အခန်း ၆၄

အခန်း (၆၄) သူက ဘာလို့ ဒီလောက်တောင် သတ္တိကောင်းနေရတာလဲ

ရွှီယန်က အပြင်သို့ တောက်လျှောက် ပြေးထွက်သွားလေသည်။ စမ်းသပ်စိုက်ခင်းများရှိရာဘက်တွင် အခြေအနေများက ပရမ်းပတာ ဖြစ်နေလေပြီ။ တောဝက်များက မူလကတည်းက ပြောင်းဖူးခင်းထဲတွင် ပုန်းကွယ်နေခဲ့ခြင်းဖြစ်ပြီး မိခင်တောဝက်မကြီးက တောဝက်ပေါက်လေး ခုနစ်ကောင် ရှစ်ကောင်ခန့်ကို ခေါ်ဆောင်လာခဲ့ခြင်း ဖြစ်လေသည်။

တိုက်တိုက်ဆိုင်ဆိုင်ပင် ယနေ့က စိုက်ပျိုးရေးတက္ကသိုလ် ကျောင်းသားများ၏ လက်တွေ့ကွင်းဆင်းချိန် ဖြစ်နေသဖြင့် သူတို့က စောစောစီးစီးပင် ကားဖြင့် ရောက်ရှိလာကြပြီး မိမိတို့ စိုက်ပျိုးထားသော လယ်ကွက်များကို ဝင်ရောက် ကြည့်ရှုခဲ့ကြလေသည်။

ရလဒ်အနေဖြင့် တက္ကသိုလ်ကျောင်းသား နှစ်ယောက်နှင့် တောဝက် မိသားစုတို့က ပြောင်းဖူးခင်းထဲတွင် ပက်ပင်းတိုးမိကြတော့သည်။ ဤအခြေအနေက ကျောင်းသားများကို ထိတ်လန့်တကြား ထွက်ပြေးသွားစေတော့သည်။

တောဝက်များကလည်း လန့်သွားသဖြင့် အနည်းငယ် ပျာယာခတ်သွားကြပြီး တောဝက်ပေါက်လေးများကို ခေါ်ဆောင်ကာ အပြင်သို့ ပြေးထွက်လာကြလေသည်။

"တောဝက်... တောဝက်ကြီးတွေဟ"

"လခွီး... မြန်မြန်ပြေးကြ"

ကျောင်းသားများက အသီးသီး အပြင်သို့ ထွက်ပြေးကြလေသည်။ အချို့ကျောင်းသားများက အနည်းငယ် ကြောက်ရွံ့နေကြသော်လည်း အချို့ကမူ ထူးထူးခြားခြား စိတ်လှုပ်ရှားနေကြပြီး ပေါက်တူးများကို ကောက်ကိုင်ကာ တောဝက်များ ပြေးသွားရာဘက်သို့ လိုက်လံ ပြေးဆင်းသွားကြလေသည်။

အချို့သော လူများက တောဝက်များကို မကြောက်ကြပေ။ မကြာသေးမီကပင် အင်တာနက်ပေါ်တွင် နာမည်ကြီးနေသော ဗီဒီယိုတစ်ခု ရှိခဲ့လေသည်။ အစ်ကိုကြီး တစ်ယောက်က သူငယ်ချင်းများနှင့်အတူ စားသောက်ဆိုင်တွင် အရက်သောက်နေစဉ် တောဝက်တစ်ကောင်က စားသောက်ဆိုင်ထဲသို့ ရုတ်တရက် ဝင်ရောက်လာခဲ့လေသည်။ ထိုအစ်ကိုကြီးက အလွန် စိတ်လှုပ်ရှားသွားပြီး ပါးစပ်တွင် ဆေးလိပ်ကို ကိုက်လျက် တောဝက် နောက်သို့ ပြေးလိုက်သွားခဲ့လေသည်။

နောက်ဆုံးတွင် တောဝက်ကို အောင်မြင်စွာ မောင်းထုတ်နိုင်ခဲ့လေသည်။ လူသားများ၏ နယ်မြေတွင် လူများ၏ လုံခြုံမှု ခံစားချက်က အတော်လေး ပြည့်ဝနေတတ်သည်။ မည်သို့ပင်ဖြစ်စေ နေရာတိုင်းတွင် လူများ ရှိနေသဖြင့် ဒဏ်ရာရရှိခဲ့လျှင်တောင်မှ သိပ်ပြီး ပြဿနာ မရှိလှပေ။

အကယ်၍ လူသူကင်းမဲ့သော တောရိုင်းထဲတွင် တောဝက်နှင့် တွေ့မည်ဆိုပါက လုံးဝ တခြား ခံစားချက်မျိုး ဖြစ်သွားမည် ဖြစ်လေသည်။ ရွှီယန် ပြေးသွားချိန်တွင် တိုက်တိုက်ဆိုင်ဆိုင်ပင် တောဝက်များက သူရှိရာဘက်သို့ ပြေးဝင်လာကြလေသည်။ တောဝက်ကြီး၏ နောက်တွင် တောဝက်ပေါက်လေးများ အများအပြား လိုက်ပါလာလေသည်။ တက္ကသိုလ် ကျောင်းသား အချို့က အရှေ့မှ ပြေးနေကြလေသည်။

"မြန်မြန်ပြေးကြဟ... တောဝက်တွေ လာနေပြီ"

"ပြေး"

တက္ကသိုလ် ကျောင်းသား အချို့က စေတနာကောင်းဖြင့် ရွှီယန်ကိုပါ သတိလှမ်းပေးကြလေသည်။ ရွှီယန် ကိုယ်တိုင်က တောဝက်များကို မကြောက်ပေ။ မည်သို့ပင်ဖြစ်စေ သူ၏ ခန္ဓာကိုယ်က အလွန် လျင်မြန်ဖြတ်လတ်လှပေသည်။ အဆိုးဆုံး အခြေအနေတွင် တောဝက်က အရှိန်ဖြင့် ဝင်တိုက်လာမည် ဆိုပါက သူက အပေါ်သို့ ခုန်တက်၍ ရှောင်တိမ်းနိုင်စွမ်း ရှိလေသည်။

ဒရုန်းက အနောက်ဘက်မှနေ၍ ရိုက်ကူးနေလေသည်။ ထွက်ပြေးနေသော ကျောင်းသားများနှင့် ရက်စက်ကြမ်းကြုတ်သော တောဝက်ကြီး... မြင်ကွင်းက ကြည့်ရသည်မှာ အလွန် စိတ်လှုပ်ရှားဖွယ် ကောင်းနေလေသည်။

ဤကဲ့သို့သော မြင်ကွင်းမျိုးကို ရင်ဆိုင်ရချိန်တွင်ပင် ရွှီယန်က အနည်းငယ်မျှ ပျာယာခတ်ခြင်း မရှိဘဲ ရှေ့သို့ပင် တိုက်ရိုက် ပြေးထွက်သွားလေသည်။ သူ၏ ကျောပြင်က တစ်ခဏချင်းမှာပင် အလွန် ကြီးမား ခန့်ညားလာသကဲ့သို့ ဖြစ်သွားလေသည်။

"လခွီး... အစ်ကိုယန်"

"တောဝက် မြင်းစီးသူရဲကောင်းကြီး"

"အရမ်း ကြမ်းတာပဲ"

"သူက ဘာလို့ ဒီလောက်တောင် သတ္တိကောင်းနေရတာလဲ"

ဤအခိုက်အတန့်တွင် ရွှီယန်၏ မျက်လုံးများထဲ၌ စိတ်လှုပ်ရှားမှု အရိပ်အယောင် အချို့ပင် ပါဝင်နေလေသည်။ ယခင်က တောနက်ကြီးထဲတွင် တွေ့ခဲ့ရသော တောဝက်ကြီးက အရွယ်အစား အတော်လေး ကြီးမားပြီး ကြည့်ရသည်မှာ အလွန် ကြမ်းတမ်းသဖြင့် ရွှီယန်က မျက်နှာချင်းဆိုင် ရင်ဆိုင်ရန် မရွေးချယ်ခဲ့ပေ။

ယခု လယ်ယာခြံဝင်းဘက်တွင်မူ တောဝက်က အရွယ်အစား အနည်းငယ် သေးငယ်ပုံရသဖြင့် သူ လုံးဝ ကြောက်ရွံ့နေခြင်း မရှိတော့ပေ။ ရွှီယန်က ပေါက်တူးကို ကိုင်ကာ ရှေ့သို့ မျက်နှာချင်းဆိုင် ပြေးသွားလိုက်ရာ တောဝက်ကြီးက သူ လာနေသည်ကို မြင်သောအခါ အနောက်သို့ လှည့်၍ အခြား တစ်ဖက်သို့ ထွက်ပြေးသွားတော့သည်။ တောဝက်ပေါက်လေးများကလည်း အနောက်မှ အလျင်စလို လိုက်ပါသွားကြလေသည်။

"တောဝက်တွေ တကယ်ကြီး ပြေးထွက်လာတာပဲ"

"စိုက်ပျိုးရေးတက္ကသိုလ်ရဲ့ ပြောင်းဖူးခင်းက သူတို့ကို ဆွဲဆောင်သွားတာ ဖြစ်မယ်"

"မနက်စောစောက လယ်ယာခြံဝင်းထဲကို တောဝက်တွေ ဘယ်ကနေ ရောက်လာတာလဲလို့ စဉ်းစားနေတာ"

ရွှီယန်က တောဝက်များ ထွက်ပြေးသွားသည်ကို မြင်သောအခါ ဆက်လက် မလိုက်တော့ပေ။ သူက ရပ်လိုက်ပြီး တောဝက်များ ထွက်ပြေးသွားရာ ဘက်သို့ ကြည့်ရင်း ပြုံးကာ ပြောလိုက်လေသည်။ ကျောင်းသားများကလည်း တောဝက်များ ထွက်ပြေးသွားသည်ကို မြင်သောအခါမှ သက်ပြင်းချနိုင်သွားကြပြီး ထွက်ပြေးနေသည့် ခြေလှမ်းများကို ရပ်တန့်လိုက်ကြလေသည်။

"လခွီး... လန့်သေတော့တာပဲ... ဒီနေ့တော့ ဒီနေရာမှာပဲ ဇာတ်သိမ်းရတော့မယ်လို့ ထင်နေတာ"

ရတနာပြောင်းဖူးများ စိုက်ပျိုးထားသော ဝူခိုင် လည်း ထိုနေရာတွင် ရှိနေပြီး သူက ထိတ်လန့်တကြားဖြင့် ပြောဆိုလိုက်လေသည်။ တိုက်ရိုက်ထုတ်လွှင့်မှု အတွင်းရှိ ကွန်ရက်သုံးစွဲသူများကတော့ ပါးစပ်ပင် ပိတ်မရအောင် ရယ်မောနေကြလေပြီ။ ကျောင်းသား အချို့ တောဝက်များ၏ လိုက်လံတိုက်ခိုက်ခြင်းကို ခံရကာ ပြေးလွှားနေရသည့် မြင်ကွင်းက တကယ်ကို ပျော်စရာ ကောင်းလွန်းလှပေသည်။

"ခြံပိုင်ရှင်ရွှီ... အစ်ကို ရောက်လာလို့ တော်သေးတာပေါ့... ကျေးဇူးတင်ပါတယ် ကျေးဇူးတင်ပါတယ်"

ထိုအချိန်တွင် ကျောင်းသား တစ်ယောက်က ရွှီယန်ကို အမြန် ကျေးဇူးတင်စကား ပြောလိုက်လေသည်။

‘ ခြံပိုင်ရှင်ရွှီ ဟုတ်လား’

ဤအမည်နာမက နားထောင်ရသည်မှာ အနည်းငယ် ထူးဆန်းနေလေသည်။ သူက လယ်ယာခြံဝင်း၏ ပိုင်ရှင် ဖြစ်သော်လည်း ထိုသို့ ခေါ်ဝေါ်သူ အလွန် ရှားပါးလှပြီး အနည်းငယ် တရားဝင်လွန်းနေလေသည်။ ထို့အပြင် သူ၏ လယ်ယာခြံဝင်းတွင် လူနှစ်ယောက်တည်းသာ ရှိသဖြင့် ခြံပိုင်ရှင် ခေါ်ခေါ် မခေါ်ခေါ် ဘာမှ မကွာခြားလှပေ။ ကျောင်းသားများက အကြောက်မပြေသေးဘဲ အသီးသီး ဆွေးနွေးနေကြလေသည်။

"ခုနက ငါ့ကို တကယ် လန့်သွားစေတာပဲ... ပြောင်းဖူးခင်းထဲမှာ တောဝက်တွေ ရှိနေလိမ့်မယ်လို့"

"ကျောင်းကို တင်ပြပြီး စမ်းသပ်စိုက်ခင်းကို ခြံစည်းရိုး ခတ်ခိုင်းမှ ဖြစ်တော့မယ်"

"နောက်တစ်ခါကျရင် ဘေးက တိရစ္ဆာန်ဆေးကုသရေး တက္ကသိုလ်က လူတွေကိုပါ ခေါ်လာရမယ်... သူတို့က တိရစ္ဆာန်တွေ အများကြီး မွေးထားတာဆိုတော့ သူတို့ကို တောဝက် နှိမ်နင်းခိုင်းရမယ်"

"ပြောင်းဖူးတွေတောင် မထွက်သေးဘူး ဝင်လာကြပြီ... တကယ် ကြောက်စရာ ကောင်းတာပဲ"

စိုက်ပျိုးရေးတက္ကသိုလ်တွင် တိရစ္ဆာန်ဆေးကုသရေး အထူးပြု ဘာသာရပ်လည်း ရှိလေသည်။ ကျောင်းသားတိုင်းက နှစ်စဉ် အိမ်စာ အနေဖြင့် တိရစ္ဆာန် တစ်ကောင်စီ မွေးမြူကြရပြီး ယုန်မွေးသူ သိုးမွေးသူ အစုံအလင် ရှိကြလေသည်။ တိရစ္ဆာန်ဆေးကုသရေး အထူးပြုနှင့် စိုက်ပျိုးရေး အထူးပြု ကျောင်းသားများကြားတွင် အမြဲတမ်း အနည်းငယ် အငြင်းပွားမှုများ ရှိတတ်ပြီး စိုက်ပျိုးရေး တက္ကသိုလ်တွင် 'မင်းရဲ့ အိမ်စာက ငါ့ရဲ့ အိမ်စာကို စားသွားပြီ' ဟူသော စကားတစ်ခွန်းပင် ခေတ်စားနေလေသည်။

ရွှီယန်က သူတို့ စကားပြောနေကြသည်ကို ကြည့်ရင်း အတော်လေး စိတ်ဝင်စားစရာ ကောင်းသည်ဟု ခံစားလိုက်ရလေသည်။ လယ်ယာခြံဝင်း ဖွင့်လှစ်ရာတွင် အိမ်နီးချင်းများ ရှိနေခြင်းက ပို၍ ကောင်းမွန်လှပေသည်။ မဟုတ်ပါက ဤမျှ ကျယ်ဝန်းသော မြေကွက်လပ်ကြီးပေါ်တွင် အထီးကျန်ဆန်သော လယ်ယာခြံဝင်းလေး တစ်ခုတည်း ဆိုပါက အလွန် ခြောက်ကပ်နေမည် ဖြစ်လေသည်။

"ကျွန်တော်က ဒီအတိုင်း လာကြည့်ရင်းနဲ့ ဝင်ပြီး မောင်းထုတ်ပေးတာပါ"

"အခု တောဝက်တွေ အရမ်း များတယ်... မင်းတို့ စိုက်ခင်းကို ခြံစည်းရိုး မခတ်ထားရင် တောဝက်တွေ သေချာပေါက် ဝင်လာမှာပဲ"

"အကောင်းဆုံးကတော့ ခြံစည်းရိုး ခတ်ထားလိုက်တာ အကောင်းဆုံးပဲ"

"ကျွန်တော် တိုက်ရိုက်ထုတ်လွှင့်မှု လုပ်နေလို့... ဆက်မပြောတော့ဘူးနော်"

ရွှီယန်က ကျောင်းသားများကို နှုတ်ဆက်လိုက်လေသည်။

"ခြံပိုင်ရှင်... ကျေးဇူးတင်ပါတယ်ဗျာ"

"အစ်ကိုယန်... အစ်ကို့ကျေးဇူးကြောင့်ပါပဲ"

"ရပါတယ်... အလွယ်တကူ ကူညီပေးလိုက်တာပါ"

ရွှီယန်က လက်ယမ်းပြလိုက်ပြီးနောက် အနောက်သို့ လှည့်ကာ ထွက်ခွာလာခဲ့လေသည်။ ဒရုန်းကလည်း သူ၏ အနောက်မှ လိုက်ပါလာလေသည်။ ရွှီယန် ထွက်သွားပြီးနောက် ကျောင်းသားများက ဤကိစ္စကို ဆက်လက်၍ စိတ်ဝင်တစား ဆွေးနွေးနေကြလေသည်။

"ဒီခြံပိုင်ရှင်က တကယ်ကို တော်တာပဲ... သူ ကျားသစ်တောင် မွေးထားတယ်လို့ ငါ ကြားဖူးတယ်"

"တောဝက်ကို မြင်တာနဲ့ တိုက်ရိုက် ပြေးဝင်သွားတာ... ဘယ်သူကများ အဲ့ဒီလို ရဲမှာလဲ"

"သူ့ရဲ့ ဗီဒီယိုတွေကို ငါ ကြည့်ဖူးတယ်... အကုန်လုံးက တောနက်ကြီးထဲကို တစ်ယောက်တည်း ဝင်သွားတာချည်းပဲ... အဲ့ဒီ တောနက်ကြီးထဲက မြင်ကွင်းတွေကို ငါ ကြည့်ရုံနဲ့တင် ကြောက်နေပြီ"

"ဒီလူက သေချာပေါက် ပညာရှင်ပဲ"

ကျောင်းသားများ၏ ရင်ထဲတွင် ရွှီယန်၏ ပုံရိပ်က အလွန် ကြီးမား ခန့်ညားနေဆဲ ဖြစ်လေသည်။ ထို့အပြင် ဘေးနားတွင် ဖော်လိုဝါ သိန်းချီရှိသော တိုက်ရိုက်ထုတ်လွှင့်သူ တစ်ဦး ရှိနေခြင်းက တက္ကသိုလ် ကျောင်းသားများအတွက် ဆွေးနွေးစရာ အကြောင်းအရာ တစ်ခု ဖြစ်လာစေလေသည်။ ရွှီယန်က သူ၏ လယ်ယာခြံဝင်းသို့ ပြန်ရောက်သောအခါ အခွင့်ကြုံခိုက် ခြံစည်းရိုးများကို တစ်ပတ်ခန့် လိုက်လံ စစ်ဆေး ကြည့်ရှုလိုက်လေသည်။

"တောင်ပေါ်ရွာလေးတွေမှာ တောဝက်တွေ ရှိတာက ပုံမှန်ပါပဲ"

"ဒီဘက်က နေရာ နည်းနည်း ခေါင်တော့ တောဝက်တွေ ရောက်လာဖို့ အခွင့်အလမ်း ပိုများတယ်"

"သူတို့က ရွာထဲကိုတော့ မဝင်ရဲကြပါဘူး... အခု တောဝက်တွေက ကာကွယ်စောင့်ရှောက်ရမယ့် တိရစ္ဆာန် စာရင်းဝင်လည်း မဟုတ်တော့ဘူး ဆိုတော့... တကယ်လို့များ ရွာထဲ ဝင်သွားရင် လူတွေ ဖမ်းတာခံရပြီး အရက်မြည်းစရာ ဖြစ်သွားလောက်တယ်"

ရွှီယန်က ကွန်ရက်သုံးစွဲသူများအား ပြောလိုက်လေသည်။ ရွှီယန်၏ ရှင်းပြချက်ကို ကြားသောအခါ အားလုံးက ထူးဆန်းနေကြလေသည်။ ဂေဟစနစ် ကောင်းမွန်ခြင်းက တကယ်ကို စိတ်ဝင်စားစရာ ကောင်းလှပေသည်။ မနက်စောစောစီးစီးပင် တောဝက်များကို မြင်တွေ့နိုင်လေသည်။

"နောက်နှစ်ရက်လောက်နေရင် တိရစ္ဆာန် နည်းနည်း ထပ်ဝယ်မွေးဖို့ စိတ်ကူးထားတယ်... အခုတလော ဘာမွေးရမလဲလို့ စဉ်းစားနေတာ"

"ဒရယ်ပြောက် တစ်ကောင် မွေးမလား... ဒါမှမဟုတ် ငှက်ကုလားအုတ် နှစ်ကောင်လောက် မွေးမလားလို့ စဉ်းစားနေတာ"

"အကုန်လုံး မဆိုးဘူးလို့ ထင်တာပဲ"

ရွှီယန်က အားလုံးနှင့် စကားစမြည် ပြောဆိုနေလေသည်။

"ဘာကြီး... ငှက်ကုလားအုတ် မွေးမယ် ဟုတ်လား... အဲ့ဒီအကောင်က မွေးလို့ ရလို့လား"

"လခွီး... လောင်ရွှီ တရားမဝင်တဲ့ ကိစ္စတွေကိုတော့ ငါတို့ လုပ်လို့ မရဘူးနော်"

ကွန်ရက်သုံးစွဲသူ အများအပြားက ချက်ချင်းပင် မေးခွန်းထုတ်လာကြလေသည်။ မှတ်ချက်များကို မြင်သောအခါ ရွှီယန်က ပြုံးကာ ပြောလိုက်လေသည်။

"လွန်ခဲ့တဲ့ နှစ်အနည်းငယ်ကတည်းက ငှက်ကုလားအုတ်တွေကို ကျွန်တော်တို့ နိုင်ငံမှာ အိမ်မွေးတိရစ္ဆာန် စာရင်းထဲ ထည့်သွင်းလိုက်ပါပြီ... ကြက် ဘဲ ငန်း တွေနဲ့ အဆင့်အတန်း အတူတူပဲ"

"မွေးမြူရေးခြံ အများအပြားမှာလည်း ငှက်ကုလားအုတ်တွေ မွေးထားကြတယ်လေ"

"ဘာလို့ သိပ်ပြီး လူမသိကြတာလဲဆိုတော့ ငှက်ကုလားအုတ်ရဲ့ အသားနဲ့ ဥတွေက စားလို့ သိပ်မကောင်းလို့ပါ... အားလုံးက သိပ်ပြီး နားလည်ကြမှာ မဟုတ်ဘူး... တိရစ္ဆာန် အစားအစာ အများအပြားကို ငှက်ကုလားအုတ် အသားနဲ့ ပြုလုပ်ထားကြတာ"

"အရေအတွက် များပြီး ဈေးလည်း ပေါတယ်လေ"

"ငှက်ကုလားအုတ် မွေးဖို့ကလည်း မလိုအပ်ပါဘူး... ဆောင်းတွင်းရောက်ရင် ဒီမှာက အေးတယ်... သူ့အတွက် လှုပ်ရှားသွားလာဖို့ နေရာမရှိဘူးလေ... ပြီးတော့ အဲ့ဒီအကောင်က သိပ်ပြီးလည်း ဉာဏ်မကောင်းဘူးဆိုတော့... မမွေးတော့ပါဘူးလေ"

ရွှီယန်က ပေါက်တူးကို ကိုင်ကာ ဖန်လုံအိမ်ထဲသို့ ဝင်၍ ကြက်ပေါက်လေးများ၏ အခြေအနေကို သွားရောက် ကြည့်ရှုလိုက်လေသည်။ ကောင်လေးများက အလုပ်များကို ကြိုးစားပမ်းစား လုပ်ကိုင်နေကြပြီး နေရာအနှံ့ ပိုးကောင်များကို လိုက်ရှာစားသောက်နေကြလေသည်။

ကြက်များ၏ ပိုးမွှား နှိမ်နင်းနိုင်စွမ်းက အလွန် အားကောင်းသဖြင့် သူတို့ ရှိနေပါက ပိုးမွှား ပြဿနာကို စိုးရိမ်ရန် မလိုအပ်တော့ပေ။ ကြက်များက ပိုးကောင်များကို စားသောက်နေကြပြီး ဘဲများက ရေကူးနေကြကာ ငန်းကြီးများကမူ လုံးဝ ပျင်းရိပျင်းတွဲ ဖြစ်နေကြလေသည်။

ခြံဝင်း တံခါးကို ဖွင့်ထားသော်လည်း သူတို့က ခြေလှမ်း အနည်းငယ်မျှသာ ထွက်လျှောက်လေ့ ရှိကြပြီး အများအားဖြင့် တစ်နေရာတည်းတွင် စုရုံးကာ ဖြည်းညင်းစွာ ဟိုဒီ ယိမ်းထိုးနေတတ်ကြလေသည်။ လယ်ယာခြံဝင်းက ယခုအခါ ဧက ၁၁၀ သာ ရှိသေးသော်လည်း ကြည့်ရသည်မှာ အလွန် အသက်ဝင် တက်ကြွနေလေသည်။

မြေခွေးပေါက်လေးများကလည်း အမြဲတမ်း အလည်လာတတ်ကြလေသည်။ ထိုကောင်လေး သုံးကောင်က နေ့စဉ် မြက်ခင်းပြင်ပေါ်တွင် ပြေးလွှားနေကြပြီး အမြဲတမ်း ပျော်ရွှင်နေသည့် ပုံစံမျိုး ဖြစ်နေလေသည်။ မည်သို့ပင်ဖြစ်စေ ဗိုက်ဆာပါက အစာကျွေးမည့်သူ ရှိနေသည် မဟုတ်ပါလား။

ရွှီယန်လည်း ဘာမှ လုပ်စရာ မရှိတော့ဘဲ လုံးဝ အားလပ်နေလေပြီ။ သူက ဘဲများ၏ အခြေအနေကို ခဏတာ တိုက်ရိုက်ထုတ်လွှင့်ပြသလိုက်ပြီးနောက် ကြက်ပေါက်လေးများ၏ အခြေအနေကိုလည်း ခဏတာ တိုက်ရိုက်ထုတ်လွှင့်ပြသကာ တိုက်ရိုက်ထုတ်လွှင့်မှုကို ပိတ်လိုက်လေသည်။

မွန်းလွဲပိုင်းတွင် ရွာထဲသို့ လမ်းလျှောက် ထွက်ရန် ရည်ရွယ်ထားလိုက်လေသည်။ ရွာထဲရှိ ဘဝက ဤသို့ပင် ဖြစ်လေသည်။ လှုပ်ရှားမှု အရှိန်က အလွန် နှေးကွေးပြီး အရေးတကြီး လုပ်စရာ ကိစ္စဟူ၍ ဘာမှ မရှိလှပေ။ သေချာသည်ကတော့ ဆင်းရဲခြင်းကလည်း တကယ်ကို ဆင်းရဲလှပေသည်။

ရွာထဲတွင် ရွာကို စောင့်ရှောက်နေသူ အချို့ ရှိပြီး နေ့စဉ် မိမိတို့၏ လယ်ကွက်လေးများကိုသာ စောင့်ရှောက်၍ အသက်မွေးဝမ်းကျောင်း ပြုနေကြကာ ဘဝက အတော်လေး ပင်ပန်းဆင်းရဲလှပေသည်။ ငွေရှာချင်သူများကတော့ အစောကြီးကတည်းက မြို့ကြီးများသို့ သွားရောက် အလုပ်လုပ်ကိုင်နေကြပြီ ဖြစ်လေသည်။

ရွှီယန်က ရွာသို့ ပြန်လာပြီး စီးပွားရေး လုပ်ငန်း စတင်သူ လူငယ် တစ်ဦး ဖြစ်ပြီး တောင်ပေါ်ရွာလေး၏ ဘဝနှင့် ပတ်သက်၍ သူ၏ ကိုယ်ပိုင် အကြံအစည်များ ရှိနေလေသည်။ ရတနာရှာဖွေရေး သံလိုက်အိမ်မြှောင်က သူ့ကို လုပ်ငန်းစတင်ရန် အရင်းအနှီးများ ပေးအပ်ခဲ့ခြင်းကိုလည်း ကျေးဇူးတင်ရမည် ဖြစ်လေသည်။ ယခုအခါ ဤသည်မှာ သူ၏ စိတ်ကူးထဲက ဘဝမျိုး ဖြစ်နေပြီ ဖြစ်ရာ ရွှီယန်က နေ့စဉ် အလုပ်လုပ်ရာတွင် အလွန် တက်ကြွနေလေတော့သည်။