အခန်း ၇၄၃

အခန်း (၇၄၃) ရည်မှန်းချက်ပန်းတိုင်

ချင်ယွမ်ဖုန်းသည် မည်သို့မျှ ရွေးချယ်စရာ မရှိတော့ပေ။ လှည့်ပတ်ကြည့်သော်လည်း ထွက်ပေါက်ဟူ၍ မြူမျှမမြင်ရဘဲ ထောင်ချောက်ထဲတွင် ပိတ်မိနေသကဲ့သို့ ခံစားရကာ အသက်လု၍သာ ထွက်ပြေးနေရချေသည်။

“ချင်ယွမ်ဖုန်း... အညံ့ခံစမ်း။ မင်းကို ဂုဏ်သိက္ခာရှိရှိ သေခွင့်ပေးမယ်။ မိုက်မဲပြီး ဆက်ရုန်းကန်နေဦးမယ်ဆိုရင် မင်းတင်မကဘူး... မင်းနဲ့ ပတ်သက်သမျှ လူတွေအကုန်လုံး လိုက်လံ သုတ်သင်ရှင်းလင်းခံရလိမ့်မယ်” ဟု မဟာအကြီးအကဲ တစ်ဦးက တင်းမာခက်ထန်စွာ အော်ဟစ်လိုက်လေသည်။

ထိုစကားကို ကြားသော် ချင်ယွမ်ဖုန်းက အတွင်းစိတ်၌ လှောင်ပြောင်လိုက်မိသည်။ ထိုသူနှင့် ပတ်သက်ဆက်နွှယ်သူများသည် ယခုအချိန်တွင် ကမ္ဘာဦး အပိုင်းအစ အတွင်းသို့ ရောက်ရှိနေလောက်ပြီ ဖြစ်ပေရာ မြူနှင်းဂိုဏ်းကသာ လက်ရဲဇာတ်ရဲ ပြုမူဝံ့ပါက တစ်လောကလုံး၏ ကန့်ကွက်ရှုတ်ချခြင်းကို ခံရမည်ဖြစ်ချေသည်။

ထိုသို့ဆိုလျှင် မြူနှင်းဂိုဏ်းသည် မိစ္ဆာဂိုဏ်းအဖြစ် သတ်မှတ်ခံရပြီး ရှန်းဝူ စကြဝဠာ တိုက်ကြီးရှိ သိုင်းပညာရှင် အားလုံး၏ လိုက်လံနှိမ်နင်းခြင်းကို ခံရပေလိမ့်မည်။

ယင်းသို့သော အကျိုးဆက်ကို မြူနှင်းဂိုဏ်းအနေဖြင့် ခံနိုင်ရည်ရှိမည် မဟုတ်သလို ရှန်းဝူ စကြဝဠာ တိုက်ကြီးတစ်ခုလုံးကို ဆန့်ကျင်ရန် မည်သည့်အင်အားစုမျှ ရဲဝံ့မည် မဟုတ်ချေ။

သို့သော် ထိုသူသည် လက်ရှိအခြေအနေမှ လွတ်မြောက်နိုင်ပါမည်လော။

ယခုအခါ ထိုသူသည် ဤရှေးဟောင်းတောအုပ်ကို အမှီပြု၍ အရိပ်ဆိုးသတ်ဖြတ်ခြင်း၊ ဟင်းလင်းပြင်ဆိုင်ရာ စွမ်းအားနှင့် အခြားသော နည်းလမ်းများကို အသုံးပြုကာ တိုက်ခိုက်မှုများကို ရှောင်တိမ်းရင်း ဆက်လက်ထွက်ပြေးရန်သာ တတ်နိုင်တော့သည်။

သို့သော် လောကကြီးက မည်မျှပင် ကျယ်ပြောစေကာမူ မည်သည့်နေရာသို့ ပြေးရပါမည်နည်း။ အားအင်ကုန်ခမ်းသွားမည့် အချိန်ဟူသည် ရောက်လာစမြဲဖြစ်ရာ တကယ်ပဲ အညံ့ခံရုံမှတစ်ပါး အခြားမရှိတော့ပြီလော။

ချင်ယွမ်ဖုန်းသည် လုံးဝ အလျှော့မပေးလိုပေ။ ထိုအခြေအနေသည် ထိုသူအလိုရှိသော ဇာတ်သိမ်း မဟုတ်ချေ။ သေရမည်ဆိုလျှင်ပင် ဤလူတစ်စု၏ လိုက်လံသတ်ဖြတ်မှုကို တုံ့ပြန်ရင်း သေဆုံးသွားရခြင်းက ပို၍ မြတ်သေးသည်ဟု တွေးတောမိသည်။

ထိုစဉ် ရုတ်တရက် ချင်ယွမ်ဖုန်းသည် ချီဖုန်းချောက်ကမ္ဘာ၏ ကျောက်ဆောင်နံရံတွင် ဝှက်ထားခဲ့သော နေရာပြောင်း အစီအရင် ပြားကို သတိရသွားချေသည်။ အကယ်၍ ထိုနေရာသို့ အရောက်ပြေးနိုင်လျှင် အခွင့်အရေး တစ်ခု ရှိနိုင်သေးသည်။

“ဒါပေမဲ့... မြူနှင်းဂိုဏ်းက ငါ့ကို ရှာဖို့ ရူးသွပ်သွားရင် ငါဘယ်နေရာကိုပဲ နေရာပြောင်းပြောင်း တခြားလူတွေကို ဒုက္ခပေးသလို ဖြစ်လိမ့်မယ်။ သူတို့အသက်ကိုတောင် အန္တရာယ်ပြုမိလိမ့်မယ်” ဟု ချင်ယွမ်ဖုန်းက ပြန်လည် ဝေခွဲမရ ဖြစ်သွားပြန်သည်။

ပင်လယ်ရေနက်ပိုင်းသို့ ထွက်ပြေးပြီး အမြစ်မဲ့ကျွန်းများဆီသို့ ပြန်သွားလျှင်ပင် မြူနှင်းဂိုဏ်းက လိုက်မရှာနိုင်ဟု မည်သူ အာမခံနိုင်ပါမည်နည်း။ ထိုသို့ဆိုပါက အမြစ်မဲ့ကျွန်းများ တစ်ခုလုံးကို အန္တရာယ်တွင်းထဲသို့ ဆွဲသွင်းရာ ရောက်ပေလိမ့်မည်။

“ဟုတ်ပြီ... အခြားနေရာတစ်ခု ရှိသေးတာပဲ။ အဲဒီနေရာကိုတော့ မြူနှင်းဂိုဏ်း ဘယ်လိုမှ ရှာတွေ့နိုင်မှာ မဟုတ်ဘူး” ဟု ချင်ယွမ်ဖုန်းက ဉာဏ်အလင်း တစ်ချက် ပွင့်သွားကာ လျှို့ဝှက်ဆန်းကြယ်သော နေရာတစ်ခုကို တွေးမိသွားချေသည်။

ထိုနေရာသည် မြူနှင်းဂိုဏ်း သာမက မည်သူမျှ ခြေချ၍ မရနိုင်သော နေရာဖြစ်ပေသည်။ ယင်းကား နတ်ဘုရားသောင်းချီနယ်မြေ ပင် ဖြစ်ချေသည်။

ထိုပိတ်လှောင်ထားသည့် နယ်မြေအတွင်း၌ နေရာပြောင်း အစီအရင်တစ်ခု ရှိပေသည်။ ချင်ယွမ်ဖုန်း၏ နေရာပြောင်း အစီအရင် ပြားသည် ထိုနေရာရှိ နေရာပြောင်း အစီအရင်နှင့် ချိတ်ဆက်ထားပြီးဖြစ်ရာ တိုက်ရိုက် နေရာပြောင်း ဝင်ရောက်သွားနိုင်ပေသည်။

အထဲသို့ ရောက်သည်နှင့် ထိုနေရာရှိ နေရာပြောင်း အစီအရင်ကို ချက်ချင်း ဖျက်ဆီးပစ်လိုက်လျှင် အခြားသူများအား မည်သို့မျှ သက်ရောက်မှု ရှိတော့မည် မဟုတ်ချေ။

နှမြောစရာ ကောင်းသည်မှာ ချင်ယွမ်ဖုန်းသည် ရှီးလျူထံမှ နောက်ဆုံး ကျန်ရှိသော နေရာပြောင်း အစီအရင် ပြားကို လုယူခဲ့ရခြင်း ဖြစ်ပြီး အခြားတစ်ခုနှင့် လဲလှယ်ရန် ယုံကြည်မှုတန်ဖိုး လုံလောက်စွာ မကျန်တော့ခြင်းပင် ဖြစ်ချေသည်။

“ငါ ချီဖုန်းချောက်ကမ္ဘာကိုပဲ သွားရတော့မယ်။ အဲဒီကို အချိန်မီ ရောက်ပါ့မလား မသိဘူး” ဟု ချင်ယွမ်ဖုန်းက တိုးတိုးရေရွတ်လိုက်သည်။

ယခုအချိန်တွင် သူတို့သည် နေဝင်ချိန် ရှေးဟောင်းတောအုပ်အတွင်းသို့ ရောက်ရှိနေကြပြီး ချင်ယွမ်ဖုန်းအား အရှင်လတ်လတ် ဝါးမြိုပစ်တော့မည့်အလား မြူနှင်းဂိုဏ်းမှ ထွက်ပေါ်လာသော အရှိန်အဝါများသည် နောက်ကွယ်မှ ပြင်းထန်စွာ လိုက်ပါနေချေသည်။

ချင်ယွမ်ဖုန်းသည် မြေပြင်ပေါ်တွင် အရိပ်တစ်ခုအသွင်ဖြင့် လျင်မြန်စွာ လှုပ်ရှားသွားပြီးနောက် ရုတ်တရက် မြေပြင်မှ ရုန်းထွက်ကာ ဟင်းလင်းပြင်ဆိုင်ရာ စွမ်းအားကို အသုံးပြု၍ ပေရာချီ ဝေးကွာသော နေရာ၌ ပေါ်လာချေသည်။

ထိုသို့ ချင်ယွမ်ဖုန်း ရှိခဲ့သည့် နေရာ၌ပင် နွယ်ပင်တစ်ပင်သည် လွန်သွားတစ်ခုကဲ့သို့ မြေပြင်မှ ရုတ်တရက် ထိုးထွက်လာသည်။

အကယ်၍ ချင်ယွမ်ဖုန်းသာ အချိန်မီ မရှောင်လွှဲနိုင်ခဲ့ပါက ထိုနွယ်ပင်၏ ဖမ်းဆီးခြင်းကို ခံရပေလိမ့်မည်။

“ဒီကောင် ချင်ယွမ်ဖုန်းက ငါးရှဉ့်လိုပဲ။ ချောကျိပြီး ကောက်ကျစ်လွန်းတယ်။ တကယ်ကို ယုတ်မာတဲ့ ကောင်ပဲ” ဟု မဟာအကြီးအကဲ တစ်ဦးက ခါးသီးစွာ ပြောလိုက်သည်။

“မြန်မြန် လိုက်ကြ။ သူ ဘယ်ကိုပဲ ပြေးပြေး ဒီတစ်ကြိမ်တော့ လွတ်မြောက်ခွင့် မပေးနိုင်ဘူး” ဟု အခြား မဟာအကြီးအကဲ တစ်ဦးက အေးစက်စွာ ဆိုလေသည်။

ချင်ယွမ်ဖုန်းသည် မြူနှင်းဂိုဏ်းသားများနှင့် ပေရာချီသော အကွာအဝေးကို လျင်မြန်စွာ ရယူနိုင်ခဲ့သော်လည်း ထိုအကွာအဝေးသည် မကြာမီ ပြန်လည် နီးကပ်လာလိမ့်မည်ကို သိရှိနေပေသည်။

“မဟာအကြီးအကဲ... ချင်ယွမ်ဖုန်း ထွက်ပြေးတဲ့ အရပ်က နေဝင်ချိန် ရှေးဟောင်းတောအုပ်ရဲ့ အနက်ရှိုင်းဆုံးပိုင်း ဖြစ်နေတယ်။ ကျွန်မ စိုးရိမ်မိတာက...” အကြီးအကဲ တစ်ဦးက မဟာအကြီးအကဲ၏ အနောက်မှ ကပ်လျက် လျှောက်လှမ်းရင်း ပြောလိုက်ချေသည်။

“ငါ သိတယ်။ ဒါပေမဲ့ ချင်ယွမ်ဖုန်းကို လွှတ်ပေးလို့ မဖြစ်ဘူး။ ဘယ်လောက်ပဲ အန္တရာယ်ကြီးပါစေ သူ့ကို ဖမ်းရမယ်” ဟု မဟာအကြီးအကဲက ပြတ်သားစွာ ပြောလိုက်သည်။

ချင်ယွမ်ဖုန်းသည် နေဝင်ချိန် ရှေးဟောင်းတောအုပ်၏ အနက်ရှိုင်းဆုံးပိုင်းသို့ ဦးတည်ထွက်ပြေးနေခြင်း ဖြစ်ရာ ထိုနေရာသည် မြူနှင်းဂိုဏ်းပင် လေ့ကျင့်ရေးကွင်းအဖြစ် သတ်မှတ်ထားသော နေရာဖြစ်သဖြင့် အထဲ၌ အစွမ်းထက်သော မိစ္ဆာသားရဲ ရှိနေကြောင်း ညွှန်ပြနေပေသည်။

ယင်းကပင် ချင်ယွမ်ဖုန်းအတွက် ရှင်သန်နိုင်မည့် အခွင့်အရေး ဖြစ်ကောင်းဖြစ်နိုင်ချေသည်။ သို့မဟုတ်ပါက ဟင်းလင်းပြင်ဆိုင်ရာ စွမ်းအားကိုသာ အမှီပြု၍ တစ်ကြိမ်လျှင် ပေရာချီသာ ခွာနိုင်သဖြင့် မကြာမီ ဖမ်းဆီးခြင်း ခံရပေလိမ့်မည်။

ချင်ယွမ်ဖုန်းသည် အနက်ရှိုင်းဆုံးပိုင်းသို့ ရောက်ရှိရန် အစွမ်းကုန် ကြိုးစားရုန်းကန်နေပြီး ထိုသူ၏ ဝိညာဉ်စွမ်းအားကိုလည်း အစွမ်းကုန် ဖြန့်ကြက်ကာ အစွမ်းထက်သော မိစ္ဆာသားရဲ ရှိ၊ မရှိ လိုက်လံရှာဖွေနေချေသည်။

“သူ့ကို ထပ်ပြီး လွတ်မြောက်ခွင့် ပေးလို့ မဖြစ်တော့ဘူး။ ရှေ့က ရှေးဟောင်းတောအုပ်ထဲမှာ ငါတို့ ဘယ်သူမှ မယှဉ်နိုင်တဲ့ အစွမ်းထက် မိစ္ဆာသားရဲ ရှိနေတယ်” ဟု မဟာအကြီးအကဲ တစ်ဦးက သတိပေးလိုက်သည်။

“မင်းတို့ နှစ်ယောက် ငါ့ကို ကူညီကြစမ်း။ ဒီအောက်တန်းကျတဲ့ ကောင်ကို ငါတို့ အတူတူ သတ်ပစ်ကြစို့” ဟု အလယ်တွင် ရှိနေသော မဟာအကြီးအကဲက အမိန့်ပေးလိုက်ချေသည်။

“တောက်... ငါတို့ တကယ်ပဲ အဲဒီတိုက်ကွက်ကို သုံးရတော့မှာလား” အခြား မဟာအကြီးအကဲ တစ်ဦးကမူ အနည်းငယ် ဝေခွဲမရ ဖြစ်နေပုံ ရပေသည်။

အဘယ်ကြောင့်ဆိုသော် ထိုတိုက်ကွက်ကို အသုံးပြုခြင်းသည် သူတို့အတွက် အလွန်ပင် ဝန်ထုပ်ဝန်ပိုး ဖြစ်စေနိုင်သောကြောင့် ဖြစ်သည်။ အဓိကအချက်မှာ ထိုတိုက်ကွက်သည် အသက်ဇီဝ သက်တမ်းကို ကုန်ခမ်းစေနိုင်ခြင်းပင် ဖြစ်ချေသည်။

“လုပ်စမ်းပါ။ ဒီကောင်ကို သတ်နိုင်သရွှေ့ ငါတို့ အသက် သက်တမ်း အနည်းငယ် ဆုံးရှုံးရတာ ဘာအရေးလဲ” ဟု အလယ်မှ မဟာအကြီးအကဲက ပြတ်သားစွာ ဆိုလေသည်။

ထိုသုံးဦးသည် ချက်ချင်းပင် ရပ်တန့်လိုက်ကြပြီး တစ်ဦးစီ၏ လက်ထဲမှ ကိုယ်တွင်းစွမ်းအင် မျှင်တန်းများ ထွက်ပေါ်လာကာ အချင်းချင်း ချိတ်ဆက်မိသွားသဖြင့် ကြီးမားလှသော စွမ်းအင်အလင်းတန်း ဖိအားကြီးတစ်ခု အောက်သို့ သက်ရောက်လာချေသည်။

ချင်ယွမ်ဖုန်းသည် ထိတ်လန့်သွားကာ အနောက်သို့ လှည့်ကြည့်လိုက်ရာ မဟာအကြီးအကဲ သုံးဦး စလုံး ရပ်တန့်နေသည်ကို တွေ့လိုက်ရသည်။

“သူတို့ ဘာလုပ်နေကြတာလဲ” ချင်ယွမ်ဖုန်းသည် သေခြင်းတရား၏ အရှိန်အဝါကို ခံစားလိုက်ရသဖြင့် လွန်စွာ တုန်လှုပ်ခြောက်ခြားသွားချေသည်။

သို့သော် ထိုသူသည် ရပ်တန့်မသွားဘဲ ရှေ့သို့သာ ဆက်လက် ပြေးနေမိသည်။

ထိုအချိန်တွင် မဟာအကြီးအကဲများ၏ အနောက်မှ အကြီးအကဲများနှင့် တပည့်များသည် ချင်ယွမ်ဖုန်းအား ဆက်လက် လိုက်လံဖမ်းဆီးရန်အတွက် ရှေ့သို့ အရင် ကျော်တက်သွားကြချေသည်။

မဟာအကြီးအကဲ သုံးဦးသည် အင်အားချင်း ပူးပေါင်းလိုက်ကြပြီးနောက် သူတို့ခန္ဓာကိုယ်အတွင်းရှိ ကိုယ်တွင်းစွမ်းအင်များသည် ထူးဆန်းစွာ စတင် လှုပ်ခတ်လာကာ ကောင်းကင်နှင့် မြေကမ္ဘာ၏ စွမ်းအားများနှင့် ချိတ်ဆက်မိသွားပြီး စကြဝဠာကြီးနှင့် ထူးခြားသော တုန်ခါမှုတစ်ခု ဖြစ်ပေါ်လာချေသည်။

ဤတိုက်ကွက်သည် မြူနှင်းဂိုဏ်းမှ ဖန်တီးထားသော လျှို့ဝှက်ပညာရပ် ဖြစ်ပြီး ဘုရင်နယ်ပယ် သုံးဦး ပူးပေါင်းရန် လိုအပ်ပေသည်။

ထိုပညာရပ်ကို အသုံးပြုရန်အတွက် ပစ်မှတ်သည် ကီလိုမီတာ အကွာအဝေးအတွင်း ရှိရမည် ဖြစ်ပြီး အနှောင့်အယှက် မရှိစေရဘဲ ပစ်မှတ်၏ ကျင့်စဉ်အဆင့်သည်လည်း သူတို့ထက် များစွာ နိမ့်ကျနေရမည် ဖြစ်ချေသည်။

အရေးကြီးဆုံးအချက်မှာ သူတို့သည် ပစ်မှတ်ထံမှ ပစ္စည်းတစ်ခုခုကို ရရှိထားရန် လိုအပ်ခြင်း ပင် ဖြစ်သည်။ ထိုပစ္စည်းသည် မည်သည့်အရာပင် ဖြစ်စေကာမူ ပစ်မှတ်၏ အချက်အလက်များ ပါဝင်နေလျှင် ရပေသည်။

ချင်ယွမ်ဖုန်းသည် ရှေးဟောင်းတောအုပ်အတွင်း ထွက်ပြေးနေစဉ် ဝတ်ဆင်ထားသော အဝတ်အစား၏ အနားစတစ်ခု စုတ်ပြဲကျန်ရစ်ခဲ့သည်ကို မဟာအကြီးအကဲ တစ်ဦးက မြင်တွေ့ခဲ့ခြင်း ဖြစ်ပေသည်။

ယခုအခါ သတ်မှတ်ချက် အားလုံး ပြည့်စုံသွားပြီ ဖြစ်ရာ ထိုလုပ်ကြံတိုက်ကွက်ကို အသုံးပြုရန် အချိန်ကျရောက်လာပြီ ဖြစ်ချေသည်။

ပုံမှန်အားဖြင့် ဤဗျူဟာသည် နှစ်ဦးနှစ်ဖက်လုံးကို ထိခိုက်ပျက်စီးစေသော နည်းလမ်းဟု ယူဆနိုင်ပေသည်။ အဘယ်ကြောင့်ဆိုသော် အသုံးပြုသူ သုံးဦး၏ သက်တမ်းကို နှစ်အနည်းငယ်မျှ ကုန်ခမ်းစေနိုင်သောကြောင့် ဖြစ်သည်။

သူတို့ထက် ကျင့်စဉ်အဆင့် များစွာ နိမ့်ကျသော သိုင်းပညာရှင်တစ်ဦးအတွက်မူ ယင်းသို့ ပြုလုပ်ရန် လုံးဝ မလိုအပ်ချေ။

သို့သော် သူတို့သည် ချင်ယွမ်ဖုန်းကို သတ်ပစ်ရန် အခိုင်အမာ ဆုံးဖြတ်ထားကြသဖြင့် အသက် သက်တမ်း နှစ်အနည်းငယ် ဆုံးရှုံးရပါစေဦးတော့... ထိုသူကို သတ်ဖြတ်ရန်သာ စိတ်ပိုင်းဖြတ်ထားကြချေသည်။

ဤမဟာအကြီးအကဲများသည် အသက်အရွယ် လွန်စွာ ကြီးရင့်နေကြပြီ ဖြစ်ရာ ကျန်ရှိသော သက်တမ်းအတွင်း ကျင့်စဉ်အဆင့် တိုးတက်အောင်မြင်ရန်အတွက် အပြင်သို့ပင် ခဲယဉ်းစွာ ထွက်လေ့ရှိကြသူများ ဖြစ်သည်။

ထိုမျှ အဖိုးတန်လှသော သက်တမ်းကို စတေး၍ ချင်ယွမ်ဖုန်းကို သတ်ရန် ကြိုးစားကြခြင်းကပင် ထိုသူသည် သူတို့အတွက် မည်မျှ အရေးပါကြောင်း ပြသနေချေသည်။

မကြာမီ ကောင်းကင်ယံ၌ ကြီးမားလှသော ဝဲကရက်ကြီးတစ်ခု ရုတ်တရက် ပေါ်ပေါက်လာသည်။ ယခင်က ချင်ဝူယန်း အသုံးပြုခဲ့သော ဖီးနစ်ငှက်၏ ပျက်သုဉ်းခြင်း နှင့် မတူသည်မှာ ယခု ဝဲကရက်ကြီးသည် မဟူရာ အဆင်း ရှိနေခြင်းပင် ဖြစ်ချေသည်။