အခန်း ၄၀

အခန်း (၄၀) သူက ဒီလောက်တောင် ဂွကျတာပဲ

'ပိုင်ရှင်၏ စုစုပေါင်း ကျော်ကြားမှုရမှတ် တစ်သိန်း ကျော်လွန်သွားသည့်အတွက် ဂုဏ်ယူပါသည်'

'ရတနာရှာဖွေရေး သံလိုက်အိမ်မြှောင် အဆင့်တက်သွားပါပြီ'

'လက်ရှိ ရတနာရှာဖွေရေး သံလိုက်အိမ်မြှောင်တွင် သိမ်းဆည်းထားနိုင်သော အကြိမ်ရေ ... ငါးကြိမ်'

ညပိုင်းအချိန်တွင် ရွှီယန်၏ ခေါင်းထဲ၌ စနစ်၏ အသိပေးသံ ထွက်ပေါ်လာလေသည်။

ဤကာလအတွင်း နေ့စဉ်ရက်ဆက် ကျော်ကြားမှုရမှတ်များကို စုဆောင်းနေခဲ့ခြင်း ဖြစ်သည်။ ကျားသစ်နှင့် တွေ့ဆုံခဲ့သော ထိုတစ်နေ့တည်းမှာပင် ရမှတ်ငါးသောင်း ရရှိခဲ့ရာ ယခုအခါ စုစုပေါင်း ကျော်ကြားမှုရမှတ်မှာ တစ်သိန်းကျော်လွန်သွားခဲ့ပြီ ဖြစ်ပြီး ရတနာရှာဖွေရေး သံလိုက်အိမ်မြှောင်၏ သိမ်းဆည်းနိုင်သော အကြိမ်ရေလည်း များပြားလာခဲ့ပြီ ဖြစ်သည်။

သိမ်းဆည်းနိုင်သော အကြိမ်ရေ ငါးကြိမ် ဖြစ်သွားခြင်းကလည်း ကောင်းမွန်လှသည်။ ဤသို့ဖြင့် တောင်ပေါ်တက်မည့် အချိန်ကို ပိုမို လွတ်လပ်စွာ စီစဉ်နိုင်မည် ဖြစ်သည်။ အားလပ်ချိန်တွင် နှစ်ကြိမ် သုံးကြိမ် စုဆောင်းပြီးပါက တောင်ပေါ်တက်နိုင်ပြီး အလုပ်များနေပါက ငါးကြိမ် ပြည့်သည်အထိ စုဆောင်းပြီးမှ တောင်ပေါ်တက်နိုင်မည် ဖြစ်သည်။

နံနက်ပိုင်းတွင် ရွှီယန်သည် လယ်ယာအလုပ် အနည်းငယ်ကို အလုပ်ရှုပ်နေခဲ့သည်။

တကယ်တမ်းတွင် ကြီးကြီးမားမား အလုပ်များ မဟုတ်ဘဲ ဟိုဟိုဒီဒီ လှည့်ပတ်ကြည့်ရှုနေခြင်းသာ ဖြစ်သည်။

အဓိကအားဖြင့် ဖန်လုံအိမ်ထဲရှိ ဘလူးဘယ်ရီပင်များကို သွားရောက် ကြည့်ရှုခြင်း ဖြစ်သည်။ ဤအရာများက သူ၏ မျက်စိအောက်မှ အဖိုးတန် ရတနာလေးများပင် ဖြစ်သည်။

ဘလူးဘယ်ရီများ၏ ကြီးထွားနှုန်းက သူ မှန်းထားသည်ထက် အနည်းငယ် ပို၍ မြန်ဆန်နေလေသည်။

ယေဘုယျအားဖြင့် ဘလူးဘယ်ရီများ၏ ရင့်မှည့်ချိန်မှာ ကိုးလခန့် ကြာမြင့်တတ်သည်။ ဆိုလိုသည်မှာ ကိုးလအကြာတွင်မှ သူ ဆွတ်ခူးရိတ်သိမ်းနိုင်မည် ဖြစ်သည်။ သို့သော် စနစ်မှ ရရှိသော မျိုးစေ့များက ပို၍ အရည်အသွေး ကောင်းမွန်သဖြင့် ရင့်မှည့်ချိန် ပိုမို တိုတောင်းပုံရသည်။

ခြောက်လအတွင်း အပြည့်အဝ ရင့်မှည့်နိုင်မည် ဖြစ်သည်။

'ဘလူးဘယ်ရီ ပျိုးပင်တွေ နည်းနည်း ထပ်ကြီးလာရင် ကြက်ပေါက်လေးတွေကို အထဲထည့်ပြီး ပိုးကောင်တွေ စားခိုင်းလို့ရပြီ ... ပိုးသတ်ဆေး ဖျန်းတာထက် အများကြီး ပိုကောင်းတယ်'

ရွှီယန်က စိတ်ထဲမှ တွေးလိုက်သည်။

သဘာဝနည်းဖြင့် ပိုးမွှားနှိမ်နင်းခြင်းက အာနိသင် ပိုမို ကောင်းမွန်ပြီး ဘလူးဘယ်ရီများလည်း ပိုမို ကောင်းမွန်စွာ ကြီးထွားနိုင်မည် ဖြစ်သည်။

နေ့လယ်ပိုင်းတွင် ရာသီဥတုက သာယာကြည်လင်နေသည်။

ရွှီယန် အင်တာနက်မှ ဝယ်ယူထားသော အပြင်ဘက်သုံး ရေကူးကန်လည်း ရောက်ရှိလာခဲ့ပြီ ဖြစ်သည်။

အပြင်ဘက်သုံး ရေကူးကန် ဆိုသည်မှာ လေထိုးသွင်းရသော ရေကန် တစ်ခုဖြစ်ပြီး ရေဖြည့်လိုက်ပါက ရေကူးကန် ဖြစ်သွားမည် ဖြစ်သည်။

သူက တိုက်ရိုက်ထုတ်လွှင့်မှုကို ဖွင့်လိုက်ပြီး အပြင်ဘက်သုံး ရေကူးကန်ကို တပ်ဆင်ရန် အလုပ်ရှုပ်နေတော့သည်။

လယ်ယာခြံဝင်းထဲရှိ မြက်ခင်းပြင် တစ်ခုပေါ်တွင် ရွှီယန်က ရေကူးကန်ကို ထုတ်ယူကာ လေစတင် ထိုးသွင်းလိုက်သည်။

လေထိုးစက်၏ လေမှုတ်ထုတ်မှုနှင့်အတူ မကြာမီမှာပင် ရေကူးကန်က ဖောင်းကားလာပြီး ကြီးမားပြည့်တင်းသော ရေကန်ကြီး တစ်ခုအဖြစ် ပြောင်းလဲသွားလေသည်။

ရွှီယန်က ရေပိုက်တစ်ချောင်းကို ယူဆောင်လာပြီး ရေကူးကန်ထဲသို့ ရေစတင် ဖြည့်တင်းလိုက်သည်။

ဤဒေသတွင် ရေ လုံးဝ မရှားပါးပေ။ တောင်ကျရေများ အလွန် ပေါများပြီး သန့်ရှင်းရုံသာမက အရသာကလည်း ချိုမြိန်ကာ အလွန် အေးမြလန်းဆန်းလှပေသည်။

ကွန်ရက်သုံးစွဲသူများက တိုက်ရိုက်ထုတ်လွှင့်မှုထဲသို့ အဆက်မပြတ် ဝင်ရောက် ကြည့်ရှုလာကြသည်။

ဤမြင်ကွင်းကို မြင်လိုက်ရသောအခါ ကွန်ရက်သုံးစွဲသူ အများအပြားမှာ နားမလည်နိုင်အောင် ဖြစ်သွားကြလေသည်။

"အစ်ကိုကြီးက ဘာလုပ်နေတာလဲ ရေကူးတာကို တိုက်ရိုက်ထုတ်လွှင့်မလို့လား"

လူတစ်ယောက်က မေးလိုက်သည်။ ထိုစကားကို ကြားသောအခါ လူတစ်ယောက်က ချက်ချင်း ဝင်ရောက် ရှင်းပြလိုက်သည်။

"လောင်ရွှီက မနေ့တုန်းက ပြောသွားတယ်လေ ဘဲတွေကို ရေကူး သင်ပေးမလို့တဲ့"

ဤမှတ်ချက်များကို မြင်လိုက်ရသောအခါ ကျန်ရှိနေသော ကွန်ရက်သုံးစွဲသူများ အားလုံး လုံးဝ ကြောင်အမ်းအမ်း ဖြစ်သွားကြတော့သည်။

"ဘာကြီးလဲ ... ဘဲတွေကို ရေကူး သင်ပေးမယ် ... ငါ မြင်တာ မမှားပါဘူးနော်"

"အစ်ကိုကြီးက တကယ်ကို ... စိတ်ကူးယဉ် ဆန်လွန်းတယ်"

"သူက ဒီလောက်တောင် ဂွကျတာပဲ"

အားလုံးက ရွှီယန်၏ စိတ်ကူးကို အလွန်ပင် အံ့ဩလေးစားသွားကြလေသည်။

ဘဲများကို ရေကူးသင်ပေးမည် ဟုတ်လား။ သူ တစ်ယောက်တည်းသာ ဤသို့ တွေးတောနိုင်မည် ဖြစ်သည်။

ရွှီယန်က ရေကူးကန်ထဲသို့ ရေအပြည့် ဖြည့်လိုက်ပြီး ဘဲများကို ထည့်ရန် ပြင်ဆင်လိုက်သည်။

ရေကူးကန်တွင် ဝင်ပေါက် တစ်ခု ပါရှိပြီး လှေကား တစ်ခုကိုပါ တွဲဖက် တပ်ဆင်ထားကာ ထိုလှေကားမှတစ်ဆင့် အထဲသို့ ဝင်ရောက်နိုင်လေသည်။

ရှောင်ဟေးက ဘေးနားမှနေ၍ စောင့်ကြည့်နေပြီး ရွှီယန် လုပ်သမျှကို အလွန် စိတ်ဝင်စားနေပုံ ရသည်။

ဤကောင်လေးက အလွန် ဉာဏ်ကောင်းပြီး အလွန်လည်း ပါးနပ်လေသည်။

"နေရောင်လေး ခဏလောက် အရင်ပြထားရမယ် ... အခုမှ ဖွင့်ထည့်ထားတဲ့ မြေအောက်ရေက အရမ်း အေးနေသေးတယ်"

"နေရောင်လေး ခဏပြလိုက်မှ ရေပူလာမှာ"

"ဘဲပေါက်လေးတွေက အခုမှ အကောင်ပေါက်ထားတာ သိပ်မကြာသေးဘူးဆိုတော့ ဒီလို ရေအေးကြီးကို မခံနိုင်ဘူး ... ရေကူးရင်းနဲ့ အကုန် သေကုန်မှ ဒုက္ခ"

ရွှီယန်က နှုတ်မှ ဖွင့်ပြောလိုက်သည်။

သူ၏ စကားကို ကြားလိုက်ရသောအခါ ကွန်ရက်သုံးစွဲသူများ အားလုံး အလိုအလျောက် ရယ်မောလိုက်မိကြသည်။

အကယ်၍ ယခုမှ ဝယ်လာသော ဘဲပေါက်လေးများက ရေအေးလွန်းသဖြင့် အအေးမိကာ အကုန်လုံး သေဆုံးသွားမည်ဆိုပါက တကယ်ကို ရယ်စရာကြီး ဖြစ်သွားမည်ပင်။

ရှောင်ဟေးက ဘေးနားတွင် ပျော်ရွှင်စွာဖြင့် ဟိုပြေးဒီပြေး လုပ်နေလေသည်။

ရွှီယန်က သူ့ကို မြင်သောအခါ ပြုံးလျက် မေးလိုက်သည်။

"ဘယ်လိုလဲ ... မင်း အထဲဝင်ပြီး စမ်းကြည့်ချင်လို့လား"

ရှောင်ဟေးက ခေါင်းလေးကို မော့ကာ လုံးဝ စမ်းသပ်ချင်နေသည့် အမူအရာမျိုး ပြသနေလေသည်။

ရွှီယန်လည်း ပြုံးသွားသည်။

"ခွေးတွေမှာ နှစ်မျိုး ရှိတယ် ... တစ်မျိုးက ရေကို ကြောက်တယ် သဘာဝအတိုင်း ရေကို မုန်းတယ် ရေချိုးပေးတာက သူ့ကို သတ်နေသလိုပဲ ... နောက်တစ်မျိုးကတော့ ရေကို သဘောကျတယ် ရေထဲကိုပဲ ပြေးဆင်းချင်နေတယ် ပြီးတော့ ရေပိုက်ကနေ ပန်းထွက်လာတဲ့ ရေတွေကိုလည်း လိုက်ကိုက်ချင်သေးတာ"

"ကြည့်ရသလောက်တော့ ရှောင်ဟေးက ရေကို သဘောကျတဲ့ အမျိုးအစားထဲမှာ ပါတယ်"

ရွှီယန်က ဤကောင်လေးကို ကြည့်ရင်း ပြောလိုက်သည်။

အခွင့်ကြုံခိုက် ရှောင်ဟေးကိုပါ ရေကူးသင်ပေးလို့ ရလေသည်။

မည်သို့ပင်ဖြစ်စေ အားလပ်နေသည်မှာ အတူတူပင် ဖြစ်သည်။

ဤသည်က လယ်ယာခြံဝင်း ပိုင်ဆိုင်ထားခြင်း၏ ပျော်ရွှင်မှုပင် ဖြစ်သည်။ လယ်ယာအလုပ်များ မအားလပ်ချိန်တွင် ကိုယ်စိတ်ဝင်စားသည့် အရာလေးများကို လုပ်ဆောင်နိုင်လေသည်။

နေရောင်ခြည်က ရေကူးကန်ကို တိုက်ရိုက် ကျရောက်နေပြီး နေအပူချိန်ကြောင့် ရေကူးကန်ထဲရှိ ရေများက လျင်မြန်စွာ ပူနွေးလာတော့သည်။

ရွှီယန်က အခြေအနေ အတော်လေး ကောင်းမွန်ပြီဟု ခံစားလိုက်ရသဖြင့် ဘဲများကို ရေကူးသင်ပေးမည့် ကိစ္စကို စတင် လုပ်ဆောင်တော့သည်။

သူက ဘဲခြံဆီသို့ လျှောက်သွားကာ ဘဲခြံတံခါးကို ဖွင့်လိုက်သည်။

အဝါရောင် ဘဲပေါက်လေးများက တစ်နေရာတည်းတွင် စုရုံးနေကြပြီး လည်ပင်းလေးများကို ဆန့်ထုတ်ကာ ရွှီယန် ရှိရာဘက်သို့ အကဲခတ်နေကြလေသည်။

"သွားမယ် ... ရေသွားဆော့ကြမယ်"

"နောက်ဆိုရင် မင်းတို့ကို မြစ်ထဲကိုပါ ခေါ်သွားပြီး လမ်းလျှောက် ထွက်လို့ရပြီ"

ရွှီယန်က စက္ကူဖာ တစ်လုံးကို ယူလာပြီး အဝါရောင် ဘဲပေါက်လေးများကို တစ်ကောင်ချင်းစီ ဖမ်းကာ ဖာထဲသို့ ထည့်လိုက်သည်။

ဘဲပေါက်လေးများက အမွေးလေးများ စုတ်ဖွားစုတ်ဖွား ဖြစ်နေပြီး ဖမ်းကိုင်လိုက်ချိန်တွင် ခြေထောက် နှစ်ချောင်းကလည်း ဟိုဒီ ရုန်းကန်နေတတ်သဖြင့် ကြည့်ရသည်မှာ အလွန်ပင် ချစ်စရာ ကောင်းလှပေသည်။

ဤမြင်ကွင်းက တိုက်ရိုက်ထုတ်လွှင့်မှုထဲတွင် ပေါ်ထွက်သွားလေသည်။

"အရမ်း ချစ်ဖို့ကောင်းတဲ့ ဘဲလေးတွေပဲ"

"ငါလည်း ဖမ်းကြည့်ချင်တယ်"

"ကိုင်ရတာ အိအိလေး ဖြစ်နေမှာပဲ"

ကွန်ရက်သုံးစွဲသူများက အားကျနေသည့် အမူအရာများကို ပြသလာကြလေသည်။

ရွှီယန်က ဘဲပေါက်လေးများ အားလုံးကို စက္ကူဖာထဲသို့ ဖမ်းထည့်ပြီးနောက် သူတို့ကို ခေါ်ဆောင်ကာ အပြင်သို့ ထွက်လာခဲ့သည်။

သီအိုရီအရ ဘဲများက မွေးရာပါ ရေကူးတတ်ကြပြီး လူသားများ အနေဖြင့် ပြုလုပ်ပေးရမည်မှာ သူတို့ကို အစောင့်အရှောက် ပေးကာ သူတို့၏ သွေးကြောထဲမှ စွမ်းရည်များကို လှုံ့ဆော်ပေးရန်သာ ဖြစ်သည်။

သူက ရေကူးကန် ဘေးသို့ လျှောက်သွားကာ လှေကားနားတွင် ရပ်လိုက်ပြီး အဝါရောင် ဘဲပေါက်လေး တစ်ကောင်ကို အရင်ဆုံး ထုတ်ယူကာ လက်ထဲတွင် ကိုင်ထားလိုက်သည်။

ဘဲပေါက်လေးက ဘာဖြစ်လာမည်ကို မသိသေးသဖြင့် ထိတ်လန့်တကြားဖြင့် ဟိုဒီအော်ဟစ်နေလေသည်။

ဒရုန်းက ဤမြင်ကွင်းကို ရိုက်ကူးနေပြီး ကွန်ရက်သုံးစွဲသူများ၏ အကြည့်များ အားလုံးက ရွှီယန်ဆီသို့ စုပြုံရောက်ရှိသွားကြသည်။

ရွှီယန်က ဘဲပေါက်လေးကို လက်နှစ်ဖက်ဖြင့် ပွေ့ကိုင်ကာ ရေထဲသို့ သတိကြီးစွာဖြင့် ဖြည်းညင်းစွာ ချပေးလိုက်သည်။

သူ၏ လက်များက ရေထဲသို့ လုံးဝ နစ်မြုပ်သွားပြီး ဘဲပေါက်လေးက ဖင်လေး ရေနဲ့ ထိသွားသည်ကို ခံစားလိုက်ရသောအခါ ချက်ချင်းပင် ထိတ်လန့်တကြား ရုန်းကန်လာတော့သည်။

မိဘများက စောင့်ရှောက် ကြီးပြင်းလာသော တောဘဲများပင်လျှင် မိဘများ၏ ပြသမှုကို မြင်ပြီးတာတောင် ပထမဆုံးအကြိမ် ရေဆင်းရမည်ဆိုပါက အချိန်အတော်ကြာအောင် တွေဝေနေတတ်ကြသည်။

မွေးမြူရေး စခန်းတွင် မွေးဖွားလာသော ဤကုန်းဘဲလေးများ ဆိုလျှင်တော့ ပြောနေစရာပင် မလိုတော့ပေ။

ရွှီယန်က ဘဲပေါက်လေးကို ပွေ့ကိုင်ကာ အောက်သို့ ထပ်မံ၍ ချပေးလိုက်သည်။

ဤကောင်လေးက လက်ဖဝါး၏ ထောက်ကန်ထားမှု မရှိတော့သဖြင့် ခန္ဓာကိုယ်လေးက ရေပြင်ပေါ်တွင် လုံးဝ ပေါလောပေါ်သွားလေသည်။

၎င်းက ဆက်လက်၍ ဟိုဒီ ရုန်းကန်နေပြီး အလွန် ကြောက်ရွံ့နေပုံ ရသည်။

သို့သော် စက္ကန့်အနည်းငယ်ခန့် ရုန်းကန်ပြီးနောက် ဘဲပေါက်လေးက ရုတ်တရက် ငြိမ်ကျသွားလေသည်။

၎င်းက တစ်ခုခု ထူးခြားနေသည်ကို သတိထားမိသွားပုံ ရသည်။

ကြည့်ရသည်မှာ ဤအေးမြသော အရာက မည်သည့် အန္တရာယ်မှ မရှိသကဲ့သို့ပင်။

ထို့အပြင် ၎င်းက ရေပြင်ပေါ်တွင် လွယ်ကူစွာ ပေါလောပေါ်နေနိုင်လေသည်။

၎င်းက အမြီးလေးကို လှုပ်ခါကာ ခြေထောက်လေးများဖြင့် ရေကူးကန်ထဲရှိ ရေများကို ဖြည်းညင်းစွာ ယက်လိုက်ရာ ခန္ဓာကိုယ်လေးက ရေပြင်ပေါ်တွင် ဖြည်းညင်းစွာ စတင် ကူးခတ်သွားလေတော့သည်။

"ကျွန်တော် ပြောသားပဲ ... ဘဲတွေက မွေးရာပါ ရေကူးတတ်တယ်လို့"

"အခုက အကောင်ပေါက်လေးတွေ ဆိုတော့ သင်ပေးလို့ လွယ်သေးတယ်"

"တကယ်လို့ ကြီးလာမှ ရေထဲချမယ် ဆိုရင်တော့ ခက်သွားပြီ ... သူတို့က ရေထဲကနေ အတင်း ပြန်တက်လာတဲ့အထိ အသေအလဲ ရုန်းကန်ကြတော့မှာ"

ရွှီယန်က ဘဲပေါက်လေးများကို တစ်ကောင်ချင်းစီ ဖမ်းကာ ရေကူးကန်ထဲသို့ ထည့်ပေးနေလေသည်။

အစပိုင်းတွင်တော့ ဘဲလေးများ၏ ရုန်းကန်မှုက အနည်းငယ် ပြင်းထန်နေသေးသည်။

သို့သော် နောက်ပိုင်းတွင် ကျန်ရှိနေသော ဘဲလေးများက အခြား ဘဲလေးများ အန္တရာယ် ကင်းရှင်းနေသည်ကို မြင်သောအခါ ရုန်းကန်မှု သိပ်မပြင်းထန်တော့ဘဲ ရေထဲရောက်သည်နှင့် တစ်ပြိုင်နက် အဖော်များ ရှိရာသို့ ချက်ချင်း ကူးသွားကြလေသည်။

မည်သို့ပင်ဖြစ်စေ အုပ်စုဖွဲ့ နေထိုင်တတ်သော တိရစ္ဆာန်များ ဖြစ်ကြသဖြင့် အုပ်စုနှင့် နေရသည်ကို နှစ်သက်ကြလေသည်။

မကြာမီမှာပင် ရွှီယန်က ဘဲလေးများကို တစ်ကောင်ပြီး တစ်ကောင် ရေကူးကန်ထဲသို့ ထည့်ပေးပြီးသွားလေသည်။

"အတော်လေး လွယ်ကူသားပဲ ... ရေကူးတဲ့ စွမ်းရည်ကို စောစောစီးစီး လေ့ကျင့်ပေးထားရင် နောက်ဆို သူတို့ကို အပြင်ခေါ်သွားဖို့ အဆင်ပြေပြီ"

ရွှီယန်က ပြုံးကာ ပြောလိုက်သည်။

ကွန်ရက်သုံးစွဲသူများက ဤချစ်စရာကောင်းသော မြင်ကွင်းကို မြင်လိုက်ရသောအခါ အလွန်ပင် အားကျသွားကြတော့သည်။

"ဘာလို့ အစ်ကိုကြီးက အစစ်အမှန် ဘဲလေးတွေကို ရေချိုးပေးလို့ ရပြီး ငါရေချိုးရင်ကျတော့ အဝါရောင် ဘဲရုပ်လေးတွေကိုပဲ ရေချိုးပေးနေရတာလဲ"

"သူ့မှာ ဒီလောက်ကြီးတဲ့ ခြံဝင်းကြီးလည်း ရှိတယ် ကိုယ်ပိုင် ရေကူးကန်လည်း ရှိတယ် ဘဲလေးတွေနဲ့လည်း ဆော့လို့ ရသေးတယ် ... လွန်လွန်းတယ်"

"အစ်ကိုကြီးက ငါ ဖြတ်သန်းချင်တဲ့ ဘဝမျိုးကို ဖြတ်သန်းနေတာပဲ"

"ငါလည်း ဝင်ပြီး ရေကူးချင်တယ်"

ထိုအချိန်တွင် ရှောင်ဟေးက လှေကားထစ်များအတိုင်း ကိုယ်တိုင် တက်လာပြီး လှေကား၏ အပေါ်ဆုံးထစ်သို့ ရောက်သောအခါ ရေပြင်ကို ကြည့်နေလေသည်။

"မင်း ဆင်းချင်လို့လား"

"ရတယ်လေ"

ရွှီယန်က ပြုံးကာ ပြောလိုက်သည်။

ထိုစကားကို ကြားသောအခါ ရှောင်ဟေးက တကယ်ပင် ရုတ်တရက် ခုန်ချလိုက်ပြီး ရေကူးကန်ထဲသို့ တိုက်ရိုက် ခုန်ဆင်းသွားတော့သည်။

ရွှီယန်က ဤကောင်လေး ရေနစ်သေသွားမည်ကို စိုးရိမ်သဖြင့် အမြန် လှမ်းကြည့်လိုက်သည်။

မထင်မှတ်ထားဘဲ ရှောင်ဟေးက ရေထဲသို့ ရောက်သွားပြီးနောက် ခေါင်းလေးကို မော့ကာ ရှေ့ခြေနှစ်ချောင်းကို အဆက်မပြတ် ယက်နေပြီး စံနှုန်းမီ ခွေးရေကူးဟန်ဖြင့် ရေကူးနေလေသည်။

ရေကူးရသည်မှာလည်း အတော်လေး ကျွမ်းကျင်နေပုံ ရသည်။

"မင်းက ရေကူး ပါရမီရှင်လေးပဲ"

ရွှီယန်က သူ့ပုံစံကို ကြည့်ပြီး ပြုံးကာ ချီးကျူးလိုက်သည်။

ရေကူးကန်၏ လေထုက အလွန်ပင် ပျော်ရွှင်စရာ ကောင်းနေလေသည်။

ရွှီယန်က ဘေးနားတွင် ရပ်ကြည့်နေရင်း အလွန် စိတ်ဝင်စားစရာ ကောင်းသည်ဟု ခံစားနေရသည်။

မည်သို့ပင်ဖြစ်စေ အကောင်ပေါက်လေးများကို ကျီစယ်ဆော့ကစားရန်အတွက် အသုံးပြုခြင်းသာ ဖြစ်ပြီး သူတို့လေးများ အထဲတွင် ရေကူးနိုင်ခြင်းက သူ၏ ကြိုးစားအားထုတ်မှုများ အချည်းနှီး မဖြစ်ခဲ့ကြောင်း သက်သေပြနေလေသည်။