အခန်း ၂

အခန်း (၂) တကယ်ကြီး တောင်ပေါ်မှာ ရတနာတွေ ရှိနေတာပဲ

ချန်ပိုင်တောင်တန်းသည် မြောက်ကမ္ဘာခြမ်းရှိ အပြည့်စုံဆုံး ဂေဟစနစ်ကို ထိန်းသိမ်းထားနိုင်ပြီး ကမ္ဘာမြေ၏ တူညီသော လတ္တီကျုများအနက် ဇီဝမျိုးစုံမျိုးကွဲ အကြွယ်ဝဆုံးသော ဂေဟစနစ်ဒေသတစ်ခု ဖြစ်လေသည်။

ထို့အပြင် ချန်ပိုင်တောင်တန်းဒေသတွင် မြောက်ပိုင်းလူမျိုးများကို ကိုယ်စားပြုသော သစ်တောယဉ်ကျေးမှုနှင့် မြက်ခင်းပြင်ယဉ်ကျေးမှုများ ရှိသည့်အပြင် ဟန်လူမျိုးများကို ကိုယ်စားပြုသော စိုက်ပျိုးရေးယဉ်ကျေးမှုများလည်း ပါဝင်သောကြောင့် ယဉ်ကျေးမှုပေါင်းစုံ စုဝေးရာဒေသတစ်ခု ဖြစ်ပေသည်။ ဤနေရာကား အမှိုက်ကင်းစင်သော သန့်စင်သည့်နယ်မြေတစ်ခုပင် ဖြစ်သည်။

ရွှီယန်သည် ငယ်စဉ်ကတည်းက တောင်ပေါ်ရွာလေးတွင် နေထိုင်ခဲ့သူဖြစ်ရာ တောင်ပေါ်ရှိ အခြေအနေများကို သူလောက် သိကျွမ်းနားလည်သူ မရှိနိုင်တော့ပေ။ ယခင်ကဆိုလျှင် သူသည် ရွာအနီးရှိ တောင်တန်းများတွင်သာ သွားလာလှုပ်ရှားလေ့ရှိသည်။ ယနေ့တွင်မူ သူက တောင်ပေါ်သို့ ပိုမိုနက်ရှိုင်းစွာ ဝင်ရောက်ရန် ရည်ရွယ်ထားလေသည်။

အဘယ်ကြောင့်ဆိုသော် ရတနာရှာဖွေရေး သံလိုက်အိမ်မြှောင်၏ အဆင့်မှာ အခြေခံအဆင့်သာ ဖြစ်ပြီး သုံးကီလိုမီတာ ပတ်လည်အတွင်းရှိ ရတနာများကိုသာ ရှာဖွေနိုင်သောကြောင့်ဖြစ်သည်။ ရွာအနီးနားရှိ တောင်ပေါ်တွင် ကောင်းမွန်သောပစ္စည်းများ မရှိနိုင်တော့ပေ။ ရှိခဲ့လျှင်ပင် ရွာသူရွာသားများက စောစီးစွာ တူးဖော်သွားခဲ့ကြပြီ ဖြစ်သည်။

တောင်ကိုမှီ၍ တောင်ကိုစားသည် ဟူသော စကားပုံအတိုင်း ရွာထဲမှ လူအများစုမှာ တောင်ပေါ်တက်၍ ဟင်းသီးဟင်းရွက် တူးဖော်သည့် အလေ့အထကို ထိန်းသိမ်းထားဆဲဖြစ်ပြီး အချို့က တောင်ပေါ်တွင် လျှောက်လည်ရသည်ကို နှစ်သက်ကြသည်။ ထို့အပြင် ဆောင်းရာသီသို့ ရောက်ရှိလာပါက တောင်ပေါ်တက်၍ ထင်းခုတ်သူများလည်း အများအပြား ရှိနေသေးသည်။

တင်းကျပ်သော ဥပဒေအရဆိုလျှင် ဤသည်က တရားမဝင်သော်လည်း ကိစ္စရပ်အများစုမှာ စည်းမျဉ်းများကို အမြဲတမ်း လိုက်နာနေလေ့ မရှိကြပေ။ ဥပမာအားဖြင့် ရွာထဲတွင် ငွေကြေးအနည်းငယ် ချမ်းသာသော မိသားစုများမှလွဲ၍ ကျန်အိမ်တိုင်းက ဆောင်းတွင်းရောက်လျှင် တောင်ပေါ်တက်၍ ထင်းခုတ်ကြသည်ချည်းသာ ဖြစ်သည်။ သစ်ပင်များကို ခါးလယ်မှ ဖြတ်မပစ်သရွေ့ ကြီးမားသော အတိုင်းအတာဖြင့် သစ်တောပြုန်းတီးအောင် မခုတ်သရွေ့ သစ်တောဦးစီးဌာနကလည်း အရေးယူလေ့မရှိပေ။

ရွာသူရွာသားများက သစ်ကိုင်းတုတ်တုတ်များကိုသာ ခုတ်ယူကာ အိမ်သို့ဆွဲယူသွားကြပြီး ထင်းအဖြစ် သုံးရန် ခုတ်ထစ်သိမ်းဆည်းထားကြသည်။ အိမ်တိုင်းလိုလိုတွင် ထင်းထားသိုရာ အခန်းတစ်ခန်းစီ ရှိကြပြီး ထိုအခန်းထဲတွင် သစ်သားများကို သေသပ်စွာ စီရီပုံထားကြလေသည်။ ဤသစ်သားများကို မည်သို့ရလာသည်ကို လူတိုင်းသိကြသော်လည်း မည်သူကမျှ ဝင်ရောက်စွက်ဖက် မေးမြန်းခြင်း မရှိကြပေ။

ရွှီယန်က တောင်ပေါ်သို့ ဆက်လက်ဝင်ရောက်နေဆဲဖြစ်ပြီး ယနေ့တွင်မူ သူက အတော်လေး နက်ရှိုင်းစွာ ဝင်ရောက်လာခဲ့လေသည်။ ယခုရောက်နေသော နေရာက လူသူကင်းမဲ့သော ဧရိယာတစ်ခုဖြစ်ပြီး ရွာသူရွာသားများပင် ဤနေရာသို့ လာရောက်လေ့ မရှိကြပေ။

မည်သူကမှ အလုပ်မရှိဘဲ သစ်တောအုပ်ကြီးထဲသို့ ပြေးမဝင်ကြပေ။ အဘယ်ကြောင့်ဆိုသော် အရှေ့မြောက်ဒေသတွင် တောရိုင်းအရှေ့မြောက်ကျားများ တကယ်ရှိနေကြောင်း သိထားရမည်ဖြစ်သည်။

ဒရုန်းလေးက ဤအရာအားလုံးကို တိုက်ရိုက်ထုတ်လွှင့်နေသည်။ လက်ရှိတွင် တိုက်ရိုက်ထုတ်လွှင့်မှုအတွင်း လူလေးဆယ့်ခုနစ်ယောက် ရှိနေလေသည်။ ထိုစဉ် တစ်စုံတစ်ယောက်က ပထမဆုံး မှတ်ချက်ကို ရေးသားလိုက်သည်။

"ဟာ ဒီအစ်ကိုသွားတဲ့နေရာက တကယ့်သစ်တောကြီးပဲ သစ်ပင်တွေရဲ့ သက်တမ်းကိုကြည့်ရတာ အားလုံးက ဆယ်နှစ်မကတဲ့ သစ်ပင်ကြီးတွေချည်းပဲ"

ထို့နောက် နောက်ထပ်တစ်ယောက်က ဝင်ရောက်ထောက်ခံလိုက်သည်။

"ဒီလူရဲ့ တိုက်ရိုက်ထုတ်လွှင့်မှုက အရမ်းသဘာဝကျတာပဲ"

ထို့နောက် တတိယမြောက် မှတ်ချက်တစ်ခု ထပ်မံပေါ်ထွက်လာသည်။

"ပတ်ဝန်းကျင်က အရမ်းလှတာပဲ ရှုခင်းတွေက တကယ်ကောင်းတယ် ကြည့်လိုက်တာနဲ့ သဘာဝအတိုင်းပဲဆိုတာ သိသာတယ်"

လူတစ်ယောက်က မှတ်ချက်စရေးလိုက်သည်နှင့် အခြားသူများကလည်း လိုက်လံရေးသားချင်လာကြလေသည်။

ယခုအချိန်တွင် ရွှီယန်က တိုက်ရိုက်ထုတ်လွှင့်မှုအတွင်းရှိ အခြေအနေများကို လုံးဝဂရုမစိုက်အားပေ။ အချိန်တိုအတွင်းတွင် သူက တိုက်ရိုက်ထုတ်လွှင့်နေသည်ကိုပင် မေ့လျော့နေခဲ့လေသည်။ ရွှီယန်က ပတ်ဝန်းကျင်ရှိ အခြေအနေများကိုသာ လေ့လာအကဲခတ်နေသည်။

တော်သေးသည်က ချန်ပိုင်တောင်တန်းတွင် တောရိုင်းတိရစ္ဆာန်များ များပြားသော်လည်း ဧရိယာအကျယ်အဝန်းကလည်း အလွန်ကြီးမားကျယ်ပြန့်လှသည်။ တောရိုင်းတိရစ္ဆာန်များကို တောင်တန်းကြီးအနှံ့ ဖြန့်ကြက်ထားလိုက်မည်ဆိုပါက တောရိုင်းတိရစ္ဆာန်များနှင့် ဆုံတွေ့ရန် အလားအလာမှာ အလွန်နည်းပါးသွားလေသည်။

ထို့အပြင် လူများနှင့်နီးသော နေရာများတွင် တောရိုင်းတိရစ္ဆာန် အရေအတွက်မှာ ပို၍ပင် နည်းပါးသေးသည်။ ယခုက နွေရာသီဖြစ်သောကြောင့် သားရဲတိရစ္ဆာန်များမှာ အစာရေစာ မရှားပါးဘဲ တောင်တန်းအနက်ပိုင်းတွင်သာ ကျက်စားနေကြသည်။ ဤအချက်များကြောင့်သာ ရွှီယန်က ဤမျှနက်ရှိုင်းစွာ ဝင်ရောက်ရန် ရဲတင်းနေခြင်းဖြစ်သည်။

ခဏအကြာတွင် ရွှီယန်က မိမိတိုက်ရိုက်ထုတ်လွှင့်နေသည်ကို သတိရသွားကာ ဖုန်းကိုထုတ်၍ တိုက်ရိုက်ထုတ်လွှင့်မှုကို ကြည့်လိုက်လေသည်။ တိုက်ရိုက်ထုတ်လွှင့်မှုအတွင်း လူငါးဆယ်အထိ ရောက်ရှိနေသည်ကို မြင်လိုက်ရသောအခါ ရင်ဘတ်တွင်ချိတ်ဆွဲထားသော အသံဖမ်းစက်ကို ဖွင့်လိုက်ပြီး စတင်ပြောဆိုလိုက်သည်။

"မင်္ဂလာပါအားလုံးပဲ ကျွန်တော်က ပြင်ပလှုပ်ရှားမှုတွေကို တိုက်ရိုက်ထုတ်လွှင့်တဲ့သူတစ်ယောက်ပါ အိမ်က ချန်ပိုင်တောင်ခြေမှာရှိပြီး ဒီနေ့တော့ တောင်ပေါ်တက်ပြီး တောင်တွင်းရှာဖွေမှုတွေ လုပ်သွားမှာပါ"

"တောင်တွင်းရှာဖွေတယ်ဆိုတာ တောင်ပေါ်တက်ပြီး ပစ္စည်းတွေရှာဖွေစုဆောင်းတာ အမဲလိုက်တာကို ခေါ်တာပါ အခုကတော့ အမဲလိုက်ခွင့် မပေးတော့တဲ့အတွက် တောင်တွင်းရှာဖွေတယ်ဆိုတာက တောင်ပေါ်တက်ပြီး တောပစ္စည်းတွေရှာတာ အဓိကဖြစ်သွားပါပြီ..."

"ဥပမာပြောရရင် တောဂျင်ဆင်းတွေ ဟင်းသီးဟင်းရွက်တွေနဲ့ တောတွင်းဆေးဘက်ဝင်အပင်တွေလိုမျိုးပေါ့"

ရွှီယန်၏ အသံက တိုက်ရိုက်ထုတ်လွှင့်မှုအတွင်းမှ ကြည်လင်ပြတ်သားစွာ ထွက်ပေါ်လာလေသည်။ သူ၏အသံက အလွန်သန့်စင်ပြီး နားထောင်ရသည်မှာ သက်သောင့်သက်သာရှိလှသည်။ တိုက်ရိုက်ထုတ်လွှင့်မှုကို ကြည့်ရှုနေသူများကလည်း အလွန်စိတ်ဝင်စားစရာကောင်းသည်ဟု ထင်မြင်သွားကြသည်။

"အစ်ကိုရေ အစ်ကိုဒီလိုလုပ်နေရင် ကြည့်တဲ့သူများလာမှာ မဟုတ်ဘူး ကျွန်တော် နည်းလမ်းတစ်ခုပေးမယ် အစ်ကိုက တောအုပ်ကြီးထဲမှာ တောရိုင်းရေသန့်ဘူး တစ်ဘူး ရှာတွေ့တာမျိုး ဒါမှမဟုတ် တောရိုင်းခေါက်ဆွဲဘူး တစ်ဘူး ရှာတွေ့တာမျိုး လုပ်ပြမှ ကြည့်တဲ့သူများလာမှာ"

"ကျွန်တော့်အကြံပြုချက်ကတော့ တောတွင်းရှင်သန်ရေးလုပ်ပြဖို့ပဲ သုံးရက်ကို ကိုးနပ်လောက် ငတ်ပြရတဲ့မျိုးဆို လူတွေက ပိုကြည့်ချင်ကြတယ်"

"ကျွန်တော်ကတော့ ဘောင်းဘီတိုတစ်ထည်နဲ့ လူသူမရှိတဲ့ ကျွန်းတစ်ကျွန်းပေါ် ရောက်သွားပြီး ကင်မရာတစ်လုံးပဲ ပါတာမျိုးကို အကြံပြုချင်တယ်"

"တောင်ပေါ်မှာ ဘာတွေများ တူးလို့ရမှာမို့လို့လဲ ပင်လယ်ဘက်သွားတာကမှ ပိုကောင်းဦးမယ်"

ရွှီယန်သည် လူတိုင်း၏ မှတ်ချက်များကို ကြည့်ကာ တည်ငြိမ်စွာပင် ပြုံးလိုက်လေသည်။

ထို့နောက် သူက စနစ်၏ ရတနာရှာဖွေရေး သံလိုက်အိမ်မြှောင်ကို အသုံးပြုရန် ရွေးချယ်လိုက်သည်။ မနေ့က ရတနာရှာဖွေရေး သံလိုက်အိမ်မြှောင်ကို အသုံးမပြုရသေးသောကြောင့် သူသည် စုစုပေါင်း နှစ်ကြိမ်တိုင်တိုင် အသုံးပြုနိုင်လေသည်။

မကြာမီမှာပင် ရတနာရှာဖွေရေး သံလိုက်အိမ်မြှောင်က သုံးကီလိုမီတာ ပတ်လည်အတွင်း စကင်ဖတ်စစ်ဆေးမှုကို ပြီးစီးသွားလေသည်။ ရတနာရှိသည့် နေရာနှစ်ခုက အမှတ်အသားအဖြစ် ပေါ်လာတော့သည်။

ရွှီယန်သည် တောအုပ်အတွင်း ဖြည်းဖြည်းမှန်မှန် လျှောက်လှမ်းနေရင်းမှ စကားဆိုလိုက်သည်။

"တောင်ပေါ်မှာ ကောင်းတဲ့ရတနာတွေ မနည်းဘူးဗျ ပြီးတော့ တောရိုင်းအပင်တွေရဲ့ ဆေးဘက်ဝင်တန်ဖိုးက ပိုပြီးမြင့်မားတယ်..."

"ဥပမာ မကြာခင်ရက်ပိုင်းကဆို တောဂျင်ဆင်းတူးတဲ့ ရာသီပဲလေ ကျွန်တော်တို့ရွာက တောဂျင်ဆင်းတူးတဲ့အဖွဲ့တွေ နောက်နှစ်ရက်နေရင် တောင်ပေါ်တက်ကြတော့မှာ အဲ့ဒီအချိန်ကျရင် ကျွန်တော်လည်း လိုက်သွားပြီး အားလုံးကို တိုက်ရိုက်ထုတ်လွှင့် ပြသပေးဦးမှာပါ"

ရွှီယန် ဤသို့ပြောလိုက်သည်ကို ကြားသောအခါ တိုက်ရိုက်ထုတ်လွှင့်မှုအတွင်းရှိ ကွန်ရက်သုံးစွဲသူအချို့၏ စိတ်ထဲတွင် မျှော်လင့်ချက်များ ဖြစ်ပေါ်လာကြတော့သည်။ မပြောနှင့်ဦး ရွှီယန်၏ တိုက်ရိုက်ထုတ်လွှင့်မှုက ကြည့်ကောင်းနေသေးသည်ပင်။ လက်တွေ့ကျပြီး သဘာဝအတိုင်းရှိနေသော ပတ်ဝန်းကျင် အလွန်တည်ငြိမ်သော ကင်မရာမြင်ကွင်းနှင့် အပေါ်စီးမှ ငုံ့ကြည့်နေရသော ရှုထောင့်များက အမှန်တကယ်ပင် ခံစားမှုတစ်ခုကို ပေးစွမ်းနိုင်လေသည်။

တစ်ခါတစ်ရံ ကင်မရာမြင်ကွင်းက နီးကပ်လာပြီး ရွှီယန်၏ ခန္ဓာကိုယ်အထက်ပိုင်းကို အနီးကပ်ပြသပေးလေသည်။ ထို့ကြောင့် တိုက်ရိုက်ထုတ်လွှင့်မှုကို ကြည့်ရှုနေသူများက ရွှီယန်၏ ရုပ်ရည်ကို အခွင့်ကောင်းယူ၍ ရှင်းလင်းစွာ မြင်တွေ့နိုင်လေသည်။

ရွှီယန်၏ အရပ်အမောင်း ခန္ဓာကိုယ်အချိုးအစားနှင့် ရုပ်ရည်က အလွန်ပင် ကြည့်ကောင်းလှရာ တက္ကသိုလ်တက်စဉ်က သူ့ကိုသဘောကျသော မိန်းကလေးများ မနည်းလှပေ။ တစ်ကိုယ်လုံးက သန့်သန့်ပြန့်ပြန့်ရှိကာ မြင်ရသူအဖို့ မျက်စိပသာဒဖြစ်စေသည်။ ထို့ကြောင့် ရုပ်ရည်ချောမောသော လိုက်ဖ်လွှင့်သူတစ်ဦးဟုပင် သတ်မှတ်၍ ရနိုင်လေသည်။

အရည်အသွေးမြင့်မားသော တိုက်ရိုက်ထုတ်လွှင့်မှုက လူတို့အား ကွဲပြားခြားနားသော အမြင်အာရုံခံစားမှုကို ပေးစွမ်းနိုင်လေသည်။ အချို့သော တိုက်ရိုက်ထုတ်လွှင့်မှုများအတွင်းသို့ ဝင်ကြည့်လိုက်သည်နှင့် လိုက်ဖ်လွှင့်သူက ကင်မရာကိုကြည့်ကာ အော်ဟစ်ဆူညံနေသည်ကို မြင်တွေ့ရမည်ဖြစ်ပြီး ထိုသို့လုပ်သည်ကို ကြိုက်သူရှိသလို ဝေးဝေးရှောင်ချင်သူများလည်း ရှိကြသည်။

သို့သော် ရွှီယန်၏ တိုက်ရိုက်ထုတ်လွှင့်မှု အရည်အသွေးက အလွန်မြင့်မားလှသည်။ ပတ်ဝန်းကျင်ကောင်းရုံသာမက ကင်မရာမြင်ကွင်းကလည်း ကောင်းမွန်သောကြောင့် လူအများအပြားကို ဆွဲဆောင်နိုင်ခြင်း ဖြစ်သည်။ ဤသည်မှာ ဒရုန်း၏ အားကောင်းသော စွမ်းဆောင်ရည်ကြောင့်ပင် ဖြစ်သည်။

ဤအကြောင်းများကြောင့်ပင် ရွှီယန်၏ တိုက်ရိုက်ထုတ်လွှင့်မှုအတွင်း ကြည့်ရှုသူများ၏ ပျမ်းမျှနေထိုင်ချိန်မှာ အလွန်ရှည်ကြာလှလေသည်။ ဤအချက်အလက်က အယ်လ်ဂိုရီသမ်၏ ကြည့်ရှုမှုပမာဏ တွက်ချက်မှုတွင် အချိုးအစားအလွန်မြင့်မားလေသည်။ ထို့ကြောင့် ရွှီယန်၏ တိုက်ရိုက်ထုတ်လွှင့်မှုက ပိုမိုကြီးမားသော ကြည့်ရှုသူပမာဏဆီသို့ လျင်မြန်စွာ တွန်းပို့ခံလိုက်ရသည်။

ဤတစ်ကြိမ်တွင် ပြင်ပလှုပ်ရှားမှုများကို ကြည့်ရှုရန်နှစ်သက်သော လူတစ်ထောင်ခန့်က သူ့ကို မြင်တွေ့ရမည်ဖြစ်သည်။ ဤအရာအားလုံးက တိုက်ရိုက်ထုတ်လွှင့်မှု ပလက်ဖောင်း၏ နောက်ကွယ်တွင် လုပ်ဆောင်နေခြင်းဖြစ်ရာ ရွှီယန်ရော ပရိသတ်များပါ သတိမထားမိကြပေ။

ယခုအချိန်တွင် ရွှီယန်သည် ရတနာရှာဖွေရေး သံလိုက်အိမ်မြှောင်၏ လမ်းညွှန်ချက်အတိုင်း ပထမဆုံးရတနာကို ရှာဖွေရန် သွားရောက်နေလေသည်။ ချန်ပိုင်တောင်တန်းကြီးက အလွန်ကြီးမားကျယ်ပြန့်လှရာ ရတနာမည်မျှ ပုန်းအောင်းနေမည်ကို မည်သူကမျှ မသိနိုင်ပေ။ ရွှီယန်၏ ခြေလှမ်းများနှင့်အတူ မကြာမီမှာပင် သူသည် ပထမဆုံးရတနာရှိရာ နေရာနှင့် ပို၍နီးကပ်လာခဲ့သည်။

အဝေးဆီမှ ကြီးမားသော အစိမ်းရောင် ခြုံနွယ်ပင်ကြီးတစ်ခုကို ရွှီယန် လှမ်းမြင်လိုက်ရသည်။ သစ်စည်က မြင့်မားကာ သစ်ခေါက်က အညိုရောင်သန်းနေသော မီးခိုးရောင်ဖြစ်ပြီး အခေါက်မျက်နှာပြင်မှာ ကြမ်းတမ်းနေသည်။ ဘဲဥပုံသဏ္ဌာန် အရွက်များက အစိမ်းရင့်ရောင်ဖြစ်နေသည်။ ရွှီယန်က ထိုအပင်ကြီးကို ချက်ချင်း မှတ်မိသွားလေသည်။

"ဟိုမှာကြည့်လိုက် အဲ့ဒါ ဝက်သစ်ချပင်ပဲ..."

"ဝက်သစ်ချပင်တွေက တောင်ပိုင်းဒေသတွေမှာ အများဆုံးပေါက်ရောက်ကြပြီး နွေးထွေးစိုစွတ်တဲ့ ပတ်ဝန်းကျင်တွေမှာ ရှင်သန်လေ့ရှိကြတယ် ဒါပေမယ့် ချန်ပိုင်တောင်ပေါ်မှာလည်း ဝက်သစ်ချပင်တွေ ရှိတယ်ဗျ..."

"ချန်ပိုင်တောင်ပေါ်မှာ ဝက်သစ်ချပင်ကို တွေ့ရတာက နိမိတ်ကောင်းတစ်ခုပဲ..."

"ဘာလို့လဲဆိုတော့ ချန်ပိုင်တောင်က ဝက်သစ်ချပင်တွေအပေါ်မှာ တန်ဖိုးကြီးတဲ့ ဆေးဘက်ဝင်အပင်တစ်မျိုး ပေါက်ရောက်နေနိုင်ခြေ အရမ်းများလို့ပဲ..."

"ကျွန်တော် အခုသွားပြီး ကံစမ်းကြည့်လိုက်ဦးမယ် ကံကောင်းရင် အဲ့ဒီတန်ဖိုးကြီး ဆေးဘက်ဝင်အပင်ကို တကယ်ရှာတွေ့နိုင်တယ်"

ရွှီယန်က ပြုံးလျက် ပြောလိုက်သည်။

တိုက်ရိုက်ထုတ်လွှင့်မှုအတွင်းမှ ကွန်ရက်သုံးစွဲသူများမှာ သူ၏စကားကို ကြားလိုက်ရသောအခါ သူတို့၏ သိချင်စိတ်များက ချက်ချင်းပင် နိုးကြွလာကြတော့သည်။

'တန်ဖိုးကြီးသော ဆေးဘက်ဝင်အပင် ဟုတ်လား'

'ဘာများဖြစ်နေမလဲ’

‘တကယ်ကြီး တောင်ပေါ်မှာ ရတနာတွေ ရှိနေတာပဲ’