အခန်း ၉၂

အပိုင်း ၉၂ - အဖွားပိုင်ကို အသိအမှတ်ပြုခြင်း

ကောကျားရှင်းက ဦးစွာ နှာခေါင်းတစ်ချက် ရှုံ့လိုက်သည်။ သူမက ကျန့်ဖိန့်ဖိန့်နှင့် စကားအခြေအတင် မပြောလိုသဖြင့် လျစ်လျူရှုလိုက်ပြီးနောက် လင်းစုယွီကို အလွန်ပင် စေတနာရှိဟန်ဖြင့် စတင် အကြံပြုတော့သည်။

"ဒီမိန်းကလေးက ဘယ်မိသားစုကလဲ။ မြင်ဖူးသလိုမရှိဘူးပဲ။ ရှင်က ကျန့်ဖိန့်ဖိန့် ဘယ်လောက် ရက်စက်လဲဆိုတာ မသိသေးလို့နေမှာ။ သူက ဟောင်ကောင်မြို့မှာ မျက်တောင်မခတ်တမ်း လူတွေရဲ့ ခြေလက်တွေကို ချိုးတတ်တဲ့ 'အဆိပ်ပြင်းသူငယ်မ' လို့ နာမည်ကြီးတာ။ ရှင့်လုံခြုံရေးအတွက် သူနဲ့ ဝေးဝေးမှာနေတာ အကောင်းဆုံးပဲနော်!"

ကျန့်ဖိန့်ဖိန့်က လင်းရှင်းယောင်ရဲ့ခြေထောက်ကို ချိုးခဲ့တာကိုပင် လင်းစုယွီက ကျေနပ်နေခဲ့သည်ဖြစ်ရာ ဤစကားများက သူမကို အနည်းငယ်မျှပင် မကြောက်လန့်စေနိုင်ပါ။ ဤကဲ့သို့ ရန်တိုက်ပေးသည့် အဆင့်အတန်းမှာ မူလတန်းကျောင်းသားလေးများကိုသာ လှည့်စားနိုင်မည်ဖြစ်သည်။

လင်းစုယွီက ဘာမှမဖြစ်သလိုပင် ငြိမ်သက်စွာ လက်ဆေးနေသည်။ လင်းစုယွီက တုန်လှုပ်မှုမရှိသည်ကို မြင်သောအခါ ကောကျားရှင်းက နည်းဗျူဟာပြောင်း၍ ဆက်လက် ရန်တိုက်ပြန်သည်။

"စိတ်ဝင်စားဖို့ကောင်းလိုက်တာ၊ ကျန့်ဖိန့်ဖိန့်လိုလူနဲ့ ပေါင်းချင်တဲ့သူ ရှိသေးတာပဲ။ ဟောင်ကောင်ရဲ့ အထက်တန်းလွှာမှာဆိုရင် သူက မိသားစုကြီးတွေက သမီးပျိုတိုင်း အပယ်ခံထားတဲ့သူ၊ ရှောင်ကြဉ်ကြတဲ့သူပဲ။ သူနဲ့ ပေါင်းနေရင် ရှင်ပါ အပယ်ခံရမှာ မကြောက်ဘူးလား"

"အဲဒီ 'အများစု' ဆိုတာ နင်နဲ့ နင့်ရဲ့ နောက်လိုက်တသိုက်ကို ပြောတာနေမှာပေါ့။ ကောကျားရှင်း... တော်လိုက်တော့! ဒီလို သေးသိမ်တဲ့ ရန်တိုက်နည်းတွေ သုံးနေတာ တကယ်ကို ကြည့်မကောင်းဘူး။ ကောမိသားစုရဲ့ နင့်ကို သွန်သင်ဆုံးမမှုက တကယ်ကို စိတ်ပူစရာပဲ"

ကျန့်ဖိန့်ဖိန့်သည် တစ်ယောက်တည်းနှင့် လူအများကို စကားနိုင်လုနိုင်ရုံသာမက လက်တွေ့တွင်လည်း လူကို ဒုက္ခပေးနိုင်စွမ်း ရှိသည်။ ဟောင်ကောင်မြို့ရှိ အဖြစ်မှန်ကိုမသိသူ အများစုမှာ သူမကို ကြောက်ရွံ့၍ အနားမကပ်ရဲကြပေ။

"ဖိန့်ဖိန့်... နင်က နင့်ရဲ့ ပင်ကိုယ်ပုံစံအတိုင်း နေတာပဲလေ။ ဒီက မိန်းကလေးကောကမှ အကောင်းနဲ့အဆိုးကို မခွဲခြားတတ်တာ။ သွားကြရအောင်၊ ငါ့ရဲ့ တတိယ ဒေါ်လေး စောင့်နေရတာ ကြာလို့ စိတ်ပူနေဦးမယ်" ဟု လင်းစုယွီက ဆိုလိုက်သည်။

လင်းစုယွီက ကောကျားရှင်း၏ ရန်တိုက်မှုနှင့် ရန်စမှုများကို လျစ်လျူရှုထားသည်။ သူမအမြင်တွင် ဤကဲ့သို့ အသေးအဖွဲ စကားများများခြင်းမှာ အချိန်ကုန်ခံရကျိုး မနပ်ပေ။ ကောကျားရှင်းက ဆက်လက် ရန်စလိုသော်လည်း လင်းစုယွီ ပြောလိုက်သည့် 'တတိယ ဒေါ်လေး' ဆိုသည့် စကားကြောင့် တုံ့ကနဲ ဖြစ်သွားသည်။

ယနေ့ ကျန့်ဖိန့်ဖိန့်သည် ဟန်တုန်းရွှယ်နှင့် အတူရှိနေခြင်းဖြစ်သည်။ ဤမိန်းကလေးပြောသော 'တတိယ ဒေါ်လေး' ဆိုသည်မှာ ပိုင်မိသားစု၏ တတိယမြောက် အိမ်ခွဲမှ သခင်မ ဟန်တုန်းရွှယ်ကို ဆိုလိုခြင်းမှာ ရှင်းနေပါသည်။ ပိုင်မိသားစုက မြေးမလေးကို ပြန်ရှာတွေ့ပြီဟု သတင်းကြားခဲ့သော်လည်း မကြာသေးမီကမှ ကျန့်ဖိန့်ဖိန့်က ပိုင်မိသားစု မြေးမလေး၏ ခြေထောက်ကို ချိုးလိုက်သည်ဟူသော သတင်းက ထွက်ပေါ်ထားပြန်သည်။

ဤမိန်းကလေးက မည်သူနည်း။ ကျန့်ဖိန့်ဖိန့်နှင့် ဘယ်လိုလုပ် ဤမျှ ရင်းနှီးနေရသနည်း။ ကောကျားရှင်း စဉ်းစားလေလေ ပို၍ ဇဝေဇဝါဖြစ်လေလေပင်။ လင်းစုယွီ၏ နောက်ကြောင်းကို မသိဘဲ သူမ စိတ်လိုက်မာန်ပါ မလုပ်ဝံ့သေးပေ။ ထို့ကြောင့် လင်းစုယွီနှင့် ကျန့်ဖိန့်ဖိန့်တို့ ထွက်ခွာရန် ပြင်သောအခါ သူမက ဘေးသို့ဖယ်ပေး၍ လမ်းဖယ်ပေးလိုက်ရုံသာ တတ်နိုင်တော့သည်။

ထို့နောက်တွင် ကျန့်ဖိန့်ဖိန့်က လင်းစုယွီကို ဟောင်ကောင်၏ အင်အားကြီးမိသားစုလေးခုကြားက ပတ်သက်မှုများကို အနည်းငယ် စိတ်လှုပ်ရှားစွာဖြင့် ရှင်းပြပေးနေသည်။ သူမတွင် လူကြီးပိုင်းမျိုးဆက်များ၏ ရှုပ်ထွေးလှသော အာဃာတများကို ပြောဆိုရန် အရည်အချင်းမရှိသော်လည်း၊ သူမတို့ မျိုးဆက်ရှိ သခင်လေးများနှင့် သခင်မလေးများ၏ အကြောင်းကိုမူ တစ်ယောက်ချင်းစီအလိုက် စရိုက်၊ ဝါသနာနှင့် အကျင့်စရိုက်များကို အလုပ်လျှောက်လွှာထက်ပင် ပိုမိုစုံလင်စွာ ပြောပြနေတော့သည်။

ချမ်းသာကြွယ်ဝပြီး အာဏာရှိသော အသိုင်းအဝိုင်းဖြစ်လေလေ ပို၍ ရှုပ်ထွေးလေလေဖြစ်သည်။ နားထောင်ပြီးနောက် လင်းစုယွီက နောင်လာမည့် သူမ၏ဘဝသည် မည်မျှ ရင်ခုန်စရာကောင်းပြီး ပင်ပန်းရမည်ကို ကြိုတင်မြင်ယောင်နေမိသည်။ ထျန်းကျင်းမြို့က ဘဝလေးက ပို၍ ရိုးရှင်းပြီး စိတ်အေးချမ်းဖို့ ကောင်းလှသည်။

ဈေးဝယ်ထွက်ပြီး ဟန်တုန်းရွှယ်နှင့်အတူ ညနေခင်း လက်ဖက်ရည်သောက်ပြီးချိန်တွင် ညနေစောင်းနေပြီဖြစ်သည်။ လင်းစုယွီ ပိုင်မိသားစု၏ ပင်မစံအိမ်သို့ ပြန်ရောက်သောအခါ ပိုင်ချီမင်၏ အငြိုးအတေးအကြည့်များက သူမနောက်သို့ တကောက်ကောက် လိုက်နေသည်။ သူက အလုပ်ထဲတွင် ခွေးတစ်ကောင်လို နစ်နေချိန်၌ သူမက အပြင်ထွက် ပျော်ပါးနေသည်ကို အပြစ်တင်နေသည့်နှယ်။

"စုယွီ... ဘွားဘွားရဲ့ ကိုယ်ပိုင်ဆရာဝန်က ဘွားဘွားကျန်းမာရေး အများကြီး ကောင်းလာပြီလို့ ပြောတယ်။ အဖေက နင် မနက်ဖြန် ဘွားဘွားဆီ သွားကြည့်နိုင်မလား မေးခိုင်းလိုက်တယ်။ အဲဒီအခါကျရင် ငါတို့အားလုံး အတူသွားပြီး ဘွားဘွားကို စံအိမ်ကို ပြန်ခေါ်လာကြမယ်"

"ကောင်းပြီလေ။ ဘွားဘွား ဘာစားရတာ ကြိုက်လဲဟင်။ ကျွန်မ တစ်ခုခု ပြင်ဆင်သွားချင်လို့"

ဘွားဘွားကြီး ကျန်းမာရေးမကောင်းကြောင်း သူမ ကြားထားဖူးသည်။ ပိုင်မိသားစုက သူမအပေါ် အလွန် ယဉ်ကျေးပျူငှာသည်ဖြစ်ရာ ဘွားဘွားကြီးအတွက် သူမ၏ စိတ်ဝိညာဉ်စမ်းရေကို ရောစပ်ပေးလိုက်ရန် ဆုံးဖြတ်လိုက်သည်။ ၎င်းက ရောဂါအတွက် အထောက်အကူ ဖြစ်နိုင်ပေသည်။

"ဘွားဘွားက ရှန်ဟိုင်းမြို့ဇာတိလေ။ သူက ရန်တူရှန်း (ဝက်သားနှင့် မျှစ်စွပ်ပြုတ်တစ်မျိုး) ကို အရမ်းကြိုက်တာ။ နှစ်တိုင်းနွေဦးရာသီမှာ မျှစ်တွေ အနုဆုံးအချိန်ဆိုရင် ဘွားဘွားက ဒီဟင်းကို ကိုယ်တိုင်ချက်လေ့ရှိတယ်"

...နွေဦးမျှစ်လားး! သူမ၏ နေရာလွတ်ထဲတွင် မရှိသည်တော့မဟုတ်၊ သို့သော် ယခုအချိန်တွင် ထုတ်သုံးလိုက်လျှင် လူသိသာလွန်းသွားမည်။ ယခုချိန်က ဆောင်းဦးအစဖြစ်၍ ဆောင်းမျှစ်ကို သုံးလျှင်လည်း အဆင်ပြေနိုင်လောက်ပါသည်။

လင်းစုယွီသည် ပိုင်ချီမင်မှတစ်ဆင့် မိသားစု၏ ဒုတိယမြောက်အိမ်ဖော် အစ်မအာ့ကို ဟင်းချက်စရာများ ပြင်ဆင်ခိုင်းပြီးနောက် နောက်တစ်နေ့ နံနက်အစောကြီးတွင် မီးဖိုချောင်၌ စတင် အလုပ်ရှုပ်တော့သည်။

"မမလေးစုယွီ... ဒီဟင်းကို မီးအပူချိန်ကြည့်တာ ကျွန်မတို့ကိုပဲ လွှတ်ထားလိုက်ပါ။ မမလေးလည်း မနက်စာ မစားရသေးဘူးမလား။ သခင်ကြီးတို့က ထမင်းစားခန်းမှာ အတူစားဖို့ စောင့်နေကြပါတယ်"

စိတ်ရင်းမှန်ခြင်းသည် လူတို့၏နှလုံးသားကို ထိမိစေရန် အလွယ်ကူဆုံးသော လက်နက်တစ်ခုပင် ဖြစ်သည်။ လင်းစုယွီက ဘွားဘွားကြီးပိုင်အတွက် စောစောထ၍ ဟင်းချက်ပေးခြင်းက ပိုင်မိသားစု အစေခံများ၏ လေးစားမှုကို ရရှိစေရုံသာမက မိသားစုအကြီးအကဲသခင်ကြီးပိုင်ကိုလည်း အလွန် ဝမ်းမြောက်စေခဲ့သည်။

"စုယွီ... မြန်မြန်လာ။ ဒီနေ့ကစပြီး အဒေါ် ဘေးမှာ ထိုင်နော်"

အဒေါ်ဖြစ်သူ လုလန်ရှင်းက သူမဘေးနားရှိ ထိုင်ခုံကို ညွှန်ပြ၍ လင်းစုယွီကို ခေါ်လိုက်သည်။ ပိုင်မိသားစု၏ ထိုင်ခုံနေရာ သတ်မှတ်ချက်မှာ အလွန် အရေးကြီးလှသည်။

အိမ်ရှင်မ၏ ဘေးတွင် ထိုင်ခွင့်ရခြင်းက လင်းစုယွီသည် ဤစံအိမ်တွင် တတိယမြောက် အရေးအပါဆုံး အမျိုးသမီးဖြစ်သည်ဟု အစေခံအားလုံးကို အသိပေးလိုက်ခြင်းပင်။

"ဘွားဘွားကြီးအတွက် မနက်စောစောထပြီး ဟင်းချက်ပေးတယ်လို့ အစ်မအာ့ ပြောပြလို့ ကြားထားတယ်။ သမီးက တကယ်ကို သိတတ်တဲ့ ကလေးမလေးပဲ"

"ဒါပေမဲ့ နောက်ဆိုရင် အစ်မအာ့ကိုပဲ ခိုင်းလိုက်ပါ၊ မိန်းကလေးဆိုတာ လက်ကလေးတွေကို ဂရုစိုက်ရတယ်လေ။ အခု ရာသီဥတုကလည်း အေးလာပြီဆိုတော့ ရေအေးအေးတွေ သိပ်မကိုင်စေချင်ဘူး"

မနက်စာ စားပြီးနောက် ပိုင်မိသားစု အကြီးအကဲက ပိုင်ချီမင်နှင့် လင်းစုယွီတို့ကို ခေါ်ဆောင်၍ အဖွားပိုင် နေထိုင်ရာ တောင်ကုန်းပေါ်ရှိ ဗီလာသို့ သွားကြသည်။

အဖွားပိုင်က လင်းစုယွီကို မြင်လိုက်ရသည့် ခဏ၌ပင် မျက်ဝန်းများတွင် မျက်ရည်များ ပြည့်လျှံသွားတော့သည်။ လင်းစုယွီ၏ ရင်းနှီးနေသော မျက်နှာကို မြင်သည်နှင့် ဘာကို နားမလည်ဘဲ ရှိတော့မည်နည်း။

လင်းစုယွီက ပိုင်ဝမ်ချင်း၏ အမှတ်အသားဖြစ်သော ကျောက်စိမ်းဆွဲသီးကို ယနေ့တွင် ရည်ရွယ်ချက်ရှိရှိ ဆွဲလာခဲ့သည်။ နေရာလွတ်သည် သူမ၏ စိတ်ဝိညာဉ်နှင့် ပေါင်းစပ်သွားပြီဖြစ်ရာ ဤကျောက်စိမ်းဆွဲသီးသည် ယခုအခါ အဆောင်အယောင်မျှသာ ဖြစ်သဖြင့် အပြင်ထုတ်လိုက်သော်လည်း နေရာလွတ်ကို ထိခိုက်မှု မရှိတော့ပေ။

"သမီးက... ငါ့သမီး ဝမ်ချင်းရဲ့ သမီးလေးလား... သမီးက ငါ့ရဲ့ မြေးအရင်းလေးပဲ မဟုတ်လား"

"ဟုတ်ကဲ့ ဘွားဘွား၊ သမီးက ပိုင်ဝမ်ချင်းရဲ့ သမီးပါ။ သမီးနာမည်က လင်းစုယွီပါ၊ နှစ်သစ်ကူးပြီးရင် သမီး ၁၃ နှစ် ပြည့်ပါပြီ"

အဖွားပိုင် တစ်ကိုယ်လုံး စိတ်လှုပ်ရှားမှုကြောင့် တုန်ယင်နေပြီး လင်းစုယွီကို တင်းကြပ်စွာ ဖက်ထားလိုက်သည်။ စန္ဒကူးနံ့ ခပ်သင်းသင်းလေးက လင်းစုယွီ၏ နှာခေါင်းထဲသို့ တိုးဝင်လာပြီး အဖွားပိုင်ဆီမှ ထွက်ပေါ်နေသော အရှိန်အဝါက လင်းစုယွီကို အလွန် စိတ်အေးချမ်းစေပါသည်။

"အဖွား... ညီမလေးကို နည်းနည်းလွှတ်ပေးဦးလေ! ကြည့်ပါဦး၊ အဖွားဖက်ထားတာ အသက်ရှူကျပ်ပြီး မျက်နှာလေး နီနေပြီ! အဖွား... ကျွန်တော် တကယ် တော်တယ်မဟုတ်လား။ မြေးအရင်းလေးကို ရှာတွေ့အောင် ကျွန်တော်ပဲ လုပ်ခဲ့တာလေ"

ပိုင်ချီမင်သည် အဖွားပိုင်၏ ကျန်းမာရေးအခြေအနေကို သိထားသူဖြစ်သည်။ သူမက ယခုမှ ပြန်ကောင်းစရှိသေးရာ အလွန်အမင်း ငိုယိုနေမည်ကို သူ စိုးရိမ်မိသည်။

"အေးပါ... မြေးက တော်ပါတယ်၊ ဒါနဲ့ ဒါတွေအားလုံးက ဘယ်လိုဖြစ်ရတာလဲ"

ပိုင်မိသားစု၏ မြေးမလေးအဖြစ် ဟန်ဆောင်ဝံ့သူ ရှိခဲ့သည်။ ၎င်းမှာ အဖွားပိုင် ကိုယ်တိုင်က ဆွေမျိုးသားချင်းကို အလွန်တရာ တောင့်တနေခဲ့ခြင်းကြောင့်လည်း ပါဝင်သော်လည်း၊ အဆိုပါ လူလိမ်မလေးသည် သူမ၏သမီး ပိုင်ဝမ်ချင်း၏ အကြောင်းအရာ အတော်များများကို သိနေခဲ့သည်။

မည်သို့ပင် ကြည့်စေကာမူ တစ်ခုခုတော့ ပတ်သက်နေရမည်။

အချိန်အကြာကြီး အသက်ရှင်လာခဲ့သူဖြစ်၍ တွေးတောကြည့်လိုက်ရာ လင်းရှင်းယောင်၊ လင်းစုယွီ... မျိုးရိုးနာမည်က အတူတူပင်ဖြစ်နေသည်။

သူမ၏မြေးမလေးက အဆိုပါ လူလိမ်မလေးကို သိလား။ လှည့်စားခံရခြင်းက အဖွားပိုင်ကို ဒေါသထွက်စေသော်လည်း သူမ အစိုးရိမ်ဆုံးမှာ သူမ၏မြေးမလေး လင်းစုယွီတစ်ယောက် ဤနှစ်များတစ်လျှောက် မည်သို့ ရှင်သန်ခဲ့ရလဲ၊ အနိုင်ကျင့် နှိပ်စက်ခံခဲ့ရလား ဆိုသည်ကိုသာ ဖြစ်သည်။

"အဖွား... ကျွန်တော် ထျန်းကျင်းအထိသွားပြီး သေချာ စုံစမ်းခဲ့တာပါ။ အဲဒီတုန်းက အဒေါ်က ကျွန်တော်တို့နဲ့အတူ မလိုက်ခဲ့ဘဲ နောက်ဆုံးမှာ ထျန်းကျင်းကို ရောက်သွားခဲ့တယ်။ အဲဒီမှာ လင်းဟွာရှန်းနဲ့ ဆုံပြီး လင်းမိသားစုထဲမှာ ညီမလေး လင်းစုယွီကို မွေးခဲ့တာပါ" ဟု ပိုင်ချီမင်က ရှင်းပြလိုက်တော့သည်။

၁၉၆၀ ၌ ပြန်လည်မွေးဖွားခြင်း