အခန်း ၇၂

အခန်း (၇၂) မဲဖောက်ရရှိသော ဆုလာဘ်များ

သစ်တောဦးစီးဌာနမှ လူများ ထွက်ခွာသွားပြီးနောက် ရွှီယန်က လယ်ယာခြံဝင်းတွင် တစ်ရက်ခန့် အနားယူလိုက်လေသည်။

ထိုနေ့ ညပိုင်းတွင် သူက ကိုယ်ပိုင် ကျော်ကြားမှုရမှတ်များကို စစ်ဆေးကြည့်ရှုလိုက်လေသည်။

တောင်ပေါ်တက်ခဲ့သော ထိုနေ့တွင်ပင် ရွှီယန်က ကျော်ကြားမှုရမှတ် ၆၀,၀၀၀ ကျော် ရရှိခဲ့လေသည်။

ယခုအခါ စုစုပေါင်း ကျော်ကြားမှုရမှတ်က ၁၁၀,၀၀၀ အထိ ရောက်ရှိလာခဲ့ပြီ ဖြစ်လေသည်။

ထုံးစံအတိုင်းပင် သူက အဆင့်မြင့် မဲဖောက်ခြင်း တစ်ကြိမ်နှင့် သာမန် မဲဖောက်ခြင်း တစ်ကြိမ်ကို ရွေးချယ်လိုက်လေသည်။

"ပိုင်ရှင်မှ သာမန် မဲဖောက်ခြင်းကို ရွေးချယ်လိုက်ပါသည်... မဲဖောက်နေပါသည်..."

"သာမန် ဆုလာဘ် တစ်ခု ရရှိသည့်အတွက် ဂုဏ်ယူပါသည်..."

"လက်တွန်း မြက်ရိတ်စက်... မြက်ရိတ်စွမ်းရည် အလွန် ကောင်းမွန်သော မြက်ရိတ်စက် ဖြစ်ပြီး ချို့ယွင်းမှု အလွန် နည်းပါးကာ မြက်ခင်းပြင်များကို လျင်မြန်စွာ ရှင်းလင်းနိုင်ပါသည်..."

သာမန် ဆုလာဘ်မှာ မြက်ရိတ်စက် တစ်လုံး ဖြစ်လေသည်။

ဤပစ္စည်းကလည်း အတော်လေး မဆိုးလှပေ။

လယ်ယာခြံဝင်း၏ နေရာ အများအပြားတွင် ပေါင်းပင်များ ပေါက်ရောက်နေတတ်ပြီး ဤပေါင်းပင်များကို အခါအားလျော်စွာ ရှင်းလင်းပေးရန် လိုအပ်လေသည်။ မဟုတ်ပါက ဒူးခေါင်း အမြင့်အထိ ကြီးထွားလာတတ်လေသည်။

ပေါင်းပင်များကို ရှင်းလင်းလိုက်ပါက ခြံဝင်းက သန့်ရှင်း သပ်ရပ်သွားမည် ဖြစ်လေသည်။

မြက်ရိတ်ရသော အလုပ်ကို လီဆန်းက လုပ်ကိုင်နေခြင်း ဖြစ်ပြီး လက်တွန်း မြက်ရိတ်စက် ရှိလာပါက သူလည်း အားအင် အတော်လေး သက်သာသွားမည် ဖြစ်လေသည်။

ဤမြက်ရိတ်စက်က အမြင့်ဆုံး အဆင့်တော့ မဟုတ်သေးပေ။ အမြင့်ဆုံး အဆင့်မှာ လူက အပေါ်မှ စီး၍ မောင်းနှင်ရသော အမျိုးအစား ဖြစ်ပြီး ဈေးနှုန်းက ပို၍ပင် ကြီးမြင့်လေသည်။

"ပိုင်ရှင်မှ အဆင့်မြင့် မဲဖောက်ခြင်းကို ရွေးချယ်လိုက်ပါသည်... မဲဖောက်နေပါသည်..."

"အဆင့်မြင့် ဆုလာဘ် တစ်ခု ရရှိသည့်အတွက် ဂုဏ်ယူပါသည်..."

"သီးသန့် ဆိုင်ကယ်... စွမ်းဆောင်ရည် အလွန် အားကောင်းသော ဆိုင်ကယ် ဖြစ်ပြီး အင်ဂျင်နှင့် ထိန်းချုပ်မှု အလွန် ကောင်းမွန်ကာ ကြမ်းတမ်းသော တောင်ပေါ်လမ်းများနှင့် အပြည့်အဝ ကိုက်ညီပါသည်..."

"မှတ်ချက်... ဆိုင်ကယ်နှင့် တွဲဖက် အသုံးပြုရန် ဦးထုပ် နှစ်လုံး ပါဝင်ပြီး ပိုင်ရှင်မှ အရောင်နှင့် ပုံစံကို ရွေးချယ်နိုင်ပါသည်..."

အဆင့်မြင့် မဲဖောက်ခြင်း၏ ဆုလာဘ်က ရွှီယန်၏ မျှော်လင့်ချက်ကို တကယ်ပင် ကျော်လွန်သွားခဲ့လေသည်။

ဆိုင်ကယ် တစ်စီး ဖြစ်နေလိမ့်မည်ဟု လုံးဝ ထင်မှတ်မထားခဲ့ချေ။

တောင်ပေါ်ရွာလေးတွင် နေထိုင်ရာ၌ ဆိုင်ကယ်က အလွန် အသုံးဝင်သော ပစ္စည်း တစ်ခု ဖြစ်ပြီး အချို့သော လမ်းကျဉ်းလေးများကို ကားများ မသွားနိုင်သော်လည်း ဆိုင်ကယ်များကမူ သွားနိုင်လေသည်။

တောင်ပိုင်းဒေသရှိ လက်ဖက်ခင်းများ ဆိုလျှင် လမ်းများက ကြမ်းတမ်းပြီး အန္တရာယ် များသဖြင့် လက်ဖက်ခူးသူများက နေ့စဉ် ဆိုင်ကယ်များ စီးကာ တောင်ပေါ်တက် တောင်အောက်ဆင်း ပြုလုပ်ကြမှသာ လက်ဖက်ခူးရသည့် အရှိန် မြန်ဆန်လေသည်။

"ဆိုင်ကယ် ဝယ်ဖို့ စဉ်းစားနေတာ... မဲဖောက်လို့ ရသွားလိမ့်မယ်လို့ မထင်ထားဘူး"

"ကွက်တိပဲ"

ရွှီယန်၏ မျက်နှာပေါ်တွင် ဝမ်းသာသည့် အရိပ်အယောင်များ ပေါ်ထွက်လာလေသည်။

သင့်တင့်လျောက်ပတ်သော ဆိုင်ကယ် တစ်စီး ဆိုလျှင် ယွမ် ၃၀,၀၀၀ မှ ၅၀,၀၀၀ ခန့်အထိ ပေးရပြီး ဈေးကြီးသော ဆိုင်ကယ်များ ဆိုလျှင် ပြောနေစရာပင် မလိုတော့ပေ... ယွမ် ၁၀၀,၀၀၀ ကျော်တန်သော ဆိုင်ကယ်များပင် ရှိလေသည်။

ရွှီယန်က မူလက သာမန် ဆိုင်ကယ် တစ်စီးသာ ဝယ်ရန် ရည်ရွယ်ထားပြီး စီး၍ ရကာ ပစ္စည်း တင်၍ ရလျှင် လုံလောက်ပြီဟု ထင်မှတ်ထားခဲ့လေသည်။

ယခုအခါ မဲဖောက်၍ ရသွားလိမ့်မည်ဟု လုံးဝ ထင်မှတ်မထားခဲ့ချေ။

သူက ဆိုင်ကယ်၏ ပုံစံကို စတင် ရွေးချယ်တော့သည်။

ရွှီယန် ရွေးချယ်လိုက်သော ပုံစံမှာ အလွန် ရိုးရှင်းသော ပုံစံ ဖြစ်ပြီး ကြည့်ရသည်မှာ တောင်ပေါ်ရွာလေးရှိ သာမန် ဆိုင်ကယ် တစ်စီးနှင့် ဘာမှ မကွာခြားလှပေ။ အရောင်ကို အမည်းရောင် ရွေးချယ်လိုက်ပြီး ကြည့်ရသည်မှာ အလွန် ရိုးရှင်း သပ်ရပ်နေလေသည်။

ရွေးချယ်ပြီးနောက် စနစ်က အမှာစာကို ဆိုင်ကယ် စက်ရုံသို့ ပေးပို့လိုက်မည် ဖြစ်ပြီး နောက်တစ်နေ့တွင် လာရောက် ပို့ဆောင်ပေးမည် ဖြစ်လေသည်။

ဤကဲ့သို့သော ပစ္စည်းကြီးများကို အမှာစာ ပုံစံဖြင့်သာ ရယူနိုင်လေသည်။ မည်သို့ပင်ဖြစ်စေ လေထဲမှ ရုတ်တရက် ပေါ်လာအောင်တော့ မလုပ်နိုင်ပေ။

ဒုတိယနေ့ နံနက်ခင်းတွင် ရာသီဥတုက အလွန် သာယာနေလေသည်။

ရွှီယန်က ကြက်အိမ်ထဲမှ လတ်ဆတ်သော တောကြက်ဥ တစ်လုံးကို ယူလာပြီး ကြက်ဥပေါင်း တစ်ပန်းကန် ပြုလုပ်လိုက်လေသည်။

ကြက်ဥပေါင်း ပြုလုပ်ရသည်မှာ အလွန် လွယ်ကူလေသည်။ ကြက်ဥ တစ်လုံး ဖောက်ထည့်ကာ သေချာ မွှေပြီး ရေအနည်းငယ် ထည့်၍ ပေါင်းအိုးထဲတွင် ထည့်ပေါင်းလိုက်ရုံသာ ဖြစ်လေသည်။

ပေါင်းပြီးသောအခါ ပဲငံပြာရည် အနည်းငယ် ထည့်ကာ ကြက်သွန်မြိတ် အနည်းငယ် ဖြူးလိုက်ပါက စားရသည်မှာ အလွန် မွှေးကြိုင် အိစက်နေပြီး အလွန် ခံတွင်းမြိန်စေလေသည်။

ကြက်မကြီး နှစ်ကောင်က အလွန် အလုပ်ကြိုးစားကြပြီး တစ်နေ့လျှင် ကြက်ဥ တစ်လုံးနှုန်းဖြင့် ပုံမှန် ဥအုပေးနေကြလေသည်။

ဤသို့ ဆိုလျှင် အတော်လေး ကောင်းမွန်လှပေသည်။

အချို့ ကြက်မကြီးများက အလွန် ဥဥကောင်းကြပြီး တစ်နေ့လျှင် ဥနှစ်လုံး သို့မဟုတ် သုံးလုံးအထိပင် ဥအုတတ်ကြလေသည်။

ရွှီယန်တို့ အိမ်တွင် ယခင်က ထိုကဲ့သို့သော ကြက်မမျိုး ရှိခဲ့ဖူးသော်လည်း ထိုကဲ့သို့သော ကြက်ဥများက သိပ်ပြီး စားမကောင်းဟု သူ အမြဲတမ်း ခံစားရလေသည်။

တစ်နေ့ တစ်လုံး သို့မဟုတ် နှစ်ရက် တစ်လုံး ဥသော ကြက်ဥများကသာ အစားကောင်းဆုံး ဖြစ်လေသည်။

ကြက်ပေါက်လေးများ၏ အမွေးများကလည်း တဖြည်းဖြည်း စုံလာပြီး အဝါရောင် နုနုလေးများမှ အနည်းငယ် ပြောင်းလဲလာကြလေသည်။ ဘဲလေးများလည်း ထိုသို့ပင် ဖြစ်ပြီး ယခင်က ဘဲပေါက်လေးများ အဖြစ် ရှိစဉ်က ချစ်စရာ ကောင်းခဲ့သော်လည်း ယခုအခါ အမွေးများက အနည်းငယ် ညိုဝါရောင် သန်းလာပြီး ရုပ်ထွက် အနည်းငယ် ကျဆင်းသွားလေသည်။

ဤဘဲများကို မွေးမြူထားခြင်းက အပျော်သဘော သက်သက်သာ ဖြစ်လေသည်။

ရွှီယန်က ဈေးကွက် အခြေအနေကို သိရှိထားပြီး သူတို့ဒေသရှိ အရွယ်ရောက်ပြီးသော ဘဲတစ်ကောင်လျှင် ယွမ် ၂၅ ခန့်သာ ရှိလေသည်။

သူ၏ ဘဲအကောင် ၄၀ လုံး ကြီးပြင်းလာပါကလည်း ယွမ် ခန့်သာ ၁၀၀၀ ရရှိမည် ဖြစ်လေသည်။

ဈေးကောင်း မရနိုင်ပေ။

ဤသည်မှာလည်း သဘာဝကျလေသည်။ အခြားသူများက ဘဲမွေးမြူရာတွင် တစ်ကြိမ်လျှင် အကောင် ၁၀၀၀ မှ ၂၀၀၀ ခန့် မွေးမြူကြသော်လည်း သူက အကောင် ၄၀ သာ မွေးမြူထားသဖြင့် သေချာပေါက် ပိုက်ဆံ အများကြီး ရနိုင်မည် မဟုတ်ပေ။

ကြက်နှင့် ငန်းများလည်း ထိုသို့ပင် ဖြစ်လေသည်။

ဝက်များကတော့ အနည်းငယ် ငွေရနိုင်ပြီး ဝက်သားက အတော်လေး ဈေးကြီးလေသည်။

ရွှီယန်က လယ်ယာခြံဝင်းမှ ငွေရှာမည့် ကိစ္စကို သေချာစွာ စဉ်းစားရဦးမည် ဖြစ်လေသည်။

မြေကွက် အများအပြား ရှိနေသဖြင့် အားလုံးကို အသုံးချရန် လိုအပ်လေသည်။

ဖန်လုံအိမ်ထဲတွင် ပြောင်းဖူးများမှလွဲ၍ နေရာလွတ် တစ်ခု ကျန်ရှိနေသေးပြီး ရွှီယန်က ပြောင်းဖူးများ ရင့်မှည့်သွားပါက မြေကြီး အားလုံးကို ပြန်လည် ထွန်ယက်ကာ ဘလူးဘယ်ရီများ အားလုံး စိုက်ပျိုးရန် ရည်ရွယ်ထားလေသည်။

ရှစ်နာရီ တိတိတွင် လယ်ယာခြံဝင်းထဲရှိ ကြက်ဖကြီးက တွန်ကျူးလိုက်လေသည်။

ဤအသံကို ကြားရတိုင်း ရွှီယန်၏ ရင်ထဲတွင် အနည်းငယ် ငိုရခက် ရယ်ရခက် ဖြစ်နေမိလေသည်။

လယ်ယာခြံဝင်း တစ်ခုလုံးတွင် သူ အိပ်ရာ အထအနောက်ကျဆုံး ဖြစ်ပြီး အော်ဟစ်နေရဲသေးသည်။

ကြက်ဖကြီးကတော့ လုံးဝ ဂရုမစိုက်ဘဲ အသံကျယ်ကျယ်ဖြင့် အကြိမ်အနည်းငယ် တွန်ကျူးပြီးနောက် ကျေနပ်စွာဖြင့် ဆက်လက် လမ်းလျှောက်နေလေသည်။

နံနက်ပိုင်းတွင် စနစ်မှ ဆုချထားသော မြက်ရိတ်စက်နှင့် ဆိုင်ကယ်တို့ အသီးသီး ရောက်ရှိလာကြလေသည်။

ရွှီယန်က ဆိုင်ကယ်ကို စစ်ဆေးနေပြီး လီဆန်းက မြက်ရိတ်စက်ကို စမ်းသပ်နေလေသည်။

လီဆန်းက အလွန် ပျော်ရွှင်နေပုံ ရလေသည်။

ယခင်က မြက်ရိတ်ရာတွင် မိုင်းရှာစက် ကဲ့သို့သော မြက်ရိတ်စက်မျိုးကို အသုံးပြုခဲ့ရပြီး တုတ်တံကို ကိုင်ကာ ပလတ်စတစ် ကြိုးများဖြင့် မြက်များကို ရိုက်ခတ် ဖြတ်တောက်ရသဖြင့် မြက်ရိတ်ပြီးတိုင်း ရာဘာဖိနပ်နှင့် ဘောင်းဘီများပေါ်တွင် မြက်စများ အပြည့် ပေကျံနေတတ်လေသည်။

လက်တွန်း မြက်ရိတ်စက် ရှိလာသဖြင့် အများကြီး ပိုမို အဆင်ပြေသွားလေသည်။

အနည်းဆုံးတော့ ကျယ်ဝန်းသော မြက်ခင်းပြင်များကို မြက်ရိတ်စက်ဖြင့် တွန်းသွားလိုက်ရုံသာ ဖြစ်လေသည်။

အလုပ်ကြိုးစားသော အလုပ်သမားများက အသုံးပြုရ လွယ်ကူသော ကိရိယာများ ရရှိလာသည့်အတွက် ပျော်ရွှင်တတ်ကြပြီး သဘာဝက ပေးသနားထားသော အလုပ်ကြိုးစားသူများပင် ဖြစ်လေသည်။

ရွှီယန်က ဆိုင်ကယ်၏ အခြေအနေကို စစ်ဆေးကြည့်လိုက်ရာ ဤဆိုင်ကယ်က အလွန် လှပလှပေသည်။

ပုံစံက အလွန် ရိုးရှင်းပြီး သာမန် ဆိုင်ကယ်များနှင့် ဘာမှ မကွာခြားလှသော်လည်း တစ်ကိုယ်လုံး အမည်းရောင် ဖြစ်ပြီး အင်ဂျင်နှင့် အိတ်ဇောပိုက်များသာ ငွေရောင် ဖြစ်နေသဖြင့် ကြည့်ရသည်မှာ အလွန် ခန့်ညားလှပေသည်။

ထို့အပြင် ဆိုင်ကယ်၏ စွမ်းဆောင်ရည်က အလွန် အားကောင်းပြီး ဂျီပီအက်စ် စနစ်လည်း ပါဝင်ကာ ရွှီယန်၏ သော့ဖြင့်သာ မောင်းနှင်နိုင်မည် ဖြစ်လေသည်။

"အစ်ကိုယန်... ပုံမှန်အချိန်တွေမှာ ရိတ်ထားတဲ့ မြက်တွေကို အပြင်မှာ ဒီတိုင်း ပုံထားတာ အရမ်း နှမြောစရာ ကောင်းတယ်"

"ယုန်လေးတွေပဲ ဖြစ်ဖြစ်... သိုးလေးတွေပဲ ဖြစ်ဖြစ်... နွား တစ်ကောင်လောက်ပဲ ဖြစ်ဖြစ် မွေးရင် ကောင်းမယ် ထင်တယ်"

"မြက်တွေကို သူတို့ကို ကျွေးလို့ ရတယ်လေ"

ထိုအချိန်တွင် လီဆန်းက အနီးသို့ လျှောက်လာပြီး ရွှီယန်ကို အကြံပေးလိုက်လေသည်။

ဤသည်မှာ တကယ်ကို ကောင်းမွန်သော အကြံဉာဏ် တစ်ခုပင် ဖြစ်လေသည်။

လယ်ယာခြံဝင်းက ဤမျှ ကြီးမားနေသဖြင့် မြက်များကို အလကား မဖြုန်းတီးသင့်ပေ။

စိုက်ပျိုးမွေးမြူရေး လုပ်ငန်းများတွင် မြက်များကလည်း အရင်းအမြစ် တစ်ခုပင် ဖြစ်လေသည်။

ဥပမာအားဖြင့် မြက်ခင်းပြင် ဒေသများရှိ မြက်ခင်းပိုင်ရှင်များ ဆိုလျှင် နွေနှောင်းပိုင်းတွင် မြက်များ အရှည်ဆုံး အချိန်သို့ ရောက်သောအခါ ဘာမှ လုပ်စရာ မလိုဘဲ မြက်ခင်းပြင်ရှိ မြက်များကို ရိတ်သိမ်းကာ မြက်ခြောက်ပုံများ ပြုလုပ်ပြီး ရောင်းချလိုက်ရုံသာ ဖြစ်လေသည်။

ဝင်ငွေ အလွန် ကောင်းမွန်လေသည်။

"ကောင်းပြီ... နောက်ရက်ကျရင် ကျွန်တော် ဈေးထဲ ထပ်သွားပြီး သိုးပေါက်လေးတွေ နည်းနည်း ဝယ်လာခဲ့မယ်"

"အဲ့ဒီအချိန်ကျရင် သိုးခြံ တစ်ခု နေရာချပေးရမယ်"

"အခု မွေးထားတာတွေက နည်းနည်း ရှုပ်ထွေးနေတယ်... နောက်နှစ်ကျရင် အမျိုးအစားတွေ လျှော့ပြီး အဓိက နှစ်မျိုး သုံးမျိုးလောက်ပဲ မွေးတော့မယ်"

ရွှီယန်က ခေါင်းညိတ်ကာ ပြန်ဖြေလိုက်လေသည်။

လက်ရှိ လယ်ယာခြံဝင်းက အစပြုကာစသာ ရှိသေးလေသည်။

အနီရောင် အုတ်တိုက်... သစ်သား ခြံစည်းရိုး... ကျယ်ဝန်းသော ကွက်လပ်ကြီး... ဖန်လုံအိမ် နှစ်လုံး... ဟင်းသီးဟင်းရွက် စိုက်ခင်း တစ်ခု... ကြည့်ရသည်မှာ အတော်လေး ရိုးရှင်းနေဆဲ ဖြစ်လေသည်။

ဖြည်းဖြည်းချင်း ဖွံ့ဖြိုးတိုးတက်အောင် လုပ်ဆောင်ရမည် ဖြစ်လေသည်။

ယနေ့ အရေးတကြီး လုပ်စရာ ဘာမှ မရှိပေ။

တိုက်တိုက်ဆိုင်ဆိုင်ပင် ဆိုင်ကယ် ရောက်လာသဖြင့် ရွှီယန်က အပြင်ထွက်၍ တိုက်ရိုက်ထုတ်လွှင့်မှု အနည်းငယ် ပြုလုပ်ရန် ရည်ရွယ်လိုက်လေသည်။

ကျော်ကြားမှုရမှတ်များနှင့် တိုက်ရိုက်ထုတ်လွှင့်မှု ဝင်ငွေ အနည်းငယ် ရရှာရန် ဖြစ်လေသည်။

သူက ကျောပိုးအိတ်ကို လွယ်ကာ အထဲတွင် ဒရုန်းကို ထည့်ထားပြီး ဆိုင်ကယ်ကို စီးကာ အပြင်ဘက်သို့ တောက်လျှောက် မောင်းနှင်သွားလေသည်။

တောင်ပေါ်ဒေသတွင် စည်းကမ်းချက်များ သိပ်မများလှဘဲ ဆိုင်ကယ် စီးသူများက ဦးထုပ်ဆောင်းလေ့ မရှိကြပေ။ မည်သို့ပင်ဖြစ်စေ လူအများစုက အလုပ်လုပ်ရန် ထွက်လာကြခြင်း ဖြစ်သဖြင့် ဦးထုပ်ဆောင်းထားရသည်မှာ အဆင်မပြေသောကြောင့် ဖြစ်လေသည်။

ထို့အပြင် တစ်ခါတစ်ရံ ဆိုင်ကယ်များကို လယ်ကွင်းထိပ်တွင် ရပ်ထားခဲ့ပြီး တောင်သူများက လယ်ကွင်းထဲသို့ အလုပ်ဆင်းလုပ်ကြရာ အကယ်၍ ဦးထုပ်ထားခဲ့ပါက အစောကြီးကတည်းက အခိုးခံရမည်မှာ အသေအချာပင် ဖြစ်လေသည်။

တောရွာ ဘဝက အမြဲတမ်း ဤသို့ပင် ဖြစ်လေသည်။

အဘိုးကြီး အဘွားကြီးများ၏ ယုတ္တိဗေဒမှာ ဤသို့ ဖြစ်လေသည်။

"ဒီဦးထုပ်ကို ဒီအတိုင်း ထားထားတော့ မင်း မလိုချင်တော့ဘူး ထင်လို့လေ"

မြို့ပြ လမ်းပန်းဆက်သွယ်ရေးက ရှုပ်ထွေးပြီး ကားများ လူများကာ အခြေအနေများ အများအပြား ရှိသဖြင့် ဦးထုပ်ဆောင်းရန် သေချာပေါက် လိုအပ်လေသည်။

ရွှီယန်က ယနေ့ အလွန် ကြီးမားသော လယ်ယာခြံဝင်း တစ်ခု သို့မဟုတ် တကယ့်ကို ကြီးမားသော လယ်ကွင်းကြီး တစ်ခုသို့ သွားရောက်ရန် ရည်ရွယ်ထားလေသည်။

တောင်ပေါ် တစ်ခွင်လုံး လယ်ကွင်းများ အပြည့် ရှိလေသည်။

ဤကဲ့သို့သော လယ်ကွင်းများကို မြင်တွေ့ရသူတိုင်း စိုက်ပျိုးရေး လုပ်ငန်း၏ ကြီးကျယ်ခမ်းနားမှုကြောင့် အံ့ဩတုန်လှုပ်သွားကြမည်မှာ အသေအချာပင် ဖြစ်လေသည်။

သူက ဆိုင်ကယ်ကို တောက်လျှောက် မောင်းနှင်သွားလေသည်။

မိနစ် ၄၀ ခန့် အကြာတွင် ရွှီယန်က ခရီးဆုံးသို့ ရောက်ရှိသွားလေသည်။

အဝေးသို့ လှမ်းကြည့်လိုက်ပါက အဆုံးအစမရှိသော ဂျုံခင်းများနှင့် စပါးခင်းများက စိမ်းလန်းစိုပြည်နေပြီး အစိမ်းရင့်ရောင်က သစ်တောများထက်ပင် ပို၍ တည်ငြိမ်သော ခံစားချက်ကို ပေးစွမ်းနေလေသည်။

လေတိုက်ခတ်လာသောအခါ စပါးပင်များက လေနှင့်အတူ ယိမ်းနွဲ့နေကြပြီး စပါးခင်းလှိုင်းများက လေ၏ ပုံသဏ္ဌာန်ကို ပုံဖော်ပေးနေသကဲ့သို့ပင် ဖြစ်လေသည်။

ရွှီယန်က ကျောပိုးအိတ်ကို ထုတ်ယူကာ ဒရုန်းကို ဖွင့်ပြီး တိုက်ရိုက်ထုတ်လွှင့်မှု စတင်ရန် ရွေးချယ်လိုက်လေသည်။

ကျော်ကြားမှုရမှတ် အချို့ ရရှာရမည် ဖြစ်လေသည်။

ပစ္စည်းကောင်း အချို့ကို ထပ်မံ မဲဖောက်ရဦးမည် ဖြစ်လေသည်။