အခန်း ၅၄

အခန်း (၅၄) အဆင့်မြင့် ထုတ်လုပ်ရေးလိုင်းများ

နောက်တစ်နေ့တွင် စုန်းကျဲက ဆွန်ဖုန်းထံသို့ ဖုန်းဆက်ကာ အဆိုပါ အကြီးစား စက်ယန္တရား ထုတ်လုပ်ရေး စက်ရုံမှ လူများ မနက်ဖြန်တွင် ဟိုင်ယန်မြို့သို့ လာရောက်၍ အထူးသံမဏိ ကိစ္စနှင့် ပတ်သက်ပြီး လာရောက် ဆွေးနွေးမည် ဖြစ်ကြောင်း အကြောင်းကြားလေသည်။

သေချာသော သတင်းစကား ရရှိပြီးနောက် ဆွန်ဖုန်းသည် ကြိုတင် ပြင်ဆင်မှုများကို စတင် ပြုလုပ်လေတော့သည်။

မိမိ၏ အထူးသံမဏိကို တစ်ဖက်က လက်ခံ အသိအမှတ်ပြုစေရန်အတွက် ခိုင်လုံသော အထောက်အထားများ ပြသနိုင်ရန် လိုအပ်ပေသည်။

ယမန်နေ့ကပင် တစ်ဖက် ကုမ္ပဏီနှင့် ဆွန်ဖုန်း၏ ကုမ္ပဏီတို့ ဖုန်းဖြင့် ဆက်သွယ် စကားပြောဆိုခဲ့ကြပြီး ယနေ့ စုန်းကျဲ ဖုန်းဆက်လာခြင်းမှာ အတည်ပြုပေးခြင်းသာ ဖြစ်သည်။

ဤအကြီးစား စက်ယန္တရား ထုတ်လုပ်ရေး စက်ရုံ၏ လုပ်ငန်းနယ်ပယ်မှာ အတော်လေး ကျယ်ပြန့်လှပေသည်။

ဆွန်ဖုန်းသည် သံမဏိစက်ရုံသို့ ရောက်ရှိလာပြီး ရုံးခန်းထဲတွင် ထိုင်ကာ ထိုကုမ္ပဏီ၏ အသေးစိတ် အချက်အလက်များကို ဖတ်ရှုနေလေသည်။

ဤစက်ယန္တရား ထုတ်လုပ်ရေး စက်ရုံမှာ ကားစက်ရုံ တစ်ခုအတွက် အင်ဂျင်ဘလောက်များ၊ ကားကိုယ်ထည် ဖရိန်များနှင့် အောက်ခံကိုယ်ထည်များကို အဓိက ထုတ်လုပ်ပေးပြီး အခြားသော အကြီးစား စက်မှုလုပ်ငန်းများအတွက်လည်း စက်ကိရိယာများနှင့် သယ်ယူပို့ဆောင်ရေး လုပ်ငန်းသုံး ပစ္စည်းများကို ထုတ်လုပ်ပေးလေသည်။

ဤကုမ္ပဏီမှာ အလွန် ကြီးမားသော အကြီးစား စက်ယန္တရား ထုတ်လုပ်ရေး စက်ရုံကြီး တစ်ခု ဖြစ်သည်ဟု ဆိုနိုင်ပေသည်။

ထို့ကြောင့် သူတို့၏ အထူးသံမဏိ လိုအပ်ချက်မှာ အလွန် ကြီးမားလှသကဲ့သို့ အရည်အသွေး သတ်မှတ်ချက်များမှာလည်း အလွန် တင်းကျပ်လှပေသည်။

ပြည်တွင်းရှိ အထူးသံမဏိ အများစုမှာ သူတို့၏ လိုအပ်ချက်များနှင့် မကိုက်ညီကြချေ။

ထို့ကြောင့် ဤကုမ္ပဏီသည် ပြည်တွင်းမှ အထူးသံမဏိ အနည်းငယ်ကိုသာ ဝယ်ယူလေ့ရှိပြီး အများစုကို နိုင်ငံခြားမှ တင်သွင်းရလေသည်။

ပြည်တွင်းရှိ အထူးသံမဏိများမှာ နိုင်ငံခြား နိုင်ငံအချို့လောက် အဆင့်မမြင့်သည်မှာ အမှန်ပင် ဖြစ်သည်။

အချက်အလက်များကို ကြည့်ရှုရင်း ဆွန်ဖုန်းသည် စားပွဲကို လက်ချောင်းဖြင့် ခေါက်ကာ စဉ်းစားနေလေသည်။

အကယ်၍ ဤကုမ္ပဏီကသာ သူ၏ အထူးသံမဏိများကို ဝယ်ယူမည်ဆိုပါက သေချာပေါက် ကြီးမားသော အရောင်းအဝယ်ကြီး တစ်ခု ဖြစ်လာမည်မှာ အသေအချာပင် ဖြစ်သည်။

"ငါ့ရဲ့ အထူးသံမဏိကို ဘယ်လိုနည်းလမ်းနဲ့ သက်သေပြရမလဲ..."

ဆွန်ဖုန်းသည် ကုလားထိုင်တွင် မှီထိုင်ကာ မျက်လုံးမှိတ်၍ စဉ်းစားနေလေသည်။

"အသံလက်ထောက်... ငါ ဘယ်လိုလုပ်ရမလဲ..."

ဆွန်ဖုန်းက နားထင်ကို ပွတ်ရင်း လေးနက်သော လေသံဖြင့် မေးလိုက်လေသည်။

"ပိုင်ရှင်... ပိုင်ရှင် ပြောတဲ့ ကုမ္ပဏီက လိုအပ်တဲ့ အထူးသံမဏိဆိုတာ သာမန် စက်မှုလုပ်ငန်းသုံး သံမဏိတွေပါ... စစ်ဘက်ဆိုင်ရာ ထုတ်လုပ်ရေးတွေလောက် အဆင့်မြင့် နည်းပညာတွေ မလိုအပ်ပါဘူး... ကျွန်တော်တို့ရဲ့ အထူးသံမဏိက ဘယ်လောက် ပွတ်တိုက်ခံနိုင်တယ်၊ ဘယ်လောက် ပျက်စီးယိုယွင်းမှု ဒဏ်ကို ခံနိုင်တယ်၊ မာကျောမှု၊ ခိုင်ခံ့မှုနဲ့ အပူဒဏ် ခံနိုင်ရည် ဘယ်လောက်ရှိတယ် ဆိုတာကို သူတို့ကို ပြသလိုက်ရုံပါပဲ... အဲဒါတွေကို တွေ့လိုက်ရရင် သူတို့ သေချာပေါက် ဝယ်ပါလိမ့်မယ်..."

အသံလက်ထောက်က ဖြေကြားလိုက်လေသည်။

"ပြဿနာက ငါ ဘယ်လို သက်သေပြရမလဲ ဆိုတာပဲ... ငါ့ဆီမှာ သုတေသန ဓာတ်ခွဲခန်းက ပစ္စည်းတွေမှ မရှိတာ... သူတို့ကို အထူးသံမဏိ တစ်တုံး ပေးလိုက်ပြီးတော့ ဒီအားသာချက်တွေကို သူတို့ဘာသာ စမ်းသပ်ကြည့်လို့ ပြောရမှာလား..."

ဆွန်ဖုန်းက မျက်လုံးလှန်ကာ ပြန်ပြောလိုက်လေသည်။

"ပိုင်ရှင်... ဒီကိစ္စတွေကို ကျွန်တော့်ကိုသာ လွှဲထားလိုက်ပါ... လေဆာစက် တစ်လုံး၊ အပူချိန်မြင့် အပူပေးစက် တစ်လုံးနဲ့ ပွတ်တိုက် စမ်းသပ်စက် တစ်လုံး ထုတ်ပေးမယ်... ဒီစက်တွေက ကျွန်တော်တို့ရဲ့ အထူးသံမဏိဟာ တခြား သံမဏိတွေထက် ဘယ်လောက် သာလွန်တယ်ဆိုတာကို ချက်ချင်း သက်သေပြပေးနိုင်လိမ့်မယ်... ကျွန်တော်တို့ရဲ့ အထူးသံမဏိနဲ့ ဈေးကွက်ထဲက တခြား အထူးသံမဏိတွေကို အဲဒီစက်တွေထဲမှာ ထည့်ပြီး ယှဉ်ပြလိုက်တာနဲ့ ဘယ်သူက အနိုင်ရမလဲဆိုတာ ချက်ချင်း သိသွားလိမ့်မယ်..."

"အသံလက်ထောက်... နောက်ဆုံးတော့ မင်း အသုံးဝင်လာပြီပဲ..."

ဆွန်ဖုန်းသည် ထိုစကားကို ကြားသောအခါ အလွန် ဝမ်းသာသွားကာ ပြောလိုက်လေသည်။

"ကျွန်တော်က အမြဲတမ်း အသုံးဝင်နေတာပါ..."

ဤသို့ဆိုလျှင် ကျန်ရှိသော ကိစ္စများမှာ လွယ်ကူသွားပြီ ဖြစ်သည်။

နောက်တစ်နေ့ နံနက်ပိုင်းတွင် ကျင်မင် အကြီးစား စက်ယန္တရား ထုတ်လုပ်ရေး ကုမ္ပဏီမှ ကိုယ်စားလှယ်များ ဆွန်ဖုန်း၏ သံမဏိစက်ရုံသို့ ရောက်ရှိလာကြသည်။ အမျိုးသမီး တစ်ဦးနှင့် အမျိုးသား နှစ်ဦး ဖြစ်သည်။

အစည်းအဝေး ခန်းမတွင် နှုတ်ဆက် စကားပြောဆိုပြီးနောက် ဆွန်ဖုန်းသည် ထိုသုံးဦးကို သူ၏ သံမဏိစက်ရုံသို့ လိုက်လံ ပြသလေသည်။

"လူကြီးမင်းတို့... ဒီဘက်ကို ကြွပါ..."

ဆွန်ဖုန်းသည် ထိုသုံးဦးကို သံမဏိချောင်းနှင့် သံမဏိပြားများ ထုတ်လုပ်ရာ အလုပ်ရုံဆီသို့ ခေါ်ဆောင်သွားလေသည်။

"ဒါက ကျွန်တော်တို့ စက်ရုံရဲ့ သံမဏိချောင်းနဲ့ သံမဏိပြား ထုတ်လုပ်တဲ့ အလုပ်ရုံပါ... ဒီဘက်က ကုန်ကြမ်း ထည့်တဲ့ နေရာဖြစ်ပြီး ဟိုဘက် အဆုံးကတော့ သံမဏိချောင်းနဲ့ သံမဏိပြားတွေ ထွက်လာတဲ့ နေရာပါ..."

ဆွန်ဖုန်းသည် ထိုသုံးဦးကို အလုပ်ရုံအတွင်း တစ်ပတ် လိုက်လံ ပြသရင်း ရှင်းပြလေသည်။

"ရှင်တို့ရဲ့ သံမဏိချောင်းနဲ့ သံမဏိပြား ထုတ်လုပ်ရေးလိုင်းက ဒီလို ပုံစံမျိုးလား... ကျွန်မ တစ်ခါမှ မမြင်ဖူးဘူး... မီးဖိုကြီးတွေလည်း မတွေ့ရသလို ရိုးရာ သံရည်ကျို စက်ပစ္စည်းတွေကိုလည်း မတွေ့ရဘူး... ပြီးတော့ ဒီထုတ်လုပ်ရေးလိုင်းကလည်း သေးသေးလေးပဲ... ဒါက ပုံစံသစ် ထုတ်လုပ်ရေးလိုင်းလား..."

ခေါင်းဆောင်ဖြစ်သူ အမျိုးသမီးက မျက်မှောင်ကြုတ်ကာ မေးလိုက်လေသည်။

"ဟဲဟဲ... ဟုတ်ပါတယ်... ဒီထုတ်လုပ်ရေးလိုင်းက လက်ရှိ ကမ္ဘာပေါ်မှာ အဆင့်အမြင့်ဆုံးပဲ... မယုံရင် ထွက်လာတဲ့ ပစ္စည်းတွေကို သွားကြည့်လို့ ရပါတယ်..."

ဆွန်ဖုန်းက ပြုံး၍ ပြောလိုက်ပြီး ရှေ့မှ ဦးဆောင် ထွက်သွားလေသည်။

'မဖြစ်နိုင်တာ... ကမ္ဘာပေါ်မှာ အဆင့်အမြင့်ဆုံး ထုတ်လုပ်ရေးလိုင်းတဲ့... အဲဒီလို ဖြစ်နေရင်တောင်မှ ဒီလို သံမဏိစက်ရုံ သေးသေးလေးက ဒီလောက် အဆင့်မြင့်တဲ့ စက်ပစ္စည်းတွေကို ဘယ်လိုလုပ် ဝယ်နိုင်မှာလဲ...'

ဤအမျိုးသမီးမှာ ယခု ဆွေးနွေးပွဲအတွက် ဦးဆောင်လာသူ ဖြစ်ပြီး လျူဖေးဖေး ဟု အမည်ရလေသည်။

အသက် ၂၄ နှစ်သာ ရှိသေးသော်လည်း ကုမ္ပဏီ၏ ဝယ်ယူရေး ဌာန မန်နေဂျာ ရာထူးကို ရရှိထားပြီး ထက်မြက်သော အမျိုးသမီး တစ်ဦး ဖြစ်သည်။ ထို့အပြင် အလွန် လှပသူ တစ်ဦးလည်း ဖြစ်ပေသည်။

ဤစကားများကို လျူဖေးဖေးက ဖွင့်ဟ မပြောဆိုသော်လည်း လျှာမပြတ်ဘဲ ကြီးကြီးကျယ်ကျယ် ပြောဆိုရဲသော ဆွန်ဖုန်းကို စိတ်ထဲမှ အထင်သေးနေမိလေသည်။

သို့သော် သူတို့ သုံးဦး ထုတ်ကုန်များ ထွက်ရှိရာ နေရာသို့ ရောက်ရှိလာပြီး ပို့ဆောင်ရေး ခါးပတ်ကြိုးပေါ်မှ တစ်တုံးချင်း ထွက်ပေါ်လာသော သံမဏိချောင်းနှင့် သံမဏိပြားများကို မြင်လိုက်ရသောအခါ မျက်လုံးများ ပြူးကျယ်သွားကြလေသည်။

"တကယ်ကို မယုံနိုင်စရာပဲ..."

လျူဖေးဖေးသည် ထိုသံမဏိချောင်းနှင့် သံမဏိပြားများကို မြင်သောအခါ မျက်နှာပေါ်တွင် အံ့အားသင့်မှုများ အပြည့် ပေါ်လွင်လာလေသည်။

စောစောက သူမ အလုပ်ရုံကို တစ်ပတ် ပတ်ကြည့်လိုက်သောအခါ ဤထုတ်လုပ်ရေးလိုင်းမှာ လျှပ်စစ်မီးကို အသုံးပြုထားပြီး ကုန်ကြမ်းများကို တစ်ဖက်မှ ထည့်ပေးလိုက်ပါက သံမဏိချောင်းနှင့် သံမဏိပြားများမှာ အခြားတစ်ဖက်မှ ထွက်လာသည်ကို တွေ့ရှိခဲ့ရသည်။

လုပ်ငန်းစဉ် တစ်ခုလုံးတွင် မည်သည့် အလုပ်သမားကိုမျှ မတွေ့ရဘဲ ကုန်ကြမ်းထည့်သည့် နေရာနှင့် ထွက်ကုန်များ ထွက်လာသည့် နေရာတွင်သာ သယ်ယူပို့ဆောင်ရေး အလုပ်သမား အချို့ကို တွေ့ရလေသည်။

ဆိုလိုသည်မှာ ဤထုတ်လုပ်ရေးလိုင်းမှာ လက်ရှိတွင် အလွန် အဆင့်မြင့်သော စက်ယန္တရား အလိုအလျောက် စနစ်ဖြင့် လည်ပတ်နေခြင်း ဖြစ်ပေသည်။

ထို့ကြောင့် လျူဖေးဖေးသည် ဆွန်ဖုန်း၏ စကားများကို အနည်းငယ် ယုံကြည်လာလေသည်။

"အခု ကျွန်တော်တို့ရဲ့ အထူးသံမဏိ ထုတ်လုပ်ရေးလိုင်းကို ဆက်ပြီး လိုက်ပြပေးပါ့မယ်..."

ဆွန်ဖုန်းက ပြုံး၍ ရှေ့မှ ဦးဆောင်ကာ လျှောက်သွားလေသည်။

"အို... မဖြစ်နိုင်တာ... ဒီအထူးသံမဏိ ထုတ်လုပ်ရေးလိုင်းကလည်း စောစောက ထုတ်လုပ်ရေးလိုင်းလိုပဲ အလိုအလျောက် စနစ်နဲ့ လည်ပတ်နေတာလား... သံသတ္တုရိုင်းတွေနဲ့ အထူးသတ္တု တချို့ကို ကုန်ကြမ်းထည့်တဲ့ နေရာကနေ ထည့်ပေးလိုက်ရုံနဲ့ အထူးသံမဏိတွေ ထွက်လာတာပေါ့... ပြီးတော့ အမြန်နှုန်းကလည်း ဒီလောက်တောင် မြန်ပြီး အဆင့်မြင့်နေတာလား..."

လျူဖေးဖေးတို့ သုံးဦးသည် အထူးသံမဏိ ထုတ်လုပ်ရေးလိုင်းကို ကြည့်ရှုပြီးနောက် အလွန်အမင်း အံ့အားသင့်သွားကြလေသည်။

'ဒီလို ထုတ်လုပ်ရေးလိုင်းမျိုးကို ငါ အခုမှ ပထမဆုံး မြင်ဖူးတာပဲ... ဒီနေ့ ဒီသံမဏိစက်ရုံက အထူးသံမဏိတွေဟာ သတ်မှတ်ချက်တွေနဲ့ မကိုက်ညီရင်တောင်မှ ဒီလောက် အဆင့်မြင့်တဲ့ ထုတ်လုပ်ရေးလိုင်းကို မြင်လိုက်ရတာနဲ့တင် ဒီခရီးက တန်သွားပြီ...'

လျူဖေးဖေးသည် အံ့အားသင့်နေရင်း စိတ်ထဲမှ တွေးလိုက်မိလေသည်။

"ကဲ... သံမဏိစက်ရုံရဲ့ ထုတ်လုပ်ရေးလိုင်းတွေကို ကြည့်လို့ ပြီးပြီဆိုတော့... ကျွန်တော်တို့ရဲ့ အထူးသံမဏိ အရည်အသွေး ဘယ်လို ရှိတယ်ဆိုတာကို ပြပေးပါ့မယ်..."

ဆွန်ဖုန်းက လျူဖေးဖေးတို့ သုံးဦးကို ပြောလိုက်လေသည်။

ထုတ်လုပ်ရေးလိုင်း နှစ်ခုကို လေ့လာ ကြည့်ရှုပြီးနောက် သူတို့ သုံးဦး၏ အံ့အားသင့်နေသော မျက်နှာများကို မြင်လိုက်ရသဖြင့် သူ၏ အောင်မြင်နိုင်ခြေမှာ ပိုမို များပြားလာပြီ ဖြစ်ကြောင်း သူ သိလိုက်လေသည်။

"ဟုတ်ကဲ့... ကျွန်မတို့လည်း အရမ်း မျှော်လင့်နေပါတယ်..."

လျူဖေးဖေးက ပြုံး၍ ပြောလိုက်လေသည်။ ဤသည်မှာ သူမ၏ ရင်တွင်းစကား အမှန်ပင် ဖြစ်သည်။

ယခင်က ဤကုမ္ပဏီမှ အထူးသံမဏိ၏ အချက်အလက်များ၊ ပါဝင်မှုများ၊ ကိန်းဂဏန်းများ စသည်တို့ ပါဝင်သော စာရွက်စာတမ်းများနှင့် အထူးသံမဏိ နမူနာ တစ်ခုကို သူမ တွေ့မြင်ခဲ့ရဖူးသော်လည်း ထိုအရာများက ဘာကိုမျှ သက်သေမပြနိုင်ချေ။

ပထမအချက်မှာ စာရွက်စာတမ်းများက အတု ပြုလုပ်၍ ရနိုင်သည်။

ဒုတိယအချက်မှာ ဤ X1-မျိုးဆက် ဟု ခေါ်သော အထူးသံမဏိမှာ မူပိုင်ခွင့် လျှောက်ထားရခြင်း မရှိသေးသဖြင့် စွမ်းဆောင်ရည်ပိုင်းတွင် သံသယ ဖြစ်စရာ ရှိနေပေသည်။

"လူကြီးမင်းတို့ လုံးဝ ကျေနပ်သွားစေရပါမယ်..."

ဆွန်ဖုန်းက ယုံကြည်မှု အပြည့်ဖြင့် ပြုံးကာ ပြောလိုက်လေသည်။

မကြာမီမှာပင် ဆွန်ဖုန်းသည် လျူဖေးဖေးတို့ သုံးဦးကို ယမန်နေ့က ကြိုတင် ပြင်ဆင်ထားသော စမ်းသပ်မည့် နေရာသို့ ခေါ်ဆောင်သွားလေသည်။

ထိုနေရာတွင် လေဆာစက်၊ အပူချိန်မြင့် အပူပေးစက်၊ ပွတ်တိုက် စမ်းသပ်စက် ဟူသော စမ်းသပ် ကိရိယာ သုံးခုကို အသင့် ပြင်ဆင်ထားလေသည်။

ဤစက်ကိရိယာ သုံးခုစလုံးမှာ အသံလက်ထောက်က ထုတ်ပေးထားခြင်း ဖြစ်သဖြင့် ဆွန်ဖုန်းကမူ လုံးဝ စိတ်ချယုံကြည်နေလေသည်။

"ရှင် ပြောတဲ့ စမ်းသပ်မယ့် ကိရိယာတွေ ဆိုတာ ဒါတွေလား..."

လျူဖေးဖေးတို့ သုံးဦးသည် ထိုလေဆာစက် အစရှိသော သေးငယ်သည့် စက်ကိရိယာ သုံးခုကို မြင်သောအခါ သံသယ အပြည့်ပါသော လေသံဖြင့် မေးလိုက်ကြလေသည်။