အခန်း ၂၂၁

အခန်း။ ၂၂၁

“လူတိုင်းပဲ... ဒါက တာအိုမိတ်ဆွေကုယွမ်ပါ။ မင်းတို့အားလုံးလည်း သူ့ရဲ့ နာမည်ကို အတိုင်းအတာတစ်ခုအထိ ကြားဖူးကြလိမ့်မယ်လို့ ငါ ယုံကြည်ပါတယ်”

ရှန်ယွီမင်က ပြုံးလျက်နှင့် ကုယွမ်ကို လူအများအား မိတ်ဆက်ပေးလိုက်သည်။

“အစ်ကိုရှန်... မင်း ငါ့ကို ချီးမွမ်းလွန်းနေပါပြီ”

ကုယွမ်က မတ်တတ်ထရပ်လိုက်ပြီး လူအများဘက်သို့ လက်ဝါးချင်းယှက်၍ ဂါရဝပြုလိုက်သည်။

“ငါက ကုယွမ် ပါ။ တာအိုမိတ်ဆွေများနှင့် ဂိုဏ်းတူညီအစ်ကိုများအားလုံးကို နှုတ်ဆက်ပါတယ်ခင်ဗျာ”

စကားပြောပြီးနောက် သူသည် သူထိုင်ခုံ၌ ပြန်လည်ထိုင်လိုက်သည်။

လူအများ၏ တုံ့ပြန်မှုများမှာမူ အမျိုးမျိုး ကွဲပြားနေကြသည်။

အချို့က အထင်သေးကြကာ အချို့က ဂရုမစိုက်ဘဲ အေးစက်နေကြသည်။

အချို့က ပြုံးပြကြကာ အချို့က လျစ်လျူရှုထားကြပြီး အချို့ကမူ ခေါင်းငြိမ့်ပြကာ အသိအမှတ်ပြုကြသည်။

ကုယွမ်ကတော့ ဤအရာကို စိုးစဉ်းမျှ စိတ်ထဲမထားပေ။။

သူသည် ယနေ့တွင် ထူးခြားသော ရည်ရွယ်ချက်တစ်ခုမျှမရှိဘဲ ရောက်ရှိလာခြင်းပင်။ အကယ်၍ ရည်ရွယ်ချက် ရှိခဲ့မည်ဆိုပါကလည်း ရှန်ယွီမင်က သူ့ကို ဘာကြောင့် ဖိတ်ကြားခဲ့တာလဲဆိုသည့်အချက်ကို စူးစမ်းလိုရုံမျှသာ ဖြစ်သည်။

ထို့အပြင် လီချန်ရှန်း၊ ကျိချန်ဟိုင်တို့နှင့် တစ်တန်းတည်း အမည်ကျော်ကြားလှသည့် ဤပုဂ္ဂိုလ်နှင့် ဆုံတွေ့ကြည့်ချင်သောကြောင့်လည်း ဖြစ်သည်။

လက်ရှိတွင်မူ ဘေးပတ်ပတ်လည်ရှိ လူအများအပြားကို မြင်တွေ့လိုက်ရချိန်၌ သူသည် ဤစားသောက်ပွဲ၏ ရည်ရွယ်ချက်ကို သဘောပေါက်သွားခဲ့ပြီ ဖြစ်သည်။

ဤပွဲမှာ ထိပ်တန်းလူနည်းစုလေး၏ စုစည်းမှုတစ်ခုဖြစ်ကြောင်း ထင်ရှားလှပြီး ကုယွမ်၏ ကျော်ကြားမှုက မြင့်တက်လာခြင်းနှင့် သူသည် ဆေးဘုရင်တောင်တန်း၏ တပည့်တစ်ဦး ဖြစ်ခြင်းတို့ကြောင့် ရှန်ယွီမင်က သူ့ကို ဤအသိုင်းအဝိုင်းအတွင်းသို့ ဝင်ရောက်ရန် အရည်အချင်း ပြည့်မီနေပြီဟု သတ်မှတ်လိုက်ခြင်း ဖြစ်ပေလိမ့်မည်။

လူအများ၏ အေးစက်သော တုံ့ပြန်မှုကို မြင်သော်လည်း ရှန်ယွီမင်က စိတ်ထဲမထားဘဲ ပေါ့ပေါ့ပါးပါး စကားအနည်းငယ် ပြောလိုက်ပြီးနောက် သူ့ဘေးနားရှိ လူနှင့် စကားလက်ဆုံ ကျနေခဲ့သည်။

ဤစားသောက်ပွဲသည် တရားဝင် အခမ်းအနားတစ်ခုထက် လွတ်လပ်ပေါ့ပါးသော ဆုံစည်းမှုတစ်ခုနှင့် ပိုမိုတူညီသည်။

“အစ်ကိုဖန်... ဒါက ဘယ်လိုအခြေအနေလဲဗျ။ သူ့ဆီမှာ မိစ္ဆာချီစွမ်းအင်တွေ ရှိနေတာပဲ... သူက မိစ္ဆာလမ်းစဉ်က တပည့်တစ်ယောက် မဟုတ်ဘူးလား”

ကုယွမ်၏ ဘယ်ဘက်ဘေးတွင် ထိုင်နေသူမှာ ဖန်ရှောက်ကျဲ ဖြစ်သည်။

ရင်းနှီးသောသူတစ်ဦးကို မြင်လိုက်ရသဖြင့် ကုယွမ်က သူ့အား စကားစမြည်ပြောရန် ဆုံးဖြတ်လိုက်ခြင်းပင်။

မည်သို့ပင်ဆိုစေကာမူ ဂျူနီယာညီလေးအချင်းချင်း ဖြစ်သဖြင့် သူစိမ်းများနှင့် စကားပြောနေရသည်ထက် ဖန်ရှောက်ကျဲနှင့် စကားလက်ဆုံကျရသည်က ပိုမိုအဆင်ပြေသည်။

ဖန်ရှောက်ကျဲသည် ကုယွမ်က ကျိချန်ဟိုင်ဘက်သို့ ပေါ့ပေါ့ပါးပါး လက်ညှိုးထိုးပြလိုက်သည်ကို မြင်သောအခါ နှုတ်ခမ်းထောင့်များ တွန့်ကွေးသွားခဲ့ရပြီး ဗီဇအရပင် အသံကို အလွန်အမင်းနှိမ့်လျက် တိုးတိုးလေး ကပ်ပြောလိုက်တော့သည်။

“ဂျူနီယာညီလေးကု... အသံနည်းနည်းလောက် လျှော့ပါဦးဗျာ”

သူ့စိတ်ထဲတွင်မူ ဤဂျူနီယာညီလေးမှာ တကယ့်ကို ကြောက်ရွံ့ခြင်းမရှိဘဲ ကျိချန်ဟိုင်ကိုပင် ပေါ်ပေါ်တင်တင် လက်ညှိုးထိုးပြီး အတင်းတုတ်ရဲသည်ဟု တွေးတောကာ အံ့ဩနေမိသည်။

ကျိချန်ဟိုင်သည် သူတို့အတွင်းစည်းမှ ဂိုဏ်းတူညီအစ်ကို လီချန်ရှန်းနှင့် တစ်တန်းတည်း အမည်ကျော်ကြားသူ ဖြစ်ပြီး မိစ္ဆာကျင့်ကြံသူတစ်ဦး ဖြစ်သော်လည်း ချုံမင်ဈေးနယ်မြေအတွင်း၌မူ မိစ္ဆာကျင့်ကြံသူများ ဝင်ရောက်ခြင်းကို တားမြစ်ထားသည့် စည်းကမ်းမျိုး မရှိပေ။။

ထို့အပြင် ဤနေရာသို့ ရောက်ရှိနေကြသူများထဲတွင် တရားဝင်လမ်းစဉ်နှင့် မိစ္ဆာလမ်းစဉ်အကြားရှိ ရန်ငြိုးရန်စကို အလွန်အမင်း အလေးအနက်ထားနေသူ တစ်ဦးမျှ မရှိကြပေ။။ အထူးသဖြင့် ကျိချန်ဟိုင်ကဲ့သို့သော အစွမ်းထက်လှသည့် ပုဂ္ဂိုလ်မျိုးနှင့် ပတ်သက်လျှင် ပို၍ပင်။

ထို့ကြောင့် လူတိုင်းက ကျိချန်ဟိုင်၏ အဆင့်အတန်းနှင့် မည်သူမည်ဝါဖြစ်ကြောင်းကို ကောင်းစွာ သိရှိထားကြသော်လည်း မည်သူကမှ ပေါ်ပေါ်တင်တင် ရန်စရဲခြင်း မရှိကြပေ။။

အမှန်တကယ်ပင် မည်သူမျှ မလုပ်ရဲကြခြင်းပင်။

အဆိုးဆုံးဖြစ်လာလျှင်ပင် မမြင်ချင်ယောင်ဆောင်၍သာ မျက်စိမှိတ်နေလိုက်ကြသည်။

ဖန်ရှောက်ကျဲသည် ပြဿနာတက်လာမည်ကို စိုးရိမ်သဖြင့် အသေးစိတ် အများကြီး မရှင်းပြတော့ဘဲ ဝေဝေဝါးဝါးသာ ပြောလိုက်သည်။

“ဒီလူရဲ့ အဆင့်အတန်းက နည်းနည်းတော့ ထူးခြားတယ်။ အဲဒါကို အများကြီး လျှောက်မတွေးနဲ့တော့”

ဤနေရာတွင် ရှိနေကြသူများအားလုံးမှာ ကျင့်ကြံသူများ ဖြစ်ကြသဖြင့် ကုယွမ်၏ လှုပ်ရှားမှုနှင့် အသံမှာ တိုးညှင်းလှသည်ဆိုသော်လည်း သူတို့၏ နားထဲသို့ မရောက်ဘဲ မနေပေ။။

သူ၏ စကားများကို ကြားလိုက်ရချိန်တွင် လူအများအပြားမှာ အသက်ရှူရပ်မတတ် ဖြစ်သွားခဲ့ကြရပြီး ကုယွမ်ကို ကြည့်သည့် အကြည့်များမှာလည်း ပြောင်းလဲသွားခဲ့ကာ ဤလူငယ်လေးသည် ကျိချန်ဟိုင်ကိုပင် အတင်းတုတ်ရဲသည်အထိ တကယ့်ကို သတ္တိခဲကြီးပဲဟု တွေးတောမိသွားကြသည်။

အပေါ်ယံတွင်မူ လူတိုင်းက သူတို့၏ စကားဝိုင်းများကို ဆက်လက်ပြောဆိုနေကြသော်လည်းနောက်ကွယ်တွင်မူ ကျိချန်ဟိုင် ဘယ်လို တုံ့ပြန်လာမလဲဆိုသည်ကို သိရှိရန် တိတ်တဆိတ် စောင့်ကြည့်နေကြသည်။

သို့သော်လည်း လူတိုင်းကို အံ့အားသင့်သွားစေသည်မှာ တုန်လှုပ်ချောက်ချားဖွယ်ရာ ကောင်းလှသည်ဟု ကောလာဟလထွက်နေသော မူလမဟူရာဂိုဏ်း၏ လူငယ်ခေါင်းဆောင် ကျိချန်ဟိုင်သည် ကုယွမ်ကို အေးစက်စွာ တစ်ချက်မျှသာ ကြည့်လိုက်ပြီးနောက် ဘာမှမဖြစ်ခဲ့သည့်အလား ကျောက်စိမ်းပန်းကန်ပြားထဲမှ ဝိညာဉ်သစ်သီးတစ်လုံးကို အသာအယာ ကောက်ယူကာ မြိန်ရှက်စွာ စားနေခဲ့ခြင်းပင်။

ပတ်ဝန်းကျင် လေထုကြီးတစ်ခုလုံးမှာ ရုတ်တရက် ထူးဆန်းအံ့ဩဖွယ်ရာ ကောင်းလောက်အောင် တိတ်ဆိတ်သွားခဲ့ရတော့သည်...

ထိုစဉ် ရှန်ယွီမင်က အရက်ခွက်ကို မြှောက်လိုက်ပြီး မသောက်သေးဘဲ ခပ်ဖွဖွလေး ဝှေ့ယမ်းရင်း ပြောလိုက်သည်။

“ဒါနဲ့ စကားမစပ်... မင်းတို့အားလုံး ဒီကိစ္စကို ကြားမိကြသေးလား”

လူတိုင်း၏ ဝေခွဲမရဖြစ်နေသော မျက်နှာအမူအရာများကို မြင်လိုက်ရသောအခါ ရှန်ယွီမင်က ပြုံးလျက် ဆက်ပြောလိုက်သည်။

“လွန်ခဲ့တဲ့ ရက်ပိုင်းတုန်းက... တစ်ယောက်ယောက်က နဂါးနီမသေမျိုးနန်းတော်ထဲကနေ အောင်အောင်မြင်မြင်နဲ့ ပြန်ထွက်လာနိုင်ခဲ့ပြီး အထဲကနေ ဖီးနစ်သွေးမြက်တစ်ပင်ကိုပါ ယူဆောင်လာနိုင်ခဲ့တယ်တဲ့”

ဝုန်း...

ဤစကားကို ကြားလိုက်ရသည်နှင့်တစ်ပြိုင်နက် နန်းဆောင်တစ်ခုလုံး ဆူညံပွက်လောရိုက်သွားခဲ့ရပြီး အားလုံးမှာ မယုံကြည်နိုင်စရာ အကြောင်းအရာတစ်ခုကို ကြားလိုက်ရသည့်အလား ထိတ်လန့်ကုန်ကြသည်။

“ဘာ... ဖီးနစ်သွေးမြက် ဟုတ်လား”

“ဒါက တကယ်ပဲလား”

“အစ်ကိုရှန်... မင်း ငါတို့ကို နောက်နေတာတော့ မဟုတ်ပါဘူးနော်။ ဖီးနစ်သွေးမြက်ဆိုတာ တကယ့်ကို ရှားပါးလှတဲ့ ဝိညာဉ်ဆေးပင်ကြီးဗျ။ နဂါးနီမသေမျိုးနန်းတော်ထဲမှာ ရှိနေနိုင်တယ်ဆိုတာ ဖြစ်နိုင်ပေမဲ့... အဲဒါကို ဒီလောက်အလွယ်တကူနဲ့ အပြင်ကို ယူထုတ်လာနိုင်ဖို့ဆိုတာ ဘယ်လိုလုပ် ဖြစ်နိုင်မှာလဲ”

ကုယွမ်ကိုယ်တိုင်လည်း စိတ်ထဲ၌ အနည်းငယ်မျှ အံ့အားသင့်သွားခဲ့ရသည်။

သူသည် ဖီးနစ်သွေးမြက်အကြောင်းကို ကြားဖူးနားဝ ရှိခဲ့ပြီး ၎င်းမှာ ဒုတိယအဆင့်ရှိသော မဟာဝိညာဉ်ဆေးပင်ကြီး ဖြစ်သည်ဟု ပြောကြသည်။

ဤဝိညာဉ်ဆေးပင်သည် သန့်စင်သော နတ်ဘုရားဖီးနစ်ငှက်၏ သွေးစက်မှာ ကျောက်စိမ်းကြောကြီးပေါ်သို့ ကျရောက်သွားရာမှတစ်ဆင့် ထိုကျောက်စိမ်းကြော၏ အနှစ်သာရများနှင့် ကောင်းကင်နှင့်မြေကမ္ဘာ၏ ဝိညာဉ်ချီစွမ်းအင်များကို သန်းချီ၍ စုပ်ယူရင်း ဖြစ်တည်လာရသော အံ့ဖွယ်ဆေးပင်ကြီး ဖြစ်သည်ဟု သိရသည်။

၎င်းတွင် သေကောင်ပေါင်းလဲဖြစ်နေသူကိုပင် ပြန်လည်အသက်သွင်းနိုင်ပြီး အရိုးများကိုပါ အသစ်တစ်ဖန် ပြန်လည်ရှင်သန်စေနိုင်သည့် ထူးကဲလှသော ပြန်လည်ဝင်စားခြင်းစွမ်းရည်ကြီး ရှိနေပေတော့သည်။

တစ်နည်းအားဖြင့်ဆိုရသော် ဤဝိညာဉ်ဆေးပင်သည် မည်မျှပင် ပြင်းထန်လှသော ဒဏ်ရာမျိုး ဖြစ်ပါစေ ကြောက်မက်ဖွယ်ကောင်းလှသော ကုသနိုင်စွမ်းစွမ်းရည် ရှိနေခြင်းပင်။ ဝိညာဉ်အကြွင်းအကျန် လုံးဝဥဿုံ ကွယ်ပျောက်မသွားသရွေ့ နှလုံးသားတစ်ခုလုံး ကြေမွသွားခဲ့လျှင်ဖြစ်စေ၊ ဦးခေါင်း ပြတ်တောက်သွားခဲ့လျှင်ဖြစ်စေ ဤဖီးနစ်သွေးမြက်ကို ပိုင်ဆိုင်ထားပါက ပြန်လည်အသက်သွင်းနိုင်ပေလိမ့်မည်။

အကယ်၍ ကျင့်ကြံသူ၏ နတ်ဘုရားဝိညာဉ်ပျက်စီးသွားခဲ့လျှင်ပင် လုံးဝဥဿုံ ပြန်လည်ကောင်းမွန်လာစေနိုင်သည်။

ဤဖီးနစ်သွေးမြက်တစ်ပင်ကို ပိုင်ဆိုင်ထားခြင်းက သူ၌ အပိုအသက်တစ်ချောင်း ရှိနေသကဲ့သို့ ဖြစ်သည်ဟု ပြောပါကလည်း အလွန်အမင်း ချဲ့ကားပြောဆိုခြင်း မဟုတ်ပေ။။

ကျင့်ကြံသူတစ်ဦး ဖြစ်သည့်အားလျော်စွာ လူတိုင်းသည် တစ်ချိန်မဟုတ်တစ်ချိန်တွင် ဘေးအန္တရာယ်များနှင့် ရင်ဆိုင်ကြရစမြဲ ဖြစ်သည်။

ဒီလို... တန်ဖိုးမဖြတ်နိုင်တဲ့ ရတနာမျိုးကို ဘယ်သူကများ မပိုင်ဆိုင်ချင်ဘဲ နေမှာလဲ...

ထို့ကြောင့်ပင် လူအများ၏ ထိတ်လန့်တုန်လှုပ်နေသော တုံ့ပြန်မှုများကို မြင်လိုက်ရချိန်တွင် ကုယွမ်သည် အံ့ဩခြင်း မရှိခဲ့ပေ။။

သို့သော်လည်း ဖီးနစ်သွေးမြက်သည် တကယ့်ကို ထိပ်တန်းအဆင့်ရှိ မဟာဝိညာဉ်ဆေးပင်ကြီး ဖြစ်ပြီး ၎င်း စတင်ပေါက်ဖွားရှင်သန်လာရန်အတွက် စစ်မှန်သော နတ်ဘုရားဖီးနစ်ငှက်၏ သွေးစက် သေချာပေါက် လိုအပ်သည်။

ဤအရာသည် ယင်ဝိညာဉ်အဆင့် မဟာလူသန်ကြီးများ၊ ယန်ဝိညာဉ်အဆင့် မဟာတန်ခိုးရှင်များနှင့် မဟာဝိညာဉ်အဆင့် မသေမျိုးအစစ်အမှန်များကိုပင်လျှင် ရင်ခုန်စိတ်လှုပ်ရှားသွားစေနိုင်သည်။

အရယူချင်ကြမှာပေါ့...

ဘာဖြစ်လို့လဲဆိုတော့ ဒီရတနာက သူတို့အတွက်ပါ တကယ်ကို အသုံးဝင်လွန်းလို့ပဲ...

ဒါပေမဲ့... ဒီလို အဆင့်မြင့်ရတနာမျိုးက... နဂါးနီမသေမျိုးနန်းတော်ရဲ့ သေးငယ်လှတဲ့ ကမ္ဘာငယ်လေးထဲမှာ ဘယ်လိုလုပ်ပြီး ရှိနေနိုင်ရတာလဲ...

သို့သော်လည်း ရှန်ယွီမင်ကိုယ်တိုင်က ထုတ်ဖော်ပြောဆိုလာခဲ့ပြီ ဖြစ်ရာ သူ၏ ရာထူးအဆင့်အတန်းနှင့် အရှိန်အဝါအရ လူအများကို လိမ်လည်လှည့်ဖြားနေလိမ့်မည် မဟုတ်ပေ။။

လူအများမှာ ပိုမို၍ စိတ်လှုပ်ရှားတက်ကြွလာကြသည်ကို မြင်လိုက်ရသောအခါ ရှန်ယွီမင်က ပြုံးလျက် ဆက်ပြောလိုက်သည်။

“ပွင့်ပွင့်လင်းလင်း ပြောရရင် ဒါက တကယ်ပါပဲ။ ဒါပေမဲ့ အဲဒီ ဖီးနစ်သွေးမြက်ကို ရရှိခဲ့တဲ့လူကတော့ အခုအချိန်မှာ ဘယ်ရောက်လို့ ဘယ်နား ရောက်နေမှန်း ရှာမတွေ့တော့ဘူးဗျ”

ဤစကားကို ကြားလိုက်ရချိန်တွင် လူအများအပြားမှာ အံ့အားသင့်သွားခဲ့ကြရပြီးနောက်တွင်မူ နှမြောတသခြင်းနှင့် မနာလိုအားကျခြင်း အမူအရာများ ထင်ဟပ်လာကြသော်လည်း မည်သူမျှ သံသယ ဝင်မနေကြတော့ပေ။။

အဘယ်ကြောင့်ဆိုသော် အကယ်၍ သူတို့ကိုယ်တိုင်သာ ထိုနေရာတွင် ရှိနေပြီး ဖီးနစ်သွေးမြက်ကဲ့သို့သော ရတနာကို ရရှိခဲ့မည်ဆိုပါက သူတစ်ပါး၏ ပစ်မှတ်ထားခြင်းကို ခံရမည်မှ ကာကွယ်ရန်အတွက် အရင်ဆုံး လူသူမသိအောင် ပျောက်ကွယ်သွားမည်မှာ သေချာလှသောကြောင့်ပင်။

မည်သို့ပင်ဆိုစေကာမူ ရတနာဟူသည် လူတို့၏ စိတ်နှလုံးကို လှုပ်ခတ်စေနိုင်စွမ်း ရှိသည်။

ခေတ္တမျှအတွင်းမှာပင် နန်းဆောင်အတွင်းရှိ လူအများမှာ စိတ်လှုပ်ရှားစွာဖြင့် တီးတိုးရေရွတ် ဆွေးနွေးကုန်ကြသည်။

လူအများစုက ဖီးနစ်သွေးမြက် တစ်ပင် ရှိနေမှတော့... ဒုတိယတစ်ပင်လည်း ရှိနေနိုင်သေးတာပဲ မဟုတ်လားဟု တွေးတောမိလိုက်ကြသည်။

အကယ်၍ အခြားသူက ရရှိနိုင်ခဲ့တယ်ဆိုရင် ငါကကော ဘာလို့ မရနိုင်ရမှာလဲ။

ထိုစဉ်၌ လူတစ်ဦးက စူးစမ်းလိုစိတ်ဖြင့် မေးလိုက်သည်။

“အစ်ကိုရှန်... မင်းက ဒီသတင်းကို ဘယ်လိုလုပ်ပြီး ကြားသိခဲ့တာလဲဗျ”

ရှန်ယွီမင်က ခေါင်းကို အသာအယာ ခါယမ်းလိုက်ရင်း “ပွင့်ပွင့်လင်းလင်း ပြောရရင်... ငါက အသေးစိတ်အချို့ကို သိရှိထားပေမဲ့ အချို့သောအကြောင်းပြချက်တွေကြောင့် အဲဒါတွေကို ထုတ်ဖော်ပြောဖို့ မသင့်တော်လို့ပါဗျာ” ဟု ပြောလိုက်သည်။

အချို့လူများ မျက်မှောင်ကုတ်သွားကြသည်ကို မြင်လိုက်ရသောအခါ သူက စကားလမ်းကြောင်းကို အသာလွှဲလိုက်ပြီး ဆက်ပြောလိုက်သည်။

“ဒါပေမဲ့... လက်ရှိအချိန်မှာ ငါ့ဆီမှာ အသုံးမပြုရသေးတဲ့ နဂါးနီအမိန့်တော်ပြားတစ်ခု ရှိနေတယ်။ လတ်တလောမှာတော့ ငါကိုယ်တိုင် နဂါးနီမသေမျိုးနန်းတော်ဆီကို သွားဖို့ အစီအစဉ် မရှိသေးဘူး။ အကယ်၍ တာအိုမိတ်ဆွေတစ်ယောက်ယောက်က လိုအပ်တယ်ဆိုရင်တော့ အဲဒါကို လွှဲပြောင်းပေးလို့ ရပါတယ်ဗျာ”

နဂါးနီအမိန့်တော်ပြား ဟုတ်လား။

ဤစကားကို ကြားလိုက်ရသည်နှင့်တစ်ပြိုင်နက် လူအများအပြားမှာ မှင်တက်သွားခဲ့ကြရသည်။

ကျိချန်ဟိုင်နှင့် လျှူကွမ်းတို့ပင်လျှင် အနည်းငယ်မျှ ဆွံ့အသွားခဲ့ကြရပြီး ရှန်ယွီမင်ထံတွင် ဤကဲ့သို့သော ပစ္စည်းမျိုး ရှိနေလိမ့်မည်ဟု မထင်မှတ်ထားခဲ့ကြသလို ၎င်းကို ကိုယ်တိုင်မသုံးဘဲ ချန်ထားရဲသည့်အချက်က တကယ့်ကို ထူးဆန်းလွန်းသည်။

ကုယွမ်လည်းပဲ တစ်စုံတစ်ခု မူမမှန်ကြောင်း အာရုံခံမိလိုက်သည်။

သဘာဝကျစွာဖြင့် နဂါးနီအမိန့်တော်ပြားကို ပိုင်ဆိုင်ထားသူ မည်သူမဆို ပထမဆုံး တွေးမိမည်မှာ နဂါးနီမသေမျိုးနန်းတော်အတွင်းသို့ ဝင်ရောက်ပြီး ရတနာများနှင့် အခွင့်အရေးများကို ရှာဖွေရန်သာ ဖြစ်သည်။

အကယ်၍ သူတို့၏ ကျင့်ကြံခြင်းအဆင့်က အမှန်တကယ်ပင် မလုံလောက်သေးပါမှသာ အခြားသူများကို ရောင်းချရန် စဉ်းစားကြမည်ပင်။

ရှန်ယွီမင်သည် နဂါးနီအမိန့်တော်ပြားကို ပိုင်ဆိုင်ထားသော်လည်း ကိုယ်တိုင်မသုံးဘဲ အခြားသူများကို ကမ်းလှမ်းလာခြင်းမှာ အခြေအနေနှစ်ရပ်ထဲမှ တစ်ခုခု ဖြစ်နေမည်မှာ သေချာလှသည်။

ပထမအချက်မှာ သူသည် ဤအမိန့်တော်ပြားကို အသုံးပြု၍ သူ အလွန်အမင်း အလိုရှိနေသော အခြားပစ္စည်းများနှင့် လဲလှယ်လိုခြင်း ဖြစ်ပေလိမ့်မည်။

ဒုတိယအချက်မှာမူ ရှန်ယွီမင်ထံတွင် နဂါးနီအမိန့်တော်ပြား တစ်ခုထက်မက ရှိနေခြင်းပင်။

သူလက်ထဲတွင် အပိုတစ်ခု ရှိနေသည့်အတွက်ကြောင့်သာ လက်ရှိတစ်ခုကို သူက စိုးစဉ်းမျှ နှမြောခြင်းမရှိဘဲ ထုတ်ပေးရဲခြင်း ဖြစ်ပေလိမ့်မည်။