အခန်း ၁၂၅

အခန်း (၁၂၅) အစေခံမလေးတစ်ဦးအား သိမ်းသွင်းခြင်း၊ ဝမ်ပေါင်ကုန်သွယ်ရေး မျှော်စင်သို့ ပြန်လည်ရောက်ရှိခြင်း

"ကျွန်မကို ကယ်တင်ပေးခဲ့တဲ့အတွက်... ကျေးဇူးအများကြီးတင်ပါတယ် သခင်လေး"

ကျောက်လင်းအာက ရှုချွမ်း၏ ရှေ့မှောက်၌ အလေးအနက် ထပ်မံ၍ ဦးချဂါရဝပြုလိုက်တော့သည်။

"ဒီလိုလုပ်ဖို့ မလိုပါဘူး"

ရှုချွမ်းက သူမအား မြန်ဆန်စွာဖြင့် ပြန်လည်ထူမပေးလိုက်သည်။

"မင်းရဲ့ အိမ်က ဘယ်မှာလဲ၊ တခြား မိသားစုဝင်တွေကော ရှိသေးလား၊ မင်းရဲ့ အဖေ ကို စနစ်တကျ မြန်မြန်ဆန်ဆန် သင်္ဂြိုဟ်နိုင်ဖို့အတွက် သူတို့ကို သွားပြီး အကြောင်းကြားသင့်တယ်"

သူမက ဖခင်ဖြစ်သူ၏ ရုပ်အလောင်းကို ဖက်ထားဆဲ ဖြစ်သည်ကို မြင်ရသဖြင့် ရှုချွမ်းက ကြင်နာစွာဖြင့် သတိပေးလိုက်ခြင်း ဖြစ်သည်။

"အိမ်... ဟုတ်လား"

ကျောက်လင်းအာ၏ မျက်နှာထက်တွင် နက်ရှိုင်းလှသော ဝမ်းနည်းပူဆွေးမှုများ ပြည့်နှက်သွားခဲ့ပြီး သူမ၏ ပါးပြင်ထက်ရှိ မျက်ရည်ကြောင်းနှစ်ခုမှာ သိသာထင်ရှားလွန်းနေခဲ့သည်။

သူမ၏ မျက်ဝန်းများမှာ ဇဝေဇဝါ ဖြစ်နေခဲ့ပြီး မည်သည့်လှုပ်ရှားမှုမျှ ပြုလုပ်ခြင်း မရှိ‌ပေ။

အချိန်အတော်ကြာမှသာ...

သူမက နောက်ဆုံး၌ ဝမ်းနည်းပူဆွေးစွာဖြင့် စကားဆိုလာခဲ့သည်။

"ကျွန်မမှာ... အိမ်မရှိတော့ပါဘူး..."

ထိုသို့ ပြောဆိုပြီးသည်နှင့်တစ်ပြိုင်နက် ကျောက်လင်းအာသည် ပြန်လည်၍ ရှိုက်ကြီးတငင် ငိုကြွေးပြန်တော့သည်။ ၎င်းကို မြင်လိုက်ရသောအခါ ရှုချွမ်းလည်း သက်ပြင်းမချဘဲ မနေနိုင်တော့ပေ။

ထင်ရှားလှသည်မှာ... ဤအဖိုးအိုက သူမ၏ တစ်ဦးတည်းသော မိသားစုဝင် ဖြစ်ခဲ့ပုံရပြီး ယခုအခါ သူ သေဆုံးသွားခဲ့ပြီဖြစ်ရာ သူမအတွက် အိမ်ဟူ၍ ကျန်ရှိမနေတော့ပေ။

သူမအနေဖြင့် နောက်ထပ် ဘာလုပ်ရမည် သို့မဟုတ် မည်သည့်နေရာသို့ သွားရမည်ကိုပင် လုံးဝ သိရှိခြင်း မရှိတော့ပေ။

"မင်းရဲ့ အဖေ ကို သင်္ဂြိုဟ်ပြီးသွားရင်... ငါ့နောက်ကို လိုက်ခဲ့ပါ"

"တိုက်ဆိုင်ချင်တော့... ငါ့ရဲ့ 'ကျန်းယန်တောင်ထိပ်' က အင်မော်တယ် ဂူမှာ အစေခံမလေးတစ်ယောက် လိုအပ်နေတာနဲ့ ကွက်တိပဲ"

သူမက လွန်စွာ သင့်တော်လှပေသည်။ အကယ်၍ သူမသာ သဘောတူမည်ဆိုပါက ရှုချွမ်းအနေဖြင့် သူမအား ခေါ်ဆောင်သွားရန်အတွက် နောက်ထပ် အကြောင်းပြချက်အသစ်များကို လိုက်လံရှာဖွေနေရမည့် ဒုက္ခမှ ကင်းဝေးသွားမည် ဖြစ်သည်။

သူမက ဇာတ်ညွှန်းတစ်ခုနှင့် ဆက်နွှယ်နေသူ ဖြစ်ရာ ရှုချွမ်းအနေဖြင့် အနားမှ လုံးဝ ထွက်ခွာခွင့်ပေးလိမ့်မည် မဟုတ်ပေ။

သို့မဟုတ်ပါက ထိုဇာတ်ညွှန်း၏ ဇာတ်လိုက် ကို သူ မည်သည့်နေရာ၌ သွားရောက်ရှာဖွေရပါမည်နည်း။ ၎င်းမှာ သမုဒ္ဒရာထဲ၌ အပ်ရှာရသကဲ့သို့ ဖြစ်နေပေလိမ့်မည်။ သူသည် ဤကဲ့သို့သော အရာမျိုးကို လုံးဝ အဖြစ်ခံနိုင်မည် မဟုတ်‌ပေ။

"ငါ ဒီမြို့တော်မှာ နောက်ထပ် အချိန်အနည်းငယ်ကြာအောင် ဆက်ပြီး နေဦးမှာပါ၊ မင်း ငါ့ကို အချိန်မရွေး လာရှာနိုင်တယ်"

ထိုသို့ ပြောဆိုပြီးနောက် ရှုချွမ်းက သူ၏ သိုလှောင်လက်စွပ်အတွင်းမှ ယွမ်ကျောက်တုံး ရာဂဏန်းခန့်ကို ထုတ်ယူလိုက်ပြီး သူမ၏ ငြင်းပယ်မှုကိုပင် စောင့်ဆိုင်းမနေတော့ဘဲ ကျောက်လင်းအာ၏ လက်ထဲသို့ အတင်းအကျပ် ထည့်ပေးလိုက်တော့သည်။

"ကျေးဇူးတင်ပါတယ် သခင်လေး... ကျွန်မ သခင်လေးနောက်ကို လိုက်ဖို့ သဘောတူပါတယ်"

ကျောက်လင်းအာက ရှုချွမ်းအား ထပ်မံ၍ ကျေးဇူးတင်စကား ဆိုလိုက်ပြီး သူ၏ ကမ်းလှမ်းချက်ကို သဘောတူလက်ခံလိုက်တော့သည်။

သူမ၏ စိတ်ထဲ၌ ရှုချွမ်းအပေါ် ဖော်ပြ၍မရနိုင်သော ကောင်းမွန်သည့် ခံစားချက်တစ်ခု ရှိနေခဲ့သည်။ ၎င်းမှာ ရှုချွမ်းက သူမ၏ အသက်ကို ကယ်တင်ပေးခဲ့ခြင်းကြောင့်သာမကဘဲ... ရှုချွမ်း၏ ခန္ဓာကိုယ်မှ ထွက်ပေါ်နေသော ထူးခြားလှသည့် အော်ရာ ကြောင့်လည်း ဖြစ်သည်။

မည်သူမဆို သူ့ကို မြင်တွေ့ရပါက ကောင်းမွန်သော အထင်အမြင်တစ်ခု အလိုအလျောက် ဖြစ်ပေါ်လာစေတတ်သည်။

သူမအနေဖြင့် ရှုချွမ်းနောက်သို့ လိုက်ပါရန် သဘောတူရခြင်း၏ အဓိက အကြောင်းရင်းမှာလည်း ဤအချက်ကြောင့်ပင် ဖြစ်၏။

အခြားသော အကြောင်းရင်းတစ်ခုမှာမူ...

ဤနေရာ၌ သူမ တွယ်တာစရာဟူ၍ မည်သည့်အရာမျှ ကျန်ရှိမနေတော့ခြင်းကြောင့် ဖြစ်သည်။

ဤနေရာ၌ ဆက်လက်ရှိနေပါက ကျန်းယွမ်မင်းသားကြီး စံအိမ်တော်၏ လက်စားချေခြင်းကိုသာ ခံရမည်ဖြစ်ရာ သေတွင်းသို့ သက်ဆင်းရုံမျှသာ ရှိတော့သည်။

သို့သော်လည်း သူမ၏ ရှေ့မှောက်၌ ရှိနေသော ဤသခင်လေးမှာမူ... ပြင်းထန်လှသော ခွန်အားများကို ပိုင်ဆိုင်ထားပြီး ကျန်းယွမ်မင်းသားကြီး၏ တစ်ဦးတည်းသောသားကိုပင် တွန့်ဆုတ်ခြင်းမရှိဘဲ သတ်ဖြတ်ရဲခဲ့ရာ သေချာပေါက် အဆင့်အတန်း မြင့်မားလှသော နောက်ခံတစ်ခု ရှိနေရမည် ဖြစ်သည်။

သူ့နောက်သို့ လိုက်ပါသွားပါက သူမအနေဖြင့် သေဘေးအန္တရာယ်နှင့် ကြုံတွေ့ရလိမ့်မည် မဟုတ်ပေ။

အစေခံတစ်ဦး ဖြစ်ရသည့်တိုင်အောင် ၎င်းမှာ လွန်စွာ ကောင်းမွန်လှသော ရာထူး တစ်ခု ဖြစ်သည်။

"ဒီလိုဆိုရင်လည်း... သွားစရာရှိတာ သွားပြီး မြန်မြန် ပြန်လာခဲ့ပါ"

ရှုချွမ်းက စိတ်ကျေနပ်စွာဖြင့် ခေါင်းညိတ်ပြလိုက်သည်။ ဤသည်မှာ နောက်ထပ် ဝမ်းမြောက်စရာကောင်းလှသော အံ့သြစရာတစ်ခုပင် ဖြစ်သည်။

မဟာဝေဧကရာဇ် မြို့တော်အတွင်း၌ ကံကြမ္မာသမီးတော်တစ်ဦးကို ရရှိလိမ့်မည်ဟုတင်မကဘဲ သူမအား မိမိ၏ အစေခံအဖြစ်ပါ သိမ်းသွင်းနိုင်ခဲ့လိမ့်မည်ဟု သူ ထင်မှတ်မထားခဲ့မိ‌ပေ။

"ဒါက ငါ့ရဲ့ တိုကင် ပဲ၊ မင်း ကိစ္စတွေ ပြီးသွားတဲ့အခါ ဒါကို သုံးပြီး ငါ့ကို လာရှာနိုင်တယ်"

နောက်ဆုံးတွင် ရှုချွမ်းက သူ၏သရုပ်မှန် ပြသသည့် တိုကင် ကို ထုတ်ယူကာ ကျောက်လင်းအာထံသို့ ကမ်းပေးလိုက်သည်။

ဤတိုကင်မှာ သူ၏ အဆင့်အတန်းကို ဖော်ပြသည့် အရာတစ်ခုမျှသာမကဘဲ မိမိကိုယ်ကိုယ် ကာကွယ်နိုင်စွမ်းရှိသည့် အရာတစ်ခုလည်း ဖြစ်သည်။

သူက ၎င်းပေါ်၌ အစီအရင်တစ်ခုကို ထည့်သွင်းထားခဲ့ရာ... ကျောက်လင်းအာအား အန္တရာယ်ပြုရန် ကြံစည်သူမှန်သမျှမှာ ထိုအစီအရင်၏ တိုက်ခိုက်ခြင်းကို ခံရမည် ဖြစ်သည်။

မည်သို့ပင်ဆိုစေကာမူ ကျောက်လင်းအာမှာ အသက် ၁၀ နှစ် ကျော်အရွယ် သာမန်သေမျိုး မိန်းကလေးတစ်ဦးမျှသာ ဖြစ်ပြီး မိမိကိုယ်ကိုယ် ခုခံကာကွယ်နိုင်စွမ်း စိုးစဉ်းမျှ ရှိမနေ‌ပေ။

သို့သော်လည်း သူမက တိုင်းပြည်ကို ပျက်စီးနိုင်လောက်တဲ့ အလှတရား ကို ပိုင်ဆိုင်ထားသဖြင့် မလိုလားအပ်သော လောဘရမ္မက် အကြည့်များကို သေချာပေါက် ဆွဲဆောင်နေလိမ့်မည်။

ထို့အပြင်... ရှုချွမ်းက သူမအား ယွမ်ကျောက်တုံး ရာဂဏန်းခန့်ကို ယခုလေးတင် ပေးအပ်ခဲ့ခြင်း ဖြစ်သည်။

ဤမြင်ကွင်းကို အမှောင်ထဲတွင် ပုန်းကွယ်နေကြသော လူအများအပြားက မြင်တွေ့သွားခဲ့ကြပြီ ဖြစ်သည်။

ရှုချွမ်းအနေဖြင့် 'အပြစ်မဲ့သောသူက ရတနာရှိခြင်းကြောင့်သာ အပြစ်ရှိသူ ဖြစ်သွားရတတ်သည်' ဟူသော ဆိုရိုးစကားကို ကောင်းကောင်းကြီး သိရှိထားသည်။

သူက ယခုလေးတင် သိမ်းသွင်းလိုက်တဲ့ ကံကြမ္မာသမီးတော် အစေခံမလေးအား ဤကဲ့သို့သော အကြောင်းရင်းများကြောင့် အလဟဿ ပျောက်ကွယ်သွားခြင်းမျိုးကို လုံးဝ အဖြစ်မခံနိုင်ပေ။

"ကျေးဇူးတင်ပါတယ် သခင်လေး... ကျွန်မ သခင်လေးရဲ့ အမည်ကို သိခွင့်ရှိမလားဟင်"

ကျောက်လင်းအာက ထပ်မံ၍ ကျေးဇူးတင်စကား ဆိုလိုက်ပြီးနောက် မေးမြန်းလိုက်သည်။

"ထိုက်ယိမြင့်မြတ်နယ်မြေရဲ့ သူတော်စင်သား‌တော် ရှုချွမ်း"

ရှုချွမ်းက လက်နှစ်ဖက်ကို နောက်ပစ်လျက် ရပ်တန့်ကာ သူ၏ အမည်နှင့် နောက်ခံကို ဂုဏ်ယူဝင့်ကြွားစွာဖြင့် ထုတ်ဖော်ပြောဆိုလိုက်သည်။

အမှောင်ထဲရှိ အင်အားစုအမြောက်အမြားက သူ့အကြောင်းကို စုံစမ်းထောက်လှမ်းလိုနေကြသည်ကို သူ သိရှိထားသည်။

သူက မည်သည့် ဖုံးကွယ်မှုမျှမရှိဘဲ ဗြောင်ကျကျ ထုတ်ဖော်ပြသလိုက်ခြင်း ဖြစ်၏။

ဤသည်မှာ ကိုယ်ပိုင်ခွန်အားအပေါ် ခိုင်မာလှသော ယုံကြည်မှုကို ပြသခြင်းဖြစ်သကဲ့သို့... ထိုလူအုပ်ကြီးကို ခြိမ်းခြောက်ဟန့်တားလိုက်ခြင်းလည်း ဖြစ်သည်။

ဤအမျိုးသမီးကို ငါ ရှုချွမ်းက သဘောကျနှစ်သက်သည်။ သူမကို ထိခိုက်အောင် လုပ်ဝံ့တဲ့သူမှန်သမျှဟာ ငါ့ကို ဆန့်ကျင်တာနဲ့ အတူတူပဲ ဟူသော သဘောပင် ဖြစ်တော့သည်။

"အာ..."

ကျောက်လင်းအာ၏ မျက်ဝန်းများမှာ ပြူးကျယ်သွားခဲ့ရပြီး သူမ၏ ပါးစပ်လေးမှာလည်း အံ့သြလွန်းသဖြင့် ဟစိစိ ဖြစ်သွားခဲ့ရသည်။

ရှုချွမ်းတွင် ကြီးမားလှသော နောက်ခံ ရှိနေလိမ့်မည်ဟု သူမ ကြိုတင်တွေးတောမိထားခဲ့သော်လည်း... ရှုချွမ်းမှာ ထိုက်ယိမြင့်မြတ်နယ်မြေ၏ သူတော်စင်သားတော်တစ်ဦး ဖြစ်နေလိမ့်မည်ဟု သူမ လုံးဝ ထင်မှတ်မထားခဲ့မိပေ။

ဤမျှအထိ မြင့်မြတ်လှသော အဆင့်အတန်း ပဲလား။

ယခုအချိန်တွင်မူ... သူမအနေဖြင့် ရှုချွမ်း၏ အစေခံတစ်ဦး ဖြစ်လာရခြင်းအပေါ် စိုးစဉ်းမျှ တွန့်ဆုတ်နေခြင်း မရှိတော့ပေ။

ဘေးပတ်ပတ်လည်ရှိ ပုန်းကွယ်နေကြသော လူများမှာလည်း ရှုချွမ်း၏ အမည်ကို ကြားလိုက်ရသည်နှင့်တစ်ပြိုင်နက်... အားလုံးမှာ တိတ်တဆိတ် နောက်ဆုတ်သွားခဲ့ကြပြီး ဤသတင်းစကားကို မိမိတို့၏ သခင်များထံသို့ အပြေးအလွှား သွားရောက်အစီရင်ခံကြတော့သည်။

ဤအချက်နှင့် ပတ်သက်၍မှု... ရှုချွမ်းက များစွာ အာရုံစိုက်မနေခဲ့ပေ။

ခွန်အားနှင့် အဆင့်အတန်း အာဏာ ရှိနေသရွေ့ မည်သည့်နေရာသို့သွားသည်ဖြစ်စေ အမြဲတမ်း အာရုံစိုက်ခြင်းကို ခံရမည်သာ ဖြစ်သည်။

သို့သော်လည်း... ဤကဲ့သို့သော ဂုဏ်သတင်းကျော်စောမှုဟူသည်မှာ အပေါ်ယံမျှသာ ဖြစ်ပြီး ခေတ္တခဏမျှသာ အသုံးဝင်ပေလိမ့်မည်။

မိမိ၏ ကိုယ်ပိုင်ခွန်အားကို အဆက်မပြတ် မြှင့်တင်နေခြင်းကသာလျှင် အစစ်အမှန် လမ်းမှန် ဖြစ်ပေလိမ့်မည်။ ဤသည်မှာ ရှုချွမ်း အမြဲတမ်း နှလုံးသွင်းထားသော အမှန်တရားတစ်ခု ဖြစ်သည်။

ကျောက်လင်းအာက ယခုအခါတွင် သေဆုံးသွားခဲ့ပြီဖြစ်သော အဖိုးအို၏ ရုပ်အလောင်းကို ဟင်းသီးဟင်းရွက် လှည်းပေါ်သို့ တင်လိုက်သည်။

သူမက ထိုလှည်းကြီးကို ခက်ခဲပင်ပန်းစွာဖြင့် အတင်းတွန်းရွှေ့ကာ ထွက်ခွာသွားခဲ့တော့သည်။

သူမအနေဖြင့် ထိုယွမ်ကျောက်တုံးများကို ယူဆောင်လျက် ဒီအတိုင်း ထွက်ပြေးတိမ်းရှောင်သွားမည်လော ဟူသော အချက်နှင့် ပတ်သက်၍မူ... သူ စိုးရိမ်ပူပန်နေခြင်း မရှိပေ။

မည်သည့် ဉာဏ်ပညာရှိသူမဆို ဤကဲ့သို့သော မှားယွင်းလှသော ရွေးချယ်မှုမျိုးကို ပြုလုပ်လိမ့်မည် မဟုတ်ကြောင်း ယုံကြည်ထားသည်။

သူမ မြို့ပြင်သို့ ထွက်ခွာသွားသည်ကို စောင့်ကြည့်ပြီးနောက် ရှုချွမ်းက ခေါင်းကို ခါယမ်းလိုက်ပြီး ဤနေရာမှ ထွက်ခွာလာခဲ့တော့သည်။

အစောပိုင်းက အခြားသော လမ်းမတစ်ခုပေါ်တွင်... သူသည် ဤနေရာ၌ 'ဝမ်ပေါင်ကုန်သွယ်ရေးမျှော်စင်'တည်ရှိနေကြောင်း မြင်တွေ့ခဲ့ရပြီး လွန်စွာ ကြီးမားကျယ်ပြန့်လှပုံရသည်။

ကွက်တိပင် ဖြစ်သည်။

သူက လွန်ခဲ့သော ရက်အနည်းငယ်အတွင်းက သိုင်းပညာရှင် အမြောက်အမြားကို သတ်ဖြတ်ခဲ့သည်။

သူက ထိုလူများထံမှ ရတနာပစ္စည်း အမြောက်အမြားကို သိမ်းပိုက်ရရှိထားခဲ့ခြင်း ဖြစ်သည်။

၎င်းတို့အနက်မှ မိမိအတွက် အသုံးဝင်မည့်အရာများကို သူ ရွေးချယ်သိမ်းဆည်းထားခဲ့ပြီး ဖြစ်သည်။

ကျန်ရှိနေသော အရာများမှာမူ သူ၏အတွက်ကော သူ၏ ညီမလေး ရှုရှင်းလီအတွက်ပါ မလိုအပ်သော အမှိုက်များသာ ဖြစ်ကြသည်။

သူက ဤပစ္စည်းများကို ဝမ်းပေါင်ကုန်သွယ်ရေးအသင်း၌ သွားရောက်ရောင်းချကာ... ၎င်းတို့ကို ယွမ်ကျောက်တုံးများ သို့မဟုတ် ကျင့်ကြံမှုအတွက် သင့်တော်မည့် ရတနာပစ္စည်းများနှင့် လဲလှယ်နိုင်ခြင်း ရှိမရှိ သွားရောက်စစ်ဆေးကြည့်မည် ဖြစ်သည်။

ဤသည်မှာ အကျိုးရှိရှိ အသုံးပြုခြင်း ပင် ဖြစ်တော့သည်။

...

မကြာမီအချိန်အတွင်းမှာပင်... ရှုချွမ်းက ထိုကုန်သွယ်ရေးအသင်း ၏ ရှေ့မှောက်သို့ ရောက်ရှိလာခဲ့ပြီ ဖြစ်သည်။

၎င်းမှာ မဟာဝေဧကရာဇ် မြို့တော်၏ ဂုဏ်သတင်းနှင့်အညီ လွန်စွာ ခမ်းနားလှပေသည်။

ဤနေရာရှိ ကုန်သွယ်ရေးအသင်းမှာ ရှုချွမ်း ယခင်က မြင်တွေ့ခဲ့ဖူးသမျှသော အရာများထက် ပိုမို၍ ကြီးမားကျယ်ပြန့်ပြီး ခန်းနားထည်ဝါလှသည်။

သူ၏ ရှေ့မှောက်ရှိ ဝမ်ပေါင်ကုန်သွယ်‌ရေးမျှော်စင်ကိုပင် နမူနာကြည့်နိုင်သည်။

မြင့်မားလှသော အဆောက်အအုံကြီးတစ်ခုက မတ်မတ်ရပ်တည်နေခဲ့ပြီး... ရှုချွမ်း၏ အကြမ်းဖျင်း ခန့်မှန်းချက်အရ ၎င်းမှာ အနည်းဆုံး အထပ် ၁၀ ထပ်ထက်မနည်း မြင့်မားလှပေသည်။

အပြင်ဘက် အလှဆင် တည်ဆောက်ပုံများမှာလည်း သေသပ်လှပစွာ ထုဆစ်မွမ်းမံထားပြီး... စိန်ရွှေရတနာများအလား ဝင်းပတောက်ပနေလျက် အလွန်အမင်း ကြွယ်ဝချမ်းသာခြင်း အော်ရာ များကို ထုတ်ဖော်ပြသနေသည်။

ရှုချွမ်းက ဤအဆောက်အအုံကြီးအတွင်းမှ ပြင်းထန်လှသော အော်ရာ အချို့ကို အာရုံခံမိလိုက်သည်။

အားနည်းဆုံး ပုဂ္ဂိုလ်ပင်လျှင်... 'ကမ္မနယ်ပယ် အဆင့် ၉ ' ခန့် ရှိလိမ့်မည်ဟု သူ စိုးရိမ်မိသည်။

ဝမ်ပေါင်ကုန်သွယ်‌ရေးမျှော်စင်၏ ရှေ့မှောက်တွင်မူ... သိုင်းပညာရှင်များမှာ အဆက်မပြတ် ဝင်ထွက်သွားလာနေကြသည်။

ထိုလူအများစုမှာ ရတနာပစ္စည်းများကို လာရောက်ဝယ်ယူကြခြင်း ဖြစ်သော်လည်း အချို့လူနည်းစုမှာ ပစ္စည်းများကို လာရောက်ရောင်းချခြင်း သို့မဟုတ် အပ်နှံရောင်းချခြင်းများ ပြုလုပ်ကြခြင်း ဖြစ်သည်။

ဝမ်ပေါင်ကုန်သွယ်ရေး မျှော်စင်၏ ဝန်ဆောင်မှုများမှာ လွန်စွာ ပြည့်စုံလှပေသည်။

ရှုချွမ်း အဆောက်အအုံအတွင်းသို့ လှမ်းဝင်လိုက်သည်နှင့်တစ်ပြိုင်နက် အမျိုးသမီးတစ်ဦးက ချက်ချင်းပင် အနားသို့ လျင်မြန်စွာ လျှောက်လှမ်းလာခဲ့ပြီး ရှုချွမ်းကို ပြောလိုက်သည်။

"ဝမ်ပေါင် ကုန်သွယ်ရေးအသင်းကနေ... လှိုက်လှဲစွာ ကြိုဆိုပါတယ်ရှင်။ ကျွန်မတို့ရဲ့ ဝမ်ပေါင်ကုန်သွယ်ရေးအသင်းဟာ အရှေ့ဘက်ဒေသမှာ အကြီးမားဆုံး ကုန်သွယ်ရေးအသင်း ဖြစ်ပြီး ရတနာပစ္စည်း အမျိုးအစား စုံလင်စွာ ရှိပါတယ်ရှင်။ ကောင်းကင်တက်လှမ်းခြင်းနယ်ပယ် ကနေ ခန္ဓာကိုယ်သန့်စင်ခြင်းနယ်ပယ် အထိ... လိုအပ်တဲ့ ပစ္စည်းမှန်သမျှ အကုန်လုံး ရှိပါတယ်ရှင်။ သခင်လေးအနေနဲ့ ဘယ်လိုပစ္စည်းမျိုးကို ဝယ်ယူချင်လို့ပါလဲရှင့်"

ရှုချွမ်းက စိတ်ကျေနပ်စွာဖြင့် ခေါင်းညိတ်ပြလိုက်ပြီးနောက်... သိုလှောင်လက်စွပ်တစ်ခုကို ထုတ်ယူကာ ထိုအမျိုးသမီးထံသို့ ကမ်းပေးလိုက်ရင်း ပြောလိုက်သည်။

"ငါက ပစ္စည်းဝယ်ဖို့ လာတာမဟုတ်ဘူး။ ဒီသိုလှောင်လက်စွပ်ထဲမှာ ရှိတဲ့ ပစ္စည်းတွေက ယွမ်ကျောက်တုံး ဘယ်လောက်အထိ တန်ဖိုးရှိလဲဆိုတာကို ကူညီပြီး စစ်ဆေးပေးပါ၊ ငါ ဒါတွေအားလုံးကို မင်းတို့ ဝမ်ပေါင်ကုန်သွယ်‌ရေး ဆီမှာပဲ ရောင်းချချင်တယ်"

ဤအရာများမှာ သူ သေသပ်စွာ စနစ်တကျ ခွဲခြားပြီး သိုလှောင်လက်စွပ်အတွင်းသို့ ထည့်သွင်းထားခဲ့သော ပစ္စည်းများ ဖြစ်ကြသည်။

"သခင်လေး... ခဏလောက် စောင့်ဆိုင်းပေးပါရှင်။ ကျွန်မတို့ ဝမ်ပေါင် ကုန်သွယ်ရေးအသင်းမှာ အကောင်းဆုံး တန်ဖိုးဖြတ်ကျွမ်းကျင်သူတွေ ရှိနေတာမို့လို့... သခင်လေး စိတ်ကျေနပ်စေမယ့် ဈေးနှုန်းတစ်ခုကို သေချာပေါက် ပေးမှာပါရှင်"

အမျိုးသမီးက ရှုချွမ်း၏ သိုလှောင်လက်စွပ်ကို လှမ်းယူလိုက်ပြီး ယဉ်ကျေးသိမ်မွေ့စွာဖြင့် ပြုံးပြလိုက်သည်။

ရှုချွမ်းအနေဖြင့် အနည်းငယ် အံ့အားသင့်သွားခဲ့ရသည်။

ဤဝမ်ပေါင်ကုန်သွယ်ရေး အစေခံမလေးများမှာ တစ်ပုံစံတည်း တူညီသည့်အလား... သူတို့၏ အရောင်းမြှင့်တင်ရေး စကားလုံးများပင်လျှင် ထပ်တူကျလွန်းလှပေသည်။

သို့သော်လည်း ဤအချက်က ကောင်းမွန်လှပေရာ ရှုချွမ်းအတွက် မလိုအပ်သော အခက်အခဲများကို လျော့နည်းစေသည်။

ရှုချွမ်းက ပြုံးလိုက်ပြီး ပြောလိုက်သည်။ "ကောင်းပါပြီ... ဒါဆိုရင်လည်း မင်း သွားပြီး စစ်ဆေးလိုက်ပါ။ ငါ ဒီနေရာမှာပဲ ဒီအတိုင်း လှည့်ပတ်ကြည့်နေလိုက်မယ်"

အမျိုးသမီးက ထုံးစံအတိုင်း အားနာစရာကောင်းလှသော အပြုံးတစ်ခုကို ပေးအပ်လိုက်ပြီးနောက် ထိုသိုလှောင်လက်စွပ်ကို ယူဆောင်လျက် ကုန်သွယ်ရေးအသင်း၏ အတွင်းခန်းဆီသို့ ဝင်ရောက်သွားခဲ့တော့သည်။

ထိုအမျိုးသမီး ထွက်ခွာသွားပြီးနောက် ရှုချွမ်းက ဝမ်ပေါင်ကုန်သွယ်‌ရေး မျှော်စင်အတွင်း၌ အေးဆေးစွာဖြင့် လှည့်ပတ်ကြည့်နေခဲ့သည်။

၎င်းမှာ အရှေ့ဘက်ဒေသတွင် အကြီးမားဆုံး ကုန်သွယ်ရေးအသင်းဟူသော ဂုဏ်သတင်းနှင့်အညီ... ဤမဟာဝေဧကရာဇ် မြို့တော်ရှိ ဝမ်ပေါင်မျှော်စင်မှာ ပိုမို၍ပင် စည်ကားဝပြောလှပြီး မည်သည့် ရတနာပစ္စည်းမျိုးမဆို လက်တွေ့ကျကျ အလွယ်တကူ ဝယ်ယူရရှိနိုင်သည်။