အခန်း ၁၃၂

အခန်း (၁၃၂) ဧကရာဇ်နင်၏ ဖိတ်ကြားချက်၊ ကျန်းယွမ်မင်းသား၏ သတ်ဖြတ်လိုစိတ်

ဝင်ရောက်လာသောလူကို မြင်လိုက်ရသောအခါ ရှုချွမ်းက ဤသူမှာ ခေါင်းဆောင် နင် ဖြစ်ကြောင်း သိရှိလိုက်သည်။

ထို့နောက် သူက အပြုံးဖျော့ဖျော့ဖြင့် ပြောလိုက်သည်။ "ကျွန်တော်က ဒီနေရာကို ပစ္စည်းအချို့ လေလံဆွဲဖို့ပဲ လာခဲ့တာပါ၊ ခင်ဗျားတို့ ကုန်သွယ်ရေးအဖွဲ့က ဒီလောက်အထိ ခမ်းနားကြီးကျယ်တဲ့ အစီအစဉ်မျိုး လုပ်ထားလိမ့်မယ်လို့ မထင်ထားမိဘူး"

နင်ဟောက်ရွှမ်းက ဤစကားကို ကြားသောအခါ ပြုံးလျက် ပြောလာခဲ့သည်။ "သူတော်စင်သားတော် ရှုချွမ်း ကျွန်တော်တို့ရဲ့ ဝမ်ပေါင်မျှော်စင်ကို ကြွရောက်ချီးမြှင့်ပေးတာက ဝမ်ပေါင်မျှော်စင်အတွက် ဂုဏ်ယူစရာတစ်ခု ဖြစ်ပါတယ်ခင်ဗျာ"

"ဒီနေ့ သူတော်စင်သားတော် ရှုချွမ်း ကျွန်တော့်ရဲ့ ဝမ်ပေါင်မျှော်စင်မှာ သုံးစွဲခဲ့သမျှ ကုန်ကျစရိတ်အားလုံးကို.... ကျွန်တော့်အကောင့်ထဲကပဲ စိုက်ထုတ်ပေးပါ့မယ်"

ပြောပြီးသည်နှင့် နင်ဟောက်ရွှမ်းက အစေခံမိန်းကလေးတစ်ဦးထံမှ သိုလှောင်လက်စွပ်တစ်ကွင်းနှင့် ကျောက်စိမ်းပြားတစ်ခုကို လှမ်းယူကာ ရှုချွမ်းထံသို့ ကမ်းပေးလိုက်သည်။

သိုလှောင်လက်စွပ်အတွင်း၌ ရှုချွမ်း ဤခရီးစဉ်အတွင်း သုံးစွဲခဲ့သော ယွမ်ကျောက်တုံးများအားလုံးကို တစ်ပြားတစ်ချပ်မျှ မကျန်ဘဲ ပြန်လည်ထည့်သွင်းပေးထားခြင်း ဖြစ်၏။

ထို့ပြင် ထိုကျောက်စိမ်းပြားမှာမူ အစောပိုင်းက ရှုချွမ်းနှင့် ချန်ဖုန်းတို့ လုယူခဲ့ကြသော ကျင့်စဉ်ကျောက်စိမ်းပြားပင် ဖြစ်သည်။

ဤသည်ကို မြင်လိုက်ရသောအခါ ရှုချွမ်းသည်လည်း ငြင်းပယ်ခြင်းမပြုတော့ဘဲ ပစ္စည်းနှစ်ခုစလုံးကို ပေါ့ပေါ့ပါးပါးပင် လက်ခံလိုက်တော့သည်။

အလကားရသည့် ယွမ်ကျောက်တုံးများကို ဘာဖြစ်လို့ လက်မခံဘဲ နေပါမည်နည်း။

ထို့အပြင် ဤသည်မှာ တစ်ဖက်လူက သဘာဝကျကျပင် မိတ်ဆွေဖွဲ့ရန် စေတနာပြသနေခြင်း ဖြစ်ရာ အကယ်၍ သူသာ လက်မခံခဲ့ပါက ထိုသူတို့၏ မျက်နှာကို အနည်းငယ် ပျက်စီးစေရာ ရောက်ပေလိမ့်မည်။

ဝမ်ပေါင်မျှော်စင်ကဲ့သို့သော ကုန်သွယ်ရေးအဖွဲ့ကြီးနှင့် ရင်ဆိုင်ရချိန်တွင် မည်သည့်အသိဉာဏ်ရှိသူမျှ ထိုသူတို့ကို လူပုံအလယ်၌ မျက်နှာပျက်အောင် ပြုလုပ်မည် မဟုတ်ချေ။

ရှုချွမ်းက "ခေါင်းဆောင် နင်ကို အများကြီး အကုန်အကျများအောင် လုပ်မိသလို ဖြစ်သွားပြီထင်တယ်"

"ကိစ္စမရှိပါဘူး... ဒါက ငွေကြေး နည်းနည်းလေး သာ ဖြစ်လို့ ကျွန်တော့်ရဲ့ ဝမ်ပေါင်မျှော်စင် ကုန်သွယ်ရေးအဖွဲ့အနေနဲ့ ဒါကို စိတ်ထဲ သိပ်မထားပါဘူး" နင်ဟောက်ရွှမ်းက သူ၏ လက်ကို ဝေ့ယမ်းလိုက်ပြီး မူလကျောက်တုံး သန်းပေါင်းများစွာကို စိုးစဉ်းမျှ ဂရုမစိုက်ကြောင်း ပြသလိုက်သည်။

ဝမ်ပေါင်မျှော်စင် ကုန်သွယ်ရေးအဖွဲ့၏ လစဉ် ငွေလည်ပတ်မှုနှုန်းမှာ ကြောက်မက်ဖွယ်ရာ အဆင့်သို့ ရောက်ရှိနေပြီး သုံးလတစ်ကြိမ် ကျင်းပသော ၁၀ ထပ်မြောက် ဈေးပွဲတော်ကမူ ဝမ်ပေါင်မျှော်စင်အတွက် ပိုမိုကြီးမားသော အမြတ်အစွန်းများကို သယ်ဆောင်လာပေးခြင်း ဖြစ်သည်။

ယွမ်ကျောက်တုံး သန်းပေါင်းများစွာမျှဖြင့် ကောင်းမွန်သော ဆက်ဆံရေးတစ်ခုကို တည်ဆောက်နိုင်မည်ဆိုပါက ဘာဖြစ်လို့ မလုပ်ဘဲ နေပါမည်နည်း။

"ဒီအဖိုးကြီးအနေနဲ့ သူတော်စင်သားတော် ရှုချွမ်းကို မေးမြန်းချင်တဲ့ မေးခွန်းတစ်ခုတော့ ရှိပါတယ်" နင်ဟောက်ရွှမ်းက ရှုချွမ်းကို မေးလိုက်၏။

"ဘာမေးခွန်းလဲခင်ဗျာ အားမနာတမ်း ပွင့်ပွင့်လင်းလင်း မေးမြန်းနိုင်ပါတယ်။ ကျွန်တော် ဖြေနိုင်တာမှန်သမျှ ဖြေပေးပါ့မယ်" ရှုချွမ်းက အနည်းငယ် ဝေခွဲမရ ဖြစ်သွားသည်။

"၁၀ ထပ်မြောက် ဈေးပွဲတော်အတွင်းမှာ... မင်းက မိမိရဲ့ သရုပ်မှန် ကို ဖုံးကွယ်ထားတဲ့ အခြားသိုင်းပညာရှင်တစ်ယောက်ကို ဆက်တိုက် ဖိနှိပ်တိုက်ခိုက်နေတာကို ကျွန်တော် မြင်ခဲ့ရတယ်။ အဲဒါ ဘာဖြစ်လို့လဲဆိုတာ သိခွင့်ရှိမလား" နင်ဟောက်ရွှမ်းက သူ၏ စိတ်ထဲမှ သံသယကို ထုတ်ဖော်ပြောဆိုလိုက်သည်။

ရှုချွမ်း ၁၀ ထပ်မြောက် ဈေးပွဲတော်သို့ ဝင်ရောက်လာကတည်းက သူသည် ထိုသူကို စောင့်ကြည့်နေခဲ့ခြင်း ဖြစ်သည်။

သူက ရှုချွမ်းနှင့် ချန်ဖုန်းတို့၏ ထိပ်တိုက်ရင်ဆိုင်မှုများကို ကိုယ်တိုင် မြင်တွေ့ခဲ့ရသည်။

ကျိုးကြောင်းဆီလျော်စွာ ပြောရမည်ဆိုပါက ဤသည်မှာ ရှုချွမ်းအနေဖြင့် မဟာ‌ဝေဧကရာဇ်မင်းဆက်၏ မြို့တော်သို့ ပထမဆုံးအကြိမ် ရောက်ရှိလာခြင်း ဖြစ်သဖြင့် မည်သည့်ရန်သူမျှ မရှိသင့်ချေ။

သို့သော်လည်း လက်တွေ့မြေပြင်တွင်မူ ရှုချွမ်းက ချန်ဖုန်းကို တမင်သက်သက် ပစ်မှတ်ထား၍ ဖိနှိပ်နေခဲ့သကဲ့သို့ ဖြစ်နေသည်။

ထို့ကြောင့်ပင် သူ့တွင် ဤသံသယ ပေါ်ပေါက်လာခဲ့ရခြင်း ဖြစ်၏။

ထိုသူက ရှုချွမ်းကို မည်သို့ ပြစ်မှားမိသဖြင့် ရှုချွမ်းကိုယ်တိုင် လှုပ်ရှားကာ အတားအဆီးများ ဖန်တီးပေးနေရသည်ကိုလည်း သူ စူးစမ်းချင်နေခဲ့သည်။

"ရိုးရှင်းတဲ့ ပဋိပက္ခလေးတစ်ခုပါပဲ" ရှုချွမ်းက ပြုံးလိုက်ပြီး အများကြီး ထပ်မံ၍ မပြောတော့ ပေ။

သူက ချန်ဖုန်းမှာ ကံကြမ္မာ၏ ဇာတ်လိုက်ဖြစ်နေကြောင်းကို အခြားသူများအား ထုတ်ဖော်ပြောဆို၍ မရနိုင်ပေ။

ထို့အပြင် သူ ထုတ်ပြောလျှင်ပင် မည်သူမျှ ယုံကြည်ကြမည် မဟုတ်ပေ။

သို့သော်လည်း လက်တွေ့တွင်မူ ရှုချွမ်း၏ ပြောကြားချက်မှာ မှားယွင်းခြင်း မရှိ ပေ။

အကယ်၍ ကိစ္စများက အနာဂတ်အတိုင်း အမှန်တကယ် ဖွံ့ဖြိုးတိုးတက်လာခဲ့မည်ဆိုပါက ဗီလိန်ဇာတ်ညွှန်းကို ပိုင်ဆိုင်ထားသော ဤဇာတ်လိုက်မှာ အစွမ်းထက်လာပြီး သောင်းကျန်းဖျက်ဆီးပေလိမ့်မည်။

ဤသည်က အရှေ့ဘက်နယ်မြေရှိ သိုင်းပညာရှင်များနှင့် ရွှမ်းထျန်းတိုက်ကြီးတစ်ခုလုံးရှိ လူများနှင့်ပါ ပဋိပက္ခ ဖြစ်ပွားရန် သေချာပေါက် ဦးတည်သွားပေလိမ့်မည်။

ထို့ကြောင့် ရှုချွမ်း၏ စကားလုံးများမှာ မသင့်လျော်ခြင်း မရှိချေ။

ထို့အပြင် ရှုချွမ်းအနေဖြင့် အထွတ်အထိပ်သို့ ရောက်ရှိရန်အတွက်မူ ဤကဲ့သို့သော ဇာတ်လိုက်ပုံစံစနစ် ပိုင်ဆိုင်ထားသူများနှင့် ဆန့်ကျင်ဘက် အနေအထားတွင် သေချာပေါက် ရှိနေရမည် ဖြစ်သည်။

သူတို့ ကိုယ်ပေါ်တွင် ရှိနေသော ဘဝဇာတ်ညွှန်းများမှာလည်း ရှုချွမ်းအတွက် လိုအပ်သောအရာများ ဖြစ်၏။

ထို့ကြောင့် သူတို့အကြားမှ ပဋိပက္ခမှာ သဘာဝအလျောက် ပေါ်ပေါက်လာခြင်း ဖြစ်သည်။

ပဋိပက္ခကို ဖြေရှင်းရန် အကောင်းဆုံးနည်းလမ်းမှာ ပဋိပက္ခ၏ မြစ်ဖျားခံရာ ဇာစ်မြစ်ကို အဖူးအငုံဘဝမှာတင် ဆိတ်သုဉ်းအောင် ချေမှုန်းပစ်ရန် ဖြစ်ပေသည်။

သို့သော်လည်း ထိုချန်ဖုန်းမှာ အဆုံးတွင်မူ နက်ရှိုင်းလှသော ကံတရားများရှိသည့် ကံကြမ္မာ၏ ဇာတ်လိုက်တစ်ဦး ဖြစ်နေဆဲ ဖြစ်သည်။

ဘေးကင်းစိတ်ချရစေရန်အတွက် ရှုချွမ်းက အဆင်ခြင်မဲ့စွာ လှုပ်ရှားရန် စိတ်ကူးမရှိချေ။

ယနေ့တွင် ချန်ဖုန်း၏ အခွင့်အလမ်းများကို တစ်ခုပြီးတစ်ခု ကြားဖြတ်လုယူနိုင်ခဲ့ခြင်းကြောင့် သူကအလွန်အမင်း စိတ်ကျေနပ်နေခဲ့ပြီ ဖြစ်သည်။

ချန်ဖုန်း၏ နောက်ခံ ကို အလုံးစုံ စုံစမ်းစစ်ဆေးပြီးသည်နှင့်တစ်ပြိုင်နက် သူက ထိုသူကို တစ်ချက်တည်းဖြင့် သေချာပေါက် အပြီးသတ် သတ်ဖြတ်ပစ်မည် ဖြစ်၏။

ရှုချွမ်း၏ ဝတ်ကျေတန်းကျေ စကားလုံးများကို ကြားလိုက်ရသောအခါ နင်ဟောက်ရွှမ်းက ခေါင်းကို အနည်းငယ် ညိတ်လိုက်ပြီး ထိုအကြောင်းအရာကို ဆက်လက်၍ မဆွေးနွေးတော့ဘဲ ရပ်တန့်လိုက်သည်။

ထို့နောက် သူက ဆက်ပြောလာခဲ့သည်။ "ကျွန်တော် သူတော်စင်သားတော် ရှုချွမ်းကို ဆက်ပြီး နေခိုင်းရတာကတော့ ဆွေးနွေးစရာ ကိစ္စအချို့ ရှိနေလို့ ဖြစ်ပါတယ်"

"ဘာကိစ္စများလဲ" ရှုချွမ်းက မေးလိုက်၏။

"သူတော်စင်သားတော် ရှုချွမ်း... ကျွန်တော်တို့ မဟာဝေဧကရာဇ်မင်းဆက်ရဲ့ 'ဧကရာဇ် နင်' က မင်း ကျွန်တော်တို့ရဲ့ မြို့တော်ကို ရောက်ရှိနေတာကို သိရှိသွားပြီး မင်းကို နန်းတော်ထဲကို ဖိတ်ကြားဖို့အတွက် ဒီအဖိုးကြီးကို အထူး စေလွှတ်လိုက်တာ "

"ဧကရာဇ်နင်က သူတော်စင်သားတော် ရှုချွမ်းကို ဧည့်ခံဖို့အတွက် တော်ဝင်ပွဲတော်တစ်ခုကို ပြင်ဆင်ထားပြီးပါပြီ၊ သူတော်စင်သားတော် ရှုချွမ်းအနေနဲ့ တက်ရောက်ပေးနိုင်မလား"

ဧကရာဇ်နင်အကြောင်းကို ပြောဆိုချိန်တွင် နင်ဟောက်ရွှမ်းက သူ၏ အနေအထားကို သိသိသာသာ နှိမ့်ချလိုက်သည်။

သူက ဧကရာဇ်နင်၏ အကြီးအကဲတစ်ဦး ဖြစ်နေလျှင်ပင် ထိုသူ့အပေါ်၌ လွန်စွာ ရိုသေလေးစားမှု ရှိနေဆဲ ဖြစ်၏။

"အို ကျွန်တော့်ကို ဖိတ်တာ ဟုတ်လား"

ဤသည်က ရှုချွမ်းကို အနည်းငယ် အံ့အားသင့်သွားစေခဲ့သည်။ အမှန်အတိုင်း ပြောရလျှင် သူက ထိုက်ယိမြင့်မြတ်နယ်မြေ၏ နဝမမြောက် 'သူတော်စင်သားတော်အဆင့် ' မျှသာ ဖြစ်သည်။

သူ၏ အဆင့်အတန်းမှာ မြင့်မြတ်လှသည် ဆိုသော်လည်း ၎င်းမှာ သာမန်သိုင်းပညာရှင်များအတွက်သာ ဖြစ်၏။

'နင်ချန်ထျန်း ' ကဲ့သို့သော အင်ပါယာနိုင်ငံတော်တစ်ခု၏ အုပ်ချုပ်သူဖြစ်ပြီး 'အထွတ်အထိပ် ကောင်းကင်ဘုရင်နယ်ပယ်' သိုင်းပညာ ရှင်ကြီးတစ်ဦး ဖြစ်သူအနေဖြင့် သူ့ကို ဖားယားရန် မလိုအပ်ချေ။

ထို့ကြောင့် ရှုချွမ်းမှာ ဤအချက်ကြောင့် အံ့ဩသွားခဲ့ရခြင်း ဖြစ်သည်။

"ကောင်းပါပြီ... ကျွန်တော် အခုပဲ သွားပါ့မယ်" ရှုချွမ်းက ခေါင်းညိတ်လျက် သဘောတူလိုက်တော့သည်။

"သူ‌တော်စင် သားတော် ရှု... ကျေးဇူးပြုပြီး ကြွပါ" နင်ဟောက်ရွှမ်းက ဖိတ်ကြားသည့် လက်ဟန် ပြုလုပ်လိုက်ပြီး ရှုချွမ်းကို ရှေ့မှ လျှောက်လှမ်းစေခဲ့သည်။

လူစုသည် ဝမ်ပေါင်မျှော်စင်အတွင်းမှ ထွက်ခွာလာခဲ့ကြသည်။

ဝမ်ပေါင်မျှော်စင်၏ အပြင်တွင်မူ ဆန်းပြားခမ်းနားလှသော ရထားလုံးတစ်စီးက စောင့်ဆိုင်းနေခဲ့ပြီး ၎င်း၏ ဘေးတစ်ဖက်တစ်ချက်စီတွင် သံချပ်ကာဝတ် စစ်သည်တော် အဖွဲ့နှစ်ဖွဲ့က ခြံရံထားကြသည်။

ထိုစစ်သည်တော်များထံမှ ပြင်းထန်လှသော အော်ရာ များ ထွက်ပေါ်နေခဲ့၏။

တစ်ဦးချင်းစီမှာ 'နတ်ဘုရားစွမ်းအားနယ်ပယ် သိုင်းပညာရှင်' များ ဖြစ်ကြသည်။

'ဒီစစ်သည်တော်တွေက... မဟာဝေဧကရာဇ်မင်းဆက်ရဲ့ ကျော်ကြားလှတဲ့ 'တော်ဝင်သက်တော်စောင့်တပ်ဖွဲ့ ' တွေလား' ရှုချွမ်း၏ စိတ်ထဲတွင် လှုပ်ခတ်သွားခဲ့ရသည်။

မဟာဝေ တော်ဝင်သက်တော်စောင့်တပ်ဖွဲ့၏ ဂုဏ်သတင်းမှာ အရှေ့ဘက်နယ်မြေတစ်ခုလုံးတွင် ကျော်ကြားလှပေသည်။

တပ်မတော်အတွင်းရှိ စစ်သည်တော်အားလုံးမှာ နတ်ဘုရားစွမ်းအားနယ်ပယ် သို့မဟုတ် ၎င်းထက်မြင့်မားသော သိုင်းပညာရှင်များ ဖြစ်ကြသည်။

ဤစစ်သည်တော်များက စစ် အစီအရင်ကို ဖွဲ့စည်းနိုင်ကြပြီး မိမိတို့ထက် ကျင့်ကြံခြင်းနယ်ပယ် တစ်ဆင့်မြင့်မားသော ရန်သူနှင့် ရင်ဆိုင်ရလျှင်ပင် တိုက်ခိုက်နိုင်စွမ်း ရှိကြပေသည်။

"ခေါင်းဆောင် နင်၊ သူတော်စင်သားတော် ရှု... ကျေးဇူးပြုပြီး ကြွပါ" တပ်မှူးဖြစ်သူ စစ်သည်တော်က ရှုချွမ်းနှင့် နင်ဟောက်ရွှမ်းတို့ ထွက်လာသည်ကို မြင်သောအခါ ရထားလုံးပေါ်မှ ဆင်းသက်လိုက်ပြီး ထိုသူနှစ်ဦးကို ရထားလုံးအခန်းအတွင်းသို့ ရိုသေစွာဖြင့် လမ်းညွှန်ပေးခဲ့သည်။

ရှုချွမ်းနှင့် ရင်ဆိုင်ရချိန်တွင် ထိုစစ်သည်တော်၏ မျက်နှာထက်၌ ကြည်ညိုလေးစားသည့် အရိပ်အယောင်များ ပေါ်ထွက်နေခဲ့သည်။

ရှုချွမ်း၏ လုပ်ရပ်များမှာ အရပ်ရပ်သို့ ကျယ်ပြန့်စွာ ပျံ့နှံ့နေခဲ့ပြီ ဖြစ်ကာ သူ၏ 'နိဗ္ဗာနနယ်ပယ် အဆင့် ၂ ' စွမ်းအားဖြင့် 'ကမ္မနယ်ပယ် ပါရမီရှင်အများအပြား' ကို အောင်မြင်စွာ အနိုင်ယူနိုင်ခဲ့သော အစွမ်းက ထိုသူ၏ လေးစားမှုကို ရရှိစေခဲ့ခြင်း ဖြစ်သည်။

"ခေါင်းဆောင် နင်... သူတို့က မဟာဝေ တော်ဝင်သက်တော်စောင့်တပ်ဖွဲ့ဝင်တွေလား" ရထားလုံးအတွင်း၌ ထိုင်နေရင်း ရှုချွမ်းက နင်ဟောက်ရွှမ်းကို မေးလိုက်သည်။

"မှန်ပါတယ်... သူတို့က မဟာဝေ တော်ဝင်သက်တော်စောင့်တပ်ဖွဲ့ဝင်တွေဖြစ်ပြီး မဟာ‌ဝေဧကရာဇ်မင်းဆက် ရဲ့ အင်အားအကောင်းဆုံး တပ်မတော်တွေထဲက တစ်ခု ဖြစ်ပါတယ်"

နင်ဟောက်ရွှမ်းက ခေါင်းကို အနည်းငယ် ညိတ်လိုက်ပြီးနောက် ပြုံးလျက် ပြောလာခဲ့သည်။

"ဒီတစ်ကြိမ်မှာတော့ ကျွန်တော်က မင်းရဲ့ ဂုဏ်သိက္ခာကြောင့် အကျိုးအမြတ်ရရှိတာ ။ ပုံမှန်ဆိုရင်တော့ ကျွန်တော် နန်းတော်ထဲကို ဝင်ရင်တောင်မှ ကိုယ်တိုင် လမ်းလျှောက်ဝင်ရတာ ဖြစ်ပြီး ဒီလို ရထားလုံးစီးခွင့်ရဖို့ဆိုတာ ဝေးလှပါသေးတယ်"

"ဒါ့အပြင်... ဒီရထားလုံးကို ဧကရာဇ်နင်ကိုယ်တိုင် သင့်အတွက် အထူး ပြင်ဆင်ပေးထားတာ "

မကြာမီအချိန်အတွင်းမှာပင် ရှုချွမ်းနှင့် လူစုသည် မဟာဝေ တော်ဝင်နန်းတော်သို့ ရောက်ရှိလာခဲ့ကြတော့သည်။

တော်ဝင်နန်းတော်မှာ ကြီးကျယ်ခမ်းနားလှပြီး နန်းဆောင်များမှာ မြင့်မားစွာ တည်ရှိနေကြကာ ခံ့ညားထူးကဲလှပေသည်။

ကောင်းကင်ယံတွင်မူ ကာကွယ်ရေး အစီအရင်တစ်ခုက တော်ဝင်နန်းတော်တစ်ခုလုံးကို လွှမ်းခြုံထားပြီး မည်သူမဆို အတင်းအကျပ် ကျူးကျော်ဝင်ရောက်ရန် ကြိုးပမ်းပါက သေချာပေါက် နှိမ်နင်းခြင်း ခံရပေလိမ့်မည်။

ရှုချွမ်းနှင့် နင်ဟောက်ရွှမ်းတို့က ရထားလုံးပေါ်မှ ဆင်းသက်လိုက်ကြပြီး တော်ဝင်သက်တော်စောင့်တပ်ဖွဲ့ဝင်များ၏ ခြံရံမှုဖြင့် တော်ဝင်နန်းတော်အတွင်းသို့ လှမ်းဝင်ခဲ့ကြသည်။

"ဟင်"

နန်းတော်အတွင်းသို့ လှမ်းဝင်လိုက်သည်နှင့်တစ်ပြိုင်နက် ရှုချွမ်းက အတွင်း၌ လူသုံးဦး ကြိုတင်ရောက်ရှိနေသည်ကို ရှာဖွေတွေ့ရှိလိုက်သည်။

ရွှေရောင်ပလ္လင်ထက်တွင် နက်မှောင်သော နဂါးဝတ်ရုံကို ဝတ်ဆင်ထားသော သက်လတ်ပိုင်းအရွယ် အမျိုးသားတစ်ဦးက တည်ငြိမ်စွာ ထိုင်နေခဲ့သည်။

သူ၏ ကိုယ်ပေါ်မှ အဆုံးမရှိသော အော်ရာ များနှင့် အထက်လူကြီးတစ်ဦး၏ နတ်ဘုရားအာဏာစက်များ ထွက်ပေါ်နေခဲ့၏။

ဤလူမှာ လက်ရှိ မဟာဝေမင်းဆက်၏ ဧကရာဇ် 'နင်ချန်ထျန်း ' ဖြစ်ပေလိမ့်မည်။

နင်ချန်ထျန်း၏ အောက်ဘက်တွင်မူ လွှမ်းမိုးချုပ်ကိုင်ထားသော မိစ္ဆာချီ များ ပိုင်ဆိုင်ထားသည့် သက်လတ်ပိုင်းအရွယ် အမျိုးသားတစ်ဦး မတ်တပ်ရပ်နေခဲ့သည်။

ဤလူနှင့် ရင်ဆိုင်ရချိန်တွင် ရှုချွမ်း၏ စိတ်ထဲ၌ သတိထားမှုများ မြင့်တက်လာခဲ့ရသည်။

အဘယ်ကြောင့်ဆိုသော် သူ ဤနန်းတော်အတွင်းသို့ လှမ်းဝင်လိုက်သည်နှင့်တစ်ပြိုင်နက် မိမိကို လွှမ်းခြုံထားသော အားနည်းလှပြီး သတိပြုမိရန် ခက်ခဲလှသည့် သတ်ဖြတ်လိုစိတ်တစ်ခုကို သူ အာရုံခံမိလိုက်ခြင်းကြောင့် ဖြစ်၏။

ထိုသတ်ဖြတ်လိုစိတ်မှာ ခဏမျှသာ ဖြတ်သန်းသွားပြီး လျင်မြန်စွာ ပျောက်ကွယ်သွားခဲ့သော်လည်း ရှုချွမ်းကမူ ၎င်းကို ထက်မြက်စွာဖြင့် သတိပြုမိလိုက်ဆဲ ဖြစ်သည်။

ရှုချွမ်း၏ စိတ်ထဲတွင် လှုပ်ခတ်သွားခဲ့ပြီး တစ်ဖက်လူ၏ သရုပ်မှန် ကို လျင်မြန်စွာ ခန့်မှန်းလိုက်တော့သည်။

နင်ချန်ထျန်း၏ အောက်တွင် မတ်တပ်ရပ်နိုင်ပြီး မိမိအပေါ်၌ သတ်ဖြတ်လိုစိတ်များ ထားရှိနိုင်သောသူဟူ၍ သူ တစ်ဦးတည်းသော သားဖြစ်သူကို သတ်ဖြတ်ခဲ့ဖူးသည့် 'ကျန်းယွမ်မင်းသားကြီး ' မှတစ်ပါး အခြားသူ ရှိနိုင်မည်မဟုတ်ချေ။

အဆုံးတွင်မူ ဤသည်မှာ ရှုချွမ်းအနေဖြင့် မဟာဝေဧကရာဇ်မင်းဆက်၏ မြို့တော်သို့ ပထမဆုံးအကြိမ် ရောက်ရှိလာခြင်း ဖြစ်ပေသည်။