အခန်း ၁၅၃၆

အခန်း ၁၅၃၆ ရူးသွပ်လုမတတ် ဖုန်း ကြော်ငြာများ

[ဖုန်းယွီစမတ်ဖုန်း၊ အဆင်ပြေလွယ်ကူမှုက သင့်ကို လာရောက် ခံစားကြည့်ဖို့ စောင့်ကြိုနေပါတယ်။]

[ဖုန်းယွီဂိမ်းဖုန်း၊ အချိန်မရွေး နေရာမရွေး ပျော်ရွှင်မှုကို ခံစားလိုက်ပါ။]

[ဖုန်းယွီဓာတ်ပုံရိုက် ဖုန်း၊ သင့်ရဲ့ အလှတရားကို ဖော်ထုတ်ပေးလိုက်ပါ။]

[ဖုန်းယွီဖုန်း၊ ကမ္ဘာ့အရောင်းပမာဏ နံပါတ်တစ်။]

[အမြဲတမ်း အတုခိုးခံရပေမဲ့၊ တစ်ခါမှ ကျော်လွန်မခံခဲ့ရဘူး၊ ဖုန်းယွီဖုန်းက ဖုန်း ဖွံ့ဖြိုးတိုးတက်မှု လမ်းကြောင်းကို ဦးဆောင်နေပါတယ်။]

......

ကြော်ငြာတစ်ခုပြီးတစ်ခုသည် အမျိုးမျိုးသော မီဒီယာများအပေါ်တွင် ပေါ်ထွက်လာခဲ့လေသည်။ အယ်လီနာ၏ သေသပ်လှပသော မျက်နှာသွင်ပြင်နှင့် နတ်ဆိုးတစ်ပါးကဲ့သို့ ဆွဲဆောင်မှုရှိသော ခန္ဓာကိုယ် ကောက်ကြောင်းတို့သည် အေးစက်ကြည်လင်သော အသံနေအသံထားနှင့် ပေါင်းစပ်သွားသောအခါ လူများကို ဖုန်းယွီဖုန်းအား လျင်မြန်စွာ မှတ်မိသွားစေခဲ့လေသည်။

ဖုန်းယွီဖုန်း၏ ကြော်ငြာထုတ်လွှင့်မှု ပမာဏ ရုတ်တရက် ဤမျှများပြားစွာ တိုးလာခဲ့ခြင်းက အခြားသော ဖုန်း ထုတ်လုပ်သူများ အားလုံးကို ထင်မှတ်မထားမိအောင် ဖြစ်သွားစေခဲ့သည်။ ယခင်က ဖုန်းယွီဖုန်းသည် ကြော်ငြာများ အများအပြား လုပ်ဆောင်ခဲ့သည်မှာ မှန်သော်ငြားလည်း သိပ်သည်းမှုမှာ ဤမျှလောက်အထိ ကြီးမားခြင်း လုံးဝမရှိခဲ့ပေ။

ဤမျှသိပ်သည်းသော ကြော်ငြာများအတွက် တစ်နှစ်စာ ကြော်ငြာစရိတ်နှင့် ကုန်အမှတ်တံဆိပ် ကိုယ်စားလှယ်၏အခကြေးငွေများကိုပါ ထည့်တွက်လိုက်ပါက သေချာပေါက် အမေရိကန်ဒေါ်လာ သန်းသုံးရာထက် ကျော်လွန်ပေမည်။ ၎င်းတို့က ဤမျှများပြားသော ငွေကြေးများကို ပြန်လည်ရရှိရန်အတွက် ဖုန်း အရေအတွက် မည်မျှကို ရောင်းချရမည်နည်း။

သို့သော် ဖုန်းယွီဖုန်း၏ယခုလက်ရှိ ကမ္ဘာလုံးဆိုင်ရာ အရောင်းပမာဏနှင့် နှိုင်းယှဉ်ကြည့်မည်ဆိုပါက အရှုံးမရှိနိုင်ဟု ထင်ရလေသည်။ ယခုနှစ် ကမ္ဘာလုံးဆိုင်ရာ ဖုန်း အရောင်းပမာဏသည် ပထမဆုံးအကြိမ်အဖြစ် အလုံးရေ သန်းတစ်ထောင်ကို ကျော်လွန်သွားမည်ဟု ခန့်မှန်းထားကြပြီး ၎င်းအနက် Nokia သည် အလုံးရေ သန်းနှစ်ရာ ကျော်လွန်နိုင်မည်ဖြစ်သော်လည်း ဖုန်းယွီဖုန်းမှာမူ သန်းသုံးရာကို ကျော်လွန်နိုင်မည် ဖြစ်လေသည်။

ဤအထဲတွင် Ai Hua ဖုန်း၏ အရောင်းပမာဏ အလုံးရေ သန်းတစ်ရာ နီးပါး ရှိနေသည်ကို ထည့်မတွက်ရသေးပေ။ တစ်နည်းအားဖြင့် ပြောရလျှင် သုတေသနနှင့် ဖွံ့ဖြိုးတိုးတက်ရေး ကုန်ကျစရိတ် အပိုင်းတွင် ဖုန်းယွီဖုန်းသည် Nokia ထက် အလွန်ကြီးမားသော အားသာချက် ရှိနေလေသည်။ အဘယ်ကြောင့်ဆိုသော် Ai Hua နှင့် ပူးတွဲအသုံးပြုထားသောကြောင့်ပင် ဖြစ်သည်။

ထို့ကြောင့် ဤမြင့်မားသည်ဟု ထင်ရသော ကြော်ငြာစရိတ်များမှာ ဖုန်း တစ်လုံးချင်းစီအပေါ်သို့ ခွဲဝေချထားလိုက်ပါက တစ်ဒေါ်လာမျှသာ ရှိလေသည်။

မနှစ်က Nokia ၏ ကြော်ငြာစရိတ်သည် ဒေါ်လာ သန်းတစ်ရာ ကျော်လွန်ခဲ့ပြီး ထိုအချိန်က ဖုန်းယွီဖုန်း၏ ကြော်ငြာစရိတ်မှာ ဒေါ်လာ သန်းရှစ်ဆယ်မျှသာ ရှိခဲ့လေသည်။ ယခုနှစ်တွင်မူ တစ်ဟုန်ထိုး အဆပေါင်းများစွာ တိုးမြှင့်လိုက်ခြင်းက Nokia နှင့် ကွာဟချက်ကို အပြီးတိုင် ဆွဲဆန့်ပစ်ရန်ပင် ဖြစ်လေသည်။

Motorolaကို ဆိုရလျှင် ယခုအခါ ၎င်းတို့မှာ Ai Hua ဖုန်း၏ ကျော်တက်သွားခြင်း မခံရစေရန် စဉ်းစားရတော့မည်ဖြစ်ပြီး ၎င်းတို့၏ မနှစ်က အရောင်းပမာဏမှာလည်း အလုံးရေ သန်းတစ်ရာ ကျော်ရုံလေးမျှသာ ရှိလေသည်။

Sony-Ericsson၊ Samsung စသည့် ကုမ္ပဏီများကလည်း စိုးရိမ်ပူပန်နေကြပြီး ၎င်းတို့၏ အရောင်းပမာဏမှာ တိုးတက်လာခဲ့သည် ဆိုသော်ငြားလည်း ဈေးကွက်ဝေစုမှာမူ ပို၍ပို၍ ပြင်းထန်စွာ ကျဆင်းလာခဲ့လေသည်။

ထို့အပြင် ဖုန်းယွီဖုန်းသည် နိုင်ငံခြားတွင် ကြော်ငြာထုတ်လွှင့်မှု ပမာဏ အကြီးအကျယ် တိုးမြှင့်ခဲ့ပြီး ပြည်တွင်းတွင်လည်း အနည်းငယ် တိုးမြှင့်ခဲ့သည်ကို ၎င်းတို့အားလုံး မြင်တွေ့ခဲ့ကြရသည်။ Ai Hua ဖုန်းကို ဆိုရလျှင် ယွမ်ငွေ သန်းလေးရာဖြင့် တရုတ် ဗဟိုရုပ်မြင်သံကြား၏ ကြော်ငြာတင်ဒါအောင် ဘုရင်ကြီးပင် ဖြစ်လာခဲ့လေသည်။

၎င်းတို့က အခြားသော အချိန်ပိုင်းများ သို့မဟုတ် မီဒီယာများတွင် ထုတ်လွှင့်သော ကြော်ငြာများနှင့်ပါ ပေါင်းစပ်လိုက်ပါက ယခုနှစ် Ai Hua ဖုန်း၏ ကြော်ငြာမြှင့်တင်ရေး စရိတ်များမှာလည်း ဒေါ်လာ သန်းတစ်ရာကို ကျော်လွန်သွားမည်သာ ဖြစ်သည်။

ထို့အပြင် AIWAလည်း ရှိသေးရာ ၎င်းတို့၏ ဂီတဖုန်းမှာ ယခုနှစ် ကြော်ငြာထုတ်လွှင့်မှု ပမာဏ တိုးလာခဲ့ရုံသာမက တေးဂီတ ပွဲတော်များစွာနှင့် တေးဂီတ ဆုပေးပွဲများကိုပါ ကမကထပြု ပံ့ပိုးပေးခဲ့လေရာ ကြော်ငြာစရိတ်မှာ ဒေါ်လာ သန်းတစ်ရာအောက် လျော့နည်းမည် မဟုတ်ဟု ခန့်မှန်းရလေသည်။

ဤဖုန်း အမှတ်တံဆိပ် သုံးခုအနက် နှစ်ခုမှာ Tai Hua Holding Group၏ လက်အောက်တွင်ရှိပြီး တစ်ခုမှာ Feng Yu Holding Group ၏ လက်အောက်တွင် ရှိလေရာ တစ်နည်းအားဖြင့် အားလုံးမှာ ဖုန်းယွီပိုင်ဆိုင်သော အရာများသာ ဖြစ်လေသည်။

မေးနေစရာပင် မလိုတော့ဘဲ သေချာပေါက် ဖုန်းယွီ၏ညွှန်ကြားချက်ကို ရရှိခဲ့သောကြောင့်သာ ဤအမှတ်တံဆိပ် သုံးခုက တစ်ပြိုင်နက်တည်း အားထုတ်ကြိုးပမ်းလာကြခြင်းဖြစ်ပြီး ဖုန်းဈေးကွက်၏ တစ်ဝက်တိတိကို တစ်ပါတည်း သိမ်းပိုက်လိုနေကြခြင်းပင် ဖြစ်သည်။

သူတို့အနက် မည်သူကမျှ မိမိတို့၏ ဈေးကွက်ဝေစုများ ဆက်လက်၍ သေးငယ်သွားသည်ကို ထိုင်ကြည့်မနေလိုကြပေ။ ကြော်ငြာ လုပ်ခြင်းမျှသာ မဟုတ်ပါလော၊ မိမိတို့လည်း လုပ်နိုင်သည်ပင်။

သို့မဟုတ် ပြောရလျှင် သူတို့၏ အမှတ်တံဆိပ်ကို လူများပို၍ သတိထားမိလာစေရန် မျှော်လင့်ချက်ဖြင့် သို့မဟုတ် ဖုန်း တစ်မျိုးမျိုးကို လူများပို၍ သဘောကျ နှစ်သက်လာစေရန်နှင့် ထိုမှတစ်ဆင့် သူတို့၏ အမှတ်တံဆိပ် တစ်ခုလုံး၏ အရောင်းပမာဏ တိုးတက်မှုကို တွန်းအားပေးနိုင်စေရန် မျှော်လင့်ချက်ဖြင့် ၎င်းတို့အနေဖြင့် ကြော်ငြာထုတ်လွှင့်မှု ပမာဏကို မဖြစ်မနေ တိုးမြှင့်ရတော့မည် ဖြစ်သည်။

ဖုန်းယွီဖုန်းက အယ်လီနာအား ကမ္ဘာလုံးဆိုင်ရာ ကုန်အမှတ်တံဆိပ် ကိုယ်စားလှယ်အဖြစ် ငှားရမ်းခဲ့သည်ကိုလည်း သူတို့အားလုံး သတိပြုမိခဲ့ကြလေသည်။ တောက်ပစွာ ထွက်ပေါ်လာနေသော ကြယ်ပွင့်သစ်လေး တစ်ပွင့်ဖြစ်ပြီး သီချင်းအပုဒ်များစွာက ကမ္ဘာ့နိုင်ငံအသီးသီးရှိ တေးဂီတ ဇယားများပေါ်တွင် အချိန်ကြာမြင့်စွာ နေရာယူထားနိုင်ခဲ့ရုံသာမက မကြာသေးမီက ရုပ်ရှင်ကား အတော်များများတွင် ဧည့်သည်သရုပ်ဆောင်အဖြစ် ပါဝင်ခဲ့သည်ဟု ကြားသိရလေသည်။

သို့သော် မကြာမီမှာပင် ဂရုတစိုက် လေ့လာသူအချို့က ရှာဖွေတွေ့ရှိသွားခဲ့သည်မှာ အယ်လီနာဧည့်သည်သရုပ်ဆောင်အဖြစ် ပါဝင်ခဲ့သော ရုပ်ရှင်ကားများစွာမှာ အားလုံး MGM မှ ထုတ်လုပ်ခဲ့ခြင်းပင် ဖြစ်လေသည်။

မကြာမီမှာပင် MGM ကလည်း Inception ဇာတ်ကား ရိုက်ကူးရေး အစီအစဉ်ကို စတင်ပြီဖြစ်ကြောင်း ကြေညာခဲ့ပြီး အယ်လီနာမှာ ဤရုပ်ရှင်ကား၏ အဓိက အမျိုးသမီး ဇာတ်ဆောင် ဖြစ်လေသည်။

အယ်လီနာ၏ နာမည်ဂုဏ်သတင်းမှာ နောက်ထပ် တစ်ဆင့် ထပ်မံမြင့်တက်သွားခဲ့ပြီး ၎င်းက လူအများအပြားကို သူ၏ ကြော်ငြာများအပေါ် ပို၍ အာရုံစိုက်လာစေခဲ့လေသည်။

ကြယ်ပွင့်၏ ပရိသတ်များ များပြားလာပါက ကြယ်ပွင့်၏ ဩဇာလွှမ်းမိုးမှုကြောင့် ဖုန်းယွီဖုန်းကို ဝယ်ယူမည့်သူများလည်း ပို၍များပြားလာမည်သာ ဖြစ်သည်။ ထို့အတူ ဖုန်းယွီဖုန်း ဝယ်ယူသူ ပိုများလာလေ အယ်လီနာကို အာရုံစိုက်လာသူများလည်း ပို၍များပြားလာမည်သာ ဖြစ်လေသည်။

၎င်းမှာ နှစ်ဦးနှစ်ဖက် အကျိုးအမြတ်ရရှိသည့် ရလဒ်တစ်ခုပင် ဖြစ်လေသည်။

ဖုန်း ထုတ်လုပ်သူ အများအပြားက အသီးသီး သက်ပြင်းချမိကြလေသည်၊ အစတုန်းက သူတို့သည် အယ်လီနာတွင် ဤမျှ အလားအလာများ ရှိနေသည်ကို မည်သို့ကြောင့်များ မတွေ့မြင်ခဲ့ရပါသနည်း။

အကယ်၍ သူတို့ကသာ အယ်လီနာကို အရင်ဆုံး စာချုပ်ချုပ်ဆိုနိုင်ခဲ့ပါက ယခုအချိန်တွင် အရောင်းပမာဏ တစ်ဟုန်ထိုး တက်နေသူများမှာ ၎င်းတို့ကိုယ်တိုင်ပင် ဖြစ်နေလောက်ပြီ မဟုတ်ပါလော။

အကယ်၍ Sony-Ericssonဖုန်းကသာ အခြားသော ဖုန်း ထုတ်လုပ်သူများ၏ ဤအတွေးကို သိရှိခဲ့မည်ဆိုပါက လုံးဝ မဖြစ်နိုင်ကြောင်းကို သူတို့အား ပြောပြမည်သာ ဖြစ်သည်။

Sony သည် မနှစ်ကတည်းက စောစောစီးစီးပင် အယ်လီနာ၏ မန်နေဂျာနှင့် ဆက်သွယ်ခဲ့ပြီး အယ်လီနာအား စာချုပ်ချုပ်ဆိုလိုခဲ့ကာ အယ်လီနာအား Sony ရုပ်ရှင်ထုတ်လုပ်ရေး၏ ရုပ်ရှင်များတွင် ပါဝင်သရုပ်ဆောင်ခွင့် ပေးနိုင်ကြောင်းလည်း ပြောဆိုခဲ့သေးသည်။

သူတို့က အယ်လီနာအား Sony-Ericssonဖုန်းကို ကိုယ်စားလှယ်လုပ်ခိုင်းရုံသာမကဘဲ Sony၏ အခြားသော ထုတ်ကုန်များ၏ ကုန်အမှတ်တံဆိပ် ကိုယ်စားလှယ်များကိုလည်း အယ်လီနာထံ ပေးအပ်သွားမည်ဖြစ်ရာ သူတို့ ကမ်းလှမ်းခဲ့သော အခြေအနေများမှာ သေချာပေါက် အလွန်တရာ ကောင်းမွန်လှပေသည်။

သို့သော် မည်သည့်အကြောင်းကြောင့်မှန်း မသိဘဲ အယ်လီနာ၏ မန်နေဂျာက ဒုတိယနေ့တွင်ပင် သူတို့အား အကြောင်းပြန်ကြားခဲ့ရာ ငြင်းပယ်လိုက်ခြင်းပင် ဖြစ်လေသည်။

Sony မှ လူများက အစတုန်းက ဈေးနှုန်းကြောင့် တစ်ဖက်လူ မကျေနပ်ခြင်းဖြစ်သည်ဟု ထင်မှတ်ခဲ့ကြသည်။ မည်သို့ပင်ဆိုစေ ကိုယ်စားလှယ်လုပ်ရမည့် ထုတ်ကုန်များက ဤမျှများပြားနေပြီဖြစ်ရာ တစ်ဖက်လူက ငွေပို၍ လိုချင်သည်မှာလည်း သင့်လျော်ပေသည်။ ထို့အပြင် သူတို့က အယ်လီနာအား Sony ရုပ်ရှင်ထုတ်လုပ်ရေးတွင် မည်သည့်ဇာတ်ကောင်နေရာမှ ပါဝင်သရုပ်ဆောင်ခွင့် ပေးမည်ဆိုသည်ကိုလည်း အတိအကျ မပြောဆိုခဲ့ပေ။

သူတို့က ဈေးနှုန်းအသစ်ကို ထပ်မံကမ်းလှမ်းခဲ့ရာ ဈေးနှုန်းကို အများကြီး မြှင့်တင်ပေးခဲ့ရုံသာမက အယ်လီနာအား Sony ရုပ်ရှင်ထုတ်လုပ်ရေး၏ နောက်ထပ် အကုန်အကျခံ ဇာတ်ကားကြီး တစ်ကားတွင် ဒုတိယ အမျိုးသမီး ဇာတ်ဆောင်အဖြစ် ပါဝင်စေမည်ဟုလည်း ကတိပေးခဲ့လေသည်။ ဤအခြေအနေမှာ မည်သည့် ရုပ်ရှင်ကြယ်ပွင့်သစ်လေးများအတွက်မဆို အကြီးမားဆုံးသော စေတနာထားမှုပင် ဖြစ်လေသည်။

ဥရောပနှင့် အမေရိကတွင် နာမည်အကြီးဆုံး အမျိုးသမီး အဆိုတော်များ ဆိုလျှင်ပင် သူတို့၏ ပထမဆုံး ရုပ်ရှင်ကားအတွက် ဤအဆင့်လောက်သာ ရရှိနိုင်မည်ဖြစ်သည်။ ဤရုပ်ရှင်ကားထဲမှ အဓိက အမျိုးသမီး ဇာတ်ဆောင်က ပန်းအိုး (အလှပြသက်သက်) ဖြစ်နေလျှင်သာလွဲ၍ သူတို့အား အဓိက အမျိုးသမီး ဇာတ်ဆောင်အဖြစ် နေရာပေးရန် စဉ်းစားမည် ဖြစ်လေသည်။

သို့သော် အယ်လီနာက နောက်တစ်ကြိမ် ထပ်မံငြင်းပယ်ခဲ့ပြန်ပြီး ဈေးနှုန်းစသည့် အခြေအနေများကြောင့် ပြဿနာဖြစ်ခြင်း မဟုတ်ဘဲ သူမက ဤထုတ်ကုန်များအတွက် ကိုယ်စားလှယ်လုပ်ရန် အစီအစဉ် မရှိသေးသောကြောင့်ဖြစ်ကာ ဈေးနှုန်းမည်မျှပင် မြင့်မားစွာ ပေးသည်ဖြစ်စေ သူမက သဘောတူမည်မဟုတ်ကြောင်းကို ရှင်းလင်းစွာ ဖော်ပြခဲ့လေသည်။

ဆိုနီမှ လူများမှာ အလွန်တရာ အံ့သြသွားကြလေသည်။ အယ်လီနာ၏ မန်နေဂျာက နှုတ်အားဖြင့် သဘောတူထားခဲ့ပြီး ဖြစ်ပါလျက် မည်သို့လုပ်၍ ပြန်ရောက်သည်နှင့် ကတိဖျက်သွားရသနည်း။ ဤအေဂျင်စီ ကုမ္ပဏီသည် သူတို့ လက်အောက်ရှိ အနုပညာရှင်များအပေါ် ထိန်းချုပ်နိုင်စွမ်း ဤမျှလောက်အထိ အားနည်းနေသည်လား။

၎င်းတို့ ဆိုနီသည် မူလက ပူးပေါင်းဆောင်ရွက်သည့် အခွင့်အရေးကို အသုံးချကာ အယ်လီနာအား သူတို့ Sony ဖျော်ဖြေရေးထံသို့ တိုက်ရိုက် လုယူရန် ရည်ရွယ်ထားခဲ့သော်လည်း ယခု ကြည့်ရသည်မှာ မျှော်လင့်ချက် မရှိတော့ပေ။

နောက်ပိုင်းမှသာ သူတို့ သိရှိသွားခဲ့ရသည်မှာ အယ်လီနာသည် တစ်ခုခုကို စောင့်ဆိုင်းနေပုံ ရကြောင်းကိုပင် ဖြစ်သည်။

ယခုအခါတွင်မူ Sonyမှ လူများမှာ အယ်လီနာသည် ဘာကို စောင့်ဆိုင်းနေခဲ့သည်ကို နားလည်သွားကြလေပြီ။ ယင်းမှာ သေချာပေါက် ဖုန်းယွီအမှတ်တံဆိပ်၏ ဤကုန်အမှတ်တံဆိပ် ကိုယ်စားလှယ်ကို စောင့်ဆိုင်းနေခဲ့ခြင်းပင် ဖြစ်လေသည်။

Sony မှ လူများသည် အယ်လီနာ၏ ထိုအေဂျင်စီ ကုမ္ပဏီသည် ကီရီလန်ကိုမှ ရင်းနှီးမြှုပ်နှံထားခြင်း ဖြစ်ကြောင်းကိုလည်း သေချာစွာ စုံစမ်းသိရှိထားပြီး ဖြစ်လေသည်။ ကီရီလန်ကိုနှင့် ဖုန်းယွီတို့၏ ဆက်ဆံရေးကိုမူကား လူအားလုံး သိရှိကြလေသည်။

သို့သော် မင်း အယ်လီနာ မရှိရင်ကော၊ ငါတို့ Sonyရဲ့ လက်အောက်မှာ အရည်အသွေးမြင့်မားတဲ့ အနုပညာရှင်တွေက နည်းနေသေးလို့လား။ သရုပ်ဆောင်၊ အဆိုတော် စတဲ့ ကြယ်ပွင့်တွေ၊ ငါတို့ဆီမှာ အများကြီး ရှိတယ်လေ။

အခြားသော ဖုန်းထုတ်လုပ်သူများ အားလုံးက ကြော်ငြာများ တိုးမြှင့်ထည့်ဝင်ရန် စတင်နေကြချိန်နှင့် အချိန်ကိုက်ပင်ဖြစ်ရာ သူတို့ Sony၏ လက်အောက်ရှိ Sony-Ericsson ဖုန်းကလည်း ဤအခွင့်အရေးကို လွတ်သွားခံမည် မဟုတ်ပေ။

ခဏတာအတွင်းမှာပင် ယခုနှစ်၏ ဖုန်းကြော်ငြာများသည် ရုတ်တရက်ဆိုသလို ပိုမိုများပြားလာသကဲ့သို့ ဖြစ်နေသည်ကို အားလုံးက သတိပြုမိသွားကြပြီး လမ်းမကြီးများ လမ်းသွယ်လေးများနှင့် အမျိုးမျိုးသော မီဒီယာများပေါ်တွင် ဖုန်းကြော်ငြာများကို မကြာခဏဆိုသလို မြင်တွေ့နေရလေသည်။

ရုပ်မြင်သံကြားကို ဖွင့်လိုက်ပါက ဖုန်းကြော်ငြာကို မြင်တွေ့ရပြီး သတင်းစာကို ဖွင့်လိုက်ပါက ဖုန်းကြော်ငြာကို မြင်တွေ့ရကာ မဂ္ဂဇင်းကို ဖွင့်လိုက်လျှင်လည်း မျက်နှာဖုံးပေါ်ရှိ ကြယ်ပွင့်၏ လက်ထဲတွင်ပင် ဖုန်းကို ကိုင်ထားလေရာ ၎င်းမှာလည်း ကြော်ငြာပင် ဖြစ်လေသည်။

အင်တာနက်ပေါ်တွင်မူ ထိုကြော်ငြာများမှာ ပို၍ပင်များပြားလှပြီး စာမျက်နှာ ကြော်ငြာများ ရှိရုံသာမကဘဲ ရုတ်တရက် ပေါ်လာတတ်သည့် မျက်နှာပြင်ငယ် ကြော်ငြာများပါ ရှိနေလေရာ ယင်းက လုပ်ငန်းရှင် အများအပြားကို အလွန်အံ့သြ၍ ရေရွတ်သွားစေခဲ့လေသည်။ ဒီနှစ် ဖုန်းထုတ်လုပ်သူအားလုံး ရူးကုန်ကြပြီလား။

******