အခန်း ၉

အခန်း (၉) ရှာဖွေတွေ့ရှိမှုအသစ်။ ရွှေရောင်မှိုများကို ခူးဆွတ်ခြင်း။

ချုံနွယ်ပိတ်ပေါင်းများ ထူထပ်လွန်းလှသော ချန်ပိုင်တောင်တန်း၏ သစ်တောအုပ်ကြီးထဲတွင် ဖြစ်သည်။

သစ်တောအုပ်ကြီးထဲတွင် လူတစ်ယောက်၏ရှေ့၌ တောသမင်ငယ်လေး တစ်ကောင်က ရပ်နေပြီး ထိုလူ၏ လက်ထဲမှ ဘီစကွတ်မုန့်များကို ပျော်ရွှင်စွာ စားသောက်နေလေသည်။ ထိုတောသမင်အလေးတွင် ဦးချိုများ မရှိဘဲ ပုံပန်းသဏ္ဌာန်မှာ ဒရယ်ပြောက်များနှင့် တူသော်လည်း တစ်ကိုယ်လုံးက အညိုနုရောင်ဖြစ်နေပြီး ဒရယ်ပြောက်များ၏ သင်္ကေတဖြစ်သော အပြောက်များ မပါရှိပေ။

ရွှီယန်သည် အလိုက်သင့်ပင် ၎င်း၏ခေါင်းလေးကို ပွတ်သပ်ပေးလိုက်လေသည်။

"ဒါက တောသမင်လို့ ခေါ်တယ်... သူတို့က တုံးအတယ်လို့တော့ မဆိုသာပါဘူး သူတို့ရဲ့ စိတ်နေသဘောထားက အရမ်းကို ရိုးရှင်းလွန်းတာ လူတွေ ဒါမှမဟုတ် တခြားတိရစ္ဆာန်တွေ အားလုံးက ကောင်းတဲ့သူတွေချည်းပဲ သူတို့ကို အန္တရာယ်မပြုနိုင်ဘူးလို့ ထင်နေကြတာ... နောက်တစ်ချက်ကတော့ သူတို့ရဲ့ သိချင်စိတ်က အရမ်းကို ပြင်းပြလွန်းတယ် မလုပ်နဲ့လို့ တားလေလေ ပိုလုပ်ချင်လေလေပဲ"

ရွှီယန်က တိုက်ရိုက်ထုတ်လွှင့်မှုအတွင်းရှိ ကွန်ရက်သုံးစွဲသူများကို ရှင်းပြလိုက်လေသည်။

မြင်ကွင်းလေးမှာ အလွန်တရာ နွေးထွေးချစ်စရာ ကောင်းနေလေသည်။ ရွှီယန်၏ တိုက်ရိုက်ထုတ်လွှင့်မှုကို တွေ့ရှိသွားသော ကွန်ရက်သုံးစွဲသူ အများအပြားမှာ ထွက်မသွားကြတော့ဘဲ တိုက်ရိုက်ထုတ်လွှင့်မှုအတွင်း၌သာ ဆက်လက်နေထိုင်ကာ ကြည့်ရှုနေကြတော့သည်။

တောသမင်ငယ်လေးသည် ရွှီယန်၏ လက်ထဲမှ ဘီစကွတ်မုန့်များကို အားရပါးရ စားသောက်ပြီးသွားသော်လည်း အားမရသေးသည့်ပုံဖြင့် ခေါင်းကြီးကို ဆန့်ထုတ်ကာ ရွှီယန်၏ ကိုယ်ပေါ်တွင် ဘီစကွတ်မုန့်များ ထပ်ကျန်နေသေးသလားဟု လိုက်လံအနံ့ခံနေလေသည်။

"သွားစမ်း သွားစမ်း"

ရွှီယန်က ၎င်း၏ လည်ပင်းကို တွန်းဖယ်လိုက်လေသည်။

ဤကောင်လေးက တော်တော်လေး အတင့်ရဲလှပေသည်။ ဒါကြောင့်လည်း အမြင်ကပ်ဖို့ ကောင်းသည်ဟု ဆိုကြခြင်း ဖြစ်ပေမည်။

"ကျွန်တော် တောင်ထွက်ပစ္စည်းတွေကို ဆက်ရှာရဦးမယ်... တောင်ပေါ်တက်တိုင်း အမြဲတမ်း ပစ္စည်းကောင်းတွေ ရနိုင်မယ်လို့တော့ မပြောနိုင်ဘူး ဒါပေမယ့် ကျွန်တော်က ငယ်ငယ်ကတည်းက တောင်ပေါ်မှာ ကြီးလာတာဆိုတော့ ဘယ်နေရာမှာ ပစ္စည်းကောင်းတွေ ရှိတတ်တယ်ဆိုတာကိုတော့ အကြမ်းဖျင်း သိပါတယ်"

ရွှီယန်က တောသမင်ငယ်လေးကို တွန်းဖယ်လိုက်ပြီးနောက် သူ၏ ခရီးကိုသာ ဆက်လက်ထွက်ခွာလာခဲ့လေသည်။

တောသမင်ငယ်လေးသည် နေရာတွင် စက္ကန့်အနည်းငယ်မျှ ရပ်နေပြီးနောက် ရွှီယန်၏ နောက်သို့ ခုန်ဆွခုန်ဆွဖြင့် လိုက်ပါလာတော့သည်။ ရွှီယန်က ခြေနှစ်လှမ်း လှမ်းလိုက်လျှင် ၎င်းကလည်း ခြေနှစ်လှမ်း လိုက်လှမ်းကာ ရွှီယန် ဘာလုပ်မည်ကို သိချင်နေသည့်ပုံပင် ဖြစ်လေသည်။

လွန်ခဲ့သော နှစ်အနည်းငယ်အတွင်း အရှေ့မြောက်ဒေသတွင် လူနေထိုင်မှု နည်းပါးလာသည်နှင့်အမျှ ဂေဟစနစ်မှာလည်း တဖြည်းဖြည်း ပြန်လည်ကောင်းမွန်လာခဲ့လေသည်။ ထို့ကြောင့် ချန်ပိုင်တောင်တန်းပေါ်ရှိ တောရိုင်းတိရစ္ဆာန်များ၏ အရေအတွက်မှာလည်း သိသိသာသာ တိုးပွားလာခဲ့သည်။ တစ်ခါတစ်ရံ တောင်ပေါ်လမ်းများတွင် ကားမောင်းသွားပါက လမ်းဘေးတွင် လမ်းလျှောက်နေသော အရှေ့မြောက်ကျားများကိုပင် တွေ့မြင်ရတတ်လေသည်။

ရွှီယန်သည် ခဏမျှ လမ်းလျှောက်ပြီးနောက် ရတနာရှာဖွေရေး သံလိုက်အိမ်မြှောင်ကို အသုံးပြုရန် ဆုံးဖြတ်လိုက်လေသည်။ မနေ့က အသုံးမပြုခဲ့သဖြင့် ယနေ့တွင် သူသည် သံလိုက်အိမ်မြှောင်ကို နှစ်ကြိမ်တိုင်တိုင် အသုံးပြုခွင့် ရှိနေလေသည်။ မကြာမီမှာပင် သူ၏ ဖုန်းမြေပုံပေါ်တွင် အမှတ်အသား ပြုလုပ်ထားသော နေရာနှစ်ခုက ပေါ်လာတော့သည်။

ရွှီယန်သည် မြေပုံကို ဖွင့်ကြည့်လိုက်ပြီး ဦးတည်ရာကို အကြမ်းဖျင်း မှတ်သားလိုက်ကာ တောအုပ်၏ အနက်ပိုင်းဆီသို့ သတိကြီးစွာဖြင့် ဆက်လက်ထွက်ခွာလာခဲ့လေသည်။

တိုက်ရိုက်ထုတ်လွှင့်မှု မြင်ကွင်းထဲတွင်တော့ စိမ်းလန်းစိုပြည်မှုများက ဖုံးလွှမ်းနေဆဲဖြစ်ပြီး မြင့်မားသော သစ်ပင်ကြီးများနှင့် မြေပြင်အနှံ့ ပေါက်ရောက်နေသော မြက်ရိုင်းပင်များကိုသာ မြင်တွေ့နေရလေသည်။ တစ်ခါတစ်ရံတွင် တောပန်းလေးများ ပွင့်လန်းနေသည်ကိုလည်း တွေ့ရပြီး ရှုခင်းက အလွန်တရာ လှပနေလေသည်။

ရွှီယန်သည် ရုတ်တရက် ခြေလှမ်းများကို ရပ်တန့်ကာ နောက်သို့ လှည့်ကြည့်လိုက်လေသည်။ သူ့နောက်မှ တကောက်ကောက် လိုက်ပါလာသော တောသမင်ငယ်လေးသည် ရွှီယန်က လှည့်ကြည့်လိုက်သည်ကို မြင်သောအခါ ချက်ချင်း ရပ်တန့်သွားပြီး ရှေ့ခြေတစ်ဖက်ကို လေထဲတွင် မြှောက်ထားလျက်သားဖြင့် အလွန်တရာ အနေခက်နေသည့်ပုံစံ ဖြစ်သွားလေသည်။ ၎င်း၏ မျက်ဝန်းများထဲတွင်မူ တုံးအအဖြစ်နေသည့် အရိပ်အယောင်များသာ ပြည့်နှက်နေလေသည်။

"မင်းက ငါ့နောက်ကို ဘာလို့ လိုက်နေတာလဲ"

ရွှီယန်က ပြုံးလျက် မေးလိုက်လေသည်။

တောသမင်ငယ်လေး၏ နားရွက်လေးများက လှုပ်ရွသွားလေသည်။

ထိုမြင်ကွင်းကို မြင်လိုက်ရသောအခါ တိုက်ရိုက်ထုတ်လွှင့်မှုအတွင်းရှိ ကွန်ရက်သုံးစွဲသူများမှာ ရယ်ချင်စိတ်ကို မထိန်းနိုင်တော့ဘဲ အားပါးတရ ရယ်မောလိုက်ကြတော့သည်။

"ကျွန်တော်ပြောရင် အားလုံး ယုံကြမှာ မဟုတ်ဘူး... ကျွန်တော့်နောက်ကို တောသမင်အလေး တစ်ကောင်က လိုက်နေတယ်ဗျ... ဒီကောင်လေးက တကယ်ကို တုံးအအနဲ့ ချစ်စရာကောင်းတာပဲ"

ရွှီယန်က ပေါ့ပေါ့ပါးပါးပင် ပြောလိုက်ပြီးနောက် တောအုပ်၏ အနက်ပိုင်းဆီသို့သာ ဆက်လက်ထွက်ခွာလာခဲ့လေသည်။ သူသည် တောင်တန်းကြီး၏ တောင်တွင်းရှာဖွေသူ တစ်ဦးဖြစ်ပြီး တောအုပ်ထဲတွင် တောင်ထွက်ပစ္စည်းများကို ရှာဖွေနေခြင်း ဖြစ်လေသည်။

လမ်းလျှောက်နေရင်း ရွှီယန်က ဆက်လက်ပြောပြနေလေသည်။

"တောင်ကိုမှီပြီး တောင်ကိုစားတယ်ဆိုတဲ့ စကားအတိုင်း တောင်တွင်းရှာဖွေသူ အလုပ်ကို အသက်မွေးဝမ်းကျောင်းအနေနဲ့ လုပ်ကိုင်နေတဲ့သူတွေ အများကြီးရှိတယ်... လူတွေက သတ်မှတ်ထားတဲ့ ရာသီချိန်ရောက်ရင် တောင်ပေါ်တက်ပြီး တောင်ထွက်ပစ္စည်းတွေကို ရှာဖွေကြတယ် ပြီးရင် တောင်ထွက်ပစ္စည်း ဈေးကွက်မှာ သွားရောင်းကြတယ်... ဒီနေ့ ကျွန်တော် သေချာရှာဖွေပြီး မနက်ဖြန်ကျရင် တောင်ထွက်ပစ္စည်း ဈေးကွက်မှာ သွားရောင်းမလို့... မနက်ဖြန်က စနေနေ့ဆိုတော့ ဈေးနေ့လည်း ဖြစ်နေတယ်... ဈေးထဲမှာ သေချာပေါက် စည်ကားနေမှာပဲ"

ရွှီယန်၏ စကားကို ကြားလိုက်ရသောအခါ ကွန်ရက်သုံးစွဲသူများမှာ တောင်ထွက်ပစ္စည်း ဈေးကွက်ဆိုသည်ကို အနည်းငယ် စိတ်ဝင်စားသွားကြလေသည်။

ထိုအချိန်တွင် ရွှီယန်သည် ရှေ့၌ အနီရောင် အသီးလေးများ သီးနေသော အပင်အချို့ကို သတိထားမိသွားလေသည်။ သူက ချက်ချင်းပင် ထိုအပင်များရှိရာသို့ သွားရောက်ကာ အနီရောင် အသီးလေးများကို အကုန်အစင် ခူးဆွတ်လိုက်လေသည်။

"ဒီမှာကြည့် ဒါက အနီရောင်အသီးလေးတွေလို့ ခေါ်တယ် ဒီအတိုင်း စားမလား ရေနွေးကြမ်းလုပ်သောက်မလား အကုန်ကောင်းတယ် ဈေးကွက်ထဲမှာလည်း အရမ်းလူကြိုက်များတယ်... ဒါပေမယ့် ဈေးကတော့ သိပ်မရပါဘူး တစ်ကျင်းကို ယွမ်ဂဏန်းလောက်ပဲ ရတာ... ပိုက်ဆံများများ ရချင်ရင်တော့ တောင်ပေါ်ကို ဆက်တက်ပြီး ပိုကောင်းတဲ့ တောင်ထွက်ပစ္စည်းတွေကို ရှာဖွေမှ ရမယ်"

ရွှီယန်က အနီရောင် အသီးလေး တစ်ခိုင်ကို ခူးဆွတ်လိုက်သည်နှင့် တစ်ပြိုင်နက် နောက်မှ လိုက်ပါလာသော တောသမင်ငယ်လေးက မျက်နှာပြောင်တိုက်လျက် ချက်ချင်း ရောက်လာကာ ပါးစပ်ကိုဟ၍ လုစားတော့သည်။ ရွှီယန်တစ်ယောက် ဤကောင်လေး၏ အပြုအမူကြောင့် ပြောစရာစကားပင် ဆွံ့အသွားတော့သည်။

"ရော့... အကုန်ယူသွား... သဘောရှိစားတော့"

သူက အနီရောင် အသီးလေးများကို တောသမင်ငယ်လေးထံသို့ ကမ်းပေးလိုက်လေရာ တောသမင်ငယ်လေးကလည်း ပျော်ရွှင်စွာဖြင့် အားရပါးရ စားသောက်တော့သည်။

"အစ်ကိုရေ ဒီလိုလုပ်တာကို ခံနိုင်တယ်ပေါ့ တစ်ချက်လောက် သွားရိုက်ချင်စရာကြီး"

"ငါသာဆိုရင် သူ့ကို သေချာပေါက် ထောင်းလိုက်ပြီ"

"အစ်ကိုရေ အစိုးရအလုပ်လိုချင်လား အခွင့်အရေး ရောက်လာပြီ အဲ့ကောင်လေးကိုသာ သတ်လိုက် အစိုးရက မင်းကို ထောင်ထဲမှာ တစ်သက်လုံး ထမင်းကျွေးထားလိမ့်မယ်"

"ထမင်းလကားစားရုံတင်မကဘူး သံတံခါး သံပန်း သံကြိုးတွေနဲ့ပါ သေချာ စောင့်ရှောက်ပေးဦးမှာ"

မှတ်ချက်များက အဆက်မပြတ် လွင့်မျောလာကြလေသည်။

တောသမင်ငယ်လေး တစ်ကောင် ပါဝင်လာခြင်းက တိုက်ရိုက်ထုတ်လွှင့်မှု အစီအစဉ်ကို ပို၍ စိတ်ဝင်စားစရာ ကောင်းသွားစေလေသည်။

ရွှီယန်သည် ခရီးကို ဆက်လက်ထွက်ခွာလာခဲ့လေသည်။ မကြာမီမှာပင် သူသည် စနစ်မှ အမှတ်အသား ပြုလုပ်ထားသော ပထမဆုံး နေရာသို့ ရောက်ရှိလာခဲ့လေသည်။ အဝေးမှ မြင်ကွင်းကို ရှင်းလင်းစွာ မြင်တွေ့လိုက်ရသောအခါ ရွှီယန်၏ မျက်နှာပေါ်တွင် အပြုံးပန်းများ ပွင့်လန်းသွားတော့သည်။

"ဟိုက် တကယ့်ကို ဂျက်ပေါ့ကြီး မိတာပဲ"

သစ်ပင်ချုံနွယ်များ ထူထပ်နေသော ဧရိယာတစ်ခုတွင် ကြီးမားတုတ်ခိုင်သော သစ်စည်ကြီး နှစ်ခုက မြေကြီးပေါ်တွင် လဲကျနေလေသည်။ ထိုသစ်စည်ကြီးများပေါ်တွင် ရွှေဝါရောင် မှိုများက အစီအရီ ပေါက်ရောက်နေကြသည်။ ဤမှိုများက ပွင့်လန်းနေသော ပန်းပွင့်များအလား အရောင်အသွေးက တောက်ပလှပနေလေသည်။ ထူထပ်သော တောအုပ်ကြီးထဲတွင် ဤမြင်ကွင်းမှာ အလွန်တရာ ထင်ရှားပေါ်လွင်နေလေသည်။

ဒရုန်း၏ ကင်မရာမြင်ကွင်းက ရှေ့သို့ ရိုက်ကူးပြသနေလေရာ ကွန်ရက်သုံးစွဲသူများလည်း တောအုပ်ထဲရှိ ရွှေရောင်မှိုများကို မြင်တွေ့လိုက်ကြရသည်။ အားလုံး၏ မျက်ဝန်းများထဲတွင် အံ့ဩမှုများ ပြည့်နှက်သွားကြတော့သည်။

'အဲ့ဒါက ဘာကြီးလဲ'

ဤမြင်ကွင်းမှာ အလွန်တရာ ကြီးကျယ်ခမ်းနားလှပေသည်။ မြေကြီးပေါ်တွင် လဲကျနေသော ကြီးမားတုတ်ခိုင်သည့် သစ်စည်ကြီး နှစ်ခုပေါ်တွင် ရွှေဝါရောင် မှိုများက အပြည့်အနှက် ပေါက်ရောက်နေကြသည်။ ဤရွှေဝါရောင် မှိုများမှာ တစ်ပွင့်ပြီးတစ်ပွင့် ပွင့်လန်းနေသော ပန်းပွင့်လေးများအလား လှပလွန်းလှပေသည်။

ရွှီယန်၏ အသံက တိုက်ရိုက်ထုတ်လွှင့်မှုအတွင်းမှ ထွက်ပေါ်လာလေသည်။

"ဒီနေ့ကံက တကယ်ကောင်းတာပဲ... ဒါကို အယ်လ်မာ မှိုဝါ လို့ခေါ်တယ် ရွှေရောင်မှို လို့လည်း ခေါ်ကြတယ် ချန်ပိုင်တောင်တန်းမှာ ပေါက်ရောက်တတ်တဲ့ မှိုတစ်မျိုးပေါ့... ဒီမှိုက အရသာ အရမ်းရှိတယ် များသောအားဖြင့်တော့ အရိပ်ကျပြီး အေးမြတဲ့ သစ်မြစ်တွေနားမှာ ပေါက်ရောက်တတ်ကြတယ်... အကယ်၍ မှိုဝါတွေ အများကြီး ပေါက်နေတဲ့ သစ်ပင်တစ်ပင်ကို တွေ့ရင် အဲ့ဒါကို ဂျက်ပေါ့မိတယ်လို့ ခေါ်တယ်... လွယ်လွယ်ပြောရရင်တော့ လွတ်လပ်စွာ စူးစမ်းရှာဖွေရတဲ့ ဂိမ်းတွေထဲမှာ တောထဲကနေ ရှားပါးတဲ့ ရတနာသေတ္တာကို တွေ့သွားသလိုမျိုးပေါ့... အခုခေတ်မှာ လူတွေစိုက်ပျိုးထားတဲ့ မှိုဝါတွေ ရှိပေမယ့် စိုက်ပျိုးထားတဲ့ မှိုဝါတွေက ဒီလောက်အထိ မကြီးနိုင်ဘူး တောရိုင်းမှိုတွေကမှ ဒီလောက်အထိ ကြီးနိုင်တာ... တကယ်ကို တွက်ခြေကိုက်သွားပြီ"

ရွှီယန်၏ စကားကို ကြားလိုက်ရသောအခါ တိုက်ရိုက်ထုတ်လွှင့်မှုအတွင်းရှိ ကွန်ရက်သုံးစွဲသူများမှာ ထပ်မံ၍ ဂနာမငြိမ် ဖြစ်လာကြပြန်သည်။

"အစ်ကိုက တောင်ထွက်ပစ္စည်း ထပ်တွေ့ပြန်ပြီလား"

"ဒါက သေချာပေါက် ကြိုပြီး စိုက်ထားတာ ဖြစ်ရမယ်"

"ဒီအရာတွေက ကြိုပြီးစိုက်ထားလို့ မရဘူးလေ ပြီးတော့ ချန်ပိုင်တောင်တန်းက အရမ်းကြီးတယ် တောင်ထွက်ပစ္စည်းတွေလည်း အများကြီးရှိတယ် အဲ့ဒီတော့ တစ်ခုနှစ်ခုလောက် တွေ့တာက ပုံမှန်ပါပဲ"

"ဒါက ဘယ်လောက်တန်လဲဆိုတာ ဘယ်သူများ ပြောပြနိုင်မလဲ"

ကွန်ရက်သုံးစွဲသူများ၏ စိတ်ဝင်စားမှုမှာ အလွန်ပင် မြင့်တက်လာကြလေသည်။

ထိုအချိန်တွင် တောသမင်ငယ်လေးကလည်း နောက်မှ ရောက်လာလေသည်။ ၎င်းက ရွှီယန်နောက်သို့ လိုက်နေပါက အစားအသောက် ကောင်းကောင်းစားရမည်ဟု မှတ်ယူထားပုံရပြီး အဆက်မပြတ် လိုက်ပါနေခြင်း ဖြစ်လေသည်။

ရွှီယန်သည် ကျောပေါ်မှ ဝါးတောင်းကို ချလိုက်ပြီး အဖြူရောင် လက်အိတ်တစ်စုံကို စွပ်ကာ သစ်စည်ဘေးတွင် ဆောင့်ကြောင့်ထိုင်၍ မှိုများကို စတင်ခူးဆွတ်တော့သည်။

မှိုဝါမှာ တကယ့်ကို ပစ္စည်းကောင်းတစ်ခုဖြစ်ပြီး တောင်တွင်းရှာဖွေသူများ အကြိုက်ဆုံး တောင်ထွက်ပစ္စည်းများထဲမှ တစ်ခုလည်း ဖြစ်လေသည်။ တောင်အောက်သို့ ယူသွားပါက ဈေးကောင်းကောင်းဖြင့် အလွယ်တကူ ရောင်းချနိုင်လေသည်။

"လူတော်တော်များများက မှိုတွေရဲ့ သဘာဝကို သိပ်နားမလည်ကြဘူး မှိုတွေက များသောအားဖြင့် အစုလိုက်အပြုံလိုက် ပေါက်ရောက်တတ်ကြတယ် မှိုဝါကလည်း မှိုအမျိုးအစား တစ်ခုပဲ ပတ်ဝန်းကျင် အခြေအနေက သင့်တော်တယ်ဆိုရင် သူတို့က အစုလိုက်အပြုံလိုက်ကို ကြီးထွားလာကြတာ... နောက်ပြီး ရင့်မှည့်နေတဲ့ မှိုဝါတွေကို ခူးဆွတ်လိုက်တာက ဂေဟစနစ်ကို မြန်မြန်ဆန်ဆန် ပြန်လည်သက်ဝင်လာစေဖို့ အထောက်အကူ ဖြစ်စေတယ်... ဒီနေ့ တောင်ပေါ်တက်ရတာ ကံတော်တော်ကောင်းတာပဲ"

ရွှီယန်က ဖြည်းဖြည်းမှန်မှန်ပင် ရှင်းပြနေလေသည်။

သူသည် မှိုများကို အကုန်အစင် ခူးဆွတ်၍ ဝါးတောင်းထဲသို့ ထည့်လိုက်လေသည်။ တောသမင်အလေးက ဘေးမှနေ၍ ကြည့်နေသော်လည်း ဝင်ရောက်စားသောက်ခြင်း မပြုပေ။ ကြည့်ရသည်မှာ ၎င်းက မှိုများကို အရသာမရှိဟု ယူဆထားပုံရသည်။ သို့မဟုတ် စောစောက စားခဲ့သော ဘီစကွတ်မုန့်နှင့် အနီရောင် အသီးလေးများကြောင့် ဗိုက်ဝနေပြီလည်း ဖြစ်နိုင်လေသည်။ ထိုသို့ဆိုလျှင် ပို၍ပင် အဆင်ပြေလှပေသည်။

"ဒီမှိုဝါတွေက အရည်အသွေး အရမ်းကောင်းတယ် နောက်ပြီး တောရိုင်းမှိုတွေလည်း ဖြစ်တယ် ဈေးကွက်ထဲမှာဆိုရင် တစ်ကျင်းကို ယွမ်နှစ်ဆယ်ကနေ နှစ်ဆယ့်ငါးယွမ်အထိ ရနိုင်တယ်... အားလုံးပေါင်းလိုက်ရင် ရှစ်ကျင်း ကိုးကျင်းလောက်တော့ ရှိမယ် တွက်ကြည့်လိုက်ရင် ဒီမှိုဝါတွေက ယွမ်နှစ်ရာလောက်တော့ ရနိုင်တယ်"

ရွှီယန်က အဖြေကို ပြောပြလိုက်လေသည်။ ယွမ်နှစ်ရာဆိုသည်မှာ သိပ်မများလှပေ။ သို့သော် တောင်တွင်းရှာဖွေသူ အများစုအတွက်တော့ အတော်လေး ကောင်းမွန်သော ဝင်ငွေတစ်ခု ဖြစ်နေပြီဖြစ်သည်။ မည်သို့ပင်ဖြစ်စေ ဤဒေသရှိ လူများ၏ ဝင်ငွေမှာ သိပ်မမြင့်မားလှပေ။

ထိုအချိန်တွင် တိုက်ရိုက်ထုတ်လွှင့်မှုအတွင်း၌ လက်ဆောင်ပေးအပ်သည့် အထူးပြုလုပ်ချက်များ ပေါ်ထွက်လာလေသည်။ တစ်စုံတစ်ယောက်က ရွှီယန်အား လက်ဆောင်ပေးအပ်လိုက်ခြင်း ဖြစ်လေသည်။ အမှန်တကယ်တော့ တိုက်ရိုက်ထုတ်လွှင့်နေစဉ်အတွင်း အမြဲတမ်းလိုလို လက်ဆောင်ငယ်လေးများ ရရှိတတ်လေသည်။ အချို့က အခမဲ့ရရှိသော လက်ဆောင်များဖြစ်ပြီး အချို့ကမူ တန်ဖိုးမကြီးလှသော လက်ဆောင်များ ဖြစ်ကြသည်။

ရွှီယန်က တိုက်ရိုက်ထုတ်လွှင့်မှုကို ကြည့်ကာ ပြောလိုက်လေသည်။

"အားပေးမှုကို ကျေးဇူးတင်ပါတယ် လက်ဆောင်ကိစ္စကိုတော့ ကိုယ့်အခြေအနေကိုယ်ကြည့်ပြီးမှ လုပ်ကြပါ... တိုက်ရိုက်ထုတ်လွှင့်မှုကို သဘောကျရင် အချိန်ကြာကြာလေး နေပြီး ကြည့်ပေးကြပါ"

ရွှီယန် ဂရုစိုက်သည်က လက်ဆောင်များကို မဟုတ်ဘဲ တိုက်ရိုက်ထုတ်လွှင့်မှု၏ ကျော်ကြားမှုရမှတ်များကိုသာ ဖြစ်လေသည်။ အဘယ်ကြောင့်ဆိုသော် ထိုရမှတ်များကို စနစ်မှ မဲဖောက်ရာတွင် အသုံးပြုနိုင်သောကြောင့် ဖြစ်သည်။

ဤသို့ဖြင့် ရွှီယန်သည် သစ်ပင်နှစ်ပင်ပေါ်ရှိ မှိုဝါများကို အကုန်အစင် ခူးဆွတ်လိုက်ရာ ဝါးတောင်းတစ်ခုလုံး အပြည့်ဖြစ်သွားလေသည်။ ပြည့်လျှံနေသော မှိုဝါများကို ကြည့်ကာ ရွှီယန်တစ်ယောက် အလွန်ပင် ကျေနပ်အားရနေလေသည်။

တောင်တွင်းရှာဖွေသူများအတွက်တော့ ဤအချိန်လေးက အပျော်ရွှင်ရဆုံး အချိန်လေးပင် ဖြစ်ပေမည်။ ထို့နောက် သူသည် ဝါးတောင်းကို လွယ်ကာ ဒုတိယမြောက် ရတနာရှိရာ နေရာဆီသို့ ဆက်လက်ထွက်ခွာလာခဲ့လေသည်။ တောသမင်ငယ်လေးကလည်း သူ၏နောက်မှ တကောက်ကောက် လိုက်ပါလာဆဲပင် ဖြစ်သည်။

ဒရုန်းလေးက အထက်မှနေ၍ ရိုက်ကူးပေးနေလေသည်။

တောအုပ်၏ အနက်ပိုင်းရှိ ဂေဟစနစ်က အလွန်ကောင်းမွန်လှရာ ရွှီယန်သည် တစ်ခါတစ်ရံတွင် မြင့်မားသော မြက်ပင်များကို ဖယ်ရှားပြီးမှသာ ရှေ့သို့ ဆက်သွားနိုင်လေသည်။ ခန္ဓာကိုယ်မှာ အနည်းငယ် ပင်ပန်းနွမ်းနယ်နေသော်လည်း ရွှီယန်၏ စိတ်ဓာတ်များကမူ အလွန်ပင် တက်ကြွနေလေသည်။ အဘယ်ကြောင့်ဆိုသော် ရတနာများက ရှေ့တွင် ရှိနေကြောင်းကို သူသိထားပြီး မျှော်လင့်ချက်များလည်း ရှိနေသောကြောင့် ခွန်အားများ အပြည့်အဝ ရှိနေခြင်း ဖြစ်လေသည်။

ဆယ့်ငါးမိနစ်ခန့် ကြာပြီးနောက် ရွှီယန်သည် ရတနာရှာဖွေရေး သံလိုက်အိမ်မြှောင်မှ အမှတ်အသား ပြုလုပ်ထားသော ဒုတိယမြောက် ရတနာရှိရာ နေရာသို့ ရောက်ရှိလာခဲ့လေသည်။

"ဟိုမှာကြည့် တစ်ခုခုရှိတယ်"

"ရှာဖွေတွေ့ရှိမှု အသစ်ပဲ"

ရွှီယန်က ရုတ်တရက် အော်ပြောလိုက်လေသည်။ သူ၏ အသံထဲတွင် ဝမ်းသာပျော်ရွှင်နေသည့် အရိပ်အယောင်များ ပါဝင်နေလေသည်။

သူ၏ အသံကို ကြားလိုက်ရသောအခါ ကွန်ရက်သုံးစွဲသူများမှာ ချက်ချင်းပင် ဂနာမငြိမ် ဖြစ်လာကြတော့သည်။

'ဘာ ရတနာ ထပ်တွေ့ပြန်ပြီလား’