အခန်း ၁၁

အခန်း (၁၁) ပထမဆုံးအကြိမ် မဲဖောက်ခြင်း၏ ဆုလာဘ်

ရွှီယန်သည် တောအုပ်၏ အနက်ပိုင်းဆီသို့ နောက်တစ်ကြိမ် ရောက်ရှိလာခဲ့ပြန်လေသည်။

မိခင်ကျားသစ်မကြီးနှင့် ကျားသစ်ပေါက်လေးတို့သည် သစ်ပင်ပေါ်တွင် အနားယူနေကြလေသည်။ ရွှီယန် ရောက်လာသည်ကို မြင်သောအခါ ကျားသစ်ပေါက်လေးမှာ ခေါင်းလေးကို ယိမ်းခါလျက် အလွန်ပင် ပျော်ရွှင်သွားတော့သည်။

၎င်းလေးမှာ သစ်ပင်ပေါ်မှ အောက်သို့ ချက်ချင်းဆင်းချင်နေသော်လည်း သစ်ပင်တက်ရာတွင် သိပ်မကျွမ်းကျင်သေးသဖြင့် ဖင်ကိုအောက်စိုက်ကာ တစ်ရစ်ချင်းစီသာ ဖြည်းညင်းစွာ ဆင်းနေရလေသည်။

မိခင်ကျားသစ်မကြီးမှာ နောက်ခြေတစ်ချောင်း ဒဏ်ရာရထားသဖြင့် လှုပ်ရှားမှုများက သိပ်မသွက်လက်လှသော်လည်း ကျန်ခြေသုံးချောင်းတည်းဖြင့်ပင် သစ်ပင်ပေါ်မှနေ၍ ပေါ့ပါးစွာ ခုန်ဆင်းနိုင်လေသည်။ ဤကျားသစ် နှစ်ကောင်စလုံးမှာ အရွယ်အစား ကြီးမားမှု ကွာခြားလှသော်လည်း ကြည့်ရသည်မှာ အလွန်ပင် ချစ်စရာ ကောင်းနေလေသည်။

ရွှီယန်က ကျားသစ်ပေါက်လေးကို ပွေ့ချီလိုက်ပြီး ၎င်း၏ ခေါင်းလေးကို အသာအယာ ပွတ်သပ်ပေးလိုက်လေသည်။

မိခင်ကျားသစ်မကြီးကလည်း ရွှီယန်၏ အနားသို့ လျှောက်လာလေရာ ရွှီယန်က ၎င်း၏ နဖူးပြင်ကိုပါ ပွတ်သပ်ပေးလိုက်လေသည်။ ဤဆူဖြိုးတုတ်ခိုင်သော ကျားသစ်ကြီးမှာ လူကို အတော်လေး အချစ်ပိုစေလေသည်။

အမွေးအမျှင်လေးများကလည်း အိစက်ညက်ညောနေလေသည်။

မိခင်ကျားသစ်မကြီးက ရွှီယန်အပေါ် အလွန်ယုံကြည်မှု ရှိနေလေပြီ။ ရွှီယန်၏ အနားသို့ ရောက်သည်နှင့် တစ်ပြိုင်နက် ဘေးတစောင်း လှဲချလိုက်လေရာ ရွှီယန်ကလည်း အခြေအနေပေးသည်နှင့်အညီ ၎င်း၏ နောက်ခြေထောက်ရှိ ဒဏ်ရာကို စစ်ဆေးကြည့်ရှုလိုက်လေသည်။

ပတ်တီးကို တင်းကျပ်စွာ စည်းနှောင်ထားပြီး အခြေအနေအားလုံးက ပုံမှန်အတိုင်း ဖြစ်နေလေသည်။ ဤသို့ဆိုလျှင် ရွှီယန်လည်း စိတ်အေးသွားရလေပြီ။

သူက အိတ်ထဲမှ ဝက်သားတစ်တုံးကို ထုတ်ယူကာ မိခင်ကျားသစ်မကြီးအား ကျွေးမွေးလိုက်ပြီး ကျားသစ်ပေါက်လေးကိုမူ နို့တိုက်ပေးလိုက်လေသည်။

သဘာဝတရားကြီးတွင် တောရိုင်းတိရစ္ဆာန်များ၏ ဘဝထဲသို့ ဝင်ရောက်စွက်ဖက်ခြင်း မပြုရဟူသော စည်းမျဉ်းတစ်ခု ရှိလေသည်။ သို့သော် ဒဏ်ရာရနေသော တောရိုင်းတိရစ္ဆာန်များကို ကယ်ဆယ်ခြင်းက ဝင်ရောက်စွက်ဖက်ခြင်း ဟူသော အမျိုးအစားထဲတွင် မပါဝင်ပေ။ သစ်တောဦးစီးဌာနဖြစ်စေ တိရစ္ဆာန်ကာကွယ်ရေး အဖွဲ့အစည်းများဖြစ်စေ ဒဏ်ရာရနေသော တောရိုင်းတိရစ္ဆာန်များကို တွေ့ရှိပါက အစွမ်းကုန် ကယ်ဆယ်ပေးလေ့ ရှိကြသည်။

အစာစားသောက်ပြီးသွားသောအခါ မိခင်ကျားသစ်မကြီးက မြက်ခင်းပြင်ပေါ်တွင် ဘေးတစောင်းလှဲကာ အနားယူနေပြီး ကျားသစ်ပေါက်လေးကမူ မိခင်၏ ကိုယ်ပေါ်သို့ ခုန်တက်ကာ ပျော်ရွှင်စွာ ဆော့ကစားနေတော့သည်။

ရွှီယန်က ဘေးမှနေ၍ ထိုင်ကြည့်ရင်း စိတ်လက်ပေါ့ပါးစွာဖြင့် အနားယူနေလေသည်။

ဆူဖြိုးတုတ်ခိုင်သော ကျားသစ်ကြီးမှာ အတော်လေး လူချစ်လူခင် ပေါများလေသည်။ မိခင်ကျားသစ်မကြီးမှာ ရက်အနည်းငယ်ခန့် အစာငတ်ထားသော်လည်း ၎င်း၏ ခန္ဓာကိုယ်မှာ အတော်လေး တောင့်တင်းကြံ့ခိုင်နေဆဲပင် ဖြစ်လေသည်။ စမ်းသပ်ကြည့်လိုက်ပါက အသားစိုင်များကို သိသိသာသာ စမ်းမိနိုင်လေသည်။

ရွှီယန်သည် ယခင်ကတည်းက ဤကဲ့သို့သော ဘဝမျိုးကို လိုလားတောင့်တခဲ့သူ ဖြစ်သည်။ ယခုအခါ စနစ်၏ အကူအညီဖြင့် သူ၏ အိပ်မက်များ အကောင်အထည် ပေါ်လာပြီဖြစ်ရာ အလွန်ပင် သက်သောင့်သက်သာ ရှိလှသည်ဟု ခံစားနေရလေသည်။

ဤသို့ဖြင့် သူသည် ထိုနေရာတွင် တစ်နာရီကျော်ခန့် နေထိုင်ပြီးနောက် ပြန်ရန် ပြင်ဆင်လိုက်လေသည်။

"ကဲ အချိန်လည်း တော်တော်လေး လင့်နေပြီ ငါသွားတော့မယ် မနက်ဖြန် တောင်ထွက်ပစ္စည်း ဈေးကွက်ကို သွားရဦးမယ် ပြီးတော့ တောင်ပေါ်တက်ဖို့ ပစ္စည်းကိရိယာတွေလည်း ပြင်ဆင်ရဦးမှာဆိုတော့ ဒီကို လာဖြစ်မှာ မဟုတ်ဘူး"

"မင်းတို့နှစ်ကောင် ကိုယ့်ကိုယ်ကိုယ် ဂရုစိုက်ကြဦး လျှောက်မပြေးနဲ့နော်"

ရွှီယန်က မိခင်ကျားသစ်မကြီး၏ ခန္ဓာကိုယ်ကို အသာအယာ ပုတ်ကာ နှုတ်ဆက်လိုက်ပြီး မတ်တတ်ရပ်၍ ထွက်ခွာရန် ပြင်ဆင်လိုက်လေသည်။

ကျားသစ်ပေါက်လေးမှာ သူ၏နောက်သို့ လိုက်လာရန် ပြင်ဆင်နေသော်လည်း မိခင်ကျားသစ်မကြီးက ၎င်း၏ လည်ကုပ်ကို ကိုက်ချီကာ သစ်ပင်ပေါ်သို့ ချက်ချင်း ခေါ်ဆောင်သွားလေတော့သည်။

ကျားသစ်ပေါက်လေးမှာ သနားစဖွယ် မျက်နှာငယ်လေးဖြင့် ရွှီယန် ထွက်ခွာသွားသည်ကိုသာ ငေးကြည့်နေရရှာလေသည်။

ကျားသစ်ပေါက်လေးက ရွှီယန်အပေါ် ထားရှိသော သံယောဇဉ်မှာ ပို၍ နက်ရှိုင်းလှပေသည်။ အဘယ်ကြောင့်ဆိုသော် ၎င်းက သဘာဝအတိုင်း ဖြစ်ပေါ်လာသော ခင်မင်နှစ်သက်မှု ဖြစ်သောကြောင့် လူကောင်းကတ်၏ အာနိသင်ထက် အများကြီး ပို၍ အားကောင်းလှပေသည်။

သို့သော် ယခုလက်ရှိ အချိန်တွင်မူ ၎င်းလေးသည် မိခင်ကျားသစ်မကြီး၏ အနားတွင်သာ နေထိုင်ရမည် ဖြစ်သည်။ နောက်ပိုင်း ကြီးပြင်းလာပြီး ကိုယ်ပိုင် ရပ်တည်နိုင်သည့် အချိန်ရောက်မှသာ မိမိ၏ ဆန္ဒအတိုင်း လွတ်လပ်စွာ သွားလာလှုပ်ရှားနိုင်မည် ဖြစ်လေသည်။

ရွှီယန်သည် အိမ်သို့ ပြန်ရောက်သောအခါ ပစ္စည်းများကို အနည်းငယ် ရှင်းလင်းသိမ်းဆည်းလိုက်လေသည်။

ညအချိန်တွင် သူသည် စနစ်မှ ရရှိထားသော ကျော်ကြားမှုရမှတ်များကို စစ်ဆေးကြည့်ရှုလိုက်လေသည်။

"ယနေ့ တိုက်ရိုက်ထုတ်လွှင့်မှုကို ကြည့်ရှုခဲ့သူ အရေအတွက် တစ်ထောင့်ခုနစ်ရာသုံးဆယ့်နှစ်ဦး လူတစ်ဦးလျှင် ပျမ်းမျှ ကြည့်ရှုချိန် သုညဒသမခုနစ်နာရီ ရရှိသော ကျော်ကြားမှုရမှတ် တစ်ထောင့်နှစ်ရာဆယ့်နှစ်မှတ်"

"လက်ရှိ စုစုပေါင်း ကျော်ကြားမှုရမှတ် တစ်ထောင့်ရှစ်ရာလေးဆယ့်ခြောက်မှတ်"

စနစ်က တိုက်ရိုက်ထုတ်လွှင့်မှုအတွင်းသို့ ဝင်ရောက်ပြီး တစ်မိနစ်ထက်ပို၍ ကြည့်ရှုသူများကိုသာ အရေအတွက်အဖြစ် သတ်မှတ်တွက်ချက်ခြင်း ဖြစ်သည်။ လူအများစုမှာ ဝင်ရောက်လာပြီး ခဏမျှသာ ကြည့်ရှု၍ ထွက်သွားတတ်ကြသဖြင့် ပျမ်းမျှ ကြည့်ရှုချိန်မှာ သိပ်မမြင့်မားလှပေ။

မနေ့က တိုက်ရိုက်ထုတ်လွှင့်မှုမှ ရမှတ်များကိုပါ ထည့်ပေါင်းလိုက်လျှင် ရွှီယန်တွင် လက်ရှိ ကျော်ကြားမှုရမှတ် ၁၈၀၀ ကျော် ရှိနေပြီ ဖြစ်သည်။ အနိမ့်ဆုံးအဆင့် မဲဖောက်ခြင်း တစ်ကြိမ်အတွက် ရမှတ် ၁၀၀၀ လိုအပ်လေသည်။ ရွှီယန်သည် ရမှတ်များ လုံလောက်နေပြီဖြစ်ရာ တစ်ကြိမ်ခန့် စမ်းသပ်မဲဖောက်ကြည့်ရန် ရည်ရွယ်လိုက်လေသည်။

"ပိုင်ရှင်မှ အနိမ့်ဆုံးအဆင့် မဲဖောက်ခြင်းကို ရွေးချယ်လိုက်ပါသည် မဲဖောက်နေပါသည်..."

"ပထမဆုံးအကြိမ် မဲဖောက်ခြင်းဖြစ်သဖြင့် အမြင့်ဆုံးအဆင့် ဆုလာဘ်ကို သေချာပေါက် ရရှိမည် ဖြစ်ပါသည်..."

"ပိုင်ရှင်မှ အမြင့်ဆုံးအဆင့် ဆုလာဘ် ရရှိသည့်အတွက် ဂုဏ်ယူပါသည် ကျပန်းစွမ်းရည် တစ်ခုကို ရရှိပါသည်..."

"ပိုင်ရှင်မှ စွမ်းရည် ရရှိသည့်အတွက် ဂုဏ်ယူပါသည် လျင်မြန်ဖြတ်လတ်မှု စွမ်းရည်..."

"လျင်မြန်ဖြတ်လတ်မှု စွမ်းရည်... ပိုင်ရှင်၏ ခန္ဓာကိုယ်မှာ လျင်မြန်ဖြတ်လတ်လာမည်ဖြစ်ပြီး တောအုပ်ထဲတွင် အပြေးအလွှား သွားလာရသည့် အခြေအနေများနှင့် ကြုံတွေ့ရပါက အချိန်တိုအတွင်း အသင့်တော်ဆုံး တုံ့ပြန်မှုများကို ပြုလုပ်နိုင်မည် ဖြစ်ပါသည်..."

မဲဖောက်ရန် ရွေးချယ်လိုက်သည်နှင့် ရွှီယန်၏ မျက်စိရှေ့တွင် ရွှေရောင်အလင်းတန်း တစ်ခုက ဖြတ်ကနဲ လက်သွားလေသည်။ ထို့နောက် အမြင့်ဆုံးအဆင့် ဆုလာဘ် ရရှိကြောင်း အသိပေးသံက ထွက်ပေါ်လာတော့သည်။

ရွှေရောင် ဒဏ္ဍာရီပါလား။

ပထမဆုံးအကြိမ် မဲဖောက်ခြင်းတွင် အမြင့်ဆုံးအဆင့် ဆုလာဘ်ကို သေချာပေါက် ရရှိမည်ဟု သူ လုံးဝ ထင်မှတ်မထားခဲ့ချေ။ ရွှီယန်သည် စွမ်းရည်တစ်ခုကို တိုက်ရိုက် ရရှိသွားခဲ့လေပြီ။

လျင်မြန်ဖြတ်လတ်မှု စွမ်းရည်မှာ သစ်တောအုပ်ကြီးထဲတွင် ပြေးလွှားရာ၌ အလွန် အသုံးဝင်လှပေသည်။ ကျောက်ဆောင်များ သစ်ပင်များနှင့် မြင့်မားသော မြက်ပင်များကို လျင်မြန်သွက်လက်စွာ ရှောင်ရှားနိုင်သည့်အပြင် ၎င်းတို့၏ အားကိုယူ၍လည်း လှုပ်ရှားသွားလာနိုင်လေသည်။

အားနည်းချက်မှာ အစွမ်းကုန် ပြေးလွှားပါက ခွန်အား ကုန်ခမ်းမှု အလွန်မြန်ဆန်လွန်းလှခြင်းပင် ဖြစ်သည်။ သာမန်လူ တစ်ယောက်၏ ခွန်အားဖြင့်ဆိုလျှင် မိနစ်အနည်းငယ်ခန့် ပြေးလွှားပြီးသည်နှင့် ဆက်လက်၍ တောင့်ခံနိုင်မည် မဟုတ်ပေ။

သို့သော် ရွှီယန်၏ ခန္ဓာကိုယ် ကြံ့ခိုင်မှုက အလွန် ကောင်းမွန်လှပေသည်။ သူသည် ငယ်စဉ်ကတည်းက တောတောင်ထဲတွင် ကြီးပြင်းလာခဲ့သူဖြစ်ပြီး ကျောင်းတက်စဉ်ကလည်း ဘတ်စကတ်ဘော အသင်းတွင် ပါဝင်ခဲ့သူဖြစ်သည်။ အချိန်ကြာမြင့်စွာ လေ့ကျင့်ခန်း လုပ်ဆောင်ခဲ့မှုများကြောင့် သူ၏ ခန္ဓာကိုယ်မှာ အလွန်တရာ သန်စွမ်းကြံ့ခိုင်နေလေသည်။ ယခုအခါ လျင်မြန်ဖြတ်လတ်မှု စွမ်းရည်ကိုပါ ရရှိလိုက်ပြီဖြစ်ရာ ကျားသစ်တောင်ပံ တပ်လိုက်သကဲ့သို့ ပို၍ပင် စွမ်းအားများ ထက်မြက်လာတော့သည်။

ရွှီယန်သည် ခြံဝင်းထဲသို့ ထွက်လာခဲ့ပြီး အိမ်၏ ခြံစည်းရိုးတံတိုင်းကို တစ်ချက် ကြည့်လိုက်လေသည်။ စွမ်းရည်အသစ်ကို ရရှိထားသဖြင့် လက်ယားနေပြီဖြစ်ရာ သူသည် ချက်ချင်းပင် အရှိန်ယူ၍ ပြေးသွားလိုက်ပြီး တံတိုင်းပေါ်ရှိ အနည်းငယ် ကြွတက်နေသော အုတ်ခဲတစ်လုံးပေါ်သို့ ခြေလှမ်းတစ်ချက် နင်းလိုက်ကာ လက်နှစ်ဖက်ဖြင့် တံတိုင်းကို အားပြု၍ အပေါ်သို့ ခုန်တက်လိုက်လေသည်။

ထို့နောက် လေထဲတွင် ကိုယ်ကိုလှည့်ကာ တံတိုင်းပေါ်တွင် အသာအယာ ထိုင်ချလိုက်လေသည်။ ဤလုပ်ဆောင်ချက် တစ်ဆက်တည်းမှာ ရေစီးကြောင်းအလား အလွန်တရာ ချောမွေ့သေသပ်လွန်းလှပေသည်။

"ဟိုက် ဒီစွမ်းရည်က တကယ် မိုက်တာပဲ"

"ရှေးခေတ်ကသာဆိုရင် သေချာပေါက် သူခိုးဘုရင် ဖြစ်လောက်တယ်"

ရွှီယန်တစ်ယောက် အံ့ဩတကြီးဖြင့် ချီးကျူးလိုက်လေသည်။

ထိုအချိန်မှာပင် တံတိုင်းပေါ်တွင် အနားယူနေသော တောကြောင်တစ်ကောင်က ရွှီယန် ရုတ်တရက် ခုန်တက်လာသည်ကို မြင်လိုက်ရသဖြင့် အလန့်တကြား ဖြစ်သွားလေသည်။ ကြောင်လေး၏ မျက်နှာပေါ်တွင် အံ့ဩထိတ်လန့်နေသည့် အမူအရာများ ပေါ်ထွက်လာပြီး မျက်လုံးနှစ်လုံးမှာ ပြူးကျယ်နေကာ ပါးစပ်ကလည်း ဟလျက်သားဖြင့် မှင်သက်နေတော့သည်။

'ဒီစွမ်းရည်ကို မင်းတို့ ခြေနှစ်ချောင်း သတ္တဝါတွေလည်း တတ်နေပြီလား'

'ဒီလိုမျိုး လွယ်လွယ်လေး ခုန်တက်လာတာလား'

တကယ့်ကို ဂျက်ကီချန်း တစ်ယောက် ခြံထဲ ရောက်နေတာပဲ နောက်နေတာ မဟုတ်ဘူး။

ရွှီယန်က တောကြောင်လေးကို မြင်သောအခါ အနည်းငယ် ပြုံးပြလိုက်ပြီးနောက် တံတိုင်းပေါ်မှနေ၍ အောက်သို့ တိုက်ရိုက် ခုန်ဆင်းလိုက်လေသည်။

စနစ်က တကယ့်ကို ပစ္စည်းကောင်း တစ်ခုပင် ဖြစ်လေသည်။ ဤစွမ်းရည်ကို ရရှိထားခြင်းဖြင့် နောင်တွင် တောတောင်ရှာဖွေရေး ပြုလုပ်ရာ၌ လုံခြုံရေးအတွက် ပို၍ စိတ်ချရပြီ ဖြစ်သည်။ ကျားနှင့် ဝက်ဝံမည်းတို့နှင့် ကြုံတွေ့ရလျှင်လွဲ၍ အခြား အခြေအနေများတွင်ဆိုလျှင် သူ သေချာပေါက် ထွက်ပြေးလွတ်မြောက်နိုင်မည် ဖြစ်လေသည်။

စွမ်းရည်အသစ်ကို ရရှိပြီးနောက် ရွှီယန်၏ စိတ်အခြေအနေက အလွန်ပင် ကောင်းမွန်နေလေသည်။ သူသည် အိမ်ရှိ တာ့ဟွမ်ကို အစာကျွေးပြီးနောက် အခန်းထဲသို့ ပြန်ဝင်ကာ ကျေနပ်အားရစွာဖြင့် အိပ်စက်အနားယူလိုက်တော့သည်။

ရွှီယန်တို့ မိသားစုတွင် ခြံဝင်းနှစ်ခု ရှိလေသည်။ ကုန်စုံဆိုင်ဘက်တွင် ခြံဝင်းတစ်ခုရှိပြီး ရွာထဲတွင်လည်း ခြံဝင်းတစ်ခု ရှိသေးသည်။ ပုံမှန်အားဖြင့် မိဘများက ကုန်စုံဆိုင်ရှိရာ ခြံဝင်းတွင်သာ နေထိုင်လေ့ရှိကြသည်။ ဆိုင်စောင့်ရန်နှင့် ဈေးရောင်းရန် လိုအပ်သောကြောင့် ဖြစ်သည်။ တစ်ခါတစ်ရံမှသာ ရွာထဲရှိ အိမ်သို့ ပြန်လာတတ်ကြလေသည်။ ရွှီယန်ကမူ ရွာထဲရှိ အိမ်တွင်သာ နေထိုင်လေသည်။

သူတို့၏ ကုန်စုံဆိုင်မှာ အတော်လေး ကြီးမားပြီး ကုန်ပစ္စည်း မျိုးစုံလည်း ရရှိနိုင်လေသည်။ မိဘများက စိတ်သဘောထား ပြည့်ဝသူများဖြစ်ပြီး ဈေးနှုန်းများကိုလည်း သင့်တင့်မျှတစွာ ရောင်းချလေ့ရှိသောကြောင့် ရွာသူရွာသားများက သူတို့ဆိုင်တွင် ဈေးဝယ်ရသည်ကို အလွန်နှစ်သက်ကြလေသည်။

ဤသို့ဖြင့် အဓိပ္ပာယ်ရှိလှသော နေ့တစ်နေ့ ကုန်ဆုံးသွားခဲ့ပြန်လေသည်။

နောက်တစ်နေ့ နံနက်ခင်းတွင် ရွှီယန်သည် ဟင်းသီးဟင်းရွက်ခင်းကို ရှင်းလင်းရန် အလုပ်များနေလေသည်။ ကြီးထွားလာသော မုန်လာဥများကို နှုတ်ယူကာ အရွက်များကို ကိုင်၍ မြေကြီးများ ပြောင်စင်သွားအောင် ခါချလိုက်ပြီးနောက် ပလတ်စတစ်အိတ်ထဲသို့ ထည့်လိုက်လေသည်။ ထို့အပြင် ခရမ်းချဉ်သီး အချို့ကိုလည်း ခူးဆွတ်လိုက်သေးသည်။

တောရွာရှိ အိမ်တိုင်းလိုလိုတွင် ဟင်းသီးဟင်းရွက်ခင်းလေးများ ရှိတတ်ကြပြီး ဟင်းသီးဟင်းရွက်နှင့် သစ်သီးဝလံ မျိုးစုံကို စိုက်ပျိုးထားလေ့ ရှိကြသည်။ များသောအားဖြင့်တော့ မိမိတို့ဘာသာ စားသုံးရန်အတွက်သာ ဖြစ်ပြီး လိုအပ်ပါက ခြံထဲဆင်း၍ ခူးဆွတ်ရုံသာ ဖြစ်လေသည်။ တစ်ခါတစ်ရံ အသီးအနှံများ အထွက်တိုးပါက အိမ်နီးချင်းများကို ဝေငှပေးတတ်သလို ဈေးကွက်တွင် သွားရောက်ရောင်းချလေ့လည်း ရှိကြသည်။

တောင်ပေါ်ရွာလေးရှိ လူများ၏ ဝင်ငွေမှာ သိပ်မမြင့်မားလှသဖြင့် ရနိုင်သလောက် ငွေရှာကြရခြင်း ဖြစ်လေသည်။

တောင်ထွက်ပစ္စည်း ဈေးကွက်မှာ မွန်းလွဲ ၃ နာရီခွဲတွင် စတင်လေ့ရှိသည်။ ပုံမှန်အားဖြင့် တောင်တွင်းရှာဖွေသူများက နံနက်ပိုင်းတွင် တောင်ပေါ်တက်၍ ပစ္စည်းများ ရှာဖွေကြပြီး မွန်းလွဲပိုင်းတွင် ဈေးကွက်သို့ လာရောက်ရောင်းချတတ်ကြလေသည်။

မွန်းလွဲပိုင်းသို့ ရောက်သောအခါ ရွှီယန်သည် အိမ်ရှိ လျှပ်စစ်သုံးဘီးဆိုင်ကယ်လေးကို စီးနင်းကာ ထွက်လာခဲ့လေသည်။ ဆိုင်ကယ်နောက်ခန်းတွင် မှိုဝါများ အပြည့်ပါသော ဝါးတောင်းတစ်လုံး လှပသေသပ်သော သမင်ချိုနှစ်ချောင်း မုန်လာဥများနှင့် ခရမ်းချဉ်သီးများကို တင်ဆောင်ထားပြီး တောင်ထွက်ပစ္စည်း ဈေးကွက်ရှိရာသို့ ဦးတည်ကာ မောင်းနှင်သွားလေတော့သည်။

လျှပ်စစ်သုံးဘီးဆိုင်ကယ်၏ အမြန်နှုန်းမှာ သိပ်မမြန်လှသဖြင့် ရွှီယန်သည် တိုက်ရိုက်ထုတ်လွှင့်မှုကို ဖွင့်လှစ်ရန် ဆုံးဖြတ်လိုက်လေသည်။ ဒရုန်းလေးကလည်း အမြန်ဆုံးမုဒ်ကို ဖွင့်ထားပါက အလွယ်တကူ လိုက်ပါနိုင်လေသည်။

မကြာမီမှာပင် တိုက်ရိုက်ထုတ်လွှင့်မှုအတွင်းသို့ လူများ ဝင်ရောက်လာကြတော့သည်။ အချိန်တိုအတွင်းမှာပင် ကြည့်ရှုသူ အရေအတွက်မှာ လေးရာကျော်အထိ ရောက်ရှိသွားလေပြီ။

တိုက်ရိုက်ထုတ်လွှင့်ခဲ့သည်မှာ နှစ်ရက်သာ ရှိသေးသော လူသစ်တစ်ယောက်အနေဖြင့် ဤကိန်းဂဏန်းမှာ အလွန်တရာ ကောင်းမွန်လှပေသည်။

မနေ့ညက ရွှီယန်သည် တောတောင်ရှာဖွေရေး ခရီးစဉ်မှ ဗီဒီယိုများကို တည်းဖြတ်၍ တင်ခဲ့သေးသည်။ ထိုဗီဒီယိုများထဲတွင် ရွှေရောင်မှိုများ တူးဖော်ရရှိပုံ တောသမင်ငယ်လေးနှင့် တွေ့ဆုံပုံနှင့် သမင်ချို ကောက်ရပုံများ ပါဝင်လေသည်။ လက်ရှိအချိန်အထိ ဗီဒီယို၏ Like အရေအတွက်မှာ သုံးထောင်ကျော်နေပြီဖြစ်ပြီး ဆက်လက်၍လည်း လျင်မြန်စွာ တိုးပွားနေဆဲ ဖြစ်လေသည်။ ဤကဲ့သို့သော ဗီဒီယိုမျိုးကို လူအများအပြားက အလွန်နှစ်သက်ကြကြောင်း ရှင်းလင်းစွာ သိသာနေလေသည်။

ထို့ကြောင့် ယနေ့ ရွှီယန် တိုက်ရိုက်ထုတ်လွှင့်မှု ဖွင့်လိုက်သည်နှင့် တစ်ပြိုင်နက် လူအများအပြားက သိချင်စိတ်ပြင်းပြစွာဖြင့် ဝင်ရောက်လာကြခြင်း ဖြစ်လေသည်။

တောင်ပေါ်ရွာလေးရှိ လမ်းကလေးပေါ်တွင် သာမန် လျှပ်စစ်သုံးဘီးဆိုင်ကယ်လေး တစ်စီးကို မောင်းနှင်လာသော ရုပ်ရည်ချောမောသည့် လူငယ်လေးတစ်ဦး။ ထို့အပြင် ဆိုင်ကယ်၏ ယာဉ်မောင်းဘေးခုံတွင် ခွေးတစ်ကောင်လည်း လိုက်ပါလာသေးသည်။

'နေပါဦး ခွေးတစ်ကောင် ဟုတ်လား’

ကွန်ရက်သုံးစွဲသူများက တိုက်ရိုက်ထုတ်လွှင့်မှု မြင်ကွင်းကို သေချာစွာ ကြည့်လိုက်သောအခါ လျှပ်စစ်သုံးဘီးဆိုင်ကယ်၏ ယာဉ်မောင်းဘေးခုံတွင် တာ့ဟွမ်က ခန့်ညားထည်ဝါစွာ ထိုင်နေသည်ကို တွေ့လိုက်ရသည်။ ၎င်းက ဖင်ကိုအောက်ချကာ ရှေ့ခြေနှစ်ချောင်းကို ဆိုင်ကယ်လက်ကိုင်ပေါ်တွင် တင်ထားလေသည်။

အားလုံးမှာ လုံးဝ ကြောင်အမ်းအမ်း ဖြစ်သွားကြတော့သည်။

'ဘာတွေဖြစ်နေတာလဲ ….အခုခေတ် ခွေးတွေက ဒီလိုမျိုး နေတတ်နေကြပြီလား’

"ငါ မျက်စိမှားတာလား ဒါမှမဟုတ် အဲ့ဒါ တကယ်ပဲ ခွေးတစ်ကောင်လား"

"ဟိုက် ခွေးက ဒီလိုမျိုး ကားစီးတတ်တာလား နောက်ခန်းက ကုန်တင်တဲ့နေရာမှာ ရပ်နေရမှာ မဟုတ်ဘူးလား"

"ဟားဟားဟား အစ်ကို့ရဲ့ ခွေးက တော်တော်လေး စိတ်ဝင်စားဖို့ ကောင်းတာပဲ"

"ဒီခွေးက နတ်ဝင်ပူးနေတာလား"

အားလုံးက ချက်ချင်းပင် မှတ်ချက်များ ရေးသားလာကြလေသည်။

ရွှီယန်က လျှပ်စစ်သုံးဘီးဆိုင်ကယ်ကို မောင်းနှင်ရင်း တောင်ခြေရှိ တောင်ထွက်ပစ္စည်း ဈေးကွက်ဆီသို့ ဦးတည်သွားနေလေသည်။ သူ၏ ရင်ဘတ်တွင် အသံဖမ်းစက်လေး တစ်ခုကို ချိတ်ဆွဲထားပြီး ကွန်ရက်သုံးစွဲသူများကို ပြောပြနေလေသည်။

"ဒီနေ့ မွန်းလွဲပိုင်းကျရင် တောင်ထွက်ပစ္စည်း ဈေးကွက်ကို သွားမယ် ဈေးက နေ့လယ်တိုင်း ဖွင့်တယ် စနေ တနင်္ဂနွေတွေဆိုရင် ပိုပြီး စည်ကားတယ် နောက်ကျမှသွားရင် နေရာကောင်းတောင် ရမှာမဟုတ်ဘူး"

"ဒီမှာက သတ်မှတ်ထားတဲ့ ဈေးဆိုင်ခန်းတွေ မရှိဘူး ရောက်တဲ့နေရာမှာ နေရာလွတ်ရင် ချရောင်းလို့ရတယ်"

"တောင်တွင်းရှာဖွေသူ အများစုက မနက်ပိုင်း တောင်ပေါ်တက်ပြီး ပစ္စည်းရှာကြတယ် နေ့လယ်ပိုင်းကျရင် တောင်ထွက်ပစ္စည်း ဈေးကွက်မှာ သွားရောင်းကြတယ်"

"နေ့တိုင်း အရမ်းစည်ကားပြီး လာတဲ့လူတွေလည်း အများကြီးပဲ"

ရွှီယန်သည် စကားပြောနေရင်းနှင့်ပင် မှတ်ချက်များကို တစ်ချက်ကြည့်လိုက်လေသည်။ အားလုံးက တာ့ဟွမ်ကို စိတ်ဝင်စားနေကြသည်ကို မြင်သောအခါ သူက ပြုံးလျက် ရှင်းပြလိုက်လေသည်။

"တာ့ဟွမ်က အရမ်းဉာဏ်ကောင်းတယ် ကျွန်တော့်အဖေနဲ့ အမေ ကားစီးရင် ဒီလိုမျိုး ထိုင်တာကိုမြင်တော့ သူလည်း လိုက်အတုခိုးပြီး ယာဉ်မောင်းဘေးခုံမှာ ထိုင်တာလေ"

"ကျွန်တော်တို့လည်း အကျင့်ပါနေပြီဆိုတော့ ဘာမှ မထူးဆန်းတော့ပါဘူး”