အခန်း ၂၂၉

အခန်း။ ၂၂၉

ဤအမည်းရောင် ကူကောင်၏ အမည်မှာ အနက်ရောင်အဆိပ်ကူဖြစ်သည်။ အမည်က သာမန်ဟု ထင်ရသော်လည်း လက်တွေ့တွင်မူ ရွှေခန္ဓာကူထက်ပင် ပိုမိုကြောက်မက်ဖွယ်ကောင်းပြီး အန္တရာယ်ကြီးမားလှသည်။

ဤအနက်ရောင်အဆိပ်ကူကို မြေအောက်နက်ရှိုင်းရာမှ အလွန်အမင်း အဆိပ်ပြင်းလှသော ယင်ဝိညာဉ်ချီများကို ထုတ်ယူကာ သန့်စင်မွေးမြူထားခြင်းပင်။

အစောပိုင်းအဆင့်တွင် ၎င်းသည် လက်ညှိုးခန့်တုတ်ပြီး မီးခိုးမြူနှင့် သန်ကောင် ရောပြန်းနေသော မီးခိုးဖြူရောင် အဆိပ်ကောင်မျှသာ ဖြစ်သည်။

ခန္ဓာကိုယ်မှလည်း ပုပ်စော်နံသော ယင်ဝိညာဉ်အရှိန်အဝါများကို အဆက်မပြတ် ထုတ်လွှတ်နေတတ်ရာ တစ်ချက်မျှ အနံ့ရရုံဖြင့်ပင် လူရာပေါင်းများစွာကို အဆိပ်မိသေဆုံးစေနိုင်သည်။

နှစ်ပေါင်းရာချီ သန့်စင်ပြီးနောက်တွင်မူ ထိုအဆိပ်ကောင်သည် တူခန့်အထိ သေးသွယ်သွားပြီး အရောင်မှာလည်း မီးခိုးဖြူမှ ကတ္တရာစေးကဲ့သို့ နက်မှောင်သွားကာ အပုပ်နံ့များလည်း လုံးဝပျောက်ကွယ်သွားသည်။

နောက်ထပ် နှစ်ပေါင်းရာချီ၍ ထပ်မံသန့်စင်သောအခါမှသာ ၎င်းသည် ဝိညာဉ်အာရုံ စတင်ရရှိလာပြီး ဆံပင်အမျှင်တစ်မျှင်ခန့်အထိ သေးငယ်သွားကာ စစ်မှန်သော သက်ရှိကူပိုးကောင် ဖြစ်လာတော့သည်။

ဤအဆင့်သို့ ရောက်ရှိသွားသော အနက်ရောင်အဆိပ်ကူသည် အဆိပ်ပြင်းလွန်းလှသဖြင့် ရွှေအမြုတေနယ်ပယ် မဟာကျင့်ကြံသူကြီးတစ်ဦးပင် ဖြစ်ပါစေ ထိမိရုံမျှဖြင့် ချက်ချင်း အသက်ပျောက်သွားနိုင်သည်။

ထို့အပြင် ၎င်း၏ ပျံသန်းနှုန်းမှာ မယုံကြည်နိုင်လောက်အောင် မြန်ဆန်ပြီး ကျင့်ကြံသူတို့၏ ကာကွယ်ရေးချီနှင့် မှော်ဝင်အတားအဆီးများကို ဖောက်ထွက်ရာတွင် အလွန်ကျွမ်းကျင်သဖြင့် လူတို့ကို မည်သို့သေဆုံးသွားမှန်းပင် မသိလိုက်ရအောင် သတ်ဖြတ်နိုင်စွမ်း ရှိသည်။

စီနီယာအစ်ကို ကုယွမ်၏ ဓားသိုင်းအတတ်ပညာ မည်မျှပင် မြင့်မားပါစေ ဤအနက်ရောင်အဆိပ်ကူနှင့် အနည်းငယ်မျှ ထိမိရုံဖြင့်ပင် မြေမြှုပ်ရန်နေရာပင် ရှိတော့မည် မဟုတ်ချေ။

စိမ်းပြာရောင်ဓားလိပ်ပြာမှာမူ အစွမ်းထက်ပြီး အနက်ရောင်အဆိပ်ကူထက် အဆင့်အတန်း မြင့်မားသည်မှာ မှန်သော်လည်း ယခုအချိန်တွင်မူ ကယ်တင်ရန် အချိန်မမှီတော့ပေ။။

ဖောက်...

အနက်ရောင်အဆိပ်ကူသည် ကုယွမ်၏ ခန္ဓာကိုယ်ကို ကာကွယ်ထားသော ဓားချီအတားအဆီးပေါ်သို့ ကျရောက်သွားသည်။

လွန်စွာခိုင်ခံ့လှသော အတားအဆီးကြီးမှာ ၎င်း၏ တိုက်စားမှုကြောင့် သေးငယ်သော အပေါက်တစ်ပေါက် အလွယ်တကူ ဖြစ်ပေါ်သွားရသည်။

ဤဓားချီအတားအဆီးသည် တူညီသောအဆင့်ရှိ ကျင့်ကြံသူတို့၏ ဝိညာဉ်လက်နက်များဖြင့် တိုက်ခိုက်လျှင်ပင် အလွယ်တကူ မပျက်စီးနိုင်သော အလွန်မြင့်မားသည့် ကာကွယ်ရေးစွမ်းအား ရှိသည်။

သို့သော် ယခုမူ ဤကူပိုးကောင်လေးက အားစိုက်စရာမလိုဘဲ ဖောက်ထွက်နိုင်ခဲ့ခြင်းက ၎င်း၏ ကြောက်မက်ဖွယ် သဘာဝကို ပေါ်လွင်စေသည်။

ချက်ချင်းပင် အနက်ရောင်အဆိပ်ကူသည် ကုယွမ်၏ ခန္ဓာကိုယ်ထဲသို့ တိုးဝင်ရန် ပြင်လိုက်တော့သည်။

တစ်ချက်မျှ တိုးဝင်ရုံဖြင့် သူ မည်မျှပင် ကျင့်ကြံခြင်း မြင့်မားပါစေ သေချာပေါက် အသက်ပျောက်ရမည်ကို ကုယွမ် ကောင်းစွာ သိထားသည်။

သို့သော် ထိုအဆုံးအဖြတ် အခိုက်အတန့်တွင်ပင် ကုယွမ်၏ ခန္ဓာကိုယ်မှ ငွေရောင်အလင်းတစ်ချက် ဖြတ်ခနဲ လက်သွားပြီး အနက်ရောင်အဆိပ်ကူ၏ လမ်းကြောင်းကို ကြားဖြတ်ကာ ပိတ်ဆို့လိုက်သည်။

“ဘာကြီးလဲ...”

လျှူကွမ်း ကြည့်လိုက်သောအခါ သူ၏ အနက်ရောင်အဆိပ်ကူမှာ လက်ဝက်ခန့်ရှည်ပြီး ငွေရောင်တောက်ပနေသော ကင်းခြေများကြီးတစ်ကောင်၏ အဖမ်းခံလိုက်ရကာ ၎င်း၏ လက်ညှပ်ကြီးများဖြင့် ကောက်ညှင်းတုတ်ကို ကိုက်ဝါးစားနေသကဲ့သို့ တဂျောက်ဂျောက် ကိုက်ခဲခြင်း ခံနေရသည်ကို တွေ့လိုက်ရသည်။

လျှူကွမ်းတစ်ယောက် ဆွံ့အမှင်တက်သွားပြီး ကုယွမ်၏ ခန္ဓာကိုယ်ပေါ်မှ ထူးဆန်းသော သန့်စင်ငွေရောင် ကင်းခြေများကြီးကို စိုက်ကြည့်ရင်း အလန့်တကြား အော်ဟစ်လိုက်မိတော့သည်။

“ငွေရောင်ကျောကုန်းကင်းခြေများလား”

“မင်းဆီမှာ ဒီလိုမျိုး ကူပိုးကောင် ရှိနေတာလား... ဒါ ဘယ်လိုလုပ် ဖြစ်နိုင်မှာလဲ”

သူသည် နတ်ဘုရားကူဂိုဏ်း၏ စစ်မှန်သောတပည့်တစ်ဦးဖြစ်ရာ ကူအမျိုးမျိုးကို စိမ်းကားသူ မဟုတ်ပေ။

ကုယွမ်၏ ခန္ဓာကိုယ်ပေါ်မှ ငွေရောင်ကျောကုန်းကင်းခြေများသည် စိမ်းပြာရောင်ဓားလိပ်ပြာထက် တစ်ဆင့်နိမ့်ပြီး ရှေးဟောင်းပိုးကောင်၏ သွေးနှောမျှသာ ဖြစ်သော်လည်း အလွန်ရှားပါးလှသော ရတနာပိုးကောင် ဖြစ်သည်။

၎င်းသည် လျှူကွမ်း မွေးမြူထားသော ရွှေခန္ဓာကူနှင့် အနက်ရောင်အဆိပ်ကူတို့ထက် များစွာ ပိုမိုအစွမ်းထက်သည်။

စိမ်းပြာရောင်ဓားလိပ်ပြာ ရှိနေသည်ကိုပင် သူက မနည်းအောင့်အီးအောင့်ခံ စကြည့်နေရချိန်တွင် ယခုကဲ့သို့ ငွေရောင်ကျောကုန်းကင်းခြေများကိုပါ ထပ်မံမွေးမြူထားသည်ကို မြင်လိုက်ရသောအခါ လျှူကွမ်းတစ်ယောက် ဆွံ့အသွားရုံမက မနာလိုဝန်တိုစိတ်များပါ ပြင်းထန်စွာ ထွက်ပေါ်လာရသည်။

သူသည် ဂိုဏ်း၏ စစ်မှန်သောတပည့်တစ်ဦးဖြစ်ပြီး အဘိုးဖြစ်သူမှာလည်း ယန်ဝိညာဉ်အဆင့် တန်ခိုးရှင်ကြီး ဖြစ်သဖြင့် အစွမ်းထက်သော ကူကောင်များ မရှားပေ။။

ရွှေခန္ဓာကူဖြစ်စေ၊ အနက်ရောင်အဆိပ်ကူဖြစ်စေ သို့မဟုတ် သွေးဆာမိစ္ဆာခြင်ကောင် ဖြစ်စေ မည်သည့်အရာမဆို တူညီသောအဆင့်ရှိ ကျင့်ကြံသူများကို အပြတ်အသတ် နှိမ်နင်းနိုင်စွမ်း ရှိသည်။

သူ၏ ချမ်းသာကြွယ်ဝမှုနှင့် နည်းဗျူဟာများမှာလည်း ဂိုဏ်းအတွင်းရှိ အခြားသော စစ်မှန်သောတပည့်များထဲတွင် ထိပ်ဆုံးက ဖြစ်သည်။

သို့သော်လည်း ကုယွမ်၏ စိမ်းပြာရောင်ဓားလိပ်ပြာနှင့် ငွေရောင်ကျောကုန်းကင်းခြေများတို့နှင့် နှိုင်းယှဉ်လိုက်ပါက သူ၏ ကူကောင်များမှာ အဆင့်အတန်းတစ်ခုလုံး နိမ့်ကျသွားရသည်။

နတ်ဘုရားကူဂိုဏ်း၏ စစ်မှန်သောတပည့်တစ်ဦး ဖြစ်ပါလျက် သူ၏ ကူကောင်များက ကုယွမ်ထက် နိမ့်ကျနေခြင်းမှာ တကယ့်ကို ရယ်စရာကောင်းသော ပြက်လုံးတစ်ခုပင်။

သို့သော်လည်း လျှူကွမ်းတစ်ယောက် ညည်းတွားနေရန် အချိန်မရှိတော့ချေ။

အဘယ်ကြောင့်ဆိုသော် ကုယွမ်၏ ငွေနဂါးဓားမှ ဖန်တီးလိုက်သော ငွေရောင်ဓားကြာပန်းကြီးသည် သူ၏ ဦးခေါင်းထက်သို့ ရောက်ရှိနေပြီ ဖြစ်သောကြောင့်ပင်။

ဓားကြာပန်းအတွင်းမှ ပါးလွှာပြီး အေးစက်လှသော ဓားချီများ ထွက်ပေါ်လာကာ လျှူကွမ်း၏ ကာကွယ်ရေးချီနှင့် ကာကွယ်ရေးဝိညာဉ်လက်နက်ကို အားစိုက်စရာမလိုဘဲ အလွယ်တကူ ဖြတ်တောက်လျက် သူ၏ ခန္ဓာကိုယ်ကို နှစ်ပိုင်းပိုင်းပစ်လိုက်တော့သည်။

“ဘာလဲ... လျှူကွမ်း... သေသွားပြီလား”

ဤမြင်ကွင်းကို မြင်လိုက်ရသောအခါ လူအများအပြားမှာ ထိုနေရာတွင်ပင် ဆွံ့အကာ မှင်တက်သွားကြရသည်။

လျှူကွမ်း၏ ခန္ဓာကိုယ်မှာ နှစ်ပိုင်းပြတ်သွားပြီး အတွင်းကလီစာများ မြင်တွေ့နေရကာ သွေးများလည်း မြေပြင်အနှံ့ ပန်းထွက်ကုန်တော့သည်။ သူ၏ ရုပ်ကလာပ်မှာလည်း တဖြည်းဖြည်း နွေးထွေးမှု ကင်းမဲ့လာကာ အေးစက်ကာ တောင့်တင်းသွားခဲ့ပြီ ဖြစ်သည်။

လျှူကွမ်း သေဆုံးသွားပြီဖြစ်ကြောင်း မည်သူမျှ မသံသယမဝင်တော့ချေ။

သို့သော်လည်း လူအများအပြားမှာ ယခုအခြေအနေကို မယုံကြည်နိုင်ဘဲ ဖြစ်နေကြရသည်။

အမှန်တကယ်ပင် ကုယွမ်၌ ထူးခြားပြောင်မြောက်သော ဓားသိုင်းပါရမီရှိပြီး အလွန်အစွမ်းထက်သော ဝိညာဉ်ကူပိုးကောင် နှစ်ကောင်ကို မွေးမြူထားနိုင်သည်မှာ မှန်သော်လည်း လျှူကွမ်းသည် နတ်ဘုရားကူဂိုဏ်း၏ စစ်မှန်သောတပည့်တစ်ဦးပင်။

ထိုကဲ့သို့သောသူကို ကုယွမ်က ဤမျှလွယ်လွယ်ကူကူ သတ်ဖြတ်ပစ်လိုက်နိုင်ခြင်းက ပွဲကြည့်

ပရိသတ်အားလုံးကို အံ့ဩတုန်လှုပ်မှု ပြင်းထန်စွာ ပေးစွမ်းလိုက်ခြင်းပင်။

ယခုအချိန်မှစ၍ ကုယွမ်ဟူသော အမည်နာမသည် လျှူကွမ်း၏ အလောင်းကို နင်းကျော်လျက် တစ်ပြည်လုံး အနှံ့ ကျော်ကြားလူသိများသွားတော့မည်ပင်။

သို့သော်လည်း ကုယွမ်သည် နတ်ဘုရားကူဂိုဏ်း၏ မျက်မှောင်ကုတ်စရာ ဆူးငြောင့်ခလုတ်တစ်ခု ဖြစ်လာတော့မည်မှာ ဧကန်မုချပင်။ သူသည် ဆေးဘုရင်တောင်တန်း၏ တပည့်တစ်ဦး ဖြစ်နေလင့်ကစား နတ်ဘုရားကူဂိုဏ်းက သူ့ကို အလွယ်တကူ လွှတ်ပေးလိမ့်မည် မဟုတ်ချေ။

အထူးသဖြင့် သူ၏ ချစ်လှစွာသော မြေးဖြစ်သူ အသတ်ခံလိုက်ရသည့် နတ်ဘုရားကူဘိုးဘေးကြီးပင်။

သူကဲ့သို့သော ယန်ဝိညာဉ်အဆင့် တန်ခိုးရှင်ကြီးတစ်ဦးက ကိုယ်တိုင်ကိုယ်ကျ လှုပ်ရှားလာမည်မဟုတ်သော်လည်း ဘိုးဘေးကြီး၏ မျက်နှာသာရရန် အောက်ခြေမှ မျက်နှာလိုမျက်နှာရ လုပ်ချင်ကြသော နတ်ဘုရားကူဂိုဏ်းသား အမြောက်အမြားမှာ ကုယွမ်ကို သတ်ရန် အလုအယက် ထွက်ပေါ်လာကြပေလိမ့်မည်။

ထို့ကြောင့် လူအများစုမှာ ကုယွမ်ကို သနားကရုဏာသက်သော မျက်ဝန်းများဖြင့် ကြည့်လိုက်ကြသည်။

ဤလူငယ်လေးမှာ အမှန်တကယ်ပင် ပါရမီထူးချွန်သော်လည်း နှမြောစရာကောင်းလှသည်မှာ ကောင်းကင်ပြိုလောက်မည့် ပြဿနာကြီးကို ဆွပေးလိုက်ခြင်းပင်။

ဆေးဘုရင်တောင်တန်းမှ အဆင့်မြင့်အကြီးအကဲကြီးများက ကျောထောက်နောက်ခံပြု၍ ကာကွယ်မပေးဘူးဆိုပါက သူ သေတွင်းမှ လွတ်မြောက်ရန် မဖြစ်နိုင်တော့ချေ။

သို့သော် လူတိုင်းကို ဇဝေဇဝါဖြစ်စေသည်မှာ ကုယွမ်သည် တိုက်ပွဲပြီးဆုံးသွားသော်လည်း စိုးစဉ်းမျှ စိတ်လျှော့ခြင်းမရှိဘဲ လျှူကွမ်း၏ ရုပ်ကလာပ်ကို သေချာစွာ စိုက်ကြည့်နေဆဲပင်။

သူ၏ မျက်ဝန်းအစုံတွင် ဝိညာဉ်အလင်းတန်းများ ဖြတ်သန်းနေပြီး တစ်စုံတစ်ရာသော အမြင်အာရုံနတ်ဘုရားအတတ်ပညာကို အသုံးပြုနေသည့်အလားပင်။

ကုယွမ်သည် အပျင်းပြေ လုပ်နေခြင်း မဟုတ်ပေ။။ သူ၏ ဝိညာဉ်မျက်စိအတတ်ပညာကို ဖွင့်လှစ်လိုက်ချိန်တွင် လျှူကွမ်း၏ ရုပ်ကလာပ်အတွင်းပိုင်း၌ ဝိညာဉ်အလင်းတန်းတစ်ခု လှုပ်ရှားနေသည်ကို ရှင်းလင်းစွာ မြင်လိုက်ရ၍ ဖြစ်သည်။

ထိုမှုန်ဝါးဝါး ဝိညာဉ်အလင်းတန်းမှာ ထူးဆန်းသော ပုံသဏ္ဌာန်ရှိသည့် ဂူတစ်ကောင်ဖြစ်ပြီး ဝိညာဉ်တစ်ခုအလား အတွင်းထဲ၌ လှုပ်ရှားကာ ရုန်းကန်နေသည်။

“ဒါက ဘာဖြစ်တာလဲ... ဒီကောင် မသေသေးဘူးလား...”

ကုယွမ်၏ မျက်ဝန်းအစုံက အေးစက်သွားတော့သည်။

သူ အချိန်ဆွဲမစဉ်းစားတော့ဘဲ လက်ညှိုးကို ချက်ချင်း ညွှန်လိုက်ရာ ထက်မြက်လှသော ဓားချီတစ်စင်း ပေါက်ကွဲထွက်ပေါ်သွားသည်။

ဓားချီက ရုပ်ကလာပ်ကို အပိုင်းပိုင်း ခြေမှုန်းပစ်တော့မည့် အခိုက်အတန့်တွင် လျှူကွမ်း၏ ခန္ဓာကိုယ်မျက်နှာပြင်ထက်၌ မှုံဝါးဝါး အလင်းစက်ဝန်းတစ်ခု ရုတ်တရက် ထွက်ပေါ်လာခဲ့သည်။

ထိုအလင်းစက်ဝန်းမှာ ပါးလွှာလွန်းလှသော်လည်း ကုယွမ်၏ ဓားချီ ကျရောက်သွားချိန်တွင်မူ အလွန်မာကျောပြီး ချောကျိလှသော အရာတစ်ခုကို သွားရောက်ထိမှန်သကဲ့သို့ ဖြစ်သွားကာ ဓားချီ၏ စွမ်းအားများကို စုပ်ယူဖျောက်ပစ်လိုက်သည်။

ဓားချီမှာ လမ်းကြောင်းလွဲချော်သွားပြီး မြေပြင်ပေါ်သို့ ကျရောက်ကာ နက်ရှိုင်းသော အပေါက်ကြီးတစ်ခုသာ ဖြစ်ပေါ်သွားစေခဲ့သည်။

ထို့နောက်တွင်မူ အလင်းစက်ဝန်းအောက်ရှိ ခန္ဓာကိုယ်မှာ ပြန်လည်ဆက်စပ်လာပြီး ပြန့်ကျဲနေသော ကလီစာများမှာ မူလနေရာသို့ ပြန်ဝင်သွားကာ စီးကျနေသော သွေးများမှာလည်း ခန္ဓာကိုယ်ထဲသို့ နောက်ကြောင်းပြန် စီးဝင်သွားကြတော့သည်။

ဒုတ်... ဒုတ်... ဒုတ်...

ဒဏ်ရာများ ကျက်သွားသည်နှင့်အမျှ လျှူကွမ်း၏ နှလုံးခုန်သံ ပြန်လည်စတင်လာသည်ကို ကုယွမ် ကြားလိုက်ရသည်။ အစပိုင်းတွင် အားနည်းနေသော်လည်း အချိန်နှင့်အမျှ ပိုမိုပြင်းထန်လာခဲ့သည်။

ချလွင်...

ကုယွမ်သည် ဒီအတိုင်း ထိုင်ကြည့်မနေတော့ဘဲ ငွေနဂါးဓားကို ထိန်းချုပ်ကာ ဓားအလင်းအဖြစ် အသွင်ပြောင်းလျက် လျှူကွမ်းထံသို့ တရစပ် ခုတ်ပိုင်းချလိုက်သည်။

ဤတစ်ကြိမ်တွင်မူ သူသည် သူ၏ စွမ်းအားအားလုံးကို ထုတ်သုံးလိုက်ခြင်းပင်။

ဓားအလင်း ဖြတ်သန်းသွားရာ လေထုထဲတွင် ကွဲအက်ရာများ ထင်ကျန်ရစ်ပြီး ဖျက်ဆီးခြင်းစွမ်းအင်များ ပြည့်နှက်နေသည့် ဝိညာဉ်လှိုင်းများပင် ထွက်ပေါ်လာခဲ့သည်။

သို့သော်လည်း ဤပြင်းထန်လှသော တိုက်ခိုက်မှု ကျရောက်လာချိန်တွင် ရလဒ်မှာ အစောပိုင်းကအတိုင်းပင်။

ဓားအလင်းသည် မှုံဝါးဝါး အလင်းစက်ဝန်းကို ထိမှန်သွားသော်လည်း ဘေးသို့သာ လျှောကျသွားခဲ့ပြီး ၎င်း၏ စွမ်းရည်များမှာလည်း ဖြန့်ကြက်ပျောက်ကွယ်သွားရသည်။

ကုယွမ်က ဓားကို ပြန်လည်ရုပ်သိမ်းလိုက်ရာ ငွေရောင်ဓားအလင်းမှာ ဝိညာဉ်မြွေတစ်ကောင်အလား သူ၏ ခန္ဓာကိုယ်ကို ဝန်းရံလျက် ဝဲပျံနေတော့သည်။

လျှူကွမ်း၏ ခန္ဓာကိုယ်ကို ကာကွယ်ထားသော အလင်းစက်ဝန်းမှာမူ စိုးစဉ်းမျှ ထိခိုက်ပျက်စီးခြင်း မရှိပေ။။

၎င်းသည် ပါးလွှာသော အလွှာလေးတစ်ခုမျှသာ ထင်ရသော်လည်း အတွင်း၌မူ ကြောက်မက်ဖွယ်ကောင်းသော စွမ်းအားများ ကိန်းဝပ်နေဆဲပင်။