အခန်း ၈

အခန်း (၈) တောသမင်ငယ် - ဘာကြည့်နေတာလဲ

"မင်းက အခု နာလန်ထူခါစပဲ ရှိသေးတယ် သိပ်ပြီး လျှောက်မသွားနဲ့ဦး... သေသေချာချာ အနားယူ... အစားအသောက်ကိစ္စကိုတော့ ငါ စီစဉ်ပေးမယ်... ဒါပေမယ့် တောရိုင်းတိရစ္ဆာန်ဆိုတာ ကိုယ့်ဘာသာကိုယ် အမဲလိုက်နိုင်ရမယ် မှီခိုတဲ့စိတ် မမွေးရဘူး... မင်းဒဏ်ရာက တစ်ပတ်လောက်ဆိုရင် သက်သာသွားမှာပါ ငါ နှစ်ရက်တစ်ခါ လာပြီး အစာကျွေးမယ် ဒဏ်ရာပျောက်သွားရင်တော့ ငါ ဆက်မကျွေးတော့ဘူးနော်"

ရွှီယန်သည် ရင်ခွင်ထဲတွင် ကျားသစ်ပေါက်လေးကို ပွေ့ချီထားရင်း မိခင်ကျားသစ်မကြီးကို ဆုံးမစကား ပြောကြားနေလေသည်။

မိခင်ကျားသစ်မကြီးမှာ မြက်ခင်းပြင်ပေါ်တွင် ဘေးတစောင်းလှဲလျက် အားအင်ကုန်ခမ်းနေသည့်ပုံဖြင့် အနားယူနေလေသည်။ ၎င်း၏ ကြည်လင်နက်မှောင်နေသော မျက်ဝန်းများထဲတွင် စိတ်အေးသက်သာရှိသွားသည့် အရိပ်အယောင်အချို့ ပါဝင်နေသော်လည်း ကြည့်ရသည်မှာ အတော်လေး ပင်ပန်းနွမ်းနယ်နေဆဲပုံပင် ဖြစ်သည်။

"ဗိုက်ဆာနေပြီ ထင်တယ်"

ရွှီယန်သည် ကျားသစ်မကြီး နားလည်သည်ဖြစ်စေ နားမလည်သည်ဖြစ်စေ ဂရုမစိုက်တော့ဘဲ ကျားသစ်ပေါက်လေးကို ၎င်း၏ ရင်ခွင်ထဲသို့ ထည့်ပေးလိုက်ကာ မတ်တတ်ရပ်၍ ထွက်ခွာရန် ပြင်ဆင်လိုက်လေသည်။

"ငါ သွားပြီး ဝက်သား သုံးကျင်းလောက် ဝယ်လာခဲ့မယ် ခဏစောင့်နေဦး... ဒီလောက် ကြီးမားတဲ့ ကျားသစ်ကြီးတစ်ကောင်က ဒဏ်ရာရနေတော့ အမဲလိုက်လို့လည်း ရမှာမဟုတ်ဘူး... လောလောဆယ်တော့ ငါပဲ မင်းကို သေချာစောင့်ရှောက်ပေးပါ့မယ်"

ရွှီယန်သည် ကျားသစ်မကြီးအား မှာကြားပြီးနောက် လှည့်ထွက်လာခဲ့လေသည်။

အမှန်တော့ ယနေ့တွင် တိုက်ရိုက်ထုတ်လွှင့်မှု ပြုလုပ်ရန် ရည်ရွယ်ထားသော်လည်း ရုတ်တရက် အကြောင်းကိစ္စများ ပေါ်ပေါက်လာသဖြင့် မဖွင့်ဖြစ်တော့ချေ။ ထို့အပြင် နိုင်ငံတော်အဆင့် သတ်မှတ်ထားသော ရှားပါးကာကွယ်စောင့်ရှောက်ရမည့် တိရစ္ဆာန်များကို စောင့်ရှောက်ပေးနေခြင်းက အငြင်းပွားဖွယ်ရာများ ဖြစ်ပေါ်စေနိုင်သဖြင့် တိုက်ရိုက်ထုတ်လွှင့်ပြသရန် မလိုအပ်ပေ။

အကယ်၍ မသမာသူတစ်ဦးဦးကသာ တိုင်တန်းလိုက်ပါက စစ်ဆေးမေးမြန်းခံရရန် အခေါ်ခံရနိုင်ခြေရှိလေသည်။ ယခုခေတ် အင်တာနက် ကွန်ရက်ပတ်ဝန်းကျင်မှာ အလွန်တရာ တင်းကျပ်လွန်းလှပေသည်။

ရွှီယန်သည် ရွာသို့ ပြန်ရောက်သောအခါ ဝက်သားအချို့ကို ဝယ်ယူ၍ တောင်ပေါ်သို့ နောက်တစ်ကြိမ် ထပ်မံတက်လာခဲ့လေသည်။

ဤသို့ အသွားအပြန် ပြုလုပ်ရခြင်းက လူကို အတော်လေး ပင်ပန်းနွမ်းနယ်စေလေသည်။ ကံကောင်းသည်မှာ သူ၏ ခန္ဓာကိုယ်ကြံ့ခိုင်မှုက ကောင်းမွန်သောကြောင့်သာ တောင့်ခံနိုင်ခြင်း ဖြစ်သည်။

မကြာမီမှာပင် ရွှီယန်သည် စောစောက နေရာသို့ ပြန်လည်ရောက်ရှိလာခဲ့လေသည်။ သို့သော် မိခင်ကျားသစ်မကြီးနှင့် ကျားသစ်ပေါက်လေးတို့မှာ ထိုနေရာတွင် မရှိကြတော့ဘဲ မည်သည့်နေရာသို့ ရောက်သွားမှန်း မသိဖြစ်နေသည်ကို ရွှီယန် တွေ့လိုက်ရလေသည်။

"ထွက်သွားကြပြီလား"

ထိုအချိန်တွင် သူ၏ ခေါင်းပေါ်မှ လှုပ်ရှားသံတစ်ခုကို ရွှီယန် ကြားလိုက်ရလေသည်။ သူက အထက်သို့ မော့ကြည့်လိုက်သောအခါမှသာ ကျားသစ်နှစ်ကောင်စလုံး သစ်ပင်ပေါ်သို့ ရောက်နေကြပြီး သစ်ရွက်များကြားမှနေ၍ ခေါင်းလေးများထုတ်ကာ သူ့ကို သိချင်စိတ်ပြင်းပြစွာဖြင့် အကဲခတ်နေကြသည်ကို တွေ့လိုက်ရတော့သည်။

"မင်းတို့နှစ်ကောင် ထမင်းစားရအောင်"

ရွှီယန်က လက်ထဲရှိ ပလတ်စတစ်အိတ်ကို ယမ်းပြကာ လှမ်းခေါ်လိုက်လေသည်။

သူ၏ ခေါ်သံကို ကြားလိုက်ရသောအခါ မိခင်ကျားသစ်မကြီးက ကျားသစ်ပေါက်လေးကို ပါးစပ်ဖြင့်ချီကာ အောက်သို့ သတိကြီးစွာဖြင့် ချက်ချင်း ခုန်ဆင်းလာလေသည်။ ကျားသစ်ပေါက်လေးမှာ မိခင်၏ ပါးစပ်ထဲတွင် အလွန်လိမ္မာရေးခြားရှိစွာ ငြိမ်သက်နေပြီး အလှချိတ်ဆွဲထားသော ပစ္စည်းလေးတစ်ခုအလားပင် ဖြစ်လေသည်။

ကျားသစ်နှစ်ကောင်စလုံး ရွှီယန်၏ ရှေ့သို့ ရောက်ရှိလာကြလေသည်။ ရွှီယန်သည် ဝက်သားများကို မိခင်ကျားသစ်မကြီးအား ကျွေးမွေးလိုက်ပြီး ကျားသစ်ပေါက်လေးကိုမူ နို့တိုက်ပေးနေလေရာ အထိန်းတော်ကြီး တစ်ယောက်အလား ဖြစ်နေတော့သည်။

အခြေအနေများက အလွန်တရာ ထူးဆန်းအံ့ဩဖွယ်ရာ ကောင်းသော လမ်းကြောင်းဆီသို့ ဦးတည်နေလေပြီ။ လူသူကင်းမဲ့သော တောနက်ကြီးထဲတွင် ရွှီယန်နှင့် ကျားသစ်နှစ်ကောင်တို့က ခင်မင်ရင်းနှီးစွာ အတူယှဉ်တွဲ နေထိုင်နေကြလေသည်။ ဤဇာတ်လမ်းမျိုးကို အပြင်လူများအား ပြောပြမည်ဆိုလျှင်ပင် မည်သူကမျှ ယုံကြည်ကြမည် မဟုတ်ပေ။

နေဝင်မိုးချုပ်ချိန်သို့ ရောက်ရှိလာသောအခါ ရွှီယန်သည် တိုက်ရိုက်ထုတ်လွှင့်မှု ဖွင့်ရန် မရည်ရွယ်တော့ဘဲ အိမ်သို့ စောစောစီးစီးပင် ပြန်လာခဲ့လေသည်။

ညစာစားနေချိန်တွင် ရွှီဟုန်ရှန်းက ကျားသစ်ပေါက်လေး၏ အခြေအနေကို မေးမြန်းလာသေးသည်။ ရွှီယန်က အခြေအနေကောင်းမွန်ကြောင်းနှင့် ပြဿနာတစ်စုံတစ်ရာ မရှိကြောင်းသာ ဖြေကြားလိုက်လေသည်။ ထို့နောက် ဤအကြောင်းအရာမှာ ထိုမျှနှင့်ပင် ပြီးဆုံးသွားခဲ့လေသည်။

နောက်တစ်နေ့ နံနက်ခင်းသို့ ရောက်ရှိလာခဲ့လေပြီ။ ရွှီယန်သည် တောတောင်ထဲသို့ နောက်တစ်ကြိမ် ရောက်ရှိလာခဲ့ပြီး ပုံမှန်အတိုင်းပင် တိုက်ရိုက်ထုတ်လွှင့်မှုကို ဖွင့်လှစ်လိုက်လေသည်။

စနစ်ကို ရရှိပြီးနောက်တွင် ဆုလာဘ်များ ပိုမိုရရှိနိုင်ရန်အတွက် လုပ်ငန်းများကို အမြန်ဆုံး လည်ပတ်ရန် လိုအပ်ပေသည်။ ဒရုန်းလေးမှာလည်း ကောင်းကင်ယံသို့ မြင့်မားစွာ ပျံတက်သွားလေပြီ။

နွေရာသီဖြစ်သောကြောင့် သစ်တောအုပ်ကြီးထဲတွင် အနည်းငယ် ပူပြင်းနေပြီး ငှက်အော်သံနှင့် ပိုးမွှားမြည်သံများက နားထဲတွင် ဆက်တိုက် ထွက်ပေါ်နေလေသည်။ ငှက်ကလေးများ၏ တေးဆိုသံက နားထောင်လို့ ကောင်းသော်လည်း ပိုးမွှားများ၏ ဇီး... ဇီး... ဟု အော်မြည်နေသော အသံများကမူ လူကို အနည်းငယ် စိတ်ရှုပ်ထွေးစေလေသည်။

ရွှီယန်သည် တောင်တက်ဝတ်စုံကို အပြည့်အစုံ ဝတ်ဆင်ထားပြီး ခေါင်းပေါ်တွင် ကောက်ရိုးဦးထုပ်ကို ဆောင်းထားလေသည်။ ကျောပြင်တွင် ဝါးတောင်းအလွတ် တစ်လုံးကို လွယ်ထားပြီး လက်ထဲတွင် သစ်သားတုတ်ရှည် တစ်ချောင်းကို ကိုင်ဆောင်ထားရာ ကြည့်ရသည်မှာ အလွန်တရာ ကျွမ်းကျင်ပိုင်နိုင်သည့် အသွင်အပြင် ရှိနေလေသည်။

တိုက်ရိုက်ထုတ်လွှင့်မှုကို ဖွင့်လိုက်သည်နှင့် တစ်ပြိုင်နက် ကြည့်ရှုသူ အရေအတွက်မှာ လျင်မြန်စွာ တိုးပွားလာတော့သည်။ ရွှီယန်၏ တိုက်ရိုက်ထုတ်လွှင့်မှုမှာ သဘာဝကျပြီး လက်တွေ့ဆန်သောကြောင့် လူကြိုက်များလေသည်။ ထို့အပြင် စမတ်ဒရုန်းဖြင့် ရိုက်ကူးထားသောကြောင့် တိုက်ရိုက်ထုတ်လွှင့်မှု မြင်ကွင်းမှာလည်း အလွန်ပင် ကြည့်ကောင်းလှပေသည်။

မကြာမီမှာပင် တိုက်ရိုက်ထုတ်လွှင့်မှုအတွင်းရှိ လူအရေအတွက်မှာ သုံးရာကျော်အထိ ရောက်ရှိသွားလေတော့သည်။

"ဒီနေ့ တောင်ပေါ်တက်ပြီး တောင်ထွက်ပစ္စည်းတွေကို ဆက်ရှာကြမယ်... ကျွန်တော့်လက်ထဲက ဒီတောင်တက်တုတ်က တောင်တက်တဲ့နေရာမှာ အထောက်အကူပြုဖို့ သက်သက်ပဲ သုံးတာမဟုတ်ဘူး... အခုက နွေရာသီဆိုတော့ တောင်ပေါ်မှာ မြွေတွေရှိတတ်တယ် မြက်ပင်တွေ ထူထပ်တဲ့ နေရာမျိုးကို ရောက်ရင် ဒီတောင်တက်တုတ်နဲ့ မြက်ခင်းတွေကို ခပ်ဆတ်ဆတ် ရိုက်ပေးရတယ်... အကယ်၍ မြက်ခင်းထဲမှာ မြွေတွေရှိနေရင်တောင် သူတို့က အမြန်ဆုံး ထွက်ပြေးသွားကြလိမ့်မယ်"

ရွှီယန်သည် လမ်းလျှောက်နေရင်းမှ ကွန်ရက်သုံးစွဲသူများအား ဗဟုသုတ ဝေမျှပေးရန်လည်း မမေ့လျော့ပေ။

တိုက်ရိုက်ထုတ်လွှင့်မှုအတွင်းတွင် လွန်ခဲ့သော နှစ်ရက်က ရွှီယန်၏ တိုက်ရိုက်ထုတ်လွှင့်မှုကို ကြည့်ရှုခဲ့ဖူးသော ပရိသတ်ဟောင်း အနည်းငယ်လည်း ရှိနေလေသည်။ ယနေ့ သူ တိုက်ရိုက်ထုတ်လွှင့်မှု ဖွင့်လိုက်သည်ကို မြင်သောအခါ ချက်ချင်းပင် ဝင်ရောက်လာကြခြင်း ဖြစ်လေသည်။

"အစ်ကိုရေ မြွေက ထွက်ပြေးသွားမယ်ဆိုတာ သေချာလို့လား လူဆီကို အမြန်ပြေးလာပြီး ကိုက်မှာတော့ မဟုတ်ပါဘူးနော်"

"မြက်ကိုရိုက်ပြီး မြွေကို ခြောက်လှန့်တယ်ဆိုတဲ့ စကားကို ငါကြားဖူးတယ်"

"ဟင် တောင်ပေါ်မှာ မြွေတွေရှိတာကို ဒီလိုမျိုး သွားစရဲတယ်ပေါ့"

"ဒီအစ်ကိုက သတ္တိ တကယ်ကောင်းတာပဲ တစ်ယောက်တည်း တောင်ပေါ်တက်လာတာလေ ကျားသစ်နဲ့တောင် တွေ့ခဲ့သေးတာ"

မှတ်ချက်များက တစ်ခုပြီးတစ်ခု တရစပ် ပေါ်ထွက်လာကြလေသည်။

"ဒီနေ့လည်း တောင်ပေါ်မှာ တောင်ထွက်ပစ္စည်းတွေကို ဆက်ရှာကြမယ် ကောင်းတဲ့ပစ္စည်းလေးတွေ တွေ့ဖို့ မျှော်လင့်ရတာပဲ... ချန်ပိုင်တောင်တန်းပေါ်မှာ ရတနာတွေ အများကြီး ရှိတယ်ဗျ... နောက်နှစ်ရက်လောက်နေရင် ဂျင်ဆင်းတူးမယ့် အဖွဲ့နဲ့အတူ ကျွန်တော် တောင်ပေါ် လိုက်တက်မယ် အဲ့ဒီအချိန်ကျရင် အရှေ့မြောက်ဒေသက ဂျင်ဆင်းတူးတဲ့ မြင်ကွင်းကို အားလုံးအတွက် တိုက်ရိုက်ထုတ်လွှင့် ပြသပေးမယ်"

ရွှီယန်က ဖြည်းဖြည်းမှန်မှန်ပင် ဆက်လက် ပြောပြနေလေသည်။

သူသည် တောင်တန်းကြီး၏ အနက်ပိုင်းနှင့် အမြင့်ပိုင်းဆီသို့ တောက်လျှောက် လျှောက်လှမ်းလာခဲ့လေသည်။ တောင်ပေါ်လမ်းများက သွားလာရ မလွယ်ကူလှပေ။ ထို့အပြင် ရွှီယန်က ပတ်ဝန်းကျင် အခြေအနေကိုလည်း အခါအားလျော်စွာ အကဲခတ်နေရသဖြင့် သူ၏ သွားနှုန်းမှာ သိပ်မမြန်လှပေ။

သူသည် အတွင်းဘက်သို့ ခရီးအနည်းငယ် ထပ်မံဝင်ရောက်ပြီးမှ ရတနာရှာဖွေရေး သံလိုက်အိမ်မြှောင်ကို အသုံးပြု၍ ရှားပါးသော တောင်ထွက်ပစ္စည်းများကို ရှာဖွေရန် ရည်ရွယ်ထားလေသည်။ သစ်ပင်များက အလွန်တရာ ထူထပ်စိမ်းလန်းနေပြီး မြက်ပင်များကလည်း အလွန်မြင့်မားလှပေသည်။ အချို့နေရာများရှိ မြက်ပင်များမှာ လူတစ်ရပ်ထက်ပင် ပို၍ မြင့်မားနေပြီး စိမ်းလန်းစိုပြည်ကာ သက်ဝင်လှုပ်ရှားနေသည့် အသွင်ရှိလေသည်။

တိုက်ရိုက်ထုတ်လွှင့်မှုအတွင်းရှိ လေထုမှာလည်း အလွန်ပင် တိတ်ဆိတ်ငြိမ်သက်နေလေသည်။

ထိုအချိန်မှာပင် ရွှီယန်သည် မြင့်မားသော မြက်ခင်းပြင် တစ်ခုကို ဖြတ်သန်းသွားခဲ့လေသည်။ သူ မြက်ခင်းထဲမှ ထွက်လာသည်နှင့် တစ်ပြိုင်နက် ရှေ့ရှိ မြက်ပင်များက ရုတ်တရက် အပြင်းအထန် လှုပ်ခါလာပြီးနောက် ကြီးမားသော တိရစ္ဆာန်ကြီးတစ်ကောင်က မြက်တောထဲမှ ခုန်ထွက်လာကာ လှည့်ပတ်ပြေးလွှားသွားသည်ကို မြင်တွေ့လိုက်ရလေသည်။

ရွှီယန်တစ်ယောက် လန့်ဖြတ်သွားပြီး ခန္ဓာကိုယ်ပင် တွန့်တက်သွားတော့သည်။

"ဟိုက်"

တိုက်ရိုက်ထုတ်လွှင့်မှုကို ကြည့်ရှုနေကြသော ကွန်ရက်သုံးစွဲသူများလည်း ထိုနည်းတူပင် အလန့်တကြား ဖြစ်သွားကြလေသည်။ အချို့သော ပရိသတ်များဆိုလျှင် ထိုင်ရာမှပင် လန့်ဖျပ်ကာ သိုင်းကွက်များပင် ထုတ်ပြမိမတတ် ဖြစ်သွားကြတော့သည်။

"အဲ့ဒါကြီးက ဘာကြီးလဲ"

ကွန်ရက်သုံးစွဲသူများမှာ အနည်းငယ် ကြောင်အမ်းအမ်း ဖြစ်သွားကြလေသည်။

ရွှီယန်သည် ခဏမျှ အံ့အားသင့်သွားပြီးနောက် အဝေးဆီသို့ လှမ်းကြည့်လိုက်လေသည်။ တင်ပါးတွင် အဖြူရောင် အကွက်နှစ်ခုပါရှိသော တိရစ္ဆာန်တစ်ကောင်က တစ်ဟုန်ထိုး ခုန်ဆွခုန်ဆွဖြင့် ထွက်ပြေးသွားသည်ကို သူ မြင်တွေ့လိုက်ရသည်။

ထိုတိရစ္ဆာန်လေးကို ကြည့်ရသည်မှာ ဒရယ်ပြောက်လေး တစ်ကောင်နှင့် တူသော်လည်း အမှန်တကယ်တွင်မူ ၎င်းက အရှေ့မြောက်ဒေသ၏ နတ်ဘုရားတိရစ္ဆာန်ဟု တင်စားခေါ်ဝေါ်ကြသော တောသမင်ငယ်လေး တစ်ကောင်ပင် ဖြစ်လေသည်။

"တောသမင်လေးပါလား ငါ့ကိုတောင် လန့်သွားအောင် လုပ်တယ်... ဒီကောင်လေးကတော့ တကယ်ပဲ အထိတ်တလန့် ဖြစ်အောင် လုပ်တာပဲ... အခုနောက်ပိုင်း ပတ်ဝန်းကျင် ထိန်းသိမ်းရေးတွေ ကောင်းလာတော့ ဂေဟစနစ်က ပြန်လည်ကောင်းမွန်လာတယ် တောသမင်တွေရဲ့ အရေအတွက်လည်း များလာတယ် တစ်ခါတလေကျရင် တောသမင်အလေးတွေက ရွာထဲကိုတောင် ရောက်လာတတ်သေးတယ်... အထူးသဖြင့် ဆောင်းတွင်းဘက်ဆိုရင် ဒီတောသမင်အလေးတွေက ရွာထဲဝင်ပြီး ပြောင်းဖူးတွေ ခိုးစားတတ်ကြတယ်... ဒီကောင်လေးတွေက တော်တော်လေး ချစ်စရာကောင်းတယ် ဒါပေမယ့် တစ်ခါတလေကျရင် သူတို့ရဲ့ မျက်နှာအမူအရာက တော်တော်လေး အမြင်ကပ်ဖို့ ကောင်းတယ် တစ်ချက်လောက် သွားရိုက်ချင်စိတ်တောင် ပေါ်လာတယ်"

ရွှီယန်က ရယ်မောရင်း အားလုံးကို ရှင်းပြလိုက်လေသည်။

"လခွီး ခုနက ငါ့ကိုတောင် လန့်သွားစေတယ် တောသမင်လေး ဖြစ်နေတာကိုး"

"တောသမင်အကြောင်း ငါကြားဖူးတယ် သူတို့က သိချင်စိတ် အရမ်းပြင်းပြတဲ့ တိရစ္ဆာန်မျိုးတွေလေ တုံးအအနဲ့"

"မုဆိုးတွေက သေနတ်နဲ့ပစ်ရင် ထွက်ပြေးသွားပြီး ခဏနေကျရင် မုဆိုးလက်ထဲက ဘာကြီးလဲဆိုတာကို သိချင်လို့ ပြန်လာကြည့်တတ်ကြတယ်လို့ ကြားဖူးတယ်"

"ဒီကောင်တွေက တော်တော်လေး တုံးအတာပဲ အရင်တုန်းက မျိုးသုဉ်းလုနီးပါးတောင် ဖြစ်ခဲ့တာ"

"သူတို့တွေ အခုလို အသက်ရှင်နေရတာ လက်ရှိ တိရစ္ဆာန်ကာကွယ်ရေး ဥပဒေကို ကျေးဇူးတင်ရမယ်"

ရွှီယန်သည် တောသမင်ငယ်လေး ထွက်ပြေးသွားရာ လမ်းကြောင်းဆီသို့ လှမ်းကြည့်လိုက်ပြီးနောက် ဘာမှဆက်မလုပ်တော့ဘဲ ခရီးဆက်လာခဲ့လေသည်။

ဆယ်မိနစ်ခန့် ကြာပြီးနောက် ထိုတောသမင်အလေးက ခေါင်းလေးကိုစောင်းကာ မျက်နှာပြောင်တိုက်လျက် သူ၏ရှေ့တွင် ပြန်လည်ပေါ်လာပြီး ရွှီယန်ရှိရာဘက်သို့ အဆက်မပြတ် ငေးကြည့်နေသည်ကို သူ မြင်တွေ့လိုက်ရလေသည်။

ထိုမြင်ကွင်းကြောင့် ရွှီယန်တစ်ယောက် ချက်ချင်းပင် သဘောကျသွားတော့သည်။

"ကြည့်ကြစမ်း ဟိုတောသမင်အလေး ပြန်ရောက်လာပြီ ဒီကောင်လေးတွေက အဲ့ဒီလိုပဲ တစ်ခါတလေကျရင် တော်တော်လေး အမြင်ကပ်ဖို့ ကောင်းတာ"

ရွှီယန်က ရှေ့သို့ လက်ညှိုးထိုးပြကာ ကွန်ရက်သုံးစွဲသူများအား ပြောလိုက်လေသည်။

ဒရုန်း၏ ကင်မရာမြင်ကွင်းက ရှေ့သို့ ရိုက်ကူးပြသနေလေသည်။ ရွှီယန်၏ ရှေ့တွင် ရပ်နေသော အညိုရောင် တောသမင်ငယ်လေး တစ်ကောင်ကို အားလုံးက မြင်တွေ့လိုက်ကြရသည်။ ၎င်း၏ ဝိုင်းစက်နက်မှောင်နေသော မျက်လုံးလေးများက ပုတ်ခတ်ပုတ်ခတ် ဖြစ်နေပြီး တစ်ကိုယ်လုံးတွင် တုံးအအဖြစ်နေသည့် အရိပ်အယောင်များ ဖုံးလွှမ်းနေလေသည်။

ထိုမြင်ကွင်းကို ကြည့်ရှုနေသော ကွန်ရက်သုံးစွဲသူများမှာလည်း ရယ်ချင်စိတ်ကို မထိန်းနိုင်အောင် ဖြစ်သွားကြတော့သည်။

ရွှီယန်က တောသမင်ငယ်လေးအား လှမ်းအော်လိုက်လေသည်။

"ဟေ့ကောင်လေး ဘာကြည့်နေတာလဲ"

ရွှီယန်၏ အသံကို ကြားလိုက်ရသောအခါ တောသမင်အလေး၏ နားရွက်လေးများက လှုပ်ရွသွားလေသည်။ ရွှီယန်က သူ့ကို အန္တရာယ်ပြုမည့် ရည်ရွယ်ချက် မရှိကြောင်းကို ရိပ်မိသွားသည့်အလား တောသမင်အလေးက ရွှီယန်ရှိရာဘက်သို့ ခြေနှစ်လှမ်းခန့် တိုးလာလေသည်။

၎င်းက လည်ပင်းလေးကို စောင်းကာ ခေါင်းလေးကို ဆန့်ထုတ်ထားပြီး ကြည်လင်၍ တုံးအအဖြစ်နေသော မျက်ဝန်းလေးများဖြင့် ကြည့်နေလေသည်။

တိုက်ရိုက်ထုတ်လွှင့်မှုအတွင်း၌ ကြည့်တော့ ဘာဖြစ်လဲ ဟူသော မှတ်ချက်များစွာက အဆက်မပြတ် လွင့်မျောလာကြလေသည်။

"ငါက နိုင်ငံတော်အဆင့် နှစ် သတ်မှတ်ထားတဲ့ ကာကွယ်စောင့်ရှောက်ရမယ့် တိရစ္ဆာန်ကွ ကြည့်တော့ ဘာဖြစ်လဲ မင်း ငါ့ကို တစ်ချက်လောက် ထိကြည့်လိုက်လေ"

"လာလေ ငါ့ခေါင်းကို ပေးထားမယ် မင်းသတ္တိရှိရင် ငါ့ကို သတ်ကြည့်လိုက်စမ်းပါ"

တိုက်ရိုက်ထုတ်လွှင့်မှုအတွင်းရှိ လေထုမှာ ချက်ချင်းပင် ဆူညံပွက်လောရိုက်ကာ ပျော်ရွှင်စရာ ကောင်းသွားတော့သည်။ ကြည့်ရှုသူ အရေအတွက်မှာလည်း လျင်မြန်စွာ တိုးပွားလာပြီး ၆၅၃ ယောက်အထိ ရောက်ရှိသွားလေပြီ။

ရွှီယန်သည်လည်း ဤကောင်လေးနှင့် နောက်ပြောင်ကျီစယ်နေခြင်းသာ ဖြစ်သည်။ တောသမင်အလေးများကို မမြင်ရသည်မှာ အတော်ကြာပြီဖြစ်သဖြင့် သူ၏ စိတ်ထဲတွင် အလွန်ပင် ဝမ်းသာပျော်ရွှင်နေလေသည်။

ရွှီယန်သည် အိတ်ကပ်ထဲမှ အဝိုင်းပုံသဏ္ဌာန် ဘီစကွတ်မုန့် အချို့ကို ထုတ်ယူကာ တောသမင်ငယ်လေး ရှိရာဘက်သို့ လှမ်းပေးလိုက်လေသည်။

တောသမင်အလေး၏ နားရွက်များက လှုပ်ရွသွားပြီး အနည်းငယ် သတိထားနေသည့်ပုံ ပေါ်လာသော်လည်း ၎င်း၏ သိချင်စိတ်ပြင်းပြမှုကိုမူ မဟန့်တားနိုင်ခဲ့ချေ။ ထို့နောက် ၎င်းသည် ရွှီယန်ရှိရာဆီသို့ ဖြည်းညင်းစွာ ချဉ်းကပ်လာတော့သည်။