အခန်း ၅၁

အခန်း (၅၁) ထျန်းနန်ရှင်းပင်တွေကြားမှာ ပုန်းကွယ်နေတဲ့ ရတနာ

တောနက်ကြီးထဲသို့ ဝင်ရောက်လာပြီးနောက် တောရိုင်းတိရစ္ဆာန် အရေအတွက်မှာ သိသိသာသာ များပြားလာခဲ့သည်။

အများဆုံး တွေ့ရသည်မှာ ဒရယ်ပြောက်များနှင့် တောသမင်များပင် ဖြစ်သည်။

သူတို့ကို တွေ့တိုင်း တိုက်ရိုက်ထုတ်လွှင့်မှုအတွင်းရှိ ကွန်ရက်သုံးစွဲသူများက အံ့ဩချီးကျူးလေ့ ရှိကြသည်။

“ဝိုး…”

တကယ်တမ်းတွင် ဤတိရစ္ဆာန် နှစ်မျိုးက အရှေ့မြောက်ဒေသတွင် အလွန် ပေါများလှသည်။

ဥပမာအားဖြင့် တာ့လျန် ဘက်ရှိ တောရိုင်း ဒရယ်ပြောက်များ ဆိုလျှင် အလွန် သတ္တိကောင်းကြပြီး ညဘက်ဆိုလျှင် လူများ သွားလာလေ့ရှိသော ပန်းခြံများတွင်ပင် လာရောက် လမ်းလျှောက်လေ့ ရှိကြသည်။

တစ်ခါတစ်ရံ လမ်းမပေါ်တွင်ပင် တွေ့ရတတ်သည်။

လမ်းညွှန်ဆိုင်းဘုတ်များတွင်ပင် ဒရယ်ပြောက်များ သွားလာခွင့် မပြုဟူသော အမှတ်အသားများ ရှိလေသည်။

တောသမင်များကတော့ ပို၍ပင် ပေါများသေးသည်။ အဘယ်ကြောင့်ဆိုသော် ယခင်က ဤဒေသ၏ ဂေဟစနစ် ကောင်းမွန်မှုကို "တုတ်နဲ့ရိုက်ရင် တောသမင်ရတယ်၊ ခွက်နဲ့ခပ်ရင် ငါးရတယ်၊ တောကြက်က ထမင်းအိုးထဲ အလိုလို ဝင်လာတယ်" ဟုပင် တင်စားပြောဆိုခဲ့ကြဖူးသည်။

အရိုက်ခံရဆုံး အကောင်မှာ သူပင် ဖြစ်သည်။

ရွှီယန်က လမ်းတစ်လျှောက်တွင် ပစ္စည်းကောင်း အများအပြားကို ခူးယူနိုင်ခဲ့ပြီး အများစုမှာ လင်ဇီးနီများ ဖြစ်သည်။ သူက တောင်ပေါ်တက်ရာတွင် ရတနာရှာဖွေရေး သံလိုက်အိမ်မြှောင်ကိုသာ အပြည့်အဝ အားကိုးနေခြင်း မဟုတ်ဘဲ လမ်းလျှောက်ရင်း ဟိုဒီလိုက်ကြည့်ကာ ကောက်ယူခဲ့ရာ မကြာမီမှာပင် တစ်အိတ်စာ အပြည့် ရရှိသွားလေသည်။

"ဒီဘက်ကို ကြည့်လိုက်... လင်ဇီးနီ နောက်ထပ် နည်းနည်း ထပ်တွေ့ပြန်ပြီ ဒီလင်ဇီးနီတွေက တော်တော်လေး ကြီးတယ်"

ရွှီယန်က သစ်ပင်ပေါ်တွင် ထိုးထွက်နေသော လင်ဇီးနီများကို လက်ညှိုးထိုးပြကာ ပြုံးလျက် ပြောလိုက်သည်။

သူက ဖွဖွလေး ချိုးယူလိုက်ရာ လင်ဇီးနီများက အလွယ်တကူ ပြုတ်ထွက်လာပြီးနောက် အိတ်ထဲသို့ ထည့်လိုက်လေသည်။

ပစ္စည်းကောင်းများကို ကောက်ယူရခြင်းက တကယ်ကို ပျော်စရာ ကောင်းလှပေသည်။

အတန်ကြာ လမ်းလျှောက်ပြီးနောက် ရွှီယန်က ရတနာရှာဖွေရေး သံလိုက်အိမ်မြှောင်ကို အသုံးပြုရန် ဆုံးဖြတ်လိုက်သည်။

ထို့နောက် သူက သံလိုက်အိမ်မြှောင် ပြသပေးသော နေရာဆီသို့ လျှောက်သွားလိုက်လေသည်။

ကွန်ရက်သုံးစွဲသူ တစ်ယောက်က တိုက်ရိုက်ထုတ်လွှင့်မှု အတွင်းတွင် မေးမြန်းနေဆဲ ဖြစ်သည်။

"အစ်ကိုကြီး... တစ်ယောက်တည်း တောနက်ကြီးထဲကို ဝင်လာတာ တကယ် မကြောက်ဘူးလား"

ရွှီယန်က ထိုမှတ်ချက်ကို မြင်သောအခါ အေးဆေးတည်ငြိမ်စွာဖြင့် ပြန်ဖြေလိုက်သည်။ "တောနက်ကြီးထဲမှာ အန္တရာယ်က အဲ့ဒီလောက် အများကြီး မရှိပါဘူး"

သို့သော် သူ၏ စကားပင် မဆုံးလိုက်သေး၊ ရွှီယန်၏ လက်ထဲရှိ တုတ်က ရှေ့သို့ တစ်ချက် ပုတ်လိုက်ရာ အညိုရောင် ရောစပ်နေသော မြွေတစ်ကောင်က မြက်ခင်းထဲမှ ထွက်ပေါ်လာသည်ကို တွေ့လိုက်ရသည်။

ရွှီယန်လည်း အလွန် လန့်သွားပြီး "လခွီး" ဟု အော်လိုက်ကာ အနောက်သို့ အမြန် ခုန်ဆုတ်လိုက်လေသည်။

သူ၏ ခုန်အားက အလွန် ကောင်းမွန်သဖြင့် ကွန်ရက်သုံးစွဲသူများ၏ အမြင်တွင် သူက အနောက်သို့ လွင့်စင်သွားသကဲ့သို့ပင် ဖြစ်နေလေသည်။

အားလုံးလည်း သူ၏ အပြုအမူကြောင့် လန့်သွားကြတော့သည်။

ဘာဖြစ်တာလဲ။

ရွှီယန်က ခြေနှစ်လှမ်းခန့် အနောက်ဆုတ်လိုက်ပြီး လက်ထဲတွင် တုတ်ကို ကိုင်ကာ ရှေ့ရှိ အညိုရောင် မြွေကို သတိကြီးစွာဖြင့် စောင့်ကြည့်နေလေသည်။

ထိုအခါမှသာ ကွန်ရက်သုံးစွဲသူများက မြွေတစ်ကောင် ရှိနေကြောင်း မြင်တွေ့သွားကြသည်။

"လခွီး... မြွေ... မြွေကြီး"

"ဟိုက်... ငါတော့ တစ်ကိုယ်လုံးကို အေးစက်သွားတာပဲ"

"တောနက်ကြီးထဲမှာ အန္တရာယ် သိပ်မရှိဘူးလို့ ပြောထားတာ မဟုတ်ဘူးလား"

"တကယ်ကြီး မြွေပါလား... ဒီမြွေက အဆိပ်ရှိလား"

"လောင်ရွှီ ရဲ့ ပုံစံကို ကြည့်လိုက်... အဆိပ်ရှိမရှိ ဆိုတာ သိသာပါတယ်"

ရွှီယန်က အဆိပ်ပြင်းမြွေကို စိုက်ကြည့်ရင်း တိုးညင်းစွာ ပြောလိုက်သည်။

"ဒါက ခြေငါးလှမ်းမြွေ လို့ ခေါ်တယ် တောနက်ကြီးထဲမှာ နေထိုင်လေ့ ရှိပြီး အရွယ်အစား ကြီးမားသလို အဆိပ်လည်း အရမ်း ပြင်းထန်တယ်... အသက်အန္တရာယ် ရှိနိုင်တဲ့ အဆိပ်ပြင်းမြွေ အမျိုးအစားပဲ"

"ဒါပေမယ့် သူတို့က ဆေးဘက်ဝင် တန်ဖိုး အရမ်း မြင့်မားတော့ လူတွေက အများကြီး ဖမ်းကြလို့ အခုဆိုရင် သိပ်တောင် မကျန်တော့ဘူး"

"ဆင်းရဲမွဲတေမှုက အဆိပ်မိတာထက် ပိုကြောက်စရာ ကောင်းတယ်လို့ပဲ ပြောရမှာပေါ့... လူတွေကို အန္တရာယ်ကြားထဲကို တွန်းပို့နေတာပဲ"

"ကျွန်တော်ကတော့ မြွေဖမ်းတာကို စိတ်မဝင်စားပါဘူး"

သူက ပြောနေရင်းဖြင့် ဘေးနားမှ ကွေ့ပတ်၍ သွားလိုက်သည်။

ခြေငါးလှမ်းမြွေက ဖြည်းညင်းစွာ တွားသွားနေပြီး ဝမ်းဗိုက်က မြက်ခင်းများပေါ်တွင် ပွတ်တိုက်သွားသဖြင့် မြက်ပင်များ အများအပြား ဖိပြားသွားလေသည်။

မြွေများ၏ သွားလာလှုပ်ရှားမှုက အလွန် ထူးဆန်းလှပေသည်။

အေးစက်နေသော မျက်လုံးများနှင့် မြွေလျှာက လူများကို ပို၍ ကြောက်ရွံ့စေလေသည်။

ရွှီယန်က မြွေကို မကြောက်သော်လည်း ရုတ်တရက် အဆိပ်ပြင်းမြွေနှင့် တွေ့လိုက်ရသဖြင့် လန့်သွားခြင်းမှာ သဘာဝကျလေသည်။

"ဒီမြွေကို ခြေငါးလှမ်းမြွေ လို့ ခေါ်တာလား... လူကို ကိုက်လိုက်ရင် ငါးလှမ်း လျှောက်တာနဲ့ သေသွားတယ်ဆိုတဲ့ အဲ့ဒီမြွေလား"

"ခြေငါးလှမ်းမြွေ အကိုက်ခံရရင် ဘယ်လိုလုပ်ရမလဲ... လေးလှမ်း လျှောက်ပြီးရင် နောက်ထပ် တစ်ခါ ထပ်အကိုက်ခံလိုက်ပေါ့"

"ခုနက လောင်ရွှီ အနောက်ကို ခုန်ဆုတ်သွားတဲ့ အကွာအဝေးက တော်တော် ဝေးတာပဲ... သူ့မှာ သိုင်းပညာ ရှိတယ်လို့ ငါ ပြောသားပဲ"

"တကယ် ဝေးတယ်... ချောင်းကျစ် တောင် သူ့လောက် ခုန်နိုင်ရင် ခုနစ်လှမ်း မလိုဘဲ နန်းတော်ထဲကနေ ထွက်ပြေးနိုင်မှာ"

ရွှီယန်က ခြေငါးလှမ်းမြွေကို ကွေ့ရှောင်သွားပြီး ပစ်မှတ် နေရာဆီသို့ ဆက်လက် လျှောက်သွားလိုက်လေသည်။

မကြာမီမှာပင် သူက ရတနာရှာဖွေရေး သံလိုက်အိမ်မြှောင် ပြသထားသော နေရာသို့ ရောက်ရှိသွားလေသည်။

သူက မျှော်လင့်ချက် အပြည့်ဖြင့် ကြည့်ရှုလိုက်ရာ ကွက်လပ် တစ်ခုပေါ်တွင် အပင်များ အမြောက်အမြား ပေါက်ရောက်နေသည်ကို တွေ့လိုက်ရလေသည်။

အပင် တစ်ပင်ချင်းစီက ထီးရိုးများကဲ့သို့ ဖြစ်နေပြီး အရွက်များက အပြင်သို့ ဖြာထွက်နေကြသည်။

အပင်များ၏ အလယ်တွင် ကွက်လပ် တစ်ခု ရှိနေလေသည်။

ရွှီယန်က ခဏတာ ကြောင်အမ်းအမ်း ဖြစ်သွားလေသည်။

"ဟိုက်... ထျန်းနန်ရှင်း ပင်တွေ အများကြီးပါလား"

သူက မအောင့်နိုင်တော့ဘဲ အံ့ဩတကြီးရေရွှတ် လိုက်မိလေသည်။

ဤတစ်ကြိမ်တွင်တော့ ကွန်ရက်သုံးစွဲသူများက အနည်းငယ် ရိပ်မိသွားကြလေသည်။

အဓိက အားဖြင့် ထျန်းနန်ရှင်း မျိုးရင်းဝင် အပင်များ အားလုံးက ပုံစံတူညီကြပြီး အရွက်များက အလွန် ရှည်လျားကာ ဖြာထွက်နေသဖြင့် အခြား မြက်ပင်များနှင့် သိသိသာသာ ကွာခြားနေသောကြောင့် ဖြစ်သည်။

"အဲ့ဒါက ရတနာလား"

"တန်ဖိုးရှိလား"

အားလုံးက သူတို့ သိချင်သော မေးခွန်းများကို ချက်ချင်း မေးမြန်းလာကြလေသည်။

ရွှီယန်က ခေါင်းခါလိုက်ပြီး "ထျန်းနန်ရှင်း မျိုးရင်းဝင် အပင်တွေက တန်ဖိုး မရှိပါဘူး... အဓိကက အဆိပ်ရှိတယ် ထျန်းနန်ရှင်း မျိုးရင်းဝင် အပင် တော်တော်များများက အဆိပ်ရှိကြတယ်"

"အဆိပ်ပင် တွေလို့ သတ်မှတ်လို့ ရတယ်"

"ဒါပေမယ့် ခြွင်းချက် တစ်ခုတော့ ရှိတယ်... အဲ့ဒါကတော့ အားလုံး စားလေ့ရှိတဲ့ ဝဥ ပဲ တကယ်တော့ ဝဥ မှာလည်း အဆိပ် ရှိတယ် ဒါပေမယ့် လူတွေက နည်းလမ်း အမျိုးမျိုးနဲ့ ပြုပြင်လိုက်တော့ အဆိပ် မရှိတော့တာ"

"ကျွန်တော်တို့ နိုင်ငံရဲ့ အစားအသောက် ယဉ်ကျေးမှုက တကယ်ကို ကြီးကျယ်ခမ်းနားပါတယ်... ဘယ်လောက်ပဲ အဆိပ်ရှိတဲ့ အရာဖြစ်ဖြစ် စားလို့ကောင်းရင် လူတွေက နည်းလမ်း ရှာပြီး စားကြတာပါပဲ"

"ကျွန်တော် အံ့ဩသွားတာက ဒီနေရာမှာ ထျန်းနန်ရှင်း ပင်တွေ အရမ်း များနေလို့ပါ... ဒီလောက် အများကြီးဆိုတော့ ဘယ်သူကများ အနီးအနားကို သွားရဲမှာလဲ"

"ဒါကြောင့်လည်း ဒီနားမှာ ဒရယ်ပြောက် တစ်ကောင်တောင် မတွေ့ရတာကိုး"

ယခုတစ်ကြိမ် ရတနာရှာဖွေရေး သံလိုက်အိမ်မြှောင် ပြသထားသော အရာက ထျန်းနန်ရှင်း ပင်များ အလယ်ရှိ ကွက်လပ်တွင် ရှိနေကြောင်း ရွှီယန် သတိထားမိလိုက်သည်။

ထိုကွက်လပ်တွင် မြက်ပင်များ သိပ်မရှိဘဲ မြေပြင်က အနည်းငယ် အက်ကွဲနေလေသည်။

ရွှီယန်က ဘောင်းဘီရှည် ဝတ်ဆင်ထားသဖြင့် ထျန်းနန်ရှင်း ပင်များကြားမှ ဖြတ်သွားသော်လည်း ကိစ္စမရှိပေ။

အကယ်၍ ဘောင်းဘီတိုသာ ဝတ်ဆင်ထားမည် ဆိုပါက ထျန်းနန်ရှင်း ပင်များနှင့် ပွတ်တိုက်မိလျှင် အရေပြားများ ရောင်ရမ်းလာမည်ကို စိုးရိမ်ရလေသည်။

"ဒီအများကြီးက အဆိပ်ပင်တွေချည်းပဲလား"

"ကြည့်ရတာ နည်းနည်း ကြောက်စရာ ကောင်းတာပဲ"

"ထျန်းနန်ရှင်း တွေက အဆိပ်ရှိပေမယ့်လည်း အဲ့ဒီလောက်ကြီးတော့ မဆိုးပါဘူး"

ထိုအချိန်တွင် ရွှီယန်က ရှေ့ရှိ ကွက်လပ်ကို ကြည့်ရင်း ပြောလိုက်သည်။

"အလယ်မှာ တစ်ခုခု ရှိနေပုံ ရတယ်"

"ကျွန်တော် သွားကြည့်လိုက်ဦးမယ်"

သူက ထျန်းနန်ရှင်း ပင်များ ကြားမှ ဖြတ်သန်းသွားရာ မြင်ကွင်းက အနည်းငယ် ကြောက်မက်ဖွယ် ကောင်းနေလေသည်။

မကြာမီမှာပင် ရွှီယန်က အလယ်ရှိ ကွက်လပ်သို့ ရောက်ရှိသွားပြီး မလှမ်းမကမ်းတွင် မြင့်မားသော ထင်းရှူးပင် အချို့ကို တွေ့လိုက်ရသည်။

မြေပြင်ပေါ်တွင် မြက်ပင်များ သိပ်မရှိဘဲ အချို့နေရာများတွင် မြေကြီးများ အက်ကွဲနေလေသည်။

သူက တစ်ခုခုကို ရိပ်မိသွားသည့်အလား တူးရန်အတွက် သံဇွန်းငယ် တစ်ခုကို ထုတ်ယူကာ အက်ကွဲနေသော မြေစာခဲများကို ဖွဖွလေး ကလော်ထုတ်လိုက်လေသည်။

မကြာမီမှာပင် ရွှီယန်က အောက်ဘက်မှ အာလူးနှင့် ဆင်တူသော အမည်းရောင်နှင့် အညိုရောင် ရောစပ်နေသည့် အရာတစ်ခုကို ထုတ်ယူလိုက်လေသည်။

"တကယ်ကြီး ရတနာ ရှိနေတာပဲ"

"ဒီတစ်ခေါက်တော့ ထပ်ပြီး အမြတ်ကြီး ထွက်ပြန်ပြီ"

ရွှီယန်က အနည်းငယ် စိတ်လှုပ်ရှားစွာဖြင့် ပြောလိုက်သည်။

ကွန်ရက်သုံးစွဲသူများကတော့ ဘာမှန်း မသိဖြစ်နေကြလေသည်။

"လောင်ရွှီ ဘာရှာတွေ့ပြန်တာလဲ"

"အဲ့ဒီအရာက မြည်းချေးတုံး နဲ့ တူနေသလိုပဲ"

"ဟုတ်တယ်... မြည်းချေးတုံး နဲ့ တူတယ်"

"မင်းတို့က လောင်ရွှီ ကို အရမ်း အထင်သေးလွန်းတယ်... မြင်းချေးတုံး လည်း ဖြစ်နိုင်တာပဲ"

လူအများအပြားက မှတ်ချက်များ ရေးသားနေကြလေသည်။

ရွှီယန်က မှတ်ချက်များကို မြင်သောအခါ ပြုံးလိုက်ပြီး ပြောလိုက်သည်။

"ဒါက မြည်းချေးတုံး မဟုတ်ပါဘူး... တကယ့် ပစ္စည်းစစ်စစ် မှိုမည်း ပါ"

"တောနက်ကြီးထဲမှာ တကယ်ပဲ ပစ္စည်းကောင်းတွေ ရှိတာပဲ"

"မှိုမည်း က တန်ဖိုး အရမ်း မြင့်မားတယ် ကမ္ဘာပေါ်မှာ အကောင်းဆုံးနဲ့ အရှားပါးဆုံး စားသုံးနိုင်တဲ့ မှို အမျိုးအစားပဲ... ကျွန်တော်တို့ ဆီမှာတော့ ဈေး သိပ်မကြီးပေမယ့် ဥရောပ ဘက်မှာဆိုရင်တော့ ရွှေနဲ့တောင် နှိုင်းယှဉ်လို့ ရတယ်"

"ကျွန်တော်တို့ ဆီမှာ မှိုမည်း ရှာတဲ့ မုဆိုးတွေ ရှိတယ်... အောက်တိုဘာလ ရောက်ပြီဆိုရင် အဲ့ဒီလူတွေက တောင်ပေါ်တက်ပြီး မှိုမည်းတွေကို သီးသန့် လိုက်ရှာကြတာ"

"အခု ကျွန်တော် ဒါကို တွေ့လိမ့်မယ်လို့ တကယ် မထင်ထားခဲ့ဘူး"

ရွှီယန်က မြေကြီးများကို ဖြည်းဖြည်းချင်း ဖယ်ရှားလိုက်သည်။ မှိုမည်းများက အများအားဖြင့် တစ်ခုတည်း ရှိလေ့ မရှိဘဲ တစ်ခု တွေ့ပါက ပတ်ဝန်းကျင်တွင် သေချာပေါက် နောက်ထပ် ရှိနေနိုင်လေသည်။

ထင်ထားသည့်အတိုင်းပင် ရွှီယန်က မြေကြီးကို ဆက်လက် တူးဖော်လိုက်ရာ နောက်ထပ် ကြီးမားသော မှိုမည်း သုံးခုကို ထပ်မံ တွေ့ရှိလိုက်ရလေသည်။

တောင်ပေါ်တက်လာသည်မှာ အတော်လေး ကြာပြီ ဖြစ်သော်လည်း ယခုမှသာ တန်ဖိုးကြီးသော ပစ္စည်း အချို့ကို တွေ့ရှိခဲ့ရခြင်း ဖြစ်သည်။

တိုက်ရိုက်ထုတ်လွှင့်မှု အတွင်းရှိ ကြည့်ရှုသူများက ထိုအခါမှသာ ရွှီယန် တူးဖော်ရရှိသော အမည်းရောင် အတုံးများမှာ မှိုမည်းများ ဖြစ်ကြောင်း သိရှိသွားကြတော့သည်။

"အဲ့ဒါက မှိုမည်းလား... လောင်ရွှီ ပိုက်ဆံ အများကြီး ရပြန်ပြီ"

"သူ ကြိုပြီး စိုက်ထားတာ သေချာတယ်"

"တိုက်ရိုက်ထုတ်လွှင့်မှုကို အချိန်နည်းနည်းလောက် ပိုကြည့်ဖူးတဲ့ သူတိုင်း ဒီတိုက်ရိုက်ထုတ်လွှင့်သူက လုံးဝ မလိမ်ညာဘူး ဆိုတာ သိပါတယ်"

"ဘယ်လောက်တောင် ရနိုင်မလဲ... ငါလည်း တောင်ပေါ် တက်ချင်လာပြီ"

ရွှီယန်က ဆက်တိုက် ဆိုသလို မှိုမည်း အချို့ကို တူးဖော်ရရှိခဲ့ပြီးနောက် ပတ်ဝန်းကျင်တွင် ဆက်လက် ရှာဖွေနေလေသည်။

"မှိုမည်းတွေက ထင်းရှူးပင်တွေနဲ့ ဝက်သစ်ချပင်တွေ အောက်မှာ ပေါက်လေ့ ရှိတယ်... တစ်ခါတလေကျရင် မြေကြီး အပြင်ဘက်ကို နည်းနည်း ထွက်နေတတ်ပြီး တစ်ခါတလေကျရင်တော့ မြေကြီးကို အက်ကွဲသွားအောင် ထိုးထွက်လာတတ်တယ်"

"အဲ့ဒီလိုမျိုးတွေကတော့ ရှာရ လွယ်တယ်"

"မြေကြီး အောက်မှာ မြုပ်နေတာတွေကတော့ အရှာရခက်ဆုံးပဲ"

"ဒါပေမယ့် မှိုမည်း ရှာတဲ့ မုဆိုးတွေမှာ မှိုမည်း ရှာဖို့ သီးသန့် နည်းလမ်း ရှိတယ်... ဝက်တွေက မှိုမည်း အနံ့ကို အရမ်း အာရုံခံနိုင်စွမ်း ရှိတော့ အများအားဖြင့် ဝက်တစ်ကောင်ကို တောင်ပေါ် ခေါ်သွားပြီး ဝက်နောက်ကို လိုက်ရှာကြတာ"

"အဲ့ဒါကြောင့် မှိုမည်းကို နောက်ထပ် နာမည် တစ်မျိုးနဲ့ ဝက်ယက်မှို လို့လည်း ခေါ်ကြသေးတယ်"

ရွှီယန်က ရှာဖွေနေရင်းဖြင့် ဗဟုသုတ အချို့ကိုပါ မျှဝေပေးနေလေသည်။

ကွန်ရက်သုံးစွဲသူများကတော့ အလွန် အံ့ဩနေကြလေသည်။

'ဝက်ယက်မှို ဟုတ်လား။’

'မုဆိုးတွေက ဝက်ကို တောင်ပေါ် ခေါ်သွားတယ် ဟုတ်လား’

'အမဲလိုက်ခွေး ခေါ်သွားတာကိုပဲ ကြားဖူးတာ အမဲလိုက်ဝက် ခေါ်သွားတာကိုတော့ တစ်ခါမှ မကြားဖူးဘူး’

အမဲလိုက်ရမည့် ပစ်မှတ် မတူညီပါက အသုံးပြုရမည့် နည်းလမ်းများလည်း မတူညီကြပေ။ မုဆိုးများက အတွေ့အကြုံ ရင့်ကျက်ကြသဖြင့် အခြေအနေအရ ပြောင်းလဲ အသုံးပြုတတ်ကြလေသည်။

"ဒီထျန်းနန်ရှင်း ပင်တွေကိုတောင် ကျေးဇူးတင်ရဦးမယ်... သူတို့ ရှိနေလို့သာ ဒီမှိုမည်းတွေက တောဝက်တွေရဲ့ အစားခံရမယ့် ဘေးကနေ လွတ်ကင်းသွားတာ"

"တောဝက်တွေကလည်း မှိုမည်းကို အရမ်း ကြိုက်ပြီး အရမ်းလည်း စားနိုင်ကြတာ"

"ထျန်းနန်ရှင်း ပင်တွေ ဒီမှာ ပေါက်နေတော့ တောဝက်တွေက အနား မကပ်ရဲဘူး ပြီးတော့ မှိုမည်း အနံ့ကိုလည်း မရနိုင်ဘူး... အဲ့ဒါကြောင့် ဒီမှိုမည်းတွေက အခုချိန်ထိ ရှိနေသေးတာပါ"

"ဒီအရာတွေ အကုန်လုံးက ကြိုတင် စီစဉ်ထားသလိုပါပဲ... အန္တရာယ် များတဲ့ နေရာတွေမှာ တန်ဖိုးကြီးတဲ့ ရတနာတွေ ပုန်းကွယ်နေတတ်ပြီး ကံကောင်းပြီး အတွေ့အကြုံ ရှိတဲ့ သူတွေကသာ ရှာတွေ့နိုင်တာပါ"

ရွှီယန်က ထျန်းနန်ရှင်း ပင်များ၏ အလယ်တွင် ရပ်နေလေသည်။

ပတ်ဝန်းကျင်တွင် မြင့်မားသော ထင်းရှူးပင် အချို့ ရှိနေသည်။

မြေပြင်ပေါ်တွင် မြက်ပင်များ သိပ်မရှိဘဲ မြေကြီးများ အက်ကွဲနေသော နေရာများစွာ ရှိနေလေသည်။

ရွှီယန်က သံဇွန်းငယ်လေးကို ကိုင်ကာ တစ်နေရာပြီး တစ်နေရာ စတင် ရှာဖွေနေတော့သည်။