အခန်း ၅၄
Vol. 6 Ch. 54
အခန်း (၅၄) ငါက ယဲ့မိသားစုက ယဲ့ပိုင်ရီ
အရက်သမားသည် ကျောက်လင်းအာက ဘာလှုပ်ရှားမှုမှမရှိသည်ကို မြင်သောအခါ သူ အမှန်တကယ် မူးနေသလား သို့မဟုတ် မူးချင်ယောင်ဆောင်နေသလား မသိရဘဲ ကျောက်လင်းအာကို ဆွဲလားရမ်းလားလုပ်ရန် အတင်းတိုးကပ်လာခဲ့သည်။
ကျောက်လင်းအာက မျက်မှောင်ကြုတ်လိုက်ပြီး အတင်းတိုးကပ်လာသော အရက်သမား၏ လက်ကို ကြည့်ကာ စိတ်ထဲတွင် အလွန်အမင်း မကျေမနပ် ဖြစ်သွားခဲ့သည်။
"သခင်က အရက်သောက်တာကို ဘာလို့မကြိုက်လဲဆိုတာ နားလည်သွားပြီ၊ ဒီအရက်သမားက တကယ်ကို စိတ်ပျက်စရာကောင်းတာပဲ"
ကျောက်လင်းအာက သူမ၏ ဝိညာဉ်စွမ်းအားများကို ထုတ်လွှတ်ပြီး သူမထံသို့ တိုးကပ်လာသော အရက်သမားကို ရိုက်ထုတ်ပစ်ရန် ပြင်လိုက်သည့်အချိန်မှာပင်...
သို့သော် ထိုစဉ်မှာပင် မည်သည့်နေရာမှန်းမသိ ရုတ်တရက် ပေါ်ထွက်လာသော ဝတ်စုံဖြူဝတ်ဆင်ထားသည့် ပုံရိပ်တစ်ခုက ကျောက်လင်းအာ၏ ရှေ့တွင် ကာဆီးပေးလိုက်သည်
"သတ္တိရှိလှချည်လား၊ ဘယ်က အရက်သမားလဲ၊ လူအများရှေ့မှာ မိန်းမပျိုလေးကို အနိုင်ကျင့်စော်ကားရဲတယ်ပေါ့" ဝတ်စုံဖြူဝတ်ဆင်ထားသူက ကျယ်လောင်စွာ အော်ဟစ်လိုက်ပြီး အရက်သမားကို ခြေထောက်ဖြင့် တစ်ချက် ကန်ထုတ်လိုက်ရာ ဝေးလံသောနေရာသို့ လွင့်ထွက်သွားတော့သည်။ "မင်းကတော့ အကောင်းနဲ့အဆိုးကို မခွဲခြားတတ်သေးဘူးပဲ"
ထို့နောက် ထိုဝတ်စုံဖြူနှင့် ပုံရိပ်က အထာကျကျဖြင့် လှည့်ကြည့်လာရာ ပြင်ဆင်မွမ်းမံထားပုံရသော ခန့်ညားသည့် မျက်နှာတစ်ခု ကျောက်လင်းအာ၏ ရှေ့သို့ ပေါ်လာခဲ့သည်။
ဝတ်စုံဖြူနှင့်လူက ညင်သာသောလေသံဖြင့် "မိန်းကလေး... ဘာမှမဖြစ်ဘူးမဟုတ်လား၊ ကျွန်တော်က ယဲ့မိသားစုက ယဲ့ပိုင်ရီ ပါ"
ကျောက်လင်းအာက သူ့ကိုယ်သူ ယဲ့ပိုင်ရီဟု မိတ်ဆက်နေသော လူကို ကြည့်ပြီး ဇဝေဇဝါ ဖြစ်သွားကာ စိတ်ထဲတွင် တွေးလိုက်မိသည်။ "ဒီလူက အရူးများလား၊ ဒါက အထာလာဖမ်းနေတာလား"
ကျောက်လင်းအာက ယဲ့ပိုင်ရီ သေချာစီစဉ်ထားသော လှုပ်ရှားမှုများကို လုံးဝ လျစ်လျူရှုထားလိုက်သည်။
ထို့အပြင် ကျောက်လင်းအာ သေချာမြင်သည်မှာ ဤယဲ့ပိုင်ယီ၏ ကျင့်ကြံခြင်းအဆင့်က ချီသန့်စင်ခြင်း အဆင့် ၇ ဖြစ်ပြီး ခုနက အရက်သမားက ချီသန့်စင်ခြင်း အဆင့် ၃ မျှသာ ရှိသဖြင့် ယဲ့ပိုင်ရီအနေဖြင့် အရက်သမား၏ ကျင့်ကြံခြင်းအဆင့်ကို မမြင်ဘဲမနေနိုင်ပေ။
သူမ ကိုယ်တိုင် ပြသထားသော ကျင့်ကြံခြင်းအဆင့်ကလည်း အရက်သမားအချို့ကို သတ်ပစ်ရန်ပင် ပိုနေသေးသည်ကို ယဲ့ပိုင်ယီ မြင်နိုင်ပါသည်။
နှစ်ယောက်ကို နှိုင်းယှဉ်ကြည့်ပါက အရက်သမားသည် ကျောက်လင်းအာကို ဘယ်လိုမှ ထိခိုက်အောင် လုပ်နိုင်မည်မဟုတ်ပေ။
ထို့ကြောင့် ယခုအချိန်တွင် ယဲ့ပိုင်ရီ၏ အပြုအမူက အလွန် ထူးဆန်းနေခဲ့သည်။
"မိန်းကလေး... မင်းက ဒီဝမ်နန်မြို့ကို ပထမဆုံးအကြိမ် လာတာလား၊ အရင်က ဘာလို့မတွေ့ဖူးတာလဲ၊ ကျွန်တော်တို့ ယဲ့မိသားစုက ဒီဝမ်နန်မြို့မှာ အတိုင်းအတာတစ်ခုအထိ ဩဇာရှိပါတယ်၊ မင်းအတွက် လမ်းပြလုပ်ပေးဖို့ စိတ်မရှိဘူးမဟုတ်လား"
ယဲ့ပိုင်ရီက ကျောက်လင်းအာ စကားမပြောသည်ကို မြင်သောအခါ ကျောက်လင်းအာက သူ၏ ဆွဲဆောင်မှုအောက်တွင် နစ်မြောသွားသည်ဟု ထင်မှတ်ကာ ယုံကြည်ချက်အပြည့်ရှိသော မျက်နှာဖြင့် ပြောဆိုနေခဲ့သည်။
ကျောက်လင်းအာက သူ့ဘာသာ တစ်ယောက်တည်း စကားတွေပြောနေသော ယဲ့ပိုင်ရီကို ဆက်လက် အကဲခတ်နေပြီး အဝေးတွင် ကန်ထုတ်ခံလိုက်ရသော အရက်သမားမှာမူ ဘယ်ရောက်သွားမှန်းမသိ ပျောက်ကွယ်သွားခဲ့ပြီ ဖြစ်သည်။
"မိန်းကလေး... မင်းက ကျွန်တော် ယဲ့ပိုင်ရီ ပြောတဲ့စကားကို မယုံတာလား" ကျောက်လင်းအာက သူ့ကို လုံးဝ အဖက်မလုပ်သည်ကို မြင်ရသဖြင့် ယဲ့ပိုင်ရီက ဆက်လက် ပြောဆိုနေရင်း ခန္ဓာကိုယ်ချင်းကမူ ကျောက်လင်းအာထံသို့ တဖြည်းဖြည်း ပိုမိုတိုးကပ်လာခဲ့သည်။
ဤအချိန်တွင် အဝေးတစ်နေရာမှ လူအချို့က တိုးတိုးတိတ်တိတ် ဝေဖန်ပြောဆိုနေကြပြီ ဖြစ်သည်။
"ဒီယဲ့မိသားစုက ယဲ့ပိုင်ရီ တစ်ယောက် ပြန်ပေါ်လာပြန်ပြီ၊ ယဲ့မိသားစုလို မိသားစုကြီးတစ်ခုက ဘာလို့ ဒီလို အသုံးမကျတဲ့ သားမိုက်တစ်ယောက် ထွက်လာရတာလဲ"
"ဟုတ်ပဗျာ၊ ငါသာ သူ့လိုနေရာမျိုးမှာရှိပြီး ယဲ့မိသားစုမှာ အဲဒီလို အဆင့်အတန်းမျိုး ရှိမယ်ဆိုရင် ကျင့်ကြံခြင်းအဆင့်က ဒီလောက်ပဲ ရှိမှာမဟုတ်ဘူး"
"မင်းတို့ မသိဘူးလား၊ ဒီယဲ့မိသားစု သခင်လေးက အလယ်အလတ်အဆင့် ဝိညာဉ်အမြစ်ပဲ ရှိတာ၊ ဒီလောက်အသက်ငယ်ငယ်နဲ့ ချီသန့်စင်ခြင်း အဆင့် ၇ အထိ ရောက်နေတာက သူ့အဖေဖြစ်တဲ့ မိသားစုခေါင်းဆောင်က ဆေးလုံးတွေ အတင်းကျွေးပြီး ပျိုးထောင်ပေးထားလို့ပဲ"
"နှမြောစရာကောင်းလိုက်တာ၊ ဒီလောက် လှပတဲ့ မိန်းကလေးတစ်ယောက်ကတော့ သူ့လက်ထဲမှာ ဒုက္ခရောက်ရဦးမယ်"
"သူ့ပုံစံနဲ့ ယဲ့ပိုင်ရီလို့ အမည်ပေးထားတာက စာသားထဲက ဝတ်စုံဖြူသူရဲကောင်း ပုံရိပ်ကို လုံးဝ အဖျက်ဆီးခံလိုက်ရသလိုပဲ"
"အားလုံး တိတ်တိတ်နေကြစမ်း၊ ဒီယဲ့ပိုင်ရီ အပြင်ထွက်တိုင်း အနည်းဆုံး အုတ်မြစ်ချခြင်း အဆင့် ကျင့်ကြံသူ နှစ်ယောက် သုံးယောက်လောက်က အမှောင်ထဲကနေ ကာကွယ်ပေးနေတာ၊ အဲဒီ အုတ်မြစ်ချခြင်း အဆင့် ကျင့်ကြံသူတွေရဲ့ မှတ်တမ်းထဲမှာ ပါသွားရင် နောက်မှ စာရင်းရှင်းခံရလိမ့်မယ်"
"....."
ထိုလူက ပြောလိုက်သည်နှင့် ခုနက ဝေဖန်ပြောဆိုနေကြသော လူအုပ်ကြီးမှာ ချက်ချင်းပင် ငြိမ်သက်သွားခဲ့ကြသည်၊ ပြောဆိုချင်လျှင်ပင် အသံအကျယ်ကြီး မပြောရဲကြတော့ပေ။
"မိန်းကလေး... မင်း တစ်ခုခုကြောင့် လန့်သွားတာလား၊ မင်းကို ကျွန်တော့်ရဲ့ ယဲ့မိသားစုကို ခေါ်သွားပြီး သမားတော် တွေနဲ့ ပြသပေးရမလား၊ ကျွန်တော်တို့ ယဲ့မိသားစုရဲ့ သမားတော် တွေက ဝမ်နန်မြို့မှာ ဆေးပညာ အလွန်တော်တယ်လို့ နာမည်ကြီးတယ်"
ပြောဆိုနေရင်းနှင့် ယဲ့ပိုင်ရီ၏ လက်က ကျောက်လင်းအာ၏ ပုခုံးပေါ်သို့ လှမ်းကိုင်ရန် ပြင်လိုက်သည်။
ကျောက်လင်းအာက ယဲ့ပိုင်ယီ ကမ်းလာသော လက်ကို ရွံရှာစွာ တစ်ချက် စောင်းငဲ့ကြည့်လိုက်ပြီး "ဖယ်စမ်း"
ကျောက်လင်းအာ၏ ခန္ဓာကိုယ်တစ်ခုလုံးမှ ဝိညာဉ်စွမ်းအားများ ပေါက်ကွဲထွက်လာပြီး ယဲ့ပိုင်ရီ ကမ်းလာသော လက်ကို တိုက်ရိုက် ရိုက်ထုတ်ပစ်လိုက်သည်။
တစ်ကိုယ်လုံး ကျင့်ကြံခြင်းအဆင့်ကို ဆေးလုံးများဖြင့်သာ ကျွေးမွေးပျိုးထောင်ထားခဲ့သော ယဲ့ပိုင်ရီက ကျောက်လင်းအာ၏ ပြိုင်ဘက် မည်သို့ ဖြစ်နိုင်ပါမည်နည်း၊ ထို့အပြင် ကျောက်လင်းအာ၏ အစစ်အမှန် စွမ်းရည်က ယဲ့ပိုင်ရီထက် အဆမတန် မြင့်မားလွန်းနေခဲ့သည်။
မည်မျှအထိ မြင့်မားသနည်းဟု မေးလျှင် အနည်းဆုံး တောင်တစ်လုံးလောက် မြင့်မားသည်ဟု ဆိုရပေမည်။
ကျောက်လင်းအာ၏ ဝိညာဉ်စွမ်းအား အနည်းငယ် လှုပ်ခတ်မှုမျှဖြင့် ယဲ့ပိုင်ရီကို တိုက်ရိုက် လွင့်ထွက်သွားစေခဲ့သည်။
"အား..." နာကျင်စွာ အော်ဟစ်သံနှင့်အတူ ယဲ့ပိုင်ရီက ဆယ် မီတာ အကွာအဝေးသို့ လွင့်ထွက်သွားတော့သည်။
သို့သော် ယဲ့ပိုင်ရီ မြေပြင်ပေါ်သို့ လဲကျမသွားခဲ့ပေ။
ထိုအချိန်တွင် ကြီးမားသော လက်တစ်ဖက်က ယဲ့ပိုင်ရီ၏ ကျောပြင်ကို မြဲမြံစွာ လှမ်းထိန်းပေးလိုက်သည်။
ယဲ့ပိုင်ရီ၏ ကျောပြင်ကို လှမ်းထိန်းပေးလိုက်သော လက် ပိုင်ရှင်က စိတ်ထဲတွင် သက်ပြင်းတစ်ချက် ချလိုက်မိပြီး မတတ်သာဘဲ ခေါင်းခါယမ်းလိုက်သည်။ "မိသားစုခေါင်းဆောင်က ဘယ်လို အကောင်မျိုးကို မွေးထားတာလဲ"
စိတ်ထဲတွင် မကျေမနပ် ဖြစ်နေသော်လည်း သူ၏ တာဝန်က ယဲ့ပိုင်ရီကို ကာကွယ်ရန် ဖြစ်သည်။
"သခင်လေး... ဘာမှမဖြစ်ဘူးမဟုတ်လား"
ယဲ့ပိုင်ရီကတော့ အရှက်ရပြီး ဒေါသထွက်နေခဲ့သည်၊ သူက ကျောက်လင်းအာကို စောစောကတည်းက သတိပြုမိထားခြင်း ဖြစ်သည်။
ကျောက်လင်းအာ၏ အာရုံစိုက်မှုကို ရရှိရန်အတွက် အရက်သမားတစ်ယောက်ကို တမင်သက်သက် အကွက်ဆင်ကာ ပြဿနာရှာခိုင်းခဲ့ခြင်း ဖြစ်သည်။
ထို့နောက် သူကိုယ်တိုင် အထာကျကျ ပေါ်ထွက်လာပြီး ကျောက်လင်းအာကို ကူညီဖြေရှင်းပေးကာ ပြီးပြည့်စုံသော ပုံရိပ်တစ်ခုဖြင့် ပွဲဦးထွက်ရန် ပြင်ဆင်ခဲ့ခြင်း ဖြစ်သည်။
သို့သော် ကျောက်လင်းအာက သူ၏ ကျေးဇူးကို လုံးဝ အသိအမှတ်မပြုသည့်အပြင် သူ့ကိုပါ ရိုက်ထုတ်ပစ်လိုက်သဖြင့် သူ၏ အထာကျပြီး ပြီးပြည့်စုံသော ပုံရိပ်ကို လုံးဝ ပျက်စီးသွားစေခဲ့သည်။
ယဲ့ပိုင်ရီ၏ စိတ်ထဲတွင် နာကျည်းမုန်းတီးမှုများ ပြည့်နှက်သွားခဲ့သည်၊ သူ သဘောကျမိသော သားကောင်က သူ၏ လက်ထဲမှ လွတ်မြောက်သွားခြင်းမျိုး တစ်ခါမျှ မရှိခဲ့ဖူးပေ။
"သူမ လက်ပါလိုက်တာကို မမြင်ဘူးလား၊ ဘာလို့ ကြောင်ကြည့်နေတာလဲ"
"သူမကို ငါ့အတွက် ဖမ်းခေါ်ခဲ့စမ်း၊ သူမကို သေသေချာချာ အပြစ်ပေးရမယ်"
"ငါ ယဲ့ပိုင်ရီက အနိုင်ကျင့်ရလွယ်တဲ့လူ မဟုတ်ဘူးဆိုတာကို သူမ သိစေရမယ်"
"ဟုတ်ကဲ့ပါ" ယဲ့မိသားစုမှ အုတ်မြစ်ချခြင်း အဆင့် ကျင့်ကြံသူသည်လည်း စိတ်ထဲတွင် ခေါင်းခါယမ်းကာ သက်ပြင်းချရုံသာ တတ်နိုင်တော့သည်၊ မျက်နှာပေါ်တွင်မူ ယဲ့ပိုင်ရီ၏ အမိန့်ကို နာခံရပေမည်။
ဤကဲ့သို့သော ကိစ္စမျိုးကို သူ ပြုလုပ်ခဲ့သည်မှာ ပထမဆုံးအကြိမ် မဟုတ်တော့ပေ။
ယဲ့မိသားစု အုတ်မြစ်ချခြင်း အဆင့် ကျင့်ကြံသူ၏ ဝိညာဉ်စွမ်းအားများ အပြင်သို့ ထွက်ပေါ်လာပြီး အုတ်မြစ်ချခြင်း အဆင့် ကျင့်ကြံခြင်း စွမ်းအားများ အထင်အရှား ပေါ်ထွက်လာခဲ့သည်။
"ယဲ့မိသားစု အုတ်မြစ်ချခြင်း အဆင့် ကျင့်ကြံသူ ပါလာပြီ၊ ဒီမိန်းကလေးတော့ ကံဆိုးတော့မှာပဲ" ဘေးက ကြည့်နေသော လူအုပ်ကြီးမှာ စိတ်ထဲတွင် ကရုဏာသက်ကာ နှမြောတသ ဖြစ်နေကြသည်။
ကျောက်လင်းအာက ယဲ့မိသားစု အုတ်မြစ်ချခြင်း အဆင့် ကျင့်ကြံသူ၏ ဝိညာဉ်စွမ်းအားများ ပေါ်ထွက်လာသည်ကို မြင်သောအခါတွင်လည်း ဘာလှုပ်ရှားမှုမှမရှိဘဲ တည်ငြိမ်နေခဲ့သည်။
အုတ်မြစ်ချခြင်း အဆင့် ၂ မျှသာ ရှိသဖြင့် သူမကို ကြောက်လန့်သွားစေရန် မလုံလောက်သေးပေ။
"ဒါက သခင် ခဏခဏ ပြောလေ့ရှိတဲ့ ကလေးကိုရိုက်ရင် လူကြီးပါလာတတ်တယ် ဆိုတဲ့ သဘောလား"
"ကျင့်ကြံခြင်းလောကက ဒီလိုပဲဆိုတာ သိလို့ သခင်က အပြင်ထွက်ရတာကို သိပ်မကြိုက်တာနေမှာ"
"ဒီနေ့တော့ သခင့်အတွက် ပြဿနာရှာမိပြီ ထင်တယ်၊ ပြန်ရောက်ရင် သခင်က ငါ့ကို သေချာပေါက် ဆူတော့မှာပဲ"
ကျောက်လင်းအာက စိတ်ထဲတွင် သူမကိုယ်သူမ အပြစ်တင်နေခဲ့သည်။
ထိုစဉ်မှာပင် ယဲ့မိသားစု အုတ်မြစ်ချခြင်း အဆင့် ကျင့်ကြံသူက ရှေ့သို့ ရောက်ရှိလာခဲ့ပြီ ဖြစ်သည်။
"မိန်းကလေး... နာကျင်မှုမရှိစေဖို့အတွက် အဖမ်းခံလိုက်တာ ပိုကောင်းပါလိမ့်မယ်၊ မင်း ငါတို့ သခင်လေးကို တောင်းပန်လိုက်ပြီး ငါတို့နဲ့အတူ တစ်ခေါက် လိုက်ခဲ့မယ်ဆိုရင် ဒီကိစ္စကို ဒီအတိုင်းပဲ ထားလိုက်ပါ့မယ်"
ယဲ့မိသားစု အုတ်မြစ်ချခြင်း အဆင့် ကျင့်ကြံသူ က ဤစကားကို ပြောလိုက်ရသော်လည်း သူကိုယ်တိုင်ပင် အနည်းငယ် အရှက်ရမိသလို ခံစားလိုက်ရသည်။
"ဘာလို့ ရှင့်တို့နဲ့ လိုက်ရမှာလဲ"
ကျောက်လင်းအာက ဇဝေဇဝါဖြင့် မေးလိုက်သည်၊ သိသိသာသာပင် ဤယဲ့ပိုင်ရီ၏ ဦးနှောက်တွင် ပြဿနာရှိနေခြင်း ဖြစ်သည်။
"ဒါဆိုရင်တော့ မိန်းကလေးကို စော်ကားမိရတော့မယ်"
ယဲ့မိသားစု အုတ်မြစ်ချခြင်း အဆင့် ကျင့်ကြံသူက ကျောက်လင်းအာကို ဖမ်းဆီးရန် တိုက်ခိုက် လိုက်တော့သည်။
ကျောက်လင်းအာ စိတ်ထဲတွင် စိုးရိမ်ပူပန်သွားပြီး ဤကိစ္စ၏ သက်ရောက်မှုကို အနည်းဆုံးအဆင့်သို့ မည်သို့ လျှော့ချရမည်နည်း၊ ချန်ကျီအတွက် ပြဿနာ မဖြစ်စေရန် မည်သို့ ပြုလုပ်ရမည်နည်းဟု တွေးတောလိုက်သည်။
ချက်ချင်းပင် ကျောက်လင်းအာ၏ အော်ရာ များက တဖြည်းဖြည်း မြင့်တက်လာခဲ့သည်။ "ရှင်က ကျွန်မကို တကယ် နိုင်မယ်လို့ ထင်နေတာလား"
ချီသန့်စင်ခြင်း အဆင့် ၉
ချီသန့်စင်ခြင်း အဆင့် အထွတ်အထိပ်
အုတ်မြစ်ချ အဆင့် ၁
......
အုတ်မြစ်ချ အဆင့် ၄ သို့ ရောက်ရှိသွားသည့်တိုင်အောင် ကျောက်လင်းအာ၏ အော်ရာများက တည်ငြိမ်သွားခဲ့သည်
"အုတ်မြစ်ချ အဆင့် ၄" ရှေ့သို့ ပြေးဝင်လာရန် ပြင်နေသော ယဲ့မိသားစု အုတ်မြစ်ချခြင်း အဆင့် ကျင့်ကြံသူက ခန္ဓာကိုယ်ကို ချက်ချင်းပင် ရုတ်တရက် ရပ်တန့်လိုက်ရတော့သည်။
လူအုပ်ကြီးထဲမှလည်း ပြိုင်တူ အံ့ဩမှင်သက်သံများ ထွက်ပေါ်လာခဲ့သည်။
"ဒါက အုတ်မြစ်ချခြင်း အဆင့်လား"
"ဒီလောက် အသက်ငယ်ငယ်နဲ့ အုတ်မြစ်ချခြင်း အဆင့်လား"
"ဒါ ဘယ်ကလာတဲ့ ပါရမီရှင်လဲ"
"ယဲ့မိသားစုတော့ ဒီတစ်ခေါက် ကျောက်ဆောင်ကို သွားတိုက်မိပြီ ထင်တယ်"
"......"
"ဘာလို့ မတိုက်တော့တာလဲ" ကျောက်လင်းအာက တည်ငြိမ်စွာ မေးလိုက်သည်။
ချန်ကျီက သူမကို အပြင်တွင် ပြဿနာ လျှောက်မရှာရန်၊ ပြဿနာဖြစ်လာလျှင်လည်း မကြောက်ရန်၊ နိုင်လျှင်ချပြီး မနိုင်လျှင် ပြေးရန် ယခင်ကတည်းက သင်ကြားပေးထားခဲ့ပြီးသား ဖြစ်သည်။
ယခုအချိန်က ဤကဲ့သို့သော အခြေအနေမျိုး ဖြစ်သည်၊ သူမက ပြဿနာရှာခြင်းမဟုတ်ဘဲ ပြဿနာက သူမထံသို့ လာရှာခြင်း ဖြစ်သည်။
ထို့အပြင် ယခုအချိန်တွင် သူမက နိုင်နေသေးသည်ဖြစ်ရာ ဘာကို ကြောက်နေရမည်နည်း။
ထိုစဉ် အဝေးမှ ယဲ့ပိုင်ရီက စိုးရိမ်တကြီးဖြင့် အပြေးအလွှား အော်ဟစ်လာခဲ့သည်။ "လူအိုကြီး ယဲ့... မင်း ဘာလုပ်နေတာလဲ၊ ချလေ"
"သခင်လေး... စိတ်မပူပါနဲ့"
ယဲ့မိသားစု အုတ်မြစ်ချခြင်း အဆင့် ကျင့်ကြံသူ က ယခုအချိန်တွင် အလွန် ခေါင်းခဲနေခဲ့သည်၊ အုတ်မြစ်ချခြင်း အဆင့် ၄ ဆိုသည်မှာ သူ့ထက် ကျင့်ကြံခြင်းအဆင့် တစ်ဆင့် ပိုမိုမြင့်မားနေခြင်းဖြစ်ရာ သူ မည်သို့ နိုင်နိုင်ပါမည်နည်း။
ထို့အပြင် ယခုအချိန်တွင် နိုင်ခြင်း မနိုင်ခြင်းထက် ဤမျှလောက် အသက်ငယ်ငယ်နှင့် အုတ်မြစ်ချခြင်း အဆင့် အလယ်အလတ်သို့ ရောက်ရှိနေသူ၏ နောက်ကွယ်တွင် မည်ကဲ့သို့သော ကျောထောက်နောက်ခံမျိုး ရှိနေမည်ကို တွေးတောရပေမည်။
ဤကျောထောက်နောက်ခံကို သူတို့ ယဲ့မိသားစုက ရန်စရဲသော အရာမျိုး ဟုတ်မဟုတ် စဉ်းစားရပေမည်။
ယဲ့မိသားစု အုတ်မြစ်ချခြင်း အဆင့် ကျင့်ကြံသူ က အကျိုးနှင့် အပြစ်ကို အချိန်အနည်းငယ်အတွင်း ချိန်ဆလိုက်ပြီးနောက် "မိန်းကလေး... ခုနက စော်ကားမိသွားပါတယ်၊ မိန်းကလေး ခွင့်လွှတ်ပေးပါဦး၊ မိန်းကလေးရဲ့ ဂိုဏ်းအမည်ကို ပြောပြပေးဖို့ တောင်းဆိုချင်ပါတယ်၊ ကျွန်တော်တို့ ယဲ့မိသားစုက သေချာပေါက် လာ တောင်းပန်ပါ့မယ်"
ယဲ့မိသားစု အုတ်မြစ်ချခြင်း အဆင့် ကျင့်ကြံသူက ပြောပြီးသည်နှင့် ကျောက်လင်းအာကို လက်သီးဆုပ် ၍ အရိုအသေပြုလိုက်သည်။
ကျောက်လင်းအာက ဤယဲ့မိသားစု အုတ်မြစ်ချခြင်း အဆင့် ကျင့်ကြံသူကို ဆန်းကြယ်စွာ ကြည့်လိုက်မိသည်၊ ယဲ့မိသားစုတွင် အကျိုးအကြောင်း သိတတ်သူ ရှိနေလိမ့်မည်ဟု ထင်မထားခဲ့ပေ၊ သို့သော် သူမတွင် မည်သည့်ဂိုဏ်းမှ မရှိပေ။
"ထားလိုက်ပါတော့" ကျောက်လင်းအာ ပြောပြီးသည်နှင့် ယဲ့မိသားစုဝင်များကို ရှောင်ကွင်း၍ ထွက်ခွာရန် ပြင်လိုက်သည်၊ ကိစ္စများကို ဤကဲ့သို့ ဖြေရှင်းနိုင်ခြင်းက အကောင်းဆုံး ဖြစ်သည်။
ထိုအချိန်တွင် အကျိုးအကြောင်းမသိတတ်သော ယဲ့ပိုင်ရီက ပိုမို စိုးရိမ်တကြီး ဖြစ်လာခဲ့သည်၊ လက်ထဲသို့ ရောက်လုနီးပါး ဖြစ်နေသော အလှလေးကို ဒီအတိုင်း လွှတ်ပေးလိုက်ရမည်လား။
"ဘယ်ပြေးမလို့လဲ" ယဲ့ပိုင်ရီက ကျယ်လောင်စွာ အော်ဟစ်လိုက်ပြီး ကျောက်လင်းအာကို တိုက်ရိုက် တိုက်ခိုက် ရန် ပြင်လိုက်တော့သည်။