အခန်း ၈၀

အခန်း (၈၀) အစားထိုး နည်းပြဆရာ။

ကျူးမင်လန်သည် ရှေးဟောင်းမျှော်စင်၏ အောက်ခြေတွင် ရပ်နေရင်း နန်လင်းရှာ ယခင် က ရေးဆွဲခဲ့သော ပန်းချီကားများကို ငေးကြည့်နေမိသည်။

သူမ ရေးဆွဲထားသည်မှာ 'ကြာပန်းနီမြို့' ဖြစ်ပြီး ရိုးရှင်းသည့် မှင်နက်ရည်ကိုသာ အသုံးပြု ထားသော်လည်း တစ်မြို့လုံးကို အသက်ဝင်လာစေသကဲ့သို့ ခံစားရ၏။ ဒုတိယမြောက် ပန်းချီကားမှာမူ အလွတ်ဖြစ်နေသော်လည်း စုတ်ချက်များကို ကြည့်ရသည်မှာ သူမ စီးနင်းသွားသော မီးလျှံချီလင်နဂါးနှင့် ဆင်တူသည့် ပုံရိပ်တစ်ခုကို ရေးဆွဲထားပုံရသည်။

တတိယမြောက် ပန်းချီကားမှာ ပို၍ပင် ထူးဆန်းနေသည်။

ကျူးမင်လန် မည်မျှပင် စူးစိုက်ကြည့်ပါစေ၊ သူမ မည်သည့်အရာကို ရေးဆွဲထားသည်ကို မခွဲခြားနိုင်ပေ။ ပန်းချီကားချပ်က သူ့မျက်လုံးရှေ့တွင် မြူခိုးများဖြင့် ဖုံးအုပ်ထားသကဲ့သို့ ရှိနေပြီး၊ ပိုမိုမြင့်မားသော နယ်ပယ်တစ်ခုသို့ ရောက်ရှိမှသာလျှင် ထိုပန်းချီကားထဲမှ အရာ ကို မြင်တွေ့နိုင်မည် ဖြစ်သည်။

"နဂါးပန်းချီဆရာ..." ကျူးမင်လန်က ရေရွတ်လိုက်သည်။

နန်လင်းရှာ၏ ကျင့်စဉ်အခြေခံမှာ ကျူးမင်လန် ထင်ထားသည်ထက်ပင် ပိုမိုမြင့်မားနေ၏။ ယခင်က လီယွင်ဇီ၏ ပျံသန်းနိုင်သော ဓားဖြင့် ကြယ်တာရာများကို ဖြတ်သန်းနိုင်သည့် စွမ်းအားက ကျူးမင်လန်ကို တုန်လှုပ်စေခဲ့သော်လည်း၊ သူမ၏ ညီမဖြစ်သူ နန်လင်းရှာ၏ ကျင့်စဉ်မှာလည်း ဤမျှ အစွမ်းထက်လိမ့်မည်ဟု မည်သူကရော တွေးမိပါမည်နည်း။

ကုလားထိုင်တွင် ထိုင်ရင်း ကျူးမင်လန်သည် ဘေးရှိ ရေခွက်ကို ကောက်ကိုင်လိုက်သည်။ သူ ခရီးနှင်လာသည်မှာ ကြာပြီဖြစ်၍ ရေတစ်ငုံမျှပင် မသောက်ရသေးပေ။

ကြည်လင်ရေမြစ်မြို့၏ အခြေအနေမှာ အလွန်ပင် ထူးဆန်းလှသည်။ ကျူးမင်လန် ရောက်ရှိသွားချိန်တွင် နည်းပြဆရာ သုံးဦးစလုံး သေဆုံးနေပြီ ဖြစ်သည်။ အကယ်၍ အကြီးအကဲ ထိုနည်းပြဆရာကသာ ဂျူနီယာညီမ ယန်၏ ကိစ္စဖြင့် အချိန် မနှောင့်နှေးခဲ့ပါ က ထိုနည်းပြဆရာလည်း အဆိပ်သင့်သေဆုံးသွားနိုင်ပေသည်။

သဘာဝအတိုင်းပင်, ကျူးမင်လန်ကိုယ်တိုင်လည်း စိုးရိမ်ပူပန်မှုများဖြင့် ပြည့်နှက်နေ၏။

ကံကောင်းထောက်မစွာဖြင့် သူသည် အနည်းငယ် နောက်ကျမှ ရောက်လာခဲ့ခြင်း ဖြစ်သည်။ မဟုတ်ပါက သူလည်း အဆိပ်သင့်သွားနိုင်ဖွယ် ရှိသည်။ သက်တမ်း နှစ်ပေါင်း သုံးထောင်ကျော်ရှိသော 'မိစ္ဆာဝိညာဉ်' တစ်ကောင်၏ လက်ချက်ဆိုလျှင် နည်းပြဆရာ အများစုမှာ အသက်ရှင်ရန် အခွင့်အရေးပင် ရှိမည်မဟုတ်ပေ...

ကျူးမင်လန် နားမလည်နိုင်သည်မှာ အဘယ်ကြောင့် ဤမျှ အဆင့်မြင့်သော မိစ္ဆာဝိညာဉ် တစ်ကောင်က ဆောင်းရာသီတွင် လူသားနယ်မြေများကို လှည့်လည် ဖျက်ဆီးနေသနည်း။ သို့မဟုတ် ဤမိစ္ဆာဝိညာဉ်မျိုးမှာ 'ညနွယ်ကြွက်ဝံပုလွေ မိစ္ဆာဝိညာဉ်ကဲ့သို့ပင် နဂါးထိန်း များကိုသာ ပစ်မှတ်ထား၍ လူသားများကို စားသုံးလေ့ရှိသည့် အမျိုးအစားများလား။

နည်းပြဆရာတစ်ဦး ဖြစ်ရခြင်းမှာလည်း အန္တရာယ်များလှသည်။ သူတို့၏ အဆင့်နှင့် မယှဉ် နိုင်သော ရန်သူများကို ရင်ဆိုင်နေရခြင်းဖြစ်ပြီး၊ နန်လင်းရှာအနေဖြင့် ဤအခြေအနေကို ထိန်းချုပ်နိုင်ပါ့မလားဟု သူ စိုးရိမ်မိသည်...

"အယ်... ဒီရေခွက်က ဘာလို့ ချိုနေတာလဲ..." ကျူးမင်လန် တစ်ငုံသောက်ကာ မြည်းကြည့် မိသည်။

ရုတ်တရက်၊ ဤရေခွက်မှာ သူ့အတွက် မဟုတ်ကြောင်း သူ သဘောပေါက်သွားသည်။ သို့သော် သူ ပင်ပန်းပြီး ရေငတ်နေသဖြင့် ကောက်ကိုင် သောက်လိုက်မိခြင်း ဖြစ်သည်။

တောင်းပန်ပါတယ်၊ တောင်းပန်ပါတယ်ဗျာ။

ကျူးမင်လန်က အလျင်အမြန် ပတ်ဝန်းကျင်ကို ကြည့်လိုက်ရာ မသုံးရသေးသည့် ဝါးခွက် တစ်ခုကို တွေ့လိုက်ရ၏။ ထို့နောက် အနီးရှိ စမ်းချောင်းသို့ သွားကာ ရေခပ်ပြီး ထပ်သောက်လိုက်သည်။

နောက်ဆုံး အသက်ရှူချောင်သွားချိန်တွင် တောင်တန်းတောအုပ်အထက် ကောင်းကင်ယံ ၌ 'နဂါးတစ်ပိုင်းငှက်ပျံ' များကို စီးနင်းထားသော လူစုတစ်စု ထွက်ပေါ်လာသည်။ သူတို့၏ အဝတ်အစားများမှာ ခမ်းနားလွန်းသဖြင့် ဆင်းရဲသည့် နဂါးထိန်းများနှင့် အဆင့် မတူ ကြောင်း သိသာသည်။

သူတို့သည် ရှေးဟောင်းမျှော်စင် မြေပြင်ပေါ်တွင် စနစ်တကျ ဆင်းသက်လာကြသည်။ အစပိုင်းတွင် သူတို့အားလုံးမှာ ရိုသေလေးစားပြီး သတိကြီးစွာ ထားဟန်ရှိသော်လည်း စားပွဲတွင် ထိုင်နေသူက ကျူးမင်လန် ဖြစ်နေသည်ကို မြင်လိုက်ရသည့်အခါ သူတို့၏ မျက်နှာများမှာ ဇဝေဇဝါ ဖြစ်သွားကြသည်။

"ဒီနည်းပြဆရာကို မေးပါရစေ၊ ဒီနေရာကို နန်မျိုးနွယ်စုက အစ်မလင်းရှာက တာဝန်ယူ ထားတာ မဟုတ်ဘူးလား" နန်မျိုးနွယ်စုမှ လူငယ်တစ်ဦးက မေးသည်။

"ကျူးမင်လန်လား……." နန်ရီက သူ့ဆီသို့ အလျင်အမြန် လျှောက်လာပြီး အံ့အားသင့် သော မျက်လုံးများဖြင့် ကြည့်လိုက်သည်။

ပန်းချီကားချပ်များ ရှိနေပြီး၊ မှင်စုတ်တံဘူးများ၊ နွေးထွေးစေရန် ပခုံးလွှမ်းအင်္ကျီပင် ချိတ်ဆွဲ ထားသေးသည်။ ဤနေရာကို နန်လင်းရှာ တာဝန်ယူထားသည်မှာ သေချာသည်။ သို့ဆို လျှင် ကျူးမင်လန်က ဘာကြောင့် ဤနေရာတွင် ရှိနေရသနည်း……။

"အော်၊ အော်... နန်လင်းရှာက ကျွန်တော့်ကို သူမအစား ဒီနေရာမှာ တာဝန်ယူပေးဖို့ ပြောသွားလို့ပါ" ကျူးမင်လန်က ရှင်းပြသည်။

နန်ရီက ကျူးမင်လန်ကို သံသယဖြင့် စိုက်ကြည့်လိုက်သည်။ မကြာသေးမီကပင် သူသည် လီယွင်ဇီနှင့် မိုးမခအုပ်ထဲတွင် လျှို့ဝှက် စကားပြောနေသည်ကို သူ မြင်ခဲ့ရသည်။ ယခု အခါတွင်မူ နန်လင်းရှာ၏ ပန်းချီရေးဆွဲရာ နေရာတွင် သူနှင့် ထပ်တွေ့ရပြန်သည်။ ထို့အပြင် ရှေးဟောင်းမျှော်စင်တွင် အခြားလူ မရှိသဖြင့် ဤနေရာမှာ လျှို့ဝှက်တွေ့ဆုံရန် နေရာကောင်းတစ်ခု ဖြစ်နေပေတော့သည်။

"မင်းက ကျူးမင်လန်ဆိုသူလား" ‘ငရဲခွေးနဂါး’ကို စီးထားသည့် လူငယ်၏ လေသံတွင် လှောင်ပြောင်မှုနှင့်အတူ အထင်သေးမှုတို့ ရောနှောနေသည်။

"ဟုတ်ပါတယ်၊ အခုတော့ ကျွန်တော်က 'ကြာပန်းနီမြို့' မှာ တာဝန်ကျတဲ့ အစားထိုး နည်းပြဆရာပါ။ ဘာကိစ္စများ ရှိလို့ပါလဲ၊ မြန်မြန်ပြောပါ" ကျူးမင်လန်က ပြောလိုက်သည်။

"ဟွန့်... နည်းပြဆရာနေရာ အစားထိုးပြီး မြို့ကို တာဝန်ယူထားရအောင် မင်းကိုယ်မင်း ဘယ်သူလို့ထင်နေလဲ" ငရဲခွေးနဂါး စီးထားသည့် လူငယ်က ကျူးမင်လန်ကို ပြင်းပြင်းထန် ထန် စက်ဆုပ် ရွံရှာနေဟန်ရှိသည်။

မကြာသေးခင်ကမှ ကျူးမင်လန်သည် ဤကဲ့သို့သော အကြောင်းမဲ့ ပစ်ပယ်ခြင်းမျိုးနှင့် ရင်းနှီးနေခဲ့ပြီ ဖြစ်သည်။ အထူးသဖြင့် 'ပထမဆုံး မြင်မြင်ချင်းမှာပင် ချစ်ခင်မြတ်နိုးမိခြင်း' နှင့် 'အပြန်အလှန် ချစ်ခင်ကြခြင်း' ဟူသော ကောလာဟလများ ပျံ့နှံ့နေသည့်အတွက် နန်မျိုးနွယ်စုတွင် ဤလူငယ်ကဲ့သို့ သူ့ကို အလွန်အမင်း မုန်းတီးနေသူများ များစွာ ရှိနေကြ သည်။

ကျူးမင်လန်ကမူ ဂရုမစိုက်ပေ။ သရဖူကို ဆောင်းလိုလျှင် ၎င်း၏ အလေးချိန်ကို ခံနိုင်ရည် ရှိရမည်။ မည်မျှ ပြင်းထန်သော မုန်တိုင်းများ တိုက်ခတ်ပါစေ၊ သူသည် ကျူးမင်လန်ပင် မဟုတ်ပါလော……

"ဒါဆို မင်းတို့ ပြောမှာလား၊ မပြောဘူးလား။ မပြောဘူးဆိုရင်လည်း ငါ့ရဲ့ ငြိမ်းချမ်းမှုကို မနှောင့်ယှက်ပါနဲ့" ကျူးမင်လန်က ဂရုမစိုက်ဘဲ ပြောလိုက်သည်။

"ကျွန်တော်တို့က အစ်မ လင်းရှာကို ရှာနေတာပါ" နန်မျိုးနွယ်စုမှ တည်ငြိမ်သည့် လူငယ် တစ်ဦးက ပြောသည်။

"သူမက သက်တမ်း နှစ်ပေါင်းသုံးထောင်ကျော်ရှိတဲ့ မိစ္ဆာဝိညာဉ်တစ်ကောင်ကို ဖြေရှင်းဖို့ သွားလိုက်တာမို့ ကျွန်တော်က ဒီမှာ အစားထိုး တာဝန်ယူပေးနေတာပါ" ကျူးမင်လန်က ရှင်းပြသည်။

"အစားထိုးတာတဲ့လား၊ ဟား... ဟား…၊ ဒီမှာ တာဝန်ကျတဲ့ နည်းပြဆရာအဖြစ် အစားထိုး ယူနိုင်တဲ့ အရည်အချင်းမျိုး မင်းမှာ ရှိမရှိ ငါကြည့်ချင်သေးတယ်။ နန်ရီ၊ ငါတို့ လိုက်နေတဲ့ မိစ္ဆာဝိညာဉ် အကြောင်းကို သူ့ကို ပြောပြလိုက်" ငရဲခွေးနဂါး စီးထားသူက ပြောလိုက် သည်။

"အဲဒီညီအစ်ကိုတွေကို အရင် စမ်းရေတွင်းနားမှာ နားခိုင်းလိုက်ပါ။ ကျွန်တော် ကျူးမင်လန် နဲ့ ဖြည်းဖြည်းချင်း စကားပြောပါ့မယ်" နန်ရီက သူ့အဖော်များထက် အဆင့်နိမ့်သည်ဟု ထင်ရသော်လည်း အရင်ကကဲ့သို့ မောက်မာခြင်း မရှိဘဲ ပြောလိုက်သည်။

လူအုပ်စုသည် စမ်းရေတွင်းဘက်သို့ သွားကာ ရေခပ်၍ သူတို့၏ 'နဂါးတစ်ပိုင်းငှက်ပျံ' များ ကို ရေတိုက်ကျွေးလိုက်သည်။

နန်ရီက ကျူးမင်လန်ကို ထူးဆန်းသော အမူအရာဖြင့် ကြည့်လိုက်သည်... အကယ်၍ ကျူးမင်လန်သည် လီယွင်ဇီနှင့် အပြန်အလှန် ချစ်ခင်မှု ရှိနေသည်ဆိုပါက၊ နန်ရီသည် ကျူးမင်လန်ကို 'ယောက်ဖ' ဟု ခေါ်ရတော့မည် ဖြစ်သည်။

အကယ်၍ ကျူးမင်လန်သာ နန်လင်းရှာနှင့်လည်း တစ်စုံတစ်ရာ ဆက်ဆံရေး ရှိနေဦးမည် ဆိုပါက ကျူးမင်လန်၏ ရှေ့တွင် နန်ရီသည် ခေါင်းမော့နိုင်တော့မည် မဟုတ်ဟု ခံစားလိုက် ရသည်။

"အဲ့ဒီနေ့က မိုးမခတောအုပ်ထဲမှာ တွေ့ခဲ့တာ တကယ်ပဲ အစ်မ လီယွင်ဇီရော ဟုတ်ရဲ့ လား" နန်ရီမှာ မရေမရာ ဖြစ်နေဆဲပင်။

တကယ်တော့ နန်ရီ၏ ပထမဆုံး အထင်မှာ ထိုလူမှာ နန်လင်းရှာ ဖြစ်သည်ဟု ထင်ခဲ့ခြင်း ဖြစ်သည်။ လီယွင်ဇီကို အကြိမ်ရေများစွာ မတွေ့ဖူးသော်လည်း သူမ၏ ဝမ်းကွဲအစ်မဖြစ်သူ နန်လင်းရှာကို မှားယွင်းရန် အကြောင်းမရှိပေ။ အထူးသဖြင့် နန်လင်းရှာ၏ ထူးခြားသော ဝတ်စားဆင်ယင်မှုကို သူကောင်းစွာ မှတ်မိနေသည်။

"မင်းအစ်မအကြောင်းကို မင်းက ငါ့ကို လာမေးနေတာလား" ကျူးမင်လန်က စိတ်အနှောင့် အယှက် ဖြစ်စွာဖြင့် ပြန်ပြောလိုက်သည်။

"ဒါဆိုရင် အစ်မ လီယွင်ဇီ မဟုတ်ဘူးပေါ့။ ကျွန်တော်လည်း အဲ့လိုပဲ ထင်တာပါ၊ အစ်မ လီယွင်ဇီက ကျွန်တော့်နာမည်ကိုတောင် မှတ်မိမှာ မဟုတ်ဘူးလေ" နန်ရီက ရေရွတ်လိုက် သည်။

"တကယ်တော့ မင်းအစ်မနဲ့ ပတ်သက်ပြီး ငါ့မှာလည်း မေးစရာ ကိစ္စလေးတွေ ရှိနေလို့..."

"မိစ္ဆာဝိညာဉ် အကြောင်းပဲ ပြောရအောင်။ ကျူးမင်လန်၊ မင်းလည်း မြင်ခဲ့မှာပါ၊ နန်ကျောက်ဘင်းက မင်းအပေါ် အလွန်ပဲ မုန်းတီးနေတာ။ သူက လီယွင်ဇီနဲ့ ပိုပြီး နီးကပ်နိုင် ဖို့ အကြောင်းပြချက် အမျိုးမျိုးရှာပြီး လီမျိုးနွယ်စုဆီကို အမြဲသွားနေကျပဲ..." နန်ရီက ပြောသည်။

"ငါ သိပါတယ်၊ သူက ငါ့ကို မနာလိုဖြစ်နေတာပါ" ကျူးမင်လန်က ဆိုသည်။

"အခုဆိုရင် 'ဘိုးဘေးနဂါး မြို့တော်' မှာ မင်းကို မုန်းတီးတဲ့လူ မရှိသလောက်ပဲ" နန်ရီက ပြောသည်။

"ကောင်းပြီ၊ မိစ္ဆာဝိညာဉ် အကြောင်းပဲ ပြောကြရအောင်။ တကယ်လို့ ဒါက သက်တမ်း နှစ်ပေါင်းနှစ်ထောင်ကျော်ရှိတဲ့ မိစ္ဆာဝိညာဉ်ဆိုရင်တော့ မင်းတို့ စွန့်လွှတ်လိုက်တာ ပိုကောင်းမယ်။ မကြာသေးခင်ကမှ နည်းပြဆရာ သုံးဦးတောင် ဒီမိစ္ဆာဝိညာဉ်ရဲ့ လက်ချက် နဲ့ သေဆုံးသွားခဲ့တာ" ကျူးမင်လန်က သတိပေးလိုက်သည်။

နန်ရီမှာ ထိတ်လန့်သွားသည်။ ဤမိစ္ဆာဖမ်းဆီးသည့် ခရီးစဉ်တွင် နည်းပြဆရာများ၊ အထူး သဖြင့် တစ်ဖွဲ့တည်းမှ နည်းပြဆရာ သုံးဦးအထိ အသက်ဆုံးရှုံးလိမ့်မည်ဟု သူ လုံးဝ မမျှော် လင့်ထားခဲ့ပေ။

စာစဉ် (၈) ပြီးပါပြီ။

ဘာသာပြန်သူ နေဇင်။