အခန်း ၁၂၉၄
Vol. 113 Ch. 1294
အခန်း ၁၂၉၄
ရေသန့်စက် ပြုလုပ်ရန် လိုအပ်သော ကုန်ကြမ်းပစ္စည်းများကို သူ စစ်ဆေးကြည့်လိုက်ရာ ပထမအဆင့် ရှင်သန်ရေးကာလတုန်းက အသုံးပြုခဲ့သည့် ရေသန့်စက်နှင့် အတော်လေး ကွာခြားနေပြီး ကုန်ကြမ်းပစ္စည်း အမျိုးအစားအများအပြား ပိုမိုတိုးပွားလာသည်ကို သူတွေ့ရှိခဲ့ရသည်။
ရှောင်းယီသည် သူလိုအပ်သော ကုန်ကြမ်းပစ္စည်းများကို ဈေးကွက်ခန်းမ၌ ချက်ချင်း စတင်စုဆောင်းလိုက်တော့သည်။
လက်ရှိတွင် အသက်ရှင်ကျန်ရစ်သူ အားလုံးမှာ အသက်ရှင်နိုင်ရန်အတွက် ရုန်းကန်နေရဆဲ အခြေအနေတွင် ရှိနေကြပြီး အောက်ဆီဂျင်၊ လောင်စာဆီ သို့မဟုတ် လျှပ်စစ်ဓာတ်အားများ တစ်ခုမဟုတ်တစ်ခု အမြဲတမ်း ပြတ်လတ်နေကြသည်။
ထို့ကြောင့် ရှောင်းယီ တင်ထားသော အောက်ဆီဂျင်နှင့် အရင်းအမြစ်များ လဲလှယ်ခြင်း အရောင်းအဝယ်မှာ လူတိုင်းကြားတွင် အလွန်ပင် ရေပန်းစားနေခဲ့သည်။
ရလဒ်အနေဖြင့် ရှောင်းယီသည် ရေသန့်စက်အတွက် လိုအပ်သော ကုန်ကြမ်းအားလုံးကို လျင်မြန်စွာ စုဆောင်းမိသွားပြီး ကျွန်းအထိမ်းအမှတ်ကျောက်တိုင်ပေါ်တွင် စတင်ပြုလုပ်လိုက်တော့သည်။
အနည်းငယ် ရှုပ်ထွေးသော စက်ပစ္စည်းတစ်ခု ထွက်ပေါ်လာခဲ့သည်။
“သင် ရေသန့်စင်စက် (အဆင့် C) ၁ ခု ရရှိထားကြောင်း စနစ်က သိရှိပါသည်။ ယင်းကို အရေးပေါ်ကယ်ဆယ်ရေးယာဉ်အတွင်း တပ်ဆင်ရန်အတွက် အုတ်မြစ်ကျောက်များနှင့် အနက်ရောင်ရွှေများကို အသုံးပြုလိုပါသလား။”
“အသုံးပြုမယ်။”
“ကျေးဇူးပြု၍ တပ်ဆင်မည့်နေရာကို ရွေးချယ်ပေးပါ။”
ရှောင်းယီသည် ရေသန့်စက်ကို ရေတိုင်ကီ၏ ဘေးနားတွင် ထားလိုက်သည်။
တပ်ဆင်ပြီးသည်နှင့် ရှောင်းယီသည် ရေသန့်စက်၏ ရေဝင်ပိုက်ကို ရေတိုင်ကီထဲသို့ ထည့်လိုက်သည်။ ပါဝါဖွင့်၍ စက်ကို စတင်လိုက်ပြီးနောက် ရေသန့်စက်မှာ အလုပ်လုပ်တော့သည်။
ရေသန့်စက်၏ ရေထွက်ပေါက်တွင် သောက်ရေအိတ်တစ်အိတ်ကို အဆင်သင့်ခံထားပေးပြီးနောက် ရှောင်းယီ ၎င်းကို ဆက်၍ အာရုံမစိုက်တော့ပေ။
“နောက်ထပ် တစ်ရက်လောက် စမ်းသပ်ကြည့်ရမလား။”
ရှောင်းယီ အနည်းငယ် ဝေခွဲမရ ဖြစ်နေခဲ့သည်။
အာကာသချိတ်သည် ယနေ့တွင် ထောက်ပံ့ရေးသေတ္တာ နှစ်လုံးကို ဖမ်းယူရမိထားပြီးပြီ ဖြစ်သည်။ နောက်ထပ် ထောက်ပံ့ရေးသေတ္တာများကို ဆက်လက်ဖမ်းယူရမည်လော သို့မဟုတ် ဥက္ကာခဲများကိုပဲ ဆွဲယူရမည်လော။
ခဏမျှ စဉ်းစားပြီးနောက် ရှောင်းယီသည် ထောက်ပံ့ရေးသေတ္တာများကိုသာ ဆက်လက်ရှာဖွေရန် ဆုံးဖြတ်လိုက်သည်။ အစောပိုင်းကာလများတွင် ထောက်ပံ့ရေးသေတ္တာများအတွင်းရှိ ပစ္စည်းများသည် အသက်ရှင်သန်ရေး၏ အခြေခံအုတ်မြစ် ဖြစ်သည်။
ပတ်ပတ်လည်ရှိ ဥက္ကာခဲများမှမူ အလွန်ဆုံးရှိမှ ပစ္စည်းပမာဏ အနည်းငယ်သာ စုဆောင်းရရှိနိုင်မည်ဖြစ်သည်။
ထိုပစ္စည်းများကို ဈေးကွက်ခန်းမတွင် အောက်ဆီဂျင်နှင့် လဲလှယ်၍ အလွယ်တကူ ဝယ်ယူနိုင်သည်လေ။
ထို့ပြင် ပိုမိုအရေးကြီးသော ရေအရင်းအမြစ်နှင့် ပတ်သက်၍မူ လောလောဆယ်တွင် ကြယ်တံခွန်မှ ရေများကို သယ်ယူပေးရန် တစ်ယောက်ယောက်က ကူညီပေးနေသဖြင့် ထိုပစ္စည်းအနည်းငယ်လောက်ကို သူ လုံးဝ အရေးစိုက်နေစရာမလိုချေ။
ရှောင်းယီသည် အာကာသချိတ်အတွက် ပစ်မှတ်ကို သတ်မှတ်ပေးပြီးနောက် ကျွန်းအထိမ်းအမှတ်ကျောက်တိုင်ထံသို့ ပြန်လာခဲ့လိုက်သည်။
ယခုအခါ ပတ်ဝန်းကျင်ကို စူးစမ်းရှာဖွေပေးနိုင်သည့် အလင်းမျက်နှာပြင် ထောက်လှမ်းရေးကိရိယာ ရှိနေပြီဖြစ်ရာ ရှောင်းယီအနေဖြင့် စစ်ဆေးရန် မိမိမျက်စိကို အသုံးပြုနေစရာ မလိုတော့ပေ။ နောက်ဆုံးတွင် သူသည် ကျွန်းအထိမ်းအမှတ်ကျောက်တိုင်ရှေ့၌ ထိုင်ကာ အများသုံးချန်နယ်ရှိ မက်ဆေ့ခ်ျများကို ကြည့်ရှုရန် အချိန်ရသွားခဲ့တော့သည်။
“ချီးပဲကွာ...။ ငါ ရေသန့်စင်စက် ထုတ်လုပ်မှုပုံစံတစ်ခုတော့ ရထားပါရဲ့။ ဒါပေမဲ့ ကုန်ကြမ်းပစ္စည်းတွေ မလောက်ဘူးဖြစ်နေတယ်။”
“ဒါက လွယ်လွယ်လေးပဲလေ။ မင်းဆီမှာ အုတ်မြစ်ကျောက်တွေ ရှိနေသရွေ့ ကုန်ကြမ်းပစ္စည်း ဝယ်မရမှာ စိုးရိမ်နေစရာ လိုလို့လား။”
“မှန်တယ်။ ဒီနေရာမှာ အုတ်မြစ်ကျောက်တွေက တကယ့်ကို အသုံးဝင်ဆုံး ငွေကြေးပဲ။”
“မင်းတို့ပြောတော့ လွယ်တာပေါ့။ ဒါဆိုရင် စောစောက ငါ အုတ်မြစ်ကျောက်တွေနဲ့ အစားအသောက် လဲဖို့လုပ်တုန်းက ဘာလို့ ဘယ်သူမှ ဂရုမစိုက်ကြတာလဲ။”
ကျူးဝူက ဂရုချက်ထဲက စကားများကို မြင်သောအခါ မကျေမနပ်ဖြင့် ဝင်ပြောလိုက်သည်။
“ဟေး... ဒါ တံမြက်စည်းနောက် လိုက်နေတဲ့ အစ်ကိုဝက် မဟုတ်ဘူးလား။”
ကျူးဝူ၏ အိုင်ဒီမှာ ကချေသည်ဝက် ဖြစ်သောကြောင့် အခြားသူများက သူ့ကို အစ်ကိုဝက် ဟု ခေါ်ကြခြင်း ဖြစ်သည်။
“လစ်စမ်းပါ။ မင်းတို့ကမှ တံမြက်စည်းနောက် လိုက်နေတာ။ ငါက ကြယ်တံခွန်နောက်ကို ကပ်လိုက်နေတာကွ။”
ကျူးဝူက ချက်ချင်း ပြန်လည်ချေပလိုက်သည်။
“အုတ်မြစ်ကျောက်တွေက အသုံးဝင်တဲ့ ငွေကြေးဆိုတာ ဟုတ်ပေမဲ့ အခုအချိန်မှာ လူတိုင်းလက်ထဲမှာ အတော်အတန် ရှိနေကြတာပဲလေ။ ဘယ်သူက ကိုယ့်ရဲ့ အစားအသောက်နဲ့ အုတ်မြစ်ကျောက်ကို လဲချင်မှာလဲ။”
“အမှန်ပဲ။ ဝက်ကြီး... မင်းရဲ့ စဉ်းစားတွေးခေါ်ပုံကို နည်းနည်း ပြောင်းလဲဖို့ လိုလိမ့်မယ်။ ငါ မင်းကို အကြံတစ်ခု ပေးရရင် အုတ်မြစ်ကျောက်တွေကို သုံးပြီး ဆရာကြီးတစ်ယောက်ယောက်ဆီကနေ အောက်ဆီဂျင်တွေ၊ လောင်စာဆီတွေနဲ့ အရင်လဲလိုက်။ ပြီးမှ အဲဒီအောက်ဆီဂျင် ဒါမှမဟုတ် လောင်စာဆီတွေကို သုံးပြီး အစားအသောက်နဲ့ ထပ်လဲ။ အဲဒါဆိုရင် အဆင်ပြေမှာ သေချာတယ်။”
“အမ်... အဲဒါကို ဘာလို့ စောစောက မပြောကြတာလဲ။”
ကျူးဝူသည် ကျွန်းအထိမ်းအမှတ်ကျောက်တိုင်ပေါ်တွင် လူတိုင်းနှင့် စကားလက်ဆုံကျကာ ရယ်မောနေခဲ့သည်။ ဘာပဲဖြစ်ဖြစ် သူလည်း အတော်လေး ပျင်းနေသည်မဟုတ်ပါလော။
“စောစောပြောလည်း ထူးမှာမဟုတ်ပါဘူး။ မင်းဆီက အုတ်မြစ်ကျောက်တွေက အကန့်အသတ် ရှိတာပဲလေ။ တကယ်လို့ ထောက်ပံ့ရေးသေတ္တာတွေ မဖမ်းနိုင်ရင်တော့ အနှေးနဲ့အမြန် ကုန်သွားမှာပဲ။”
“ဒါပေါ့...အခုပြောလည်း နောက်မကျသေးပါဘူး။ မြန်မြန် မင်းရဲ့ အုတ်မြစ်ကျောက်တွေနဲ့ အောက်ဆီဂျင်တို့၊ လောင်စာဆီတို့နဲ့ လဲလိုက်တော့။ ပြီးရင် ငါ့ကို ဈေးပေါပေါနဲ့ ပြန်ရောင်း။ ငါအားလုံး သိမ်းကျုံးဝယ်ပေးမယ်။”
“ညီအစ်ကို... ငါ့ကိုလည်း နည်းနည်းလောက် ခွဲပေးပါဦး။ မင်း မသေခင် မင်းရဲ့ အုတ်မြစ်ကျောက်တွေကို အပြည့်အဝ အသုံးချသွားစမ်းပါ။”
“လခွမ်းပဲ...။ ဘယ်ကောင်က ငါသေတော့မယ် ပြောတာလဲ။ ငါ အခု မင်းတို့အားလုံးထက် ပိုပြီး သက်သောင့်သက်သာ နေနေရတယ်ကွ။”
ကျူးဝူက ရယ်မောရင်း ဆဲရေးတိုင်းထွာလိုက်သည်။
“ဟေး ဝက်ကြီး... မင်း ရူးသွားတာတော့ မဟုတ်ပါဘူးနော်။ ဟူး... ငါ မင်းကို အပြစ်မတင်ပါဘူးကွာ။ ကိုယ့်ကိုယ်ကိုယ် သေမင်းဆီကို ခြေတစ်လှမ်းချင်း လျှောက်လှမ်းနေရတာကို မျက်ဝါးထင်ထင် မြင်နေရတဲ့ ဘယ်သူမဆို ခံနိုင်ရည်ရှိမှာ မဟုတ်ဘူးလေ။”
“ဟုတ်တယ်။ သေမင်းကို ထိုင်စောင့်နေရုံကလွဲလို့ ဘာမှမလုပ်နိုင်တဲ့... အဲဒီခံစားချက်က တကယ့်ကို စိတ်ဆင်းရဲစရာပဲ။”
“ဝက်ကြီးအတွက် ငါ့နှလုံးသားက သုံးစက္ကန့်လောက် နာကျင်ရပါတယ်။ သုံး... နှစ်... တစ်... ပြီးပြီ။ ဝက်ကြီးရေ... မင်းရဲ့ အမွေတွေကို ငါ့ကိုသာ ပေးခဲ့လိုက်တော့။ မင်းရဲ့ မျိုးဆက်ကို ဆက်ခံဖို့ ငါ သေချာပေါက် ကူညီပေးပါ့မယ်။ မင်းမလျှောက်လှမ်းနိုင်ခဲ့တဲ့ လမ်းကို ငါအဆုံးထိ လျှောက်ပေးမယ်။”
“လူတိုင်းက တကယ်ကြီး အရမ်းအားနေကြတာလား။”
“ဒါမှမဟုတ် ဘာလုပ်ရဦးမှာလဲ။ ဘယ်အချိန်မှာ ထွက်လာမှန်းမသိတဲ့ ထောက်ပံ့ရေးသေတ္တာတွေကို စောင့်ရတာကလွဲလို့ လုပ်စရာ လုံးဝကို မရှိဘူးလေ။”
“အမှန်ပဲ။ အာကာသဝတ်စုံလည်း အဆင်သင့်မရှိတော့ ဒီလို လေးထောင့်ကန် ပုံးအသေးလေးထဲမှာပဲ ဟိုဟိုဒီဒီ လွင့်မျောနေရတာက ကမ္ဘာကြီးနဲ့ လုံးဝအဆက်ပြတ်နေသလိုပဲ။”
“အေးကွာ...။ ငါရောက်နေတဲ့ အရေးပေါ်ကယ်ဆယ်ရေးယာဉ်က မျောပါနေတဲ့ လူသူမရှိတဲ့ ကျွန်းတစ်ကျွန်းနဲ့ ပိုတူနေသလိုပဲ။”
“အဲ့ဒီနှိုင်းယှဉ်ချက်က မမှန်ဘူး။ ဟိုဂြိုဟ်တွေကမှ လူသူမရှိတဲ့ ကျွန်းတွေပဲ။ ငါတို့က အလွန်ဆုံးရှိမှ ဖောင်အစုတ်လေးတစ်စင်းစီပဲ။”
“ဟူး... ဘဝက ခက်ခဲလှပါပြီဆိုမှ ပိုပြီး ခက်ခဲအောင် မလုပ်ကြပါနဲ့။ ဒီလို ကြမ်းတမ်းစုတ်ပြတ်နေတဲ့ အရေးပေါ်ယာဉ်ကို ဘယ်တော့မှ အဆင့်မြှင့်တင်နိုင်မှာလဲ။”
“နောက်တစ်ခါရမယ့် ထောက်ပံ့ရေးသေတ္တာထဲမှာ အာကာသယာဉ်လိုမျိုး ထုတ်လုပ်မှုပုံစံ ပါလာပါစေလို့ပဲ မျှော်လင့်ရတာပဲ။ အဲဒါမှ ဒီအရေးပေါ်ယာဉ်ထဲမှာပဲ အတင်းအကြပ် အောင့်အည်းမနေရတော့မှာ။”
“ငါ မင်းကို စောစောစီးစီး အိပ်ရာဝင်လိုက်ဖို့ပဲ အကြံပေးချင်တယ်။ အိပ်မက်ထဲမှာဆိုရင် မင်းလိုချင်တာ အားလုံးရနိုင်တယ်။”
“အိပ်ရမှာလား။ လွင့်မျောနေရင်းနဲ့ ဘယ်သူက ကောင်းကောင်းအိပ်ပျော်မှာလဲ။ ငါက ငါးမှ မဟုတ်တာ။”
“ငါ ကောင်းကောင်းမအိပ်ရတာ သုံးညရှိပြီ။”
“အဲဒါက မင်း သိပ်မအိပ်ချင်သေးလို့ပါ။ အိပ်ချင်လာရင်တော့ အလိုလို အိပ်ပျော်သွားမှာပဲ။ တော်သေးတာက ငါက မတ်တပ်ရပ်နေရင်းတောင် အိပ်ပျော်နိုင်တဲ့ လူစားမျိုးမို့လို့ အဲဒီပြဿနာ လုံးဝမရှိဘူး။”
“ချီးပဲကွာ...။ ထောက်ပံ့ရေးသေတ္တာအလွတ်တစ်လုံး ဝယ်ချင်ပါတယ်။ ဈေးနှုန်းကို သီးသန့်စာပို့ပြီး လာပြောပေးပါ။”
“အမ်... အခု ထောက်ပံ့ရေးသေတ္တာတွေကိုတောင် ဝယ်လို့ရနေပြီလား။ အရင်တုန်းက လျှို့ဝှက်သေတ္တာတွေ ဝယ်ရသလိုပဲ။ တူညီတဲ့ဈေးနှုန်းပေးရပေမဲ့ အထဲက ဘာထွက်လာမလဲဆိုတာ လုံးဝမသိရဘူး။”
“မင်းတို့တွေ တကယ် ကစားတတ်တာပဲ။ ထောက်ပံ့ရေးသေတ္တာတွေကိုတောင် လျှို့ဝှက်သေတ္တာတွေအဖြစ် ပြောင်းပစ်ကြသေးတယ်။”
“မင်းတို့အားလုံး နားလည်မှုလွဲနေပြီ။ ငါဝယ်ချင်တာက ထောက်ပံ့ရေးသေတ္တာ အလွတ်ကွ။ ချီးပဲ... ဒီနေ့တစ်နေ့လုံး ထောက်ပံ့ရေးသေတ္တာတစ်လုံးမှ ရှာမတွေ့သေးဘူး။ ဒါပေမဲ့ ငါ အပေါ့အလေး သွားချင်လွန်းလို့ ပေါက်ကွဲတော့မယ်။”
ထိုအသက်ရှင်ကျန်ရစ်သူမှာ ထောက်ပံ့ရေးသေတ္တာအလွတ်ကို အိမ်သာအဖြစ် အသုံးပြုရန် ဝယ်ယူလိုခြင်း ဖြစ်နေသည်ကို တွေ့လိုက်ကြရ၏။
“ဒါဆို မင်းမနေ့က ရခဲ့တဲ့ ထောက်ပံ့ရေးသေတ္တာကော။”
တစ်ယောက်က စပ်စုကာ မေးလိုက်သည်။
“ပြောမနေပါနဲ့တော့။ အနံ့က နည်းနည်းပြင်းလွန်းတယ်လို့ ခံစားရလို့ အပြင်ကို တိုက်ရိုက် လွှင့်ပစ်လိုက်ပြီ။”
“နောက်ဆိုရင်တော့ နောက်ထပ် ထောက်ပံ့ရေးသေတ္တာတစ်လုံး မတွေ့မချင်း အောင့်ထားလိုက်တော့။ အန်ချင်စရာကြီးကွာ။”
“အပေါ်က ညီအစ်ကို... ငါ သိပါတယ်ကွာ။ မင်းကတော့ မင်းဟာမင်း သိမ်းထားတုန်းပဲ ဖြစ်ရမယ်။ ကိစ္စမရှိပါဘူး။ အနံ့ကို ဖြည်းဖြည်းချင်း ကျင့်သားရသွားမှာပါ။ အော့..။”
“ဒီထက် အနံ့သက်သာတဲ့ အကြောင်းအရာကို ပြောင်းပြောလို့မရဘူးလား။”
“ဒါက ရှောင်လွှဲလို့မရဘူးလေ။ စားသောက်တာနဲ့ စွန့်ပစ်တာက လူသားတွေရဲ့ အခြေခံ လိုအပ်ချက်ပဲ။ ဘာပဲဖြစ်ဖြစ် ဒါတွေကို မင်းရှောင်လွှဲလို့ မရဘူး။”
အများသုံးချန်နယ်ရှိ ဆွေးနွေးမှုများကို မြင်သောအခါ ရှောင်းယီ မျက်မှောင်အနည်းငယ် ကြုတ်သွားပြီး ကျူးဝူထံသို့ သီးသန့်စာ လှမ်းပို့လိုက်သည်။
“မင်းရဲ့ ကိုယ်ရေးကိုယ်တာကိစ္စတွေကို ဘယ်လို ဖြေရှင်းနေလဲ။”
“ထောက်ပံ့ရေးသေတ္တာထဲမှာပဲပေါ့။ အနံ့က တော်တော်လေး ပြင်းတယ်။”
ကျူးဝူက စိတ်ပျက်လက်ပျက်ဖြင့် ပြန်ဖြေလိုက်သည်။
“ထောက်ပံ့ရေးသေတ္တာ အသစ်တစ်လုံးနဲ့ လဲလိုက်။”
ရှောင်းယီက ထိုသို့ပြောရင်း ကျူးဝူထံသို့ ထောက်ပံ့ရေးသေတ္တာ အလွတ်တစ်လုံး ပို့ပေးလိုက်သည်။
ဤနေရာတွင် ထောက်ပံ့ရေးသေတ္တာအလွတ်များသည် သိပ်ပြီးအသုံးမဝင်သလို ရှောင်းယီကိုယ်တိုင်လည်း ၎င်းကို အိမ်သာအဖြစ် အသုံးပြုရန် မလိုအပ်ပေ။
မူလက ရှောင်းယီသည် ထောက်ပံ့ရေးသေတ္တာအလွတ်အားလုံးကို ကျူးဝူအား ပေးရန် ရည်ရွယ်ခဲ့သော်လည်း ကျူးဝူ၏ အရေးပေါ်ယာဉ် အရွယ်အစား အကန့်အသတ်ရှိသည်ကို ထည့်သွင်းစဉ်းစားကာ တစ်လုံးတည်းသာ လှမ်းပို့ပေးလိုက်ခြင်း ဖြစ်သည်။
“ကျေးဇူးအများကြီးတင်ပါတယ် သူဌေး။”
ကျူးဝူက ဝမ်းသာအားရ ပြောလိုက်သည်။
“လောလောဆယ် မစင်နဲ့ ဆီးစုဆောင်းတဲ့ကိရိယာ အပိုမရှိသေးလို့ ထောက်ပံ့ရေးသေတ္တာနဲ့ပဲ လောလောဆယ် အဆင်ပြေအောင် လုပ်ထားလိုက်ဦး။”
ရှောင်းယီက ပြောလိုက်သည်။