အခန်း ၄၁

အခန်း (၄၁) မြေခွေးပေါက်လေး တစ်ကောင်ကို ဖမ်းမိသွားပြီ

ဘဲပေါက်လေးများ အတော်လေး ကြာအောင် ရေကူးပြီးသောအခါ ရွှီယန်က သူတို့ကို လှမ်းခေါ်လိုက်သည်။

ကောင်လေးများက အလွန် ပျော်ရွှင်စွာ ဆော့ကစားခဲ့ကြပြီး တစ်ကောင်ပြီး တစ်ကောင် "ကျွိကျွိကျာကျာ" အော်ဟစ်နေကြလေသည်။

အတောင်ပံသေးသေးလေးများကလည်း အဆက်မပြတ် ခတ်နေကြသည်။

ကွန်ရက်သုံးစွဲသူများက ဤချစ်စရာကောင်းသော မြင်ကွင်းကို ကြည့်ရင်း အလိုအလျောက် ပြုံးလိုက်မိကြသည်။

ထိုအချိန်တွင် ရွှီယန်က အေးဆေးတည်ငြိမ်စွာဖြင့် ပြောလိုက်သည်။

"ဘဲတွေက စိတ်ခံစားချက် ကောင်းရင် အစာပိုစားနိုင်ပြီး မြန်မြန် ဝလာနိုင်တယ်"

"ပြီးတော့ ဒီလို ဘဲသားမျိုးက ပိုပြီး စားလို့ ကောင်းတယ်"

သူ၏ စကားကို ကြားလိုက်ရသောအခါ ကွန်ရက်သုံးစွဲသူများ အားလုံး အနည်းငယ် ကြောင်အမ်းအမ်း ဖြစ်သွားကြတော့သည်။

"လောင်ရွှီ... မင်းက နတ်ဆိုးကြီးလား"

"ဘဲလေးတွေ... နားပိတ်ထားကြ အဲ့ဒါ ဆဲတာ... နားမထောင်နဲ့"

"ဘဲလေးတွေက ဒီလောက် ချစ်ဖို့ကောင်းနေတာကို မင်းက ဘယ်လိုလုပ် စားရက်မှာလဲ"

"ဒီလောက် ချစ်ဖို့ကောင်းတဲ့ ဘဲလေးတွေကို မင်းက စားရက်တယ်ပေါ့လေ"

"အခုတော့ မစားရက်ဘူး ဖြစ်နေမှာပေါ့ ကင်ပြီးသွားရင်တော့ ဘယ်သူ့ထက်မဆို ပိုစားဦးမှာ"

မှတ်ချက်များက ချက်ချင်းပင် ဆူညံသွားတော့သည်။

ရွှီယန်ကတော့ အေးဆေးတည်ငြိမ်နေသည်။ မွေးမြူရေးစခန်းမှ ဝယ်ယူလာသော ဘဲများမှာ ကြီးလာပါက စားသုံးရန်အတွက်သာ ဖြစ်သည်။

ကြီးပြင်းလာသည့် လုပ်ငန်းစဉ် အတွင်းတွင်တော့ သူတို့ကို အနည်းငယ် ပို၍ ပျော်ရွှင်စေကာ ကျန်းမာရေးနှင့် ညီညွတ်အောင် ထားရှိခြင်းကလည်း အလွန် ကောင်းမွန်လေသည်။

တိရစ္ဆာန် တစ်ကောင်ချင်းစီ၏ ကံကြမ္မာများက မတူညီကြပေ။

ရှောင်ဟေးက ရေကူးကန်ထဲမှ ထွက်လာပြီး လှေကားထစ်ပေါ်တွင် ရပ်ကာ ခန္ဓာကိုယ်ကို လျင်မြန်စွာ ခါရမ်း၍ ရေများကို ခါထုတ်လိုက်သည်။

သေးသေးကွေးကွေးလေး ဖြစ်သော်လည်း အတော်လေး တက်ကြွနေသည်။

ထို့နောက် ၎င်းက အောက်သို့ ဆင်းရမည့် လှေကားကို ကြည့်ကာ ခဏတာ တွေဝေသွားပြီး ရှေ့ခြေနှစ်ချောင်းကို အောက်သို့ ချရန် အကြိမ်ကြိမ် ကြိုးစားသော်လည်း လုံးဝ မချရဲဘဲ ဖြစ်နေလေသည်။

"အရွယ်က သေးသေးလေးနဲ့ လှေကားပေါ်က မဆင်းရဲဘူး... တက်တုန်းကတော့ မြန်လိုက်တာ"

ရွှီယန်က သူ့ပုံစံကို ကြည့်ပြီး ပြုံးကာ ပြောလိုက်သည်။ ထို့နောက် သူက ရှောင်ဟေးကို သွားရောက် ပွေ့ချီကာ အောက်သို့ ချပေးလိုက်သည်။

ရွှီယန်က ရေကူးကန်ကို လေထုတ်၍ သိမ်းဆည်းရန် မရည်ရွယ်ထားဘဲ ဤအတိုင်းသာ ထားရှိရန် ရည်ရွယ်ထားသည်။

အသုံးပြုလိုသည့်အခါ ရေဟောင်းများကို ဖောက်ထုတ်ပြီး ရေအသစ် ပြန်လည် ဖြည့်တင်းလိုက်ရုံသာ ဖြစ်သည်။

အကယ်၍ ရာသီဥတု ပူလာပါက သူကိုယ်တိုင်ပင် အထဲသို့ ဝင်ရောက် ရေစိမ်နိုင်သည်။

ဘဲလေးများက ရေကူးပြီးနောက် ခြံဝင်းထဲတွင် ရေများကို ခါထုတ်ကာ စိတ်လှုပ်ရှားစွာဖြင့် "ဂါးဂါး" ဟု အော်ဟစ်နေကြလေသည်။

သူတို့၏ အမွေးလေးများက အနည်းငယ် စိုစွတ်နေပြီး ကြည့်ရသည်မှာ အလွန် ချစ်စရာ ကောင်းနေလေသည်။

ရွှီယန်က စက္ကူဖာကို ယူလာပြီး ဘဲပေါက်လေးများကို တစ်ကောင်ချင်းစီ ထည့်ကာ ဘဲခြံထဲသို့ ပြန်လည် ပို့ဆောင်ပေးလိုက်သည်။

မြင်ကွင်းက အလွန်ပင် အေးချမ်းပြီး သက်သောင့်သက်သာ ရှိလှပေသည်။

ကွန်ရက်သုံးစွဲသူများက လယ်ယာခြံဝင်း၏ နေ့စဉ်ဘဝကို ကြည့်ရှုရင်း စိတ်အပန်းပြေနေကြသည်။

သို့သော် ရွှီယန်က ဘဲများကို ဘဲခြံထဲသို့ ပြန်လည် ပို့ဆောင်ပြီးနောက် အပြင်သို့ ထွက်လာချိန်တွင် အနောက်သို့ တစ်ချက် လှည့်ကြည့်လိုက်ရာ ဘေးနားရှိ ကြက်ခြံထဲတွင် ကြက်ပေါက်လေး နှစ်ကောင် မြေကြီးပေါ်တွင် လဲကျနေသည်ကို ရုတ်တရက် မြင်လိုက်ရသည်။

တိတိကျကျ ပြောရလျှင် စုတ်ပြတ်သတ်နေသော ကြက်ပေါက်လေး နှစ်ကောင် ဖြစ်သည်။

ရွှီယန်၏ မျက်လုံးများ ချက်ချင်း ပြောင်းလဲသွားတော့သည်။

"ငါ့ကြက်တွေ... ကြက်ခိုးတဲ့သူ ရှိတယ်"

သူက ကြက်ခြံထဲသို့ အမြန် လျှောက်သွားလိုက်သည်။

ကြက်ခြံ၏ ခြံစည်းရိုးက သိပ်မမြင့်လှပေ။ အနီရောင် အုတ်များဖြင့် ကာရံထားသော ခြံစည်းရိုးမှာ လူတစ်ယောက်၏ ခါးလောက်သာ ရှိပြီး အပြင်မှနေ၍ အတွင်းဘက်ရှိ အခြေအနေများကို အလွယ်တကူ မြင်တွေ့နိုင်လေသည်။

အတွင်းဘက်တွင် အခန်းလွတ် နှစ်ခန်း ရှိပြီး ထိုအခန်းများထဲတွင် ကြက်အိမ်များကို ပြင်ဆင်ပေးထားလေသည်။

ဒရုန်းက ရွှီယန်၏ နောက်မှ တကောက်ကောက် လိုက်ပါနေသည်။

ကွန်ရက်သုံးစွဲသူများကလည်း ဤကဲ့သို့သော အခြေအနေမျိုး ဖြစ်လာလိမ့်မည်ဟု မထင်မှတ်ထားခဲ့သဖြင့် ချက်ချင်း စိတ်ဝင်စားသွားကြတော့သည်။

မြေပြင်ပေါ်တွင် သေဆုံးနေသော ကြက်ပေါက်လေး နှစ်ကောင်ကို တွေ့လိုက်ရပြီး အများစုမှာ အစားခံထားရပြီ ဖြစ်သည်။

ဤမြင်ကွင်းကို မြင်လိုက်ရသောအခါ ရွှီယန်က ကြက်ခြံ၏ အတွင်းဘက်သို့ အမြန် လှမ်းကြည့်လိုက်သည်။

ကျန်ရှိနေသော ကြက်ပေါက်လေးများ အားလုံးက ကြက်အိမ်ထဲတွင် စုရုံးနေကြပြီး လတ်တလောတွင် ဘေးကင်းနေကြသည်။

ကြက်ပေါက်လေး နှစ်ကောင်သာ သေဆုံးသွားခြင်း ဖြစ်သည်။

အခြေအနေအရ ကြည့်မည်ဆိုပါက သေဆုံးသွားသည်မှာ သိပ်မကြာသေးဘဲ သွေးများပင် မခြောက်သေးပေ။

"ဒါ ဘယ်လို ဖြစ်တာလဲ... ဘယ်အကောင် လုပ်သွားတာလဲ"

ရွှီယန်က ကြက်ခြံထဲတွင် ရပ်ကာ စဉ်းစားနေလေသည်။

တောနက်ကြီးထဲတွင် ကြက်စားသော တိရစ္ဆာန်များက အလွန် များပြားလှသည်။

"ရှဉ့်စုတ် ဖြစ်နိုင်တယ်... ဒါပေမယ့် ရှဉ့်စုတ်ကို မစရင် သူက ကြက်တွေကို သိပ်ခိုးလေ့ မရှိဘူး"

"ဒါပေမယ့် အဲ့ဒီကောင်လေး မဖြစ်ပါစေနဲ့... ရှဉ့်စုတ်က တစ်ခါတလေ ကြက်တွေကို မစားဘဲ သတ်ရုံ သက်သက်ပဲ သတ်တတ်တယ်"

"သစ်ကြောင် လည်း ဖြစ်နိုင်တယ်... အဲ့ဒီအကောင်ကလည်း အရမ်း ကြမ်းတာ"

ရွှီယန်၏ မျက်ခုံးများ အနည်းငယ် တွန့်ကွေးသွားလေသည်။

တိုက်ရိုက်ထုတ်လွှင့်မှုကလည်း ဆူညံသွားတော့သည်။

"လခွီး... ဒီလောက်တောင် စိတ်လှုပ်ရှားဖို့ ကောင်းတာလား လယ်ယာခြံဝင်းထဲမှာ လူသတ်မှုတောင် ဖြစ်နေပြီလား"

"ဒီလို အခြေအနေမျိုး ကြုံရရင် ကံဆိုးတယ်လို့ပဲ သတ်မှတ်ရမှာ... တောရိုင်းတိရစ္ဆာန်တွေရဲ့ အမဲလိုက်နိုင်စွမ်းက အရမ်း အားကောင်းလွန်းတယ်"

"လောင်ရွှီက သူခိုးကာကွယ်ရေး စနစ်ကို ပိုပြီး တင်းကျပ်မှ ရမယ်"

"နေ့ခင်းကြောင်တောင်ကြီးတောင် ဝင်ရဲတယ်ဆိုတော့ တော်တော်လေး ရဲတင်းလွန်းနေပြီ"

"တောင်ပေါ်ရွာလေးတွေမှာ ဒီလိုကိစ္စမျိုးက ပုံမှန်ပါပဲ"

"ဘယ်သူ့အိမ်ကများ ကြက် နှစ်ကောင် သုံးကောင် မပျောက်ဖူးလို့လဲ"

ထိုအချိန်မှာပင် အပြင်ဘက်မှ "အီအီအာအာ" ဟူသော အော်သံ တစ်ခု ထွက်ပေါ်လာသည်ကို ရွှီယန် ရုတ်တရက် ကြားလိုက်ရသည်။

ရွှီယန်က ခြံဝင်းထဲမှ အမြန် ထွက်ကာ ကြည့်ရှုလိုက်သည်။

ကြည့်လိုက်သောအခါ ကြက်ခြံ၏ ဘေးနားတွင် အရွယ်အစား သေးငယ်သော မြေခွေး သုံးကောင်က သူ့ကို စူးစမ်းနေသည့် မျက်လုံးများဖြင့် ကြည့်နေသည်ကို တွေ့လိုက်ရသည်။

မြေခွေးများ၏ အမူအရာက အနည်းငယ် ထူးဆန်းနေပြီး စိုးရိမ်ထိတ်လန့်နေပုံ ရသည်။

ဤတစ်ကြိမ်တွင်တော့ "မြေခွေး သူခိုးများ" သက်သေနှင့်တကွ ဖမ်းမိသွားပြီ ဖြစ်သည်။ လူသတ်သမားများကို ရွှီယန်က အောင်မြင်စွာ ဖမ်းဆီးလိုက်နိုင်ပြီ ဖြစ်သည်။

"မင်းတို့ သုံးကောင်ကိုး... ငါ့ကြက်တွေကို လာခိုးတယ်ပေါ့လေ"

ရွှီယန်က ခြံစည်းရိုး နောက်ဘက်တွင် အပေါက် တစ်ပေါက် ရှိနေသည်ကို သတိထားမိလိုက်သည်။ မြေခွေးများက ထိုအပေါက်မှတစ်ဆင့် အတွင်းသို့ ဝင်ရောက်လာခြင်း ဖြစ်နိုင်သည်။

ရွှီယန်၏ စကားကို ကြားသောအခါ မြေခွေး သုံးကောင်က ချက်ချင်း "အီအီအီအီ" ဟု အော်ဟစ်လာကြပြီး အနည်းငယ် စိုးရိမ်နေသည့်ပုံ ပေါ်ကာ တစ်ခုခုကို ရှင်းပြချင်နေပုံ ရသည်။

၎င်းတို့၏ ပုံစံလေးများက အလွန်ပင် ချစ်စရာ ကောင်းလှပေသည်။

သို့သော် ရွှီယန်က သူတို့၏ ကြက်ခိုးသည့် အကျင့်ကို အလိုလိုက်၍ မရနိုင်ဟု တွေးလိုက်မိသဖြင့် ချက်ချင်း ပြေးသွားကာ မြေခွေးများကို ဖမ်းရန် ကြိုးစားလိုက်သည်။

မြေခွေးများက အခြေအနေကို မြင်သောအခါ ထိတ်လန့်တကြား ထွက်ပြေးကြတော့သည်။ သို့သော် လျင်မြန်ဖြတ်လတ်သော မြေခွေးလေးများက ရွှီယန်၏ စွမ်းရည်ကို လုံးဝ မသိရှိကြပေ။ မကြာမီမှာပင် မြေခွေး တစ်ကောင်ကို ရွှီယန်က အမိဖမ်းလိုက်နိုင်ပြီး အပေါ်သို့ မတင်လိုက်လေသည်။

ကွန်ရက်သုံးစွဲသူများက ဤမြင်ကွင်းကို မြင်သောအခါ အဆက်မပြတ် မှတ်ချက်များ ရေးသားလာကြတော့သည်။

"အပြင်ဘက်မှာ မြေခွေးတွေတောင် ရှိတာလား လခွီးပဲ... ဒါတောင် သုံးကောင်တောင်"

"ဒါက ကြက်သတ်တဲ့ လူသတ်သမားလား"

"ကြည့်ရတာ အရမ်း ချစ်ဖို့ကောင်းတာပဲ... အစ်ကိုကြီးက ဘာလုပ်မလို့လဲ"

"တောရိုင်း မြေခွေးတွေကလည်း ကာကွယ်စောင့်ရှောက်ရမယ့် တိရစ္ဆာန်တွေပဲ မဟုတ်လား"

"ကြက် နှစ်ကောင်တည်းပါကွာ... တစ်ကောင်ကိုမှ ယွမ် အနည်းငယ်ပဲ တန်တာ... မြေခွေးလေးကို မနာကျင်စေနဲ့နော်"

ထိုအချိန်တွင် ရွှီယန်က ဖွင့်ပြောလိုက်သည်။

"အားလုံးပဲ စိတ်ချပါ... ကျွန်တော် မြေခွေးကို လုံးဝ မနာကျင်စေပါဘူး ဘာမှလည်း မလုပ်ပါဘူး"

"ဒါပေမယ့် ကြက်ခြံ ဘဲခြံ ငန်းခြံ တွေထဲက အကောင်လေးတွေအတွက် သူတို့ကို သင်ခန်းစာ နည်းနည်းတော့ ပေးရမယ် ဒါမှမဟုတ် ခြိမ်းခြောက်တာမျိုးတော့ လုပ်ရမယ်"

"ခိုးစားတာက မကောင်းဘူး ဆိုတာကို သူတို့ သိအောင် လုပ်ရမယ်... မဟုတ်ရင် နောက်ဆို ပိုပြီး ရဲတင်းလာလိမ့်မယ်"

"ကျွန်တော့် အစီအစဉ်ကတော့ သူ့ကို နာရီဝက်လောက် လှောင်ထားမလို့ပဲ နာရီဝက် ပြည့်ရင် လွှတ်ပေးလိုက်မယ်... ဒီလို အခြေအနေမျိုးက ဥပဒေနဲ့လည်း မငြိစွန်းပါဘူး... အရေးပေါ် အခြေအနေကို ပုံမှန်အတိုင်း ဖြေရှင်းတာပါပဲ"

"ဒီမြေခွေးလေးကို ထောင်ဒဏ် နာရီဝက် ချမှတ်လိုက်တယ်"

ပြောနေရင်းဖြင့် ရွှီယန်က မြေခွေးလေးကို ဆွဲယူကာ လှောင်အိမ် တစ်ခုထဲသို့ ထည့်လိုက်လေသည်။

မြေခွေးလေးက "အီအီအီအီ" အော်ဟစ်နေပြီး အလွန် သနားစရာ ကောင်းနေလေသည်။

ရွှီယန်က သူ့ကို ပြစ်မှုကျူးလွန်ရာ နေရာသို့ ခေါ်ဆောင်သွားပြီး သေဆုံးနေသော ကြက်ပေါက်လေးကို လက်ညှိုးထိုးပြကာ ပြောလိုက်သည်။

"ဒါက ငါ့ကြက်တွေ... မင်းတို့ ခိုးစားလို့ မရဘူး"

"အကြောင်းမဲ့ လျှောက်သတ်လို့လည်း မရဘူး"

ရွှီယန်၏ စကားကို ကြားသောအခါ မြေခွေးလေးက ထပ်မံ၍ "အီအီ" ဟု အော်ဟစ်လိုက်ပြန်သည်။

ဤမြေခွေးလေးကို ကြည့်ရသည်မှာ အတော်လေး ချစ်စရာ ကောင်းလှပေသည်။

ရွှီယန် ကိုယ်တိုင်လည်း အတော်လေး သဘောကျမိလေသည်။

သူ၏ လယ်ယာခြံဝင်းက ကြက် ဘဲ မွေးမြူရေး လုပ်ငန်းကို မလုပ်ကိုင်ဘဲ သူတို့၏ လုံခြုံရေးကို စိတ်ပူစရာ မလိုပါက ရွှီယန်က မြေခွေးလေးများကို ကိုယ်တိုင် အစာကျွေးရန်ပင် ဝန်လေးမည် မဟုတ်ပေ။

သို့သော် မြေခွေးလေးများ၏ အမဲလိုက်ခြင်းနှင့် ခိုးစားခြင်း အကျင့်ဆိုးများကိုတော့ လုံးဝ အားပေး၍ မရနိုင်ပေ။

မြေခွေးလေးက မြေပြင်ပေါ်ရှိ ကြက်ပေါက်လေး၏ အလောင်းကို ကြည့်ရင်း "အီအီ" အော်ဟစ်နေဆဲ ဖြစ်ပြီး အသံထဲတွင် အနည်းငယ် ငိုသံလေးများပင် ပါဝင်နေလေသည်။

ရွှီယန်၏ စိတ်များ အနည်းငယ် ပျော့ပြောင်းသွားလေသည်။

"ကဲပါ... မင်းကို ခဏလောက်ပဲ လှောင်ထားမှာပါ... မအော်နဲ့တော့ စပျစ်သီး နည်းနည်း ကျွေးမယ် ဟုတ်ပြီလား"

ရွှီယန်က လှောင်အိမ်ကို ဆွဲကာ နံရံပေါ်တွင် တင်ထားလိုက်သည်။

ထို့နောက် သူက အိမ်ထဲသို့ ပြန်ဝင်ကာ စပျစ်သီး အနည်းငယ် ယူလာပြီး အခွင့်ကြုံခိုက် အမဲသားခြောက် အနည်းငယ်ကိုပါ ယူလာခဲ့လေသည်။

အပြင်ထွက်လာပြီးနောက် ရွှီယန်က စပျစ်သီးနှင့် အမဲသားခြောက်များကို လှောင်အိမ်ထဲရှိ မြေခွေးလေးအား ကျွေးလိုက်လေသည်။

အမဲသားခြောက်၏ အနံ့ကို ရသွားသောအခါ ဤကောင်လေးက ချက်ချင်းပင် ပါးစပ်ဖြင့် ကိုက်ယူကာ ဖြည်းညင်းစွာ စားသောက်နေတော့သည်။

အစာရသွားသောအခါ ၎င်းက ဆက်မအော်တော့ဘဲ အတော်လေး ပျော်ရွှင်နေပုံ ရသည်။

'အစားကြူးတဲ့ ကောင်လေးပဲ’

အဓိက အကြောင်းရင်းမှာ လူသားများ ချက်ပြုတ်ထားသော အစားအစာများက အလွန် အရသာရှိလွန်းသဖြင့် သာမန် တိရစ္ဆာန်လေးများက လုံးဝ ခုခံနိုင်စွမ်း မရှိကြသောကြောင့် ဖြစ်သည်။

ဤမြင်ကွင်းကို ကြည့်ရင်း ရွှီယန်လည်း ပြုံးလိုက်မိလေသည်။

အခြား မြေခွေးလေး နှစ်ကောင်ကလည်း အဝေးသို့ မပြေးသွားဘဲ အနီးအနားမှနေ၍ စောင့်ကြည့်နေကြလေသည်။

ရွှီယန်က မြေခွေးလေးကို မနာကျင်စေကြောင်း မြင်သောအခါ သူတို့လည်း အနည်းငယ် စိတ်အေးသွားကြပုံ ရသည်။

ထို့နောက် မြေခွေးလေး နှစ်ကောင်က လျင်မြန်စွာ ပြေးထွက်သွားကြလေသည်။

မကြာမီမှာပင် သူတို့ နှစ်ကောင်က ပြန်လည် ရောက်ရှိလာပြီး ရွှီယန် ရှိရာဘက်သို့ တမင်တကာ ပြေးလာကြတော့သည်။

ဤသည်ကတော့ ရွှီယန် လုံးဝ ထင်မှတ်မထားခဲ့သော အခြေအနေ တစ်ခုပင် ဖြစ်လေသည်။