အခန်း ၄၃၈

အခန်း။ ၄၃၈

ယုတ္တိဗေဒအရ တွေးကြည့်ရင်တော့ ပုစွန်ဆိုတာ စားစရာ မဟုတ်ဘူးလား...

ဒီကောင်က ဘယ်လိုလုပ်ပြီး နိဗ္ဗာန်အဆင့်အထိ တောင် ကြီးထွားလာနိုင်ရတာလဲ...

"တခြားကောင်တွေက ဖမ်းရခက်တယ်။ ဖမ်းမိရင်တောင် အသက်မရှင်ဘူး...

ဒါကတော့ အသက်ရှင်ဖို့ လွယ်တယ်..."

အော်...

ဒီထင်းရှူးပင်ကြီးက ငါ သူ့ကို အရင်က ပြောခဲ့ဖူးတဲ့ စကားကို မှတ်မိနေတာကိုး...

အသက်ရှင်လျက် ဖမ်းမိတဲ့ နတ်ဆိုးသားရဲတွေက ပိုပြီး တန်ဖိုးရှိတယ်ဆိုတဲ့ စကားကို...

ဒါပေမဲ့လည်း... စားဖို့ကလွဲရင် ဒီကောင်က ဘာအတွက် အသုံးဝင်ဦးမှာမို့လို့လဲ...

ချန်ကျီရှင်း၏ စိတ်မကျေနပ်မှုကို ရိပ်မိဟန်ရှိသည့် နတ်ဘုရားလွီသည် ခဏတာ စဉ်းစားပြီးနောက် သူ့ကို ဤသို့ ပြောလိုက်သည်။

"အခုဖမ်းရတာ ခက်တယ်။ ပင်လယ်ကမ်းစပ်မှာ အစွမ်းထက်တဲ့ တည်ရှိမှုတွေ မကြာသေးခင်ကမှ ရောက်လာတယ်။ သူတို့ကို မနိုင်ဘူး"

"အင်း အစွမ်းထက်တဲ့ တည်ရှိမှုတွေလား"

အကြောင်းရင်းတစ်ခုခုကြောင့် ချန်ကျီရှင်းသည် ပိတ်မိနေသော ထာဝရအသက်ရှည်ခြင်း တာအိုအရှင်သခင် နှစ်ယောက်ကို ချက်ချင်း သတိရသွားသည်။

ဒါပေမဲ့... ဒီထင်းရှူးပင်ကြီးက ကျောက်ရွာမှာပဲ အမြဲတမ်း ရှိနေတာ မဟုတ်ဘူးလား...

ဒီလောက်အထိ ဝေးလံတဲ့ နေရာအထိ ဘယ်လိုမျိုး လက်လှမ်းမှီသွားပြီး နိဗ္ဗာန်အဆင့်ရှိတဲ့ ပုစွန်ကို အသက်ရှင်လျက် ဖမ်းဆီးနိုင်ခဲ့တာလဲ...

ချန်ကျီရှင်းသည် သူ၏ သံသယကို နတ်ဘုရားလွီထံ ပြောပြလိုက်သော်လည်း နတ်ဘုရားလွီက သူ့ကို မည်သို့ ရှင်းပြရမှန်း မသိပေ။

နောက်ဆုံးတွင် နတ်ဘုရားလွီက ဤတစ်ကြိမ် အကြွေးကျန်သည်ကို နောက်တစ်ခါတွင် ပို၍ ကြီးမားသည့်အရာဖြင့် ဆပ်ပေးမည်ဟုသာ တိုးတိုးလေး ပြောလိုက်သည်။

ချန်ကျီရှင်းမှာမူ အလွန်ပင် တွေဝေသွားရသည်။

ဒီထက် ပိုကြီးတယ်ဆိုတာက... ဘယ်လောက်တောင် ကြီးမှာမို့လို့လဲ...

နတ်ဘုရားလွီက နောက်တစ်ခါကျရင် ဝေလငါးကြီးတစ်ကောင်လောက်ကိုများ အမိအရ ဖမ်းလာပေးဦးမလား မသိဘူး...

မြေပြင်ပေါ်ရှိ နဂါးအရေခွံနှင့် အသက်ရှင်ဆဲ ပုစွန်တို့ကို သိုလှောင်မှု မှော်ပစ္စည်းတစ်ခုအတွင်းသို့ သိမ်းဆည်းလိုက်ပြီးနောက် ဓားနတ်ဆိုး တုကူးထံသို့ ပေးအပ်လိုက်သည်။

"တုကူး လင်ကျန်းမြို့ကို တစ်ခေါက်လောက် ပြန်သွားပေးရလိမ့်မယ်။ ဒီအရာတွေကို ယူသွားပြီး ဒီမြေပုံနဲ့ စာကိုပါ မိသားစုဆီ အရောက်ပို့ပေးပါ"

"စိတ်ချပါ ဂိုဏ်းချုပ် တုကူး ဒီတာဝန်ကို အောင်မြင်အောင် လုပ်ဆောင်ပါ့မယ်"

"ဟုတ်ကဲ့ အကြီးအကဲကို ယုံကြည်ပါတယ်"

ချန်ကျီရှင်းသည် တုကူး၏ ပုခုံးကို ပုတ်လိုက်သည်။

ကျောက်ရွာကို ကျော်လွန်ကာ တောင်တန်းများထဲသို့ သူ၏ ပုံရိပ် တဖြည်းဖြည်း ပျောက်ကွယ်သွားသည်ကို ငေးကြည့်နေမိသည်။

...

ကျန်းကျိုး ဇီဝေတောင်။

"ကျီရှင်းဆီက သတင်းရောက်လာပြီ"

လက်ရှိတွင် ချန်မိသားစု၏ ထောက်လှမ်းရေးကို တာဝန်ယူထားသူမှာ ချန်ကျီရှင်း၏ စတုတ္ထဦးလေး ချန်တျန်ချန် ဖြစ်သည်။ ချန်တျန်ချန်က မျက်နှာတည်တည်ဖြင့် ဆက်လက် ပြောပြသည်။

"တာလျို တာအိုနယ်မြေက မြောက်ဘက်မှာရှိတဲ့ နတ်ဘုရားတက်လှမ်းခြင်း ဂိုဏ်းနဲ့ မဟာမိတ်ဖွဲ့ပြီး စစ်ဆင်ရေးအတွက် စုရုံးဖို့ အမိန့်ပေးလိုက်ပြီ။ မြောက်ဘက်က မြင့်မြတ်တဲ့ မိသားစု ၁၁ ခုက အထွတ်အထိပ်အဆင့် ကျွမ်းကျင်သူတွေအားလုံးကို ကျောက်မျိုးနွယ်စုရဲ့ မြောက်ဘက်နယ်မြေ၊ ခါးသီးသော ရေမြောင်းမှာ ပထမဆုံး ကာကွယ်ရေးလိုင်း တည်ဆောက်ပြီး ကမ်းတက်လာတဲ့ ပင်လယ်နတ်ဆိုးတွေကို ကြားဖြတ် တိုက်ခိုက်ဖို့ ညွှန်ကြားထားတယ်"

"အင်း သိပြီ"

ချန်တောက်ရှန်းက သူ၏ မုတ်ဆိတ်ကို ပွတ်သပ်ရင်း ရုတ်တရက် ပြောလာသည်။

"မြောက်ဘက်မှာ စစ်တိုက်ဖို့ ဆုံးဖြတ်ထားပြီဆိုတော့ အဲဒီအချိန်ကို အခွင့်ကောင်းယူပြီး အမြတ်ထုတ်သင့်တယ် မဟုတ်လား"

ချန်တျန်ချန်သည် ဤစကားကို ကြားသောအခါ အံ့ဩသွားသည်။

ခဏအကြာတွင် သူက ချန်တောက်ရှန်းကို တည်ငြိမ်စွာဖြင့် ပြန်ပြောလိုက်သည်။

"ဆဌမဦးလေး ဒါက စစ်ပွဲပါ။ ကျွန်တော်တို့ လူသားမျိုးနွယ်စုနဲ့ ပင်လယ်နတ်ဆိုးတွေကြားက စစ်ပွဲပါ။ ကစားပွဲ မဟုတ်ပါဘူး"

"ငါသိပါတယ်"

ချန်တောက်ရှန်းက ခေါင်းညိတ်ရင်း "ဒါပေမဲ့ ငါတို့လို မြင့်မြတ်တဲ့ မိသားစုတွေ ဆက်လက်ရှင်သန်ဖို့ဆိုတာ ဒီလိုအချိန်အခါမျိုးမှာ အမြတ်အစွန်းတွေကို လုယူပြီး ကိုယ့်ကိုကိုယ် သန်မာအောင် တည်ဆောက်ထားမှပဲ ဖြစ်မှာ။ အဲဒီအခါမှ ငါတို့မိသားစု အခက်အခဲနဲ့ ရင်ဆိုင်ရတဲ့အခါ တခြားသူတွေထက် ပိုပြီး ခံနိုင်ရည်ရှိမှာလေ ဟုတ်တယ်မလား"

"ဦးလေး..."

"တျန်ချန် မင်းအဖေသာဆိုရင် ဒီလိုအခြေအနေမျိုးနဲ့ ကြုံလာတဲ့အခါ သူ ဘာလုပ်မယ်လို့ မင်းထင်သလဲ"

"အယ်..."

သူ့ရှေ့က ဆဌမဦးလေးထက်ပင် ပို၍ ရက်စက်တတ်သည့် သူ့အဖေအကြောင်းကို တွေးမိလိုက်သောအခါ ချန်တျန်ချန်မှာ တွေဝေသွားပြီး "ဖြစ်နိုင်တာက သူလည်း အခု ဦးလေး လုပ်သလိုမျိုးပဲ ရွေးချယ်မှာပါပဲ" ဟု ဖြေလိုက်သည်။

"တောင်ဘက်ဒေသက တခြား မြင့်မြတ်တဲ့ မိသားစုတွေကကော ဘယ်လိုလဲ"

"..."

"ကောင်းပြီ ငါနားလည်ပြီ။ တျန်ချန် ငါတို့ ချန်မိသားစုနဲ့ နတ်ဘုရားလွီကြားက ကိစ္စတွေကို မင်းပဲ စီစဉ်ပေးပါ။ ဒီမှာရှိတဲ့ ကျန်တဲ့ကိစ္စတွေကို ငါ အကုန်တာဝန်ယူလိုက်မယ်"

"ဒါပေမဲ့... ဆဌမဦးလေး အဲဒါတွေက လူ့အသက်တွေလေ။ ကျွန်တော်တို့သာ သတိမထားမိဘဲ ပင်လယ်နတ်ဆိုးတွေကို မြောက်ဘက်ဒေသမှာ ခြေကုပ်ယူမိအောင် လွှတ်ပေးလိုက်ရင်..."

"သူတို့ ခြေကုပ်ယူမိရင်တောင်မှ နောက်ထပ် ဒုက္ခရောက်မှာက အလယ်ပိုင်းပြည်နယ်က တာလျို တာအိုနယ်မြေနဲ့ အရှေ့ဘက်ဒေသက နတ်ဘုရားတက်လှမ်းခြင်း ဂိုဏ်းတို့ပဲ ဖြစ်မှာပါ။ ချန်မိသားစုက အဓိက တိုက်ခိုက်ခံရမှာ မဟုတ်ဘူး"

"ကောင်းပါပြီ ကျွန်တော် တောင်ဘက်နယ်စပ်ကို လူတွေခေါ်ပြီး သွားပါ့မယ်။ အပင်ရဲ့ အနှစ်သာရတွေကို သွားစုဆောင်းပါ့မယ်"

ချန်တျန်ချန်သည် တံခါးပေါက်ဆီသို့ ယိုင်နဲ့နဲ့ လျှောက်သွားသည်။ သို့သော် တံခါးဝသို့ ရောက်သည်နှင့် သူသည် ရင်ကွဲမတတ် အော်ဟစ်လိုက်မိသည်

"မဟုတ်ဘူး ဦးလေးတို့ ဒီလိုမလုပ်ရဘူး။ ဒီလိုသာ လုပ်ရင် အနိုင်ရနိုင်တဲ့ အခြေအနေကို လက်လွှတ်ဆုံးရှုံးသွားလိမ့်မယ်။ လူတွေ အများကြီး အများကြီး သေဆုံးသွားလိမ့်မယ်။ ရာဂဏန်း၊ ထောင်ဂဏန်းတင် မဟုတ်ဘဲ သန်းထောင်၊ သန်းသောင်းနဲ့ချီပြီး သေဆုံးသွားလိမ့်မယ် သူတို့အားလုံး သေကုန်လိမ့်မယ်"

"ရွှဲ့ကွမ်း တျန်ချန်ရဲ့ ကျန်းမာရေးက နည်းနည်း မကောင်းဖြစ်နေပုံပဲ။ သူ့ကို အိမ်အရင် ပြန်ပို့ပေးလိုက်ပါ"

"ဆဌမဦးလေး တျန်ချန်ရဲ့ စကားကို နားထောင်ပေးပါ။ ဦးလေးတို့ ဒီလို မလုပ်သင့်ဘူး မလုပ်ပါနဲ့"

...

ချန်တျန်ချန်တစ်ဦးတည်း ငြင်းဆန်ရုံဖြင့် မဖြစ်နိုင်သော ကိစ္စရပ်များလည်း ရှိသည်။

သူသည် ထောက်လှမ်းရေးဌာန၏ ခေါင်းဆောင်ဖြစ်နေပါစေ သို့မဟုတ် တောင်ဘက်ဒေသ၏ အင်အားကြီး မိသားစုဖြစ်သည့် ဇီဝေချန်မိသားစု၏ မိသားစုခေါင်းဆောင် ဖြစ်နေပါစေ ဤကဲ့သို့သော အချိန်မျိုးတွင် သူသာ သနားညှာတာမှု ပြသနေပါက တခြားသော တောင်ဘက်ဒေသ မိသားစုခေါင်းဆောင်များသည် စီကုံးမိသားစုကို ပြုလုပ်ခဲ့သလိုမျိုး ချန်မိသားစုကို စုပေါင်း၍ ဖြုတ်ချပြီး သူတို့၏ အကျိုးအမြတ်ကို အများဆုံး ပေးနိုင်မည့် ခေါင်းဆောင်အသစ်ကို ချက်ချင်း ရွေးချယ်သွားမည်သာ ဖြစ်သည်။

အခြေအနေမှာ ချန်တျန်ချန် စိုးရိမ်ခဲ့သည့်အတိုင်းပင်။

မြောက်ဘက်ဒေသ စစ်ပွဲသတင်းကို ကြားရသောအခါ အခြေအနေကို လေ့လာရန် ရောက်ရှိလာကြသည့် မိသားစုခေါင်းဆောင်များသည် နတ်ဆိုးမျိုးနွယ်စု၏ သူလျှိုများကို ကာကွယ်ရန်ဟူသော အကြောင်းပြချက်ဖြင့် တောင်ဘက်နယ်မြေ၏ နယ်စပ်များကို ပိတ်ဆို့ရန် တညီတညွတ်တည်း အဆိုပြုကြသည်။

ဤသို့ဖြင့် အလယ်ပိုင်းပြည်နယ် သို့မဟုတ် အရှေ့ဘက်ဒေသမှ မည်သည့်ကျင့်ကြံသူမျှ ဝင်ရောက်လာနိုင်တော့မည် မဟုတ်ပေ။

ဤအကြောင်းကြောင့်ပင် ယခင်က လေးစားစရာကောင်းဟန်ရှိသည့် လူကြီးလူကောင်းများသည် ယခုအခါ သွေးစွန်းနေသော သတ်ဖြတ်သူများအဖြစ် ပြောင်းလဲသွားကြသည်။

ကြီးမားလှသော အစီအရင်များသည် တောင်ဘက်နယ်စပ်တစ်လျှောက် အဆုံးမရှိ ဆန့်တန်းသွားပြီး ဘေးဘက်များသို့လည်း အကန့်အသတ်မရှိ ချဲ့ထွင်နေသည်။

တောင်ဘက်ဒေသရှိ မိသားစုကြီး ၈ ခု၏ ပူးပေါင်းဆောင်ရွက်မှုဖြင့် ဤဧရာမ စီမံကိန်းကြီးကို တစ်လခွဲအတွင်း အပြီးသတ်နိုင်မည်ဟု ခန့်မှန်းထားကြသည်။

ကောင်းကင်စံအိမ်တော်မှ သတင်းအချက်အလက်များကို ခွဲခြမ်းစိတ်ဖြာကြည့်လျှင် မြောက်ဘက်ဒေသ စစ်ပွဲသာ အခြေအနေဆိုးဝါးသွားပါက ပင်လယ်နတ်ဆိုးများအနေဖြင့် မြောက်ဘက်ဒေသ တစ်ခုလုံးကို ဖျက်ဆီးပြီး အလယ်ပိုင်းပြည်နယ်နှင့် အရှေ့ဘက်ဒေသ၏ တံခါးပေါက်များဆီသို့ ရောက်ရှိရန် သုံးလသာ ကြာမြင့်နိုင်သည်။

……

"ဆိုလိုတာကတော့ ဒီအစီအရင်ကြီးကိုသာ ဆောက်လုပ်ပြီးသွားရင် နှစ်လအတွင်းမှာ တောင်ဘက်နယ်စပ်ကနေ ထွက်ပြေးလာကြမယ့် ကံဆိုးသူတွေကို ဝင်ကြေး ကောက်နိုင်ပြီပေါ့။ အင်း... ငါတို့ ရှောင်မိသားစုရဲ့ အမြင်မှာတော့ သူတို့ ပိုင်ဆိုင်သမျှရဲ့ သုံးပုံတစ်ပုံလောက် ကောက်တာက သင့်တော်တဲ့ ပမာဏလို့ ထင်တယ်"