အခန်း ၁၆

အခန်း (၁၆) အတုတွေ အဲ့ဒါ အတုတွေပဲ ဖြစ်ရမယ်

"ဗဟုသုတအနေနဲ့ မှတ်ထားလို့ရအောင် ပြောပြမယ် တောရိုင်း သစ်တောဖားတွေက နိုင်ငံတော်အဆင့် နှစ် သတ်မှတ်ထားတဲ့ ကာကွယ်စောင့်ရှောက်ရမယ့် တိရစ္ဆာန်တွေပါ"

"ဆိုလိုတာက ဒီကောင်လေးတွေ အားလုံးဟာ ဥပဒေရဲ့ အကာအကွယ်ပေးမှုအောက်မှာ ရှိနေကြတယ်"

"သူတို့ကို ဖမ်းဖို့ဆိုတာ ဝေလာဝေး ကျွန်တော်က သူတို့ရဲ့ ခြေထောက်တစ်ချောင်းကို ထိခိုက်မိအောင် လုပ်လိုက်မိရင်တောင် ရဲစခန်းမှာ သွားပြီး ဖြေရှင်းချက် ပေးရလိမ့်မယ်"

"မွေးမြူရေးခြံတွေက ဖားတွေ ဒါမှမဟုတ် တစ်ပိုင်းတစ်စ မွေးမြူထားတဲ့ ဖားတွေကိုတော့ ဖမ်းခွင့်ရှိသလို စားခွင့်လည်း ရှိတယ်"

"ဒရယ်ပြောက်တွေနဲ့ အတူတူပါပဲ"

ရွှီယန်က အားလုံးကို ရှင်းပြလိုက်လေသည်။

ထိုအခါမှသာ ကွန်ရက်သုံးစွဲသူများက သဘောပေါက်သွားကြတော့သည်။ တိရစ္ဆာန်များကို တောရိုင်းနှင့် မွေးမြူရေးဟူ၍ ခွဲခြားထားကြောင်းကို သူတို့ နားလည်သွားကြလေသည်။

တိရစ္ဆာန် အမျိုးအစားတူပင်ဖြစ်သော်လည်း တောရိုင်းဖြစ်ပါက ကာကွယ်စောင့်ရှောက်ရမည့် တိရစ္ဆာန်ဖြစ်ပြီး မွေးမြူရေးဖြစ်ပါက စားသုံးခွင့်ရှိကြောင်း သိရှိသွားကြလေသည်။ တောင်ပိုင်းဒေသများတွင် မိကျောင်းများကို မွေးမြူသူများ ရှိပြီး အင်တာနက်ပေါ်တွင်ပင် မိကျောင်းသားများကို တရားဝင် ဝယ်ယူခွင့်ရှိနေခြင်းက ဤအကြောင်းရင်းကြောင့်ပင် ဖြစ်လေသည်။

"အဲ့ဒါကြောင့် ဒီသစ်တောဖားလေးတွေကို ဒီအတိုင်း ကြည့်နေရုံပဲ ရမယ် တောတောင်ရှာဖွေသူ တစ်ယောက်အနေနဲ့ ဘယ်အရာတွေက ကာကွယ်စောင့်ရှောက်ရမယ့် တိရစ္ဆာန်တွေနဲ့ အပင်တွေဆိုတာကို ကွဲကွဲပြားပြား သိထားဖို့ လိုအပ်တယ်"

ရွှီယန်က ဆက်လက်၍ ပြောပြလိုက်လေသည်။

ဒုတိယမြောက် ရတနာရှိရာ နေရာမှာ အရှေ့မြောက် သစ်တောဖားများ အုပ်စုလိုက် ရှိနေသော နေရာဖြစ်ပြီး ဘာမှ မရရှိခဲ့သော်လည်း ရွှီယန်၏ စိတ်အခြေအနေက အလွန်ပင် ပေါ့ပါးနေလေသည်။ သူသည် အမြဲတမ်း စိတ်သဘောထား ကြီးမြတ်သူ တစ်ဦး ဖြစ်လေသည်။

ရွှီယန်သည် တောအုပ်ထဲတွင် ဆက်လက်၍ လှည့်ပတ်သွားလာနေလေသည်။

သူသည် သစ်သားတုတ်ရှည် တစ်ချောင်းကို ကိုင်ဆောင်ထားပြီး မြက်ပင်များကို အဆက်မပြတ် ဖယ်ရှားကာ တန်ဖိုးကြီး တောင်ထွက်ပစ္စည်းများ ရှိမရှိကို လိုက်လံရှာဖွေနေလေသည်။ ထိုသို့ ရှာဖွေနေရင်းနှင့်ပင် တတိယမြောက် ရတနာရှိရာ နေရာဆီသို့ တဖြည်းဖြည်း နီးကပ်လာခဲ့လေသည်။

ဤနေရာတစ်ဝိုက်တွင် ဆေးဘက်ဝင် အပင်များ အများအပြား ရှိနေလေသည်။ အရွက်မျိုးစုံက တစ်ခုနှင့်တစ်ခု ယှက်နွယ်နေကြရာ ကွန်ရက်သုံးစွဲသူများ ပြောသကဲ့သို့ပင် ကျွမ်းကျင်မှု အတွေ့အကြုံ မရှိပါက ၎င်းတို့အားလုံးကို မြက်ရိုင်းပင်များအဖြစ်သာ သတ်မှတ်မိကြမည်မှာ အသေအချာပင် ဖြစ်လေသည်။

နောက်ဆုံးတွင် ရွှီယန်သည် တတိယမြောက် ရတနာရှိရာ နေရာသို့ ရောက်ရှိလာခဲ့လေသည်။

သစ်မြစ်တစ်ခု၏ ဘေးတွင် ပေါက်ရောက်နေသော အရွက်အချို့ကို မြင်လိုက်ရသောအခါ ရွှီယန်က သူ၏ လုပ်ဆောင်မှုများကို ရပ်တန့်လိုက်ပြီး မျက်နှာပေါ်တွင် ဝမ်းသာပျော်ရွှင်နေသည့် အရိပ်အယောင်များ ပေါ်ထွက်လာတော့သည်။

ရွှီယန်၏ လုပ်ဆောင်မှုများ ရပ်တန့်သွားသည်ကို မြင်လိုက်ရသောအခါ တိုက်ရိုက်ထုတ်လွှင့်မှုအတွင်းရှိ ကွန်ရက်သုံးစွဲသူများ၏ စိတ်ထဲတွင် မကောင်းသော ခံစားမှုတစ်ခုက ချက်ချင်းပင် ဖြစ်ပေါ်လာကြတော့သည်။

'နေပါဦး သူတစ်ခုခု ရှာတွေ့သွားပြန်ပြီလား'

ထို့နောက် ရွှီယန်က ပြုံးလျက် အားလုံးကို အဖြေပြောပြလိုက်လေသည်။

"ဒီနေ့ကံက တကယ်ကို ကောင်းလွန်းတယ် တောရိုင်း ဂျင်ဆင်းတစ်ပင်ကို ရှာတွေ့သွားပြီဗျ"

"အရွက်ကို ကြည့်ပြီး ခန့်မှန်းရရင် အရွက်ခက် သုံးခုနဲ့ အရွက်ငါးရွက်ဆိုတော့ စံကိုက် တောရိုင်း ဂျင်ဆင်းပဲ"

"ပုံမှန်အားဖြင့် ဂျင်ဆင်းမှာ အမျိုးအစား သုံးမျိုးရှိတယ် ပထမတစ်မျိုးက ယွမ် ဂျင်ဆင်းလို့ ခေါ်တဲ့ ဆေးဝါးစိုက်ပျိုးရေးခြံတွေကနေ ထုတ်လုပ်တဲ့ အမျိုးအစားပဲ သူ့ရဲ့ ဆေးဘက်ဝင် အာနိသင်က အနိမ့်ဆုံးဖြစ်သလို ဈေးလည်း အပေါဆုံးပဲ တစ်ကျင်းကို ယွမ်ဆယ်ဂဏန်းလောက်ပဲ ရှိပြီး မုန်လာဥနဲ့ ဘာမှမကွာဘူး"

"ဒုတိယတစ်မျိုးက လင်ရှား ဂျင်ဆင်းလို့ ခေါ်တယ် အဲ့ဒါက တောင်ကုန်းတစ်ခုကို ငှားရမ်းပြီး အထဲကို ဂျင်ဆင်းစေ့တွေ ကြဲချထားတာ အချိန်တန်ရင် အဆင့်လိုက် ပြန်ပြီး တူးယူကြတယ် ငါးနှစ်သက်တမ်း ရှိသလို ဆယ်နှစ်သက်တမ်း ရှိတာတွေလည်း ရှိတယ်"

"ချန်ပိုင်တောင်တန်းမှာ ဂျင်ဆင်းစိုက်ပျိုးရေးခြံတွေ အများကြီးရှိတယ် အကုန်လုံးက သူဌေးကြီးတွေ ငှားရမ်းထားကြတာချည်းပဲ ဂျင်ဆင်းတွေကို နိုင်ငံခြားကို တင်ပို့ဖို့အတွက် သီးသန့်စိုက်ပျိုးထားကြတာ... အဲ့ဒီနေရာတွေမှာဆိုရင် မြေကွက်တစ်ခုလုံးမှာ ဂျင်ဆင်းတွေ အပြည့်စိုက်ထားတာဆိုတော့ ကားတွေနဲ့တောင် လာသယ်ရတယ်"

"တတိယတစ်မျိုးကတော့ တောရိုင်း ဂျင်ဆင်းပဲ တောရိုင်း ဂျင်ဆင်းတွေရဲ့ အရေအတွက်က အရမ်းနည်းပါးသလို ကြီးထွားမှုကလည်း အရမ်းနှေးကွေးတယ် ဖြစ်ပေါ်လာဖို့ အချိန်အတော်ကြာ ယူရတယ်... ဒီလိုပြောရင် ပိုရှင်းမယ် ပုံမှန်အားဖြင့် တောရိုင်း ဂျင်ဆင်းတစ်ပင် ကြီးထွားလာဖို့ အနည်းဆုံး အနှစ်ငါးဆယ်လောက်တော့ ကြာတယ်"

"အဲ့ဒါကြောင့် ဂျင်ဆင်းတစ်ပင်ကို ယွမ်သောင်းချီပြီး ရောင်းရတာက ပုံမှန်ပါပဲ"

သူ၏ စကားကို ကြားလိုက်ရသောအခါ တိုက်ရိုက်ထုတ်လွှင့်မှုအတွင်းရှိ ကွန်ရက်သုံးစွဲသူများအားလုံး မှင်သက်သွားကြတော့သည်။

'နေပါဦး အစ်ကိုက... တကယ်ကြီး ဂျင်ဆင်း တွေ့သွားတာလား'

မှတ်ချက်များက ချက်ချင်းပင် ဆူညံပွက်လောရိုက်သွားတော့သည်။

"အဲ့ဒါ အတုကြီးလို့ ငါ့ကို အမြန်ပြောစမ်း အတုတွေ အဲ့ဒါ အတုတွေပဲ ဖြစ်ရမယ်"

"ဒီအစ်ကိုက ရတနာရှာဖွေတဲ့ စနစ်ကြီးများ ပါနေတာလား"

"ဟန်ဆောင် ရိုက်ကူးထားတာ သေချာပေါက် ဟန်ဆောင် ရိုက်ကူးထားတာ ငါလုံးဝ မယုံဘူး"

"မုန်လာဥ သေချာပေါက် မုန်လာဥပဲ ဖြစ်ရမယ် အစ်ကို တွေ့သွားတာက သေချာပေါက် မုန်လာဥပဲ"

"လခွီး သူများပိုက်ဆံရှာနိုင်တာကို မြင်ရတာ ငါပိုက်ဆံရှုံးတာထက်တောင် ပိုပြီး ခံစားရခက်သေးတယ်"

လူတိုင်းက တကယ်ကို ခံစားရခက်နေကြကြောင်း ရှင်းလင်းစွာ သိသာနေလေသည်။

ထိုအချိန်တွင် ရွှီယန်က ဆောင့်ကြောင့်ထိုင်ချလိုက်ပြီး အိတ်ကပ်ထဲမှ အနီရောင် ကြိုးတစ်ချောင်းကို ထုတ်ယူကာ မြက်ရိုင်းပင်နှင့် တူသော အပင်၏ ပင်စည်တွင် ချည်နှောင်လိုက်လေသည်။

ကွန်ရက်သုံးစွဲသူများက သူ၏ လုပ်ဆောင်မှုကို မြင်သောအခါ အာရုံစိုက်သွားကြပြန်သည်။

"အစ်ကို ဘာလို့ ဂျင်ဆင်းကို အနီရောင်ကြိုးနဲ့ သွားချည်နေတာလဲ"

"အဲ့ဒါက ဘယ်လို လုပ်ဆောင်ချက်မျိုးလဲ"

အားလုံးက ချက်ချင်းပင် မေးမြန်းလိုက်ကြလေသည်။

ရွှီယန်က အားလုံးကို ရှင်းပြလိုက်လေသည်။

"ဒါက ရိုးရာဓလေ့ တစ်ခုပါ ဂျင်ဆင်းတွေက သက်တမ်းကြာလာရင် နတ်ဝင်ပူးတတ်တယ်လို့ ဆိုကြတယ် အနီရောင်ကြိုးနဲ့ မချည်ထားဘူးဆိုရင် ထွက်ပြေးသွားတတ်တယ်တဲ့"

"ဒီဘက်က လူတွေက အဲ့ဒီအယူအဆကို အရမ်းယုံကြည်ကြတယ် အဲ့ဒါကြောင့် တောရိုင်း ဂျင်ဆင်းကို တွေ့ပြီဆိုတာနဲ့ ဂျင်ဆင်း ထွက်မပြေးသွားအောင် အရွက်တွေကို အနီရောင်ကြိုးနဲ့ အရင်ဆုံး ချည်နှောင်ထားရတယ်"

"နောက်ပြီးတော့ ကံကောင်းခြင်း နိမိတ်တစ်ခု အနေနဲ့လည်း လုပ်ကြတာပါ"

"တချို့ ဂျင်ဆင်းတူးတဲ့ အဖွဲ့တွေဆိုရင် ဂျင်ဆင်းကို တွေ့တာနဲ့ ဦးချပြီး ပူဇော်ပသတာတွေတောင် လုပ်ကြသေးတယ်"

"တချို့အရာတွေက ယုံတမ်းစကားတွေ ဖြစ်ပေမယ့်လည်း ယုံကြည်သင့်တာကိုတော့ ယုံကြည်ရမှာပဲ"

သူ၏ ရှင်းပြချက်ကို ကြားလိုက်ရသောအခါ အားလုံးမှာ လုံးဝ ကြောင်အမ်းအမ်း ဖြစ်သွားကြတော့သည်။

'ဂျင်ဆင်းက ထွက်ပြေးသွားမှာကို ကြောက်လို့ ဟုတ်လား... ဒီလောက်တောင် အဓိပ္ပာယ်မဲ့လွန်းတာလား'

မှတ်ချက်များက ထပ်မံ၍ ဆူညံပွက်လောရိုက်လာပြန်သည်။

"အစ်ကိုပြောတာ မှန်တယ် တစ်ခါက ကျွန်တော် ဂျင်ဆင်းတစ်ပင်ကို တူးပြီး စက်ဘီးပေါ်မှာ တင်ထားခဲ့တယ် အနီရောင်ကြိုးနဲ့ မချည်ထားမိဘူး အဲ့ဒါ ဂျင်ဆင်းက ကျွန်တော့် စက်ဘီးကို စီးပြီး ထွက်ပြေးသွားတာပဲ"

"ဂျင်ဆင်းတွေ ထွက်ပြေးတတ်တယ်ဆိုတာကို ကျွန်တော် ကိုယ်တိုင် မြင်ဖူးတယ် အရှေ့မြောက်ဒေသကနေ ဟိုင်နန်အထိကို ထွက်ပြေးသွားတာလေ ဟိုင်နန်မှာ ကျွန်တော် တွေ့ခဲ့တဲ့ သူဌေးတစ်ယောက်က သူ့ရဲ့ ဂျင်ဆင်းက အရှေ့မြောက်ဒေသကနေ ပြေးလာတာလို့ ပြောတယ် ပြီးတော့ သူက ဟိုင်နန်ရောက်မှ အဲ့ဒီဂျင်ဆင်းကို ဖမ်းမိတာတဲ့"

"ကျွန်တော် သက်သေခံပေးနိုင်တယ် ကျွန်တော်က အဲ့ဒီ ဂျင်ဆင်းပင်ပဲ ကျွန်တော်က နတ်ဝင်ပူးနေတာလေ"

"ဟားဟားဟား တစ်ယောက်ထက် တစ်ယောက် ပိုပြီး အဓိပ္ပာယ်မဲ့လွန်းနေကြပြီ"

ကွန်ရက်သုံးစွဲသူများက တိုက်ရိုက်ထုတ်လွှင့်မှုအတွင်း၌ အဆက်မပြတ် နောက်ပြောင်နေကြလေသည်။

ရွှီယန်က မှတ်ချက်များကို ဆက်လက်၍ မကြည့်တော့ဘဲ သမင်ချို ပေါက်တူးကို ထုတ်ယူကာ မြေကြီးကို သေချာစွာ စတင်တူးဆွတော့သည်။ ချန်ပိုင်တောင်တန်းတွင် တန်ဖိုးအကြီးမားဆုံး အရာကို ပြပါဆိုလျှင် သေချာပေါက် တောရိုင်း ဂျင်ဆင်းပင် ဖြစ်လေသည်။

ဤဒေသမှာ သဘာဝအတိုင်း ဂျင်ဆင်းများ ပေါက်ရောက်ရာ နေရာတစ်ခုပင် ဖြစ်လေသည်။ သို့သော် တောတောင်ရှာဖွေသူများ၏ အဆက်မပြတ် ရှာဖွေတူးဖော်မှုများကြောင့် တောရိုင်း ဂျင်ဆင်းများ၏ အရေအတွက်မှာ တဖြည်းဖြည်း နည်းပါးလာခဲ့လေသည်။

ထို့အပြင် လင်ရှား ဂျင်ဆင်းများကို အများအပြား စိုက်ပျိုးလာကြပြီဖြစ်ရာ တောရိုင်း ဂျင်ဆင်းများ၏ ဆေးဘက်ဝင် အာနိသင်ကို မမီနိုင်သော်လည်း လုံးဝ အစားထိုး အသုံးပြုနိုင်လေသည်။ ထို့ကြောင့် ဈေးကွက်အတွင်း တောရိုင်း ဂျင်ဆင်းများ၏ အရေအတွက်မှာ အလွန်တရာ ရှားပါးလွန်းလှပြီး တစ်ပင်ရှာတွေ့ပါက အလွန်တန်ဖိုး ကြီးမားလေသည်။

ရွှီယန်သည် မြေကြီးများကို ညင်သာစွာ ဖယ်ရှားလိုက်ရာ မကြာမီမှာပင် မြေကြီးထဲရှိ ဂျင်ဆင်းကို လူတိုင်းက မြင်တွေ့လိုက်ကြရသည်။

ဤဂျင်ဆင်းပင်မှာ သိပ်မကြီးလှဘဲ သက်တမ်းမှာ အနှစ်လေးဆယ်ခန့် ရှိမည်ဟု ရွှီယန်က ခန့်မှန်းလိုက်လေသည်။ ဂျင်ဆင်းပင်မှာ မကြီးမားသော်လည်း ဂျင်ဆင်းမြစ်များမှာမူ အလွန်များပြားလှပြီး ရှုပ်ထွေးစွာ ဖြာထွက်နေလေသည်။

"ဂျင်ဆင်းတူးတဲ့အခါ သမင်ချို ပေါက်တူး ဒါမှမဟုတ် နွားချို ပေါက်တူးကို အသုံးပြုရတယ် ဘာလို့လဲဆိုတော့ တိရစ္ဆာန်တွေရဲ့ ဦးချိုတွေက ဂျင်ဆင်းမြစ်တွေကို မထိခိုက်စေနိုင်လို့ပဲ"

"သံထည်ပစ္စည်းတွေကို လုံးဝ အသုံးမပြုရဘူး ဂျင်ဆင်းမြစ်တွေကို ထိခိုက်သွားပြီဆိုရင် ဂျင်ဆင်းက မပြည့်စုံတော့ဘူးလေ"

ရွှီယန်က ထပ်မံ၍ ရှင်းပြလိုက်ပြန်သည်။

အရွက်ခက် သုံးခုနှင့် အရွက်ငါးရွက်ပါသော ဂျင်ဆင်း၏ သက်တမ်းမှာ ခန့်မှန်းခြေ အနှစ်ငါးဆယ်ခန့် ရှိပြီး ဈေးနှုန်းအားဖြင့် ယွမ်ခြောက်သောင်း ခုနစ်သောင်းခန့် ရရှိနိုင်လေသည်။

အကယ်၍ အရွက်ခက် ခြောက်ခုပါသော အနှစ်ရှစ်ဆယ် သက်တမ်းရှိ ဂျင်ဆင်းသာဆိုလျှင် ယွမ်နှစ်သိန်းအထက်တွင် ရောင်းချရနိုင်လေသည်။ သို့သော် ၎င်းတို့မှာ တကယ့် ရတနာစစ်စစ်များ ဖြစ်ကြပြီး ကြုံတွေ့နိုင်ရန်မှာ အလွန်တရာ ခက်ခဲလှပေသည်။ အရွက်ခက် ငါးခုနှင့် ခြောက်ခုပါသော ဂျင်ဆင်းများကြားရှိ ကွာခြားချက်မှာ အလွန်တရာ ကြီးမားလှပေသည်။

တိုက်ရိုက်ထုတ်လွှင့်မှုအတွင်းရှိ ကြည့်ရှုသူ အရေအတွက်မှာ လျင်မြန်စွာ တိုးပွားလာနေပြီး မကြာမီမှာပင် သုံးထောင်ကျော်သွားကာ သုံးထောင့်လေးရာကျော်အထိ ရောက်ရှိသွားလေပြီ။

ရွှီယန်က ဂျင်ဆင်းတူးနေသည်ကို မြင်သောအခါ လူအများအပြားက ဝင်ရောက်ကြည့်ရှုလာကြခြင်း ဖြစ်လေသည်။

ထို့အပြင် ဆေးဆိုင်အချို့၏ တရားဝင် အကောင့်များကပင် ရွှီယန်၏ တိုက်ရိုက်ထုတ်လွှင့်မှုကို ဝင်ရောက်ကြည့်ရှုလာကြလေသည်။

မကြာမီမှာပင် ရွှီယန်သည် ဂျင်ဆင်းတစ်ပင်လုံးကို အကုန်အစင် တူးဖော်နိုင်ခဲ့လေသည်။ ဂျင်ဆင်း၏ ပင်စည်မှာ သိပ်မကြီးလှဘဲ လက်ဖဝါးအရွယ်အစားပင် မရှိသလို ပုံသဏ္ဌာန်မှာလည်း ကောက်ကွေးနေပြီး လူပုံစံနှင့် အနည်းငယ် တူနေလေသည်။

သို့သော် ၎င်း၏ ဂျင်ဆင်းမြစ်များမှာမူ အလွန်များပြားလှပြီး ရှုပ်ထွေးစွာ ဖြာထွက်နေကြသည်။ ဖြန့်ခင်းကြည့်လိုက်မည်ဆိုလျှင် လူတစ်ယောက်၏ လက်မောင်းတစ်ဖက်စာခန့် အရှည်ရှိလေသည်။

ဤသည်မှာ တောရိုင်း ဂျင်ဆင်းပင် ဖြစ်လေသည်။ ကြီးထွားမှု အလွန်နှေးကွေးသော်လည်း အာဟာရတန်ဖိုး အလွန်မြင့်မားသော တောတောင်ရတနာ တစ်ပါးပင် ဖြစ်လေသည်။ ၎င်းတို့သည် တောင်တန်းကြီး၏ အနှစ်သာရများသဖွယ် ဖြစ်ကြသည်။

တူးဖော်ရရှိလာသော ဂျင်ဆင်းများကို ဆေးဆိုင်များသို့ ရောင်းချနိုင်ပြီး လူများ၏ ရောဂါများကို ကုသရာတွင် အသုံးပြုနိုင်လေသည်။

ဤကဲ့သို့သော တောရိုင်း ဂျင်ဆင်းများ၏ ဆေးဘက်ဝင် အာနိသင်မှာ အလွန်တရာ အားကောင်းလှရာ အနည်းငယ်မျှ ဖြတ်၍ စားသုံးလိုက်ရုံဖြင့် သွေးလည်ပတ်မှုကို ကောင်းမွန်စေပြီး ခန္ဓာကိုယ်၏ စွမ်းအင်များကို လှုံ့ဆော်ပေးနိုင်သည့် အစွမ်းသတ္တိ ရှိလေသည်။

သာမန် ယွမ် ဂျင်ဆင်းများကိုမူ တိုက်ရိုက် စားသုံးနိုင်သော်လည်း ခန္ဓာကိုယ်ကို အနည်းငယ် ပူအိုက်စေနိုင်လေသည်။ ဆယ်နှစ်သက်တမ်းရှိသော လင်ရှား ဂျင်ဆင်းများကို ရေနွေးကြမ်း လုပ်သောက်နိုင်သလို အနည်းငယ်မျှသာ စားသုံးသင့်လေသည်။

အနှစ်လေးဆယ် သက်တမ်းရှိသော တောရိုင်း ဂျင်ဆင်းများကိုမူ အနည်းငယ်စီသာ ဖြည်းဖြည်းချင်း စားသုံးရမည်ဖြစ်ပြီး တစ်ခါတစ်ရံတွင် အမှုန့်ကြိတ်၍ပင် အသုံးပြုရလေသည်။

"ကဲ ကြည့်ကြ ဒါက ပြည့်စုံတဲ့ တောရိုင်း ဂျင်ဆင်းတစ်ပင်ပဲ"

"တောရိုင်း ဂျင်ဆင်းတွေရဲ့ အရွယ်အစားက သိပ်မကြီးဘူး ဒါပေမယ့် ဂျင်ဆင်းမြစ်တွေက အရမ်းများတယ် အဲ့ဒါကြောင့် အလွယ်တကူ ခွဲခြားသိနိုင်တယ်"

"လင်ရှား ဂျင်ဆင်းတွေမှာ ဒီလောက်များတဲ့ ဂျင်ဆင်းမြစ်တွေ မရှိဘူး"

"ဈေးကွက် အခြေအနေအရ ခန့်မှန်းရရင် ဒီတောရိုင်း ဂျင်ဆင်းတစ်ပင်က ယွမ်နှစ်သောင်းလောက်တော့ ရနိုင်တယ်"

"ဒီနေ့ တောင်ပေါ်တက်ရတာ အချည်းနှီး မဖြစ်ခဲ့ဘူးဗျ"

ထို့နောက် ရွှီယန်သည် ကျိုးကျနေသော သစ်ကိုင်းတစ်ကိုင်းကို ရှာဖွေကာ သစ်ခေါက်ကို အပြည့်အစုံ ခွာယူလိုက်ပြီး ဂျင်ဆင်းကို မြေကြီး ရေညှိပင်များနှင့်အတူ ထိုသစ်ခေါက်ထဲတွင် ထည့်၍ သေချာစွာ ထုပ်ပိုးလိုက်လေသည်။ ထိုသို့ သိမ်းဆည်းထားခြင်းက ဂျင်ဆင်းကို အလတ်ဆတ်ဆုံး အခြေအနေတွင် ရှိနေစေလေသည်။

"ဒီနေ့ ရိတ်သိမ်းမှုက မဆိုးဘူးဗျ"

"ဒီရက်ပိုင်း ရာသီဥတုလည်း ကောင်းတယ် ဂျင်ဆင်းရွက်တွေ ထွက်လာတဲ့ အချိန်လည်း ဖြစ်နေတော့ ဂျင်ဆင်းလာတူးတဲ့ တောတောင်ရှာဖွေသူတွေ အများကြီးပဲ"

"တောရိုင်း ဂျင်ဆင်းတွေ ပေါက်တဲ့နေရာက အရမ်းကို ပုန်းကွယ်နေတာဆိုတော့ ရှာတွေ့ဖို့ဆိုတာ မလွယ်ဘူး ရှာတွေ့မတွေ့ ဆိုတာက ကံတရားပေါ်မှာပဲ အပြည့်အဝ မူတည်နေတယ်"

ရွှီယန်က သစ်ခေါက်ထုပ်လေးကို ကိုင်ထားရင်း အလွန်ပင် ပျော်ရွှင်နေလေသည်။

ရတနာရှာဖွေရေး သံလိုက်အိမ်မြှောင်ကို သုံးကြိမ်စလုံး အသုံးပြုပြီးသွားပြီ ဖြစ်သော်လည်း အချိန်စောနေသေးသဖြင့် ရွှီယန်သည် သစ်တောအုပ်ကြီးထဲတွင် ဆက်လက်၍ လှည့်ပတ်သွားလာနေလေသည်။

တောနက်ကြီးထဲရှိ ရှုခင်းများကို လိုက်လံကြည့်ရှုရသည်ကလည်း အတော်လေး ကောင်းမွန်သော ခံစားမှုတစ်ခုပင် ဖြစ်လေသည်။