အခန်း ၇၁၂

အခန်း (၇၁၂)။

“နတ်ဘုရားဘုရင်မ ကော့လီ... ခင်ဗျား တကယ်ပဲ ကျုပ်နောက်ကို လိုက်လာတာလား”

ဟုန်ယွိက သဲကန္တာရပေါ်တွင် ရပ်တန့်လိုက်သည်။ သူတော်စင်ပေါင်းစုံခန်းမကို သူ၏ မျက်ခုံးနှစ်ခုကြားတွင် ဝှက်ထားလိုက်သည်။ သူသည် ပျက်သုဉ်းခြင်း နတ်ဘုရားများကို သန့်စင်ရန် အလျင်မလိုသေးဘဲ၊ ကြည့်လိုက်သည်။ သူမသည် နီလာပြာရောင် ဝတ်စုံကို ဝတ်ဆင်ထားပြီး သူမ၏ နောက်ကျောတွင် ဒေါင်းမြီးဖြန့်ထားသကဲ့သို့ အမြီးဆယ်ချောင်း မှာ ထောင်မတ်နေပေသည်။

ကော့လီနတ်ဘုရားဘုရင်မ၏ ပေသုံးထောင်ရှည်သော ဆံနွယ်စိမ်းများမှာ ယခုအခါ ပေါ်မ လာတော့ဘဲ ဟင်းလင်းပြင်အတွင်းသို့ ပေါင်းစည်းသွားကာ သုံးပေခန့်သာ ကျန်ရှိတော့ သဖြင့် ကြည့်ရသည်မှာ အလွန်ပင် စိတ်ကူးယဉ်ဆန်ပြီး ထူးခြားလှပေသည်။

သို့သော် ဟုန်ယွိသည် ထိုဟင်းလင်းပြင် အလွှာများအားလုံးကို ကော့လီနတ်ဘုရားဘုရင်မ ၏ ဆံနွယ်များက ချိပ်ပိတ်ထားကြောင်း ခံစားမိသည်။ သူ မည်သည့်ဘက်ကို ပျံသန်း ထွက်ခွာသည်ဖြစ်စေ၊ သူမ၏ ဆံနွယ်များဖြင့် ပိတ်ဆို့ခြင်း ခံရမည်မှာ သေချာသည်။ ဤနတ်ဘုရားဘုရင်မ၏ ဆံပင်များမှာ ကောင်းကင်နှင့် မြေပြင်ကို လွှမ်းခြုံထားသည့် ပိုက်ကွန်တစ်ခုထက်ပင် ပို၍ အစွမ်းထက်လှပေသည်။

ထို့အပြင် သူမ၏ နောက်ကွယ်မှ အမြီးဆယ်ချောင်းမှာလည်း အစွမ်းထက်သော ရတနာ များ မဟုတ်ဘဲ သူမ၏ ရုပ်ပိုင်းဆိုင်ရာ ခန္ဓာကိုယ်မှ တိုက်ရိုက် ထွက်ပေါ်လာခြင်း ဖြစ် ကြောင်း ဟုန်ယွိ မြင်နိုင်သည်။ ၎င်းတို့မှာ လင်းယုန်၏ ခြေသည်းများ သို့မဟုတ် ကျား၏ သွားများကဲ့သို့ မွေးရာပါ အစိတ်အပိုင်းများသာ ဖြစ်သည်။

ရိုးရိုးရှင်းရှင်း ပြောရလျှင် ကော့လီနတ်ဘုရားဘုရင်မမှာ အမြီးများဖြင့် မွေးဖွားလာခြင်း ဖြစ်သည်။ ‘အနန္တထိတ်ခြင်း နတ်ဘုရားဘုရင်’ ၏ ခန္ဓာကိုယ်အောက်ပိုင်းမှာ ကင်းခြေများ၊ ကင်းမြီးကောက်ပုံစံ ဖြစ်နေသည်နှင့် ဆင်တူသည်။ နတ်ဘုရားဘုရင်တစ်ပါး၏ ရုပ်ခန္ဓာ ကိုယ်မှာ သဘာဝအတိုင်း မွေးရာပါပင် သန်မာလှရာ ရှေးဦးခေတ်တွင် အနှိုင်းမဲ့ ဖြစ်ခဲ့ကာ ကျင့်ကြံရန်ပင် မလိုပေ။

“မင်းက ရွှီယွိကိုတောင် တိုက်ခိုက်နိုင်ပြီး ရှေးခေတ်က တိုင်ရှန်ရဲ့ ‘ထာဝရနိုင်ငံတော်’ နဲ့ ဖန်ဆင်းရှင်ရဲ့ ‘ဖန်ဆင်းခြင်း သင်္ဘော’ ကို ယှဉ်နိုင်တဲ့ အမြင့်ဆုံး ရတနာကို ပိုင်ဆိုင်ထားတဲ့ လူ နောက်ကို ငါလိုက်လာတာ မဆန်းပါဘူး။ ငါတင်မကဘူး၊ လူတိုင်း မင်းကို စိတ်ဝင်စား ကြမှာပဲ”

ကော့လီ နတ်ဘုရားဘုရင်မ စကားပြောလိုက်သည်နှင့် သူမ၏ နောက်ကွယ်မှ နီလာပြာ ရောင် အမြီးဆယ်ချောင်းမှာ ဝူး... ဟူသော အသံနှင့်အတူ ပြန်လည် ရုပ်သိမ်းသွားခဲ့သည်။ သူမသည် ခဏချင်းအတွင်းမှာပင် အပြာရောင် ဂါဝန်ကို ဝတ်ဆင်ထားသည့် အနှိုင်းမဲ့ အလှပိုင်ရှင် မိန်းမလှတစ်ဦးအဖြစ် ပြောင်းလဲသွားပြီး မည်သည့် ထူးခြားမှုမျှ မရှိတော့ပေ။ အခြားသူများ မြင်လျှင် သူမကို အလွန်လှပသည့် မိန်းမလှလေးတစ်ဦးဟုသာ ထင်ကြ ပေလိမ့်မည်။ အခြားသူများအနေဖြင့် သူမ၏ အလှတရားကြောင့် အသက်ရှူပင် ကြပ်သွား နိုင်ပြီး၊ ဤအပြာရောင် ဝတ်ရုံရှင်မှာ ရှေးဦးခေတ်က ကျော်ကြားခဲ့ပြီး တန်ခိုးစွမ်းအား ကြီးမားကာ မရေမတွက်နိုင်သော မိစ္ဆာများနှင့် နတ်ဘုရားများကို အုပ်ချုပ်ခဲ့သည့် ကော့လီ နတ်ဘုရားဘုရင်မ ဖြစ်မည်ဟု မည်သူမျှ ထင်မှတ်မိကြမည် မဟုတ်ပေ။

ကော့လီနတ်ဘုရားဘုရင်မက ဟုန်ယွိကို ချိုမြိန်စွာ ပြုံးပြပြီး စိုက်ကြည့်လိုက်ပါသည်။ သူမ၏ မျက်လုံးများမှာ အလွန်ပင် နက်ရှိုင်းပြီး ကမ္ဘာတစ်ခုလုံး၏ ဖြစ်တည်ခြင်း၊ ပျက်စီးခြင်းနှင့် ပြောင်းလဲခြင်း အားလုံး ကိန်းအောင်းနေပုံရသည်။ အချိန်ကာလများ ကုန်ဆုံးသွားမှုနှင့် အရာခပ်သိမ်း၏ ကြီးထွားလာမှု၊ သေဆုံးမှုများကို ဤနတ်ဘုရား ဘုရင်မ၏ မျက်လုံးများထဲတွင် မြင်တွေ့နိုင်ပေသည်။

ထို့အပြင် ဤနတ်ဘုရားဘုရင်မ၏ ခန္ဓာကိုယ်အတွင်း၌ အားကောင်းလှသော အမည်မသိ စွမ်းအားတစ်ခု ကိန်းအောင်းနေသည်ကို ဟုန်ယွိ ပို၍ ခံစားမိလာသည်။ ထိုစွမ်းအားမှာ အနန္တထိတ်လန့်ခြင်း နတ်ဘုရားဘုရင်၏ ကြောက်မက်ဖွယ် စွမ်းအားမျိုး မဟုတ်ဘဲ၊ ရှင်သန်ခြင်းနှင့် ပြုစုပျိုးထောင်ခြင်း စွမ်းအားနှင့် ပို၍ နီးစပ်ပေသည်။

“ကော့လီနတ်ဘုရားဘုရင်မ... အသင်က အင်မော်တယ် ကျောက်စာတိုင်ထဲမှာ နှစ်ပေါင်း သောင်းနဲ့ချီပြီး ဖိနှိပ်ခံထားရတာတောင် ဒီလောက် ပြင်းထန်တဲ့ စွမ်းအားတွေ ကျန်နေဦး မယ်လို့ ကျွန်တော် မထင်ထားခဲ့ဘူး။ ကျွန်တော် ‘အနန္တထိတ်လန့်ခြင်း နတ်ဘုရားဘုရင်’ ကို တွေ့ဖူးတယ်။ သူက ချိတ်ပိတ်ခံရပြီးတဲ့နောက် ဖန်ဆင်းရှင်အဆင့် စွမ်းအားလောက်ပဲ ကျန်တော့တယ်။”

ဟုန်ယွိသည် ကော့လီနတ်ဘုရားမ၏ ရှေ့တွင် မပေါ့ဆရဲပေ။ အကြောင်းရင်းမှာ တစ်ဖက်လူက ရှေးဦးနတ်ဘုရားဘုရင်မတစ်ပါး ဖြစ်ပြီး အလွန် ကြောက်စရာကောင်းသော တည်ရှိမှုဖြစ်သောကြောင့်ပင်။ ‘ပိန်သွားသော ကုလားအုပ်တစ်ကောင်က မြင်းထက် ပို၍ ကြီးမားသေးသည်’ ဆိုသလိုပင် ကော့လီနတ်ဘုရားဘုရင်မမှာ မည်မျှပင် အားနည်းသွား ပါစေ သာမန်ထက် ပိုနေဦးမည်သာ ဖြစ်သည်။ ထို့အပြင် ဟုန်ယွိသည် ယခင်တိုက်ပွဲတွင် သူမ၏ စွမ်းအားကို မျက်မြင်ကိုယ်တွေ့ မြင်ခဲ့ရပြီး ဖြစ်သည်။ သူမ၏ စွမ်းအားမှာ ရွှီဝူယွိ ထက် အားမနည်းပေ။ သူမအနေဖြင့် အပြည့်အဝ ပြန်လည်ကောင်းမွန်လာခြင်း မရှိသေး သည်မှာ သေချာသည်။

ယခုအချိန်တွင် ဟုန်ယွိသည် ပျက်သုဉ်းခြင်း နတ်ဘုရားများကို သန့်စင်ရန် စိတ်အားထက် သန်နေပြီး သူမနှင့် တိုက်ခိုက်လိုစိတ် မရှိပေ။ ထို့ကြောင့် သူက ယဉ်ကျေးစွာဖြင့်ပင် ဆက်ဆံလိုက်သည်။

“ဘာ” ဟုန်ယွိ၏ စကားကြောင့် ကော့လီ နတ်ဘုရားဘုရင်မမှာ အံ့အားသင့်သွားသည်။ “မင်း အနန္တထိတ်လန့်ခြင်း နတ်ဘုရားဘုရင်နဲ့ တွေ့ဖူးတာလား။ သူ အခု ဘယ်လိုနေသေး လဲ”

“သူက သူ့ရုပ်ပိုင်းဆိုင်ရာ ခန္ဓာကိုယ်ကို စွန့်လွှတ်လိုက်ပြီး မိစ္ဆာမျိုးစေ့နဲ့အတူ တစ်နေရာရာ မှာ လူပြန်ဝင်စားသွားပြီ။ ဒါပေမဲ့ သူ့ကို ချိတ်ပိတ်ထားတဲ့ အင်မော်တယ် ကျောက်စာတိုင် ကတော့ ကျွန်တော့်လက်ထဲ ရောက်နေပြီ” ဟုန်ယွိက အသေးစိတ် ရှင်းပြလိုက်သည်။ “ရွှီယွိနဲ့ တိုက်တုန်းက ရွှီယွိရဲ့ ရွှေရောင်အင်မော်တယ် မူလစိတ်ဝိညာဉ်ကို ကျွန်တော်က ဖျက်ဆီးပစ်လိုက်တာ၊ အဲဒါက ဘာမှ အထူးအဆန်း မဟုတ်ပါဘူး။ သူ့ရဲ့ ယန်စိတ်ဝိညာဉ် အတွေးစနဲ့ ဧကရာဇ်ဖန်ရဲ့ နတ်ဘုရားအသိစိတ်ကတော့ တကယ်ပဲ အစွမ်းထက်တယ်။ ဒါပေမဲ့၊ ကျွန်တော်က ပျက်သုဉ်းခြင်း နတ်ဘုရားတွေကိုပဲ ဖိနှိပ်ချင်တာမို့ သူ့နဲ့ တိုက်ခိုက်ဖို့ စိတ်မဝင်စားဘူး။ ဖြစ်နိုင်တာက နတ်ဘုရားဘုရင်မက ကျွန်တော့်ကို အားနည်းတယ် ထင်ပြီး ကျွန်တော့်ဆီက နတ်ဘုရားရတနာတွေကို လုယူဖို့ လိုက်လာတာလား။ ပျက်သုဉ်းခြင်း နတ်ဘုရားတွေကို လုယူဖို့လား။”

“မင်း နားလည်မှု လွဲနေပြီ။” ကော့လီနတ်ဘုရားဘုရင်မက ပြုံး၍ ပြောသည်။ “ပျက်သုဉ်းခြင်း နတ်ဘုရား ၁၂ ပါးက အစွမ်းထက်တယ် ဆိုပေမဲ့၊ အပြည့်အဝ သန့်စင်နိုင် မယ်ဆိုရင် ရှေးဦးခေတ်က ရတနာတွေထက် မနိမ့်တဲ့ စွမ်းအားအရင်းအမြစ်တစ်ခု ဖြစ်လာမှာပါ။ ရှေးဦးခေတ်တုန်းကဆိုရင် ကျွန်မတို့လို နတ်ဘုရားဘုရင်တွေတောင် အဲဒီလို ရတနာမျိုးကို သန့်စင်ဖို့ နှစ်ပေါင်း တစ်ထောင်ကျော် အချိန်ယူရလိမ့်မယ်။ ငါ အဲဒါကို စိတ်ဝင်စားပေမဲ့ လုယူချင်စိတ်တော့ သိပ်မရှိပါဘူး။ ငါ လွတ်လပ်ခွင့် ပြန်ရလာတဲ့ အခါမှာတော့ တိုက်ခိုက် သတ်ဖြတ်နေရတာထက် လွတ်လွတ်လပ်လပ် နေချင်တာပဲ ရှိတော့တယ်။ ငါ့ရဲ့တိုက်ခိုက်လိုတဲ့ စိတ်ဆန္ဒတွေဟာ ဟိုးအရင်က ‘ဧကရာဇ်ချန်ရှန်း’ နဲ့ တိုက်ခိုက်ခဲ့စဉ်ကတည်းက ကုန်ဆုံးသွားခဲ့ပြီ”

“အဲဒီလိုဆိုရင် နတ်ဘုရားဘုရင်မက ဘာလို့ ကျွန်တော့်နောက်ကို လိုက်လာတာလဲ” ဟုန်ယွိ၏ မျက်နှာမှာ အနည်းငယ် ပြေလျော့သွားပြီး အနည်းငယ် ပြုံးကာ မေးလိုက်သည်။ “ပြီးတော့ ကျွန်တော် ပျက်သုဉ်းခြင်းနတ်ဘုရားတွေကို သန့်စင်ဖို့ အရေးကြီးဆုံး အချိန်ကြီး မှာလေ။”

“အဲဒါကတော့ ပူးပေါင်းဆောင်ရွက်ဖို့၊ မိတ်ဖက်ရှာဖို့ပဲ။” ကော့လီ နတ်ဘုရားဘုရင်မက ဆိုသည်။ “နှစ်ပေါင်းသောင်းနဲ့ချီ ကြာပြီးနောက်ပိုင်း လက်ရှိကာလဟာ လူသားလမ်းစဉ် ပြောင်းလဲမူတွေ အများဆုံး ဖြစ်လာလိမ့်မယ်လို့ မဟာဧကရာဇ်ချန်ရှန်းက ဟောကိန်း ထုတ်ခဲ့ဖူးတယ်။ ကျွမ်းကျင်သူတွေ အများကြီး ကျဆုံးမယ်၊ ကျွမ်းကျင်သူအသစ်တွေလည်း အများကြီး ပေါ်ထွက်လာလိမ့်မယ်တဲ့။ မင်းရဲ့နာမည်က ဟုန်ယွိ၊ ရွှီယွိလိုပဲ မင်းက ဧကရာဇ် ချန်ရှန်းရဲ့ ဟောကိန်းကို ဖြည့်ဆည်းပေးမယ့် ကံတရားရှိနေသူပဲ။ အနာဂတ်ရဲ့ အပြောင်း အလဲတွေမှာ မင်းတို့ကပဲ ဦးဆောင်သူတွေ ဖြစ်လာလိမ့်မယ်”

“ဟားဟားဟား...” ကော့လီနတ်ဘုရားဘုရင်မ၏ စကားကို ကြားသောအခါ ဟုန်ယွိ ရယ်မောမိသည်။

“ဘာကံတရားလဲ။ အနာဂတ် အပြောင်းအလဲတွေက အဆုံးမရှိဘူး၊ ကံတရားဆိုတဲ့ စကားလုံးနဲ့တောင် မရှင်းပြနိုင်ဘူး။ အသင်တို့တတွေ ဧကရာဇ်ချန်ရှန်းရဲ့ လှည့်စားခြင်းကို ခံလိုက်ရပြီ။ ပြီးတော့ မိတ်ဖက်ရှာချင်ရင် အသင်ကိုယ်တိုင် ‘မဟာဖျက်ဆီးခြင်း နတ်ဘုရားဘုရင်’ ကို ဘာလို့ သွားမရှာတာလဲ။ ကျွန်တော်သိရသလောက်ဆို သူလည်း ကောင်းကင်အပြင်ပနယ်မြေက လျှို့ဝှက်တဲ့နေရာတစ်ခုမှာ ချိပ်ပိတ်ခံထားရတယ်လေ။”

“အဲဒီ ကြက်ဖကြီး ‘မဟာဖျက်ဆီးခြင်း နတ်ဘုရားဘုရင်’ အကြောင်းတော့ ပြောမနေပါနဲ့ တော့။” ကော့လီနတ်ဘုရားဘုရင်မက ခေါင်းခါသည်။ “သူ့အခြေအနေက အနန္တထိတ်လန့် ခြင်း နတ်ဘုရားဘုရင်ထက် မပိုပါဘူး။ ငါတို့ နတ်ဘုရားဘုရင် ငါးပါးထဲမှာ အင်မော်တယ် နတ်ဘုရားဘုရင်က ခေါင်းဆောင်၊ သူက အသန်မာဆုံးပဲ၊ ကျန်တဲ့သူတွေကတော့ အများကြီး အားနည်းတယ်။ ဧကရာဇ်ချန်ရှန်းရဲ့ ချိပ်ပိတ်မှုက တကယ်ကို ကြောက်ဖို့ ကောင်းတယ်။ လွန်ခဲ့တဲ့ နှစ်သောင်းကျော်အတွင်းမှာ ငါ့ရဲ့ မူလစွမ်းအား ၆၀ ရာခိုင်နှုန်း ဆုံးရှုံးသွားပြီ။ အခု ငါ့စွမ်းအားက ရှေးတုန်းကရဲ့ ထက်ဝက်တောင် မရှိတော့ဘူး။ ဒါ့အပြင် ငါ့သက်တမ်းဟာလည်း ထက်ဝက်ကျော် ကုန်ဆုံးသွားပြီ။ ‘မဟာဖျက်ဆီးခြင်း နတ်ဘုရား ဘုရင်’ က ငါ့ထက်တောင် အားနည်းသေးတယ်။ သူနဲ့ပူးပေါင်းရင် ငါ့စွမ်းအားတွေ ပြန်ရလာ မှာ မဟုတ်ဘူး။ မင်းနဲ့ ပူးပေါင်းချင်တာကတော့ မင်းရဲ့အမြင့်ဆုံး ရတနာကို သုံးပြီး ငါ့ရဲ့ စွမ်းအားတွေကို ပြန်လည် ထူထောင်ချင်လို့ပဲ။ ဒါဟာ အရိုးရှင်းဆုံး အကြောင်းပြချက်ပဲ”

ရှေးခေတ် မဟာနတ်ဘုရားဘုရင် ငါးပါးတောင် သက်တမ်း ၁၂၉,၆၀၀ မကျော်လွန်နိုင်ပေ။ ယခုအခါ သူတို့သည် သာမန်လူသားများအနေဖြင့်ဆိုလျှင် အသက် ၆၀ ကျော် ၇၀ အရွယ် အဖိုးအိုများနှင့် တူနေပြီ ဖြစ်သည်။ သူတို့တွင် သက်တမ်း နှစ်ပေါင်း သောင်းနှင့်ချီ၍ ကျန်သေးသည် ဆိုသော်လည်း သူတို့အတွက်မူ ထိုသက်တမ်းမှာ သေခြင်းတရားနှင့် နီးကပ်နေပြီ ဖြစ်သည်။

‘ကောင်းကင်အပြင်ပနယ်မြေ မဟာကမ္ဘာလောကကို ကျူးကျော်တော့မယ်၊ ရွှီယွိ၊ ရွှီဝူယွိနဲ့ ဝန်ကြီးခုနစ်ပါးက အလွန်အစွမ်းထက်တယ်။ ငါ့အနေနဲ့ အကူအညီတွေ တကယ် လိုအပ် နေတာ။ တကယ်လို့ ဒီကော့လီ နတ်ဘုရားဘုရင်မကို ငါ့ဘက်ပါအောင် စည်းရုံးနိုင်ရင် ဒါဟာ ကောင်းတဲ့ကိစ္စပဲ’ ဟုန်ယွိ တိတ်တဆိတ် စဉ်းစားလိုက်မိသည်။

“အသင်က ကျွန်တော့်ရဲ့ သူတော်စင်ပေါင်းစုံခန်းမကို ငှားပြီး စွမ်းအားပြန်ရအောင် လုပ်ချင် တာလား”

“ဒီရတနာကို သူတော်စင်ပေါင်းစုံခန်းမလို့ ခေါ်တာလား။ ကောင်းလိုက်တဲ့နာမည်။ အထဲ မှာရှိတဲ့ မိုးကြိုးရေကန်ကိုရော ဘယ်လိုခေါ်လဲ။ သူက ‘ကောင်းကင်နှင်းရည် အဆီအနှစ်’ ကို တကယ် ထုတ်လုပ်ပေးနိုင်တာလား” ကော့လီ နတ်ဘုရားဘုရင်မက ဟုန်ယွိ၏ မျက်ခုံးကို ကြည့်လိုက်သည် “ရှေးဦးခေတ်က ငါ ကျင့်ကြံဖို့အတွက် ကောင်းကင်နှင်းရည် အဆီအနှစ်တွေကို စုဆောင်းခဲ့တာ... ပန်းကန်လုံးအသေး တစ်လုံးစာရဖို့ ဆယ်နှစ်ကျော် ကြာခဲ့တယ်။ မင်းရဲ့ သူတော်စင်ပေါင်းစုံခန်းမကတော့ တစ်နေ့ကို တစ်ရက်ကို ပုံးနဲ့ချီပြီး ထွက်နေတာပဲ၊ ဒါက ငါ့ရဲ့ နှစ်ပေါင်း ထောင်ချီ ကျင့်ကြံရမယ့် ဒုက္ခတွေကို သက်သာစေလိမ့် မယ်”

“နတ်ဘုရားဘုရင်မက ကျွန်တော်နဲ့ မဟာမိတ်ဖွဲ့ပြီး ကျွန်တော့်ရဲ့ သူတော်စင်ပေါင်းစုံ ခန်းမကို ငှားသုံးပြီး စွမ်းအားပြန်ဖြည့်ချင်တယ်ဆိုရင်လည်း အတွင်းထဲကို ဝင်ပြီး ရှုစားပါ ဦး” ဟုန်ယွိက ဖိတ်ခေါ်သည့် အမူအရာ ပြလိုက်ပါသည်။

သူတော်စင်ပေါင်းစုံခန်းမ အတွင်း၌……

အထွက်အထိပ် လူသားအင်မော်တယ် လေးဦးဖြစ်ကြသည့် လီဖူ၊ ဝူကျွမ်း၊ နေမီးလျှံကြယ် သခင်၊ မြောက်ပြန်ကြယ်သခင်မတို့သည် တိုင်ကျိမိုးကြိုးရေကန်ဘေးတွင် ရပ်နေကြပြီး၊ အပြာရောင်ဝတ်ရုံရှင် ကော့လီ နတ်ဘုရားဘုရင်မကို မြင်သောအခါ အနည်းငယ် စိုးရိမ် သွားကြသည်။ သူတို့မှာ အစွမ်းထက်ကြသော်လည်း၊ ရှေးခေတ် နတ်ဘုရားဘုရင်မတစ်ပါး နှင့် ယှဉ်လျှင်မူ အများကြီး နိမ့်ကျနေသေးသည်။ ထို့အပြင် ဒဏ္ဍာရီများအရ နတ်ဘုရား ဘုရင်များမှာ ရက်စက်ကြမ်းကြုတ်ပြီး လူသားများကို စားကာ သွေးကို သောက်ကြသည် ဟု ကြားဖူးထားသဖြင့် ဟုန်ယွိက သူမကို သူ၏ရတနာအတွင်းထဲသို့ ခေါ်လာသည်ကို မြင်သောအခါ အံ့သြနေကြခြင်း ဖြစ်သည်။

သို့သော် ဟုန်ယွိနှင့် ကော့လီ နတ်ဘုရားဘုရင်မတို့ ရယ်ရယ်မောမော စကားပြောနေ သည်ကို မြင်မှသာ သူတို့ စိတ်အေးသွားကြသည်။ ဟုန်ယွိမှာ အစွမ်းထက်ပြီး စစ်ဘက် ရေးရာဝန်ကြီးကိုပင် သတ်ဖြတ်နိုင်သူ ဖြစ်သည်။ သူသည် အိမ်ထဲသို့ ဝံပုလွေကို ဖိတ်ခေါ် မည့် လူမိုက်မျိုး မဟုတ်ကြောင်း သူတို့အားလုံး သိကြသည်။

“တောက်... တောက်... ဒီရတနာမှာ ‘ဘိုးဘေးနဂါး’ ရဲ့ အနှစ်သာရ မူလစွမ်းအင်တွေ ရှိနေ တာပဲ။ ကံမကောင်းတာက ‘ဉသျှောင်နဂါး’ ရဲ့ မူလစွမ်းအင် အနှစ်သာရတွေ ရှိမနေခဲ့ဘူး။ အဲဒါစွမ်းအင်သာ ရှိနေခဲ့ရင်တော့ ဒီရတနာရဲ့ စွမ်းအားက ပိုပြီး ကြီးမားလာမှာ”

ကော့လီ နတ်ဘုရားဘုရင်မနှင့် ဟုန်ယွိတို့သည် သူတော်စင်ပေါင်းစုံ ခန်းမအတွင်း လှည့်လည် ကြည့်ရှုနေကြသည်။ ကော့လီနတ်ဘုရားဘုရင်မ၏ မျက်လုံးများမှာ တောက်ပ နေပြီး အစီအရင်များကို တစ်ခုပြီးတစ်ခုကို ဖောက်ထွင်းမြင်နိုင်ကာ ရောယှက်နေသော မူလစွမ်းအင်များကိုလည်း ရင်းနှီးကျွမ်းဝင်နေပုံရသည်။

“ဉသျှောင်နဂါးရဲ့ မူလစွမ်းအင်အနှစ်သာရ မရှိရင်လည်း ကျွန်တော် ဖန်တီးလို့ရပါတယ်။” ဟုန်ယွိက ပြုံးကာ ပြောသည်။ “ခင်ဗျား ပြောတာ မှန်ပါတယ်။ ကိုးကြိမ်မြောက် မိုးကြိုး ကပ်ဘေးကို ဖြတ်ကျော်ပြီးနောက်မှာ ကျွန်တော် မူလစွမ်းအားတွေကို နားလည်လာခဲ့ တယ်။ အခွင့်အရေးရရင် ‘ပြောင်းလဲခြင်းကျမ်း’ ကို အသုံးပြုပြီး ဉသျှောင်နဂါးအသစ် တစ်ကောင် ကျွန်တော် ဖန်တီးရမယ်။ ဒါက ခက်ခဲတဲ့အလုပ် မဟုတ်ပါဘူး။”

“အို… ‘ပြောင်းလဲခြင်းလမ်းစဉ်’ ပေါ်ထွန်းလာပြီဆိုတော့ လူသားလမ်းစဉ်လည်း ပြောင်းလဲ လာပြီပေါ့... ဧကရာဇ်ချန်ရှန်းရဲ့ စကားတွေက ရွှီယွိအတွက် မဟုတ်ဘဲ မင်းအတွက် ဖြစ်နေတာပဲ။” ဟုန်ယွိ၏ စကားကို ကြားသောအခါ ကော့လီနတ်ဘုရားဘုရင်မ၏ ခန္ဓာကိုယ်မှာ အနည်းငယ် တုန်ခါသွားခဲ့သည်။

“ဉသျှောင်နဂါးအသစ်တစ်ကောင် ဖန်တီးမယ်”

ထိုစကားမှာ သူမကို အတော်လေး တုန်လှုပ်သွားစေသည်။