အခန်း ၉၄

အခန်း (၉၄) ထင်ယောင်ထင်မှားဖြစ်တာလား... ဘယ်ကနေ သမင်ပြောက်တွေ အများကြီး ရောက်လာတာလဲ

ရွှီယန်သည် လယ်ယာခြံဝင်းရှိ အလုပ်များကို လုပ်ကိုင်ပြီးစီးသွားသောအခါ သမင်ပြောက်ကို လာရောက် ကြည့်ရှုလေသည်။

ဤအကောင်ကြီးသည် နံရံဘေးရှိ အရိပ်ရသော နေရာတွင် အေးချမ်းစွာ လှဲလျောင်း အနားယူနေ၏။

ထိုနေရာ၌ မြက်များ အတော်လေး ထူထပ်သဖြင့် လှဲနေရသည်မှာလည်း သက်သောင့်သက်သာ ရှိလှသည်။

ရွှီယန်သည် လက်ထဲတွင် မုန်လာဥနီ တစ်တောင့်ကို ကိုင်ကာ သမင်ပြောက်၏ အနားသို့ လျှောက်သွားလိုက်သည်။

မုန်လာဥနီကို မြင်လိုက်ရသည်နှင့် သမင်ပြောက်၏ မျက်လုံးများက ချက်ချင်းပင် အရောင်လက်သွားတော့၏။ လူမမာ တစ်ကောင်၏ ပုံစံမျိုး လုံးဝ မပေါက်တော့ချေ။

ရွှီယန်သည် ဆောင့်ကြောင့်ထိုင်ချလိုက်ပြီး မုန်လာဥနီကို သမင်ပြောက်အား ခွံ့ကျွေးလိုက်ရာ ၎င်းက ချက်ချင်းပင် ခေါင်းကို ဆန့်ထုတ်၍ အလောတကြီး လုစားလေတော့သည်။

"စားချင်စိတ်က ဒီလောက်တောင် ကောင်းနေတာ... မင်းက တကယ်ရော လူမမာ ဟုတ်ရဲ့လား"

သမင်ပြောက် မုန်လာဥနီ စားနေသည့် ပုံစံကို မြင်သောအခါ ရွှီယန်က မနေနိုင်ဘဲ ရယ်မောရင်း ပြောလိုက်သည်။

သမင်ပြောက်သည် မုန်လာဥနီ တစ်တောင့်ကို စားပြီးသွားသောအခါ ကြည်လင်နေသော မျက်လုံးဝိုင်းကြီးများဖြင့် ရွှီယန်ကို စိုက်ကြည့်နေ၏။ ကြည့်ရသည်မှာ ထပ်စားချင်နေသေးသည့် ပုံပင်။

ရွှီယန်မှာ ငိုရခက် ရယ်ရခက် ဖြစ်သွားရတော့သည်။

"ကောင်းပါပြီ... နောက်ထပ် နည်းနည်းလောက် ထပ်ယူပေးမယ်"

ရွှီယန်က မုန်လာဥနီ ထပ်ယူရန် ထွက်သွားလိုက်သည်။

လယ်ယာခြံဝင်းထဲတွင် သမင်ပြောက် တစ်ကောင် တိုးလာခဲ့ပြီ ဖြစ်၏။

သမင်ပြောက်၏ အမွေးအမှင်များမှာ အလွန်နူးညံ့ပြီး ကိုင်ကြည့်လိုက်ပါက အလွန် ချောမွေ့နေသည်။

မွေးထားရသည်မှာလည်း အတော်လေး အဆင်ပြေလှပေသည်။

ထို့နောက် ရွှီယန်သည် သမင်ပြောက်ကို ဆေးကုသပေးနေသည့် ဗီဒီယိုကို တည်းဖြတ်ကာ သူ၏ အကောင့်ထဲတွင် တင်လိုက်လေသည်။

ထိုဗီဒီယိုလေးက အလျင်အမြန်ပင် လူများ၏ အာရုံစိုက်မှုကို ရရှိသွားခဲ့၏။

"သမင်ပြောက်လေးက ကြည့်ရတာ အရမ်း သနားစရာကောင်းတာပဲ"

"ဘယ်လိုဖြစ်ပြီး ဒီလောက် ပြင်းထန်တဲ့ ဒဏ်ရာ ရသွားတာလဲ"

"လောင်ရွှီ ပတ်တီးစည်းပေးတဲ့ လက်ရာက အရမ်း ကျွမ်းကျင်တာပဲ"

"ဒီလို ဒဏ်ရာရထားတဲ့ တိရစ္ဆာန်မျိုးက အသက်ရှင်နိုင်ပါဦးမလား"

အင်တာနက်သုံးစွဲသူများ ဤသို့ သံသယဝင်ကြသည်မှာလည်း အပြစ်ဆို၍ မရပေ။ တောရိုင်းထဲတွင် သားရဲတိရစ္ဆာန်များ ပြင်းထန်သော ဒဏ်ရာရရှိသွားပါက အခြေခံအားဖြင့် အသက်မရှင်နိုင်ကြတော့ချေ။

၎င်းတို့တွင် ကောင်းမွန်သော ဆေးဘက်ဆိုင်ရာ အထောက်အပံ့များ မရှိသဖြင့် မိမိဘာသာ အနာကျက်ရန်သာ အားကိုးရပေသည်။ ထို့ကြောင့် အကောင်ကြီးမားသော အမဲလိုက် သတ္တဝါများပင်လျှင် မိမိကိုယ်ကို အလွယ်တကူ ဒဏ်ရာအနာတရ အဖြစ်မခံကြပေ။

ရွှီယန်က ကွန်မန့်များထဲတွင် ဝင်ရောက် ဖြေကြားပေးလိုက်သည်။

"လောလောဆယ်တော့ သမင်ပြောက်က လယ်ယာခြံဝင်းထဲမှာပါ... အခြေအနေက ကောင်းမွန်ပါတယ်... ကျွန်တော် ဆက်ပြီး စောင့်ကြည့်ပေးသွားမှာပါ... ရဲစခန်းကိုလည်း အစီရင်ခံထားပြီးပါပြီ... သမင်ပြောက်က ကျွန်တော့်ဆီမှာပဲ ဆေးကုသမှု ခံယူနေပါတယ်"

ဤကွန်မန့်ကို မြင်လိုက်ရသောအခါ အင်တာနက်သုံးစွဲသူများလည်း အတော်လေး စိတ်အေးသွားကြတော့၏။

လူအများအပြားမှာ အလွန် ကြင်နာတတ်ကြပေသည်။

ဗီဒီယို၏ အသည်းပေးမှု အရေအတွက်မှာ အလွန်များပြားလှပြီး လူများစွာက သူ့ထံသို့ သီးသန့် မက်ဆေ့ချ်ပို့ကာ သမင်ပြောက်၏ အခြေအနေကို သိရှိလိုကြသည်။

မွန်းလွဲပိုင်းတွင် ရွှီယန်သည် လိုက်ဖ်ခဏဖွင့်ကာ သမင်ပြောက်၏ အခြေအနေ ကောင်းမွန်နေကြောင်း အားလုံးကို ပြသလိုက်၏။

ဤအကောင်ကြီးသည် ပုံမှန် သမင်ပြောက်များနှင့် ဘာမျှမကွာခြားသော်လည်း ဝမ်းဗိုက်တွင် ပတ်တီးစတစ်ခု ကပ်နေသဖြင့် လူမမာ ဖြစ်ကြောင်း သက်သေပြနေသည်။

ဤမြင်ကွင်းလေးမှာ အတော်လေး ချစ်စရာ ကောင်းလှ၏။

သမင်ပြောက်၏ စိတ်အခြေအနေမှာ အလွန်ကောင်းမွန်နေပြီး ဒဏ်ရာမှ နာလန်ထူလာပြီဖြစ်ကြောင်း ထင်ရှားလှပေသည်။

ရွှီယန်က နံနက်ပိုင်းတွင် ၎င်းကို စတင်တွေ့ရှိစဉ်က ဤအကောင်ကြီးမှာ အလွန် သနားစရာကောင်းအောင် ငိုယိုနေခဲ့ခြင်း ဖြစ်သည်။

ယခုတော့ ဝမ်းနည်းနေသည့် ပုံစံမျိုး လုံးဝ မရှိတော့ချေ။

ထို့အပြင် ရွှီယန်က သူ့အပေါ် အန္တရာယ်မပြုကြောင်း သိရှိသွားသဖြင့် သတ္တိလည်း ပိုကောင်းလာပြီး တစ်ခါတစ်ရံ လယ်ယာခြံဝင်းအတွင်း ဟိုဟိုဒီဒီ လမ်းလျှောက်နေတတ်ရာ အလွန် စိတ်ဝင်စားစရာ ကောင်းလှသည်။

နောက်ပိုင်း နှစ်ရက်တွင် ရွှီယန်က သမင်ပြောက်၏ ဒဏ်ရာကို အမြဲတမ်း စောင့်ကြည့်ပေးနေခဲ့၏။

နေ့တိုင်း ပတ်တီး အသစ်လဲပေးပြီး ဒဏ်ရာကို အမြန်ကျက်စေသော ဆေးအချို့ကိုလည်း အသုံးပြုပေးခဲ့သည်။

သမင်ပြောက်၏ ဒဏ်ရာမှာ အတော်လေး အမြန်ကျက်သွားပြီး ရောင်ရမ်းလာခြင်းလည်း မရှိချေ။

ထိုနေ့ မွန်းလွဲပိုင်းတွင် သမင်ပြောက်သည် လယ်ယာခြံဝင်းထဲမှနေ၍ ၎င်းဘာသာ သစ်တောထဲသို့ ပြန်လည် ထွက်ခွာသွားခဲ့လေသည်။

မည်သို့ပင်ဖြစ်စေ သစ်တောသည်သာလျှင် ၎င်း၏ အိမ်ဖြစ်သည် မဟုတ်ပါလား။

ဤနေရာတွင် နေထိုင်ခြင်းမှာ ဒဏ်ရာကို ကုသရန်သာ ဖြစ်သည်။

"ပြန်သွားတာလည်း ကောင်းပါတယ်... သူ့ခန္ဓာကိုယ် အတော်လေး ပြန်ကောင်းလာပြီမို့ တောထဲက ဘဝကို အသားကျနိုင်ပြီလို့ ခံစားရလို့ နေမှာပါ"

ရွှီယန်က အဝေးသို့ ထွက်ခွာသွားသော သမင်ပြောက်ကို ကြည့်ရင်း ညည်းတွားလိုက်သည်။

ဒဏ်ရာရနေသော သမင်ပြောက် တစ်ကောင်နှင့် ဆုံတွေ့ရသည်မှာလည်း အတော်လေး စိတ်ဝင်စားစရာ ကောင်းပြီး ချစ်စရာလည်း ကောင်းလှပေသည်။

သို့သော် နောက်ဆက်တွဲ ဖြစ်ပေါ်လာသော ကိစ္စများမှာမူ ရွှီယန် မျှော်လင့်ထားသည်ထက် အများကြီး ပိုလွန်သွားခဲ့လေသည်။

ထိုနေ့ ညဘက်တွင် ရွှီယန်မှာ တစ်နေ့လုံး အလုပ်များထားသဖြင့် အနည်းငယ် ပင်ပန်းနေကာ စောစောစီးစီးပင် အိပ်ရာဝင်ခဲ့၏။

နောက်တစ်နေ့ နံနက် ၇ နာရီခွဲခန့်သို့ ရောက်သောအခါ သူသည် အိပ်ရာမှ ထကာ အဝတ်အစားများကို သေချာဝတ်ဆင်ပြီး အိပ်မှုန်စုံမွှားဖြင့် ခြံဝင်းထဲသို့ ထွက်လာခဲ့သည်။

နံနက်ခင်း၏ လေအေးလေးကို ရှူရှိုက်လိုက်မှသာ လူက မြန်မြန် လန်းဆန်းသွားနိုင်ပေသည်။

အိပ်မှုန်စုံမွှား အခြေအနေတွင်ပင် ရွှီယန်သည် သမင်ပြောက် တစ်ကောင်က ခေါင်းစောင်းကာ သူ့ကို ကြည့်နေသည်ကို မြင်လိုက်ရ၏။

သူက အနောက်ဘက်သို့ လှမ်းကြည့်လိုက်ရာ အနောက်တွင်လည်း သမင်ပြောက် ခုနစ်ကောင် ရှစ်ကောင်ခန့်က ခေါင်းများကို စောင်းကာ သူ့ဘက်သို့ ကြည့်နေကြသည်။

သမင်ပြောက်များ အားလုံးက ပုံစံတူများသာ ဖြစ်နေကြ၏။

ရွှီယန်မှာ ချက်ချင်းပင် ကြောင်အသွားတော့သည်။

'ဒါ ဘာအခြေအနေကြီးလဲ'

'ထင်ယောင်ထင်မှား ဖြစ်နေတာလား'

'အမြင်တွေ နှစ်ထပ် ဖြစ်နေတာလား'

'ဘယ်ကနေ သမင်ပြောက်တွေ ဒီလောက်အများကြီး ရောက်လာတာလဲ'

လယ်ယာခြံဝင်း၏ နောက်ဘက်ဧရိယာကို ခြံစည်းရိုး ကာရံထားသော်လည်း အရှေ့ဘက် နေထိုင်ရာ ဧရိယာတွင်မူ တံခါးမရှိသဖြင့် အရှေ့ဘက်မှနေ၍ တိုက်ရိုက် ဝင်လာ၍ ရပေသည်။

ဧက ၁၁၀ ကျော် အကျယ်အဝန်းကို အကုန်လုံး ခြံစည်းရိုး ကာရံရန် ဆိုသည်မှာလည်း လက်တွေ့ မကျလှပေ။

သမင်ပြောက်များသည် ခြံစည်းရိုးကို ကွေ့ပတ်ကာ နေထိုင်ရာ ဧရိယာထဲသို့ တိုက်ရိုက် ဝင်ရောက်လာကြခြင်း ဖြစ်သည်။

ရွှီယန်မှာ ချက်ချင်းပင် လန်းဆန်းသွားတော့၏။

သူက မျက်လုံးများကို ပွတ်သပ်ကာ သေချာစွာ ကြည့်လိုက်သည်။

တကယ်ပင် သမင်ပြောက်များ ဖြစ်နေပြီး အကောင်ရေ အများအပြားပင် ဖြစ်၏။

အားလုံးက တောင်အောက်သို့ ဆင်းလာကြခြင်းပင်တည်း။

ထိုအချိန်တွင် ဝမ်းဗိုက်၌ ပတ်တီးစည်းထားသော သမင်ပြောက်က ရွှီယန်၏ ရှေ့သို့ ဖြည်းဖြည်းချင်း လျှောက်လာလေသည်။

၎င်း၏ အနောက်ရှိ ကျန်သမင်ပြောက်များကမူ ဤမြင်ကွင်းကို သတိကြီးစွာနှင့် စပ်စုချင်စိတ်များဖြင့် ကြည့်နေကြ၏။

၎င်းတို့ အားလုံးမှာ ဒဏ်ရာရထားသော သမင်ပြောက်က ခေါ်လာခြင်းဖြစ်ပြီး တိရစ္ဆာန်များ အချင်းချင်းကြားတွင် ကိုယ်ပိုင် ဆက်သွယ်မှု နည်းလမ်းများ ရှိကြပေသည်။

ဒဏ်ရာရထားသော သမင်ပြောက်သည် ရွှီယန်၏ ရှေ့တွင် ရပ်ကာ ခေါင်းကို ဆန့်ထုတ်၍ ရွှီယန်အား ညင်သာစွာ လာရောက် ထိတွေ့လေသည်။

ထိုအဓိပ္ပာယ်က ဤသို့ ပြောနေသကဲ့သို့ပင်။

'အစ်ကိုကြီး... ကျွန်တော့် သူငယ်ချင်းတွေ အကုန်လုံး ရောက်လာကြပြီ... ကျွန်တော့်ကို အရှက်မကွဲစေနဲ့နော်'

ရွှီယန်သည် သတိပြန်ဝင်လာပြီး မျက်စိရှေ့ရှိ မြင်ကွင်းကို လက်ခံလိုက်တော့သည်။

သူက ဖုန်းကို ထုတ်ကာ သမင်ပြောက်များကို ဗီဒီယို စတင် ရိုက်ကူးလိုက်ပြီး ရှင်းပြလိုက်၏။

"တကယ်ကို လွန်လွန်းတယ်ဗျာ... အိပ်ရာက နိုးလာတော့ ခြံထဲမှာ သမင်ပြောက်တွေ အများကြီး ပေါက်နေတယ်"

"အကောင်ရေ အများကြီးပဲ"

"အားလုံးက ဟိုတစ်ကောင် ခေါ်လာတာတွေချည်းပဲ"

"ကျွန်တော် အခန်းထဲက ထွက်လာတော့ ကြောင်တောင်တောင်တောင် ဖြစ်သွားတယ်"

ဪဪ

"ထင်ယောင်ထင်မှား ဖြစ်နေတာလို့တောင် ထင်လိုက်တာ"

"တကယ်ကြီး သမင်ပြောက်တွေချည်းပဲဗျာ"

ရွှီယန်က အနောက်မှနေ၍ ရှင်းပြနေပြီး အသံထဲတွင် ပေါ့ပါးသော ရယ်သံများလည်း ပါဝင်နေ၏။

ဤလယ်ယာခြံဝင်း ဖွင့်ရသည်မှာ တကယ်ကို စိတ်လှုပ်ရှားစရာ ကောင်းလှပေသည်။

မည်သူကများ ဤကဲ့သို့သော အရာများနှင့် ကြုံတွေ့ရလိမ့်မည်ဟု ထင်မှတ်ထားမည်နည်း။

ကံကောင်းသည်မှာ ယမန်နေ့ကမှ မုန်လာဥနီများ အများအပြား ဝယ်ထားခဲ့ခြင်းပင်။ သူတို့ဒေသရှိ မုန်လာဥနီများကို လယ်သမားများက ကိုယ်တိုင် စိုက်ပျိုးကြခြင်းဖြစ်ပြီး ဤရာသီတွင်လည်း အများအပြား ထွက်ရှိကာ အလွန်လည်း ဈေးပေါလှသည်။

ရွှီယန်သည် မီးဖိုချောင်ထဲသို့ တန်းတန်းမတ်မတ် ဝင်သွားပြီး မုန်လာဥနီ တစ်အိတ်လုံးကို သန့်စင်အောင် ဆေးကြောလိုက်သည်။

ထို့နောက် ပြန်ထွက်လာကာ သမင်ပြောက်များကို တစ်ကောင်ပြီး တစ်ကောင် အစာကျွေးရန် ပြင်လိုက်၏။

မြင်ကွင်းမှာ အလွန် လွန်ကျူးနေသဖြင့် ရွှီယန်က ဒရုန်းကိုပါ ဖွင့်ကာ တိုက်ရိုက် လိုက်ဖ်လွှင့်လိုက်ပြီး လမ်းကြုံ ဗီဒီယိုပါ ရိုက်ကူးထားလိုက်သည်။

ထိုအချိန်တွင်...

ရွှီယန် လိုက်ဖ်ဖွင့်လိုက်သည်ကို ပရိသတ်အချို့က တွေ့ရှိသွားပြီး ချက်ချင်းပင် ဝင်ရောက် ကြည့်ရှုကြလေသည်။

လိုက်ဖ်ထဲသို့ ဝင်ဝင်ချင်းမှာပင် ပရိသတ်များမှာ ချက်ချင်း ကြောင်အသွားကြတော့၏။

'ဘာအခြေအနေကြီးလဲ'

'ဒါ ဘယ်နေရာလဲ'

'ဘယ်ကနေ သမင်ပြောက်တွေ ဒီလောက်အများကြီး ရောက်လာတာလဲ'

'လိုက်ဖ်ထဲ ဝင်တာများ မှားသွားတာလား'

ပရိသတ်များက တိရစ္ဆာန်ရုံ တစ်ခုခု၏ လိုက်ဖ်ထဲသို့ ရောက်သွားသည်ဟု ထင်မှတ်သွားကြပြီး သေချာ ကြည့်လိုက်သောအခါမှ ရွှီယန်၏ လယ်ယာခြံဝင်းလေး ဖြစ်နေကြောင်း သိလိုက်ရတော့သည်။

'သမင်ပြောက်တွေက ဘယ်က ရောက်လာတာလဲ'

"လောင်ရွှီ... မင်းက သမင်ပြောက်တွေပါ မွေးထားတာလား"

လူအချို့က ချက်ချင်းပင် မေးမြန်းကြလေသည်။

"ဟိုက်... သမင်ပြောက်တွေ ဒီလောက်တောင် များတာလား"

"မနက်စောစောစီးစီး လိုက်ဖ်ဖွင့်တယ်ပေါ့... အရမ်း ကြိုးစားတာပဲ"

"တကယ်ပဲ ခင်ဗျားပဲ... သမင်ပြောက်တွေက ဘယ်က ရောက်လာတာလဲ"

အားလုံးက သမင်ပြောက်များနှင့် ပတ်သက်၍ အတော်လေး စပ်စုချင်နေကြ၏။

ရွှီယန်က သမင်ပြောက်များကို တစ်ကောင်ပြီး တစ်ကောင် အစာကျွေးနေရသဖြင့် အလုပ်များနေသည်။ မုန်လာဥနီများကို လှီးဖြတ်ရန်ပင် မလိုဘဲ တစ်ကောင်ကို တစ်တောင့် တိုက်ရိုက် ပေးလိုက်ရုံသာ ဖြစ်၏။

သူက အစာကျွေးရင်းဖြင့် ပြောလိုက်သည်။

"ပြောပြရင် ခင်ဗျားတို့ ယုံချင်မှ ယုံမှာ... ကျွန်တော်လည်း သူတို့ ဘယ်ကရောက်လာမှန်း မသိဘူး"

"မနက် မျက်လုံး ဖွင့်လိုက်တော့ ခြံထဲမှာ သမင်ပြောက်တွေ အပြည့်ပဲ"

"ကျွန်တော်တောင် နည်းနည်း ကြောင်သွားတယ်"

"ဟိုအကောင်ကြီး ခေါ်လာတာ နေမှာပါ"

"ဒါကတော့ အစာတောင်းဖို့ နေရာလာရှာတာပဲ"

ရွှီယန်၏ စကားကို ကြားသောအခါ အင်တာနက်သုံးစွဲသူများမှာ ချက်ချင်းပင် ငြိမ်မနေနိုင်တော့ချေ။

"ဟာ... ခြံထဲမှာ သမင်ပြောက်တွေ ပေါက်နေတာလား"

"ဟားဟား... သူတို့က ရေရှည် ထမင်းစားလက်မှတ် လာရှာတာပဲ"

"သမင်ပြောက်က... ကယ်ထားပြီးမှတော့ တစ်သက်လုံး မွေးထားပေးရမယ် လို့ ပြောနေတာ"

"လောင်ရွှီရဲ့ လယ်ယာခြံဝင်းကို တိရစ္ဆာန်တွေက အရမ်း သဘောကျကြတာပဲ... မြေခွေးတွေလည်း နေ့တိုင်း ရောက်လာကြတယ်လေ"

အင်တာနက်သုံးစွဲသူများ ပြောသည့်စကားမှာ တကယ်ပင် ကွက်တိကျနေပေသည်။

တိရစ္ဆာန် အများအပြားမှာ တစ်ခေါက် ရောက်ဖူးပြီးနောက် ရွှီယန်ထံသို့ လာရသည်ကို အလွန် သဘောကျသွားတတ်ကြ၏။

မြေခွေးပေါက်လေး သုံးကောင်မှာလည်း ဤသို့ပင်ဖြစ်ပြီး ယခုအခါ သမင်ပြောက် တစ်အုပ်ကြီးပါ ထပ်ရောက်လာပြန်သည်။

ရွှီယန်ကတော့ ဂရုမစိုက်လှပေ။ သူ့ထံတွင် အစားအစာများ မရှားပါးချေ။

မုန့်များ၊ ဟင်းသီးဟင်းရွက်များနှင့် အခြားအရာများမှာ ဤဘက်တွင် အလွန် ပေါများလှသည်။

ရွာထဲရှိ မုန်လာဥနီများကိုလည်း ကားများဖြင့် အပြည့်တင်ကာ အပြင်သို့ သွားရောင်းကြသည်ဖြစ်ရာ မိမိဘာသာ တစ်စီးစာ သွားယူလိုက်လျှင်ပင် ရနိုင်ပေသည်။

"ကုန်ပြီ... ကုန်ပြီ"

"မျက်နှာကို ဟိုဘက် နည်းနည်း ရွှေ့ကြပါဦး"

သမင်ပြောက် အကောင်ရေ အများအပြားက တစ်ပြိုင်နက်တည်း အနားသို့ တိုးကပ်လာကြရာ ချစ်စရာ ကောင်းသော်လည်း အရေအတွက်က အနည်းငယ် များလွန်းနေ၏။

ရွှီယန်က အနားသို့ တိုးလာသော သမင်ပြောက်များ၏ မျက်နှာကြီးများကို တွန်းဖယ်ရင်း ပြုံးကာ ပြောလိုက်သည်။

မုန်လာဥနီ တစ်အိတ်လုံးကို အကုန်အစင် စားသောက်သွားကြပြီ ဖြစ်၏။

ဤသမင်ပြောက်များ၏ စားနိုင်စွမ်းမှာ အလွန် အားကောင်းလှပေသည်။

"ကုန်ပြီ... လူစုခွဲကြတော့"

"တောထဲ ပြန်ကြတော့"

ရွှီယန်က လက်ကာပြလိုက်သည်။

ဤသမင်ပြောက်များ အားလုံးက သူ့ကို ဝိုင်းကြည့်နေကြပြီးနောက် သူပြောသည့် စကားကို နားလည်သွားသကဲ့သို့ တစ်ကောင်ပြီး တစ်ကောင် အပြင်သို့ ထွက်ပြေးသွားကြကာ စုရုံး၍ ပြေးထွက်သွားကြတော့၏။

၎င်းတို့၏ လှုပ်ရှားမှုများက အလွန် သွက်လက်ပေါ့ပါးပြီး တစ်ခုန်ချင်း ခုန်ပေါက် သွားကြလေသည်။

ဒဏ်ရာရထားသော သမင်ပြောက်မှာမူ ကျန်ရစ်နေခဲ့၏။

"မင်းက အိမ်ပြန်သွားပြီ ထင်နေတာ... လူသွားခေါ်တာကိုး"

"မင်းက တော်တော် အလိုက်သိတာပဲ... မင်းက ဖိတ်ကျွေးပြီး ငါက ပိုက်ဆံရှင်းရတယ်ပေါ့"

ရွှီယန်က ၎င်းကို ကြည့်ကာ မနေနိုင်ဘဲ ပြုံး၍ ဆူပူလိုက်သည်။

သို့သော် သူက အများကြီး အပြစ်တင်လိုသည့် သဘောမျိုးတော့ မရှိချေ။

မနက်စောစောစီးစီး ဤမြင်ကွင်းလေးကလည်း အတော်လေး စိတ်ဝင်စားစရာ ကောင်းပြီး ရိုးရှင်းလှသော လယ်ယာခြံဝင်း ဘဝလေးထဲသို့ အံ့သြပျော်ရွှင်မှုများ အများအပြား ယူဆောင်လာပေးခဲ့သည် မဟုတ်ပါလား။

ရွှီယန်က လိုက်ဖ်ကြည့်နေသည့် အင်တာနက်သုံးစွဲသူများကို နှုတ်ဆက်လိုက်ပြီးနောက် လိုက်ဖ်ကို ပိတ်လိုက်သည်။

လိုက်ဖ်ကို ပိတ်လိုက်သော်လည်း ဗီဒီယိုမှာ ချက်ချင်းပင် တည်းဖြတ်၍ တင်ဆက်ခံရတော့၏။

ယခုအခါ ရွှီယန်မှာ ဖော်လိုဝါ တစ်သန်းကျော်ရှိသော လိုက်ဖ်လွှင့်သူ တစ်ယောက်ဖြစ်ရာ အတော်လေး နာမည်ကြီးနေပြီ ဖြစ်သည်။

သူနှင့် တိရစ္ဆာန်များ အပြန်အလှန် ဆက်သွယ်သည့် ဗီဒီယိုများမှာ အသည်းပေးမှုနှင့် ကြည့်ရှုသူ အရေအတွက် အမြဲတမ်း အလွန်များပြားလေ့ ရှိ၏။

ထို့ကြောင့် မားကတ်တင်း အကောင့် အများအပြားက သူ၏ ဗီဒီယိုများကို သီးသန့် တည်းဖြတ်လေ့ရှိကြပြီး တစ်ယောက်က တည်းဖြတ်လိုက်ပါက လူအများအပြားက လိုက်လံတည်းဖြတ်ကြသဖြင့် ဗီဒီယိုမှာ ပို၍ပင် နာမည်ကြီးသွားတော့သည်။

ရွှီယန်က မနက်ခင်းက ကိစ္စမှာ အလွန် စိတ်ဝင်စားစရာ ကောင်းသည်ဟု တွေးမိ၏။

သမင်ပြောက် တစ်ကောင်ကို ကယ်တင်လိုက်ရာ မနက်ခင်းတွင် သမင်ပြောက် တစ်အုပ်ကြီး ရောက်လာလိမ့်မည်ဟု မည်သူက ထင်မှတ်ထားမည်နည်း။

လယ်ယာခြံဝင်းသို့ လာပြီး အဖွဲ့လိုက် စားသောက်ကြခြင်းပင်။

ရွှီယန်က ဒဏ်ရာရထားသော သမင်ပြောက်၏ ခေါင်းကို ပွတ်သပ်ပေးလိုက်သည်။

ဤအကောင်ကြီး၏ သမင်ချိုမှာ အလွန်လှပပြီး အခက်အလက်များစွာ ရှိကာ ပုံသဏ္ဌာန်မှာလည်း ထူးခြားလှ၏။

တောင်ပေါ်မှ လူချောလေး တစ်ယောက်ပင် ဖြစ်သည်။

"မင်းကို နာမည်တစ်ခု ပေးရမယ်... ရှောင်မေးဟွာ လို့ပဲ ခေါ်ကြစို့"

"မင်းက တကယ်ကို ပြဿနာရှာတတ်တာပဲ"

ရွှီယန်က ပြုံးရင်း ၎င်းအား ပြောလိုက်သည်။

ရှောင်မေးဟွာ၏ မျက်လုံးများမှာ ကြည်လင်ပြီး တုံးအအ ဖြစ်နေဆဲပင်။

သို့သော် ရွှီယန်က ကယ်တင်ပေးခဲ့ပြီးနောက် ၎င်းသည် ရွှီယန်အပေါ် အလွန် ယုံကြည်နေပြီ ဖြစ်သည်။

လယ်ယာခြံဝင်းတွင် စားစရာ ဪဪ မည်သူက မကြိုက်ဘဲ နေမည်နည်း။

၎င်းက မိမိဘာသာ အထဲသို့ ဝင်သွားပြီး လယ်ယာခြံဝင်းအတွင်း မြက်ခင်းပြင် တစ်ခုကို ရှာကာ လှဲလျောင်း အနားယူနေပြန်၏။

ရွှီယန်သည်လည်း ၎င်းသဘောအတိုင်းသာ လွှတ်ထားလိုက်လေတော့သည်။