အခန်း ၇၂၅

အခန်း (၇၂၅)။

ဘုန်း…

ဟုန်ယွိ၏ ခြေထောက်နှစ်ဖက် အသွင်ပြောင်းလဲထားသော "ကမ္ဘာပျက်ကပ်၏နဂါးအမွှာ" ကြောင့် ဟုန်ရွှန်ကျိ၏ ခန္ဓာကိုယ်မှာ အပိုင်းပိုင်းအစစ ဆုတ်ဖြဲခံလိုက်ရပြီး၊ အင်မော်တယ် ကျောက်စာတိုင်မှာလည်း မှော်သင်္ကေတများအဖြစ် ပြောင်းလဲသွားခဲ့ရပြီ။ ဟုန်ယွိသည် တစ်ကွက်တည်းဖြင့်ပင် အောင်မြင်သွားခဲ့သည်။

သို့သော်လည်း ဟုန်ရွှန်ကျိ၏ ခန္ဓာကိုယ်မှာ အပိုင်းပိုင်း ဆုတ်ဖြဲခံလိုက်ရသော်လည်း သွေးထွက်သံယိုဖြစ်ခြင်း သို့မဟုတ် အသားစများ လွင့်စင်ထွက်ကျလာခြင်းမျိုး မရှိပေ။ ၎င်းမှာ အပိုင်းအစပေါင်းများစွာအဖြစ် ကွဲထွက်သွားရုံသာ ဖြစ်ပြီး အပိုင်းအစတိုင်းမှာ အဆက်မပြတ် လှုပ်ရှားရုန်းကန်နေကြသည်။ မျက်တောင်တစ်ခတ်အတွင်းမှာပင် ထိုအပိုင်းအစများမှာ ဟုန်ရွှန်ကျိ အသစ်အမြောက်အမြားအဖြစ် ပြောင်းလဲသွားကြသည်။ ထိုဟုန်ရွှန်ကျိ တစ်ယောက်ချင်းစီက သိုင်းပညာအသစ် တစ်မျိုးစီကို ထုတ်ဖော်ကာ ဟုန်ယွိ အား ရူးသွပ်စွာ ပြန်လည် တန်ပြန်တိုက်ခိုက်ကြတော့သည်။

"ပုံစံကိုးမျိုးလက်ဝါး"၊ "သွေးအရည်ပျော်ဓား"၊ "ပျက်သုဉ်းခြင်းခြေကန်ချက်"၊ "ကောင်းကင်ဘုရင်လက်ဝါး"၊ "နာရာလက်ညှိုး"၊ "မွန်းချန်လှံ"၊ "လေတိမ်တိုက် ဓား"၊ "တိမ်ခွဲအားဟုန်"၊ "မိစ္ဆာချေမှုန်းခြင်း"...

ဟုန်ရွှန်ကျိ၏ ကွဲထွက်သွားသော ခန္ဓာကိုယ်များမှ ကြီးမြတ်သော နတ်ဘုရားစွမ်းအား ဒါဇင်ပေါင်းများစွာ ပေါက်ကွဲထွက်ပေါ်လာသည်။ ဟုန်ရွှန်ကျိ၏ ခန္ဓာကိုယ်မှာ အပြာရောင် မီးတောက်များပင် တောက်လောင်နေ၏။ သူသည် ပြည့်စုံခြင်းစွမ်းအားကို ထုတ်ဖော်နိုင် ရန် သူ၏ အပ်စိုက်မှတ်များမှ မူလစွမ်းအင်များကိုပါ အသက်သွင်းလိုက်ခြင်း ဖြစ်သည်။

ဟုန်ရွှန်ကျိသည် တစ်ခါက "လီဖူကြယ်သခင်မ" နှင့် သိုင်းပညာ ဖလှယ်ဖူးပြီး "အထူး" တိုက်ကွက်ကိုလည်း သင်ယူခဲ့ဖူးသည်။ ယခုအခါ သူ၏ အသွင်မျိုးစုံပြောင်းလဲခြင်း နတ်ဘုရား စွမ်းရည်များကို ထုတ်ဖော်လိုက်သောအခါ အမှန်တကယ်ပင် အလွန်တရာ အစွမ်းထက်လှပေသည်။ သူသည် လီဖူကြယ်သခင်မ ကိုယ်တိုင်ထက်ပင် များစွာ ပိုမို အစွမ်းထက်နေပြီ။

ဟုန်ရွှန်ကျိ၏ ခန္ဓာကိုယ် ကွဲထွက်သွားသော်လည်း အနည်းငယ်မျှပင် ဒဏ်ရာမရသည်ကို မြင်တွေ့ရသည့်အပြင်၊ ဟုန်ရွှန်ကျိ အသစ်အမြောက်အမြားက ပိုမိုပြင်းထန်သော လက်သီး သိုင်းကွက်များဖြင့် သူ့ကို တိုက်ခိုက်လာသည်ကို မြင်သည့်တိုင် ဟုန်ယွိမှာ အနည်းငယ် မျှပင် ထိတ်လန့်တုန်လှုပ်ခြင်း မရှိပေ။ သို့သော်လည်း ဟုန်ရွှန်ကျိသည် ခေတ္တ အသက်ရှူ ချောင်ရန် အချိန်ဆွဲပြီး အသေအလဲ ပြန်လည်ခုခံတိုက်ခိုက်နေခြင်း ဖြစ်ကြောင်းကိုမူ သူ သိသည်။

ယခုလေးတင် သူသည် ဟုန်ရွှန်ကျိကို အပိုင်းပိုင်းဖြစ်အောင် လိမ်ချိုးဆွဲဖြဲပစ်ခဲ့သဖြင့် ဟုန်ရွှန်ကျိ၏ အသက်စွမ်းအင်များ ထိခိုက်သွားခဲ့ရပြီ။ ယခုလို ခန္ဓာကိုယ် အများအပြား ခွဲထွက်သွားချိန်တွင် သူ၏အင်အားများမှာလည်း သဘာဝအလျောက် ပြန့်ကျဲသွားမည်သာ ဖြစ်သည်။ ဤနည်းလမ်းမှာ သာမန် သိုင်းပညာရှင်များကို ရင်ဆိုင်ရာတွင် ဖြစ်နိုင်သော် လည်း ယန်နတ်ဘုရားအဆင့်နှင့် အလွန်နီးကပ်နေပြီဖြစ်သော ဟုန်ယွိကဲ့သို့သော တည်ရှိမှုမျိုးကို ရင်ဆိုင်ရန်မှာမူ ခက်ခဲလှပေသည်။

ယခုအခါ ဟုန်ရွှန်ကျိ၏ တိုက်ခိုက်မှု ကျရှုံးသွားချိန်တွင် သူသည် ရှိသမျှအင်အားအကုန် ထုတ်ကာ တိုက်ခိုက်နေခြင်း ဖြစ်သည်။ သူသည် ဟုန်ယွိကို နောက်ဆုတ်သွားအောင် ဖိအားပေးပြီးနောက် သူ၏အင်အားများကို ပြန်လည်စုစည်းကာ တစ်ဖန်ပြန်လည် တိုက်ခိုက်ရန် ဆန္ဒရှိနေသည်။ ဤသိုင်းပါရမီရှင်၊ တော်ဝင်ချန်အင်ပါယာ၏ ဤဧကရာဇ် အကြံပေးသည် ယင်နှင့်ယန်ကို ထိန်းချုပ်နိုင်သူ ဖြစ်သည်။ သူ၏ ကျင့်ကြံမှုမှာ အလွန်ပင် မြင့်မားပြီး အံ့မခန်း ပါရမီရှင်တစ်ဦးလည်း ဖြစ်သည်။ သူသည် တိုက်ပွဲအတွင်းမှ အတွေ့ အကြုံများကို အစဉ်အမြဲ စုပ်ယူသင်ယူနေသူ ဖြစ်သည်။ သူသာ အသက်ရှူချောင်မည့် အချိန်လေးတစ်ခု ရလိုက်သည်နှင့် အခြေအနေကို ပြောင်းပြန်လှန်ပစ်နိုင်မည်။

သူ ရှုံးနိမ့်ခဲ့ရခြင်းမှာ အသွင်မျိုးစုံပြောင်းလဲခြင်း နယ်ပယ်သို့ ယခုမှ တက်လှမ်းထားခါစ ဖြစ်ပြီး တိုက်ခိုက်ရေး နည်းစနစ်များနှင့် မရင်းနှီးသေးသောကြောင့်သာ ဖြစ်သည်။ သို့သော် ဟုန်ယွိက သူ့ကို မည်သို့လုပ် လွှတ်ပေးမည်နည်း။ သူ၏ ပြင်းထန်သော တန်ပြန်တိုက်ခိုက် မှု ကို အားကိုးပြီး မူလစွမ်းအင်များ ပြန်လည်ရယူကာ တစ်ဖန် ပြန်လည်စုစည်းလာရန်ဆို သည်မှာ လုံးဝ မဖြစ်နိုင်တော့ပေ။

"ဟုန်ရွှန်ကျိ... ခင်ဗျားရဲ့ မူလစွမ်းအင်ကို ပြန်လည်ရယူချင်နေတာလား။ အသစ်ပြန်လည် ဖွဲ့စည်းချင်တယ်ပေါ့လေ။ ခင်ဗျားဆန္ဒအတိုင်း ကျုပ်က ဘယ်လိုလုပ် အခွင့်အရေး ပေးမှာ လဲ။ ကျုပ်ဒီတိုက်ကွက်ကိုသာ ခံစားကြည့်ပေတော့ မီးလျှံလိုတောက်ပခြင်း"

ပြင်းထန်သော အတွေးစတစ်ခုက ဟုန်ယွိ၏ လက်သီးချက်မှ ပေါက်ကွဲထွက်ပေါ်လာ သည်။ ဟုန်ရွှန်ကျိ၏ ကြမ်းတမ်းပြင်းထန်သော တန်ပြန်တိုက်ခိုက်မှုရှေ့တွင် ဟုန်ယွိက နောက်ဆုတ်သွားခြင်း မရှိဘဲ အင်အားကို အင်အားဖြင့် ရင်ဆိုင်ရန် တိုက်ရိုက် ပြေးဝင် သွားတော့သည်။

ဟုန်ယွိ၏ လက်နှစ်ဖက်မှာ မမြင်ရသော မီးတောက်တစ်ခုကို ဆုပ်ကိုင်ထားသကဲ့သို့ ဖြည်းညှင်းစွာ မြင့်တက်လာသည်။ ထိုလက်များ မြင့်တက်လာသည်နှင့် ပတ်ဝန်းကျင်ရှိ ဟင်းလင်းပြင်နှင့် အချိန်တို့မှာ လုံးဝ ရပ်တန့်သွားသည်။ အချိန်က ဆက်လက် စီးဆင်းခြင်း မရှိတော့ပေ။ ထို့နောက် သူ၏ လက်ချောင်း ငါးချောင်းမှာ ရုတ်တရက် ပွင့်အာသွားပြီး သူ၏ လက်များမှ မမြင်ရသော မီးတောက်တစ်ခု ခုန်ထွက်လာသည်။ သူ၏ တစ်ကိုယ်လုံးရှိ အဆစ်အမျက်များနှင့် အပ်စိုက်မှတ်အားလုံးမှာ စွမ်းအားများကို ထုတ်ဖော်လိုက်ကြသည်။

ဘုန်း… ဘုန်း…. ဘုန်း….. ဘုန်း…… ဘုန်း……. ဘုန်း…….

သူ၏ လက်ချောင်းများက အလင်းတန်းများသဖွယ် ဖောက်ထွင်းဝင်ရောက်သွားပြီး ဟုန်ရွှန်ကျိ၏ ခန္ဓာကိုယ်အတွင်းရှိ အဓိက အပ်စိုက်မှတ်များထဲသို့ တိုးဝင်သွားကာ ဟုန်ရွှန်ကျိ၏ အပ်စိုက်မှတ်များကို တိုက်ရိုက် ပေါက်ကွဲစေရန် ကြံရွယ်လိုက်သည်။

တစ်ချိန်တည်းမှာပင် ဟုန်ရွှန်ကျိသည် ပြင်းထန်လှသော အန္တရာယ်အငွေ့အသက်ကို ခံစားလိုက်ရသည်။ ဤမျှ ပြင်းထန်သော အန္တရာယ်မျိုးအငွေ့အသက်ကို သူ တစ်ကြိမ် တစ်ခါမျှ မခံစားခဲ့ရဖူးပေ။ သူ ဒိုင်ဇင်ဘုရားကျောင်းတွင် တိုက်ပွဲဝင်ခဲ့စဉ်ကပင်၊ အစွမ်းထက်သူ အများအပြားကို သတ်ဖြတ်ပြီး ဝိုင်းရံပိတ်ဆို့ခံထားရချိန်မှာတောင် ဤမျှ လောက် အန္တရာယ် မကြီးမားခဲ့ပေ။

သူသည် ကျဆုံးတော့မည့် အန္တရာယ်ကို ခံစားနေရသည်။

ဟုန်ယွိ၏ 'မီးလျှံလိုတောက်ပခြင်း' တိုက်ကွက်က သူ၏ အသွင်မျိုးစုံပြောင်းလဲခြင်း နယ်ပယ်၏ အသက်အန္တရာယ်ကို အမှန်တကယ်ပင် ခြိမ်းခြောက်လာခဲ့ပြီ။

အမှန်စင်စစ်တွင် ဟုန်ယွိသည် ရွှီဝူယွိနှင့် တိုက်ခိုက်ခဲ့စဉ်ကတည်းက "ပြောင်းလဲခြင်း ကျမ်း" ကို အသုံးပြု၍ အသွင်မျိုးစုံပြောင်းလဲခြင်းအဆင့်ရှိ ပညာရှင်တစ်ဦးကို မည်သို့ သတ်ဖြတ်ရမည် သို့မဟုတ် ဒဏ်ရာရအောင် တိုက်ခိုက်ရမည်ကို တွက်ချက်ထားပြီး ဖြစ်သည်။ ယခု ဟုန်ရွှန်ကျိနှင့် တိုက်ခိုက်နေချိန်တွင်မူ ထိုတွက်ချက်မှု ရလဒ်များကို လက်တွေ့ ထုတ်ဖော်လိုက်ခြင်းဖြစ်ပြီး ဟုန်ရွှန်ကျိကို အငိုက်ဖမ်းနိုင်ခဲ့လေသည်။

သို့မဟုတ်ပါက သွေးတစ်စက်မှ ပြန်လည်မွေးဖွားခြင်း အဆင့်ရှိ မည်သည့် ကျွမ်းကျင်သူ မဆို အလွန်ပင် အစွမ်းထက်လှသဖြင့်၊ သူတို့သည် အချိန်မရွေး နောက်ဆုတ်နိုင်သော ကြောင့် သူတို့ကို သတ်ဖြတ်ရန် သို့မဟုတ် ဒဏ်ရာရစေရန် အလွန် ခက်ခဲလှသည်၊ ‘အသွင်မျိုးစုံ ပြောင်းလဲခြင်း’ အဆင့်ရှိသူကို ဆိုလျှင် ပြောနေစရာပင် မလိုတော့ပေ။

“ပျက်သုဉ်းခြင်းခေတ်၊ စကြဝဠာရဲ့ အစွန်းတစ်ဖက်ထိတိုင်"

ဤအလွန်အမင်း အန္တရာယ်ရှိသော အခြေအနေတွင် ဟုန်ရွှန်ကျိ၏ စိတ်စွမ်းအားမှာ အလွန် ကျယ်ပြောလွန်းပြီး အလွန်ပင်သေးငယ်သောနယ်ပယ်တစ်ခုသို့ ရုတ်တရက် တက်လှမ်း သွားသည်။ ထိုနယ်ပယ်မှာ ကောင်းကင်ဘုံနှင့် စကြဝဠာကြီးကို လွှမ်းခြုံထားနိုင်လောက် အောင် ကျယ်ပြောလှသော်လည်း၊ ဆောင်းဦးပေါက် အမွှေးအမျှင်တစ်ခု သို့မဟုတ် မုန်ညင်းစေ့ တစ်စေ့မျှပင် မဆံ့နိုင်လောက်အောင် သေးငယ်လှသည်။

တစ်ချိန်တည်းမှာပင် သူ၏ ခန္ဓာကိုယ်အများအပြားမှာ အတင်းအဓမ္မ ပြန်လည်စုစည်း လိုက်ကြသည်။ သူက လက်ဝါးတစ်ချက်၊ လက်သီးတစ်ချက်ဖြင့် ‘ပျက်သုဉ်းခြင်းခေတ်’ သိုင်းကွက်ကို ထုတ်ဖော်၍ ဟုန်ယွိကို ပြင်းထန်စွာ တောင့်ခံလိုက်သည်။

“အလကားပဲ”

ဟုန်ယွိ၏ အစွမ်းထက်လှသော စိတ်ဝိညာဉ်နှင့် ရုပ်ခန္ဓာ နတ်ဘုရားစွမ်းအားမှ နောက်ထပ် တစ်ဆင့် ထပ်မံ ပေါက်ကွဲထွက်ပေါ်လာသည်။ သူက ဘယ်ဘက်လက်ဖြင့် လှမ်းဆုပ်လိုက် ရာ သူ့လက်မောင်းမှ ရွှေရောင်ငှက်မွေးများ ထွက်ပေါ်လာသည်။ ထိုသိုင်းကွက်မှာ "ရှေးဦး ကောင်းကင်ငှက် အသွင်ကိုးမျိုးပြောင်းလဲခြင်း" ထဲမှ "ရွှေကျီးကန်း အသွင်ပြောင်းခြင်း" ပင် ဖြစ်သည်။ တစ်ချိန်တည်းမှာပင် သူ၏ အခြားလက်တစ်ဖက်က "ထင်းရှူးနှင့် ကြိုးကြာ ထာဝရ" တိုက်ကွက်ကို ထုတ်ဖော်လိုက်သည်။ ထို့နောက် သူ၏ ခြေကန်ချက်မှာ သိမ်းငှက် ကြီး တစ်ကောင်ကဲ့သို့ ဖြစ်သွားပြီး သူ၏ မျက်ခုံးနှစ်ခုကြားမှ "လင်းနို့ဖြူ အသွင်ပြောင်း ခြင်း" လှိုင်းဂယက်များ ပျံ့နှံ့ထွက်ပေါ်လာသည်။ သူ၏နှုတ်မှ မန္တန်တစ်ခုကို ရွတ်ဆိုလိုက် ရာ ဖီးနစ်ငှက်ကြီးတစ်ကောင် ပေါ်လာသည်။

ဤတိုက်ကွက်နှင့်အတူ သူ၏ခန္ဓာကိုယ်၌ ရှေးဦးငှက်ကိုးကောင်၏ မှော်သင်္ကေတများ အမှန်တကယ်ပင် ထင်ဟပ်လာတော့သည်။ ထိုတိုက်ကွက် တစ်ကွက်အတွင်းမှာပင် ရှေးဦး ကောင်းကင်ငှက်ကိုးကောင်မှာ တစ်သားတည်း ပေါင်းစည်းသွားခဲ့သည်။ သူ၏ စွမ်းအား၊ အလျင်၊ အရှိန်အဝါနှင့် ပုံသဏ္ဌာန်မဲ့ လှိုင်းဂယက်များမှာ အရာရာတိုင်း ပြည့်စုံလွန်းနေ၏။

"ကောင်းကင်ငှက်ကိုးမျိုး တစ်ကောင်တည်း ပေါင်းစည်းခြင်း"

ဟုန်ယွိ၏ တိုက်ကွက်မှာ ဟုန်ရွှန်ကျိထံသို့ တိုးဝင်သွားသည်။ ထိုအရှိန်အဝါနှင့် တိုက်ကွက် မှာ ဟုန်ရွှန်ကျိကို အလုံးစုံ လွှမ်းခြုံသွားလေပြီ။ ထိုအခိုက်အတန့်တွင် ဟုန်ရွှန်ကျိသည် သူသာ 'ဟင်းလင်းပြင် ဖျက်ဆီးခြင်း' နည်းစနစ်များကို အသုံးပြုလျှင်ပင် ဤတိုက်ကွက်ကို တားဆီးနိုင်မည်မဟုတ်ကြောင်း ခံစားလိုက်ရသည်။

"မိဘကျေးဇူးမသိတဲ့ သားမိုက်။ ဒီနေ့ မင်းသေ၊ ဒါမှမဟုတ် ငါသေပဲ"

ဟုန်ရွှန်ကျိသည် သူ၏ခန္ဓာကိုယ်အတွင်းမှ မူလစွမ်းအင်များကို ရူးသွပ်စွာ လှည့်ပတ်ရင်း ဟစ်အော်လိုက်သည်။ ဤအခိုက်အတန့်၌ သူသည် ထွက်ပြေးစရာနေရာ၊ ပုန်းကွယ်စရာ နေရာ မရှိတော့ချေ။ အသေအလဲ ထိပ်တိုက်ရင်ဆိုင်ရုံမှတစ်ပါး အခြားရွေးချယ်စရာ မရှိ တော့ပေ။

သို့သော် ထိုအချိန်တွင် ဟုန်ယွိမှာ 'ကောင်းကင်ငှက်ကိုးမျိုး တစ်ကောင်တည်း ပေါင်းစည်း ခြင်း' မှတစ်ဆင့် အသစ်အဆန်း တစ်ခုကို နားလည်သဘောပေါက်သွားခဲ့သည်။ သူ၏မျက်လုံးထဲတွင် ဟုန်ရွှန်ကျိ၏ တည်ရှိမှုမှာ အရေးမပါတော့ပေ။

ဤအခိုက်အတန့်တွင် ဟုန်ယွိသည် သူ၏ခန္ဓာကိုယ်အတွင်းရှိ အပ်စိုက်မှတ် (၉၉) ခုမှာ ရုတ်တရက် တုန်ခါလာသည်ကို ခံစားလိုက်ရ၏။ တစ်ချိန်တည်းမှာပင် မည်သည့်နေရာ တွင် ပုန်းကွယ်နေမှန်း မသိနိုင်သည့် ထိုအပ်စိုက်မှတ် (၉၉) ခုမှာ သူ၏ ခန္ဓာကိုယ် အတွင်း မှာရော၊ ခန္ဓာကိုယ်အပြင်မှာပါ ရှိနေသကဲ့သို့ ဖြစ်နေပြီး၊ အမှန်စင်စစ် ထိုအပ်စိုက်မှတ် ၉၉ ခုမှာ တော်ဝင်ချန်အင်ပါယာ ပြည်နယ် (၉၉) ခု၏ အထက်၌ ရှိနေကြသည်။ လူသားတစ်ဦး ၏ နောက်ဆုံးသော အပ်စိုက်မှတ် (၉၉) ခုမှာ သူတို့၏ ခန္ဓာကိုယ်အတွင်း၌ ရှိနေခြင်း မဟုတ်ဘဲ ပြည်နယ် (၉၉) ခု၌ အပ်နှံထားခြင်းသာ ဖြစ်သည်။

တွေဝေငေးမောနေစဉ်အတွင်း ဟုန်ယွိသည် တော်ဝင်ချန်အင်ပါယာ နယ်မြေတစ်ခုလုံး၏ စစ်မှန်သော ပုံပန်းသဏ္ဌာန်ကို မြင်တွေ့လိုက်ရသည်။ ကျယ်ပြောလှသော ကုန်းမြေကြီး တစ်ခုမှာ တော်ဝင်ချန်အင်ပါယာ၏ အလယ်ဗဟို၌ လွင့်မျောနေပြီး အစဉ်အမြဲ လည်ပတ် နေ၏။ ကောင်းကင်ယံ၌မူ 'ကောင်းကင်အပြင်ပနယ်မြေ' ရှိ နေမင်းကြီးထက် အဆပေါင်း ထောင်ချီ၍ ပိုမိုတောက်ပသော ဧရာမနေမင်းကြီးမှာ ဟင်းလင်းပြင်ကို ဖြတ်ကျော် ခုန်ပျံ နေသည်။ ညဘက်တွင် ထိုနေမင်းကြီးမှာ ဟင်းလင်းပြင်ထဲသို့ ခုန်ဝင်သွားပြီး နေ့ဘက်တွင် ပြန်လည်ထွက်ပေါ်လာကာ ကုန်းမြေကြီးကို အလင်းပေးသည်။ ဤသို့ လည်ပတ်နေပုံမှာ 'ကောင်းကင်အပြင်ပနယ်မြေ' ရှိ နေမင်းများ၏ လည်ပတ်ပုံနှင့် လုံးဝ ကွဲပြားခြားနားလှ သည်။

မဟာကမ္ဘာလောကကြီးသည် စကြဝဠာ၏ ဗဟိုချက်ဖြစ်ပြီး၊ စကြဝဠာကြီး၏ ‘မူလမြေ’ ဖြစ်သည်။ ‘မူလနဝမချောက်နက် နတ်ဘုရားနယ်မြေ’ သည် မဟာကမ္ဘာလောကကြီး၏ အထက်ရှိ ‘ဟင်းလင်းပြင် လေဟာနယ် မုန်တိုင်း’ ထဲတွင် ရှိနေပြီး မူလနဝမချောက်နက် နတ်ဘုရားနယ်မြေမှာ မဟာကမ္ဘာလောကကြီးနှင့် တစ်သားတည်း ဖြစ်သည်။ ‘လျှပ်တ ပြက် ဝင်္ကပါ’ မှာ မဟာကမ္ဘာလောကကြီး၏ အဆုတ်နှင့် တူလှသည်။

ပြည်နယ် (၉၉) ခုမှာ မဟာကမ္ဘာလောကကြီး၏ ဗဟိုချက် ဖြစ်ပြီး၊ 'ကျောက်စိမ်းမြို့တော်' မှာမူ ထိုပြည်နယ် (၉၉) ခု၏ အလယ်ဗဟို ဖြစ်သည်။ လူ့ခန္ဓာကိုယ်ဆိုသည်မှာ စကြဝဠာ၏ ပုံစံငယ်တစ်ခု သို့မဟုတ် စကြဝဠာ၏ သေးငယ်သော အရိပ်ထင်ဟပ်မှုတစ်ခုသာ ဖြစ်သည်။ လူသားတစ်ဦး၏ အပ်စိုက်မှတ် (၉၉) ခုမှာ ခန္ဓာကိုယ်အတွင်း၌ ရှိနေခြင်း မဟုတ်ဘဲ၊ ‘ပြည်နယ် ၉၉ ’ ခုတွင် အခြေချ တည်ရှိနေခြင်း ဖြစ်သည်။

ဟုန်ယွိသည် 'ဟင်းလင်းပြင် ဖျက်ဆီးခြင်း' အဆင့်၏ လျှို့ဝှက်ချက်ကို ဝေဝါးဝါး နားလည် သဘောပေါက်သွားပြီး သူ၏လမ်း၌ ရှိသမျှအရာအားလုံးကို သုတ်သင်ရန် နောက်ဆုံး ခြေလှမ်းကို လှမ်းတော့မည့်ဆဲဆဲတွင် ဟုန်ရွှန်ကျိ၏ တစ်သက်တာတွင် အတောက်ပဆုံး ဖြစ်သော အပြင်းထန်ဆုံး တန်ပြန်တိုက်ခိုက်မှုနှင့် ဝင်ရောက်တိုက်မိသွားတော့သည်။

ဝုန်း…

ကြီးမားလှသော စွမ်းအားများ ထိပ်တိုက်တွေ့မှုကြောင့် ဟုန်ယွိမှာ သူ၏ သိမြင်နားလည်မှု လျှပ်တပြက်ဉာဏ်အလင်းမှ ရုတ်တရက် နိုးထလာပြီး ထိုနောက်ဆုံး ခြေလှမ်းကို မလှမ်းနိုင်အောင် တားဆီးခြင်း ခံလိုက်ရသည်။

သို့သော်လည်း ဟုန်ရွှန်ကျိမှာမူ ကြီးမားသော တန်ဖိုးကို ပေးဆပ်လိုက်ရသည်။

ထိုထိပ်တိုက်တွေ့မှုအတွင်း သူ၏ခန္ဓာကိုယ်မှာ အင်မော်တယ် ကျောက်စာတိုင်ကဲ့သို့ပင် အလုံးစုံ ပျက်စီးသွားခဲ့ပြီး၊ သူသည် သန်းပေါင်း ၄၈၀ သော အမှုန်အမွှားလေးများနှင့် မှော်သင်္ကေတများအဖြစ် ပြောင်းလဲသွားတော့သည်။ သူ၏စွမ်းအားများမှာလည်း တစ်ဖန် ပြန်လည် ပြန့်ကျဲသွားခဲ့သည်။

“အလင်း မန္တလာ၊ အမှောင် မန္တလာ၊ ကံတရား မူလစိတ်ဝိညာဉ်၊ ထာဝရအမှောင်ည မူလ စိတ်ဝိညာဉ် ပိတ်လှောင်စမ်း”

ဟုန်ယွိ၏ လက်သီးချက်က ဟုန်ရွှန်ကျိ၏ တန်ပြန်တိုက်ခိုက်မှုကို ချေမှုန်းဖျက်ဆီးပစ် လိုက်ပြီး ဟုန်ရွှန်ကျိကို သန်း ၄၈၀ သော မှော်သင်္ကေတလေးများအဖြစ် ပြောင်းလဲ ပစ်လိုက်သည်။ အနည်းငယ်မျှပင် တုံ့ဆိုင်းခြင်းမရှိဘဲ 'အလင်းနှင့်အမှောင်မန္တလာ အတား ဆီး' ကို ဖြန့်ကျက်လိုက်ရာ ကမ္ဘာလောက အလွှာပေါင်းစုံမှာ ဟုန်ရွှန်ကျိကို ၎င်းတို့အတွင်း ၌ ပိတ်လှောင်လိုက်တော့သည်။

ဤချိပ်ပိတ်မှုမှာ ဟုန်ရွှန်ကျိ တစ်ကိုယ်လုံးကို တစ်သားတည်းအဖြစ် ပိတ်လှောင်ထားခြင်း မဟုတ်ဘဲ၊ ဟုန်ရွှန်ကျိနှင့် အင်မော်တယ် ကျောက်စာတိုင်ကိုပါ သီးခြားစီ ခွဲထုတ်လိုက် သည်။ မှော်သင်္ကေတ အသေးလေးတစ်ခုချင်းစီကို သီးခြားစီဖြစ်သော အချိန်နှင့် ဟင်းလင်း ပြင်များအတွင်း ချိပ်ပိတ်လိုက်သဖြင့် ၎င်းတို့ကို ပြန်လည်စုစည်းရန်မှာ မဖြစ်နိုင်တော့ချေ။

ဤသည်မှာ ရွှီဝူယွိကို ရင်ဆိုင်ရန် ဟုန်ယွိ ကြံဆထားသော လျှို့ဝှက်နည်းပညာပင် ဖြစ်သည်။ ယခုအခါ ၎င်းကို ဟုန်ရွှန်ကျိအပေါ် အသုံးပြုလိုက်ခြင်းဖြစ်သည်။

ယခုလေးတင် သူ၏ ဉာဏ်အလင်းသိမြင်နားလည်မှုမှာ ဟုန်ရွှန်ကျိကြောင့် အနှောင့် အယှက် ဖြစ်ခဲ့ရသော်လည်း ဟုန်ယွိသည် နောက်ဆုံးတွင် မှန်ကန်သော လမ်းစကို ရှာဖွေ တွေ့ရှိသွားခဲ့ပြီ။ ထိုလမ်းစမှာ 'ဟင်းလင်းပြင် ဖျက်ဆီးခြင်း' နယ်ပယ်၏ တံခါးမကြီးဆီသို့ ဦးတည်နေသော ချောမွေ့သည့် လမ်းကြောင်းပင် ဖြစ်သည်။ နောင်တွင် ကောင်းစွာ နားလည်သဘောပေါက်အောင် ကျင့်ကြံနိုင်သည်နှင့် သူသည် 'ဟင်းလင်းပြင် ဖျက်ဆီးခြင်း' ဆိုသည့် အမြင့်ဆုံးအဆင့်သို့ ရောက်ရှိမည်မှာ သံသယဖြစ်ဖွယ် မရှိပေ။

ဟုန်ရွှန်ကျိမှာမူ ချိပ်ပိတ်ခံထားရပြီ ဖြစ်သည်။ သူ၏ ခန္ဓာကိုယ် အမှုန်အမွှားတိုင်းမှာ သီးခြားစီဖြစ်သော ဟင်းလင်းပြင်ထဲ၌ ရှိနေသည်။ အချိန်သာ ရမည်ဆိုပါက ဟုန်ယွိသည် ၎င်းတို့ကို အပြီးတိုင် ချေဖျက်သန့်စင်ပစ်နိုင်ပြီး သူ၏ သိုင်းပညာကို ဖျက်ဆီးနိုင်မည် ဖြစ်သည်။ ပြိုင်ဘက်ကင်း သိုင်းပညာရှင်၊ ယင်နှင့်ယန်ကို စီရင်နိုင်သော ဧကရာဇ်အကြံပေး ကို သာမန်လူတစ်ယောက်အဖြစ် ပြောင်းလဲပစ်ရန်မှာ ဟုန်ယွိ၏ နှစ်ရှည်လများ တောင့်တ ခဲ့သော ဆန္ဒပင် ဖြစ်သည်။

…

"ဖန်ဆင်းခြင်းသင်္ဘော... မသေမျိုးစစ်အလံကို ဖျက်ဆီးပစ်စမ်း"

ထိုအခိုက်အတန့်တွင် ဧကရာဇ်ယန်ဖန်သည် သူ၏စွမ်းအားများကို ထုတ်ဖော်လိုက်သည်။ သူ၏မျက်ခုံးများ လှုပ်ရှားသွားသည်နှင့် နတ်ဘုရားရတနာများ၏ ဘုရင်ဖြစ်သော ဧရာမ "ဖန်ဆင်းခြင်းသင်္ဘော" ကြီး ပေါ်ထွက်လာတော့သည်။ ဤခေတ်ဦး နတ်ဘုရားရတနာကြီး ပေါ်ထွက်လာသည်နှင့် ကမ္ဘာလောကကြီး တစ်ခုလုံး တုန်လှုပ်သွားပြီး ဟုန်ယွိ ချိပ်ပိတ် ထားသော ဟင်းလင်းပြင် စစ်မြေပြင်ကြီးပင်လျှင် ကြီးမားလှသော မူလစွမ်းအင်များ ကြောင့် အက်ကွဲသွားတော့သည်။

ဗြိ… ဗြိ…. ဗြိ…

'မသေမျိုးစစ်အလံ' မှာ ဖန်ဆင်းခြင်းသင်္ဘော၏ ရိုက်ခတ်မှုကြောင့် အတင်းကြပ် ဆုတ်ဖြဲ ခံလိုက်ရသည်။ မူလတာအိုသခင်မှာလည်း လှုပ်ရှားလိုက်ကာ 'မသေမျိုးစစ်အလံ' ကို သိမ်းဆည်း၍ မျက်စိတစ်မှိတ်အတွင်း ထွက်ပြေးသွားတော့သည်။ သူသည် ဖန်ဆင်းခြင်း သင်္ဘောနှင့် ဆက်လက်တိုက်ခိုက်ရန် ဆန္ဒမရှိသယောင်ပင်။

မူလတာအိုသခင်နှင့် 'မသေမျိုးစစ်အလံ' မှာ အစွမ်းထက်သော်လည်း၊ ဧကရာဇ်ချန်ရှန်းပင် လျှင် သတိထားရသော ခေတ်ဦးကာလ၏ နံပါတ်တစ် နတ်ဘုရားရတနာဖြစ်သည့် ဖန်ဆင်းခြင်းသင်္ဘောကိုမူ မယှဉ်နိုင်ပေ။ ထို့အပြင် ထိုနေရာတွင် 'အနာဂတ်သခင်' လည်း ရှိနေသေးသည်။

ဧရာမ ဖန်ဆင်းခြင်းသင်္ဘောကြီးသည် 'အလင်းနှင့်အမှောင် အကာအကွယ်' ကို ပြင်းထန် စွာ ဝင်တိုက်လိုက်သည်။ ဧကရာဇ်ယန်ဖန်နှင့် ဟုန်ရွှန်ကျိတို့မှာ စိတ်ချင်းဆက်နွယ်နေကြ သူများဖြစ်ရာ ဟုန်ရွှန်ကျိ ရင်ဆိုင်နေရသော အန္တရာယ်ကို သူ သဘာဝကျကျ ခံစားမိနေ သည်။ ဟုန်ယွိသည် နောက်သို့ လှည့်ကြည့်လိုက်ရာ သူ၏ မျက်ခုံးနှစ်ခုကြားမှ သူတော်စင် ပေါင်းစုံခန်းမကို ဖန်ဆင်းခြင်းသင်္ဘောဆီသို့ ဦးတည်၍ ပစ်လွှတ်လိုက်သည်။ သူသည် ဤတိုက်ကွက်အတွက် အစောကတည်းက အဆင်သင့် ပြင်ဆင်ထားပြီး ဖြစ်သည်။