အခန်း ၂၂၅

အခန်း။ ၂၂၅

ဤစကားကို ပြောဆိုပြီးနောက် လျှူကွမ်း၏ မျက်ဝန်းအစုံမှာ ကုယွမ်ထံသို့သာ စူးစိုက်ကျရောက်နေခဲ့ပြီး ၎င်း၏ အတွင်းပိုင်း၌ ရက်စက်ကြမ်းကြုတ်သော အရိပ်အယောင်အချို့ ထင်ဟပ်နေခဲ့သည်။

ကုယွမ် တစ်စုံတစ်ရာ ပြန်လည်မပြောဆိုနိုင်သေးမီမှာပင် ဘေးပတ်လည်ရှိ လူအများမှာ ဆူညံစွာဖြင့် ရုတ်ရုတ်သဲသဲ ဖြစ်သွားခဲ့ကြရပြီး လျှူကွမ်းက ဤကဲ့သို့သော လောင်းကြေးထပ်မှုကို ကမ်းလှမ်းလာလိမ့်မည်ဟု လုံးဝ ထင်မှတ်မထားခဲ့ကြပေ။။

အသက်နှင့်သေခြင်းစင်မြင့်ဟူသည် စျေးကွက်အတွင်းရှိ ထူးခြားသော နေရာတစ်ခုဖြစ်ပြီး... ကျင့်ကြံသူများအကြားရှိ ပဋိပက္ခများကို ဖြေရှင်းရန်အတွက် အမြဲတမ်း အသုံးပြုလေ့ရှိကြသည်။

လူရှိသည့်နေရာတွင် ကျင်လည်ရာလောက ရှိစမြဲဖြစ်ပြီး ကျင်လည်ရာလောက ရှိလျှင်မူ ပဋိပက္ခများနှင့် ရန်ငြိုးရန်စများလည်း ရှိနေပေလိမ့်မည်။

အနည်းဆုံးတော့ ကျင့်ကြံသူများအကြား၌ အငြင်းပွားမှုအချို့ ဖြစ်ပွားခြင်းမှာ ရှောင်လွှဲ၍မရနိုင်ပေ။။

ချုံးမင်းမှော်စျေးကွက်၏ စည်းကမ်းချက်များမှာ လွန်စွာ တင်းကျပ်လှသော်လည်း အချို့လူများက စွန့်စားလုပ်ဆောင်ကြမည်မှာ ရှောင်လွှဲမရနိုင်သဖြင့် ဤအသက်နှင့်သေခြင်းစင်မြင့်ကို တည်ဆောက်ခဲ့ခြင်းပင်။

ပဋိပက္ခတစ်ခု ဖြစ်ပွားလာသော်လည်း နှစ်ဖက်စလုံးအနေဖြင့် ချုံးမင်းမှော်စျေးကွက်၏ စည်းကမ်းချက်များကြောင့် လက်ရဲဇက်ရဲ မလုပ်ဆောင်နိုင်ကြချိန်၌ သူတို့သည် ဤအသက်နှင့်သေခြင်းစင်မြင့်ပေါ်တွင် ပြဿနာကို ရှင်းလင်းရန် ရွေးချယ်နိုင်ကြသည်။

အသက်နှင့်သေခြင်းစင်မြင့်ပေါ်၌မူ ရလဒ်က မည်သို့ပင်ဖြစ်စေကာမူ သို့မဟုတ် မည်သူပဲ သေသည်ဖြစ်စေ ရှင်သည်ဖြစ်စေ၊ မည်သူကမှ နောက်ကြောင်းပြန်၍ အပြစ်ရှာ တာဝန်တောင်းခံပိုင်ခွင့် မရှိပေ။။

ကျိချန်ဟိုင်၏ အကြည့်များက ကုယွမ်နှင့် လျှူကွမ်းတို့နှစ်ဦးအကြား၌ အကြိမ်အနည်းငယ် ဖြတ်သန်းသွားခဲ့ပြီးမှ ပြန်လည်ရုပ်သိမ်းသွားခဲ့သည်။

ရှန်ယွီမင်ကတော့ အကွက်မြင်သော အပြုံးတစ်ခုကို ထုတ်ဖော်ထားပြီး ပွဲကောင်းတစ်ပွဲကို ကြည့်ရှုရန် အသင့်ဖြစ်နေသည့်ပုံစံမျိုး ရှိနေသည်။

ကုယွမ်ကိုယ်တိုင်လည်း အနည်းငယ် နှမြောတသဖြစ်သွားခဲ့ရပြီး အမြဲတမ်း ပုန်းလျှိုးကွယ်လျှိုး လုပ်တတ်သော လျှူကွမ်းက ယခုအကြိမ်တွင်မူ သတ္တိမွေးကာ သူနှင့်အတူ အသက်နှင့်သေခြင်းစင်မြင့်ပေါ်၌ ဝိညာဉ်အစွမ်းတိုက်ပွဲ ဆင်နွှဲရန် တောင်းဆိုလာလိမ့်မည်ဟု မထင်မှတ်ထားခဲ့မိချေ။

သို့သော်ငြားလည်း ကုယွမ်သည် ဤကိစ္စရပ်တွင် မျှတမှုဟူ၍ စိုးစဉ်းမျှ မရှိကြောင်း ခံစားမိနေသည်။

လျှူကွမ်းသည် ယန်ဝိညာဉ်အဆင့် မဟာတန်ခိုးရှင်၏ မြေးဖြစ်သည့်အားလျော်စွာ သူ့ထံတွင် လျှို့ဝှက်လက်နက်များနှင့် လူသတ်ကွက်များ သေချာပေါက် ကုန်စင်လိမ့်မည် မဟုတ်ပေ။။

ထို့အပြင် သူက ကျင့်ကြံခြင်းအဆင့်ကို ချုပ်တည်းထားမည်ဆိုလျှင်ပင် သူ့ထံ၌ ရှိနေသော ဝိညာဉ်လက်နက်များနှင့် ဂူများမှာ သာမန်အရာများ မဟုတ်နိုင်ပေ။။

ကျင့်ကြံခြင်းအဆင့်ချင်း တူညီရုံလေးတင်နဲ့ ဘယ်လိုလုပ်ပြီး မျှတမှု ရှိနိုင်မှာလဲ...

လျှူကွမ်းဆီမှာ ပိုပြီးအဆင့်မြင့်တဲ့ ဝိညာဉ်လက်နက်တွေနဲ့ ကြောက်စရာကောင်းတဲ့ ဂူတွေ ရှိနေမှာကတော့ သေချာသလောက်ပဲ...

ပြီးတော့ သူ့ရဲ့ ပြီးပြည့်စုံတဲ့ တိုက်ပွဲအတွေ့အကြုံတွေနဲ့ပါ ပေါင်းစပ်လိုက်ရင် ငါ့ကိုအလွယ်တကူ ကိုင်တွယ်နိုင်လိမ့်မယ်လို့... သူက တွက်ချက်ထားတာပဲ...

“ကောင်းပြီလေ”

သေသေချာချာ စဉ်းစားသုံးသပ်ပြီးနောက် ကုယွမ်က ခေါင်းငြိမ့်ကာ သဘောတူလိုက်သည်။

လျှူကွမ်းသည် အဆုံးသတ်တွင်မူ ကြီးမားလှသော ပြဿနာကြီးတစ်ခု ဖြစ်သည်။ သူတို့နှစ်ဦးစလုံးမှာ အပေါ်ယံမျက်နှာဖုံးကို လုံးဝ ခွာချပြီးဖြစ်ရာ ဤကောင်ကို အဆိပ်ပြင်းမြွေတစ်ကောင်လိုမျိုး နောက်ကွယ်ကနေ ချုံခိုတိုက်ခိုက်ခြင်းနှင့် ပရိယာယ်ဆင်ခြင်းများ ပြုလုပ်ခွင့်ပေးထားမည့်အစား ဤနေရာ၌ပင် အကျိုးအကြောင်း ရလဒ်ကို တိုက်ရိုက်ရှင်းလင်းလိုက်ခြင်းက ပိုမိုကောင်းမွန်ပေလိမ့်မည်။

မည်သို့ပင်ဆိုစေကာမူ အသက်နှင့်သေခြင်းစင်မြင့်ပေါ်ရှိ ဝိညာဉ်အစွမ်းတိုက်ပွဲအတွင်း၌ မည်သူမျှ ကြားဖြတ်စွက်ဖက်ပိုင်ခွင့်မရှိဘဲ သူ၏ ကိုယ်ပိုင်စွမ်းရည်အပေါ်၌သာ လုံးဝဥဿုံ တည်မှီနေသောကြောင့်ပင်။

လျှူကွမ်းက သန်မာထွားကျိုင်းသည်မှာ မှန်သော်လည်း ကုယွမ်သည်လည်း အထင်သေးခံရမည့်သူ မဟုတ်ပေ။။

“ညီလေး... မဖြစ်ဘူးနော်”

ဘေးနားတွင် ရှိနေသော ဖန်ရှောက်ကျဲက မနေနိုင်တော့ဘဲ ကန့်ကွက်စကား ပြောလိုက်တော့သည်။

“အစ်ကိုဖန်... ဘာဖြစ်လို့လဲဗျာ”

ကုယွမ်က နားမလည်နိုင်စွာဖြင့် မေးလိုက်သည်။

ဖန်ရှောက်ကျဲက လျှူကွမ်းကို တစ်ချက်ကြည့်လိုက်ပြီး အသံလွှင့်နည်းလမ်းကို အသုံးပြုကာ ပြတ်သားစွာ အကြံပြုလိုက်သည်။

“ညီလေး... လျှူကွမ်းက ဘယ်လိုမှ သာမန်လူ မဟုတ်ဘူး။ သူက မင်းနဲ့အတူ အသက်နှင့်သေခြင်းစင်မြင့်ပေါ်မှာ လောင်းကြေးထပ်ချင်တယ်ဆိုတာ... သေချာပေါက် ပရိယာယ်တစ်ခုခု ရှိနေလို့ပဲ ဒါက ထောင်ချောက်တစ်ခု ဖြစ်နိုင်တယ်။ အဲဒီထဲကို အကျမခံပါနဲ့ဦး”

ကောင်းကင်ဘုံလူသားနယ်ပယ် အဆင့်လေးပဲ ရှိသေးတဲ့ ကုယွမ်က ရွှေအမြုတေနယ်ပယ် ကျင့်ကြံသူကို သတ်နိုင်ခဲ့တာက တကယ်ကို အံ့ဩစရာ စွမ်းဆောင်ရည်မျိုးပါပဲ...

ဒါပေမဲ့လည်း ဒါက ဘယ်လောက်အထိ အခြေအနေပေးလို့ ဖြစ်သွားခဲ့ရတာလဲဆိုတာကိုတော့ ဘယ်သူက သိနိုင်မှာလဲ...

သို့သော်လည်း လျှူကွမ်းသည် ဂူနတ်ဘုရားဂိုဏ်းဂိုဏ်း၏ စစ်မှန်သောတပည့်တစ်ဦးအဖြစ် တက်လှမ်းနိုင်ခဲ့သူ ဖြစ်ရာ သူသည် အရည်အချင်းမရှိသောသူ မဟုတ်ပေ။။

ပြီးတော့ ယန်ဝိညာဉ်အဆင့် မဟာတန်ခိုးရှင်ကို အဖိုးအဖြစ် ပိုင်ဆိုင်ထားသဖြင့် သူ့ထံတွင် မည်မျှအထိ အစွမ်းထက်လှသော ရတနာများ ပါရှိနေမည်ကို မည်သူမျှ မခန့်မှန်းနိုင်ပေ။။

အဆုံးသတ်တွင်မူ ကုယွမ်သည် နာမည်ကျော်ကြားသော်လည်း သူ၏ အခြေခံအုတ်မြစ်မှာ အနည်းငယ် နုနယ်သေးသည်။

ဝိညာဉ်အစွမ်းတိုက်ပွဲနှင့် ပတ်သက်၍မူ ဖန်ရှောက်ကျဲက လျှူကွမ်းဘက်သို့ ပိုမို၍ ယိမ်းယိုင်နေခဲ့သည်။

ထို့အပြင် ကုယွမ်သည် သူနှင့် ဂိုဏ်းတူညီအစ်ကို ဖြစ်သည့်အပြင် လက်ရှိအချိန်၌ သူတို့၏ ဆရာသခင်ဖြစ်သူ စီမာယန်၏ အလေးပေးခြင်းကို ခံထားရသူ ဖြစ်သည်။

ထို့ကြောင့် မည်သို့ပင်ဖြစ်စေကာမူ ကုယွမ်က သေတွင်းထဲသို့ ဆင်းသွားသည်ကို သူ ဒီအတိုင်း ထိုင်ကြည့်မနေနိုင်ပေ။။

“အစ်ကိုဖန်... စိတ်အေးအေးထားပါဗျာ မင်းပြောချင်တဲ့ အချက်ကို ငါနားလည်ပါတယ်။ ဒါပေမဲ့ ငါ့မှာလည်း ကိုယ်ပိုင်စဉ်းစားချက်တွေ ရှိနေလို့ပါ”

ကုယွမ်က ဖန်ရှောက်ကျဲထံသို့ အသံလွှင့်ကာ စိတ်ချစေခဲ့ပြီး အသေးစိတ်အချက်အလက်များကိုမူ ဆက်လက်၍ မရှင်းပြတော့ပေ။။

လျှူကွမ်းသည် တကယ့်ကို ကိုင်တွယ်ရမလွယ်ကူသော ပြိုင်ဘက်တစ်ဦး ဖြစ်သည်ကို ကုယွမ် ကောင်းစွာ သိရှိထားသည်။

သို့သော်လည်း လတ်တလောရက်ပိုင်းအတွင်း၌ ကုယွမ်၏ ကျင့်ကြံခြင်းအဆင့်မှာ ပိုမို၍ ဟန်ချက်ညီကာ ချောမွေ့လာခဲ့ပြီး ချိုးဖျက်ဝင်ရောက်နိုင်မည့် အရိပ်အယောင်များ ပြသနေသည့်အပြင် သူ၏ ဓားသိုင်းအတတ်ပညာမှာလည်း များစွာ တိုးတက်လာခဲ့သည်။

အရေးကြီးဆုံးအချက်မှာ သူ့ထံ၌လည်း ကိုယ်ပိုင်လျှို့ဝှက်ချက်များနှင့် လူသတ်ကွက်များ ရှိနေသဖြင့်... လျှူကွမ်းကို စိုးစဉ်းမျှ ကြောက်ရွံ့ခြင်း မရှိပေ။။

“ဟူး... ဒီလိုမှတော့လည်း ညီလေး... မင်း သေသေချာချာ သတိထားပါဦးဗျာ”

ကုယွမ်က သူ၏ အကြံပြုချက်ကို လျစ်လျူရှုထားသည်ကို မြင်သောအခါ ဖန်ရှောက်ကျဲလည်း မတတ်နိုင်တော့ဘဲ သက်ပြင်းချလိုက်မိတော့သည်။

မည်သို့ပင်ဖြစ်စေကာမူ သူတို့အကြားရှိ ရင်းနှီးမှုမှာ ထိုမျှအထိ နက်ရှိုင်းလှသည်မဟုတ်ရာ သူ အလွန်အကျွံ ဝင်ရောက်ပြောဆိုရန်မသင့်သော အကြောင်းအရာအချို့ သေချာပေါက် ရှိနေသည်။

ထို့အပြင် သူက ဆက်လက်ပြောဆိုခဲ့လျှင်ပင် ကုယွမ်က နားထောင်ချင်မှ နားထောင်လိမ့်မည်ပင်။

“ငါကတော့ သဘောတူနိုင်ပါတယ်။ ဒါပေမဲ့ မင်းက ဝိညာဉ်အစွမ်းတိုက်ပွဲ ဆင်နွှဲဖို့ တောင်းဆိုလာမှတော့... ငါတို့ လောင်းကြေးတစ်ခုခု ထပ်ကြရင် ဘယ်လိုလဲ”

ကုယွမ်က လျှူကွမ်းရှိရာဘက်သို့ လှည့်ကြည့်လိုက်ပြီး ပြုံးလျက် ပြောလိုက်သည်။

“လောင်းကြေး ဟုတ်လား... မင်းရဲ့ စိမ်းပြာရောင်ဓားလိပ်ပြာကို ပြောတာလား”

လျှူကွမ်းက ခေတ္တမျှ ကြောင်အမ်းသွားခဲ့ပြီးမှ နှာခေါင်းရှုံ့လျက် “အကယ်၍ မင်းက စိမ်းပြာရောင်ဓားလိပ်ပြာကို လောင်းကြေးအဖြစ် သုံးမယ်ဆိုရင်တော့... ငါက သေချာပေါက် သဘောတူတာပေါ့ဗျာ” ဟု ပြောလိုက်သည်။

“ငါက စိမ်းပြာရောင်ဓားလိပ်ပြာကို လောင်းကြေးအဖြစ် သုံးလို့ရပေမဲ့... မင်းကော ဘာနဲ့လောင်းမှာလဲ”

ကုယွမ်က ပေါ့ပါးစွာ ရယ်မောလိုက်ရင်း “ငါ မပြောရင်တောင်မှ မင်းအနေနဲ့ စိမ်းပြာရောင်ဓားလိပ်ပြာရဲ့ တန်ဖိုးကို ကောင်းကောင်းသိထားမှာပါ”

“ဒါကြောင့်... မင်းက ငါနဲ့လောင်းဖို့ ဘယ်လိုပစ္စည်းမျိုး ထုတ်ပေးနိုင်မလဲ။ အဲဒီပစ္စည်းရဲ့ တန်ဖိုးက စိမ်းပြာရောင်ဓားလိပ်ပြာထက်တော့ မနိမ့်သင့်ဘူး မဟုတ်လား”

သူ စကားပြောနေစဉ်အတွင်းမှာပင် စိတ်အာရုံတစ်ခု လှုပ်ရှားလိုက်ရာ ဝိညာဉ်သားရဲအိတ်အတွင်းမှ စိမ်းပြာရောင် ဝိညာဉ်လိပ်ပြာလေးတစ်ကောင် ပျံသန်းကာ ထွက်ပေါ်လာခဲ့ပြီး သူ့ဘေးပတ်လည်တွင် လှပဆန်းကြယ်စွာ ဝဲပျံ၍ ကပြနေခဲ့တော့သည်။

လိပ်ပြာလေး၏ အတောင်ပံများမှာ လွတ်လပ်ပေါ့ပါးစွာ လှုပ်ခတ်နေပြီး လေထုထဲတွင် လင်းလက်သော အရိပ်အယောင်များကို ချန်ထားခဲ့ရာ လွန်စွာ ထူးခြားဆန်းပြားပြီး စွဲမက်ဖွယ်ကောင်းလှသည့်အပြင် နက်နဲသော အရှိန်အဝါတစ်ခုလည်း ကိန်းဝပ်နေသည်။

လူတိုင်းက ထိုစိမ်းပြာရောင်ဓားလိပ်ပြာရှိရာသို့ လှည့်ကြည့်လိုက်ကြရာ ဤဝိညာဉ်လိပ်ပြာလေးမှာ လွန်စွာ ချစ်စရာကောင်းပြီး အသက်ဝင်လှသော်လည်း ၎င်း၏ အတွင်းပိုင်း၌မူ ဘေးအန္တရာယ်ရှိလှသော အငွေ့အသက်များကို ငုပ်လျှိုး၍ ထုတ်ဖော်နေကြောင်း တွေ့ရှိလိုက်ကြရသည်။

လူအများအပြား၏ မျက်နှာအမူအရာမှာ အနည်းငယ် ပြောင်းလဲသွားခဲ့ရသည်။

ဤသေးငယ်လှသော ဝိညာဉ်လိပ်ပြာလေးသည် သူတို့ကို အလွန်အမင်း ဘေးအန္တရာယ်ကြီးမားလှသော ခံစားချက်မျိုး ပေးစွမ်းနိုင်နေသောကြောင့်ပင်။

ဤအချက်ကို ကြည့်ခြင်းအားဖြင့် ကုယွမ်ကိုယ်တိုင် လက်မလှုပ်လျှင်ပင် ဤစိမ်းပြာရောင်ဓားလိပ်ပြာတစ်ကောင်တည်းဖြင့်တင် ပြိုင်ဘက်အများစုကို အလွယ်တကူ အလဲထိုးနိုင်စွမ်း ရှိနေသည်ဟု ဆိုလိုခြင်းပင်။

လျှူကွမ်း၏ မျက်ဝန်းအစုံမှာ စိမ်းပြာရောင်ဓားလိပ်ပြာထံသို့သာ ရောက်နေခဲ့ပြီး ၎င်းကို ယခုချက်ချင်းပင် သူအပိုင်အဖြစ် သိမ်းပိုက်လိုလှသော လောဘဇော အရိပ်အယောင်များ ပြတ်သားစွာ ထင်ဟပ်နေခဲ့သည်။

ဒါက စိမ်းပြာရောင်ဓားလိပ်ပြာ အစစ်အမှန်ပဲ။

ဤစိမ်းပြာရောင် ဝိညာဉ်လိပ်ပြာလေးသည် ကောလာဟလများထဲက စိမ်းပြာရောင်ဓားလိပ်ပြာ အစစ်အမှန်ဖြစ်ကြောင်း သူ သေချာပေါက် အတည်ပြုလိုက်နိုင်သည်။

“မင်းပြောတာလည်း အကြောင်းရှိတာပဲ”

လျှူကွမ်းသည် အချိန်အကြာကြီး တုံ့ဆိုင်းမနေတော့ဘဲ ခေါင်းကို အနည်းငယ် ငြိမ့်လိုက်ကာ ဆုံးဖြတ်ချက်ချပြီးနောက် ပြောလိုက်သည်။

“ဒါဆိုရင်တော့... ငါက ဒီပစ္စည်းနဲ့ပဲ မင်းကို လောင်းကြေးထပ်မယ်”

စကားပြောပြီးနောက် သူသည် သစ်သားသေတ္တာတစ်လုံးကို ထုတ်ယူကာ ဖွင့်လှစ်လိုက်ရာ ၎င်း၏ အတွင်းပိုင်း၌ ထူးဆန်းဆန်းပြားလှသော ဝိညာဉ်ဆေးပင်တစ်ပင် ရှိနေသည်ကို ပြသလိုက်သည်။

အတိအကျ ပြောရမည်ဆိုပါက ၎င်းမှာ အလွန်အမင်း ထူးခြားလှသော ကြာပန်းတစ်ပွင့် ဖြစ်ပြီး ကြာပွင့်တစ်ပွင့်တည်း ဖြစ်သော်လည်း ၎င်းတွင် ခရမ်းရောင်နှင့် စိမ်းပြာရောင်ဟူ၍ ကြာငုံနှစ်ငုံ တွဲလျက် ပါရှိနေကာ အရောင်အဆင်းမှာ လွန်စွာ သန့်စင်သည်။

ကုယွမ်သည် ၎င်း၏ အတွင်းပိုင်း၌ ကိန်းဝပ်နေသော ထူထပ်သန့်စင်လှသည့် ဝိညာဉ်စွမ်းအင်များကိုပါ အာရုံခံမိနေသည်။

ခရမ်းရောင်ကြာငုံမှာ နံနက်ခင်းနေခြည်၏ ခရမ်းရောင်အရှိန်အဝါကဲ့သို့ သန့်စင်သော ဖိုဓာတ်အလင်းတန်းများ တောက်ပနေပြီး နူးညံ့နေကာ စိမ်းပြာရောင်ကြာငုံမှာမူ အလွန်အမင်း သန့်စင်အေးစက်လှသော မိစ္ဆာဓာတ်အရှိန်အဝါများ ရှိနေသည်။

“ဒါက... ခရမ်းပြာအမြွှာကြာပန်းမဟုတ်ဘူးလား”

တစ်စုံတစ်ယောက်က မနေနိုင်တော့ဘဲ အံ့ဩတုန်လှုပ်စွာဖြင့် အော်ဟစ်ရေရွတ်လိုက်မိသည်။

“ဘာကြီး... ဒီလိုမျိုး ရတနာက တကယ်ပဲ ရှိနေတာလား”

“ငါ့ သေသေချာချာ ကြည့်ပါရစေ...”

“မှန်တယ်... ကြာပွင့်တစ်ပွင့်တည်းမှာ ခရမ်းရောင်နဲ့ စိမ်းပြာရောင် ကြာငုံနှစ်ငုံ တွဲလျက်ပါရှိနေတာ။ ဒါက သေချာပေါက် ခရမ်းပြာအမွှာကြာပန်းအစစ်အမှန်ပဲ”

ခရမ်းပြာအမွှာကြာပန်းဟူသော အမည်နာမကို ကြားလိုက်ရချိန်တွင်မူ လူအများအပြားမှာ အံ့အားသင့်သွားခဲ့ကြရပြီး ရှေ့သို့ ခြေလှမ်းအနည်းငယ် တိုးကာ သေသေချာချာ စစ်ဆေးကြည့်ရှုလိုက်ကြရင်း သူတို့၏ မက်မောလှသော မျက်ဝန်းအစုံမှာ ဤထူးခြားဆန်းပြားလှသော ဝိညာဉ်ဆေးပင်ထံသို့သာ စွဲမြဲစွာ ကျရောက်သွားခဲ့တော့သည်။

အကယ်၍ ဤပစ္စည်းသာ လျှူကွမ်း၏ လက်ထဲတွင် ရှိမနေခဲ့ပါက အချို့လူများမှာ အတင်းအဓမ္မ လုယူရန်ပင် ကြိုးစားကြပေလိမ့်မည်။

ခရမ်းပြာအမွှာကြာပန်း၏ အာနိသင်မှာ ကျင့်ကြံခြင်းအဆင့်ကို တဟုန်ထိုး မြင့်တက်စေနိုင်ခြင်းပင်။

အခြားသော ဝိညာဉ်ဆေးပင်များနှင့် ဆေးလုံးများစွာကလည်း ဤကဲ့သို့သော အာနိသင်မျိုးကို ပေးစွမ်းနိုင်သည်မှာ မှန်သော်လည်း ၎င်းတို့အများစုတွင်မူ အညစ်အကြေးများ ပါဝင်နေတတ်ခြင်း၊ ဆေးယဉ်ပါးမှု ဖြစ်စေခြင်း သို့မဟုတ် ဘေးထွက်ဆိုးကျိုးများ ရှိနေတတ်ခြင်းတို့ ကြုံတွေ့ရလေ့ရှိသည်။

သို့သော်လည်း ခရမ်းပြာအမွှာကြာပန်းတွင်မူ ဤကဲ့သို့သော ပြဿနာမျိုး စိုးစဉ်းမျှ မရှိပေ။။

၎င်းကို ဆေးလုံးအဖြစ် သန့်စင်ဖော်စပ်ရန်ပင် မလိုအပ်ဘဲ တိုက်ရိုက်စားသုံးလိုက်ရုံမျှဖြင့် ကျင့်ကြံခြင်းအဆင့်ကို ဘေးကင်းစွာဖြင့် မြင့်တက်စေနိုင်ခြင်းပင်။

ဒီလို... အဖိုးတန်တဲ့ ဝိညာဉ်ဆေးပင်မျိုးကိုမှ... ဘယ်သူကများ မမက်မောဘဲ နေနိုင်မှာလဲ...