အခန်း ၁၅၃၂

အခန်း ၁၅၃၂ ဦးတည်ချက်

ဖုန်းယွီဖုန်းသည် ကမ္ဘာ့ထုတ်လုပ်ရောင်းချရမှု ပမာဏတွင် နံပါတ်တစ် ဖြစ်လာခဲ့သော်လည်း အမြတ်အစွန်းမှာမူ Nokia ထက် အနည်းငယ် လျော့နည်းနေသေး၏။ အဘယ်ကြောင့်ဆိုသော် ဖုန်းယွီဖုန်း၏ ဤထုတ်လုပ်ရောင်းချရမှု ပမာဏ နံပါတ်တစ် ဖြစ်လာခြင်းမှာ ထိုတန်ဖိုးကြီးမော်ဒယ်၏ ကြီးမားသော စွမ်းဆောင်မှုများ ပါဝင်နေသောကြောင့်ပင် ဖြစ်သည်။

ထုတ်လုပ်ရောင်းချရမှု ပမာဏတွင် နံပါတ်တစ် ဖြစ်ရုံမျှဖြင့်၊ ဖုန်းယွီအား ကျေနပ်သွားစေနိုင်မည် မဟုတ်သည်မှာ သိသာထင်ရှားလှပေသည်။ အရင်ဘဝကဆိုလျှင်၊ Apple၏ ဖုန်းသည် ကမ္ဘာ့အရောင်းပမာဏတွင် နံပါတ်တစ် မဟုတ်ခဲ့သော်လည်း၊ အမြတ်အစွန်းမှာမူ အခြားသော ထုတ်လုပ်သူများ လိုက်မမီနိုင်လောက်အောင် ဖြစ်ခဲ့ပြီး၊ နာမည်ဂုဏ်သတင်းမှာလည်း အကြီးမားဆုံး ဖြစ်ခဲ့သည်နှင့် တူညီလေသည်။

ဖုန်း ထုတ်လုပ်သူအားလုံးက ထုတ်ကုန်သစ်များကို ကြော်ငြာမြှင့်တင်သည့်အခါတိုင်း၊ Apple ဖုန်းနှင့် နှိုင်းယှဉ်ပြလေ့ရှိခြင်းကပင်၊ ဤအချက်ကို သက်သေပြနိုင်ပေသည်။ Apple ဖုန်းသည် စမတ်ဖုန်းများ၏ စံသတ်မှတ်ချက်တစ်ခု ဖြစ်လာခဲ့လေသည်။

ဤဘဝတွင်မူ၊ ဖုန်းယွီက ဤအခြေအနေကို ပြောင်းလဲပစ်ချင်နေပြီး၊ စမတ်ဖုန်း တစ်မျိုးတည်းသာမကဘဲ၊ ဖုန်းအားလုံး၏ စံသတ်မှတ်ချက်မှာ ဖုန်းယွီဖုန်းသာ ဖြစ်သင့်သည်ဟု တွေးတောထားလေသည်။

ဖုန်းယွီဖုန်းက ဤအမျိုးအစားကို မထုတ်လုပ်လျှင်သာ ရှိမည်ဖြစ်ပြီး၊ ထုတ်လုပ်လိုက်ပြီ ဆိုသည်နှင့်၊ စံသတ်မှတ်ချက် ဖြစ်လာရမည်သာ ဖြစ်သည်။

ဥပမာအားဖြင့် ဂီတဖုန်းဆိုလျှင်၊ ဖုန်းယွီဖုန်းက မထုတ်လုပ်ခဲ့ဘဲ၊ AIWAနှင့် Ai Hua ဟူသည့် အမှတ်တံဆိပ် နှစ်ခုကို လွှဲပြောင်းပေးခဲ့လေသည်။ AIWAသည် ဂျပန်နိုင်ငံ၏ ဖုန်း ဈေးကွက်တွင် ကိတ်မုန့်ကြီး တစ်တုံးကို ကိုက်ဖြတ်ယူနိုင်ခဲ့ရုံသာမက တစ်ကမ္ဘာလုံးတွင်လည်း အတော်လေး နာမည်ရလာခဲ့ပြီး၊ လူအများအပြားမှာ ဂီတဖုန်းဆိုသည့် အယူအဆကို မှတ်မိသွားခဲ့ကြလေသည်။

အခြားသော ကုမ္ပဏီများက ဂီတဖုန်းများကို မထုတ်လုပ်ခဲ့သည်လည်း မဟုတ်ပေ။ ဥပမာအားဖြင့် Apple ကုမ္ပဏီကလည်း ဂီတဖုန်းကို ထုတ်လုပ်ခဲ့သော်လည်း၊ နှမြောစရာကောင်းသည်မှာ မြောက်အမေရိကရှိ အရောင်းပမာဏမှာ AIWAကို အဝေးကြီး မမီခဲ့ဘဲ၊ ကျရှုံးသွားသည့် ထုတ်ကုန်တစ်ခု ဖြစ်သွားခဲ့လေသည်။

ဂီတဖုန်း ကဏ္ဍတွင် AIWAသည် လုပ်ငန်းနယ်ပယ်၏ စံသတ်မှတ်ချက် ဖြစ်လာခဲ့ရာ အခြားသော ဖုန်း ကဏ္ဍများတွင်မူ၊ ဖုန်းယွီဖုန်းက ထုတ်လုပ်ခဲ့ပြီဆိုမှတော့ အကုန်လုံး အကောင်းဆုံး ဖြစ်လာရမည်သာ ဖြစ်သည်။

ဈေးပေါသော ဖုန်း ကဏ္ဍတွင် ဖုန်းယွီတန်ဖိုးကြီး ဖုန်း၏ အရောင်းပမာဏမှာ ပြိုင်ဘက်ကင်းဖြစ်နေပြီး၊ တန်ဖိုးနှင့် အရည်အသွေး မျှတမှုအပိုင်းတွင်ဖြစ်စေ၊ ဩဇာလွှမ်းမိုးမှုအပိုင်းတွင်ဖြစ်စေ ကြည့်မည်ဆိုပါက လုပ်ငန်းနယ်ပယ်၏ စံသတ်မှတ်ချက် တစ်ခု ဖြစ်နေလေပြီ။

စမတ်ဖုန်း ကဏ္ဍတွင်မူ BlackBerryက နာမည်အကြီးဆုံး ဖြစ်နေဆဲပင်ဖြစ်သော်လည်း၊ ဖုန်းယွီဖုန်း၏ S စမတ်ဖုန်း စီးရီးများ ထွက်ပေါ်လာမှုနှင့်အတူ၊ စီးပွားရေးလုပ်ငန်း ကဏ္ဍကိုသာ ပို၍အလေးထားသော BlackBerryမှာမူ သိသာထင်ရှားစွာပင် နောက်ကောက်ကျသွားခဲ့လေပြီ။

BlackBerry တွင် ရှိသော လုပ်ဆောင်ချက်များ အားလုံးကို ဖုန်းယွီ S Series တွင်လည်း ရရှိနိုင်ပြီး၊ BlackBerry တွင် မရှိသော လုပ်ဆောင်ချက်များမှာလည်း၊ ဖုန်းယွီ S Series တွင် ရှိနေလေသည်။ ထို့အပြင် ကိုင်တွယ်အသုံးပြုရသည်မှာလည်း ပို၍ရိုးရှင်းပြီး၊ စတင်အသုံးပြုရန် ပို၍လွယ်ကူလေသည်။

ယခင်တုန်းက BlackBerry ၏ စမတ်ဖုန်းများသည် အမေရိကန်ရှိ ထိုဘေးအန္တရာယ်ကြီးကြောင့် အလွန်တရာ ရေပန်းစားသွားခဲ့ပြီး၊ နောက်ပိုင်းတွင် BlackBerry ၏ ကြော်ငြာထိုးစစ်များကလည် ၎င်းတို့၏ အရောင်းပမာဏကို တဟုန်ထိုး မြင့်တက်သွားစေခဲ့လေသည်။

သို့သော် BlackBerry တွင် သိပ်မကောင်းလှသော အချက်တစ်ချက် ရှိနေလေသည်။ ယင်းမှာ ကိုင်တွယ်အသုံးပြုရသည်မှာ သိပ်မအဆင်ပြေလှခြင်းပင်ဖြစ်ပြီး၊ အခြားသော ဘာသာစကား ဗားရှင်းများရှိ စက်လည်ပတ်မှုစနစ်များမှာ ပို၍ပင်ဆိုးရွားသေးကာ၊ အင်္ဂလိပ်ဘာသာစကား တစ်မျိုးတည်းသာ မဆိုးလှခြင်းပင်။

ဖုန်းယွီဖုန်းသည် မျိုးဆက်နှစ်ခုရှိ စမတ်ဖုန်းများကို ထုတ်လုပ်ခဲ့ပြီး၊ ပို၍ရိုးရှင်းလွယ်ကူသော ကိုင်တွယ်အသုံးပြုမှုများကြောင့်၊ လူအများအပြား၏ လက်ခံမှုကို ရရှိခဲ့လေသည်။ ဈေးနှုန်း အနည်းငယ် ကြီးမြင့်သည် ဆိုသော်ငြားလည်း၊ အရောင်းပမာဏမှာ မဆိုးလှပေ။

ယခုအခါ ဖုန်းယွီဖုန်းက တွန်းအားပေး မြှင့်တင်လိုသည်မှာ စမတ်ဖုန်း စက်လည်ပတ်မှုစနစ်၏ စံသတ်မှတ်ချက်ပင်ဖြစ်ပြီး၊ ယင်းမှာ Lenovo-Kingsoft မှ ဖန်တီးရေးဆွဲထားသော HOS စနစ်ပင် ဖြစ်လေသည်။ လူများကို ဤစက်လည်ပတ်မှုစနစ်အား သဘောကျလာစေရန်၊ တဖြည်းဖြည်းနှင့် ဤစက်လည်ပတ်မှုစနစ်အား အသားကျလာစေရန်နှင့် ထိုမှတစ်ဆင့် ပို၍များပြားသော ဖုန်း ထုတ်လုပ်သူများက ဤစနစ်မိသားစုကြီးထဲသို့ ဝင်ရောက်လာစေရန် ရည်ရွယ်ထားခြင်း ဖြစ်လေသည်။

ယခုလက်ရှိ Hardware နည်းပညာ၏ ကန့်သတ်ချက်များကြောင့် HOS၏ တွေးတောထားသော လုပ်ဆောင်ချက် အများအပြားကို ထည့်သွင်း၍ မရနိုင်သေးပေ။ သို့သော် ဖုန်းယွီက Lenovo-Kingsoft ဘက်သို့ စိတ်မလောရန် ပြောဆိုထားခဲ့ပြီး၊ အီလက်ထရောနစ် နည်းပညာများ၏ အဆင့်မြှင့်တင်မှု အမြန်နှုန်းကို စဉ်းစားကြည့်ပါက တစ်နှစ်ပင် အချိန်မကြာဘဲ လုပ်ဆောင်ချက် အများအပြားကို ထည့်သွင်းနိုင်လာမည်ဖြစ်ကာ၊ ထိုအချိန်ရောက်လျှင် ဖုန်းယွီ S3 ဖုန်းကို အချိန်ကိုက် ထုတ်လုပ်ရောင်းချနိုင်မည် ဖြစ်လေသည်။

S3 မှ စတင်၍ ဖုန်းယွီက ဖုန်းယွီဖုန်းသည် BlackBerry ကို ဖိနှိပ်ထားသင့်ပြီး၊ စမတ်ဖုန်း ဈေးကွက်၏ ခေါင်းဆောင်ကြီး ဖြစ်လာသင့်ပြီဟု ယူဆထားလေသည်။ ထို့နောက်တွင် ဤနေရာကို ဆက်လက်၍ ခိုင်မာအောင် နေရာယူထားပြီး၊ ထိန်းသိမ်းထားကာ၊ BlackBerry အား တဖြည်းဖြည်းနှင့် ဖယ်ရှားပစ်ရန်ပင် ဖြစ်လေသည်။

ရိုးရာ ဖုန်းများကိုမူ၊ လုပ်ဆောင်ချက် မတူညီမှုအပေါ် မူတည်၍၊ မတူညီသော အမျိုးအစားခွဲခြားမှုများ ရှိလာမည်ဖြစ်သည်။ ဥပမာအားဖြင့် ဓာတ်ပုံရိုက်သည့် လုပ်ဆောင်ချက်ပါသော ဖုန်း၊ Touch Screen ပါသော ဖုန်း၊ ဂိမ်းဖုန်း စသည်တို့ပင် ဖြစ်လေသည်။

၎င်းတို့အနက် ဂိမ်းဖုန်း ကဏ္ဍတွင်မူ Philipsကုမ္ပဏီက လုပ်ဆောင်ထားသည်မှာ မဆိုးလှပေ။ ၎င်းတို့၏ သုတေသနနှင့် ဖွံ့ဖြိုးတိုးတက်ရေးက လူများကို မျက်စိပွင့်သွားစေခဲ့ကာ မျက်နှာပြင်ကို ဘေးသို့ ပွတ်ဆွဲလိုက်ပါက အောက်ဘက်တွင် ဂိမ်းခလုတ်များ ပါဝင်လာပြီး၊ စိတ်ဝင်စားစရာကောင်းသော ဖုန်းဂိမ်းများကို ကစားနိုင်လေသည်။

သေချာသည်မှာ Feng Yu Electronicsသည် ၎င်းတို့၏ ကိုယ်ပိုင်နည်းပညာများကို အသုံးပြု၍ Philipsနှင့် ဖလှယ်မှုများ ပြုလုပ်ထားပြီးဖြစ်ကာ၊ တကယ်တမ်းတွင် ဤအရာမှာ အစတုန်းက ဖုန်းယွီက ဂိမ်းဖုန်းဆိုသည့် အယူအဆကို အဆိုပြုခဲ့စဉ်က အားလုံး တိုင်ပင်ဆွေးနွေးပြီးနောက် ထွက်ပေါ်လာသော ရလဒ်ပင် ဖြစ်လေသည်။

လူတိုင်းက ဦးတည်ချက် တစ်ခုတည်းကိုသာ ချိန်ရွယ်၍ သုတေသန ပြုလုပ်နေ၍ မရပေ။ ဤသို့လုပ်ဆောင်ခြင်းက ဦးတည်ချက်တစ်ခုတွင် အကောင်းဆုံးအထိ ရောက်ရှိသွားနိုင်သည် ဆိုသော်ငြားလည်း၊ အခြားသော ဦးတည်ချက် အများအပြားတွင် အားကောင်းလာနိုင်မည့် အခွင့်အရေးများကို ဆုံးရှုံးသွားစေမည်ဖြစ်သည်။

ထို့ကြောင့် ၎င်းတို့သည် သုတေသန လားရာများကို ခွဲဝေလိုက်ကြပြီး၊ မဟာမိတ်ဖွဲ့စဉ်က ချုပ်ဆိုခဲ့သော အတွင်းရေး စာချုပ်များအရ၊ တစ်ဖက်လူ၏ နည်းပညာ မူပိုင်ခွင့်လိုင်စင်ကို ဝယ်ယူမည်လား၊ မဝယ်ယူဘူးလား ဆိုသည်ကို လွတ်လပ်စွာ ရွေးချယ်ခွင့် ပေးထားလေသည်။

ဖုန်းယွီသည် အရင်ဘဝ မှတ်ဉာဏ်များထဲမှ ရေပန်းစားခဲ့သော ဖုန်း၏ လုပ်ဆောင်ချက်များ အားလုံးကို စာရင်းချရေးလိုက်လေသည်။ ဤအရာများကို ဖုန်းယွီဖုန်း စသည်တို့က လုပ်ဆောင်နေကြပြီး၊ ဦးတည်ချက် တစ်မျိုးစီတိုင်းတွင်၊ ကိုယ်စားပြု မော်ဒယ်တစ်ခုစီ ရှိနေကြကာ၊ အဓိကထားသည့် မဟာဗျူဟာ မော်ဒယ်များလည်း ဖြစ်ကြလေသည်။ ဖုန်းယွီမှာ အလွန်လောဘကြီးလှပြီး၊ မော်ဒယ်အားလုံးတွင် အကောင်းဆုံး ဖြစ်ချင်နေလေသည်။

ဖုန်းယွီဖုန်းက ရှေ့ဆောင်၍ အဆိုပြုခဲ့သော အယူအဆများဖြင့် ထုတ်ကုန်များ ထုတ်လုပ်လိုက်ပြီဖြစ်ရာ အခြားသော ဖုန်းထုတ်လုပ်သူများကို မည်သို့လုပ်၍ ဦးဆောင်ခွင့် ပေးနိုင်မည်နည်း။

"ငါ ခုနက ဖုန်းရဲ့လုပ်ဆောင်ချက် ဦးတည်ချက်တွေ အများကြီးကို ပြောပြခဲ့ပြီးပြီ၊ မင်းတို့ထဲက ဘယ်သူတွေများ ထပ်ဖြည့်ပြောချင်တာ ရှိသေးလဲ” ဖုန်းယွီက အားလုံးကို ကြည့်၍ မေးလိုက်သည်။

သူက ခုနက ဓာတ်ပုံရိုက် ဖုန်း၊ ဂီတဖုန်း၊ စမတ်ဖုန်း၊ ဈေးပေါသော ဖုန်း၊ ဘက်ထရီ အလွန်ခံသော ဖုန်း၊ ကွန်ရက်နှစ်ခု စင်းကတ်နှစ်ခုသုံး ဖုန်း၊ Touch Screen ဖုန်း စသည့် ဦးတည်ချက် အချို့ကို ပြောပြခဲ့ခြင်း ဖြစ်သည်။

"သူဌေး ဖုန်းရဲ့ ဓာတ်ပုံရိုက်တဲ့ လုပ်ဆောင်ချက်က လူသုံးများနေပြီဆိုတော့၊ ဗီဒီယိုအတိုလေးတွေ ရိုက်ကူးတာ၊ ဗီဒီယိုအတိုလေးတွေ ကြည့်ရှုတဲ့ လုပ်ဆောင်ချက်တွေတောင်မှ အတော်လေး ပြန့်နှံ့နေပြီဆိုတော့လေ၊ ဖုန်းရဲ့ မျက်နှာပြင်ကို၊ နောက်ထပ် နည်းနည်းလောက် ပိုကြီးအောင် လုပ်လို့ မရနိုင်ဘူးလား” ခါမီဒါ မာဆာအိုက မေးလိုက်သည်။

"မျက်နှာပြင်ကြီး ဖုန်း၊ ကောင်းတယ်၊ ဒါကလည်း ဦးတည်ချက် တစ်ခုပဲ၊ ဘယ်သူ့ဆီမှာ အကြံဉာဏ်တွေ ရှိသေးလဲ” ဖုန်းယွီက ကျေနပ်အားရစွာဖြင့် ခေါင်းညိတ်လိုက်လေသည်။ အကြံဉာဏ် အားလုံးကို ဖုန်းယွီတစ်ယောက်တည်း စဉ်းစား၍ ထွက်လာရန် မဖြစ်နိုင်ပေ။ အားလုံးက ဝိုင်းဝန်းစဉ်းစား အကြံပြုကြခြင်းကသာ၊ မှန်ကန်သော လမ်းကြောင်းပင် ဖြစ်လေသည်။

သူတို့အထဲမှ တစ်ယောက်ယောက်၏ စကားတစ်ခွန်းက ဖုန်းယွီအား သတိပေးမှု တစ်ခု ပေးစွမ်းနိုင်မည်ကို မပြောနိုင်ပေ။ ထိုမှတစ်ဆင့် ဖုန်းယွီအား ရေပန်းစားမည့် ထုတ်ကုန်အချို့ကို သတိရသွားစေနိုင်လေသည်။

"မန်နေဂျာဖုန်း၊ လက်တော့ပ်၊ ကွန်ပျူတာတွေတောင် အလွန်ပါးလွှာအောင် လုပ်လို့ရပြီဆိုမှတော့ အရင်က မင်းလည်း ပြောခဲ့ဖူးသလိုပဲ၊ ဖုန်းကိုလည်း နည်းနည်း ပိုပါးအောင် လုပ်လို့ရနိုင်တယ်ဆိုတော့ ငါတို့က ဘာဖြစ်လို့ အလွန်ပါးတဲ့ ဖုန်းကို မထုတ်ရမှာလဲ” လျူချွမ်းကျစ်က ပြောလိုက်သည်။

"အလွန်ပါးတဲ့ ဖုန်း၊ ဒါလည်း မဆိုးဘူးပဲ၊ မှတ်ထားလိုက်”

"မန်နေဂျာဖုန်း၊ Nokia က ငါတို့ရဲ့ ဖုန်းတွေ မခိုင်ခံ့ဘူးဆိုတဲ့ အချက်ကိုသုံးပြီး အမြဲတမ်း ငါတို့ကို တိုက်ခိုက်နေတာဆိုတော့ ငါတို့တွေက အဲဒီလေကြောင်းဆိုင်ရာ ပစ္စည်းတွေနဲ့ လုပ်ထားတဲ့ အပြင်ဘက်ကိုယ်ထည်ပါတဲ့ ဖုန်းတစ်မျိုးလောက် ထုတ်လုပ်လိုက်ရမလား” ကျန်းဝမ်မုန့်က မေးလိုက်သည်။

"ရတယ်၊ ဒါကလည်း ဦးတည်ချက် တစ်ခုပဲ”

"မစ္စတာဖုန်း Nokia က ဥရောပမှာ အဆင့်မြင့် ဖုန်းအမှတ်တံဆိပ်တစ်ခုကို ထုတ်လုပ်ခဲ့ပြီး၊ ဖုန်းကို ဇိမ်ခံပစ္စည်းတစ်ခုအဖြစ် ထုပ်ပိုးလိုက်တယ်ဆိုတော့ ငါတို့ကရော ဇိမ်ခံပစ္စည်း ဖုန်း တစ်မျိုးလောက် ထုတ်လို့ မရနိုင်ဘူးလား” Philips၏ တရုတ်မန်နေဂျာချုပ်က မေးလိုက်သည်။

"ဒါလည်း ရတာပါပဲ၊ ဒါကို ကျိုးတဖူးနဲ့ တစ်ချက်လောက် ဆက်သွယ်ကြည့်လိုက်၊ ခါမီဒါ မင်းက တာဝန်ယူလိုက်ပါ”

Feng Yu Holdingတွင် ကျိုးတဖူးနှင့် ချုပ်ဆိုထားသော ရွှေအရောင်းအဝယ် စာချုပ် ရှိနေလေရာ၊ ခါမီဒါ မာဆာအိုက ဟိုဘက်နှင့် ဆက်သွယ်လိုက်မည်ဆိုပါက ကွက်တိပင် ဖြစ်လေသည်။ ဇိမ်ခံပစ္စည်းဟု ဆိုလာမှတော့ ထိုသူဌေးများ၏အမြင်နှင့် ကိုက်ညီမည့်အရာမှာ ရွှေကွပ်စိန်စီထားခြင်းမှလွဲ၍ အခြားမရှိနိုင်ပေ။ ကျိုးတဖူးကဲ့သို့သော လက်ဝတ်ရတနာ ကုမ္ပဏီတစ်ခုမှာ ကွက်တိပင် အဆင်ပြေလှပေသည်။

သေချာသည်မှာ အဆင့်မြင့်သည်ဟု ဆိုမှတော့၊ ကာကွယ်မှု သုံးမျိုး (ရေ၊ ဖုန်၊ အကြမ်းခံမှု) အပိုင်းတွင်လည်း အကောင်းဆုံး ဖြစ်အောင် လုပ်ဆောင်ရမည်သာ ဖြစ်သည်။ သူတစ်ပါးက ဒေါ်လာ သောင်းဂဏန်းကျော် ပေး၍ ဝယ်ယူထားသော ဖုန်းက နောက်ဆုံးတွင် အပေါ်သို့ ကော်ဖီဖိတ်ကျသွားသည်နှင့် ပျက်စီးသွား၍ မဖြစ်နိုင်ပေ မဟုတ်ပါလော။

"မန်နေဂျာဖုန်း ကျွန်တော့်ဆီမှာ နောက်ထပ် အကြံဉာဏ်တစ်ခု ရှိသေးတယ်၊ ကျွန်တော်တို့ရဲ့ အဲဒီတန်ဖိုးကြီး ဖုန်းကို သက်ကြီးရွယ်အို အများအပြားက သဘောကျ နှစ်သက်ကြတယ်။ သူတို့က ငွေအများကြီး သုံးဖို့လည်း နှမြောကြတယ်၊ ပြီးတော့ သားသမီးတွေရဲ့ ဖုန်းတွေကိုလည်း အချိန်မရွေး လက်ခံဖြေကြားချင်ကြတယ်။ ပြဿနာ တစ်ခုပဲ ရှိတယ်၊ အဲဒါက ကျွန်တော်တို့ရဲ့ အဲဒီတန်ဖိုးကြီးဖုန်းရဲ့ မျက်နှာပြင်က အရမ်းသေးတယ်၊ စာလုံးတွေကလည်း အရမ်းသေးတယ်၊ ခလုတ်တွေကလည်း အရမ်းသေးတယ်လေ၊ သူတို့ရဲ့ လက်ချောင်းတွေက သိပ်မသွက်လက်ကြဘူး၊ နားတွေကလည်း သိပ်မကောင်းသလို၊ အမြင်အာရုံတွေကလည်း သိပ်မကောင်းကြဘူးဆိုတော့၊ ခလုတ်တွေ ကြီးကြီး၊ မျက်နှာပြင် နည်းနည်းပိုကြီးကြီး၊ စာလုံး ကြီးကြီး၊ အသံ ကျယ်ကျယ်ပါတဲ့ ဖုန်း တစ်မျိုးလောက် ထုတ်လို့ မရနိုင်ဘူးလား” ရှုလိဟွာက မေးလိုက်သည်။

"အရမ်းကောင်းတယ်၊ သက်ကြီးရွယ်အိုသုံး ဖုန်း၊ မှတ်ထားလိုက်”

ထုတ်ကုန်များကို လုပ်ဆောင်ချက်များအပေါ် မူတည်၍ အမျိုးအစား ခွဲခြားနိုင်ရုံသာမကဘဲ၊ ရည်ရွယ်ထားသော သုံးစွဲသူအုပ်စုများအပေါ် မူတည်၍လည်း အမျိုးအစား ခွဲခြားနိုင်သေးရာ၊ သင့်လျော်သော လုပ်ဆောင်ချက်များကို သေချာအောင် လုပ်ဆောင်ပေးနိုင်မည်ဆိုလျှင် ရပြီဖြစ်သည်။

"အားလုံးရဲ့အကြံဉာဏ်တွေက မဆိုးကြဘူး၊ ဒါကလည်း ငါတို့ရဲ့ လာမယ့် နှစ်အနည်းငယ်အတွင်း အဓိက သုတေသနနဲ့ ဖွံ့ဖြိုးတိုးတက်ရေး ဦးတည်ချက်တွေပဲ။ သေချာတာပေါ့၊ ငါတို့ရဲ့ အခုလက်ရှိ အကြီးမားဆုံး တာဝန်ကတော့၊ ငါတို့ ဖုန်းယွီဖုန်းရဲ့ ထုတ်လုပ်ရောင်းချရမှု ပမာဏ နံပါတ်တစ်ဆိုတဲ့ ပလ္လင်ကို သေချာအောင် ထိန်းသိမ်းထားဖို့ပဲ၊ မင်းတို့အားလုံးမှာ ဘယ်လို အကြံဉာဏ်တွေများ ရှိကြသေးလဲ”

......

******