အခန်း ၃၄

အခန်း (၃၄) ရှားပါးအပင်... မြေအောက်ကမ္ဘာရဲ့ ပန်း

ရွှီယန်က ထင်းရှူးမှိုများ အပြည့်ပါသော အိတ်တစ်လုံးကို ကိုင်ကာ ဟိုသည် ကြည့်ရှုနေသည်။

သူက သင့်တော်သော နေရာတစ်ခုကို ရှာဖွေနေခြင်း ဖြစ်သည်။

"ကျွန်တော် တောနက်ကြီးထဲကို ဆက်သွားဦးမှာ... ဒီနေရာမှာ ထင်းရှူးတောကို တွေ့လိမ့်မယ်လို့ အရင်က လုံးဝ မထင်ထားခဲ့ဘူး တကယ်ကို ထူးဆန်းတယ်"

"အဲ့ဒါကြောင့် ဒီထင်းရှူးမှိုတွေကို တစ်နေရာရာမှာ ထားခဲ့ပြီး ပြန်လာတဲ့အချိန်မှ ယူသွားတော့မယ်"

"၁၀ ကျင်းကျော်ဆိုတော့ အမြဲတမ်း သယ်သွားဖို့ကလည်း ပင်ပန်းတယ်လေ တောင်ပေါ်လမ်းက အတက်အဆင်းတွေ များတော့ ခွန်အား အများကြီး ကုန်တယ်"

ပြောနေရင်းဖြင့် ရွှီယန်က အနီးနားရှိ သစ်ပင်တစ်ပင်၏ အမြင့်သို့ တက်ကာ အဝတ်အိတ်ကို သစ်ပင်ပေါ်တွင် ချိတ်ဆွဲလိုက်သည်။

သူက ဖုန်းထဲတွင် ထိုနေရာ၏ ကိုဩဒိနိတ်ကို မှတ်သားထားလိုက်သည်။

ဒရုန်း၏ အကူအညီကြောင့် သူ၏ ဖုန်းမြေပုံက အလွန်တိကျပြီး လမ်းလွဲသွားမည်မဟုတ်သဖြင့် ပြန်ရှာမတွေ့မည်ကို စိုးရိမ်စရာမလိုပေ။

ရွှီယန်က ထင်းရှူးမှိုများကို သစ်ပင်ပေါ်တွင် ချိတ်ဆွဲလိုက်သည်ကို မြင်သောအခါ ကွန်ရက်သုံးစွဲသူ အများအပြားက ချက်ချင်း စိတ်ဝင်စားသွားကြသည်။

"အစ်ကိုရေ အပင်ပန်းခံ ခူးထားတဲ့ ထင်းရှူးမှိုတွေ အခိုးခံရမှာ မကြောက်ဘူးလား"

"ဘယ်သူ ငါနဲ့အတူ ထင်းရှူးမှို သွားခိုးမလဲ"

"ပြန်လာလို့ မရှိတော့ရင် ရယ်ရမှာပဲ"

"ပျောက်သွားမှာ မကြောက်ဘူးလား"

အားလုံး၏ စိုးရိမ်မှုများကို မြင်သောအခါ ရွှီယန်က ပြုံးကာ ပြောလိုက်သည်။

"အားလုံးပဲ စိတ်ချပါ ဒီတောင်က အရမ်းကြီးတယ်... ဒီလို ပြောရအောင် ကျွန်တော် တောင်ပေါ်တက်လာတာ ကြာပြီ တခြား တောင်ပေါ်တက်တဲ့သူ တစ်ယောက်မှ မတွေ့ဖူးသေးဘူး"

"အဲ့ဒါကြောင့် တခြားလူတွေ ရောက်လာမှာကိုလည်း စိုးရိမ်စရာ မလိုပါဘူး"

"ကျွန်တော့်ရဲ့ တိုက်ရိုက်ထုတ်လွှင့်မှုကို ကြည့်နေရင်တောင် ဒီနေရာရဲ့ ကိုဩဒိနိတ် အတိအကျကို မသိနိုင်လို့ ရှာတွေ့မှာ မဟုတ်ဘူး"

"တောင်ပေါ်က သစ်ပင်တွေ အကုန်လုံးက ပုံစံတူတွေချည်းပဲ ဗီဒီယိုကို ကြည့်ပြီး ဒီနေရာကို ရှာဖို့ဆိုတာ လုံးဝ မဖြစ်နိုင်ပါဘူး"

တောင်ပေါ်တက်သူများ အနေဖြင့် တောင်ပေါ်တက်ရာတွင် ရရှိလာသော ပစ္စည်းများက အလွန်လေးလံနေပါက ချက်ချင်းပြန်သွားခြင်း သို့မဟုတ် တစ်နေရာရာတွင် ဝှက်ထားပြီး အပြန်လမ်းတွင်မှ ယူသွားခြင်းတို့ကို ပြုလုပ်လေ့ရှိကြသည်။

တခြားသူများ ရှာတွေ့နိုင်ခြေမှာ အလွန်အမင်း နည်းပါးလှသည်။

ရွှီယန်က ထင်းရှူးမှိုများကို သစ်ပင်၏ အမြင့်တွင် ချိတ်ဆွဲထားပြီး သာမန်လူများ မကြည့်လေ့ရှိသော မြင့်မားသည့် ထင်းရှူးပင် တစ်ပင်ကို အထူးရွေးချယ်ခဲ့ခြင်း ဖြစ်သည်။

ထင်းရှူးမှိုများကို ချိတ်ဆွဲပြီးနောက် ရွှီယန်က ကျောပိုးအိတ်ကို လွယ်ကာ တောနက်ကြီးထဲသို့ ဆက်လက် ဝင်ရောက်သွားသည်။

လမ်းက သိပ်မကောင်းလှပေ။

သို့သော် ရွှီယန်က အသားကျနေပြီ ဖြစ်သည်။

တိုက်ရိုက်ထုတ်လွှင့်မှုအတွင်းရှိ ကြည့်ရှုသူ အရေအတွက်မှာလည်း များပြားနေဆဲ ဖြစ်သည်။

ကွန်ရက်သုံးစွဲသူများက သူ့အပေါ် အလွန် သိချင်စိတ် ဖြစ်ပေါ်နေပြီး ဤနေရာတွင် အချိန်ပိုကြာကြာ နေချင်ကြသည်။

တစ်နာရီခန့် လမ်းလျှောက်ပြီးနောက် ရွှီယန်က ဆေးဘက်ဝင် အပင်များ အများအပြား ပေါက်ရောက်နေသော နေရာတစ်ခုကို ရှာတွေ့ခဲ့သည်။

ထိုဆေးဘက်ဝင် အပင်များက သာမန်သာ ဖြစ်ပြီး ချန်ပိုင်တောင်တန်း၏ မြေဩဇာကောင်းမွန်သော နေရာများတွင် ပေါက်ရောက်လေ့ရှိသည်။ ထို့ကြောင့် ရွှီယန်က ထိုအပင်များကို ကြည့်ရုံသာ ကြည့်ပြီး မခူးယူခဲ့ပေ။

ရွှီယန်က စက္ကူမြေပုံကို ထုတ်ကာ သူ၏ နေရာကို မှတ်သားပြီးနောက် ရတနာရှာဖွေရေး သံလိုက်အိမ်မြှောင်ကို အသုံးပြုရန် ရွေးချယ်လိုက်သည်။

စကင်ဖတ်ပြီးနောက် စနစ်က မြေပုံပေါ်တွင် နေရာတစ်ခုကို မှတ်သားပေးလိုက်ရာ ရွှီယန်က ထိုမှတ်သားထားသော နေရာသို့ လျှောက်သွားလိုက်သည်။

ရောက်သောအခါ ရွှီယန်က အနည်းငယ် အံ့ဩသွားသည်။

ခူးယူနိုင်သော တောင်ထွက်ပစ္စည်း မဟုတ်သော်လည်း အလွန်ရှားပါးသော ပစ္စည်းကောင်း တစ်ခု ဖြစ်နေသည်။

ရွှီယန်က ချက်ချင်း ဆောင့်ကြောင့်ထိုင်ချကာ သတိထားပြီး ကြည့်ရှုနေသည်။

သူ၏ အမူအရာကို မြင်သောအခါ ကွန်ရက်သုံးစွဲသူများကလည်း တစ်ခုခု ထပ်တွေ့ပြန်ပြီဖြစ်ကြောင်း သိလိုက်ကြသည်။

"လောင်ရွှီ ဘာထပ်တွေ့ပြန်ပြီလဲ"

"မင်းရဲ့ တောင်ပေါ်တက်တဲ့ ပုံစံက တခြားလူတွေနဲ့ မတူသလို ခံစားရတယ်"

"ပုံမှန်ပါပဲ အစ်ကိုကြီးက တောနက်ကြီးထဲ ဝင်နေတာကိုး တခြား တောင်ပေါ်တက်တဲ့ တိုက်ရိုက်ထုတ်လွှင့်သူတွေက အတုလုပ်တာတို့ ရွာအနီးအနားမှာပဲ သွားတာတို့ဆိုတော့ ဘယ်လိုလုပ် ရတနာတွေ တွေ့ပါ့မလဲ"

"တကယ် ဘာကြီးလဲ"

အားလုံးက အလွန် သိချင်နေကြသည်။

ဒရုန်းက ရှေ့သို့ ရိုက်ကူးပြသနေသည်။

မြေပြင်ပေါ်ရှိ သစ်ရွက်ဆွေးပုံများကြားတွင် အဖြူရောင် အပင်တစ်ပင် ပေါက်ရောက်နေသည်ကို ကွန်ရက်သုံးစွဲသူများက မြင်လိုက်ရသည်။

ထိုအပင်က ပန်းတစ်ပွင့်နှင့် တူသော်လည်း ပင်စည်မှစ၍ ပန်းပွင့်အထိ အားလုံး အဖြူရောင်ဖြစ်နေသဖြင့် အလွန် ထူးဆန်းလှသည်။

သာမန် အဖြူရောင် ပန်းပွင့်များ၏ ပင်စည်များက အစိမ်းရောင် ဖြစ်လေ့ရှိသည်။

ပင်စည်ပါ အဖြူရောင်ဖြစ်နေသော ဤပန်းမျိုးကို အားလုံးက ပထမဆုံးအကြိမ် မြင်ဖူးခြင်း ဖြစ်သည်။

"ဒါကို ရေခဲပန်း လို့ ခေါ်တယ် အရမ်းကို ရှားပါးပြီး မှောင်မိုက်တဲ့ သစ်တောတွေထဲမှာပဲ ပေါက်ရောက်လေ့ရှိတယ်"

"ရေခဲပန်းက သစ်ရွက်ဆွေးတွေကို အားကိုးပြီး အာဟာရရယူတဲ့ အပင်မျိုး ဖြစ်တယ် အပင်တစ်ပင်လုံးမှာ ကလိုရိုဖီးလ် မပါဝင်လို့ အဖြူရောင် ဖြစ်နေတာပါ"

"သူ့ကို မြေအောက်ကမ္ဘာရဲ့ ပန်း လို့လည်း ခေါ်ကြသေးတယ်"

"သဘာဝတရားကြီးအကြောင်း သေချာလေ့လာကြည့်ရင် ထူးဆန်းတဲ့ အပင်တွေ အများကြီး ရှိတယ်ဆိုတာ တွေ့ရလိမ့်မယ်"

"အကုန်လုံးက ကိုယ်ပိုင်ထူးခြားချက်တွေ ရှိကြတယ်"

ရွှီယန်က ဆောင့်ကြောင့်ထိုင်ကာ ရေခဲပန်းကို သေချာစွာ ကြည့်ရှုရင်း ကွန်ရက်သုံးစွဲသူများကို ဗဟုသုတ ဝေမျှနေသည်။

'မြေအောက်ကမ္ဘာရဲ့ ပန်း ဟုတ်လား’

အားလုံးက ဤကဲ့သို့သော ဖော်ပြချက်မျိုးကို ပထမဆုံးအကြိမ် ကြားဖူးခြင်း ဖြစ်သည်။

'မြေအောက်ကမ္ဘာရဲ့ ပန်းဆိုတာ ပီအန်းပန်း မဟုတ်ဘူးလား’

"အပင်တစ်ပင်လုံးမှာ ကလိုရိုဖီးလ် မပါဘူး ဟုတ်လား အဲ့ဒါကြောင့် အဖြူရောင် ဖြစ်နေတာကိုး"

"အဖြူရောင် ပန်းကို ပထမဆုံး မြင်ဖူးတာပဲ အရမ်း ထူးဆန်းတာပဲ"

"ဒီအစ်ကိုရဲ့ တိုက်ရိုက်ထုတ်လွှင့်မှုကို ကြည့်ရတာ ဗဟုသုတ အများကြီး ရတယ်"

"မျက်စိပွင့်သွားပြီ ဒီလိုအပင်မျိုးတောင် ရှိတာလား ကိုယ်တိုင် စိုက်လို့ ရမလား ပန်းနည်းနည်းလောက် စိုက်ချင်လို့"

ရွှီယန်က ဆက်လက် ရှင်းပြသည်။

"ရေခဲပန်းက အရမ်း နာမည်ကြီးတယ် ဆွေးမြည့်နေတဲ့ အပင်တွေ ကြားမှာပဲ ပေါက်တယ် နေ့ဘက်ဆိုရင် သိပ်ပြီး မထင်ရှားပေမယ့် ညဘက်ဆိုရင်တော့ အဖြူရောင် အလင်းတန်းလေးတွေ ထွက်နေတတ်တယ်"

"အခုက နေ့လယ်ခင်းဆိုတော့ ဘာမှ မမြင်ရဘူး အမှောင်ထုထဲမှာဆိုရင်တော့ ဒီရေခဲပန်းတွေ လင်းလက်နေတာကို မြင်ရမှာ"

"အားလုံးပဲ အဲ့ဒီ မြင်ကွင်းကို တွေးကြည့်လို့ ရပါတယ်"

"အရမ်း လှပပြီး အရမ်းလည်း အန္တရာယ်များတယ် သေခြင်းတရားကနေ မွေးဖွားလာလို့ မြေအောက်ကမ္ဘာရဲ့ ပန်းလို့ ခေါ်ကြတာ"

"ကျွန်တော့် မှတ်ဉာဏ်ထဲမှာဆိုရင် မြေအောက်ကမ္ဘာရဲ့ ပန်းလို့ ခေါ်တဲ့ ပန်းလေးမျိုး ရှိတယ် မန်ဒါရာ၊ ပီအန်းပန်း၊ ရေခဲပန်း နဲ့ ဘိန်းပန်း တို့ပဲ"

"အားလုံးက ကိုယ်ပိုင် ထူးခြားချက်တွေ ရှိကြတယ်"

ရွှီယန်က ခဏလောက် ကြည့်ပြီးနောက် မတ်တတ်ရပ်လိုက်သည်။

ဒုတိယအကြိမ် ရတနာရှာဖွေရေး သံလိုက်အိမ်မြှောင် ပြသပေးသော အရာမှာ ရေခဲပန်း ဖြစ်ပြီး နိုင်ငံတော်အဆင့် တစ် ကာကွယ်စောင့်ရှောက်ရမည့် အပင်ဖြစ်သဖြင့် ခူးယူ၍ မရပေ။

ဆေးဘက်ဝင် တန်ဖိုးမရှိသော ဤကဲ့သို့ အပင်မျိုးကို ရွှီယန်က မည်သည့်အခါမျှ ဖျက်ဆီးလေ့ မရှိပေ။

သစ်တောထဲတွင် ဤအတိုင်း ရှင်သန်နေခြင်းက ကောင်းမွန်သည်။

"တောင်ပေါ်တက်တဲ့အခါ ပစ္စည်းကောင်းတွေ အများကြီး တွေ့ရတတ်တယ်"

"တွေ့ရတာကလည်း အဓိပ္ပာယ် ရှိပါတယ်"

"နောက်မှ ဗီဒီယိုထဲမှာ ထည့်ပြီး တည်းဖြတ်လိုက်ရင် လူပိုများများ မြင်ရတာပေါ့"

ရွှီယန်က သူ၏ တောင်ပေါ်တက် ခရီးစဉ်ကို ဆက်လက် လျှောက်လှမ်းသွားသည်။

ရေခဲပန်းကို တွေ့ရခြင်းကလည်း ထူးခြားသော အတွေ့အကြုံ တစ်ခု ဖြစ်သည်။

သူက တောနက်ကြီးထဲသို့ ဆက်လက် ဝင်ရောက်သွားရာ မကြာမီမှာပင် ရှေ့တွင် သေးသွယ်ရှည်လျားသော မြစ်ငယ်လေး တစ်စင်း ပေါ်လာသည်။

ရွှီယန်က မြစ်ကမ်းဘေးတွင် ရပ်ကာ ကြည့်ရှုလိုက်ရာ မြစ်အောက်ခြေတွင် ကျောက်စရစ်ခဲများ ရှိနေပြီး ရေက အလွန် ကြည်လင်နေသည်။

"ချန်ပိုင်တောင်တန်းမှာ ရေမရှားဘူး ဒီရေတွေ အကုန်လုံးက ထျန်းချီ ကနေ စီးဆင်းလာတာ အရမ်း သန့်ရှင်းတဲ့ တကယ့် တောင်ကျရေစစ်စစ်တွေပဲ"

"ဒီရာသီမှာ တောင်ပေါ်တက်တဲ့သူတွေက တောင်ပေါ်တက်ရင် ရေသယ်သွားစရာ မလိုဘူး ရေဘူး အလွတ်ပဲ သယ်သွားရုံပဲ"

"မြစ်ရေကို တိုက်ရိုက် သောက်လို့ရတယ် ဒါပေမယ့် ကျိုချက်ပြီးမှ သောက်တာ အကောင်းဆုံးပေါ့ ဒါပေမယ့် တောင်ပေါ်မှာ နေရစားရတဲ့သူတွေကတော့ အဲ့ဒီလောက် အသေးစိတ် ဂရုမစိုက်နိုင်ကြဘူး"

ရွှီယန်က ရှင်းပြလိုက်သည်။

ကွန်ရက်သုံးစွဲသူများက မြစ်ရေထဲသို့ လှမ်းကြည့်လိုက်ကြသည်။

မြစ်ထဲရှိ အရာအားလုံးကို ရှင်းလင်းစွာ မြင်တွေ့နေရသည်။

ရေက လုံးဝ ကြည်လင်နေပြီး နေရောင်အောက်တွင် ရေလှိုင်းလေးများက အလင်းအမှောင်များကို ဖန်တီးကာ မြစ်၏ ပုံသဏ္ဌာန်ကို ပုံဖော်ပေးနေသည်။

"မြစ်ရေက တကယ်ကို ကြည်လင်နေတာပဲ"

"အစ်ကိုရေ ဒီမှာ နောင်ဖူဆန်းချွမ် ရေတွေ သယ်နေတဲ့ သူတွေကို တွေ့ရလားလို့ မေးချင်လို့"

"ဟုတ်တယ် သူတို့က ရေမထုတ်လုပ်ဘူး သဘာဝတရားကြီးကနေ သယ်လာတာဆိုပြီး ပြောကြတယ် မဟုတ်လား တွေ့ဖူးလား"

ကွန်ရက်သုံးစွဲသူများက နောက်ပြောင် မေးမြန်းကြသည်။

ရွှီယန်ကမူ တောင်ပေါ်တွင် တောင်ထွက်ပစ္စည်းများကို ဆက်လက် ရှာဖွေနေသည်။

တစ်ခါတစ်ရံ သစ်ပင်များပေါ်တွင် လင်ဇီးနီ အချို့ကို တွေ့ရပါက ခူးယူပြီး ဟောရှို့ဝူ အချို့ကိုလည်း တူးယူခဲ့သည်။

လမ်းတစ်လျှောက် သွားလိုက် ရပ်လိုက်ဖြင့် အများအပြား ရရှိခဲ့သည်။

မြစ်ကမ်းဘေး တစ်လျှောက် ဆက်လျှောက်သွားရာ ရှေ့တွင် သစ်ပင်နည်းပါးသော ညီညာသည့် နေရာကျယ်ကြီး တစ်ခု ထပ်မံ ပေါ်လာသည်။

ဤနေရာက ကြည့်ရသည်မှာ အလွန် ကောင်းမွန်ပြီး တောနက်ကြီးထဲတွင် တွေ့ရခဲသော ရတနာမြေ တစ်ခု ဖြစ်သည်။

ရွှီယန်က ချက်ချင်းပင် ရတနာရှာဖွေရေး သံလိုက်အိမ်မြှောင်ကို အသုံးပြုရန် ရွေးချယ်လိုက်သည်။

သို့သော် ထိုအချိန်မှာပင် တရှပ်ရှပ် မြည်သံ တစ်ခု ထွက်ပေါ်လာသည်။

ထို့နောက် ရွှီယန်က ချစ်စရာ ကောင်းသော အော်သံလေး တစ်ခုကို ကြားလိုက်ရသည်။

သူက အနောက်သို့ လှည့်ကြည့်လိုက်ရာ မိခင်ကျားသစ်မကြီးနှင့် ကျားသစ်ပေါက်လေးတို့က မြင့်မားသော မြက်ခင်းပြင်ထဲမှ ဖြည်းညင်းစွာ ထွက်လာသည်ကို တွေ့လိုက်ရသည်။

ကျားသစ်ပေါက်လေးက ယခင်အတိုင်း သေးငယ်ပြီး ချစ်စရာ ကောင်းကာ ရိုးအအ ပုံစံလေး ဖြစ်နေသည်။

မိခင်ကျားသစ်မကြီးကမူ ခန္ဓာကိုယ် တောင့်တင်းပြီး အမွေးများ ညီညာသော်လည်း နောက်ခြေထောက်ရှိ အမွေးများက အနည်းငယ် ရှုပ်ပွနေကာ ဒဏ်ရာ အသစ်စက်စက် ကျက်သွားသည့်ပုံ ပေါ်နေသည်။

ဤသည်မှာ သူ ကယ်ဆယ်ခဲ့သော ကျားသစ်နှစ်ကောင် ဖြစ်ကြောင်း ရွှီယန် ချက်ချင်း သိလိုက်သည်။

သူ၏ မျက်နှာပေါ်တွင် ဝမ်းသာသည့် အမူအရာ ပေါ်လာသည်။

တကယ်ကို ရေစက်ပါပဲ။

ဒီနေရာမှာတောင် ပြန်ဆုံရတယ်လို့။

ထိုအချိန်တွင် ဒရုန်း၏ ကင်မရာက ကျားသစ်နှစ်ကောင် ရှိရာသို့ ရိုက်ကူးပြသနေသည်။

တိုက်ရိုက်ထုတ်လွှင့်မှုအတွင်းရှိ ကွန်ရက်သုံးစွဲသူများမှာမူ လန့်သွားသဖြင့် မျက်နှာများပင် ဖြူရော်သွားကြသည်။

'အဲ့ဒါ ကျားသစ်လား ….အရမ်း ကြီးတဲ့ ကျားသစ်ကြီးပါလား’