အခန်း ၄၆၁

အခန်း (၄၆၁)

ရှောင်မို၏ အသိစိတ်တို့ ဝေဝါးလွင့်မျောနေရာမှ လက်တွေ့ကမ္ဘာဆီသို့ တစ်ဖန် ပြန်လည်ရောက်ရှိလာလေ၏။

ရှောင်မိုက ဘဝတစ်ရာကျမ်းထဲမှ ပဉ္စမမြောက်ဘဝ၏ ဖြတ်သန်းမှုကို ပြန်လည်အောက်မေ့ရန် ကြိုးစားကြည့်သော်လည်း မည်သည့်အရာကိုမျှ မှတ်မိနိုင်ခြင်း မရှိချေ။

ထို့အပြင် ရှောင်မိုက အတင်းအဓမ္မ စဉ်းစားရန် ကြိုးပမ်းလိုက်တိုင်း အပြစ်ရှိသလို ခံစားရသော ထိုရင်နာမှုက ပုရွက်ဆိတ်များ အုံကြွကာ နှလုံးသားကို အဆက်မပြတ် ကိုက်ခဲနေသည့်အလား နာကျင်ရပေ၏။

ရှောင်မိုမှာ အသက်ရှူရန်ပင် အနည်းငယ် ခက်ခဲကျပ်တည်းလာတော့၏။

နဖူးပြင်မှ ချွေးအေးတို့ကို သုတ်ဖယ်လိုက်ရင်း ရှောင်မိုက သူ၏စိတ်ကို တည်ငြိမ်အောင် ထိန်းချုပ်လိုက်လေ၏။

ထိုခဏမှာပင် ဘဝတစ်ရာကျမ်း၏ အသံက ရှောင်မို၏ စိတ်အာရုံထဲ၌ ပဲ့တင်ထပ်ကာ ထွက်ပေါ်လာလေတော့သည်

【 ဘဝတစ်ရာကျမ်း၏ ပဉ္စမမြောက်ဘဝ ဖြတ်သန်းမှုအတွေ့အကြုံကို ပိုင်ရှင်က အောင်မြင်စွာ ပြီးမြောက်ခဲ့ချေပြီ။ 】

【 တာဝန် (၁) ပိုင်ရှင်သည် သူမအား အခြားတိုင်းပြည်များကို အောင်နိုင်ရန်နှင့် ကျမ်းစာထဲရှိ လောကများအားလုံးကို တစ်ပေါင်းတစ်စည်းတည်းဖြစ်စေရန် ကူညီပေးခဲ့၏။ ထို့နောက် သူမက မိမိကိုယ်ကိုယ် ဧကရီအဖြစ် ကြေညာကာ ရထားဘီးဝင်ရိုးများ၊ အရေးအသားများနှင့် ဘာသာစကားတို့ကို စံသတ်မှတ်ပေးခဲ့ပြီး ရွှေခေတ်တစ်ခေတ်ကို ဖန်တီးနိုင်ရန် တိုင်းပြည်ရေးရာများကို လေ့လာလိုက်စားစွာ စီမံအုပ်ချုပ်ခဲ့လေသည်။

တာဝန် တိုးတက်မှုအခြေအနေ အောင်မြင်စွာ ပြီးမြောက်ခဲ့ပြီ။

တာဝန် ဆုလာဘ်များ စစ်ချီနည်းစနစ်၊ စစ်ပွဲဖြင့် တာအိုနှင့် ပေါင်းစပ်ခြင်း။

စစ်ချီနည်းစနစ် ဤနည်းစနစ်တွင် ပဉ္စမမြောက်ဘဝမှ ပိုင်ရှင်ရရှိခဲ့သော စစ်ဘက်ဆိုင်ရာ ဗျူဟာများနှင့် ပတ်သက်သည့် နားလည်သဘောပေါက်မှုများ အားလုံးပါဝင်ပေ၏။ ပိုင်ရှင်က စစ်တပ်တစ်တပ်ကို ဦးဆောင်၍ စစ်မြေပြင်သို့ ဝင်ရောက်သောအခါ ပြိုင်ဘက်၏ အစီအရင်များကို ထိုးထွင်းသိမြင်နိုင်ပြီး အမှားနှင့်အမှန်ကို ခွဲခြားသိမြင်နိုင်မည့် အခွင့်အလမ်း ပိုမိုမြင့်မားလာမည့်အပြင် စစ်သည်တော်များ၏ စိတ်ဓာတ်ခွန်အားသည်လည်း သုံးဆယ်ရာခိုင်နှုန်းအထိ တိုးတက်လာမည် ဖြစ်သတည်း။

စစ်ပွဲဖြင့် တာအိုနှင့် ပေါင်းစပ်ခြင်း စစ်မြေပြင်ဟူသည် ကံတရားအကျိုးဆက်များ စုဝေးရာနေရာဖြစ်သော်လည်း ကျင့်ကြံသူအများစုအတွက်မူ အသက်နှင့်သေဆုံးခြင်းကို နားလည်သဘောပေါက်ခြင်းဖြင့် အဆင့်ချိုးဖောက်တက်လှမ်းနိုင်သော နေရာတစ်ခုလည်း ဖြစ်ပေ၏။ နောင်အနာဂတ်တွင် ပိုင်ရှင်က ရန်သူများကို သတ်ဖြတ်ရန် စစ်မြေပြင်သို့ ဝင်ရောက်သောအခါ (သို့မဟုတ်) အခြားသော ကျင့်ကြံသူများနှင့် တိုက်ခိုက်သောအခါ ၎င်းသည် သူ၏ကျင့်ကြံခြင်းအဆင့် တက်လှမ်းမှုကို အရှိန်မြှင့်တင်ပေးနိုင်ပြီး အသက်နှင့်သေဆုံးခြင်းကြားမှ သဘောတရားများကို ပိုမိုလွယ်ကူစွာ ရရှိစေနိုင်ပေမည်။ 】

【 တာဝန် (၂) ဤလောကတွင် ပိုင်ရှင်၏ ဂုဏ်သိက္ခာ ပိုမိုမြင့်မားလေလေ၊ အခြေချတွက်ချက်မှု ပြုလုပ်ချိန်တွင် ရရှိမည့် ဆုလာဘ်များက ပိုမိုရက်ရောများပြားလေလေ ဖြစ်ပေမည်။

တာဝန် တိုးတက်မှုအခြေအနေ အနန္တဓမ္မလောကနှင့် မိစ္ဆာကမ္ဘာတစ်ဝန်းလုံး၌ ကျော်ကြားနေပြီး ထိုဂုဏ်သတင်းက ပြင်ပပင်လယ်အထိပင် ပြန့်နှံ့နေချေပြီ။

တာဝန် ဆုလာဘ် ဂုဏ်သိက္ခာ။

ဂုဏ်သိက္ခာ ပိုင်ရှင်နှင့် ရင်းနှီးကျွမ်းဝင်သူ ပိုမိုများပြားလေလေ၊ ၎င်းတို့၏ နှလုံးသားထဲတွင် ပိုင်ရှင်၏ အဆင့်အတန်းက ပိုမိုမြင့်မားလေလေ၊ ပိုင်ရှင်သည် တာအို၏ တုံ့ပြန်ထောက်ပံ့မှုကို ပိုမိုရရှိနိုင်လေလေ ဖြစ်ပေ၏ (ရွှေအမြူတေအဆင့်သို့ ရောက်ရှိပြီးနောက် သက်ရောက်မှုရှိမည်)။ 】

【 တာဝန် (၃) ဓားတာအို၊ ကွန်ဖြူးရှပ်တာအို (သို့မဟုတ်) သိုင်းတာအို ဖြစ်စေကာမူ ကျင့်ကြံခြင်းကို ပေါ့ဆခြင်း မပြုရပေ။ ပဉ္စမမြောက်ဘဝ၏ အဆုံးသတ်တွင် ပိုင်ရှင်၏ ကျင့်ကြံခြင်းအဆင့် ပိုမိုမြင့်မားလေလေ၊ ဆုလာဘ်များက ပိုမိုရက်ရောလေလေ ဖြစ်သတည်း။

တာဝန် တိုးတက်မှုအခြေအနေ ကျောက်စိမ်းသန့်စင်ခြင်းအဆင့် ပြီးပြည့်စုံခြင်း။

တာဝန် ဆုလာဘ်များ နတ်ဘုရားသတ်လှံဆန္ဒ၊ သိုင်းကျင့်ကြံသူ ရုပ်ခန္ဓာ။

နတ်ဘုရားသတ်လှံဆန္ဒ နတ်ဘုရားသတ်လှံသိုင်းပညာရပ်ကို ရှေးဟောင်း လူသားမျိုးနွယ် ဘိုးဘေးတစ်ဦးက ဖန်တီးခဲ့ခြင်းဖြစ်ပေ၏။ စုစုပေါင်း လှံဟန်ပန် ကိုးကွက်ရှိပြီး ကိုး ဟူသော ဂဏန်းသည် အမြင့်ဆုံး အဆုံးစွန်သော ကိန်းဂဏန်းဖြစ်လေသည်။ ပိုင်ရှင်က နဝမမြောက် လှံကွက်အထိ ကျင့်ကြံနိုင်သောအခါ နတ်ဘုရားများကိုပင် သတ်ဖြတ်နိုင်စွမ်း ရှိပေလိမ့်မည်။

ဤလှံဆန္ဒတွင် လှံသိုင်းပညာရပ်များ၊ ကောင်းကင်ဖွင့်လက်သီး သိုင်းကွက်များနှင့် ကျင့်ကြံခြင်းအဆင့် ချိုးဖောက်တက်လှမ်းမှုဆိုင်ရာ နားလည်သဘောပေါက်မှုများ ပါဝင်ပေသည်။

မှတ်ချက် ဤလှံသိုင်းပညာရပ်များသည် လက်တွေ့လောကတွင်လည်း တည်ရှိနေပြီး တူညီသော မျိုးရိုးအဆက်အနွယ်မှ ဆင်းသက်လာခြင်း ဖြစ်ပေ၏။ အကယ်၍ ပိုင်ရှင်က ဤလှံသိုင်းပညာရပ်များကို လူအများရှေ့တွင် အသုံးပြုလိုပါက အထူးသတိထား ဆင်ခြင်ရပေမည်။

သိုင်းကျင့်ကြံသူ ရုပ်ခန္ဓာ ပိုင်ရှင်က ခန္ဓာကိုယ်သန့်စင်ခြင်းကို ပြုလုပ်သောအခါ ခန္ဓာကိုယ်သန့်စင်ရေး ဆေးဝါးများကို ၎င်းတို့၏ အမြင့်ဆုံး အကန့်အသတ်အထိ စုပ်ယူနိုင်စွမ်းရှိပေ၏။ ရုပ်ခန္ဓာ၏ ကြံ့ခိုင်မှုသည် ပိုင်ရှင်၏ လက်တွေ့ ရုပ်ပိုင်းဆိုင်ရာ ခွန်အားအပေါ် မူတည်၍ တိုးတက်လာမည် ဖြစ်သတည်း။ 】

【 ဆုလာဘ်များကို ဖြန့်ဝေပေးပြီး ဖြစ်ပေသည်။ 】

【 ဘဝတစ်ရာကျမ်း၏ ဆဋ္ဌမမြောက်ဘဝကို ပြင်ဆင်နေဆဲ ဖြစ်၏။ ပြင်ဆင်ရမည့် အချိန်ကာလကိုမူ မသိရသေးချေ။ ပြင်ဆင်မှု ပြီးစီးသွားသည်နှင့်တစ်ပြိုင်နက် ပိုင်ရှင်ထံသို့ ချက်ချင်း အသိပေး အကြောင်းကြားမည် ဖြစ်၏။ 】

【 မှတ်ချက် ပိုင်ရှင်၏ ကျင့်ကြံခြင်းအဆင့်က နိမ့်ကျနေပြီး စိတ်စွမ်းအင်မှာလည်း သာမန်မျှသာ ဖြစ်သောကြောင့်၊ ဘဝတစ်ရာကျမ်းက ပိုင်ရှင်ကို ကာကွယ်ပေးရန်အတွက် သူ၏ ပဉ္စမမြောက်ဘဝ မှတ်ဉာဏ်များကို ချိတ်ပိတ်ထားလိုက်လေပြီ။

သို့မဟုတ်ပါက ဘဝငါးခုကို ဖြတ်သန်းပြီးနောက် ပိုင်ရှင်သည် မိမိကိုယ်ကိုယ် လက်လွတ်ဆုံးရှုံးသွားပေလိမ့်မည်။

ပိုင်ရှင်၏ ကျင့်ကြံခြင်းအဆင့် မြင့်တက်လာပြီး သူ၏ စိတ်စွမ်းအင်နှင့် ဝိညာဉ် ပိုမိုအားကောင်းလာသည်နှင့်အမျှ ဘဝတစ်ရာကျမ်းက ထိုကန့်သတ်ချက်များကို တဖြည်းဖြည်း ရုပ်သိမ်းပေးသွားမည် ဖြစ်သတည်း။ 】

ဘဝတစ်ရာကျမ်း၏ နောက်ဆုံးအသံဝိညာဉ် တိတ်ဆိတ်သွားသည်နှင့်တစ်ပြိုင်နက်၊ ရင်းနှီးနေသယောင်ရှိသော်လည်း သူစိမ်းဆန်နေသော အသိပညာတစ်ခုက ရှောင်မို၏ ဦးနှောက်အာရုံကြောများထဲသို့ စီးဆင်းဝင်ရောက်လာလေ၏။

ထိုအသိပညာများ အားလုံးသည် စစ်မြေပြင်၌ တပ်ဖွဲ့များကို ဦးဆောင်ကွပ်ကဲခြင်းနှင့် ပတ်သက်နေပေသည်။

မျက်တောင်တစ်ခတ်စာ အချိန်လေးအတွင်းမှာပင် ရှောင်မိုက ဤအကြောင်းအရာများ အားလုံးကို နားလည်သဘောပေါက်ကာ အကြွင်းမဲ့ တတ်မြောက်သွားချေပြီ။

ထို့အပြင် ဤသည်မှာ စာအုပ်စာပေမှ သင်ယူရုံမျှဖြင့် ရရှိလာသော အပေါ်ယံ အသိပညာမျိုး မဟုတ်ခဲ့ချေ။

ရှောင်မိုမှာ တစ်ဘဝတာလုံး စစ်မြေပြင်တွင် စစ်တပ်များကို အမှန်တကယ် ဦးဆောင်တိုက်ပွဲဝင်ခဲ့ရသကဲ့သို့ ခံစားလိုက်ရလေ၏။

ရှောင်မို၏ စိတ်အာရုံထဲ၌ ယုံကြည်မှုတစ်ခုပင် ထွက်ပေါ်လာလေသည်။ ယခုအခါ သူသည် ခမ်းနားကြီးကျယ်သော တပ်မတော်ကြီးတစ်ခုကို ဦးဆောင်ကာ ယနေ့ခေတ်၏ နာမည်ကျော် စစ်သူကြီးအချို့နှင့်ပင် ယှဉ်ပြိုင်တိုက်ခိုက်နိုင်စွမ်း ရှိနေပြီဟူ၍ပင်။

ထို့နောက် ရှောင်မို၏ ခန္ဓာကိုယ်အတွင်း၌ လှံဆန္ဒတစ်မျှင်က လေဟာပြင်ထဲမှနေ၍ ရုတ်တရက် ထွက်ပေါ်လာလေ၏။

ဘဝတစ်ရာကျမ်းက ဖော်ပြထားခဲ့သည့်အတိုင်းပင်၊ ဤလှံဆန္ဒထဲတွင် နတ်ဘုရားသတ်လှံသိုင်းပညာရပ်များနှင့်တကွ တန်ဖိုးမဖြတ်နိုင်သော နားလည်သဘောပေါက်မှု အချို့ပါဝင်နေပေသည်။

ထိုနားလည်သဘောပေါက်မှုများက ရှောင်မိုအား အချိန်ကုန်လူပန်းဖြစ်စေမည့် လမ်းလွဲလမ်းမှားများစွာမှ ကယ်တင်ပေးနိုင်ပေလိမ့်မည်။

လှံသိုင်းကို ကျင့်ကြံရန်အတွက် ပထမဦးစွာ လက်သီးသိုင်းကို ကျင့်ကြံရပေမည်။

ကောင်းကင်ဖွင့်လက်သီးသည် နတ်ဘုရားသတ်လှံသိုင်းကို သင်ယူရန်အတွက် မရှိမဖြစ်လိုအပ်သော အခြေခံကြိုတင်သတ်မှတ်ချက် ဖြစ်သောကြောင့်၊ ကောင်းကင်ဖွင့်လက်သီး သိုင်းပညာရပ်သည်လည်း သဘာဝကျကျပင် ပါဝင်လာခဲ့လေ၏။

ဤအချက်က ရှောင်မိုကို အလွန်အမင်း ဝမ်းမြောက်ပျော်ရွှင်သွားစေတော့သည်။

အဘယ်ကြောင့်ဆိုသော် နတ်ဘုရားသတ်လှံကို သင်ယူရန် မဟုတ်လျှင်တောင်မှ၊ ဤကောင်းကင်ဖွင့်လက်သီးသည် အထက်သုံးဆင့်သို့ တက်လှမ်းနိုင်ရန် လုံလောက်သော လက်သီးသိုင်းပညာရပ်တစ်ခု ဖြစ်နေပြီး ၎င်းကို လေ့ကျင့်ခြင်းဖြင့် ရုပ်ခန္ဓာအတွက် အကျိုးကျေးဇူးများစွာကို ရရှိစေနိုင်သောကြောင့် ဖြစ်ပေ၏။

အကယ်၍ သာမန်လူတစ်ဦးကသာ ၎င်းကို လေ့ကျင့်မည်ဆိုပါက (ဥပမာအားဖြင့် ဧကရာဇ်တစ်ပါးကသာ မနေမနား ကြိုးစားပမ်းစား လေ့ကျင့်မည်ဆိုပါက) အခြားအရာများကို ဘေးဖယ်ထားလိုက်လျှင်ပင်၊ တစ်ညတည်းနှင့် မောင်းမငယ် ငါးဦး သို့မဟုတ် ခြောက်ဦးခန့်၏ နာမည်ကတ်ပြားများကို လှန်လှောရွေးချယ်ရန် ပြဿနာမရှိနိုင်တော့ဘဲ မည်သည့် ကာမအားတိုးဆေးထက်မဆို အဆတစ်ရာမျှ ပိုမို အစွမ်းထက်ပေလိမ့်မည်။

ထို့အပြင် ကောင်းကင်ဖွင့်လက်သီးကို လေ့ကျင့်ရာတွင် နတ်ဘုရားသတ်လှံထက် အင်အားစိုက်ထုတ်မှု များစွာ လျော့နည်းသက်သာပေသည်။

လောလောဆယ်တွင် သူသည် ဓားသိုင်းအပေါ်၌သာ အာရုံစိုက်ထားနိုင်ပြီး လက်သီးသိုင်းပညာရပ်ကို လေ့ကျင့်ရန်အတွက် အားလပ်ချိန် ရှာဖွေနိုင်ပေ၏။

အချိန်အခါ သင့်မြတ်လာသောအခါမှသာ နတ်ဘုရားသတ်လှံကို ဆက်လက် ကျင့်ကြံတော့မည် ဖြစ်သည်။

သို့ရာတွင် ရှောင်မိုက ဤနတ်ဘုရားသတ်လှံ၏ အရသာကို ခံစားနေဆဲ အချိန်လေးမှာပင်...

သူ၏ တစ်ကိုယ်လုံး၌ စူးရှပြင်းထန်သော နာကျင်မှုတစ်ခုကို ရုတ်တရက် ခံစားလိုက်ရလေတော့၏။

သူ၏ ကြွက်သားများ၊ အရိုးများနှင့် အရေပြားတို့သည် အလုံးတစ်လုံးအဖြစ် နယ်ဖတ်ခံလိုက်ရပြီး၊ ခြေမွခံလိုက်ရကာ၊ ထို့နောက်မှ ပုံစံသစ်တစ်ဖန် ပြန်လည် ဖွဲ့စည်းခံလိုက်ရသည့်အလား ခံစားရပေသည်။

ရှောင်မိုက နူးညံ့သော ခေါင်းအုံးတစ်လုံးကို အလျင်အမြန် ဆွဲယူကာ အံကြိတ်ကိုက်ခဲထားလိုက်ရ၏။ သူ၏ အော်ဟစ်ညည်းတွားသံများကြောင့် အပြင်ဘက်မှ ဝေ့ရွှန်း အခန်းထဲသို့ ဝင်လာမည်ကို စိုးရိမ်သောကြောင့် ဖြစ်လေသည်။

နံ့သာတိုင်တစ်တိုင် လောင်ကျွမ်းချိန် ကုန်ဆုံးသွားပြီးနောက်...

ရှောင်မိုသည် စာကြည့်ဆောင်အတွင်းရှိ နူးညံ့သော သလွန်တော်ပေါ်တွင် လှဲလျောင်းနေပြီး သူ၏ ဝတ်ရုံတော်များမှာ ချွေးများဖြင့် ရွှဲရွှဲစိုနေချေပြီ။

ဤတစ်ကြိမ်တွင်မူ ချွေးပေါက်များထဲမှ အညစ်အကြေးများ စစ်ထုတ်ပစ်ခြင်းမျိုး မရှိခဲ့သော်လည်း၊ ရှောင်မိုက သူ၏ ခန္ဓာကိုယ်သည် ယခင်ကထက် များစွာ ပို၍ ခိုင်မာတောင့်တင်းလာကြောင်းကို ခံစားလိုက်ရလေ၏။

၎င်းသည် ကျောက်တုံးတစ်တုံးကဲ့သို့ တောင့်တင်းမာကျောနေခြင်းမျိုး မဟုတ်ဘဲ၊ စွဲမြဲကြံ့ခိုင်သော ပျော့ပြောင်းမှုတစ်မျိုး ဖြစ်နေပေသည်။

သာမန် အရပ်သုံးစကားဖြင့် ပြောရလျှင် သူ၏ ကာကွယ်မှုစွမ်းရည် မြင့်တက်လာပြီး သူ၏ အမြင့်ဆုံး သက်စောင့်ခွန်အား ပမာဏသည်လည်း ပိုမို ထူထဲလာခြင်းပင် ဖြစ်တော့သတည်း။

ရှောင်မိုက သန့်ရှင်းသော ဝတ်ရုံတော်များကို လဲလှယ်ဝတ်ဆင်လိုက်ပြီးနောက် စာကြည့်ဆောင်ထဲမှ လမ်းလျှောက်ထွက်လာခဲ့လေ၏။

"အရှင်မင်းမြတ်"

အရှင်မင်းမြတ် ထွက်လာသည်ကို မြင်သောအခါ ဝေ့ရွှန်းက ကပျာကယာ ဦးညွှတ်အရိုအသေ ပေးလိုက်လေသည်။

ဝေ့ရွှန်းက အရှင်မင်းမြတ်ကို ခိုးကြည့်လိုက်ပြီးနောက် အံ့သြမှင်တက်သွားခြင်းမှ မလွတ်မြောက်နိုင်ခဲ့ချေ။ အဘယ်ကြောင့် အရှင်မင်းမြတ်၏ ရုပ်ဆင်းသွင်ပြင်သည် ယခင်ကထက် များစွာ ပို၍ ကြည့်ကောင်းလာသလို ခံစားနေရပါသနည်း။

"ဝေ့ရွှန်း... ရထားယာဉ်ကို ပြင်ဆင်လော့။"

ရှောင်မိုက ဝေ့ရွှန်းကို ပြောလိုက်၏။ သူ၏ လေသံထဲတွင် မျှော်လင့်တောင့်တမှု အရိပ်အယောင်အချို့ ပါဝင်နေပေသည်။

"အရှင်မင်းမြတ်... ဘယ်အရပ်ဆီသို့ ကြွချီတော်မူမလို့ပါလဲ ဘုရား။" အရှင်မင်းမြတ်၏ စိတ်အာရုံ အတော်လေး ကြည်လင်နေပုံရသည်ကို ဝေ့ရွှန်းလည်း သတိပြုမိလိုက်လေ၏။

"နိုင်ငံတော်ဆရာအိမ်တော်ဆီသို့ပဲ။" ရှောင်မိုက ပြုံးလိုက်သည်။

လွန်ခဲ့သော ရက်များအတွင်း သူသည် ထိုနတ်မိမယ်ကျန်း၏ အဆက်မပြတ် ဖိနှိပ်ရိုက်နှက်ခြင်းကို ခံခဲ့ရပြီး၊ ၎င်းမှာပင် သူတို့နှစ်ဦး တူညီသော ကျင့်ကြံခြင်းအဆင့်၌ ရှိနေစဉ်က ဖြစ်ပေ၏။

ယခုအခါ သူ၏ ရုပ်ခန္ဓာမှာ သိသိသာသာ အားကောင်းလာပြီဖြစ်ရာ၊ ဆုံးရှုံးသွားသော မျက်နှာကို ပြန်လည်ဆယ်ယူရန် အချိန်ကျရောက်လာချေပြီ။

"မှန်လှပါ အရှင်မင်းမြတ်ဘုရား။ ဒီအစေခံအိုကြီး အခုချက်ချင်းပဲ တော်ဝင်ရထားယာဉ်ကို သွားရောက်ပြင်ဆင်လိုက်ပါ့မယ်။"

အရှင်မင်းမြတ်သည် အဘယ်ကြောင့် နိုင်ငံတော်ဆရာအိမ်တော်ဆီသို့ အမြဲတမ်း သွားချင်နေရသနည်းဆိုသည်ကို ဝေ့ရွှန်း နားမလည်ခဲ့သော်လည်း၊ တစ်ခါတစ်ရံတွင် အရှင်မင်းမြတ်မှာ ပွန်းပဲ့ဒဏ်ရာများဖြင့် ထွက်လာတတ်သည့်တိုင်အောင် သွားရောက်ရန် အခိုင်အမာ တောင်းဆိုနေဆဲ ဖြစ်ပေသည်။

သို့သော်လည်း တစ်ခါတစ်ရံတွင် အရှင်မင်းမြတ်က ဤကဲ့သို့သော အရာမျိုးကို နှစ်သက်နေခြင်းလည်း ဖြစ်နိုင်ပေ၏။

သို့ရာတွင် ဝေ့ရွှန်းက ခြေလှမ်းအနည်းငယ် လှမ်းပြီးသည်နှင့်တစ်ပြိုင်နက် ချက်ချင်းပင် လှည့်ကြည့်လာခဲ့လေသည်

"အို... အရှင်မင်းမြတ်ဘုရား၊ လင်ရှင်းနန်းဆောင်ရှိ မယ်တော်ကြီးယန်ထံမှ အရှင်မင်းမြတ် ဖတ်ရှုစစ်ဆေးတော်မူနိုင်ရန်အတွက် စာလွှာတစ်ခုကို ပို့ဆောင်ထားပါတယ် ဘုရား။"

ရှောင်မိုက ထိုစာလွှာကို ယူ၍ ဖွင့်ကြည့်လိုက်လေ၏။ အတွင်း၌ မယ်တော်ကြီးယန်၏ ဘက်မှ နန်းတွင်းအစေခံမလေးများကို ရွေးချယ်ခြင်းနှင့် ပတ်သက်သည့် ကိစ္စရပ်အချို့နှင့် ရွေးချယ်ခံရသူများ၏ စာရင်းပါဝင်နေပြီး ယနေ့သည် နောက်ဆုံး အဆုံးသတ်ရက် ဖြစ်ပေသည်။

"ဘာပြဿနာမှ မရှိဘူး။ ဒီလိုကိစ္စမျိုးတွေအတွက် ငါ့ကို တိုင်ပင်ဆွေးနွေးနေစရာ မလိုဘူးလို့ မယ်တော်ကြီးကို တစ်ယောက်ယောက်လွှတ်ပြီး ပြောလိုက်ပါ။" ရှောင်မိုက ဆိုလေ၏။

နန်းတွင်းအစေခံမလေးများ ကိစ္စနှင့် ပတ်သက်၍မူ ရှောင်မိုက ဂရုပင်မစိုက်ခဲ့ချေ။

အနာဂတ်တွင် ရောက်လာမည့် မြင့်မြတ်သော မိဖုရားငယ်နှစ်ပါးကိုပင် သူ ထိန်းချုပ်နိုင်စွမ်း ရှိမည်မဟုတ်ပေ။

သို့သော်လည်း... ရှောင်မိုက စာကြည့်ဆောင်၏ တံခါးဝတွင် အစောင့်အဖြစ် ရပ်နေကြသော နန်းတွင်းအစေခံမလေး အနည်းငယ်ကို လှမ်းကြည့်လိုက်လေ၏။

၎င်းတို့အားလုံးသည် ယန်ရှန်းအောက်၏ သူလျှိုများဖြစ်ကြောင်းကို ရှောင်မို ကောင်းကောင်း သိထားပေသည်။ ယခုတစ်ကြိမ်တွင် နန်းတွင်းအစေခံမလေး အသစ်တစ်သုတ် ရောက်လာပြီဖြစ်ရာ၊ သူ၏ ကိုယ်ပိုင် ယုံကြည်ရသော လူယုံအချို့ကို တိတ်တဆိတ် မွေးမြူပျိုးထောင်နိုင်မည် မဟုတ်ပါလော။