အခန်း ၇၂၈

အခန်း (၇၂၈) ဘုရင်နယ်ပယ်အောက်ဝယ်

သို့ရာတွင် စစ်မှန်သော နတ်ဘုရားအဆင့် နယ်ပယ်ဟူသည် ရှိ၊ မရှိကိုမူ မည်သူမျှ တိကျစွာ မသိနိုင်ချေ။

ဂိုဏ်းချုပ်၏ အစွမ်းအစအပြင် နတ်ဘုရားတစ်ပိုင်းအဆင့်ရှိသည်ဟု သံသယရှိရသော မဟာအကြီးအကဲနှစ်ဦးလည်း ရှိပေသေးသည်။

ထို့ကြောင့် မြူနှင်းဂိုဏ်းတွင် နတ်ဘုရားတစ်ပိုင်းအဆင့် အစွမ်းထက်ပုဂ္ဂိုလ် သုံးဦးအထိ ရှိနေခြင်း ဖြစ်ပေသည်။

ထိုသို့သော နတ်ဘုရားတစ်ပိုင်းအဆင့် ကျင့်ကြံသူများအပြင် မြူနှင်းဂိုဏ်း၌ အဆင့်အတန်း ကွဲပြားကြကုန်သော ဂိုဏ်းကြီးကြပ်သူ အကြီးအကဲများစွာလည်း ရှိကြသေးသည်။

အချို့မှာ ဘုရင်နယ်ပယ်သို့ ရောက်ရှိနေပြီဖြစ်သော်လည်း အချို့မှာမူ ဘိုးဘေးနယ်ပယ်၌သာ ရုန်းကန်နေရဆဲ ဖြစ်ချေသည်။

ချင်ယွမ်ဖုန်းသည် မြူနှင်းဂိုဏ်း၏ အလုံးစုံသော အင်အားကို နားလည်သဘောပေါက်သွားခဲ့ပြီ ဖြစ်သည်။ ဂိုဏ်းချုပ်နှင့် မဟာအကြီးအကဲတို့သည် အကြောင်းမဲ့ ထွက်ပေါ်လာမည် မဟုတ်ပေရာ အစွမ်းထက်လှသော ဘုရင်နယ်ပယ်အဆင့် အကြီးအကဲများသည်လည်း ကျင့်ကြံခြင်းအမှု၌သာ အလုပ်ရှုပ်နေကြပေလိမ့်မည်။

အဆုံးစွန်၌မူ ကျင့်ကြံခြင်း၏ ထိပ်ဆုံးအဆင့်သို့ ရောက်ရှိသွားပါက လောကဓာတ်၏ မူလအနှစ်သာရကို ရရှိနိုင်ပြီး နတ်ဘုရားတစ်ပိုင်းအဆင့်သို့ တက်လှမ်းနိုင်မည် ဖြစ်တန်ရာသည်။

ချင်ယွမ်ဖုန်းသည် မိမိ၏ခန္ဓာကိုယ်အတွင်းရှိ လောကဓာတ်၏ မူလအနှစ်သာရကို မတွေးဘဲ မနေနိုင်ဖြစ်သွားရသည်။ ယင်းကား ပြီးပြည့်စုံသော လောကဓာတ်၏ မူလအနှစ်သာရပင် ဖြစ်ချေသည်။

ချင်ယွမ်ဖုန်းအနေဖြင့် နဝမအဆင့် ဘုရင်နယ်ပယ်သို့ တက်လှမ်းနိုင်သရွေ့ နောက်ဆုံးခြေလှမ်းကို လှမ်းလှမ်းနိုင်ကာ နတ်ဘုရားအဆင့်သို့ တက်လှမ်းနိုင်မည် ဖြစ်ပေသည်။

သို့သော် ထိုအကြောင်းအရာကား နောင်ခါလာမှ နောင်ခါစျေးဖြစ်ပေရာ ယခုအချိန်၌မူ ချင်ယွမ်ဖုန်းအနေဖြင့် ယင်းအတွက် စိုးရိမ်ပူပန်နေရန် အချိန်မရှိသေးချေ။

ကျန်ရှိနေသော အကြီးအကဲများကိုမူ ချင်ယွမ်ဖုန်း ရင်ဆိုင်နိုင်စွမ်းရှိပေရာ ဤတစ်ခေါက် မြူနှင်းဂိုဏ်းသို့ သွားမည့်ခရီးစဉ်၏ အောင်မြင်နိုင်ခြေမှာ အလွန်ပင် မြင့်မားလှပေသည်။

ထို့အပြင် သတင်းကောင်းတစ်ခုလည်း ရှိသေးသည်။ မြူနှင်းဂိုဏ်း၏ ကမ္ဘာငယ်လေးကို မူလပိုင်ဆိုင်ခဲ့သူမှာ ကွယ်လွန်သွားခဲ့သည်မှာ ကြာမြင့်ပြီဖြစ်၍ ယခုအချိန်တွင် မည်သူမျှ ယင်းကို သန့်စင်နိုင်ခြင်း မရှိကြတော့ချေ။

တစ်နည်းအားဖြင့် ဆိုရသော် ဤကမ္ဘာငယ်လေးသည် လောလောဆယ်တွင် ပိုင်ရှင်မဲ့ ဖြစ်နေပေရာ ချင်ယွမ်ဖုန်းအနေဖြင့် မြူနှင်းဂိုဏ်းတံခါးသို့ တိတ်တဆိတ် ဝင်ရောက်သွားလျှင်ပင် ချက်ချင်း သိရှိသွားမည် မဟုတ်ပေ။

မြူနှင်းဂိုဏ်း၏ သလင်းကျောက်တံခါးကြီးမှာ ရတနာတစ်ခု ဖြစ်ချေသည်။ မြူနှင်းဂိုဏ်း၏ သီးသန့်ကျောက်စိမ်းတံဆိပ်ပြား ရှိသူများသာ ဝင်ရောက်နိုင်ပြီး မဟုတ်ပါက အပြင်ဘက်၌သာ ပိတ်ဆို့ခြင်း ခံရမည် ဖြစ်သည်။

ချင်ယွမ်ဖုန်း မျက်မှောင်ကုတ်မိသွားသည်။ မြူနှင်းဂိုဏ်းအတွင်းသို့ မည်သို့ဝင်ရမည်နည်းဟူသောအချက်က ပြဿနာတစ်ရပ် ဖြစ်နေချေပြီ။

မြူနှင်းဂိုဏ်း၏ ဖြတ်သန်းခွင့် ကျောက်စိမ်းတံဆိပ်ပြားကို ရရှိမှသာ မြူနှင်းဂိုဏ်းအတွင်းသို့ ဝင်ရောက်နိုင်မည် ဖြစ်သည်။ ချင်ယွမ်ဖုန်းသည် ဆက်လက်၍ မစောင့်ဆိုင်းတော့ဘဲ မတ်တတ်ရပ်ကာ နန်းတော်အပြင်ဘက်သို့ လျှောက်လှမ်းခဲ့ချေသည်။

ချင်ယွမ်ဖုန်း၏ ဘေးတွင် ရပ်နေသော တုချင်းသည် ချင်ယွမ်ဖုန်း ဘာလုပ်တော့မည်ကို သိရှိနေဟန် တူသော်လည်း မည်သည့်စကားမျှ မဆိုဘဲ ဖြည်းညှင်းစွာ အပြင်သို့ ထွက်ခွာသွားခဲ့သည်။

ကြီးကြပ်သူကြီး၏ ရုံးခန်းသို့ ပြန်ရောက်သောအခါ တုချင်းသည် ချင်ယွမ်ဖုန်းမှာ ချင်ကွေ့ ဖြစ်သည်ဟူသောအချက်ကို လုံးဝ မခြေဖျက်ဘဲ မေ့ဖျောက်ထားရန် ပြင်ဆင်နေစဉ် လုပ်ကြံသူတစ်ဦး သူမထံသို့ ရောက်ရှိလာခဲ့ချေသည်။

"တာဝန်ခံကြီး... အာဟိုင်ဆိုတဲ့ကောင်က တကယ်ပဲ ချင်ကွေ့ ဖြစ်လာတာလား၊ ကျွန်တော် မကျေနပ်ဘူး၊ သူ့ကို စိန်ခေါ်ချင်တယ်" ဟု အလင်းမဲ့ရွှေအဆင့် လူသတ်သမားတစ်ဦးက အေးစက်စွာ ပြောဆိုလိုက်သည်။

အလင်းမဲ့ရွှေအဆင့် လူသတ်သမားများသည် ဘိုးဘေးနယ်ပယ် အဆင့် ရှစ် အထက်ရှိသော သိုင်းပညာရှင်များ ဖြစ်ကြပြီး ယမမင်းဌာနချုပ်တွင်ပင် ယင်းတို့၏ အရေအတွက်မှာ အလွန်တရာ နည်းပါးလှချေသည်။

တုချင်းသည် အလင်းမဲ့ရွှေအဆင့် လူသတ်သမားကို တစ်ချက် ကြည့်လိုက်ရာ သူ၏ကျင့်စဉ်အဆင့်မှာ အဆင့်ရှစ် ဘိုးဘေးနယ်ပယ်မျှသာ ရှိသည်ကို တွေ့ရှိရသဖြင့် ခေါင်းကို ခါယမ်းလိုက်မိသည်။

"မင်းကို သေတွင်းမူးလို့ မရှာဖို့ ငါ အကြံပြုချင်တယ်၊ မင်းက အကြီးအကဲ ချင်ကွေ့ရဲ့ ပြိုင်ဘက် မဟုတ်ဘူး၊ ပြီးတော့ အကြီးအကဲ ချင်ကွေ့က အပြင်ကို ထွက်သွားပြီ၊ ဘယ်တော့ ပြန်လာမလဲဆိုတာ ငါတို့လည်း မသိဘူး" ဟု တုချင်းက တည်ငြိမ်စွာ ပြောကြားလိုက်သည်။

တုချင်း ထိုသို့ပြောသည်ကို ကြားသော် လူသတ်သမားသည် မျက်မှောင်ကုတ်ကာ သံသယစိတ်ဖြင့် မေးမြန်းလိုက်သည်။

"တာဝန်ခံကြီး... အာဟိုင်က တကယ်ပဲ အဲဒီလောက်တောင် အစွမ်းထက်လို့လား"

ချီဖုန်းချောက်ကမ္ဘာဝယ် ဖြစ်ပွားခဲ့သော စိန်ခေါ်ပွဲကို တုချင်း ပြန်လည်တွေးတောမိသွားသည်။

ချင်ယွမ်ဖုန်းသည် ဒေါသအမျက်ချောင်းချောင်း ထွက်ကာ ဘိုးဘေးနယ်ပယ်အဆင့် ကျွမ်းကျင်သူ ခြောက်ဦးကို သတ်ဖြတ်ခဲ့ရာ ယင်းအထဲ၌ နဝမအဆင့် ဘိုးဘေးနယ်ပယ်တွင် ရှိသော ချင်ဝူယန်း၏ ဆရာ ဖုမိုချိုးပင် ပါဝင်နေခဲ့ပေသည်။

ထိပ်သီးလူသတ်သမားနှစ်ဦး၏ လိုက်လံလုပ်ကြံခြင်းကို ခံရပြီးနောက် ပင်လယ်ပြင်သို့ ထွက်ပြေးလွတ်မြောက်သွားခဲ့သည်။

သူ သေဆုံးမသွားခဲ့ခြင်းကပင် ချင်ယွမ်ဖုန်း၏ ဇွဲလုံ့လ မည်မျှ ကြီးမားကြောင်း သက်သေပြနေချေသည်။

"ဘုရင်နယ်ပယ်အောက်က လူတွေကတော့ စောင့်ဆိုင်းနေကြတာ ပိုကောင်းလိမ့်မယ်" ဟု တုချင်းက ဤစကားတစ်ခွန်းတည်းကိုသာ ချန်ထားခဲ့လေသည်။

သူ၏ အမြင်၌မူ ဘုရင်နယ်ပယ်အဆင့်သို့ မရောက်ရှိသေးသူ မည်သူမဆို ချင်ယွမ်ဖုန်းကို စိန်ခေါ်ခြင်းသည် သေတွင်းသို့ ကိုယ်တိုင် သက်ဆင်းခြင်းနှင့် အတူတူပင် ဖြစ်ချေသည်။

ချင်ယွမ်ဖုန်းသည် ဘုရင်နယ်ပယ်အောက်၌ ပြိုင်ဘက်ကင်းသူ ဖြစ်ပေသည်။

ချင်ကွေ့ဟူသော အဆင့်အတန်းသည် ချင်ယွမ်ဖုန်းအပေါ် မည်သို့မျှ လွှမ်းမိုးနိုင်ခြင်း မရှိပေရာ သူသည် ချင်ကွေ့ ဖြစ်လာပြီးနောက်တွင်ပင် မည်သည့် ထိန်းချုပ်မှုမျှမရှိဘဲ လွတ်လပ်စွာ လှုပ်ရှားနေခဲ့သည်။

သူသည် မိမိ၏ မည်သူမည်ဝါဖြစ်ကြောင်းကို ယမမင်းထံ ထုတ်ဖော်ပြသရန်လည်း မကြောက်ရွံ့တော့ချေ။

ရက်အနည်းငယ် ကြာပြီးနောက် ချင်ယွမ်ဖုန်းသည် ရှေးဟောင်းတောအုပ်သို့ ရောက်ရှိလာခဲ့ပြီး ဟင်းလင်းပြင်၌ လွင့်မျောနေသော သလင်းကျောက် တံခါးဝကြီးကို ကြည့်ကာ မျက်မှောင်ကုတ်မိသွားသည်။

ပြီးခဲ့သည့်တစ်ခေါက် ဖြစ်ရပ်ပြီးနောက် မြူနှင်းဂိုဏ်းမှ လူအနည်းငယ်သာ အပြင်သို့ ထွက်လာကြတော့သဖြင့် ယင်းက ချင်ယွမ်ဖုန်းအတွက် ကြီးမားသော အခက်အနေကို ဖြစ်ပေါ်စေခဲ့သည်မှာ အမှန်ပင် ဖြစ်သည်။

ကျောက်စိမ်းတံဆိပ်ပြား မရှိဘဲနှင့် ကျောက်စိမ်းတံဆိပ်ပြားကို မရရှိနိုင်သလို ကျောက်စိမ်းတံဆိပ်ပြား မရှိပါကလည်း သလင်းကျောက် တံခါးဝအတွင်းသို့ မဝင်ရောက်နိုင်ပေရာ ယင်းက ချင်ယွမ်ဖုန်းကို ပူပန်သောက ရောက်စေချေသည်။

"ဒီလိုမှန်းသိရင် ပြီးခဲ့တဲ့တစ်ခေါက် မြူနှင်းဂိုဏ်းက အကြီးအကဲတွေကို သတ်တုန်းက ကျောက်စိမ်းတံဆိပ်ပြားတွေ အကုန်လုံး သိမ်းခဲ့ရမှာ၊ အခုတော့ မြူနှင်းဂိုဏ်းက လူတွေက အပြင်တောင် မထွက်ရဲကြတဲ့ လူဖျင်းတွေလို ဖြစ်နေကြပြီ" ဟု ချင်ယွမ်ဖုန်းက တိုးတိုးရေရွတ်လိုက်သည်။

ထိုစဉ်မှာပင် ချင်ယွမ်ဖုန်းသည် ဘေးဘက်မှ ပျံသန်းလာသော လင်းတသဏ္ဌာန် သားရဲတစ်ကောင်ကို လှမ်းမြင်လိုက်ရသဖြင့် စိတ်ကူးတစ်ခု ရရှိသွားခဲ့ချေသည်။

ယနေ့တွင်မူ သလင်းကျောက်တံခါးကြီးကို စောင့်ကြပ်ရန် ရှောင်ယု၏ အလှည့် ဖြစ်ပေရာ သလင်းကျောက်တံခါးကြီးအတွင်းသို့ အတင်းအဓမ္မ ကျူးကျော်ဝင်ရောက်ရန် ကြိုးစားသူ အလွန်နည်းပါးသဖြင့် ဤအလုပ်မှာ အလွန်ပင် ပျင်းရိဖွယ်ကောင်းလှသည်။

သားရဲများပင်လျှင် သလင်းကျောက်တံခါးပေါ်ရှိ စွမ်းအင်လှိုင်းဂယက်များကို ခံစားသိရှိနိုင်ကြသဖြင့် ယင်းနှင့် ဝေးရာသို့ ရှောင်ကွင်းသွားကြပေသည်။

ထို့ကြောင့် မြူနှင်းဂိုဏ်း၏ တပည့်များအတွက်မူ သလင်းကျောက်တံခါးကြီးကို စောင့်ကြပ်ရခြင်းက အပျင်းရိဆုံး အမှုကိစ္စတစ်ခု ဖြစ်နေခဲ့ချေသည်။

ရှောင်ယုတစ်ယောက် မှေးခနဲ အိပ်ပျော်လုဆဲဆဲမှာပင် သလင်းကျောက်တံခါးကြီး ပြင်းထန်စွာ တုန်ခါသွားသည်ကို ရုတ်တရက် သတိပြုမိလိုက်ရသဖြင့် လန့်နိုးသွားခဲ့ရသည်။

"ရန်သူတွေ လာတိုက်တာလား" ရှောင်ယုသည် ထိတ်လန့်တုန်လှုပ်စွာဖြင့် အပြင်ဘက်သို့ လှမ်းကြည့်လိုက်သော်လည်း သလင်းကျောက်တံခါးကြီး ပိတ်ဆို့နေမှုကြောင့် မည်သည့်အရာကိုမျှ မမြင်တွေ့ရချေ။

တုန်ခါမှု ရပ်တန့်သွားပြီးနောက် ထပ်မံ၍ တုန်ခါလာပြန်ရာ တစ်စုံတစ်ဦးက သလင်းကျောက်တံခါးကြီးကို တမင်သက်သက် တိုက်ခိုက်နေသကဲ့သို့ ဖြစ်နေချေသည်။

ရှောင်ယုသည် သတ္တိကို မွေးကာ တံခါးကို အနည်းငယ် ဟဟရုံမျှ ဖွင့်၍ တိတ်တဆိတ် ချောင်းမြောင်း ကြည့်ရှုလိုက်သည်။ ဤတစ်ကြိမ်တွင်မူ သူမသည် အပြင်ဘက်၌ ဘာဖြစ်နေသည်ကို တိကျစွာ မြင်တွေ့လိုက်ရချေပြီ။

လင်းတသဏ္ဌာန် သားရဲတစ်ကောင်သည် တံခါးကြီးကို ဝင်တိုက်မိထားခြင်း ဖြစ်ပြီး ၎င်း၏ အတောင်ပံများမှာလည်း ကျိုးပဲ့နေဟန် ရှိချေသည်။

"ဖြစ်မှဖြစ်ရလေ... သနားစရာကောင်းလိုက်တာ" ရှောင်ယုသည် မျက်မှောင်ကုတ်လျက် သလင်းကျောက်တံခါးကြီးကို ဖွင့်ကာ ထိုလင်းတကို ရှေးဟောင်းတောအုပ်အတွင်းသို့ ပစ်ချရန် ကြံရွယ်လိုက်သည်။

သို့သော် သူမသည် သလင်းကျောက်တံခါးအပြင်ဘက်သို့ ခြေလှမ်းလှမ်းလိုက်သည်နှင့် တစ်ပြိုင်နက် ကြီးမားသော လက်ဝါးကြီးတစ်ပြင်က ရုတ်တရက် ဆန့်ထွက်လာပြီး ရှောင်ယု၏ မျက်စိရှေ့မှောက်တစ်ခုလုံး မှောင်အတိ ကျသွားခဲ့ရချေတော့သည်။

ချင်ယွမ်ဖုန်းသည် လက်တစ်ဖက်ဖြင့် မြူနှင်းဂိုဏ်းတပည့်ဖြစ်သော ရှောင်ယုကို ဖမ်းဆွဲထားပြီး ကျန်လက်တစ်ဖက်ဖြင့် လင်းတသဏ္ဌာန် သားရဲကို လွှတ်ပေးလိုက်သည်။

"မင်းကို ဒုက္ခပေးရတော့မှာပဲ" ချင်ယွမ်ဖုန်းက တည်ငြိမ်စွာ ဆိုရင်း ကြိုးတစ်ချောင်းကို ထုတ်ကာ ကျောက်စိမ်းတံဆိပ်ပြားတွင် ချည်နှောင်လိုက်ပြီးနောက် ရှောင်ယုကို သလင်းကျောက်တံခါးအတွင်းသို့ တိုက်ရိုက် ပစ်ထည့်လိုက်သည်။

ထို့နောက် ချင်ယွမ်ဖုန်းသည် သူ၏လက်ထဲရှိ ကြိုးကို ဆွဲလိုက်ရာ ရှောင်ယု၏ ခါးဘေးမှ ကျောက်စိမ်းတံဆိပ်ပြားမှာ ပြုတ်ထွက်လာခဲ့ချေသည်။

"ဒါကိုပဲ ဟာကွက်ကို အသုံးချတာလို့ ခေါ်ရမှာပေါ့" ချင်ယွမ်ဖုန်းက ကျောက်စိမ်းတံဆိပ်ပြားကို ကိုင်ဆောင်လျက် အတွင်းသို့ လျှောက်လှမ်းရင်း တိုးတိုးရေရွတ်လိုက်သည်။

ယခုအခါတွင်မူ ချင်ယွမ်ဖုန်းသည် မြူနှင်းဂိုဏ်း၏ ကမ္ဘာငယ်လေးအတွင်းသို့ အောင်မြင်စွာ ဝင်ရောက်နိုင်ခဲ့ချေပြီ။

သူ၏ မျက်စိရှေ့မှောက်တွင် တန်းစီလျက်ရှိသော နတ်တောင်တန်းကြီးများနှင့် ယင်းတို့အကြား၌ ဖုံးကွယ်နေသော မျှော်စင်နန်းဆောင်များ ပေါ်ထွက်လာရာ မြေကမ္ဘာပေါ်ရှိ နတ်ဘုရားတို့၏ နယ်မြေတစ်ခုကဲ့သို့ပင် ဖြစ်ချေသည်။

"ဒါက မြူနှင်းဂိုဏ်းပေါ့..."

ချင်ယွမ်ဖုန်းသည် ရှောင်ယုကို တံခါးဝတွင် ပြန်လည် ထားရှိပေးခဲ့ပြီးနောက် သလင်းကျောက်တံခါးကြီးကို ပိတ်ကာ ကျောက်စိမ်းတံဆိပ်ပြားကို ရှောင်ယု၏ခါးတွင် ဂရုတစိုက် ပြန်လည် ချိတ်ဆွဲပေးခဲ့သည်။

ရှောင်ယုအနေဖြင့် ယခုအချိန်တွင် နိုးလာခဲ့လျှင်ပင် မိမိကိုယ်ကိုယ် အိပ်ပျော်သွားခဲ့သည်ဟုသာ ထင်မြင်သွားပေလိမ့်မည်။

ဤအမှုကိစ္စအဝဝကို ဆောင်ရွက်ပြီးနောက် ချင်ယွမ်ဖုန်းသည် ထိုနေရာမှ တိတ်တဆိတ် ထွက်ခွာခဲ့ပြီး အရိပ်များအတွင်းသို့ တိုးဝင်ကာ အတွင်းဘက်သို့ ဦးတည်သွားခဲ့ချေသည်။

မကြာမီအချိန်အတွင်းမှာပင် ရှောင်ယု နိုးလာခဲ့သည်။ ချင်ယွမ်ဖုန်းသည် သူမအား ဝိညာဉ်စွမ်းအားဖြင့်သာ လှုံ့ဆော်ခဲ့ခြင်း ဖြစ်ပြီး တစ်စုံတစ်ရာ ထိခိုက်နာကျင်စေခြင်း မရှိခဲ့ပေ။

"ငါ ဘာဖြစ်သွားတာလဲ" ရှောင်ယုသည် မိမိ၏ မျက်လုံးများကို ပွတ်သပ်ရင်း စောစောက ဖြစ်ပျက်ခဲ့သော အကြောင်းအရာကို ပြန်လည်သတိရသွားကာ ထိတ်လန့်အံ့ဩသွားခဲ့ရချေတော့သည်။