အခန်း ၂၂၃

အခန်း။ ၂၂၃

လီချန်ရှန်းကိုယ်တိုင်က ဤ မီးနဂါးကျောက်စိမ်းတံဆိပ်တော်ကို အလွန်အမင်း တောင့်တလျက် ရရှိရန်အတွက် သီးသန့် တောင်အောက်သို့ ဆင်းလာခဲ့သည်ဟူသော အချက်ကို ကြည့်ခြင်းအားဖြင့် ၎င်းသည် ဘယ်လိုမှ သာမန်ပစ္စည်းတစ်ခု မဟုတ်နိုင်ကြောင်း ထင်ရှားသည်။

ဤအရာသည် အလွန်မြင့်မားသောအဆင့်ရှိသည့် ထိပ်တန်းဝိညာဉ်ရတနာတစ်ခု ဖြစ်နိုင်သလို သို့မဟုတ်လျှင်လည်း ထူးဆန်းအံ့ဖွယ်ကောင်းလှသော စွမ်းရည်အချို့ ရှိနေသည့် အထွတ်အထိပ် ရတနာတစ်ခု သေချာပေါက် ဖြစ်ပေလိမ့်မည်။

ယခုမူ လျှူကွမ်းက မီးနဂါးကျောက်စိမ်းတံဆိပ်တော်အကြောင်းကို စတင်ထုတ်ဖော်ပြောဆိုလာခဲ့ရာ ကုယွမ်၏ စူးစမ်းလိုစိတ်ကို လှုံ့ဆော်ပေးလိုက်သကဲ့သို့ ဖြစ်သွားခဲ့သည်။

ဒီမီးနဂါးကျောက်စိမ်းတံဆိပ်တော်မှာ လူမသိသေးတဲ့ ဘယ်လိုလျှို့ဝှက်ချက်နဲ့ ရည်ရွယ်ချက်မျိုး ရှိနေလို့လဲ။

ထို့အပြင် မီးနဂါးကျောက်စိမ်းတံဆိပ်တော်ဆိုသည့် စကားလုံး ထွက်ပေါ်လာချိန်တွင်ပဲ နန်းဆောင်အတွင်းရှိ လူအများအပြားမှာ စိတ်ဝင်တစားဖြင့် နားစွင့်လိုက်ကြသည်ကို ကုယွမ် သေသေချာချာ သတိပြုမိလိုက်သည်။

မည်သည့်အရာကိုမျှ စိတ်ဝင်စားခြင်းမရှိဘဲ အမြဲတမ်း တည်ငြိမ်အေးစက်နေတတ်သည့် ကျိချန်ဟိုင်ပင်လျှင် သူ လုပ်ဆောင်နေသည်များကို ခေတ္တရပ်တန့်လိုက်ပြီး လျှူကွမ်းထံသို့ စိတ်ဝင်တစားဖြင့် လှည့်ကြည့်လာခဲ့သည်။

ကုယွမ်၏ ရင်ထဲ၌ စိတ်ကူးတစ်ခု ဖြတ်ပြေးသွားခဲ့သည်။

လီချန်ရှန်း၊ ကျိချန်ဟိုင် နဲ့ လျှူကွမ်း တို့လို... ထိပ်တန်းပုဂ္ဂိုလ်ကြီးတွေကိုတောင် ရင်ခုန်စိတ်လှုပ်ရှားသွားစေနိုင်တဲ့ ဒီရတနာက... အမှန်တကယ်ကော ဘယ်လောက်အထိ အစွမ်းထက်နေတဲ့ ရတနာမျိုး ဖြစ်နေလို့လဲ...

“မီးနဂါးကျောက်စိမ်းတံဆိပ်တော် ဟုတ်လား”

ရှန်ယွီမင်က လျှူကွမ်းကို အဓိပ္ပာယ်ပါပါဖြင့် တစ်ချက်ကြည့်လိုက်ပြီးနောက် ပြုံးလျက် ပြောလိုက်သည်။

“အစ်ကိုလျှူကို ငါ မဖုံးကွယ်ပါဘူးဗျာ ငါလည်း ဒီပစ္စည်းအကြောင်းကို ကြားဖူးနားဝ ရှိခဲ့ပေမဲ့ အများကြီးတော့ မသိလှပါဘူး။ ငါ သိထားသလောက်ကတော့... ဒါက ကံတရားကို ထိန်းချုပ်တည်ငြိမ်စေနိုင်တယ်လို့ ပြောကြတဲ့ ထူးခြားတဲ့ ဝိညာဉ်ရတနာတစ်ခု ဖြစ်တယ်ဆိုတာပါပဲ”

“တကယ်တော့ ကံတရားကို ထိန်းချုပ်ပေးနိုင်ရုံတင်မကဘူး... မီးနဂါးကျောက်စိမ်းတံဆိပ်တော်ကိုယ်တိုင်က ဝိညာဉ်ရတနာစစ်စစ်အဆင့်ကို တက်လှမ်းဖို့ ခြေတစ်လှမ်းပဲ လိုတော့တဲ့ အလွန်အမင်း စွမ်းအားကြီးမားတဲ့ ထိပ်တန်းဝိညာဉ်လက်နက်ကြီးဗျ”

လျှူကွမ်းက ပြုံးလျက် ပြောလိုက်သည်။

“အို...”

ရှန်ယွီမင်၏ မျက်နှာအမူအရာမှာ တည်ငြိမ်နေဆဲဖြစ်ပြီး “ဒါဆိုရင် အစ်ကိုလျှူက အဓိက ဘာကို ပြောချင်တာလဲဗျာ” ဟု မေးလိုက်သည်။

လျှူကွမ်းက ရယ်မောလျက် ပြန်ဖြေလိုက်သည်။

“ငါ့ဆီမှာ ခိုင်မာတဲ့ သတင်းအချက်အလက်တစ်ခု ရှိနေတယ်။ အဲဒီ မီးနဂါးကျောက်စိမ်းတံဆိပ်တော်က နဂါးနီမသေမျိုးနန်းတော်ရဲ့ အတွင်းပိုင်းမှာ ရှိနေတာတဲ့။ အကယ်၍ အစ်ကိုရှန်က စိတ်ဝင်စားတယ်ဆိုရင်... ငါတို့နှစ်ယောက် အတူတူ သွားရောက်ရှာဖွေကြရင် ဘယ်လိုလဲ”

ဤစကားကို ကြားလိုက်ရချိန်တွင်မူ တက်ရောက်လာကြသူများ၏ မျက်နှာအမူအရာများမှာ လွန်စွာ စိတ်ဝင်စားစရာ ကောင်းသွားခဲ့ရပြီး တစ်ဦးနှင့်တစ်ဦး မတူညီသော ခံစားချက်များကို ထုတ်ဖော်လာကြသည်။

မီးနဂါးကျောက်စိမ်းတံဆိပ်တော်…..

ကံတရားကို ထိန်းချုပ်ပေးနိုင်ခြင်း……

ထိပ်တန်းဝိညာဉ်ရတနာကြီး…..

လျှူကွမ်း ပြောဆိုချက်များ၏ စစ်မှန်မှုကို လူတိုင်းက အသေအချာ မသိရှိကြသော်လည်း ဤအရာက လူအများအပြား၏ စိတ်နှလုံးကို လှုပ်ခတ်သွားစေခဲ့သည်မှာ သံသယဝင်စရာ မလိုပေ။။

မည်သူမျှ ဤကဲ့သို့သော ရတနာမျိုးကို မက်မောခြင်းမရှိဘဲ တည်ငြိမ်မနေနိုင်ကြပေ။။

သို့သော်လည်း ကုယွမ်တစ်ဦးတည်းသာလျှင် လက်ရှိအခြေအနေကြီးတစ်ခုလုံးမှာ ပိုမို၍ ထူးဆန်းနေသည်ဟု ခံစားနေရသည်။

လျှူကွမ်း၏ ပြောဆိုချက်အရ မီးနဂါးကျောက်စိမ်းတံဆိပ်တော်သည် တကယ့်ကို ရတနာတစ်ခု ဖြစ်ပြီး လီချန်ရှန်းကဲ့သို့သော ပုဂ္ဂိုလ်များက စိတ်ဝင်စားကြသည်မှာ သဘာဝကျသည်။

သို့သော် ကုယွမ်ကတော့ သူတို့နှစ်ဦးစလုံးက အမှန်တရားအားလုံးကို အပြည့်အဝ ထုတ်ဖော်ပြောဆိုနေခြင်း မဟုတ်ဘဲ မီးနဂါးကျောက်စိမ်းတံဆိပ်တော်နှင့် ပတ်သက်သည့် အလွန်အရေးကြီးသော အချက်အလက်အချို့ကို ဖုံးကွယ်ထားကြသည်ဟု အမြဲတမ်း ခံစားနေရသည်။

သူ မသိရှိသေးသည့် အရေးကြီးသောအရာတစ်ခု သေချာပေါက် ရှိနေရမည်ပင်။

ရှန်ယွီမင်က ခေါင်းကို ခါယမ်းလိုက်ရင်း “ဒါကိုတော့ ထားလိုက်ပါတော့ဗျာ။ ငါ့မှာ လုပ်စရာ အခြားအရေးကြီးတဲ့ ကိစ္စတွေ ရှိနေသေးလို့ပါ။ ထပ်ပြီး ပြောရမယ်ဆိုရင်... လွန်ခဲ့တဲ့ နှစ်ပေါင်းထောင်ချီအတွင်းမှာ လူအများအပြားက ဒီပစ္စည်းကို ရှာဖွေဖို့အတွက် နဂါးနီမသေမျိုးနန်းတော်ထဲကို ဝင်ရောက်ခဲ့ကြဖူးပေမဲ့ အားလုံးက လက်ဗလာနဲ့ပဲ ပြန်ထွက်လာခဲ့ကြရတာပဲ ဥစ္စာ။ ဒီပစ္စည်းကို ရှာဖွေဖို့ဆိုတာ ဘယ်လိုမှ မလွယ်ကူပါဘူးဗျာ” ဟု ပြောလိုက်သည်။

ရှန်ယွီမင် ပြောဆိုလိုက်သည့် စကားမှာ သဘာဝကျစွာပင် အကြောင်းပြချက်တစ်ခု မျှသာ ဖြစ်သည်။

မီးနဂါးကျောက်စိမ်းတံဆိပ်တော်က ဘယ်လောက်ပဲ အဖိုးတန်ပါစေဦးတော့...

အကယ်၍ လျှူကွမ်းရဲ့ ဖိတ်ခေါ်မှုအတိုင်း အတူတူ သွားရှာကြလို့ ကံကောင်းပြီး တကယ်ပဲ တွေ့ခဲ့မယ်ဆိုရင်... အဲဒီပစ္စည်းက ဘယ်သူ့အပိုင် ဖြစ်သွားမှာလဲ...

ထို့အပြင် လျှူကွမ်း၏ စရိုက်လက္ခဏာကို သူ ကောင်းစွာ သိရှိထားသည်။

စိတ်ကြီးဝင်တတ်ခြင်း၊ အတ္တကြီးခြင်းနှင့် မောက်မာစော်ကားခြင်းကြောင့် သူသည် လုံးဝ ဖြူစင်ရိုးသားသောသူ မဟုတ်ပေ။။

ယခုကဲ့သို့ ဖိတ်ခေါ်ခြင်းမှာ အပေါ်ယံ ယဉ်ကျေးပျူငှာပြခြင်း သို့မဟုတ် သူ့ကို အမြတ်ထုတ်ရန် သားကောင်အဖြစ် အသုံးချလိုခြင်းသာ ဖြစ်ပေလိမ့်မည်။

“ဒါဆိုရင်တော့ တကယ့်ကို နှမြောစရာ ကောင်းတာပဲ”

လျှူကွမ်းက စိတ်ဆိုးခြင်းမရှိဘဲ နှမြောတသဟန်ဖြင့်သာ ခေါင်းကို ခါယမ်းလိုက်ပြီးနောက် ပတ်ဝန်းကျင်ရှိ လူများကို ကြည့်ကာ ပြောလိုက်သည်။

“ငါ့ဆီမှာ နေရာလွတ် ရှစ်နေရာစာ ကျန်ရှိနေသေးတယ်။ ဒါကြောင့် စားသောက်ပွဲပြီးလို့ စိတ်ဝင်စားတဲ့ တာအိုမိတ်ဆွေများ ရှိမယ်ဆိုရင်တော့ ငါနဲ့ အားမနာတမ်း လာရောက်ဆွေးနွေးနိုင်ပါတယ်ဗျာ”

ဤစကားကို ကြားလိုက်ရသည်နှင့်တစ်ပြိုင်နက် လူအများအပြား၏ မျက်ဝန်းများမှာ ချက်ချင်း တောက်ပသွားခဲ့ကြရပြီး စိတ်လှုပ်ရှားစွာဖြင့် တုံ့ပြန်ပြောဆိုလာကြတော့သည်။

ရှန်ယွီမင်ကတော့ ပြုံး၍သာ ကြည့်နေခဲ့သော်လည်း သူ၏ မျက်ဝန်းအစုံထဲတွင်မူ လှောင်ပြောင်ခြင်းနှင့် အထင်သေးခြင်း အရိပ်အယောင်အချို့ ဖြတ်ပြေးသွားခဲ့သည်။

လျှူကွမ်းသည် ဂူနတ်ဘုရားဂိုဏ်းဂိုဏ်း၏ စစ်မှန်သောတပည့်တစ်ဦးဖြစ်ပြီး ယန်ဝိညာဉ်အဆင့် မဟာတန်ခိုးရှင် ဘိုးဘေးအင်းဆက်ပိုးကောင်ကြီး၏ အချစ်ဆုံးမြေးဖြစ်သော်လည်း ရှန်ယွီမင်၏ အမြင်တွင်မူ ထိုအဆင့်အတန်းနှင့် နောက်ခံကိုသာ ဖယ်ထုတ်လိုက်ပါက သူသည် ဘာကောင်မှ မဟုတ်တော့ပေ။။

လျှူကွမ်း၏ နေရာတွင် အခြားမည်သူမဆို ရှိနေခဲ့ပါကလည်း သူ့ထက် ဆိုးရွားသွားလိမ့်မည် မဟုတ်ပေ။

ထို့ကြောင့်ပင် ရှန်ယွီမင်သည် ထိုကဲ့သို့သောလူကို အပေါ်ယံ၌သာ ယဉ်ကျေးပျူငှာစွာ ဆက်ဆံပြီး စိတ်ထဲတွင်မူ တကယ်တမ်း၌ အထင်သေးနေခြင်းပင်။

၎င်းအစား ကျိချန်ဟိုင်နှင့် ကုယွမ်တို့ကသာ ရှန်ယွီမင်ကို အနည်းငယ် သတိထားမိစေရန် ဆွဲဆောင်နိုင်ခဲ့ကြသည်။

ဤသို့တွေးတောရင်း ရှန်ယွီမင်သည် ကျိချန်ဟိုင်နှင့် ကုယွမ်တို့ရှိရာဘက်သို့ လှည့်ကြည့်လိုက်သည်။

နန်းဆောင်တစ်ခုလုံးတွင် သူ လုံးဝဥဿုံ ဝေခွဲမရဘဲ ခန့်မှန်းရခက်နေသည့် လူနှစ်ယောက်မှာ ဤသူတို့သာ ဖြစ်သည်။

ကျိချန်ဟိုင်သည် နှလုံးသားခုနစ်ပေါက်ကို ပိုင်ဆိုင်ထားပြီး ထိုနေရာတွင် တည်ငြိမ်စွာ ထိုင်နေသော်လည်း သူ့ထံမှ ဆန်းကြယ်လှသော အရှိန်အဝါတစ်ခု ဖုံးလွှမ်းနေသည်။

သူသည် နက်နဲဆန်းကြယ်ပြီး ခန့်မှန်းရခက်လှသဖြင့် စွမ်းရည်အနက်အရှိုင်းကို သိရှိရန် မလွယ်ကူပေ။။

ကုယွမ်နှင့် ပတ်သက်၍မူ ရှန်ယွီမင်က ကုယွမ်ကို ကြည့်လိုက်ချိန်တွင် ခေတ္တမျှ ကြောင်အမ်းသွားခဲ့ရသည်။

အဘယ်ကြောင့်ဆိုသော် လက်ရှိအချိန်၌ ကုယွမ်သည် စားပွဲပေါ်ရှိ ဇီးသီးနှင့်တူသော ဝိညာဉ်သစ်သီးတစ်လုံးကို ကိုက်ယူကာ ဂွပ်... ဂွပ်...နှင့် အသံမြည်အောင် မြိန်ရှက်စွာ ဝါးစားနေသောကြောင့်ပင်။

အခြားလူများက လျှူကွမ်း၏ ဘေးပတ်လည်တွင် စိတ်လှုပ်ရှားစွာ စုဝေးလျက် ရင်းနှီးမှုရယူရန် အားထုတ်နေကြချိန်၌ ကုယွမ်ကတော့ မီးနဂါးကျောက်စိမ်းတံဆိပ်တော် သို့မဟုတ် နဂါးနီအမိန့်တော်ပြား၏ နေရာလွတ်များကို စိုးစဉ်းမျှ စိတ်ဝင်စားပုံမပေါ်ချေ။

ရှန်ယွီမင်၏ အမြင်တွင် ကုယွမ်၏ ကျင့်ကြံခြင်းအဆင့်မှာ ကောင်းကင်ဘုံလူသားနယ်ပယ်၏ အောင်မြင်မှုအသေးစားအဆင့်မျှသာ ရှိသဖြင့် လွန်စွာ ရိုးရှင်းလှသည်ဟု ထင်ရသည်။

သို့သော်လည်း ရှန်ယွီမင်သည် စစ်မှန်သော နဂါးနွယ်ဖွား သွေးစုံလင်မှုကို ပိုင်ဆိုင်ထားပြီး အလွန်အမင်း ထက်မြက်လှသော ဝိညာဉ်အာရုံရှိသူ ဖြစ်သည့်အားလျော်စွာ ကုယွမ်၏ ကျင့်ကြံခြင်းအဆင့်က အနည်းငယ် အားနည်းနေသော်လည်း သူ၏ စစ်မှန်သောချီလှိုင်းထန်မှုမှာ ထူးဆန်းလောက်အောင် သန့်စင်နေပြီး သူ့ထံမှ ထက်မြက်ပြီး အသက်ဝင်လှသော အရှိန်အဝါတစ်ခုကို မသဲကွဲစွာ ခံစားမိနေသည်။

ဤအရှိန်အဝါသည် ကုယွမ် ကျင့်ကြံထားသော တာအိုဓားသိုင်း နတ်ဘုရားအတတ်ပညာဖြစ်ကြောင်း ထင်ရှားပြီး ၎င်း၏ အနှစ်သာရမှာ ဘယ်လောက်အထိ ကြောက်မက်ဖွယ်ကောင်းသလဲဆိုပါက သူ့ကိုပင် ဘေးအန္တရာယ်ရှိနေသကဲ့သို့ အာရုံခံမိစေသည်။

ကုယွမ်၏ ကျင့်ကြံခြင်းအဆင့်က သူ့အောက်တွင် ရှိနေသည်ဟု ထင်ရသော်လည်း သူ၏ တာအိုဓားသိုင်း နတ်ဘုရားအတတ်ပညာကို ကျွမ်းကျင်ပိုင်နိုင်မှုမှာမူ သူ့ကိုပင် ခြိမ်းခြောက်နိုင်စရာ ရှိနေသည်အထိ ခန့်မှန်းရခက်လွန်းသည်။

ဤအချက်ကို သိရှိလိုက်ရခြင်းက ရှန်ယွီမင်ကို အလွန်အမင်း အံ့အားသင့်သွားစေခဲ့သည်။

ဤကဲ့သို့သော တုန်လှုပ်ချောက်ချားဖွယ်ရာ ကောင်းလှသည့် ဓားသိုင်းအတတ်ပညာကို ကျွမ်းကျင်ပိုင်နိုင်နေစေရန်အတွက် ကုယွမ်၏ ပါရမီမှာ သေချာပေါက် ထူးချွန်ပြောင်မြောက်လှရမည်ပင်။

အကယ်၍ ဤမျှသာဆိုပါက ရှန်ယွီမင်သည် အံ့ဩရုံမျှသာ ရှိမည်ဖြစ်ပြီး အခြားထူးခြားသော တုံ့ပြန်မှုမျိုး ရှိလိမ့်မည်မဟုတ်ပေ။။

သို့သော်လည်း ဤအရာထက်မကဘဲ ရှန်ယွီမင်သည် ကုယွမ်ထံမှ အခြားသော ခြိမ်းခြောက်မှုအလွှာတစ်ခုကိုပါ ထပ်မံအာရုံခံမိနေပြန်သည်။

ကုယွမ်တွင် ရှန်ယွီမင်၏ အာရုံခံနိုင်စွမ်းထက် ကျော်လွန်နေသော အခြားသော ထူးခြားချက်အချို့ ရှိနေခြင်းပင်။

ရှန်ယွီမင်က ကုယွမ်ကို တစ်ချက်ကြည့်လိုက်ပြီး ရုတ်တရက် ပြောလိုက်သည်။

“တာအိုမိတ်ဆွေကု... ဘာဖြစ်လို့လဲ မင်းကတော့ ဒီနဂါးနီအမိန့်တော်ပြားကို စိတ်ဝင်စားပုံမပေါ်ဘူးနော်”

ဤစကား ထွက်ပေါ်လာသည်နှင့်တစ်ပြိုင်နက် လူအများအပြား၏ အကြည့်များက ကုယွမ်ထံသို့ ရောက်ရှိသွားကြတော့သည်။

တကယ်တော့ ဤနေရာတွင် ရှိနေကြသူ အများအပြားမှာ ကုယွမ်၏ အမည်ကို ကြားဖူးနားဝ ရှိကြပြီး သူ့အပေါ် စူးစမ်းလိုစိတ် အနည်းနှင့်အများ ရှိနေကြခြင်းပင်။

ကုယွမ်ကိုယ်တိုင်လည်း ရှန်ယွီမင်က သူ့ကို စတင်စကားပြောလာလိမ့်မည်ဟု မထင်မှတ်ထားသဖြင့် အနည်းငယ် နှမြောတသဖြစ်သွားခဲ့ရသော်လည်း ချက်ချင်းပင် စိတ်ကို ပြန်ထိန်းလိုက်ကာ ခေါင်းခါယမ်းလျက် “ပွင့်ပွင့်လင်းလင်း ပြောရရင်တော့ အစ်ကိုရှန်... ငါက မွေးရာပါ သတ္တိနည်းတတ်တဲ့အပြင် ငါ့ရဲ့ ခွန်အားကလည်း အရမ်း အားနည်းလွန်းလို့ပါဗျာ။ ဒါကြောင့် နဂါးနီမသေမျိုးနန်းတော်လိုမျိုး ဘေးအန္တရာယ်များတဲ့ နေရာတွေဆီကို သွားဖို့ ဘယ်တုန်းကမှ မဝံ့ရဲခဲ့ပါဘူး” ဟု ပြောလိုက်သည်။

မွေးရာပါ သတ္တိနည်းတတ်တယ် ဟုတ်လား။

ပြီးတော့ ခွန်အားကလည်း အားနည်းလွန်းတယ် ဟုတ်လား။

ကုယွမ်၏ နှိမ့်ချလွန်းလှသော စကားများကို ကြားလိုက်ရချိန်တွင်မူ တက်ရောက်လာကြသူ အများအပြား၏ မျက်နှာတွင် ထူးဆန်းသော အမူအရာများ ထင်ဟပ်လာကြပြီး အချို့လူများကမူ လျှူကွမ်းရှိရာဘက်သို့ ထူးဆန်းအံ့ဩဖွယ်ရာ အကြည့်များဖြင့် တိတ်တဆိတ် စောင်းငဲ့ကြည့်လိုက်ကြသည်။

အဘယ်ကြောင့်ဆိုသော် လတ်တလော ထွက်ပေါ်ထားသည့် ပေါက်ကွဲစေတတ်သော သတင်းအချက်အလက်များအရ ကောင်းကင်ဘုံလူသားနယ်ပယ် ကျင့်ကြံသူတစ်ဦးဖြစ်သည့် ကုယွမ်သည် ရွှေအမြုတေနယ်ပယ် မိစ္ဆာကြီးဖြစ်သူ လင်းတနက်ကို ကိုယ်တိုင်ကိုယ်ကျ သတ်ဖြတ်နိုင်ခဲ့သောကြောင့်ပင်။

ထို့အပြင် ထို လင်းတနက်ဟူသော မိစ္ဆာကြီးမှာ လျှူကွမ်း၏ လက်အောက်ခံ တပည့်တစ်ဦး ဖြစ်သည်။

ကောင်းကင်ဘုံလူသားနယ်ပယ် ကျင့်ကြံသူတစ်ဦးက ရွှေအမြုတေနယ်ပယ် မိစ္ဆာကြီးကို သတ်ဖြတ်ခဲ့ပြီးမှ သူ့ကိုယ်သူ သတ္တိနည်းပါးပြီး ခွန်အားအားနည်းလှပါတယ်ဟု ပြောဆိုနေခြင်းပင်။

အဲဒါဆိုရင် ငါတို့လို သာမန် ကောင်းကင်ဘုံလူသားနယ်ပယ် ကျင့်ကြံသူတွေကို ဘာကောင်တွေလို့ သတ်မှတ်ရတော့မှာလဲ။

နဂါးနီအမိန့်တော်ပြား၏ နေရာလွတ်များနှင့် နဂါးနီမသေမျိုးနန်းတော်သို့ သွားရောက်ရှာဖွေမည့် ကိစ္စရပ်များကို ပြုံးရွှင်စွာ ဆွေးနွေးနေခဲ့သော လျှူကွမ်းသည် ကုယွမ်၏ ဟန်ဆောင်နှိမ့်ချလွန်းလှသော စကားကို ကြားလိုက်ရပြီး လူအများ၏ ထူးဆန်းသော အကြည့်များက သူ့ထံသို့ ရောက်ရှိလာသည်ကို သတိပြုမိလိုက်ချိန်တွင်မူ သူ၏ မျက်နှာအမူအရာကြီးတစ်ခုလုံးမှာ ချက်ချင်းပင် မည်းမှောင်ကာ အကျည်းတန်သွားခဲ့ရတော့သည်။