အခန်း ၁၂

အခန်း (၁၂) အစီအစဉ်သစ်

ဆွန်ဖုန်းသည် တောင်တရုတ်ပင်လယ်သို့ ရောက်ရှိပြီးနောက် ပတ်ဝန်းကျင် တစ်ဝိုက်တွင် အတန်ကြာ လှည့်လည်ကြည့်ရှုရာ လွန်စွာ အံ့အားသင့်သွားမိသည်။ ဤပင်လယ်ပြင်ကြီး၏ အောက်ခြေတွင် သယံဇာတများ အမှန်တကယ်ပင် ကြွယ်ဝလွန်းလှပေသည်။

တစ်ခေါက် လှည့်ပတ်ကြည့်ရုံနှင့်ပင် ရေနံမြေ သုံးနေရာ၊ ကျောက်မီးသွေးမြေ တစ်နေရာနှင့် သံသတ္တုကြော နှစ်နေရာတို့ကို ရှာဖွေတွေ့ရှိခဲ့သည်။ သို့သော် ထိုနေရာများမှာ ရေအောက် အနက် မီတာ လေးထောင်မှ ငါးထောင်ခန့် အထိ ရှိနေသဖြင့် လက်ရှိ လူသားများ၏ နည်းပညာဖြင့် တူးဖော်ရန်မှာ လွန်စွာ ခက်ခဲလှပေသည်။

ထို့အပြင် ဤတောင်တရုတ်ပင်လယ်သည် သူ၏ ဇာတိမြေ ဖြစ်သောကြောင့် မျိုးချစ်စိတ်ရှိသော လူငယ်တစ်ယောက် အနေဖြင့် ဤသယံဇာတများကို မတူးဖော်လိုဘဲ အနာဂတ် မျိုးဆက်သစ်များအတွက် ချန်ထားရစ်လိုပေသည်။

ထို့အပြင် ဤပစ္စည်းများကို တူးဖော်ပြီးလျှင်လည်း ရောင်းချရန် ခက်ခဲမည် ဖြစ်သည်။

မည်သို့ပင်ဖြစ်စေ ဆွန်ဖုန်းသည် ရေအောက်တွင် ရှိနေသော်လည်း ဤတောင်တရုတ်ပင်လယ် ဒေသ၏ တင်းမာနေသော အခြေအနေကို ကောင်းစွာ သတိပြုမိပေသည်။ နိုင်ငံတကာရေးရာများနှင့် ပတ်သက်၍မူ သူ အများကြီး ဝေဖန်ပြောဆိုလိုခြင်း မရှိချေ။

ဆွန်ဖုန်း၏ အဓိက ရည်ရွယ်ချက်မှာ အပန်းဖြေ ခရီးထွက်လာခြင်းနှင့် လေ့လာစူးစမ်းရန်သာ ဖြစ်သဖြင့် အခြားကိစ္စများကို ခေါင်းထဲ မထည့်တော့ဘဲ ဆက်လက် ကူးခတ်သွားလာနေလေသည်။ မကြာမီမှာပင် သူသည် ဖိလစ်ပိုင် နိုင်ငံ၏ ရေပိုင်နက် အတွင်းသို့ ရောက်ရှိသွားလေတော့သည်။

"သတင်းပို့ပါတယ် ပိုင်ရှင်... အနောက်ဘက် ကီလိုမီတာ လေးဆယ် အကွာမှာ သံသတ္တုကြော တစ်ခုကို ရှာဖွေတွေ့ရှိထားပါတယ်..."

အသံလက်ထောက်၏ သတင်းပို့သံကို ကြားလိုက်ရသောအခါ ဆွန်ဖုန်း၏ မျက်နှာမှာ အနည်းငယ် ညှိုးနွမ်းသွားလေသည်။

"ကျစ်... ဒီနေရာက ဖိလစ်ပိုင်တွေရဲ့ ပိုင်နက်ဆိုတော့ ဒီသံသတ္တုကြောက သူတို့အတွက် အလကား ရသွားတာပေါ့..."

ဆွန်ဖုန်းက ကျိန်ဆဲလိုက်သည်။

"သွားကြည့်ရအောင်..."

ကီလိုမီတာ လေးဆယ် ဆိုသော အကွာအဝေးကို ရေငုပ်စစ်ဝတ်စုံဖြင့် သွားရောက်ရာ မိနစ်အနည်းငယ် အတွင်းမှာပင် ရောက်ရှိသွားလေသည်။

"စကင်န်ဖတ်နေပါသည်... ဒီသတ္တုကြောဟာ သံသတ္တုကြော တစ်ခု ဖြစ်ကြောင်း အတည်ပြုနိုင်ပါတယ်... စကင်န်ဖတ်နေဆဲပါ... ခန့်မှန်းခြေ ပမာဏက တန်ချိန် သန်းရှစ်ဆယ်လောက် ရှိပါတယ်... သေးငယ်တဲ့ သတ္တုကြော အမျိုးအစား ဖြစ်ပါတယ်..."

"ဒီနေရာရဲ့ ရေအနက်က မီတာ တစ်ရာ့ငါးဆယ် ရှိပြီး သံသတ္တုကြောကတော့ မြေအောက် အနက် မီတာ တစ်ရာ့နှစ်ဆယ်လောက်မှာ တည်ရှိနေတာပါ... လက်ရှိမှာ တန်ချိန် ငါးသန်းလောက် တူးဖော်ပြီးသွားပါပြီ..."

အသံလက်ထောက်၏ ရှင်းပြချက်ကို ကြားလိုက်ရသောအခါ ဆွန်ဖုန်းသည် ဒေါသတကြီးဖြင့် သွားကြိတ်လိုက်မိသည်။ ဤဖိလစ်ပိုင် နိုင်ငံသည် ဤကဲ့သို့သော သတ္တုကြောမျိုးကို တူးဖော်ရန် နည်းပညာနှင့် စွမ်းရည် မရှိကြောင်း သူ ကောင်းစွာ သိရှိထားပေသည်။

ကမ်းစပ်နှင့် နီးသော သတ္တုကြော ဖြစ်သော်လည်း သူတို့ချည်းသက်သက် တူးဖော်နိုင်မည် မဟုတ်ချေ။ ဤသည်မှာ အမေရိကန်များနှင့် ပူးပေါင်း၍ တူးဖော်နေခြင်း ဖြစ်မည်မှာ သေချာလှပေသည်။

"ဒီကောင်တွေ ပူးပေါင်းပြီး အချောင်နှိုက်နေကြတာကို ငါက မင်းတို့ရဲ့ အကျိုးအမြတ်တွေကို ဘယ်လို ပြန်နှိုက်ရမလဲ ဆိုတာ စဉ်းစားရဦးမယ်..."

ဆွန်ဖုန်းသည် မျက်လုံးများကို မှေးကျဉ်းကာ စဉ်းစားရင်း အကြံဆိုး တစ်ခု ရလာလေသည်။

ဤနေရာသည် ဖိလစ်ပိုင် နိုင်ငံ၏ ရေပိုင်နက် ဖြစ်ပြီး ပစ္စည်းများမှာလည်း သူတို့၏ ပိုင်ဆိုင်မှု ဖြစ်သော်လည်း ဆွန်ဖုန်းက လုံးဝ ဂရုမစိုက်ချေ။ သူ၏ နိုင်ငံမှ မဟုတ်လျှင် ရပြီ ဖြစ်ပေသည်။

ဆွန်ဖုန်း ဆုံးဖြတ်လိုက်သည်မှာ - ခိုးယူရန်ပင် ဖြစ်သည်။

မည်သို့ ခိုးယူမည်နည်း။ အခြားသူများအတွက် ဆိုလျှင် မိုးပေါ်တက်ရသကဲ့သို့ ခက်ခဲမည် ဖြစ်သော်လည်း ဆွန်ဖုန်းအတွက်မူ အလွန်တရာ လွယ်ကူသော ကိစ္စရပ် တစ်ခု ဖြစ်ပေသည်။ သူ၏ ထံတွင် အစွမ်းထက်မြက်လှသော ရေအောက်ကမ္ဘာ ဖွံ့ဖြိုးတိုးတက်ရေး စနစ်ကြီး ရှိရုံသာမက ကျွန်းတစ်ကျွန်းစာမျှ ကျယ်ဝန်းသော သိုလှောင်ရုံ ကြီးလည်း ရှိနေသေးသည် မဟုတ်ပါလား။ သံသတ္တု တန်ချိန် သန်းတစ်ရာ ရှိနေလျှင်ပင် အလွယ်တကူ သိမ်းဆည်းနိုင်မည် ဖြစ်ပေသည်။

လက်ရှိတွင် ဆွန်ဖုန်း၌ အစီအစဉ် နှစ်ခု ရှိနေသည်။ ပထမ အစီအစဉ်မှာ စက်ရုပ်များနှင့် တူးဖော်ရေး ကိရိယာများကို အားသွင်းပြီး ဤနေရာသို့ ယူဆောင်လာကာ သတ္တုကြော၏ အခြားတစ်ဖက်မှ စတင် တူးဖော်ရန် ဖြစ်သည်။ သူတို့ တူးသလို မိမိလည်း တူးမည်။ မည်သူ ပိုမြန်မည်ကို ယှဉ်ပြိုင်မည် ဖြစ်သည်။ ဆွန်ဖုန်း၏ အဆင့်မြင့် တူးဖော်ရေး ကိရိယာများသည် မြေအောက်ထဲတွင် တိတ်ဆိတ်စွာ တူးဖော်နိုင်သဖြင့် လုံးဝ သတိပြုမိခံရမည် မဟုတ်ချေ။

ဒုတိယ အစီအစဉ်မှာ တိုက်ရိုက် ခိုးယူရန် ဖြစ်သည်။ သူတို့ တူးဖော်ပြီးသား အသင့်ရှိနေသော သတ္တုတုံးများကို ယူဆောင်ရန် ဖြစ်သည်။

စောစောက ဆွန်ဖုန်း လေ့လာကြည့်ရှုခဲ့စဉ်က မလှမ်းမကမ်းရှိ ကမ်းစပ်တွင် သံသတ္တုတုံးများ တောင်လို ပုံနေသည်ကို တွေ့ရှိခဲ့ရသည်။ ဆွန်ဖုန်းသာ တိတ်တဆိတ် သွားရောက်ပြီး သိုလှောင်ရုံထဲသို့ ထည့်သွင်းလိုက်ပါက မျက်စိတစ်မှိတ် အတွင်းမှာပင် ထိုသတ္တုတုံးများ အားလုံး ပျောက်ကွယ်သွားမည် ဖြစ်ပေသည်။

သို့သော် ဒုတိယ အစီအစဉ်မှာ အလွန် အန္တရာယ် များလွန်းသည်ဟု ဆွန်ဖုန်း တွေးတောမိသဖြင့် ပထမ အစီအစဉ်ကိုသာ ရွေးချယ်ရန် ဆုံးဖြတ်လိုက်သည်။

ပထမ အစီအစဉ် အရဆိုလျှင် သူသည် အခြားတစ်ဖက်မှနေ၍ သတ္တုကြော တစ်ခုလုံးကို ပြောင်စင်အောင် တူးဖော်ယူဆောင်သွားနိုင်မည် ဖြစ်ပေသည်။

အသံလက်ထောက်က ပြသလိုက်သော ဟိုလိုဂရမ် မြေပုံအရ ဤသံသတ္တုကြောသည် ကီလိုမီတာ ဆယ်ချီ ရှည်လျားသော ကြိုးတန်း တစ်ခုသဏ္ဍာန် တည်ရှိနေကြောင်း သိရှိရသည်။

ဆွန်ဖုန်းသည် သူ၏ တူးဖော်ရေး ကိရိယာများကို အလွန် ယုံကြည်စိတ်ချမှု ရှိပေသည်။ အဘယ်ကြောင့်ဆိုသော် ၎င်းတို့သည် မြေအောက်ထဲတွင် အလုပ်လုပ်နေမည် ဖြစ်သဖြင့် မည်သူကမျှ မြင်တွေ့နိုင်မည် မဟုတ်ချေ။ ထို့အပြင် သယ်ယူပို့ဆောင်ရေး လုပ်ငန်းများကိုလည်း သူကိုယ်တိုင် လုပ်ဆောင်မည် ဖြစ်ရာ ပိုမို လုံခြုံစိတ်ချရပေသည်။ သူတို့၏ ရေဒါများ စစ်သင်္ဘောများကလည်း ရှာဖွေတွေ့ရှိနိုင်မည် မဟုတ်ချေ။ ကမ္ဘာမြေကို နှစ်ပေါင်းရာချီ ကျော်လွန်နေသော နည်းပညာ တစ်ခုက ဤမျှလေးတောင် မလုပ်နိုင်ဘဲ နေမည်လား။

ထိုအကြောင်းများကို စဉ်းစားမိသောအခါ ဆွန်ဖုန်းသည် ချက်ချင်းပင် ဆုံးဖြတ်ချက် ချလိုက်လေတော့သည်။

မိမိနိုင်ငံ၏ သယံဇာတများကို မတူးဖော်ဘဲ အခြားနိုင်ငံများ၏ သယံဇာတများကိုသာ တိတ်တဆိတ် သွားရောက် တူးဖော်မည် ဖြစ်သည်။ နောင်တွင်လည်း ရေအောက်ကမ္ဘာ ဖွံ့ဖြိုးတိုးတက်ရေး လုပ်ငန်းများကို အခြားနိုင်ငံများ၏ ပိုင်နက်များတွင်သာ လုပ်ဆောင်တော့မည်ဟု ဆွန်ဖုန်းက ရယ်မောရင်း ကြုံးဝါးလိုက်လေသည်။

"အသံလက်ထောက်... ဒီလို သံသတ္တုကြော မျိုးကို တူးဖော်ဖို့အတွက် ဘယ်လို တူးဖော်ရေး ကိရိယာ မျိုးကို အသုံးပြုသင့်လဲ..."

ဆွန်ဖုန်းသည် တူးဖော်ရေးနှင့် ပတ်သက်၍ အတွေ့အကြုံ မရှိသဖြင့် အသံလက်ထောက်အား မေးမြန်းလိုက်ခြင်း ဖြစ်သည်။

"ပိုင်ရှင်ရဲ့ လက်ရှိ အခြေအနေတွေအရ A အဆင့်ရှိတဲ့ အကြီးစား တူးဖော်ရေး ကိရိယာကို အသုံးပြုသင့်တယ်လို့ ကျွန်တော် အကြံပြုချင်ပါတယ်... ဒီလို အခက်အခဲ မရှိတဲ့ တူးဖော်ရေး လုပ်ငန်းမျိုးမှာ A အဆင့် ကိရိယာကို အသုံးပြုမယ်ဆိုရင် ၂၄ နာရီ အတွင်းမှာ သံသတ္တု တန်ချိန် ငါးသိန်းလောက် အထိ တူးဖော်နိုင်မှာပါ..."

"သံသတ္တု တန်ချိန် ငါးသိန်း ဟုတ်လား... ဘုရားရေ... ငါက စာသိပ်မတတ်လို့ ငါ့ကို လာမလိမ်နဲ့နော်... ဒီအတိုင်းသာ တူးသွားမယ်ဆိုရင် တစ်လ အတွင်းမှာ တန်ချိန် သန်းတစ်ဆယ့်ငါးသန်းလောက် အထိ ရလာမှာပေါ့... ဒါက ကောင်းကင်ဘုံကိုတောင် အံတုနိုင်တဲ့ စွမ်းဆောင်ရည်ပဲ မဟုတ်ဘူးလား..."

ဆွန်ဖုန်းမှာ အံ့အားသင့်လွန်းသဖြင့် မျက်လုံးများပင် ပြူးကျယ်သွားရလေသည်။

"ပိုင်ရှင်... စိတ်ကို တည်ငြိမ်အောင် ထားပါ... ဒါက A အဆင့် ကိရိယာပဲ ရှိပါသေးတယ်... အကယ်၍ S အဆင့် ကိရိယာကိုသာ အသုံးပြုမယ်ဆိုရင် တစ်ရက်ကို သံသတ္တု တန်ချိန် တစ်သန်း အထိ တူးဖော်နိုင်မှာပါ..."

"အင်း..."

ဆွန်ဖုန်းမှာ ဘာပြောရမည်မှန်း မသိအောင် ဆွံ့အသွားလေတော့သည်။ ကမ္ဘာမြေကို နှစ်ပေါင်းများစွာ ကျော်လွန်နေသော ဤ X ကြယ်စုတန်း ရေအောက်ကမ္ဘာ ဖွံ့ဖြိုးတိုးတက်ရေး စနစ်ကြီး၏ အစွမ်းအစများကို သူ အပြည့်အဝ လက်ခံယုံကြည်သွားလေပြီ။ တကယ့်ကို အစွမ်းထက်မြက်လွန်းသော ရွှေလက်ချောင်းကြီး တစ်ခုပင် ဖြစ်ပေသည်။

"ဒါနဲ့... A အဆင့် တူးဖော်ရေး ကိရိယာ ဘယ်နှစ်ခုလောက် လိုအပ်မလဲ... ကိရိယာ တစ်ခုကို အားအပြည့် သွင်းဖို့ လျှပ်စစ်စွမ်းအင် ဘယ်လောက် လိုအပ်လဲ... ပြီးတော့ အားအပြည့် သွင်းထားရင် ဘယ်နှစ်ရက်လောက် အသုံးပြုနိုင်မလဲ..."

ဆွန်ဖုန်းက နဖူးမှ ချွေးများကို သုတ်ရင်း မေးလိုက်သည်။

"ကိရိယာ ငါးခု လိုအပ်ပါတယ်... ကိရိယာ တစ်ခုကို အားအပြည့် သွင်းဖို့ လျှပ်စစ်စွမ်းအင် ယူနစ် တစ်သောင်း လိုအပ်ပြီး သုံးရက်ကြာအောင် ဆက်တိုက် အသုံးပြုနိုင်ပါတယ်... ဒါပေမယ့် ပိုင်ရှင်ရဲ့ လက်ရှိ သတ္တု ပြုပြင်ဖန်တီးရေး စက်ရုံက လျှပ်စစ် ကေဘယ်ကြိုးတွေနဲ့ ထရန်စဖော်မာ အခြေအနေအရဆိုရင်တော့ ကိရိယာ ငါးခုလုံးကို အားအပြည့် သွင်းနိုင်ဖို့အတွက် အနည်းဆုံး တစ်ပတ်လောက် အချိန်ယူရပါလိမ့်မယ်..."

အသံလက်ထောက်က အေးစက်စက် အသံဖြင့် ဖြေကြားလိုက်သည်။

"ငါလခွေး... ငါးခုဆိုတော့ ယူနစ် ငါးသောင်း... တစ်ယူနစ်ကို ယွမ် တစ်ကျပ်လောက် ကျတယ်ဆိုတော့... ယွမ် ငါးသောင်းလောက် ကုန်မှာပေါ့... တကယ့်ကို ငွေစားတဲ့ ကိရိယာတွေပဲ..."

ဆွန်ဖုန်းက ညည်းတွားလိုက်သည်။ အမှန်တကယ်တော့ သူသည် အကျိုးအမြတ် များစွာ ရရှိနေပါလျက်နှင့် မကျေမနပ် ဖြစ်နေခြင်းသာ ဖြစ်သည်။ အခြားသူများ ဤကဲ့သို့သော သတ္တုကြောမျိုးကို တူးဖော်ရာတွင် ငွေကြေး မည်မျှ ရင်းနှီးမြှုပ်နှံရမည်ကို မသိရှိသော်လည်း သူကမူ လျှပ်စစ်မီတာခ ယွမ် ငါးသောင်းမျှဖြင့် သုံးရက်တိုင်တိုင် တူးဖော်ခွင့် ရရှိနေခြင်း ဖြစ်ပေသည်။

တစ်ရက်လျှင် တန်ချိန် ငါးသိန်း တူးဖော်နိုင်ပြီး သုံးရက်ဆိုလျှင် တန်ချိန် တစ်သန်းခွဲ ရရှိမည် ဖြစ်ရာ အမြတ်အစွန်းမှာ ပြောစရာပင် မလိုတော့ချေ။

"ကျစ်... လုပ်မယ်ကွာ... ဒီသံသတ္တုတွေကို ရောင်းလို့ ရမရ နောက်မှပဲ စဉ်းစားတော့မယ်... ဘယ်လိုပဲဖြစ်ဖြစ် တူးသာ တူးလိုက်မယ်... သူတို့ဆီက တန်ချိန် သန်းနဲ့ချီပြီး ခိုးယူမယ်... ငါ့အိမ်က ပစ္စည်းမှ မဟုတ်တာ... မခိုးဘဲ နေစရာ အကြောင်းမှ မရှိတာ..."

ဆွန်ဖုန်းက တွေးတောပြီးနောက် ဆုံးဖြတ်လိုက်လေသည်။

"ကြည့်ရတာ နောက်ပိုင်းကျရင် ငါ့ရဲ့ သတ္တု ပြုပြင်ဖန်တီးရေး စက်ရုံက ထရန်စဖော်မာနဲ့ ကေဘယ်ကြိုးတွေကို အကြီးစား ပြောင်းလဲတပ်ဆင်ရတော့မယ်... မဟုတ်ရင် အားသွင်းဖို့ကိုပဲ အချိန်တွေ အများကြီး ပေးနေရလိမ့်မယ်..."

ဆွန်ဖုန်းက မိမိကိုယ်ကို သတိပေးလိုက်သည်။ အကယ်၍သာ ထရန်စဖော်မာနှင့် ကေဘယ်ကြိုးများ လောင်ကျွမ်းသွားမည်ကို မစိုးရိမ်ရပါက မနက်ဖြန်တွင်ပင် တူးဖော်ရေး လုပ်ငန်းများကို စတင်တော့မည် ဖြစ်ပေသည်။

"အင်း... ဒီလောက်ဆို ရပါပြီ... အိမ်ပဲ အရင် ပြန်ကြတာပေါ့..."

အပြန်လမ်းတွင် ဆွန်ဖုန်းသည် ရေအောက်ကမ္ဘာ၏ မြင်ကွင်းများကို ခံစားကြည့်ရှုရင်း ပျော်ရွှင်နေမိသည်။ ယခုအခါတွင် သူ၏ ရည်မှန်းချက်မှာ ပိုမို ရှင်းလင်းလာပြီ ဖြစ်ပြီး ထိုရည်မှန်းချက်မှာ ခိုးယူရန်ပင် ဖြစ်ပေသည်။

"ဒီဖိလစ်ပိုင်တွေရဲ့ သံသတ္တုကြောကို တန်ချိန် သန်းနဲ့ချီပြီး ခိုးယူလိုက်ရင် သူတို့ မျက်နှာတွေ ဘယ်လို ဖြစ်သွားမလဲ ဆိုတာ တွေးကြည့်ရုံနဲ့တင် ရယ်ချင်နေပြီ... ဟဲဟဲ..."