို ချုပ်ဆိုစေခဲ့သည်။ ဤသို့ဖြင့် သူတို့၏ အီလက်ထရောနစ် အပိုပစ္စည်းများ ထုတ်လုပ်ရန် အသုံးပြုမည့် ကုန်ကြမ်းကုန်ကျစရိတ် အနည်းဆုံးဖြစ်စေရန် အာမခံနိုင်ခဲ့လေသည်။

သေချာသည်မှာ ဤစာချုပ်က ထာဝရ ဈေးမတက်ဘူးဟု ဆိုလိုခြင်းမဟုတ်ဘဲ၊ ဈေးကွက်ထဲတွင် အတော်လေး တွေ့ရများသည့် သုံးနှစ် အကာအကွယ်ပေး ဈေးနှုန်းမျိုး ဖြစ်လေသည်။ တစ်နည်းအားဖြင့် ပြောရလျှင် ကြိုတင်ငွေပေးချေထားပြီး၊ သုံးနှစ်အတွင်း နှစ်စဉ် ဈေးနှုန်းမြင့်တက်မှုမှာ ငါးရာခိုင်နှုန်းထက် မကျော်လွန်ရဘဲ၊ ဈေးကွက်ပျမ်းမျှဈေးနှုန်းထက်လည်း မကျော်လွန်ရပေ။ သေချာသည်မှာ အကယ်၍ ဈေးကွက်ပျမ်းမျှဈေးနှုန်းက အကြီးအကျယ် ကျဆင်းသွားမည်ဆိုပါကလည်း၊ Tai Hua ခရစ္စတယ်ဆီလီကွန်သည် ဆန့်ကျင်ဘက်အနေဖြင့် ဈေးနှုန်းအကာအကွယ်ကို ရရှိနိုင်မည် ဖြစ်သည်။

Feng Yu Electronicsသည် တွက်ချက်မှုများ ပြုလုပ်ထားခဲ့ပြီးဖြစ်ရာ၊ စက်ရုံ၏ ထုတ်လုပ်နိုင်စွမ်း မြင့်တက်လာခြင်းကြောင့် လုပ်အားခနှင့် စက်ယန္တရား ကုန်ကျစရိတ်များသည် တကယ်တမ်းတွင် ဆက်လက်၍ ကျဆင်းနိုင်သေးပြီး၊ အဓိက ကုန်ကြမ်းကုန်ကျစရိတ်မှာ အနည်းငယ် မြင့်တက်လာမည်ဖြစ်သော်လည်း ဘက်ထရီ၊ အပြင်ဘက် ကိုယ်ထည် စသည့် ကုန်ကြမ်းများ၏ ကုန်ကျစရိတ်မှာ ဆက်လက်၍ ကျဆင်းလာဦးမည်ဖြစ်သည်။ ထို့ကြောင့် ကုန်ကျစရိတ်မှာ လုံးဝ မြင့်တက်လာမည်မဟုတ်ဘဲ၊ ဆန့်ကျင်ဘက်အနေဖြင့် ဆက်လက်ကျဆင်းနေဦးမည် ဖြစ်သည်။

အခြားသောထုတ်လုပ်သူများ၏ ရောင်းဈေးမှာ စုစုပေါင်းအမြတ်ခန့်သာ ရှိနေပြီဖြစ်ရာ၊ သူတို့က လုံးဝ ထပ်မံ၍ ဈေးလျှော့ရဲမည် မဟုတ်ပေ။ သို့မဟုတ်ပါက သူတို့ အရှုံးပေါ်သွားမည်ဖြစ်ကာ၊ ဈေးချ၍ အလုအယက် ရောင်းချခြင်း ဥပဒေကို ချိုးဖောက်မိသွားမည်ဖြစ်သည်။ ထိုအချိန်ရောက်လျှင် ၎င်းတို့ကသာ Feng Yu Electronicsနှင့် နိုင်ငံပေါင်းများစွာမှ အစိုးရများ သို့မဟုတ် ကုန်သွယ်ရေး အဖွဲ့အစည်းများ၏ တရားစွဲဆိုခြင်းကို ခံရတော့မည်ဖြစ်သည်။

ပြည်တွင်း၌ ၂၉၉ ယွမ်တန် ရောင်းဈေးနှင့် နိုင်ငံခြား၌ ၃၉ ဒေါ်လာတန် ရောင်းဈေးတို့သည် အခြားသော ထုတ်လုပ်သူများကို ဖုန်တမွတ်မွတ်ထနေသည့် နောက်ပိုင်းကိုသာ လှမ်းကြည့်နေရုံမှလွဲ၍ မီအောင်မလိုက်နိုင် ဖြစ်သွားစေခဲ့လေသည်။

၎င်းအပြင် ယခုအခါတွင် ဤမျှများပြားသော မီဒီယာများက အခမဲ့ ကြော်ငြာပေးနေမှုများ ရှိနေသည့်အပြင်၊ သုံးစွဲသူများကို ဝယ်ယူရန် တမင်သက်သက် လမ်းညွှန်ပေးနေမှုများလည်း ရှိနေသေးရာ၊ ဤ ဖုန်းယွီတန်ဖိုးကြီး ဖုန်း၏ အရောင်းပမာဏသည် ကျုံးချင်းရှန်တို့အား ပြုံး၍ပင် မဆုံးနိုင်အောင် ဖြစ်သွားစေခဲ့လေသည်။

ရောင်းဈေးကို လျှော့ချလိုက်သောကြောင့် သူတို့၏ ပစ္စည်းတစ်မျိုးချင်းစီမှ အမြတ်အစွန်းများ ကျဆင်းသွားခဲ့သော်ငြားလည်း၊ အခြားသော ပြိုင်ဘက်များကို ဖယ်ရှားနိုင်ခဲ့ပြီး ဖုန်းယွီဖုန်း၏ ဈေးကွက်ဝေစုကို ချဲ့ထွင်နိုင်ခဲ့လေသည်။

ထို့အပြင် အရောင်းပမာဏ မြင့်တက်လာသောကြောင့် သူတို့၏ အမြတ်အစွန်းမှာ ကျဆင်းသွားသည် ဆိုသော်လည်း၊ ကျဆင်းသွားမှုမှာ များများစားစား မဟုတ်ပေ။ သို့သော် အခြားသော ဖုန်း ထုတ်လုပ်သူများမှာမူ ထိုသို့မဟုတ်တော့ဘဲ၊ မူလကတည်းက ဈေးနှုန်းသက်သာမှုကို လိုက်လံရှာဖွေရန်အတွက် သူတို့ ထုတ်လုပ်ထားသော ဈေးပေါသည့် ဖုန်းများမှာ သိပ်မကောင်းလှပေ။ အပြင်ပန်း ဒီဇိုင်းတွင်ဆိုပါက ဖုန်းယွီဖုန်းနှင့် ယှဉ်၍ပြောရန်ပင် မဖြစ်နိုင်ဘဲ၊ မူလက ဈေးနှုန်းပိုင်းဆိုင်ရာ အားသာချက်လေး ရှိနေခဲ့သော်လည်း၊ ယခုအခါတွင်မူ ဤအကြီးမားဆုံးသော အားသာချက်လေးသည်လည်း ပျောက်ကွယ်သွားခဲ့လေပြီ။

အခြားသော ဖုန်း ထုတ်လုပ်သူများ၏ ဈေးပေါသော ဖုန်းများ အားလုံးမှာ အရောင်းထိုင်းသည့် အခြေအနေသို့ ရောက်ရှိသွားခဲ့ပြီး၊ အဆင့်မြင့် မော်ဒယ်များကို ဆိုရလျှင်လည်း၊ သူတို့ကိုယ်တိုင်က ဖုန်းယွီဖုန်းလောက် မကောင်းကြပေ။ နည်းပညာပိုင်းတွင်ဖြစ်စေ၊ ထုတ်ကုန်ဒီဇိုင်း အယူအဆပိုင်းတွင်ဖြစ်စေ၊ သူတို့ အားလုံးသည် နောက်ကောက်ကျနေသည့် အခြေအနေတွင်သာ ရှိနေကြလေသည်။

အနည်းငယ်မျှ နောက်ကျနေသည်ဆိုပါက သူတို့က အမီလိုက်နိုင်မည်ဟု ထင်မြင်ကြသော်လည်း၊ ယခုကဲ့သို့ အများကြီး နောက်ကောက်ကျနေသောအခါတွင်မူ သူတို့ မျှော်လင့်ချက် ကင်းမဲ့သွားကြလေပြီ။

ဤဈေးပေါသော ဖုန်း ဈေးကွက်တွင် သူတို့ မျှော်လင့်ချက် ကင်းမဲ့သွားကြလေပြီ။ သူတို့၏ အရောင်းပမာဏ လုံးဝ ပျောက်ကွယ်သွားသည်ဟု ဆိုလိုခြင်းမဟုတ်ဘဲ အရောင်းပမာဏမှာ အရမ်းနည်းပါးလွန်းလှရာ ကြော်ငြာမြှင့်တင်ရေး စရိတ်ပင် ပြန်မရနိုင်ပါက ဘာအဓိပ္ပာယ်များ ရှိတော့မည်နည်း။

ကြော်ငြာမြှင့်တင်မှု မရှိပါက မည်သို့ ယှဉ်ပြိုင်မည်နည်း။ သူတို့တွင် နိုင်ငံတော်က လျှို့ဝှက်စွာဖြင့် ဝယ်ယူရန် တိုက်တွန်းပေးမှုမျိုးလည်း မရှိသကဲ့သို့၊ ပထမဆုံး ဈေးပေါသော ဖုန်းဟူသည့် နာမည်ဂုဏ်ပုဒ်မျိုးလည်း မရှိပေ။

ထို့အပြင် အရောင်းပမာဏ ကျဆင်းခြင်းက ထုတ်လုပ်မှု လျှော့ချရမည့် သက်ရောက်မှုများကိုပါ ယူဆောင်လာခဲ့ပြီး၊ ထုတ်လုပ်မှု လျှော့ချလိုက်မည်ဆိုပါက ပစ္စည်းတစ်မျိုးချင်းစီ၏ ကုန်ကျစရိတ်များက မြင့်တက်လာမည်ဖြစ်ရာ၊ ယင်းမှာ ဆိုးရွားသော သံသရာလည်မှုတစ်ခုပင် ဖြစ်လေသည်။

နောင်လာမည့် ဖုန်း ဈေးနှုန်းများအားလုံးက ဖုန်းယွီဖုန်း၏ မျက်နှာကိုသာ ကြည့်နေရတော့မည်ဟု ဆိုလိုခြင်းလော။

ဤသည်မှာ အမျိုးမျိုးသော လုပ်ဆောင်ချက်များရှိသည့် ဖုန်း ရောင်းဈေးများအတွက် စံသတ်မှတ်ချက် တစ်ခုကိုပါ ပြဋ္ဌာန်းပေးလိုက်ခြင်း ဖြစ်သည်လား။

......

******