အခန်း ၂၀၁

အခန်း (၂၀၁) ပုရစ်တိုက်ပွဲ

ကနဦး အစီအစဉ်များကို ဆွဲသားပြီးနောက် လီယွမ်သည် ရေရှည် ထိုးဖောက်ဝင်ရောက်ရေးနှင့် စောင့်ကြည့်လေ့လာရေး အပိုင်းသို့... တစ်ဖန် ပြန်လည် ရောက်ရှိသွားခဲ့သည်။ သက်မဲ့ တစ္ဆေကောင်များ၏ အလေ့အထများကို သေချာစွာ တွက်ချက် လေ့လာပြီးနောက် သူသည် ရွာသားများ၏ ယုံကြည်မှုကို အောင်မြင်စွာ ရယူနိုင်ခဲ့ပြီး မက်မွန်ပွင့် ရွာလေးအတွင်းရှိ အဓိက သော့ချက်ကျသော နေရာတစ်ခုကို ရှာဖွေတွေ့ရှိ သွားခဲ့၏။ ၎င်းမှာ ကျန်းယန် နှင့် အခြားသူများ... ကူကောင်များကို ပျိုးထောင်ခဲ့သည့် နေရာပင် ဖြစ်၏။

တတိယမြောက် လပြည့်ည တစ်ည...။ လီယွမ်သည် ကျန်းယန် ဦးဆောင်သော အဆင့်ရှစ် ကူသခင် သုံးဦးအပေါ်... သူ၏ အာရုံများကို အပြည့်အဝ စုစည်းကာ စောင့်ကြည့် နေခဲ့သည်။ ကျန်းယန် ထံတွင် အလွန် ပြင်းပြလှသော စွဲလမ်းမှုကြီး တစ်ခု ရှိနေကြောင်း... သူ ရှာဖွေ တွေ့ရှိခဲ့၏။ မက်မွန်ပွင့် ရွာလေး၏ စည်းမျဉ်း စည်းကမ်းများမှာ... အခြေခံအားဖြင့် ကျန်းယန် မသေဆုံးမီ ကတည်းက ချမှတ်ထားခဲ့ခြင်း ဖြစ်ပြီး သက်မဲ့ တစ္ဆေကောင်များ အားလုံးက ထိုစည်းမျဉ်းများ အတိုင်းသာ လည်ပတ် လှုပ်ရှားနေကြခြင်း ဖြစ်၏။

ကျန်းယန် ၏ ရွာအား စီမံအုပ်ချုပ်မှုနှင့် သူ၏ ဘဝဖြတ်သန်းမှု သဲလွန်စများကို အသေအချာ ခွဲခြမ်း စိတ်ဖြာကြည့်ရာမှ... လီယွမ် သည် အသေးစိတ် အချက်အလက်များစွာကို တွေ့ရှိ ခဲ့ရလေတော့သည်။

'အစတုန်းကတော့ မက်မွန်ပွင့် ကူရွာလေးက လူတွေဟာ... ဒီနေရာမှာ အချိန်အကြာကြီး နေထိုင်ခဲ့ကြတာပဲ... သူတို့တွေ တစ္ဆေကောင် ဘဝကို ရောက်သွားတဲ့ အချိန်မှာတောင်... အသက်ရှင်စဉ် ကတည်းက ရှိခဲ့တဲ့ အလေ့အထ အများစုကို ဆက်ပြီး ထိန်းသိမ်း ထားကြသေးတာကိုး...'

'ကျန်းယန် က တစ်ခုခု မှားယွင်းနေပြီ ဆိုတာကို အစောကြီး ကတည်းက ရိပ်မိခဲ့ပြီး အကူအညီ တောင်းဖို့ လူတွေကို အကြိမ်ကြိမ်... အပြင်ဘက်ကို စေလွှတ်ခဲ့မှာ သေချာတယ်... ဒါပေမဲ့ ဘယ်သူကမှ အသက်ရှင်ခြင်းနဲ့ သေဆုံးခြင်း တံတားကို မဖြတ်ကျော် နိုင်ခဲ့ကြဘူးလေ သူ သတိပြန်လည် လာတဲ့ အချိန်လေးတွေမှာ... အသုံးဝင်မယ့် သဲလွန်စ တချို့ကို ချန်ထားခဲ့နိုင် လောက်တယ်... အကယ်၍များ အဲဒါတွေကို ငါ ရှာတွေ့ခဲ့မယ် ဆိုရင်... ငါ့အတွက် အများကြီး အထောက်အကူ ဖြစ်လာမှာပဲ...'

လီယွမ် သည် ကျန်းယန် ၏ အနီးသို့... ချဉ်းကပ်နိုင်ရန် ကြိုးစားကြည့် သည်။ ယုတ္တိကျကျ တွေးကြည့်မည် ဆိုပါက သူ၏ ပါရမီမျိုးဖြင့် ဆိုလျှင်... ဝါရင့် ပညာရှင်ကြီး တစ်ဦး၏ ချီးကျူး အသိအမှတ်ပြုမှုကို ရရှိသင့် သော်ငြားလည်း ကျန်းယန် မှာ သက်မဲ့ တစ္ဆေကောင် တစ်ကောင်သာ ဖြစ်နေသဖြင့် သူ၏ ပါရမီ စွမ်းရည်များကို ရှာဖွေ တွေ့ရှိရန်... အလွန် ခက်ခဲ နေခဲ့၏။ ပင်ကိုယ် အသိစိတ် အရသာ သူ့ကို လူငယ် တပည့်လေး တစ်ဦးအဖြစ်... သတ်မှတ်ထားပြီး အဓိက လျှို့ဝှက်ချက် ရှိရာသို့... ချဉ်းကပ်ခွင့် မပြုခဲ့ပါချေ။

သူ၏ ပါရမီကို ထုတ်ဖော် ပြသရုံဖြင့် ကျန်းယန် ထံသို့ ချဉ်းကပ်၍ မရနိုင်သလို အတင်းအကြပ် ဝင်ရောက်ရန်လည်း မဖြစ်နိုင် သောကြောင့်... လီယွမ် တွင် နောက်ဆုံး ရွေးချယ်စရာ တစ်ခုသာ ကျန်ရှိ တော့သည်။ ၎င်းမှာ ကျန်းယန် ၏ ဘဝနေမှု ဟန်ပန်နှင့် စိတ်ဝင်စားမှု များကို လိုက်လံ လုပ်ဆောင်ကာ သူ၏ သတိထား ကာကွယ်မှုများကို လျှော့ချ ပစ်ရန်သာ ဖြစ်၏။

ဤသို့ စောင့်ကြည့် လေ့လာမှုက နောက်ထပ် တစ်လတိတိ ကြာမြင့် သွားခဲ့သည်။ စတုတ္ထမြောက် လပြည့်ည လွန်မြောက် သွားပြီးနောက်မှသာ လီယွမ် သည် ကျန်းယန် ၏ အလေ့အထများနှင့် နှစ်သက် သဘောကျမှု များကို အပြည့်အဝ နားလည် သဘောပေါက် သွားတော့၏။

ကျန်းယန် ၏ သက်စောင့်ကူကောင် မှာ ဟင်းလင်းပြင်သို့ ပြန်လည်ဝင်ရောက်ခြင်းနှင့် ဝိညာဉ်လမ်းပြကူ... မဟုတ်ခဲ့ပါချေ။ ၎င်းမှာ ထူးခြားကူ စာရင်း၏ အဆင့် နှစ်ဆယ့်နှစ် နေရာတွင် ရှိသော သေမင်းတမန် တိုက်ခိုက်ရေး ပုရစ်... ဟု အမည်ရသော ထူးခြားကူ တစ်ကောင် ဖြစ်၏။ အမည်နှင့် လိုက်ဖက်စွာပင် ဤကူကောင်ကို ပုရစ်များမှ တစ်ဆင့် ဖန်တီးထားခြင်း ဖြစ်၏။

ဤကူကောင်ကို အောင်မြင်စွာ သန့်စင်ပြီးပါက ဆန်းကြယ်ပုံရိပ်ကူ ၏ စွမ်းရည်နှင့် ဆင်တူသော ဆန်းကြယ် နယ်မြေ ဟူသည့် စွမ်းရည်ကို ရရှိလာမည် ဖြစ်ပြီး ၎င်း၏ အမည်ကို သေမင်းတမန် တိုက်ပွဲ နယ်မြေ... ဟု ခေါ်ဆိုကြ၏။ သေမင်းတမန် တိုက်ပွဲ နယ်မြေကို တစ်ကြိမ် အသက်သွင်းလိုက်ပါက ပြန်လည် ရုပ်သိမ်း၍ မရနိုင်တော့ဘဲ... သွေးထွက်သံယို ဖြစ်ရမည်မှာ မြေကြီးလက်ခတ်မလွဲ ပင်။

သေမင်းတမန် တိုက်ပွဲ နယ်မြေ အတွင်း၌... ကူသခင် ၏ ခန္ဓာကိုယ်မှာ တစ်ဝက်တစ်ပျက်... ပုရစ် တစ်ကောင်အလား ပြောင်းလဲသွားမည် ဖြစ်သည်။ ဤအခြေအနေတွင် ကူသခင် ၏ စွမ်းအားမှာ... ရန်သူ တစ်ယောက်ကို သတ်ဖြတ်နိုင်တိုင်း... တစ်မှတ်စီ တိုးလာမည် ဖြစ်၏။ ကူသခင် ၏ ဒဏ်ရာ ပိုမို ပြင်းထန်လေလေ ပုရစ်တောင်ပံ ခတ်သည့် အကြိမ်အရေအတွက်မှာ... ပိုမို များပြားလာလေလေ ပင်။ အရေးပါသော အချိုးအကွေ့ တစ်ခုသို့ ရောက်ရှိသွားသည်နှင့် နာကျင်မှုကို လုံးဝ လျစ်လျူရှု ထားနိုင်သော ရူးသွပ်မှု အခြေအနေ သို့ ဝင်ရောက်သွားမည် ဖြစ်ပြီး သူ၏ အမြန်နှုန်းမှာလည်း အဆုံးမရှိ... မြင့်တက် လာတော့မည် ဖြစ်၏။

တိုက်ပွဲ နယ်မြေ သည် သေရေးရှင်ရေး တိုက်ပွဲ... အဆုံးသတ် သွားပြီးမှသာလျှင် ပျောက်ကွယ် သွားမည် ဖြစ်၏။ တိုက်ပွဲ အပြီးတွင် သေမင်းတမန် တိုက်ခိုက်ရေး ပုရစ် သည်... ၎င်းသတ်ဖြတ် ခဲ့သော သတ္တဝါ၏ စွမ်းအား တစ်စိတ်တစ်ပိုင်းကို စုပ်ယူကာ သက်စောင့်ကူသခင် ထံသို့... ပြန်လည် ပို့ဆောင်ပေးပြီး စွမ်းအား များကို မြှင့်တင် ပေးမည် ဖြစ်သည်။

ဤ အချက်အလက် များကို သိရှိသွားသော အခါ... လီယွမ် မှာ အတော်လေး အံ့အားသင့် သွားရတော့သည်။ အကြီးအကဲ ကျန်းယန် ၏ အပြင်ပန်း ရုပ်သွင်မှာ... ကြင်နာ ယဉ်ကျေးပုံ ရသော်ငြားလည်း သူ၏ သက်စောင့်ကူကောင် မှာ ဤမျှလောက်... ရူးသွပ် ကြောက်မက်ဖွယ် ကောင်းသော သေမင်းတမန် တိုက်ခိုက်ရေး ပုရစ် ဖြစ်နေလိမ့်မည်ဟု... သူ လုံးဝ မထင်ထားခဲ့မိပါချေ။ ဖြစ်နိုင်သည်မှာ ကျန်းယန် သည် မွေးရာပါ... စစ်သွေးစစ်မန် ပါသူ တစ်ဦး ဖြစ်သော်လည်း တိုက်ခိုက်ရန် နေရာ မရှိခဲ့ခြင်း ပင် ဖြစ်ပေလိမ့်မည်။

ဤအချက်ကပင် သူ၏ သေးငယ်သော ဝါသနာလေး တစ်ခုကို ဖြစ်တည် လာစေခဲ့ခြင်း ဖြစ်၏။ ပုရစ် တိုက်ခိုက်ခြင်း ပင်။

ပုရစ် တိုက်ခိုက်ခြင်း သည် အလယ်ပိုင်းလွင်ပြင် မှတဆင့်... တောင်ပိုင်း နယ်စပ် ဒေသများသို့ ပြန့်နှံ့လာခဲ့သော ဖျော်ဖြေရေး ကစားနည်း တစ်မျိုး ဖြစ်၏။ အဆင့်မြင့် အရာရှိကြီး များ၏ သားသမီး များစွာက ဤကစားနည်းကို အလွန်အမင်း နှစ်သက် သဘောကျ ကြပြီး သာမန် ပြည်သူများ ကြားတွင်လည်း ပုရစ်တိုက် ဝါသနာအိုး အမြောက်အမြား... ရှိနေခဲ့ကြ သည်။

'ဒါက ငါ့အတွက်တော့ အခွင့်အရေး တစ်ခုပဲ...'

လီယွမ် သည် ဤအချက်ကို အသုံးချကာ ကျန်းယန် ၏ ပင်ကိုယ် ယုံကြည်မှုကို ရယူပြီး အဓိက အကျဆုံးသော လျှို့ဝှက်ချက် ရှိရာသို့... ဝင်ရောက်နိုင်မည့် အချိုးအကွေ့ တစ်ခုအဖြစ်... အသုံးပြုရန် ဆုံးဖြတ် လိုက်တော့သည်။ သူသည် မက်မွန်ပွင့် ကူရွာလေး အတွင်းမှ... လိုအပ်သော ပစ္စည်း တချို့ကို စုဆောင်းလိုက်ပြီး သူ၏ အိမ်သို့ ပြန်လာကာ အနက်ရောင် အိုးကြီးကို ထုတ်ယူ လိုက်၏။

( မူလ ပစ္စည်းများကို ရွေးချယ်ပါ )

( သာမန် သွေးပုရစ် သုံးကောင် )

( ဖန်တီးမှုကို စတင်နေပါပြီ... )

( လျှို့ဝှက်ဆန်းကြယ် သွေးပုရစ် တစ်ကောင်ကို သင် ရရှိပါသည် )

လီယွမ် အနေဖြင့် ကျန်းယန် ကို အနိုင်ယူနိုင်မည့်... ပုရစ် တစ်ကောင်ကို မဖြစ်မနေ လေ့ကျင့်ပေးရမည် ဖြစ်သည်။ ကံကောင်း ထောက်မစွာဖြင့် ကျန်းယန် ၏ သက်စောင့်ကူကောင် ဖြစ်သော သေမင်းတမန် တိုက်ခိုက်ရေး ပုရစ် ကို ထပ်မံ အသုံးပြု၍ မရနိုင်တော့ပါချေ။ တိုက်ခိုက်ရာတွင် အသုံးပြုသော ပုရစ်များမှာ... ပင်ကိုယ် အသိစိတ် အရသာ နောက်ပိုင်းတွင် မွေးမြူထားခဲ့သော သာမန် ပုရစ်များသာ ဖြစ်ကြ၏။

အကြိမ်ကြိမ် ကြိုးစား ဖန်တီးပြီး နောက်တွင်တော့... လီယွမ် သည် အတော်လေး အစွမ်းထက်လှသော ရူးသွပ် မိစ္ဆာပုရစ် ဟု အမည်ရသည့် လျှို့ဝှက်ဆန်းကြယ် ကူကောင် တစ်ကောင်ကို အောင်မြင်စွာ ရရှိသွားခဲ့ချေပြီ။ သူသည် ထို ရူးသွပ် ပုရစ်လေးကို ယူဆောင်ကာ ကျန်းယန် ထံသို့ သွားရောက် လိုက်တော့သည်။

“အကြီးအကဲ ကျန်းယန်... ကျွန်တော် အကြီးအကဲ နဲ့အတူ... ပုရစ် တိုက်ချင်လို့ပါ...”

လီယွမ် က အလွန် လေးနက်သော အမူအရာဖြင့် စိန်ခေါ်မှုကို စတင် လိုက်သည်။

“အို...”

ကျန်းယန် ၏ မျက်လုံးများ အရောင်လက် သွားတော့၏။

“မင်း အသက်အရွယ်လေး နဲ့တော့... တော်တော်လေး သတ္တိကောင်းတာပဲ... ငါ့ရဲ့ ပုရစ် စစ်သူကြီး က အင်းဆက် ကောင်ပေါင်း ထောင်ချီကို သတ်ဖြတ်ခဲ့တဲ့... ထောင်ချီ သတ်ဖြတ်သူ လို့ နာမည်ရထားတာကွ... မျက်တောင် တစ်ခတ်လေး အတွင်းမှာတင်... ပြိုင်ဘက်ကို အသေသတ်နိုင်တယ်... မင်း သေချာ စဉ်းစားပြီးပြီလား...”

“အကယ်၍ မင်း ရှုံးသွားရင်... မင်း ဂရုတစိုက် မွေးမြူထားတဲ့ ပုရစ် လေးလည်း အသက်ရှင်မှာ မဟုတ်တော့ဘူးနော်... မင်းက လူငယ်လေး တစ်ယောက် ဖြစ်နေရင်တောင်... ငါ့ဘက်က ဘာလျော်ကြေးမှ ပေးမှာ မဟုတ်ဘူး...”

“ကျွန်တော် သေချာပေါက် နိုင်မှာပါ...”

လီယွမ် က ဂုဏ်ယူ ဝင့်ကြွားစွာ ကြွေးကြော် လိုက်၏။

“လာစမ်းပါ...”

ကျန်းယန် က လက်လှမ်းကာ ပုရစ် တိုက်ခိုက်သည့်... လှောင်အိမ် တစ်ခုကို ယူလိုက်သည်။

“ဘာမှ မသိတဲ့ ကောင်စုတ်လေး... ငါ့ရဲ့ ပုရစ် စစ်သူကြီး က မင်းကို ဘယ်လို ပညာပေးမလဲ ဆိုတာ... သေချာ ကြည့်ထားလိုက်စမ်း...”

“အကြီးအကဲ ကျန်းယန်... အကယ်၍ အကြီးအကဲ သာ ရှုံးသွားရင်... ကျွန်တော့်ရဲ့ တောင်းဆိုချက် တစ်ခုကိုတော့... မဖြစ်မနေ လိုက်လျော ပေးရမယ်နော်...”

လီယွမ် က အခွင့်အရေးကို ဆုပ်ကိုင်ကာ တောင်းဆိုမှု တစ်ခု ပြုလုပ်လိုက်၏။

“မင်းရဲ့ တောင်းဆိုချက် က ဘာများလဲ...”

“အကယ်၍ အကြီးအကဲ ကျန်းယန် သာ ရှုံးသွားရင်... ကျွန်တော့်ကို လျှို့ဝှက် နေရာလေး ထဲကို ဝင်ခွင့်ပြုရမယ်... အဲဒီ ရှေးဟောင်း ပညာရှင်ကြီး ချန်ထားခဲ့တဲ့ အမွေအနှစ် တွေကို ငါတို့တွေ အတူတူ လေ့လာလို့ ရအောင်လို့လေ”

ကျန်းယန် မှာ အံ့အားသင့် သွားပြီးနောက် မျက်မှောင် ကုတ်သွားရ သည်။ သူသည် ခေါင်းကို ပြင်းထန်စွာ ခါယမ်း လိုက်ပြီး သူ၏ မျက်နှာ အမူအရာ မှာ... ရှုပ်ထွေးမှု၊ ရက်စက် ကြမ်းကြုတ်မှု၊ ဝမ်းနည်း ပူဆွေးမှု နှင့် အလွန်အမင်း ဝမ်းသာ ပျော်ရွှင်မှု တို့ ကြားတွင် အရူး တစ်ယောက်အလား အဆက်မပြတ်... ပြောင်းလဲ သွားနေတော့၏။ ၎င်းမှာ ကျန်ရှိနေသေးသော ပင်ကိုယ် အသိစိတ် နှင့် စွဲလမ်းမှု တို့ ကြားရှိ ပြင်းထန်သော ပဋိပက္ခ တစ်ခု ဖြစ်ကြောင်း သိသာ ထင်ရှား လှ၏။

“အကြီးအကဲ ကျန်းယန်... အဆင်ပြေရဲ့လား...”

ဤ အခွင့်အရေးကို အသုံးချကာ လီယွမ် သည်... သူ မွေးမြူထားသော ရူးသွပ် ပုရစ် ကို ထုတ်ယူ လိုက်ပြီး လှောင်အိမ် ထဲသို့ ထည့်ကာ ကျန်းယန် ၏ ပုရစ် စစ်သူကြီး နှင့် ယှဉ်ပြိုင် တိုက်ခိုက် စေလိုက်တော့သည်။

“အကြီးအကဲ ကျန်းယန်... အကြီးအကဲ ရဲ့ ပုရစ် စစ်သူကြီး ကလည်း သိပ်ပြီး အဆင့်မမီ ပါလား... ကျွန်တော် နိုင်တော့မယ် နော်... အကြီးအကဲ ရဲ့ ထောင်ချီ သတ်ဖြတ်သူ စစ်သူကြီး ကတော့... ကျွန်တော့်ရဲ့ ရူးသွပ်နေတဲ့ စစ်သားလေး ဆီမှာ... ရှုံးနိမ့် သွားတော့မယ့် ပုံပဲ...”

လီယွမ် က အပြောအဆို ညက်ညောစွာဖြင့် ဆက်တိုက် ပြောဆို နေ၏။ သူသည် ပုရစ် တိုက်ပွဲ၏ အနိုင်အရှုံးကို ဂရုစိုက် နေခြင်း မဟုတ်ဘဲ... သူ၏ အဆက်မပြတ်သော စကားများ နှင့် အပြုအမူ များမှ တစ်ဆင့်... ကျန်းယန် ၏ ပင်ကိုယ် အသိစိတ် ကို လွှမ်းမိုး နိုင်ရန်သာ အာရုံစိုက် နေခဲ့ခြင်း ဖြစ်၏။ ထိုမှသာလျှင် ကျန်းယန် ကို စွဲလမ်းမှု အချုပ်အနှောင် များမှ... ရုန်းထွက် နိုင်အောင် ကူညီပေးနိုင်မည် ။

ထိုသို့ ပြုလုပ် နိုင်မှသာလျှင် သူသည်... ရွာလေး၏ လျှို့ဝှက် နေရာသို့ ဝင်ရောက်နိုင်မည့်... အခွင့်အရေးကို ရရှိနိုင်မည် ဖြစ်သည်။ ထိုအခါမှသာ ကျန်းယန် မသေဆုံးမီ ကတည်းက ချန်ရစ် ထားခဲ့သော သဲလွန်စ များကို ရှာဖွေ တွေ့ရှိ နိုင်မည် ဖြစ်ပြီး ဤ တားမြစ် နယ်မြေ၏ လျှို့ဝှက်ချက် များကို ဖော်ထုတ်ကာ ဤနေရာမှ ထွက်ခွာ နိုင်မည် ဖြစ်ပေတော့သည်။

သူတို့ နှစ်ဦးမှာ အချိန် အတော်ကြာအောင်... ရုန်းကန် နေခဲ့ကြ ရ၏။ လှောင်အိမ် အတွင်းမှ တိုက်ပွဲ အဆုံးသတ် သွားပြီး လီယွမ် ၏ ရူးသွပ် ပုရစ်လေး က ကျန်းယန် ၏ ပုရစ် စစ်သူကြီး ကို အပြတ်အသတ် ခြေမွပစ် လိုက်သည့် အခါကျမှသာ ဂနာမငြိမ် ဖြစ်နေသော ကျန်းယန် လည်း မြေကြီး ပေါ်သို့ နောက်ဆုံးတွင် အရုပ်ကြိုးပြတ် ထိုင်ကျ သွားရတော့သည်။

“ငါ... ရှုံးသွားပြီလား...”

ယခင်က တစ်ကြိမ် တစ်ခါမျှ အရှုံးမပေးခဲ့ဖူးသော ထောင်ချီ သတ်ဖြတ်သူ ပုရစ် စစ်သူကြီး ၏ ကျဆုံး သွားမှု က ကျန်းယန် အလွန်အမင်း ဂုဏ်ယူ ဝင့်ကြွား ခဲ့ရသော စိတ်ဓာတ် များကို ရိုက်ချိုးပစ် လိုက်ပြီး လျှို့ဝှက် နေရာကို ထိန်းချုပ်ထားလိုသည့် သူ၏ စွဲလမ်းမှု အပေါ် ပင်ကိုယ် အသိစိတ် ကို ခေတ္တမျှ လွှမ်းမိုး သွားစေခဲ့သည်။

“အကြီးအကဲ ကျန်းယန်... ပုရစ် တွေလည်း သေတတ် သလို လူတွေ လည်း အိုမင်း ရင့်ရော် တတ်ကြတာပါပဲ... ခေတ် တွေက ပြောင်းလဲ သွားခဲ့ပါပြီ...”

“ကျေးဇူးပြုပြီး ဂျူနီယာ ကို ယုံကြည်ပေးပါ... ကျွန်တော် အကြီးအကဲ ကို သေချာပေါက်... ကူညီပေးနိုင်မှာပါ... ရှေးဟောင်း လျှို့ဝှက်ချက် တွေကို ဖော်ထုတ်ပြီး အကြီးအကဲ ကို ဦးဆောင် ပေးပါ့မယ်... အားလုံးကို ဒီနေရာ ကနေ ခေါ်ထုတ် သွားပေးပါ့မယ်... ကျေးဇူးပြုပြီး ဂျူနီယာ ကို အခွင့်အရေး တစ်ကြိမ်လောက် ပေးပါ...”

လီယွမ် က လက်နှစ်ဖက်ကို ယှက်ကာ နက်ရှိုင်းစွာ ဦးညွှတ် လိုက်ပြီး အလွန် ရိုးသား မှန်ကန်သော အမူအရာ ဖြင့် တောင်းဆို လိုက်သည်။

“ထွက်သွားမယ်... ထွက်သွားမယ်...”

ကျန်းယန် က ကောင်းကင်ယံ သို့ မော့ကြည့် လိုက်ရာ... သူ၏ မျက်လုံးအိမ် များမှာ တစ်ခါတစ်ရံ အနက်ရောင်... တစ်ခါတစ်ရံ အဖြူရောင် သို့ ပြောင်းလဲ နေတော့၏။

“ငါ တကယ်ပဲ... ဒီကနေ ထွက်သွားလို့ ရပြီလား...”

“သေချာပေါက် ရတာပေါ့...”

လီယွမ် က မတ်တပ် ရပ်လိုက်ပြီး ကျန်းယန် ကို တွဲထူ လိုက်သည်။

“အကြီးအကဲ... ကျေးဇူးပြုပြီး ကျွန်တော့်ကို အဲဒီ နေရာဆီ... ခေါ်သွားပေးပါ...”

သူသည် ရူးသွပ် ပုရစ် ကို သူ၏ လက်မောင်း ပေါ်သို့... တမင်သက်သက် ခုန်တက် လာစေရန်... ပြုလုပ် လိုက်၏။

ကျန်းယန် သည် သာမန်မျှသာ ဖြစ်ပြီး သိပ်ပြီး အစွမ်းထက်ပုံ မရသော ရူးသွပ် မိစ္ဆာပုရစ် ကို ငေးကြောင်စွာ ကြည့်နေမိပြီး ဤကဲ့သို့သော ပုရစ် မျိုးက သူ၏ ထောင်ချီ သတ်ဖြတ်သူ စစ်သူကြီး ကို မည်သို့များ အနိုင်ယူ သွားနိုင်သနည်း ဟု... လုံးဝ နားမလည် နိုင်အောင် ဖြစ်နေရတော့သည်။

အကြောင်းရင်း ကတော့ အလွန် ရိုးရှင်းလှ၏။ ကျန်းယန် သိရှိထားသော 'ထောင်ချီ သတ်ဖြတ်သူ' စစ်သူကြီး ဆိုသည်မှာ... လွန်ခဲ့သော နှစ်ပေါင်း တစ်ထောင် ကတည်းက ပျောက်ကွယ် သွားခဲ့ပြီ ဖြစ်ပြီး သူ၏ စွဲလမ်းမှု ထဲတွင်သာ ကျန်ရှိ နေတော့ခြင်း ပင်။ သို့သော် လည်း ကျန်းယန် ကတော့ ထိုအချက်ကို ဘယ်သောအခါ မှ သဘောပေါက် လာတော့မည်... မဟုတ်ပါချေ။

'ဖြစ်နိုင်တာက ဒါက တကယ့်ကို မျှော်လင့်ချက် တွေနဲ့... ပြန်လည် မွေးဖွားခြင်း ကို ကိုယ်စားပြု နေတာများလား...'

လီယွမ် ၏ အဆက်မပြတ် လွှမ်းမိုးမှု အောက်တွင် နောက်ဆုံး တွင်တော့ ကျန်းယန် လည်း စိတ်လှုပ်ရှား သွားခဲ့ရပြီး လီယွမ် ကို ယုံကြည်ရန်... ရွေးချယ် လိုက်တော့သည်။ ထို့နောက် တွင်မူ ကူကောင် များကို ပျိုးထောင် ခဲ့ရာ... ရွာလေး အတွင်းရှိ လျှို့ဝှက် နေရာလေး ဆီသို့... လီယွမ် ကို ဦးဆောင် ခေါ်သွား လေတော့၏။